مأساة روح {هالكه} في اوراق تائهه ~

السلام عليكم من جديد ....~

اشربت نص كاسه الكهوه ,وهيني ..~

اليوم هو السبت والساعه 8 واشي بالليل , 3\2\19 ..~

؛

اخر مره كنت بالمدونه من حوالي شهر , وراح امشي بالسناب لاني كعدت حوالي نص هالشهر احط كصصي فيه , عشان اشوف شو مجريات مهمه صارت معي ..~

؛

امرضت بزياده وصارت معي كصه وغير انه ظهري وصلت معاه لمرحله مكدرتش اتحمل , لهيك روحت ع دكاتره بس ما اعطوني حل بخصوص الظهر الا تمارين وراحه , بس اعطوني دوا للكصه التانيه ولازم اداوم عليه حوالي 3 اشهر , وهالدوا بوجع المعده وبسد النفس وكديش متغلبه منه ..~

؛

انحركت في رقبتي حرك كبير , يالله شو وجعنّي , بس الحمد لله الدوا اللي استخدمته ساعد وخفف من الوجع , بس للاسف علّم مكان الحرق ,بس الحمد لله مش كتير ...~

؛

اتكاتلت في الشغل مع كارمليتا ودون مكتل كبير كبير , وما سكتنا , وكعدنا نغلط ونسب ع بعض , بس عاودنا اتصالحنا ..~

؛

حبي مريض والله يستر ..لانو مرض كبير وان شاء الله ميطلعش اشي ..~

؛

هدا شو اللي متزكره , عفكره مفعول الكهوه ما مشي معي , انعست ! عشاني مكمله من امبارح مش نايمه ..~

||

ملان عندي صور , وملان شغلات اشتريتها , صرفت بهدول الشهرين عن صرف سنه من كتر منا مكهوره ومتنكده

||



عم تحكي انو من اهدافك انو تسافري وكمان يصير متاح إلك السفر وين مكان مشان تزوريني , بتعرفيش كديش هاللعبه بتزكرني فيكي وبايامنا ..~

؛

- بطلّت اخاف منك !
- امبين اتعبتي من العيشه ؟
-اغلطت !!

كديش بحب الرموز بالحكي .

السلام عليكم ...~

اليوم هو الاحد والساعه 10 ونص الصبح || 3\3\19

؛

نمت منييح الحمد لله واصحيت بدري , حكيت مع امي اول ما اصحيت مشان في كصه كانت في بالي وبدي اطمن , وحكيت مع خواتي واخوتي اشوف شو مخططاتهم اليوم ؟ واد حد منهم بده يجي عندي ؟! ولحد الان محدش عارف راسه من رجليه مشان الدنيا عنا عواصف وبتخوّف واللي ملوش مشوار مهم ما يطلع من البيت , افطرت واشربت كهوه , وبستنى في الطلبيه من الامازون تبعتات الوصله للبلستيشن , كديش مكهوره اني مش كادر افتحها وانو اجت العطله تبعتي وانا مش لاعب عليها , وبعدين فتحت اللاب توب وبلشت اشوف بفلم , وحكيت شو رايك يا مير تروحي ع المدونه بما انه ملان عندك صور تحطيهم وتحكي عنهم , بس بالاول بس جليت جلي الفطور ورتبت الدار وهيني ..~

امفكره اعمل كمان غله كهوه لاني بلشت اكسّل , بس بنفس الوكت بدي استنى اد حد بيجي عشان اشرب معه ..~

راح احكيلكم اليوم عن ايش في الشنته تبعتي من حوالي 3 او 4 اشهر , في اواخر اشهر سنه 2018 .الصور من زمان بجهازي :~

||



مش عارف من وين اجتني هاي الشنته , او من وين اشتريتها , لما ازهكت ستيف مادن وعشان ظهري كتير كان يوجع فا كعدت ابعبش في الشناتي اللي عندي واخترت اخف واحده اللي هي هاي , وطول الوكت وانا استخدمها , اضل خايفه في اي لحظه انها راخ تنخلع وتنكطم من كتر مهي خفيفه كانت .




راح ابلش من زاويه اليمين :~

تسالي الي : بحب يكون معي اشي يتاكل لاني بشرب دوا وبحبش اشربه ع معده فاضيه ,ومعهم تسالي تبعت ساده , لاني اول ما اعبر البيت احب اطعميه .

كالعاده الدوا : ادفل للراس, وابروفين\تروفين لظهري هدا من الضفه بطلبه من امي تجيبه معاها , ولزكه للظهر وهاي كمان بطلبها من امي تجيبها من الضفه لانو اللي هون ما بستفيد عليهم من مره , ودايما لزكه للظهري لاني خلص اوصلت لمرحله انو اتأقلم مع الوجع .

الشنته تبعت المكياج

||




لما كرّبت الصوره اللي هي وصله لشعري متل الهنود الحُمر , بحب احطهم بشعري كتير , حتى امفكره اشتري .



وهاي عباره عن تعليقه في الرقبه كزاز ع شكل فيل , كانت في السنته لسبب شخصي

||




الكتاب اللي لحد الان بقرأ فيه , وكمان كنت بوكتها شاري الرزنامه للسنه 2019 اللي ما استخدمتها , بستخدم بالوكت هاد واحده تانيه , وكصه من الكصص للصغار , اظن حد منهم اعطاني اخبيها عشان ما اضيع .

||




الشاحن والسماعات اللي ع زمنها كنت استخدمهم , وبكزب عليكم اد حكتلكم اني بفكهم , بتركهم مشبكيّن مع بعض بهمنيش , ولحد الان بكون حاطط بالشنته تبعتي حتى لو ما بستخدمهم لانهم تبعات امي .

