ارحل بصمت لا ترجع ولا تلين
بعض الأفعال ماتبغى شجاعة !

أنت جالس تحرّى دمعة العين ؟
كثرة جروحك أعطتني مناعة !

لاتودّع ولاتترك عناوين
وش بتنفع حبيبك في وداعه ؟

صوت لحن الفراق يضايق الحين
وباكر القلب يتعوّد سماعه

لو خذتك الليالي بأشكي لمين ؟
سود الأيام ماتقبل شفاعة !

والبشر كلهم صاروا محبّين
مابقى شخص يمنحني ذراعه

قد تعوّدت أسولف للحزن لين
صرت أحسّه أخوي من الرضاعة !

هات فرقاك والأوضاع بتزين
منت أول حبيب أخشى ضياعه

بس قبل أفقدك وأقابل البين
ودّي اسألك من قبل القطاعة :

ليه وقت الغياب يطوّل سنين ؟
وليه دايم لقانا نصف ساعة ..!






عبدالرحمن الرويس