لا تـــــــزعــــــــــل

لاتزعل علي وتكلي ماحاجيك
خلي الدنيا تزعل وانتَ لاتزعل

شجره انه وحبيبي الماي انت
واموت انا بغيابك حتماً واذبل
...
ونور اعيوني انت ولو رحت ما شوف
واذا ما اعمى يمكن انكلب وجفل

انطق كول كلشي ولا تكول فراك
وسوي شما تسوي بيه انه اتقبل

عكبك راح اخلص وانسل بلياك
ومو بس انه كلبي وياي هم ينسل

شلون انطاك كلبك تبتعد وتروح
جاوبني بعذر يقنعني من أسئل

مات الكلب بعدك موته الفراك
وبس يسمع بجيتك ينهض ويعدل

واذا انتَ رحت المن اكول اهواك
وبعد يا الاوصفه وبيمن اتغزل

تعال ورد اليه وانه انتظرك
وخل نرجع أحباب ارجوك مثل اول

لغيرك ماتوسل كلبي فد يوم
وجي هوه يحبك الك يتوسل

واذا غيرك احبن يجوز مايوفي
وأخافن مايقدر حبي اله وانذل

صعبه العيشه دونك تنحل بلياك
واذا مويمي انتَ العمر هم ينحل

كلشي انتَ بحياتي لو رحت كلشي راح
وحتى الفوك عكبك ينكلب أسفل