(أبن الرافدين )
قصيدة حصرية لمنتديات العاااااشق
بقلم الشاعر
أحــــــــمــــــــد الــــــــرحال
بيش تريد أذكرك أذا فد يوم ناسيهن
عهد خوتنا أني وياك أولهن وتاليهن
بيش تريد ابدي بالخبــز والزاد
لو ماصخ ملحي وطــعم ما بيهن
لو من زرعولك العبوات تالي الليل
وظل سهران كل الليل وعيوني ابجيهن
دم مو دمع تبجي عليك العين
مثــل الخبل جيتك عــلى تاليهن
بيش تريد اذكرك وانتة يا ابن الناس
اخوية حزام ظــهري تــالي ناسيهن
طعناتك بظهري بيوم اردهن ليك
دنيــلي شليلــك وانــتة عبيهن
روح اقرة الاخوة وعيد الحسابات
واتحـــداك اتحداك اذا تگدر تجازيهن
عفتني من طحت حسبت لا ما گوم
طــيور بالسما الصياد ياذيهن
بيش تريد اذكرك من جنت مديون
واني افـتر عليهن بيدي اوفيهن
لاتغرك النجمة انشالن بشلفان
ولبسوهن اعفونه وانـت تدريهن
ايدك عالجرح وبگلبي تشب النار
چنت اصورك انتة الــتداويهن
أخوية العگر بيه وطعنتة بظهري
يا حيفي اعليه يضحك اذا يجناب طاريهن
جزى المعروفي منك ما شفت فد نوب
لان طبعك غدر ما تگدر تجازيهــن
بيش تريد اذكرك واني كلي جروح
جروحي ما برت ملحك طفة عليهن
بيش تريد اذكرك وبياهي ابدي وياك
وطعناتك جزن لك وين اوديــهن
شسمي الغدر بقاموسك شمكتوب
صداقا لو وفة مدري شتســميهن
هم تدري الصديق اخ ما ولد من ام
يتالم يعاني ينكسر وجروحك يداويهن
كل الناس تشهدلك بطل بس مو بطل تحرير
واني اشهدلك بطل بسهامك التهديهن
الصداقة ...
مو لبس ويعجبك من تريد تروح
من ترجع تنزعه او وين ما حبيت ترميهن
الصداقة انبل او اطهر واسئل العراف
واتعلم ترة مو عيب تتعلم معـانيهــن
وربطلك چلب وشوف الاطباع البيه
أمين ويوفي للرباه وافضالك يجــازيهن
ولاتأمن الواوي ولا تصدك بــيه
يغدر بيك لو عشرة شمع تشعل يطفيهـن
بيش تريد اذكرك گلي يا ابن الناس
اذا تذكــرهن انتة اليوم احـجــيهن
ما اقبل بخوتك يالبعتني بساع
مشاعر خوتي مو للبيع وبالمازاد تــشريهن
اني ويا الصديق اوف او ابيع الروح
ومن عمري العمرة اسنين انطيهن
واصيرله درع لو واحد ايدانيه
وضلوعي جسر الرجـليه اسويهن
بيش اتريد اذكرك وانتة تعرف زين
اني اسمى من تهم تلفقهن وتحجـيهن
وراسي دوم ارفعة بيك وبلياك
وايامك صفن ضلمات ما نارت لياليهن
وحق الي رفعهن سبعة متعليات
وانجــــومة بالسما محد يـدانيهن
دولة وعلم للخوة اضل يفلان
وعهد خوتنا اني وياك اولهن وتاليهن
بقلم الشاعر
احـــمــــد الـــــــــرحـــــــــال
©تحياتي ©
© اداويـﮯ© جروحيـﮯ©بروحيـﮯ©