||



الدزدان تبع امي اللي بستخدمه للفكّه

||



والمفاتيح ..~

||

هدول شو كانوا بشنتيتي السنه الماضيه , اما بالشنته تبعت هاي السنه اللي يالله شو مبسوط عليها , راح احطلكم شو في شنتيتي هاي السنه ..~

||

كعدت نص ساعه وانا ادّور في المدونه ع الشناتي الكديمه تبعتي :~

هون و هون و هون و هون وكمان

؛

السلام عليكم ..~

اليوم هو الاثنين والساعه 5 واشي المغرب || 3\4\19 ..~

يوم الاحد كان من الايام الهاديه عليّا , اجت عندي اختي الكبيره بعد الظهر كعدت حوالي ساعه , وبس اجت مشان تجيب الاكل اللي عملته الي , وبعدها وصلت الطلبيه اللي هي وصلّه البلستيشن واخيرا , وفتحت البلستيشن وضليت للعشره بالليل , كان نفسي اسهر بس لانو عليا شفت صباحي لازم انام بدري ..~

اصحيت اليوم حوالي ع 7 الصبح وكان ضايل ساعه ع موعد المنبّه , بس عشان حضره ساده اللي بضّل يصحّي فيّا ومعرفتش ارجع انام بعدها , لهيك كومت افطرت وجهزت حالي واطلعت ع شغلي الشفت الصباحي , عنا الدنيا مطر وعواصف , وع كد ما بحب المطر , بس من وكت السياره بضّل تفحّط وتشّحط مع المطر , صرت اهكل هم المطر لما اسوك , والصبح بكون ازمه سير اشي مش طبيعي , وعنا الشوارع طلعات ونزول بخوّف , بس الحمد لله اوصلت الشغل ع السلامه وكان ضايل ربع ساعه لبدايه الشفت , اتصلت ع امي اطمّن عليها وحكيت معاها ومع ابوي , وبعدها دخلت الشفت ..~

||

اطلعت الظهر من الشفت , واتواصلت مع خواتي اشوف شو عندهم مخططات ؟ اتفكنا انو بنكدرش نشوف بعض اليوم , لهيك لما اطلعت من الشغل حطيت براسي اني ارجع عالبيت , وبالطريك , ميّلت ع محل الورد هو بكون كريب من شغلي هاد , واشتريت ضّمه ورد لانو فش عندي وبعرفش اكعد بدون ورد بغرفتي , وبعدها اوصلت البيت وكعدت ربع ساعه ت لكيت مكان اصف السياره , وانزلت ع البيت واتغديت واشربت كهوه, وبعدها اطلعت من الدار لانو عليا موعد ..~

||

كان عليا اليوم العصر موعد لوظيفه جديده , ويا رب التمام ع خير يا رب ويوافقوا عليا , كنت في المقابله منيحه مع اني مش شاطره في المقابلات من مره اتا , والمدير حكى برجعلي بتلفون ويا رب , اد تم كلشي يا رب عخير بخبركم , واتلاكيت مع اختي ايمان لانو مكان الشغل كريب ع بيتها , اجت كعدت معي عشر دكايك , وبعدها ارجعت عالبيت ..~

||
عليا الليله سهر ويا رب تهونها علينا يا رب لانو عنجد صار الشغل متعب لدرجه الكل صارت يتنكّد وبطّل حد يصبّر حد , وفش بريكات فيه لهيك بنضل صاحين 12 ساعه وع اعصابنا وكصص ..~

؛؛

بدي اروح ارتب الدار واجهز حالي واتسهل ()

؛؛

ايش اشتريت :~



كالفن كلاين حسب ما متزكره 35$ , مش متأكده بس

كديش حبيتها وكديش بلبسها وكديش مريحه , الايام اللي بديش امشطّ شعري , او وجهي مش عبعضه وبديّ اخبيّه بلبسها , او بدي اشخّص بلبسها , بالفتره هاي بس بلبسها هي .

؛





في عيد الحُب كل واحده فينا صحّلها ورده كد نصّنا , انا حبيت احط تبعتي في المطبخ

؛



كلشي بدي اياه مش هان , ومستغربه ليش محدش بده اياني , بس اتجرأت انو يكون حد بده اياني ..~

||..~

السلام عليكم ..~

اليوم هو السبت والساعه 10 بالليل || 3\16\19 ..~

؛

اخر اخباري؟ انطردت من شغلي , صارلي حوالي اسبوع ونص , لهيك كنت بفتره نقاهه عشان مكسور عليا نوم , وكمان البلستيشن سوسه , كل ما يكون معي وكت بس بضل عليها , او بشوف درامات وافلام , وباكل كتير , ومرتاحه اشي مش طبيعي ..~

؛

عملت مصيبه كبيره بالشغل , بس كدبت وغطيت عليها انو مليش دخل , ولما شوفت كارمليتا اللي دايما تعمل مصايب بتخوّف بالشغل وانا اتحمل المسووليه عنها ومعاها ما وكفت معي بالمصيبه تبعتي , ابتسمت وحكيت بعكلي " اوك , انا راح اتحمل المسووليه لحالي وبديش جميله حد " وبالزبط اتحملت المصيبه بس حطيت السبب ع جماد احكي وغيرت بالاشي اللي صار , وحكيت لكارمليتا مش جاي اشتغل مره تانيه عشان توصل خبر للجينفر , لاني عنجد كرهت كارمليتا وكتها غير شكل , وحكيت بتستاهلش كل المنيح اللي كنت اعمله معاها , وبالزبط لما طلع الصبح , بلشت كصص التحقيق في اللي صار في الشغل وتلفونات معي ,وكل كلامي معهم اني ازهكت واتعبت لهيك فهموا عليا اني بديش اشتغل لهيك حكولي خدي اجازه من شفتات الليل , لانو بعرفوا انو بالاصل قرب موعدي الاجازه تبعتي اللي دايما باخدها برمضان ..~

