انا الغلطان .... بقلمي
انا الغلطان
من خلّيتك انت ابدفتر الوجدان
وانا الغلطان
من كتلك اريدك من كلب والسان
يا كصر النظر من كمت أهتم بيك
حسبالي يظل ميزانك الميزان
ويا عثرة درب ذبّت إجدامي اهناك
والسجّه طويله إتعاند التعبان
تجرحني إعله طولي وما كلتلك ليش
وأدنّك عيني منك مستحه وخجلان
أجيك إبخلك ما دشّنته طول اليوم
وأرد إبخطوه وحشه وبهذلاها اللوم
و أعض إشفافي عض ندمان
أنا الغلطان
يارحلة عمر نفظت أكتاره إسنين
أعد أيامها وأشخط على الحيطان
وأرد الذكرياتي البعثراها الغيض
أرتّبهن ...و أرد كلشي مثل ماجان
وترد إنت تبعثرهن
وارد آنه
وترد انت
وأصيح إبزحمة السكته...
مو كافي ولك يفلان
جرّحني الحجي الماعاشرنه إحروف
وأشهك ويّه روحي الجتفاها الخوف
وأطيح وبيّه ألف نيشان
ياااا طبعي شكول إعليك
تركض عالسراب وشايلك طوفان
رد معذور ماطول الوكت بعده
رد إبأول المدّه
و... لو سدّوا إبوجهك باب
صدّكني أكلّك تنفتح بيبان
صدّكني اكلّك تنفتح بيبان
................
|