نقطة تحول .. بداية الهداية ..



مرت الحياة وبعد مرور يمكن اقل من شهر

خلص الحشيش .. وانتهت فلوسي .. مافي سم وانا كنت طفشان ابي ارتاح

رحت للموزع < ما احب اسميه بتسميات اخرى

وقلت له ابي حشيش بس ما معي فلوس

قال تعال معاي

ركبت سيارته وسقت انا هو ما كان قادر يسوق

مشينا

شوي قال : انا جوي مو زي جوك .. وطلع سيجارة وقال : تجرب معاي ..؟

اخذتها وطبعا ضميري واقف بعيد يتفرج يائس مني

جربت كم مره معاه

اوووف كانت اكبر مما كنت استخدمه باضعاف

صداع .. دوخة حتى الغثيان حسيت فيه

كنت اسوق

وهو طفى فجأة .. لكن انا لااازم اوصل البيت بسرعه

انام وفجأة استوعب اني بالسيارة

اقوم مفجوع

وكذا لييين كملت الطريق لبيته

اعوذ بالله كرهت نفسي كثير بس مثل ذالك اليوم لااا ولا بيصير

وقفت ورميته ببيته

وروحت

وصلت البيت ندمان وتعباان

حلقي جاف

ما قدرت امشي كملت على اطرافي الاربع لين وصلت غرفتي

عطشششان

رحت المطبخ بشرب

ولقيت امي جالسة تنتظرني بالصالة

للان امي ما تعرف اني استخدم الحشيش حدها الدخان

..



حسيت انها النهاية

ببكي .. مليان ذنوب .. ثقل المعصية اتعبني ..

سالتني امي .. وش فيك ..؟

قلت لهاا عطشان

ودي افضفض لها وخايف عليها كفاية اتعبتها كثير

وقتها احارب نفسي

لين لقيتني لا شعوريا جلست وحطيت راسي على رجولها

قالت وش فيك ..؟

رديت عليها بس بـ : الدنيا فوق راسي ..!

قالت : شوف هذا .. ورفعت يدها

( نقلوا الجهاز من رقبتها ليدها )

شفت مثل الزجاج لما نرمي عليه حجر كيف يتشطب ..؟!

زي كذا مكان الابرة والعروق حولها

وقوة التركيز صارت اعلى فصرت والله ما اشوف الا يدها

والعروق البارزة

تعمقت وحسيت اني اشوف حتى دمها وهو يجري في اوردتها

: هذا بسببك ..

قالتها ..!!

ابكي .. ايوالله بكيت وانا اقول : هذا مني انا

قالت : تعبتني كثير .. تركت الدراسة ولا ادري عنك ..!

قلت لها : امي وش اسوي ..

قالت : كل همومك انثرها على سجادتك .. صلي .. خل قلبك يتكلم

قمت بعد كلامها ونزلت وانا ابكي

خفت احد يشوفني توضيت وصليت ولازال تأثير الحشيش

سجدت ولا عرفت وش اقول



لذة ايمانية

..

جا اليوم الثاني ما قدرت انام

صورة امي ما تفارقني

انتظرت لليل

ومروني عيال الحارة

قالوا : تعال اسهر معنااا زمان عنك يا ابن الحلال

قلت لهم : اسسسف عندي موعد

وما بين سخرية وشماته انقلعوا عني

جات الساعه 1 الليل وانا كل اللي ببالي كلمة امي وهي تقول ( خل قلبك يتكلم )

جاء الموعد مع ربي

جا الوقت اللي افضفض فيه ولا احد يمسك علي زلتي

ربي اعلم بحالي ونيتي

ووالله العظيم للان ومهما سويت مستحيل احس بلذة مثل اللي ذقتها وقت تلك الصلاة

سجدت وابتديت بنثر شكواي لربي

بكيت وندمت واستغفرت

طلعت حق الثمان سنوات كككلها اللي راحت علي

حسيت اني خفيييييف

ارتحت والله ارتحت ولان ربي هو اللي معاي ارتحت

انتهيت وقلت لازم اصلح غلطتي

..

تنظيف الحاضر

..