||

بالليل اللي صارت فيها المصيبه ,قبل ما تصير المصيبه , كتير كنت احكي مع حالي بعكلي وافكر وافكر وكنت صريحه مع حالي ع بلاطه , انو ليش بشتغل وانو ليش بتحمل وليش وليش وشو انا بعمل وشو هي المصاري وشو هي الحياه وكل هالكصص , وكديش كنت اتزكر نصيحه حاح اللي كان يضل يحكلي ما تتركي الشغل , ومع هيك فكرت واوصلت انو شغلي هو عالفاضي , وطوووب صارت المصيبه , كأنه ربنا ريحني من الشغل الحمد لله ومن شفتات الليل الحمد لله يا رب ..~

||

كانت ردت فعل كارمليتا اني بديش ارجع اشتغل صدمه ومصيبه عندها , لانو اكيد راحت مير اللي تساعد ويرتكن عليها , وكد ما حاولت في ليله المصيبه تقنعني بالمصاري وانو مش راح الاكي شغل بهيك مصاري ومش لازك اتركه , عالفاضي لاني عنجد حقدت عليها , لان كتير كصص صارت وضلت الكصص تتركم عليا منها , وبدي اياها تتعذب بدوني , بدي اياها وبدي اياهم كلهم يتحسروا عليا , وبعد بيومين اتصلت عليا وتحكي انها راح تخفف ايام وبطّل عاجبها الشغل بدوني , وانا اسمع هالحكي واحكي الله لا يردّك ولا يردّكم كلكم , كنت نعمه الكم ..~

||

ردت فعل اهلي ..~

امي وابوي اكيد زعلوا بس مش سائله بتصدكوا , كد ما هم اعلى اشي عندي بالدنيا وبعرف عشان بساعدهم في الدوا ومع هيك حكيت في رب بوكف معهم , بس خلص اتعبت من هالشغل نفسيا , اما بالنسبه لخواتي واخوي 3 فا كتير انبسطو اني تركت الشغل , اما اخوي واحد ما حكى اشي ضل ساكت , الكل فكر بصراحه اني راح اندم او اتحسر ع الشغل , بس بيني وبينكم من مره مش فارك معي الشغل وبيني وبينكم مبسوطه اني بطلت اشتغل شفتات ليل , والله العظيم انو نفسيتي اتغيرت ومزاجي وعلاقاتي وتصرفاتي , بطلّت حيوانه , او احكي خففت مش ع الاخر ..~

||

اما بخصوص كيف راح اعيش بدون مصاري ؟ انا بحكيلكم , اللي صار هو واحد زكّف وواحد طار, يالله هالنكته ولا عمرها بتصدّي , اللي صار عنجد هو بتتزكروا لما حكتلكم روحت قابلت بالشغل تاني ؟ وافكوا عليا الحمد لله , الشغل هو في مقهى وراح اعمل كهوه , يالله كهوه !! اشي رهيب عالاخر , طول هالاسبوع اللي تركت فيه الشغل التاني او الاصح انطردت , كنت مشغوله في التدريب في الكهوه مع المدير ومع اللي بشتغلوا , كتير مصتصعبه لانو عنجد اطلعت بعرفش انواع الكهوه واسمائها , وبعرفش اشي , بعرفش للكاشير , بعرفش اسماء الاكل والكصص , ومع هيك كل يوم بتعلم وبدّرب لوكت ما يصير تمام بمسك الشغل عخير يا رب , مش هالمصاري من مره , يعني اللي بطلعه بشهر كنت اطلعه باسبوع او اسيوعين بالشغل الكديم , بس طز , مش بحاجه الا لمصروفي الاساسي ..~

||

وبس ()

السلام عليكم ..~

اليوم هو الاحد والساعه بعد نص الليل واحنا اخر شهر 3 ||..~

؛

حياتي (فوضى) ومشاكل ومصايب , وع كد ما امي بضّل تحكيلي ما بتشد الدنيا علينا الا لترخي ومش راضيه ترخي , كله كوم وحُبي واللي صاير فيه كوم تاني وانا حيوانه ومش عامله اشي عشان اساعده , مش طالع بايدي اشي اعمله او انا بديش اضيّع حياتي , معاه اقل من سنه وبيطلع عند ربنا , ويحكيلي انو مش راح اكدر اشوفه , انو مش راح اكدر انزل , انو امنيته انو يشوفني , وانا حكتله ما بنزل لانو معيش ورق , اد تركت امريكا بكدرش ارجعلها , مستحيل , بحكيلكم انا متحطمه ومحدش بيعرف انو مريض وبدوش حد يعرف حتى اهله وبدوش يتعالج , بحكيلكم من وكت ما اعرفت الخبر وانا لا بعرف انام ولا بعرف احكي ولا بعرف اشتغل , عاجزه ومش محقق طلبه .. مستحيل اوعده او اكزب عليه واحكيله اه بترك امريكا وبنزل عندك وبضل معك , بكدرش , والله منا عارفه ..~

شغلي الجديد دايما بيطلع مشاكل فيه ع كد منا حابب الشغل وحابب اعمل كهوه , بس زي كأنه المحل بيطرد فيّا , من وكت ما بلّشت اشتغل وكلشي بالمحل بيخرب , من مكينه لمكينه ,وجهي ع المحل مش منيح , وكصه حساب المصاري اللي دايما بتلخبط فيه , وكل يوم يوم الا ما يصير كصه كبيره بالشغل , وكد ما انا والله والله بتحمّل وبحكي خلص هدا قضاء ربنا بس بنفس الوكت بعرفش ايش اعمل , انو اتركه للشغل ؟ يعني اشاارات اني اتركه ؟!

