السلام عليكم ..~
المسا من يوم السبت || 1\4\20 ..~
؛
صارلي ساعه بمصيبه من اديّا , الحمد لله انتهت ع خير , جربت نوع كريم لوجهي وبعرفه نوع كوي ومش لازم اخلطه مع اي نوع تاني , بس انا طنشت وحكيت مش راح يصير اشي , وطوب صار مصيبه , وجهي صار زي النار وزي البندوره , واوصلت لمرحله اسحب حالي واروح ع الطوارئ , بس عشان متحممه وبديش يلفحني الهوا وامرض , لهيك ضليت بالمطبخ وخلصت كل جرار مكعبات التلج , ضليت ساعه كامله التلج بذوب من سخونه وجهي , والحمد لله هي وجهي خف وارتحت ..~
||
اصحيت اليوم متاخره بعد ما اقلقت بالليل لانو امبارح حضرت اخوي كعد يعمل مشاوي بالليل وخلى باب البيت مفتوح وحضره ساده طلع برى , وضليت ع اعصابي لانو ما رجع ساده , ع نص الليل بعد ما انشفت وانا فاتح الباب وانا استنظر ع اعصابي , لمحت ساده جاي , ولما شافني لف حاله وبده يرجع يكمل طش , وانا ركضت وخلعت راسه وبدي اكصّه ع الحاله اللي كنت فيها منه , حملته رميته بغرفتي وكنت تعبانه لهيك نمت .
مكنتش متوقع حد من خواتي يجي عندي اليوم , لانو فيث عليها مشوار , بس هوبز امبين عليها زهكانه لهيك حكتلي اروح اجيبها بس يطلع جوزها ع الشغل , تيجي تشرب عندي كهوه , وكنت كمان متواعده مع فد انو نحكي , لانو كمان امبارح بالليل هي بعتت انو نحكي , لهيك بعد ما اصحيت وافطرت ورتبت شوي بالدار , حكيت احكي مع فد قبل ما اروح اجيب اختي , ما حكيت معاها دكيكه الا هوبز بتتصل , ضليت مع فد ع الخط وانا اسوك , وبس اوصلت لعند اختي سكرت الخط لانو بديش حد يعرف انو بحكي معاها .
وحتى ميم كمان بعتت مسج انو حلمت فيا والحلم منيح ويا رب يكون فرج .وانناس بضل تبعت مسجات عشان مرت اخوي بتعمللها مشاكل وبصراحه بشوف المشاكل تبعتهم حكي فاضي وهبل وتفاهه , وبهمنيش هيك مشاكل , حياتي فيها شغلات اهم واكبر من اللي بصير بينهم , وغير اني حكتلها زماان انو مليش دخل شو مرت اخوي بتعملك مشاكل وما تيجي تحكيلي .
فد صاحبتي ومن وانا صغيره , ميم صاحبتي من ايام المدرسه , وانناس صاحبتي وجارتي .
بعد ما اوصلت لعند اختي وارجعنا ع الدار وضلينا كاعدين نحكي وندردرش ونشرب كهوه وناكل وكل الامور تمام وحتى حكينا مع امي ساعه , وجلطتني بالاخر صرخت فيها واندمت بس هي مش مستوعبه شو بحكي ومعنديش بال عليها صرت . وحتى فد كتير حكيت معاها وما خليتها تحكي , هي بس ضلت تسمع وصارت نفسيتي توب بعد ما خلصت الحكي معاها .
وبعدها رتبت البيت واجتني مصيبه وجهي وهيني ..~
||
