السلام عليكم ...~
||
من ليله السبت || 12\28\19 ..~
شهر بدي يصيرلي غايبه , لانو كل يوم ادخل بكصه تخليني اكتئب اكتر واكتر , وكل يوم ادخل بمصيبه ما يكون ببالي الا بس احلّها وبعدين بمشي بحياتي ,هاي مشكله عندي انو اد انا بمشاكل راح اوكف حياتي لوكت ما تنحل , وهات عاد ع حياه كلها مشاكل , راح احاول احكي بالمختصر ويمكن لأ , لاني مكهوره , اليوم شوفت نفسيتي احسن وامشو معي لاحكي عن مجريات هالشهر ..~
بالنسبه للصحه ..~
الحمد لله الحمد لله كتير انو ما طلع معي المرض العاطل عالاكيد , عملت فحوص كتير ومكينات كتير بس الحمد لله الحمد لله فش اشي يخوّف , بس هلكيت صرت اخد دوا اكتر وبجرعات اكتر , صح بشوفها بتعملي هبوط بالنشاط اللي معي , وهزل بس الحمد لله مرتاحه نفسيا , ضايل عليا موعد بعد شهر وحكولي ان شاءا لله بعدها بحولوني ع ميعاد للعميله , الاشي المزعج انو فتره اعياد هون , وانو مواعيدي دايما بعيده , عشان مع دكتور كبير , بس فش خوف .
||
بالنسبه للشغل ..~
انا الان ما بشتغل ولا نص يوم , تركت كل انواع الشغل , استقلت من كل انواع الشغل , من التمريض عالاخر , كتير ازعلت لانو في عميل عندي بعرفها من خمس سنين وهي اول عميله عندي , كتير ازعلت اني راح اترك الشغل عندها , يالله عمر بينا عمر , لما حكتلها خلص بدي اترك الشركه يالله كيف وجهها اتغيّر , جينفر ما حكتلها وحطتني انا ببوز المدفع احكيلها , وكعدنا نحكي لبعض عن اول يوم اتكابلنا , وكديش حكت انو كانت مبسوطه بشغلي , يالله كعدت اسبوع وانا مشغول بالي كيف احكيلها , الكل حكالي لكل اشي بالدنيا نهايه , بش بديش نهايه هالعمليه , اليوم هو اول يوم انا عاطله عن العمل , سبب ترك الشغل الصحه , وكمان شغله تانيه بخبركم عنها بعدين ..~
||
بالنسبه للاهل ..~
مشاكل دايما , دايما , اوصلت لايام احكي خلص بديش اعيش , ومكنتش افكر بشو بصير بعدها ,وايام احكي بدي احكي لامي اني مريضه مشان خلص تحمد الله اني منيحه وهدا المهم , كتير يصير صراخ ورمي حكي , ونحارب بعض ساعات , واحكي بعكلي بديش احكي معهم خلص , وكد ما احاول افهم فيهم شو بدي وشو براسي وكيف نقتنع بالنصيب , ومرات احكي اللي بيعملوه معاي يا ريت بصير مع بناتهم لخواتي مشان يحسو اللي انا بحس فيه , ومع هيك لما نرجع نتصالح ونراضي بعض ونبوس رووس بعض كل اللي كنت افكر فيه يطير , وحكتلهم انو مرضي صار من كتر ما بتلجو فيا , وانو خلص ليروح يصير فيا اشي اكبر ومشاكل اكبر مشان خلص تفهمو انو نصيب وانو مش هالاشي الكبير , والله اعلم ..~
||
بالنسبه للنفسيه ..~
من مره مش منيحه , دايما متنكده , دايما معصبه ومتوتره , ودايما في استنظار لشغلات بحياتي , ما بستمتع بالشغلات اللي بشوفها او بقرئها , ما بستمتع بالايام بدون شغل , لانو الكل بحسسني انو غلط ما تشتغلي .
||
من الشغلات اللي كمان صارت , في شب عربي كانت تصير مصالح بينا بخصوص شغل , من فتره خلص صار حكي منه انو انتهت المصالح , كديش ازعلت لانو شب محترم ومؤدب وبفهم وخلوق جدا , كديش حبيت الشغل اللي كان بينا لاني دايما مرتاحه في التعامل معه , لهيك روحت اتعامل مع شب عربي تاني مشان نفس المصلحه, هاد الشب العربي التاني بعرفه وصار بينا مصالح وهو شخص عبقري وعكله رهيب لانو تفكيره رهيب ومن زوايا ما بشوفها مع الناس اللي حواليا , كعدت اسبوع وانا والتاني نشتغل عشان المصلحه , اوكعت بفتره توتر مش طبيعه , ومع انو هالمصلحه مشان اهلي , واكيد ارتمت عليا , وبكره بصراحه هاي الثقه من اهلي باني بكدر احل المشكله وانو كدها وانو ما بنخاف عليا , بس بيني وبينكم انا بخاف من الناس , ودايما محتاطه منهم , ودايما عندي الناس ع غلط لوكت ما يثبتو العكس , صار بيني وبينه مواكف احاول كد ما اكدر ما اطلّع بعيونه , لانو عيونه مش مريحات , عيونوه بثبتولي انو هو غلط , انو هامل ووكح , وانو اد غلط بكرهه وبكره التعامل معه وراح انهي المصحله بينا , وانا بكدرش انهي المصلحه بينا بكدرش , مين راح يساعدني فش حد , وهو والله تعب معي والله , لهيك دعست ع مبدأ من مبادئ عشان بس اعمل هالمصلحه مشان اهلي , بس ينعن شكله ينعن شكله ع افكاره الرهيبه , بحب الكعده معه والحكي معه ينعن شكله , عاد المصلحه ماشيه لشهر يا رب , ويا رب ادوم اشهر عشان ما اروح اطلب مساعدته , مع انه بشوفه وانا بالبجامه وفش ولا ذره مكياج وشعري مربوط , وبحاول امسك حالي من الضحك , واكون صريحه ووقحه معاه من ناحيه الكلام مشان اعمل خطوط وحواجز بينا .
||
