السلام عليكم ..~

من ليله الاربعا || 1\8\20 ..~

||

بالنسبه ليوم التلاتاء , اصحيت بدري مشان كان عليا موعد مع اختي الكبيره بخصوص شغله نعملها مع بعض ,اطلعت من الدار واوصلت عند بيتها واخدتها وروحنا نعمل الكصه, وبعد ما خلصناها والحمد لله كل الامور تمام , حكينا لبعض نروح نشرب كهوه ونشتري اشي خفيف ناكله مع الكهوه , بس لاني صبيه مش صباحيه من مره , والله يعيني ع الايام الجايه , كبل ما اطلع من الدار افطرت خبزه عالسريع واخدت معي كهوه اشربتها بالطريك ومع هيك منيح ما خبطت السياره اكتر من مره الله سترها معي , واحنا نشرب كهوه فتحنا التلفون ع امي وحكينا معاها , وبعدها جوزها لاختي بتصل عليها لهيك رجعتها ع البيت وانا روحت اعمل اشغالي ..~

روحت اتحوجت شوي في محل كريب ع بيتي فيه شغلات حلوه وارجعت ع البيت وكعدت نص ساعه وانا الف ع مكان اصف السياره , انكهرت انو لسا الدنيا العصر وفش مكان كريب , وبعد ما اوصلت الدار رتبت الدار وكان في تلفونات عليا مع البنك تبعي ومع شركه النت ومع العياده , في امور زبطت معي وامور لأ وبس ..~

||

اما اليوم الاربعا , كان عليا موعد بدري مع لينا , كل فتره يعني مره بالشهر او مرتين بحب اروح عندها تزبطني وتعمل اظافري وكل هالكصص , بس هاي المره اتاخرت عشان اعياد وكانت ماخده اجازه , وموعدي ع 8 , يعني سبعه ونص الصبح اطلعت من الدار , يعني اصحيت واطلعت شو ما انا بدون فطور وكهوه وكصصها , وفش مكان لصف السياره الا بمصاري وبعرف هاد الاشي لهيك باخد معي فكّه للمكينه لانو صارت معي قبل هالمره انو المكينات اللي بالحاره عندها ما بتقبل الا فكه كاش , مش بطاقه بنك , وبعرف كمان لانو صارت معي انو المكينه حراميه مرات بتاخد اكتر من المطلوب انو بتنصب عليا , بس اليوم اعرفت انو المكينه بتاخد المصاري وما بتحسب ولا دكيكه ينعن ابوها بكاع الكندره ع الصبح ,يعني دفعت اجار ساعتين وبستنى كاعده انو المكينه تزمر تطلع صوت انو اشتعلت ويطلع اللون الاخضر , ولانو لسا الصبح كانت درجه استيعابي صفر , بعدين استوعبت انو المكينه مش شغاله ومش لازم استنى , وانا عصبت بدكم الصراحه , ضليت اضرب فيها انو بكلي تشتغل وعالفاضي , روحت ع مكينه تانيه وبوزي واصل عندكم , واوصلت عند لينا عالموعد بالزبط وانا عندها اتصلو عليا خواتي اني اروح اشرب معهم كهوه , حكتلهم استنوني , ولما خلصت من عند لينا واجيت اطلع اتصلوا عليا انو ازواجهم المحترمين بتصلوا عليهم يرجعوا ع البيت لهيك ما روحت شوفت خواتي وارجعت عالبيت , ورتبته وهيني ..~


||