للثانوية العامة
السلام عليكم ورحمة الله ^^
اخباركم ان شاء الله تكونو بخير
بسبب حاله الاحباط
ندخل ف صلب الموضوع
.................................................. .............
كتير مننا داخل الثانوية العامة وهو متخوف منها
ومنها الي شادد اعصابه تقوله مالك يا بني
يقولك انا ف #ثانوية عامة
اول حاجة شبح الثانوية العامة ده اقتله خالص
#الثانوية_العامة مجرد سنة عادية جدااا فاهم حاجة خوفك يكون بنسبة معينة لانه لو زااد هتوصل لمرحله الهروب من المذاكرة بالنوم او غيره
ولو نقص هتكبر دماغك وده طبعا الي احنا مش عاوزينه
#الثانوية_العامة مجرد سنة عاادية جداا عادية جداا ؟؟ اه عادية جدا
مجرد المطلوب منك انك تجيب #مجموع فلا تقلق ولا تخاف لانك على قد ما #تتعب على قد ما #هتاخد
وعشان تجيب مجموع تعمل اييه ؟
هتقولي #هذاكر هقولك تمام
بس هتذاكر ازاي ؟
.................................................. .............................
اول شي #نظم_وقتك لانه مهم جدا ف الفترة الي احنا فيها دي دلوقت
اعمل جدول نظم حالك خطط لنجاحك انت تقدر تعملها ليه لا
لا نقصك عقل ولا دراع نتظم الوقت بين المواد ع حسب دروسك
استثمر الوقت باكبر قدر من الامكان قلل الفاقد من الوقت
متضيعش وقتك لانك هتعرف قيمة كل ثانية ف الاخر اول ما ترجع من درسك خلص كل الي عليك كل مادة من 4 الي 3 ساعات مذاكرة وحل
واياك ثم اياك تسمع اي جملة من صحابك او زمايلك وتأثر فيك يعني 2 مذاكرة وساعة حل او ما ترجع ذاكر عشان شرح المدرسة يكون لسة ف دماغك
.................................................. .......
زي انا مبذاكرش انا هسقط انا وانا وانا .. الخ الخ لان في ناس بتحب تحبط غيرها ! ربنا يامحهم بقى grin رمز تعبيري
اسمع من هنا ورمي الكلام من هنا
هتقولي احيااانا مش بيجيلي نفس اذاكر ونفسي تتسد عنها
هقول تمام يبقى تعمل اييه عشان تحفز حالك
بين كل مادة ومادة بتذاكرها خلي مثلا نص ساعة فراغ كأنك بتكافيء حالك ع المذاكرة اعمل فيها الي انت بتحبه
حط ف بالك ان المذاكرة دي حاجة جميلة مش وحشة علم هتاخده هتستفيد منه بعد كده مستقبلك الي انت بتبنيه بايديك
.........................................
.......................
ققولك حاجة
اييه الكائن الي ربنا خلقه واستأمنه على ارضه ؟
وامره بتعميرها ؟ واداله قدرات هايله لكده؟ هتقولي الانسان
هقولك تمااام جداا وانت اييه ؟ هتقولي انسان يبقى عندك قدرات عالية وربنا استأمنك ع ارضه يبقى تقدر تعمل المستحيل وهتوصل ان شاء الله لحلمك
ليه لأ
كلنا بنحلم وكلنا بنقول انا نفسي ابقى وابقى
طب مدام نفسك ليه متخليش الحلم حقييقة ؟ ليه تستسلم للاحباط والايأس
اي اختراع بتستخدمه دلوقت موبايل لاب عربيات طيارات غيره كانت مجرد حلم
وصاحب الحلم استمر ومشى ورا حلمه واجتهد .... ف الاخر وصل
المذاكرة دي عبارة عن معلومات بتديك ثقافة لانك انت بعد كده هتشيل مكان من مجتمعك هيبقل ليك لمسة وليك تأثير
معلومات بتدخلها لدماغك عشان هتتسأل فيهم ف اخر السنة
المذاكرة حاجة جميلة حطها ف بالك كده
اياك تطنش امتحانات الدروس سواء نهائية او سبوعية
لانها مهمة عارف لييه ؟؟ مش مجرد المدرس بيتابعك وخلاص
لا دي عشان بتكسر رهبة الامتحان جواك
ده غير انها بتعرفك مستواك نزل ارفعه وشد حيلك ! على عليه اكتر وشد حيلك اكتر ! كله ف سبيل حلمك كليتك الي انت عاوزها
.................................................. .................................................. ....
اعمل لنفسك ف اجازة اخر الاسبوع كام ساعة رتب فيها دماغك من تاني اجازة ليه الساعات الفاضية دي تعمل فيها ما بدالك تنزل اي حاجة بتحبها اعملها لان طبيعي مفيش حد بيقعد لازق ع الكتاب
وطبيعة الانسان بيمل من عدم التغيير فدي طريقة لقتل الملل وف نفس الوقت جايزة لحالك لشغلك طول الاسبوع
.................................................. ...........................
