كـتابي ..~

السلام عليكم ..~

بعد تفكير طويل ومخمخه كثيرة قررت افتح مدونة

اليوم الاثنين 1434/12/23 ** 28/10/2013

..

السراحه ما كنت ناوي افتح مدونة بس شفت بأحد التواقيع مكتوب تحت مدونتي << الصدز حسيته كشخه << قلت قدااام

..

الشعر ما احبه

ولا احب أقراه حتى الخواطر بعد ..!

يعني هـ المدونة بتصير سواليف وحكم بما اني حكييم

#اتمنى ما يطلع شيء خارج المدونة ..~

Top 5 :

1- detective conan <<< لا تعليق مع ذا الاسطورة ..~

2-naruto - one piece >>> ما اقدر افضل ذا على ذا كلهن اساطير

4-Tokimeki Memorial - Only Love >>> هذا الانمي موب ذاك الحماس بس حصلت معي قصه يوم اتابعه عقبها صار من التووب

5-Shingeki No Kyojin >>> تبا لهذا الانمي مايخليك تاخذ نفس ..!

# هذا التوب قابل للتغيير مع مرور الزمن

What good is a pirate if he can't do what he wants – roger -
" ما الجميل في أن تكون قراصانا إذا لم تستطع فعل ما يحلوا لك " – روجر –

أآسممي ..~

على كلام امي سلمهاا الله من كل شر تقول ..:

اول ما حملت بك شفت أحلام << مهوب الطقاقه

يعني رؤيا والمره تعرف من احلامه هو ولد ولا بنت << تقول شفت بشت او شماغ << الصدز نسيت

المهم تقول قلت لـ ابوك انه ولد قال الحمد لله ..~

تقول يوم ما بقى على ولادك الا شيء بسيط قال ابيتس تكشفين قلت خلاص ..~

كشفت لما طلعت النتيجه جتهاا ممرضه هنديه قالت لامي الهمد لله كل شيء يجي من الله كويس

تقول امي احسب بك شيء قلت له الحمدلله قالت ماما انتي بيبي بنت

قلت الحمدلله ..~

راحت لبوي وقالت له يقولون كذا وكذا << ابوي زعل بوقتهااا ..~

مع العلم ان امي شاكه بالموضوع لاني مو اول مولود تجيبه ..~~ << انا خامس مولود

وفي يوم ولادتي صار لعمي حادث ودخل العناية وبيسوون له عملية ابوي راح لعمي وبنص العمليه دقت اختي على ابوي قالت امي جابت ولد

ابوي مباشره قال هـ الولد اسمه علي على عمه

المهم نجحت عملية عمي ولا نجح تغيير اسمي

قبل فتره سألت امي قلت وش مجهزه لي اسم قالت فرح << بغيت اصير فرح

# خلاصة الموضوع اسمي علي

الأمهات عندهم مشكله بالوقت تقولها

قوميني 8 تجيك 7 وتقول قم

بسرررعهالساعه 9 ☺̷*beer*

^لا اعلم من الكاتب لكن امه

مثل امي الله يخليها ☺̷<3

اذا لم تجد عدلا في محكمه الدنيا ..~

فأرفع ملفك الي محكمه الأخره ..~

فالشهود ملائكه والدعوة محفوظه..~.’

والقاضي احكم الحاكمين ..!



,’,’,’,’,’



الحمدلله ..~

النسيان ...~

اكبر مشكله في حياتي هي نسيان الاسماء ..!
انا الاسم مباشره انساه ..!
كثير مواقف محرجه والسبه هي اني نسيت وش اسمك ..!

,‘,‘,‘

قبل فتره دخلت احد محلات الطيور ..~

كان العامل يتكلم مع احد الزباين انا اسمع صوت الزبون موب غريب عليّ اخذت كيس وحطيت فيها الي ابي من اغراض

وانا احط الاغراض الا ويلتفت الزبون ويناظرن انا حسيت انه يناظرن كملت وانا احاول اجيب من هذا الشخص

يمين يسار ما اتذكره ابداً

قلت خلني اروح احاسب وكأني ما اعرفه وأن قال شيء اقول مشبه <<< ..~

شلت اغراضي ورحت احاسب العامل كان مشغول يقطع دجاج للرجال ..~

قعدت انتظر والرجال ما غير يناظراً انا رفعت راسي وقعدت اناظره << ودي اتذكر وين انا شايفه

وللأسف ما تذكرته

قال : يا أنور (اسم العامل ) حاسب الشيخ علي ما يسلم ولا كأنه يعرفاً ..!!!

<< انا بـ اللحظه ذي بديت احس بحر شديد

قلت : ياهلا حياك الله بس من معي << انا من ذي اللحظه تذكرت انه مدرس ايام المتوسط بس وش اسمه ما ادري

قال : معقوله ما عرفتاً ..~

قلت : السراحه مو غريباً عليّ ..~ <<

قال : ما تذكر احد مدرسينك ..؟!
قلت : ايام المتوسط ولا الثانوي << مسوي اني نايسه << وأحاول اتذكر وش اسمه او ابو من

قال : مدرس تاريخ ثاني متوسط ..~ّ

قلت مباشرة ..: جبّال << هذي معيارته ايام المتوسط

قال : الحين ما سلمت عليّ ولا عرفت اسمي وتقول معيارتي ..!!!!
<< اومير يصير وجهي كذا

سألاً وش دخلت ونصحاً وسألاً عن العيال ومن هـالامور ..~
وقال : شف الله يجعلكم جميعاً بحل وانتم حللون << الله يجزاه خير وقسم مستحيل انساء ذا الشخص ..~

,‘,‘,‘

قابلت رجل كبير بالسن ونسولف انا وهو قال تدري وش اعظم نعمه حنا غافلين عنهاا ..!!
قلت : والله ما ادري ..~
قال : النسيان من اعظم النعم قال يوم تموت أمي كرهت العيشه وكرهت كل شيء ومر والوقت ونسيت كثير من الاشياء و الحين عندي عيال وأحفاد فـ يآربي لك الحمد على هـ النعمه ..~

..

الحمدلله ..~

,‘,‘,‘

# خلاصة الموضوع شفتوا المدرس الي شفته بمحل الطيور قسم بالله الى الحين ما أدري وش اسمه