أنه عندي الترف مو بالجسد بالروح ** مافسر التطور بالمشي اتلوى
أنـه مَشية نَسَق مستعرض بكانون ** صدى ضربة مسيري بكل إذن دوّى
بالظاهر جلد بس أشبه المحّار ** ماتشبه صدفته اللؤلؤه الجوه
صِدِت ليلي لأن بالشُص نجم حطيت ** إبن هور وخبير وصيدي مو توّه
يحركَـني اللهب بس أطلع أحلة هواي ** ماشوه بشرتي وكلشي ماسوى
اندل الجمر واعرف زوايا النار ** من جانت الوادم تجدح بحصوه
سهرت ويه الورد واتمرجحت بالغيم ** وعّـيت الطيور من الفجر ضوه
-