السلام عليكم ..~

من ليله الاثنين || 1\13\20 ..~

||

اليوم اصحيت ع الخمسه الصبح ومعرفتش ارجع انام لاني كنت متوتره عشان اليوم هو اول يوم تدريب بالشغل الجديد اللي ان شاء الله التمام فيه عخير , وافطرت واشربت كهوه ورتبت البيت مشان بعرف برجع بالليل وبكون تعبانه ارتب , وجهزت حالي واطلعت 8 الصبح من البيت , والحمد لله السياره جمب الدار ,ولان اول مره بدي اروح ع هاد المكان من هاد الشارع كنت مركزه بالسواكه والحمد لله ربنا سترها معي مع انه كانت الصبح ازمه اشي مش طبيعي والجي بي اس بتخربط الواحد والشمش بعيوني ولا زي كاني لابس نطاره , بس مع هيك كنت مبسوطه اني رايحه ع هاد الشغل , لانو بعطو معاش منيح ولانو شركه كبيره بعرف راح يجي وجع راس والنفسيه مش كتير راخ تكون وراح اغيب عن البيت فوق ال 12 ساعه كل يوم , يعني فش حياه , بس عم احاول اشوف الشغلات الايجابيه بالشغل , وهاد الشغل اتعبت اشهر عشان اوصله , ما بين حسن السلوك اللي اتعبوني ووصلت لمرحله الخوف انو ما يزبط , واضيع ساعات وايام في تعبايه ورق انجليزي صعب كتير عليا .

اليوم الاول هو فيديوهات مع الاساتذه مشان يدربوكي عالشغل وملان قرائه ورق وتعبايه ورق وبده ساعات واللي بكهر انو بتكدريش تعمليهم بالبيت لازم اتصالات فيديو مع الطلاب التانين والاساتذه شغلات كتيره مش مريحه والنفسيه ضغط . منيح انهم بعطو الواحد بريك ومنيح في كهوه جمبنا , ومنيح في بريك دكايك بين كل ساعه وساعه .

بعد ما خلصت التدريب اللي عليا ع 6 ونص , اجيت عالبيت وبلشت بمرحله السياره وفش مكان اصف السياره الا بعيد بعيد واخ يبي بس يالله اتحمل , ودخلت البيت 8 بالليل , بالزبط متل ما كنت حاسب بعقلي انو كل يوم هيك من 8 لل 8 حياتي , وهي الساعه بدها تصير عشره بالليل , ما اتعشيت ورتبت المطبخ من عجكه العشا وحكيت مع امي بالبلفون وعملت روتيني الليلي , لا قرات ولا شوفت حلقه من مسلسل , يالله يالله العبت شوي مع ساده من كتر ما كان مشتاكلي لاني غيبت عنه كل النهار وهيني بدي انام ,

بعرف مرات كد ما تكون الامور صعبه عليا بس لما اجي احكيها هون بتخف عليا كتير , كانو في حدي بستدعيلي بالخير , شكرا ولك المثل .