مشكلة النسيان كلنا طبيعي بننسى والنسيان نعمة من عند ربنا
فمدام بننسى الي ذاكرناه احيانا نعمل ايه
ف الجدول الي هنضبط
نخلي المادة الواحدة تمسكها مرتين ف الاسبوع مرة مذاكرة الجديد والتانية لمراجعة القديم
او شوف انت هتعمل ايه او هترتب مراجعتك ازاي ؟؟
.................................................. .................................................. .....
متستسلمش لاي افكار سلبية هدامة لهدفك
وبلاش توصف حالك بصفات سلبية
زي انا فاشل انا مش هقدر كلهم يقدرو وانا لا ؟ لانها بتحد من قدراتك العقلية وتثبت ف عقلك الباطن فيعمل اييه عقلك الباطن ! هياخد الكلمات دي يثبتها ويتحكم ف افعالك وافكارك ع اساس الكلمتين الي بتوصف بيهم ذاتك بمعنى اصح كأنك بتكبح قدراتك العقلية وقوتك الداخلية جوا سجن انت في غنا عنه ! لان قدراتك عالية
فسيبك من السلبية وقول لحالك دااائما انا هقدر انا ذكي انا ذاكرتي قوية
انا ناجح انا هقدر
لانك ببساطة هتقدر وتقدر #وهتوووووصل !!
اياك تقارن شغلك او مذاكرتك بحد لانك متعرفش الحد ده شغله جاي منين يمكن انت اجابتك احسن منه بكتير كل هيبان ف اخر السنة فمتخليش حاجة تحبطك !
واول واهم حاجة الصلاة والدعاء مش للسنة دي وبس
لا دول لكل السنين الي جت والي هتيجي دول اساس التسهيل من عند ربنا
والتوفيق من عنده سبحانه فحافظ ع صلاتك وادعي واتوكل على ربنا واجتهد هتوصل ان شاء الله هتوصل
.................................................. ...............................................
ف اخر السنة اياك تخاف من الامتحان وانت رايح لللجنة
حط ف بالك انك شغال تمام وتعبان طول السنة
مذاكرة وامتحانات هتلاقي الاسئلة بسيطة جداا بالنسبة لك
الامتحانات مبتجيش بالصعوبة الي بنسمع بيها
بتيجي ف مستوى الطالب العادي وطبيعي جداا هيحطو تكة ولا اتنين
عشان يفرقو بين الطالب الفاهم والي هيقفل من غيره
الي مذاكر وتعبان طول السنة هيلاقي لان ربنا مبيضيعش تعب حد
وحط ف بالك انك تشتغل بحق ربنا عشان مش ورقة هي الي هتوديك وتجيبك !
.................................................. .....................
كل ما تفقد الامل اتخيل منظر اهلك ف اخر السنة وانتم متجمعين ع الجهاز ومستنيين نتيجتك كله اعصابه مشدودة
ها ظهرت لا لسة ظهرت اه ظهرت وجبت المجموع الي نفسك فيه جبت الي انت عاوزه وكلهم حواليك والدتك من الفرحة بتبكي ووالدك من الفرحة حضنك ياااه ع الفرحة خلي المنظر ده حقييقة حوله لحقيقة لانه بايديك يا تخليه حقيقة يا بايدك تخليه مجرد منظر !
تخيل المنظر ده لما ترفع راسهم
لما ياخدو نتيجة تعبهم معاك
لما تتقي ربنا ف الفلوس الي بيصرفوها على دروسك وتتعب عشانهم
مهدودين طول السنة معاك واعصابهم مشدودة اكتر منك خوفا عليك
لانهم نفسهم يشوفوك احسن واحد ف الدنيا
دي هدية بسيطة هتقدمهالهم
وهتفرح معاهم بيها
اياك تنسى المنظر ده من بالك
حط ورقة اكتب فيها نفسك تبقى اييه والمجموع الي نفسك فيه
وحطها بحيث او ما تصحى من النوم عينك تيجي عليها smile رمز تعبيري
.................................................. ..........
قبل ما تنام وانت دماغك ع مخدتك حفز افكارك انا نشيط انا هقدر لغاية ما تروح ف النوم
.................................................. .......................................
ومتنساش متخليش حاجة #توقفك
ومتنساش مستقبلك وحياتك بين ايديك يا ترفعهم لاعلى من قمم الجبال يا تنزلهم لا سفل من المنحدرات >> هدية لبتوع ادبي مصطلحات جغرافية اهي وبتوع علمي معلش بقى تفرقة عنصرية ^_^
معلش طولت عليكم كتير :D
ويارب اكون افدت :D
ومحدش يكسل وميقراش
لان ده اختصار وبصراحة مرضتش ارغي كتير :P
ان شاء الله هتوصلوا ربنا يوفقكم ويكرمكم كلكم يارب
بالتوفيق ان شاء الله للجميع