السلام عليكم ,,~

من ليله الاحد || 1\19\20 ..~

كل الاسبوع الماضي كان اول اسبوع تدريب بشغلي الجديد , شغلي الجديد اللي صارلي شهرين بحكيلكم عنه , اتعبت لاوصله , عملت فحوص عشانه , وحسن سلوك وانا بالاصل ورقي بخوف وصعب في امريكا , واوصلت لمرحله انهم ما يقبلوني , بس قبلوني ..~

وكان المقرر انو بدايه التدريب تكون الاثنين الماضي , وكان يوم ورى يوم ورى يوم تعب نفسي اشي مش طبيعي , لانو التدريب عباره عن دروس عالنت مع اساتذه ومع طلاب , كل يوم خمس ساعات ع الكمبيوتر بالبث المباشر بالدورس , وبالاحراج بالاساله اللي بسالوها والصعوبه اشي مش طبيعي كلمات انجليزي اول مره بتمر عليا , وكمان واجب بده العاده 4 ساعات , وكمان واجب تاني بده ساعه او ساعتين , وانا لاني بطيئه بالانجليزي واضعيفه , مكنتش الحك عليهم , اكون متاخر , بالاصل انا اخر واحده بين كل الطلاب , كنت اكره لما يسالني الاستاذ ومعرفش اجاوب , كنت مضغوطه نفسي , وكنت بيطئه ومحرجه وحاله مش طبيعي , مع اني كبل بدايه التدريب كنت احكي لحالي لو شو ما كان صعب لازم اتحمل , بس بعرفش مالي ليش مش كادر اتحمل , بعرفش ليش مش كادر اتحمل الحياه , بعرفش ليش فش عندي هدف بالدنيا ومش مرتاحه وليش حساسه ..~

اصحى 6 الصبح واطلع من الدار حوالي 7 ونص 8 , وبدي ساعه الا ربع بالسياره لاوصل لشغلي ودايما ع اعصابي لانو اجت ايام مطر بخوف وبتكون ازمه سير الصبح , واكون بشغلي التدريب ع 9 ونص , واخلص 6 ونص او 7 , واوضل البيت 8 ونص بالليل 9 , غير الساعه اللي اكعد ادور ع مكان اصف السياره , وفوك كل الكصص النفسيه من التدريب , من المديره اللي مش عاجبتني وما بتساعد ولا حتى اللي بشتغل معهم مناح لئمين اشي مش طبيعي , كرهت الشغل قبل ما ابلش فيه لسا ..~

ونهايه كصه الاسبوع الاول تدريب هو ابلش تدريب تاني من بكرا لاني رسبت بالتدريب الاول ولاني ضعيفه فيه واضعف واحده بينهم كلهم بين ال 20 طالب , ولما اشوف كيف الكل مش سائل ومبسوط ومطنش الحياه من الطلاب ومن اللي معي بالشغل , احكي ليش انا هيك نكده وحزينه وخويفه ليش ؟؟! لهيك بعرفش اد بكون عندي الوكت اجي ع المدونه , اللي بكهر اني برجع ع البيت في الليل ولازم ارتبها وانظف واغسل واجلى واطبخ قبل ما انام, فش وكت للنوم بنام نص ليل ويالله يالله اشبع نوم , واخوي بكهرني بتيضع وكتي وبغلبني بكلامه الفاضي وبعجكلي المطبخ في طبيخه , ما مصدك تيجي خطيبته هان اتعبت منه ..~

هو بالاصل حرام مش الحك عليه , الحك عليا انا اللي اتعبت من الكل , اللي مش كادره اتحمل حد , واللي متنكده هيك , واللي بكهر اكتر زوج اختي الكبيره مريض صارله يومين بالمستشفى شروش قلبه بدهم فتح وهو لسا صغير , وبكرا عمليته , وعليه كمان عمليه بعدها , يعني طول هاد الاسبوع اختي بالمستشفى , وامي بالبلاد كمان مريضه وابوي كمان ,وكل شوي بسمع اخبار ناس بعرفهم ماتوا , وكصص بتزعل ااياست من الحياه , اوصلت لمرحله اقرا كصص ناس كتلت حالها , بعدين ضليت استدعي ربنا بكل صلاه انو يثبتني ويهونها علينا وعليا بشغلي , دموعي بطلوا يوكفوا ع خدي , شايف حالي ضعيفه وخواتي وبناتهم بحكو عني دلوعه , والكل ما عجبه كلامي عن التدريب وكيف انو صغط وكيف انا هيك ضعيفه , محدش حس باللي مريت فيه , والكل شاف اني مكبره الموضوع وانو بعرفش اشي , كديش كرهت حالي وكديش نفسي الدنيا تبلعي , وكديش كنت منحرجه ..~

بستغرب من حالي , كل ما بتزكر حالي زمان بحكي ليش صرت هيك , العمر بأثر ؟ ولا شو ؟ كنت اشتغل يومين ورى بعض وما انام الا ساعتين ومع هيك كنت متحمله , مريت باوكات زي ما حكتلي امي صعبه كتيره هان ومكنتش اشكي , بس هالسنتين هدول بلشت اشكي واتعب , من وكت ما وصلني خبر اني بكدرش اعمل ورقي وانزل ع البلاد , ومن وكت المرض اللي اخد اشي غالي عليا , وكل ما افكر بشو اخد وشو جاي عليا بديش امر باللي جاي عليا ..~