الأشياء اللي أكرهها .. :-
1- حصة الأنقليزي .. :
مع أني أحسن واحد في الصف بالأنقلش لكن الأستاذ يكرهك الحياة .. لما تتكلم بدل ما يقول لك أسكت يقعد يضربك بالعصاية..
اليوم قعد يضرب يضرب يضرب و يقول لي : بس بس يا أسامه متسكت بئه
اللهم أعني عليه .!
2- الفيس بوك .. :
ما أدري ليش بس يرفع لي الضغط .! الحمد لله حذفت حسابي بنجاح ..!
وبس .. هذا لليوم ..!
-------------
أنجازات اليوم .!
تم ختم لعبة وزنك ذهب في حصة الكمبيوتر ... بعد أسابيع من البحث و الدراسة < كل أسبوع حصة .!
+
انا ختمتها بعد ما عرفت اجوبة معظم الأسئلة .. و بعد ما خلصت رحت ساعدت أبن عمي و حليناها سوا .. بعدين رحت لواحد ثاني و حليتها له .!
مشكلتهم نصابين ما يعطون فلوس من جد .. أنتظرت قدام الكمبيوتر ساعة ولا طلعت فلوس .! بخيلين .!
+
اليوم و الحمد لله فليتها فلة .. مع أنه حصة الأنقلش ملل .. لكن مشيت نفسي في باقي الحصص
+
أحلى حصة و لأول مرة في التاريخ .. حصة الجيوأحياء .. ( جيولوجيا + أحياء )
كان باقي لنا درس في كتاب الجيولوجيا فقال الأستاذ جيبوا كتاب الجيولوجيا و كتاب الأحياء .. ترا نفس الأستاذ..
المهم بعد مخلصنا الدرس .. قعدنا ننكت مع الأستاذ ..
الأستاذ لما يبغى يسكتنا يقول " أسمع أسمع " بصوت عالي .. وفيه مرة قال " الله الله الله " بالطريقة المصرية الرهيبة ..
لما أرتفع صوت الطلاب و الأستاذ عصب .. تبرع 5 طلاب .. وقعدوا يقولوا أسمع أسمع .. وواحد فيهم قال الله الله الله خخخخ
و الأستاذ أنفجر ضحك ... و الله العظيم انها حصة رهيييبة .!
---------
نزلت قرار وزاري من الحكومة المدوناتية .!
كل يوم أربعاء راح أتكلم عربي فصيح ببلاغة عالية و السبب أن أخر حصة تكون عربي ..
لكن خليها في الفصل الثالث اللي ما أدري متى يبدأ لأن يوم الأربعاء بغيب
--------
أيه ما شرحت لكم عن عائلتي .!
طبعاً حنا كم يا ربي لحظة أعد .. أنا أمي أبوي أخواتي 4 و أخوي الصغير 5 و أختي الأصغر الأصغر وحده .. و زوجة أبوي كمان
كلنا في بيت واحد ..
طبعاً و لله الحمد أنا أكبر واحد في أخواني .. أخوي الصغير عمره 5 سنوات .. دائماً يزعجني بأسئلته الخاصة .!!
أبوي أو كما يسمونه أعمامي و بقية العيلة " المطوع " الحمد لله طيب مرررررة ... في حياته ما ضربني ...
لكن لو سويت شي غلط يعطيني درس في الأدب و الأحترام .!! أمي الحبيبة دايماً تدافع عني ضد البنات خخخ
طبعاً البنات ما أهتم فيهم و لا أعطيهم وجه .!! إلا أختي الصغيرة العزيزة أو كما أسميها " فطوم شان " هههه
وربي فديتها أختي عمرها 8 شهور ...! دووم تجي عن اللاب توب و تسحب الشاشة خخخخ
من مميزات أني أكبر واحد ... أتحكم في كل شي في البيت ... السيارة كل ما نطلع البر أخذ مفتاحها و أفر فيها .!
كل ما أطلب شي يعطوني ..
سلبيات أني أكبر واحد ... أنت الكبير لا تحط راسك براسهم .. لما تصير مشاكل كذا يقولون
و كمان هذول اخوانك الصغار لازم تكون لهم قدوه .. يعني أحترمهم علشان يحترموك .. و كمان أنواع رفع الضغط من البنات
و أخوي الصغير دايماً أسامه سوي لي... أسامه شوف ...أسامه عادي أسوي كذا ؟ خخخ
و بكذا نكون ختمنا لليوم .. نشوفكم بكرة لأن فيني نوووم و بكرة جمعه فلازم أصحى بدري
نشوفكم على خير ...