|
رد: مُذكرات وخواطر عابر سبيل
السلام عليكم ورحمة الله وبركاته ^^
تحية عطرة لزوار مدونتي المتواضعة 
من المواقف المحرجة اللي صارت لي 
رحت جدة عند أحد أصدقائي العضو ( Razor-Disturbed ) نايف
المهم إن الرجال كان عندهـ زواج وما يبغى يسحب علي قال لي إيش رايكـ تمثل إنكـ قريبي 
قلت له أوكي نو بروبليم
وكنا ننتظر أحد أصدقاء نايف وهو العضو ( Asode ) عبدالله
عشان مايعرف مكان الزواج إلا هو وكنت أنا ونايف جالسين على سور جامعة الملكـ عبدالعزيز وناكل بيكـ
وطولنا في الإنتظار ومانشوف إلا سيارة مفحطة وجاية من بعيد وإلا هو عبدالله ينزل معصّب 
ويقول لنايف وينكـ يا حـ*** لي ساعة أدق عليكـ
طلع نايف ناسي جواله في سيارتي 
المهم نايف راح يجيب أهله من السوق وأنا وعبدالله قعدنا ننتظر إلى أن جاء نايف ونروح للزواج كما إتفقنا
وأول مادخلنا سلمت على العريس ونايف يقدمني له ويقول هذا قريبي عماد جاء من مكة
وللصدفة إن نايف عندهـ قريب إسمه عماد وساكن في مكة أيضاً 
المهم جلسنا أنا ونايف وعبدالله في زاوية وكل واحد يقول سالفة سامجة
بعدها إنتقلنا من المكان إلى مكان آخر أمام أحد مدرسين نايف سابقاً 
وبرضو قال له هذا قريبي عماد من مكة
طبعاً أنا شايف المدرس صار وجهه زي كذا 
كيف أكون أقرب لنايف وإحنا مختلفين كلياً عن بعض مافي ذرة شبه بيننا
المهم شوية إلا أشوف واحد قاعد يعدل السماعات ومن سوء الحظ كانت بجنبي 
وبعدها يجون منشدين أصواتهم ماني قايل كيف وأناشيدهم سامجة
الليلة ليلة فرح ومرح وأمممم نسيت الأنشودة 
المهم إنها مي حلوة
وأنا قاعد أقول لنايف ودي أمسكـ السماعات وأضربها فوق راس المنشد السامج هذا
بس المشكلة مو في الأناشيد السامجة المشكلة إن السماعات بجنبي وأنا حساس ضد الأصوات العالية
بعد ما إنتهوا السامجين جاء وقت العشاء وأجلس بجنب ناس متفلسفين وكل واحد يفتي من عندهـ
بس مو محيرني فيهم إلا اللي يقول هذا سمكـ ياحبيبي لحم قدامكـ تقول سمكـ إيش جوكـ إنت
طبعاً عدا اللي يقول هذا مندي والثاني يقول لا هذا كوزي والرز واضح إنه كابلي
المهم ماعلينا بعد ما إنتهينا من العشاء خرجنا انا ونايف وعبدالله وإحنا فاطسين ضحكـ على الزواج
مسرحية مو زواج
ممكن تقولوا إيش المحرج في الموضوع ؟
المحرج إني مثلت إني قريب نايف وكل شوية أقول كيف نايف قريبي عشان الناس اللي حولنا يسمعون
وخلاص إنتهت الهرجة 
|