رحت لامي وقلت لها : اذا انا سبب فشل كليتك تراي رحت المستشفى وسالت

وقالوا اقدر اتبرع لك بكلية

ناظرتني وقالت : انت دمك فاسد كله دخان وبتتبرعلي ..؟

فعلا وقتها كانت على حق

وبديت احط لي هدف اخر بعد توبتي اتوب كمان من الدخان

مرت 3 شهور وانا احاول ولا فائدة تذكر

كل ما شميت ريحته رجعت ولا كاني نويت اتوب

لين قلت بنفسي الله هو قادر على حل مشكلتي

وفعلاا قمت اخر الليل ودعيت من قلبي

واكثر شي كنت اكرره " ربي 8 سنوات ادخن وما لقيت الراحة ..

يا رب انت ترزقني المال الحلال وانا ادمر به نفسي

يا رب اعطيتني جسمي امانه وانا خذلتها "

والله خير معين

بعدها وكلت امري لله



الدعاء يحقق المعجزات

..

من كثر ما يئست شريت باكيت دخان

وطلعت الاولى بكل ثقة بأتسممبها

سحبت هواء منها للمرة الاولى

وفجأة وقفت بحلقي

وكحيت باقوى شي ليين دمعت عيوني

وحسيت اني برجع

اخذت هواء نقي وتنفست شوي وما تبت فكرت اعيد التجربة

وعدتها ونفس الطريقة

قلت خلني اتركها ساعه واجرب

وفعلااا بعد ساعتين ولعتهاا < الشيطان ما ييأس

واخذت منهاا ( السيجارة )

وكحيت من قلللب لين رجعت وحسيت ان معدتي بتخرج كمان

مدري ليه حسيت بفرحة

رميته وانا ببكي من السعادة

روحت البيت

ودخلت المجلس ولقيت اخوي + عيال خالي + ولد اخوي وكككلهم يدخنون

وقلت وانا فرحان : باركولي شباب لي يوم كامل ما دخنت

اخوي .. رمى الباكيت علي

وولد خالي .. رمى علي خمس ريا قال روح حبيبي اشتري دخان وتعال هيص معنا

اما ولد اخوي الشيطان المتشكل ببشر

جاب لي السيجارة مولعه جاهزة وقال : خذ جرب

تقوى علي الشيطان لحظتها

وفعلا اخذتها ومن المرة الاولى وقفت بحلقي وقمت اكح قدامهم

طلعت الشارع وبديت ارجع واطفي السيجارة ووالله اني ارجع وانا ابكي من الفرحة




ما بعد الهداية
.


ومن بعدهاا مرت 3 شهور وانا اعاني من اثار خروج النيكوتين من جسمي

لكن والله كل شي له لذة دامها في طاعة الله

رحت لامي وقلت لها : الان دمي نظيف يمه اقدر اتبرع لك

قالت : يا ولدي انت باقي شباب وانا ربي قدر علي ها المرض

كنت قبل فترة تعاني انت كمان من كليتك

خلها لك والله يجزاك الخير كله

وفعلااا بعد فترة جات لامي كلية جاهزة مطابقه لدمها لكنها رفضت

مرت الايام وانا عندي امي بالدنيا كلها واجاهد في طاعة الله

واقطع كل سبل الشيطان

ماتت الله يرحمهاا ويتقبل منها

وانقفل باب لي من ابواب الجنة

..

شفت امي باحلام كثيرة تبشرني انها بخير ولله الحمد

ولا زلت اشوفها ويارب نتقابل انا واياها على منابر من نور بالجنة ..





النهاية


نصيحتي لكل من يقرأ كلامي او يعرف قصتي

لا تنتظروا مصيبة عشان تصحوا من غفلتكم

والله الالم اشد واقوى ابدأو من الان التغيير

جددوا توبتكم رحمة ربي واسعه ..

حافظوا على الصلاة فوالله الكثير من المواقف كنت بأنفمس فيها لولا رحمة الله

ثم الصلاة



كل من عنده ام .. انت عندك نهر جاري من الحسنات استغله قبل لا يجف

فوالله بيجي يوم تتمنى جلسه معاها هواشها عليك .. توبيخها لك ما تلقاه

..





اسفة على الاطالة

هذي يدي لا تعمقت في الوصف محد يوقفها

كل ماتذكر دموعه وهو يحكيني

احس اني لازم اوصل الشعور نفسه

اسأل الله له القبول في الدنيا والاخرة

..

ما جبت من عندي اي زيادة

صاحب القصة اعطاني رؤس الاقلام

وترك مهمة السرد علي

هذي مشاركتي في اول مسابقة ادخلها في حياتي

دعواتي لكم