وغير هيك الاشي اللي كمان بكهرني هو سياراتي بضّل تخرب , السياره التاني اللي اشتريتها بضّل تخرب , وبتخرب بالليل وانا راجعه من الشغل ع الدار , وبتكون مطر ورعد وعواصف وفش حد بالشوارع ومين بدي اسال عشان يساعدني بتصليح السياره .؟ اخوي تلات اللي مسافر , ولا اخوي واحد اللي بحكيش معانا من زوجته الكطّاعه ولا حبي اللي مريض وحالته حاله ! مين ؟ واللي كان يكهرني انو يكونوا الشباب الحشاشين حواليا وتطليعتهم بتخوٌف , اكون احكي بعقلي " انتي يا مير مش وجه يترك الدار , انا مش لازم اطلع من الدار " .. ومع هيك ربنا ينزّل الصبر عليا والهداوه لوكت ما اضل استدعي كأنه ربنا بده يسمع صوتي وتشتغل السياره , وصارت تلات مرات عامله فيا هالكصص ..~


ولا احكي عن صحتي ؟ عشان شغلي كل المحل عليا من كتر مهم اصحابه بخلا , بس واحد بشتغل , ليهك فش بريك , يا حبيي ع ظهري واجريا , التفكير اللي بكتل عقلي بكصه حبي , والضرب اللي في اجريا وظهري , ولا بطني ومعدتي من الدوا اللي باخده ..~

شايفين , هدا سبب اني بجيش عالمدونه , لانو فش يوم او ساعه حلوه عليا , كلها كصص صعبه وابتلائات , وبكون احكي ليش انكّد عليكم ؟ ليش اذكّر حالي بالنكد اللي صار بايامي ؟ لهيك اغلب وكتي بعد ما ارجع من الشغل من فلم لفلم ومن مسلسل لمسلسل , اهرب ..~

صارلي يومين او تلات مش جاليه ولا منظفه الدار , ودايما عيوني منفخيّن من كتر الدموع اللي بضّلوا فيهم اللي مش راضين ينزلوا ..وفش فيا حيل افتح البلستيشن ..~

السلام عليكم ..~

اليوم هو الاحد وشوي بتصير الاثنين وبنعبر بنص الليل ..~

اصحيت بدري اليوم مع اني نمت متأخره , وغير اني كنت اضل اصحى من الكوابيس , واصحى دايما مخنوكه وعرقانه , وطبعا لما اصحى ما اعرفش ارجع انام بسرعه, واكون افكر انو مع مين احكي ؟ امي اللي بتنكهر وبتزعل لما تعرف اني بنامش منيح ؟ ولا صاحباتي اللي كل كلامهم معي تحقيق عن حياتي وانو اترك امريكا وانزل عندهم ! ولا حبي الا احس بالعجز وانا احكي معاه , لهيك ضليت اتكلّب بالتخت لوكت ما اغفيت ..~

لما اصحيت الصبح لكيت مسجات وكصص , منها من بنت اختي لانها بتشتغل معي بالكهوه , وهي بالاصل اللي وصّت عليا , كانت تسال عن مصاري الكاش تبعت المحل وفي ناكص مصاري ومبلغ كبيير , لانو انا سكّرت المحل السبت وهي فتحته الاحد , ولما قرأت المسجات كعدت فتره استوعب شو بتحكي ؟ بس بنفس الوكت وانا اقرأ وصلني مسجات انو لكت المصاري , وانا كنت بفتره لسا صاحيه واستوعب , بس كمان متأكده من الحساب والكاش قبل ما اسكّر المحل , وحكيت بعقلي لسا ما طلع الصبح بدها تطلعلي مشاكل , وكمان في مسجات من خواتي وايمان بتسأل اماني عن صحتها ومن كلامهم انو اماني مريضه , وكعدت بنفس الوكت استوعب شو صاير . وبسألهم ومحدش مجاوبني , بس ايمان بعتت انو راح يجيو عندي بعد الظهر , عندي عاده وهي اللي محكاش اليوم بعاود يحكي بعد سنه واول عن اخر راح اشوفهم وراح يخبروني , بحاول ما اكبّر الكصص , بس بشكل عام لكل الناس بحياتي معنديش الفضول انو اعرف عنهم , بسالهم مره ما حكو ما بعاود اسال , ابصر يعني بشوفه اد بدك تعمل حالك غامض او تكيل مش عليا ..وعنجد بحترم كتير اصحاب عليا غابوا ورجعوا لانو بعرفوني دايما معنديش مشكل مع اللي برجع , ولا مشكل مع اللي بحكيش ..~

عملت فطور وكنت احلم في الريدبول , ونظفت الدار وجهزت حالي الا امي بتتصل وحكيت معاهاوبتحكي مهي اختك اماني كانت بالمستشفى , يالله معيش خبر , صار عندها ضيق نفس ووجع صدر وحرقان , وقلبها بضرب بسرعه , بس الحمد لله طلعت كل فحوصها منيحه وفش اشي , بس عندها زي شد عضلات والتهابات او تمزق نحكي , اعطوها دوا , وضليت 4 ساعات بالمستشفى , هدا كاين اللي صاير , خلصت حكي مع امي , الا جرس البيت بيرن وكانوا خواتي ,ضلوا عندي لوكت طويل , والصغار كتير غلبوا وصرت عنجد مكدرش اتحمل , وحتى اليوم كنت مش عبعضي , مش مركزه بالكلام اللي بحكوه , وكنت عصبيه , وحالتي حاله ..~

