left.png[/IMG][/URL] رسم حيره الوجه حته النضر حيران
وحته الدمعه من ادموعهه اختنكت



شك ثوبه الفقير ونزف دم الثوب
اثاري جروحه هي الثوب وانشكت



حبل اعدام تنزل دمعته بكل يوم
واحلامه البريئه بدمعته اتعلكت



بلكت ياوكت تهدي الفقير افراح
بلكت راحه يلكه جروحه ماضحكت



زعل حيل الوكت وانقهر كلش حيل
وكص راس الفقير وكلمة البلكت



غريبه الدنيه ليش اعله الفقير تضيك
ارض الله شكبرهه بعينهم ضكت



امانيهم طفل فوك الجبل مرعوب
طاح اعله السفح رجله بغفل زلكت



ملابسهم جلدهم بالشبه واللون
كطعهه التعب ومن التعب عتكت



يشربون الصبر والعطش مو من ماي
من ضحكه بديهم بالهوه احتركت



يكعدون بقهر ولملمون احلام
وعبوه بنص حلمهم بالعجل طكت



ممنوع الفقير يداوي نفسي بطيب
أي ليش خدودهم بس بالدمع غركت



أي لمحة فرح ممنوعة عنهم ليش
حته جفوفه تنكص لو ندم صفكت



ليش بلا ذنب عاشو عمرهم ضيم
طاحو عالارض بجفوف متلكت



دنيانه شعجب ما شافت الاطفال
من شافت عركهم هي ماعركت؟



شربت كل تعبهم والتعب عطشان
وبقت تضحك عليهم وابد ماشركت



طاح حض الوكت وانعل ابو الدولار
وعمت عين الحياة شلون مارفكت