تريد الحقيقة؟
....
نازل على حمص هاليومين بركي بشوف أخي صرلي فترة مامريت قلت لحالي هلا بنتخي من زمان قبل بفترة كنت غيب لسى اكتر بس هلأ كل ماحضرت أخبار فوراً بتذكر نازل شوف أخي الموالي وأخي المعارض وأخي الحيادي وأخي لي رأيو على غيرو فارض نازل شوف أخي ضابط الأمن أخي المتظاهر شوف أخي الفقير والغني المهتم بالمصاري نازل شوف أخي المتطرف وأخي العلماني وشوف كل واحد حامل البلد عكتافو اماني نازل شوف أهلو لأخي لي مات شهيد بركي بقدر واسي كل حدا ماقدر ينبسط بالعيد نازل ناقش أخي السياسي المخضرم بامتياز وأخي لي بكم شهر تعلم سياسة قمة الأنحياز نازل شوف العيلة الكبيرة لي ولادها تربو سوا نازل أعرف ليش غيمت هيك ليش تغير الهوا ؟
نازل بدي شوف السوق والساعة العتيقة وبعدها رايح على الحضارة وشوارع الحميدية الضيقة نازل عطريق الشام بركي بمر صوب البيت جاي عبالي شوف الحارة محل ماأنا تربيت ... محل ماكنا نلعب بالطابة وقت لي كنا ولاد أنا والياس مع حيدر وأحمد وعماد نازل بدي شوف أبو مازن الخضرجي يلي بيحكيلي كلشي صار بس لما اجي ... بعدها ناوي أقعد بالروضة ألعب شدة مع الشباب محل مالعالم كلهون صحاب من الباب للباب .. نازل زور الملعب البلدي إذا ضل وقت زيادي محل ما حمص كلها بتتوحد بالعادة نازل عباب سباع شوف مدرستي محل ماتعلمت أنو كل شب أخي وكل بنت أختي ... محل ماصفوف الديانة لسى بهديك السنين ماقدرت تقنعنا انو ممكن نكوت مختلفين
ازل على حمص بدون اي توجه سياسي مع انو هالأيام يمكن هاد صار شي أساسي نازل وقف ضد الأنحياز الأعمى يلي خنقنا لأنو نحنا بحمص أخوة من وقت لي أنخلقنا آخد معي بخاخ وطالع على قلعة حمص لأنو بدي أكتب بأعلى نقطة بحمص كلها أنو نحنا شعب واحد وأمة وحدة وطنية بدنا نقص الأيد يلي لعبت بالطائفية
قسم بالله العظيم ان أحافظ على وطني موحد صفاً وأن ألا اكون طرفاً بأي نزاع طائفي وبأي طريقة فلا أتكلم بكلام طائفي يجيش الغير ولا أدخل بشجار طائفي مهما كان حجمه كما أقسم أن أحترم السني الشيعي العلوي المسيحي الأسماعيلي والدرزي وأي طائفة آخرى مهما كبرت أو صغرت .... فالديـن لله وسوريــــا لنـا جميعاً