بعد ما اتسهلوا خواتي , حكيت بدي ارزع الورد اللي عندي , زرعت الورد وضايل عليا كمان كم شغله ازرعها , وبعدها اكلت واتمددت اشوف بمسلسل وهيني ..~

||





||

السلام عليكم ..~

الاثنين والساعه 11 ونص بالليل || واحد الشهر ..~

||

اصحيت بدري لانو كان عليا الشفت الصباحي تبع يوم الاثنين ما غيره ما اتغير الحمد لله من تلات سنين والله يدومه كمان , بس اصحيت ومش جاي عبالي اطلع ع الشغل , بالاصل امتى بيجي عبالي اشتغل الايام هاي , بس عنجد مكنتش كادره افتح عيوني , جهزت حالي واطلعت حتى بدون مكياج لانو شوفت وجهي صافي الحمد لله يا الله شو هدا اشي بحبه , وغير انه معنديش طاكه احط مكياج ولا حتى وكت ومزاج , لهيك بس جهزت حالي بلبسه كنت لسا حاطهها عالتخت من يومين , بديش افتح الخزانه , بس الاشي اللي عنجد كعدت وعملته هو عندي مكينه للوجه بتخفف من التنفخ تبع الصبح , لهيك مشيتها شوي ع وجهي عشان اريّحه , يبي كديش بحب عالمكينه , لانها عنجد بتريّح وجهي وكأني نايمه وشبعانه نوم , واطلعت وكنت مبسوطه انو فش مدارس زي هداك الاسبوع يعني فش ازمه سير , وبعدين طول الوكت وانا اسوك اشوف طلاب مدارس , احكي امبين في مدارس ؟!! وطلع اه , لويت بوزي واوصلت الشغل , ضليت بالسياره لوكت ما يجي موعده , وانا بالسياره اتصلت احكي مع امي , نط اخوي وابوي يحكوا معي , وانا بصراحه مش فتاه صباحيه من مره , يعني باخد وكت لاصحصح , وبصحصش بدون كهوه , لهيك معنديش هدا البال الصبح احكي مع اي حد , وخاصه هالاخو , وابوي لانو من الناس اللي بحكي الكصص بالتفصيل التفصيل الممل اللي عنجد بملل , يابا لسا الدنيا الصبح سامحني , بس امي حبيبه قلبي بعرفش ليش بكدر اتحملها وبكون مستمتعه بالحكي معاها , وانا احكي مع اخوي سالته وين امي , اجت حكيت معاها شوي وطبعا هي فاتحه السماعه وبلّش الكل يشارك بالكصص , وانا لما شوفت هيك حكتلهم " السلام عليكم " وسكرت البلفون ,افطرت وانا بالسياره وكنت احلم بالكهوه , ما مصدّق ادخل الشغل عشان اعمل غلّه. وبعدها دخلت الشغل ..~

بالشغل طبعا المزاج مش ولا بد لاني بضل افكر بكصص كتيره , بس بنفس الوكت صار اشي وانا احكي مع صاحبي وبصراحه اضحكت من قلبي , واظن صارت قبل هالمره مع حد , بسأله كيف هو ؟. بعت كلمه " تمام " مش عارفه يا تلات مرات يا اربعه , وكل مره يبعتها يكتب الاملاء غلط , بالاخر كتبلي " انا زفت , زفت " وزبطت الاملاء مكدرتش الا اني اضحك , وكمان لما حكالي انو بلّش يتعلّق في بنت , يعني بلّش يحبها , وحكى " والله عوكش احبها , اكيد بلوك بنص شكلها " يعني عمللها بلوك ولا يحبها من اصله . وبعدها اجاني مسجات من صاحبي انو طلّق مرته , ولما قرأت المسج انصعقت , وبعدها اختفى , يا ريت تكون كزبه نسيان !

بعد الشغل لانو اليوم بدايه الشهر يعني لازم ادفع اجار البيت , لهيك ميّلت ع البنك وعملت التحويل , وكنت ع الخط مع امي , كانت مش عارفه تنام , بعرفش اد حكتلكم امي وكعت واجرها انشعرت , وصار للكصه يمكن شهر او اقل , ولحد الان اجرها بتوجع , وكديش مكهوره اني مش عندها ادير بالي عليها واني عاجزه , استعفر الله ! ما مني فايده , لهيك كنت اغلب الوكت مع امي نحكي , وكمان كانت تيجيني تلفونات من خواتي , يسالوا عن كصص ..~

اوصلت البيت , اه كعدت حوالي ساعتين وانا احكي مع امي بالبلفون , وحتى سالتني عن حبي انو ليش هو مختفي وليش ما بحكي معاها , حكتلها يما اللي فيه مكفيه , وهي فهمت عليا , انو في اشي وبتعرف اني مش راح احكيه , لهيك سكّرنا ع سيرته , وحكتلي بشوفك ما رحتي عند صاحبك ؟ وعنجد كان في اشي بعقلي بحكيلي اني ناسيه اشي شو هو ؟ واطلعت كنت واعده صاحب اهلي اني ازوره اليوم ع الظهر وانسيت يالله شو صايره انسى, لهيك حكيت لامي خلص راح النهار وبتصل عليه اتأسف منه , وبالزبط امي اتسلهت تنام وانا حكيت معه وتأسفت وبعدها اكلت واتمددت .~

اجاني تلفونات من خواتي , وكعدنا نطمن ع بعض لانو ايمان عندها عزومه , واماني لسا مريضه , وانا الكل شفقان عليا لاني لحالي , مش عارفين كديش هدا اشي انا بالاصل بحبه وبعشقه . وكمان من اخوي واحد بعت مسجات وكصص , وكل كلامه انو كيفني ؟ وانو عشان ضميره اني لحالي وهو ما بيجي يطل عليا وكل هالحكي الفاضي تبع الشباب اللي بمشيش معي , بس اد كلامه بريّح ضميره هو ورفع العتب انو بسأل عليا عنده , بهمنيش يضل يحكي من هان لبكرا , خليه يكزب ع حاله ويصدكه , وانا عنجد بستناش اشي من حد ..~

وصحيح احلمت انو حبي مات , عشان هيك اصحيت متنكده هلكيت اتزكرت , وفي الحلم اجو خواتي وامي وبستنوا في رده الفعل تبعتي لما يحكولي انو مات , امي اظن كانت خامله التلفون وخايفه عليا , ومش عارفه تحكي ولا لأ هي كل ملامح وجهها بالحلم كانت . ولما اسمعت الخبر بكيت وعيطت وسحبت حالي وعبرت غرفتي واصحيت من الحلم , لعاد يعني حياه وفرج الحلم ؟ بس الدكتور حكى فش امل يطيب , فش اشي كيير ع ربنا ..~

طول حياتي بكل المصايب اللي ع راسي , كنت اصبّر حالي انو عالاقل في صحه , بعدين بلشت صحتي تخرب , وكتها بلّشت اصبّر حالي انو الكل عايش ومش متحسرى ع حد , طوووب حكتلي الدنيا خدي .. حبك مريض وراح يموت في اي لحظه وبعطيكي سنه ..~

برجع وبحكي ما بعد الصبر الا القبر .~

بديش اصبّر حالي , واد شغلي هدا الاسبوع بكون نكد , بدي اتركه !

||







..~

السلام عليكم ..~

اليوم هو التلاتاء والساعه 10 بالليل || 4\2\19

؛

بعد ما كنت ع المدونه امبارح , طفيت اللاب توب وحطيت راسي ونمت , وزي العوايد اضل اصحى بالليل , وما اعرفش ارجع انام , اصحى امشي بالدار , واوكّف ع الشبابيك واشوف الهدوء والبيوت المعتمه كديش اشي حلو , زي كأنه خرابه , بس عشان البيت كريب ع الطريق السريع الا ما اسمع صوت السيارات مع المطر , واحكي مع ساده شوي وارجع اتمدد عالتخت ..~

اصحيت يمكن حوالي ع 9 الصبح , وكان ظهري يوجع اشي بخوف , وكنت كمان نعسانه, بعرفش شو هو الاشي اللي كان يخلّيني اصحى غصب عني , لاني اصحيت وبراسي اشي اعمله , بس مش عارفه شو هو , بس اصحيت ع حلم كديش بكرهه لما يتكرر , انا صبيه اد احملت بالمدرسه الابنتدائيه والاعداديه اللي درست فيها مع كم بنت من صاحباتي ع ايام المدرسه , دايما نفس الحلم بالساحه او ع الادراج , بعرف انو يومي راح يكون متعب واشي مش منيح عليا , دايما الفال تبع هدا الحلم بكرهه وبخاف منه , بضل استدعي الله يكفيني شر هالحلم , وبالزبط لما شوفت الاخبار طلع في شغلات مش منيحه صايره بالمنطقه اللي فيها هاي المدرسه , انا صبيه اد بمسك البلفون الصبح عشان اشوف اخبار خواتي ومخططاتهم وكمان عشان ااشوف اخبار الضفه , الكل بستغرب مني اني بحب الاخبار, بحب اعرف الاخبار والاوضاع بالبلاد وكمان الاخبار هان قبل ما اطلع الدار , بعدها بسرعه افطرت لاني ما اتعشيت وكنت جعانه واشربت كهوه وشوفت انو الوكت سريع بمشي , واتصلت ع امي وكمان اسمعت خبر مش منيح ..صرت مش كتير احكي مع امي اول ما اصحى لاني بطلت اخد راحتي بالحكي , عشان اخوي وابوي جمبها دايما ..~

جهزت حالي واطلعت عالشغل , وكنت شاريه شويت اغراض يوم الاثنين , بس مكدرتش انزّلهم من السياره , لهيك نزلتهم اليوم قبل ما اطلع عالشغل , وطول الوكت ما وصلني اي مسج من خواتي ومش بالعاده , وانا صرت اخاف , بس عشان كنت مشغوله بالشغل وبالاغراض واني ما اتأخر عالشغل , اوصلت الشغل , وصفيت السياره بالموقف , وحكيت بدي اتاكد كيف السياره والمي اللي فيها ,’ لهيك فتحت الغطا تبع السياره واتاكدت من المي , ولازم اتزكر اخادها ع المكنيكي عشان اعيّر الزيت , وسحبت حالي وعبرت عالشغل , وكالعاده لازم البنت اللي بشتغل معاها تسمّعني حكي , دايما بتتفلسف عليا , حكيت بعقلي لسا ما عبرت الشغل , اطلعي من راسي انكلعي الله ياخدك , وبعدما مهي انكلعت , انا اتصلت ع خواتي اطمن والحمد لله طلعوا مشغولات بالدار والتنظيف وهالكصص , وبعدها اتصل عليا اخوي واحد وحكى بده يجي يشوف شغلي ويشوفني , اجى عندي كعد حوالي ربع ساعه , فتحنا كصه اهلي , وكصه اصحابنا , منهم حبي , وهو معوش خبر انو حبي مريض , هدا و اللي صار بينا ..~
مير :مش راح احكيلك شو ماله هدا اشي بخصّه هو بس كون منيح مع صاحبك لانو ما بتشوف الا هو مختفي عن الدنيا .
وبعدها انشغلت بالشغل وبالزباين , الا هو كان كاعد ع الطاوله واجى بسرعه ..~
هو : مير تشغليش بالي ايش في ؟ ايش اكبر من اللي صاير ؟
لانو في كصه كبيره صارت من يومين معاه واخوي معه خبر بالكصه الكبيره بس معوش خبر بالمرض اللي هو اكبر .
مير :صاحبك مريض
هو :شو يعني مريض شو المرض ؟
وحكتله المرض وحكتله بدوش يتعالج وحكتله فش امل .. بحكيلكم انصعقت من ردت فعل اخوي , مكنتش متوقع اخوي هيك يزعل , واخوي سحب حاله وتركني وراح , وانادي عليه بين الزباين وصتي عالي , وهو ولا سأل , عنجد مكنتش متوقع اخوي يزعل عليه هيك , وبعد ما راحوا الزباين اتصلت ع اخوي واحكيله انو ما يحكي لحبي واني اندمت اني حكتله وانو حبي بدوش حد يعرف والله يستر ما اخوي هلكيت يعبّرني بمشاكل ويطلّعني بسواد الوجه , بس لازم اخوي يعرف لازم عشان يوكّف معاه ..~

وانا بالشغل امي اتصلت عليا وكنت احكي معاها , وصحيح اخوي كال حط بالجرّه بغيشيش الي 10 $ وفطست ضحك , لاني يالله يالله يطلعلي باليوم 10 وافيات ..~

بعد الشغل اجيت عالدار , واليوم من الايام العذاب اللي اتغلبت فيها عشان الاكي مكان اصف السياره , اليوم بالزبط حسبت وهو كعدت نص ساعه بالزبط وانا اشوف هان وهان ع مكان اصّفه , ولما لكيت اول مكان طلعت صغيره , ولما شوفت التاني كعدت عشر دكايك بالزبط وانا اصف فيها لانها كمان صغيره , والله يستر ما اخد تكت عشان قريب ع الرصيف الاحمر , ومنطقه اول مره بروح عليها واكيد راح يشوفوا سيارتي مش من اهل الحاره ف الله يستر , وعنا الدنيا مطر مطر وكنت تعبانه وبديش استنى بالسياره ليوكّف المطر , كنت بدي اوصل الدار , لهيك سحبت حالي وانزلت من السياره والدنيا مطر والمكان بعيد عن الدار , كعدت عشر دكايك امشي تحت المطر وبلشت اسكع وارج , ما صدكت اوصل الدار ..~

الحمد لله اوصلت الدار واتعشيت وهيني , ولازم انام بدري لانو عليا موعد بكرا الصبح والله يهونّها ..~


||






||

السلام عليكم ...~

اليوم هو الاربعا والساعه 10 ونص بالليل || 4\3\19 ..~

امبارح بعد ما كنت ع المدونه , طفيت الاب توب , ورميت حالي عالتخت ونمت , كنت اصحى بالليل , احكي مع حبي وارجع انام , اصحى وانام , لوكت ما اجى الصبح ورن المنبّه , وكنت وكتها نعسانه , كومت من التخت غصب عني , وكان عليا اليوم موعد , بحكيلكم عن الموعد مع الوكت , اصحيت وبسرعه جهزت حالي واتاخرت وانا اجهّز حالي بعرفش ليش , يمكن عشان كنت كتير بطيئه ,كعدت نص ساعه وبالعاده بكعد عشر دكايك او اقل , وبسرعه حملت حالي وروحت ع السياره , ويالله امشي واطلع الطلوع وانهديت واعرقت قبل ما اوصل السياره , ولما اوصلت السياره ايدي ع قلبي انو يكون في تكت( مخالفه) , بس الحمد لله الحمد لله فش وكديش ارتحت , عبرت السياره واخدت نفس وبلشت اسوك , واتاخرت ع الموعد , لازم اكون غاد 9 , كنت غاد 9 وعشر دكايك , وكانوا يتصلوا عليا , وبعد ما اوصلت الموقف صفيت السياره ورايح ركاض عليهم , اوكعت , وكعه اخت شلن ع ظهري وظهري راح فيها مكدرتش اتنفس من الوكعه , لا حول ولا قوه الا بالله , كومت وانا اضحك مع حالي بصوت عالي واحكي مع حالي بصوت عالي كمان ,انو كنت متوقع اني راح اوكع , اوصلت عندهم وحكتلهم لازم اغسّل اديا وحالتي لاني كلي تراب وطين من الوكعه , بسرعه عبرت غسّلت واجيت عندهم واطلعت بسيارتهم واتسهّلنا ..~

الموعد هو رحله صغيره لمصنع الكهوه اللي بشتغل فيه , المدير اخدنا ع المصنع وبعدها اخدنا نتغدا بمطعم ورجعّنا , وانبسطت بالرحله مع انه مش هالكُبر المصنع من مره وما ورجونا كلشي وحتى ما اعطونا كهوه ببلاش , بس اعطونا طُبع لازكه ودبوس عليه الشعار تبع المصنع بورجيكم كلشي مع الزمن لانو مليش نفس اشبك البلفون وانقل الصور , انبسطت انو كانت معي بالرحله بنت اختي وكمان شب اشتغلت معه كم يوم ببس هو كتيّر بضّحك وكديش بتحمّل مزحي التكيل , والمسافه بعيده بس عشان كان الشب وهو اسمه هسوس وكان معانا المدير وبنت جديده بتشتغل بفرع تاني انبسطنا مع بعض .. والاكل كان كمان زاكي والمطعم حلو كتير ..~

لما رجعونا لمكان محنا صافين سياراتنا , روحنا ع المحل اللي بنشتغل فيه انا وبنت اختي واخدنا كهوه لانو سطّلنا بدون كهوه طول النهار , وبعدها اجيت عالبيت واخيرا بعد الرحله لانو المكان كتير بعيد , وامي اغلب الوكت تتصل تتطمن عليا , ولما اوصلت البيت كعدت اتهنى ع كاسه الكهوه ولسا ع البلفون مع امي , وبعدها رتبت البيت وغسلت , وضيعت وكت هيك ع البلفون عالفاضي , وهيني ..~

بس شو ظهري بوجع مولّع , اخ بس هالظهر ..~

السلام عليكم ..~

عندي صارت بعد نص ليل ودخلنا بيوم الجمعه|| 4\5\19 ..~

||

اصحيت اليوم ع كابوس , وبعرفش شو مال عقلي ليش بكرر الاحلام والاكوابيس هدا الشهر , هدا الكابوس شوفته قبل هالمره , بنفس المكان ونفس الليل ونفس الاضواض ونفس الشوارع بس الحادث غير , ومن الخبطه اصحيت من الكابوس ع صوت بلفوني برن , وكانت اختي ايمان ,كديش حمدت الله انو حلم , حتى بتزكر بالحلم حكيت مع حالي انو حلم تخافيش بس كان الاحساس انو حقيقه , ايمان حكت بدها تطلع تتحوج وبدها اروح معاها , اتفكنا ع الساعه والمكان , اصحيت وراسي بوجع مع ظهري , واكيد اطمنت ع حبي , بس كان مزاجه بدوش يحكي , لهيك اعطيته المجال وحكيت برجعله , بعدها اكلت بسكوت ع الفطور وحكيت المهم بدي كهوه , اد بشربش الكهوه العربيه الصبح بضّل متكسله ومزاجي مش ولا بُد , لهيك عملت غلّه كبيره وما اجى عبالي اضوي اللاب توب او التلفزيون او اعمل اشي , كعدت وصفنت وبعدها ضليت صافنه لوكت ما شوفت الساعه واني لازم اقوم اجهّز حالي , جهزت حالي وانا بجهّز بحالي اسمعت صوت السياره اللي بتنظّف الشوارع , وهدا سقط قلبي , فكّرته انو اليوم الاربعا وانا كنت صافف السياره ع يوم الاربعا , حكيت اكلتي يا مريم تكت , اللي خايفه منه صار (بعرف انو بكل تعليق بضل خايفه من التكوت )وبعدين حكيت بنفس اللحظه طز طزين ,-- كلشي بكون تمام اد محدش عرف -- , الله بعوّضني ع مصاري التكت بس مش لازم احكي لحد اني اخدته , وبنفس الوكت حكيت يا ربي ليش اجت تنظف السياره متأخر اليوم , مش هي بتيجي بدري ؟ وبنفس الوكت اتزكرت انو اليوم الخميس , كل هالاشي صار خلال خطوتين , شايفين كديش عقلي بضّل يتعب حاله , نهايتها انو اليوم هو الخميس والحمد لله كنت صافف السياره ع الاربعا يعني فش تكت .. وسحبت حالي واطلعت ..~

بالاول اتأخرت ع ايمان وبنفس الوكت اتفقدت السياره وشوفت انو فش بنزين, يا سلااام , يعني يالله يالله توصّلني للكازيه , ضاوي الضو الاحمر, الله ستر اني انتبهت , الله ستر عنجد الحمد لله , حطيت بنزين , دايما صاحب الكزيّه بعرف اني بصّف عند رقم 4 , بعدها كملت سواكه , واوصلت ع المكان , بس قبل ما اوصل ايمان بتتصل وبتحكي بدها تشتري كهوه واد بدي , اكيد لازم بدون سؤال , صفيت السياره وكعدت استنى في ايمان , بعدين لما اجت ضلوا بناتها بالسياره واحنا نزلنا بلشنا نتحوج ..ايمان بتغلّب بالحواجه خاصه في الاواعي (الملابس) ومش هالذوق وبتدفعش من مره , ف لهيك اللي بعجبها غالي وبدهاش تدفع , بس بدها كتير كطع عالفاضي , اظن هي زي الاغلب , انا الكل بحكي عني اني زي الشباب , كم بلوزه وكم جينز وبس , وبعرفش وين الغلط انو اضلك تلبسي نفس الاواعي اد نظاف حلوات عليكي ؟ بعرفش ليش كل يوم لبسه ؟ بعرفش لشو الكتير , عن حالي بحب ابسّط حياتي , لهيك بحب اقلل من كلشي فيها من الناس ومن الجمادات , الا من الكريمات والعنايه ملاان عندي ~~ لاني ختيّرت !

واحنا نتحوج امي اتصلت واختي اماني كمان واخوي, وكتير حكي صار , واماني حكت بدها تيجي حتى نتلاكي , بعد ما خلصنا حواجه وارجعنا ع السيارات كانت اماني تستنى فينا , وكان لسا معي ساعه لشغلي , كان على بنت اختي تدريب واختي لازم تاخدها , حكينا لبعض انو نروح بسياره واحده عشان نضل مع بعض , وبعدين بنرجع كل واحده عند سيارتها ,واتفكنا نروح في سياره اختي ايمان , ايمان بلّشت تشغل بسيارتها الا السياره ما بتشتغل , شغّل شغّل مش راضيه , كأنه البطاريه بدها شحن , جبنا الكابل من سياره اماني , وكربّت سيارتي وشحنا سيارتها والحمد لله اشتغلت ,وبعدها اطلعنا بالسياره كلنا لناخدها للتدريب , وبلّش كتير حكي بينا واهمه انو الصبيه اللي بنشتغل معاها فسدت علينا انا وبنت اختي عشان امبارح ميّلنا اخدنا كهوه ببلاش , هو مسموح النا ناخد كهوه ببلاش , بس هاي البنت فش محال بدها تطردنا , والصبيه ما اجت تحكي معي ولا حتى المدير , راحوا يحكوا مع بنت اختي , وبنت اختي فكعت معاها لانو الصبيه جننتنا , والمدير بالاصل امبارح بعد ما وصلنا من الرحله هو اللي نزّلنا عند الكهوه وكان عارف انو رايحين ناخد كهوه وحتى حكى "انا حكتلهم " نهايتها انو المدير ما حكى معي وما عمل مشكل , وهدا خلى الصبيه الفلبنيه تفكع معاها وفي صبيه تاني اسبنيوليه هي اللي فسدت اللي بالاصل ما بتشتغل معانا هي بتشتغل بمكان تاني, بس بوكت فش حد بنادوا عليها , وهاي انا متاكد بس اشوفها مره تانيه راح اسمعها حكي , لاني اليوم لما شوفت الفلبنيه اللي بشتغل معاها سمعتها حكي , وصارت تحكي احنا افهمنا غلط وكل هالكصص وسكّرت عالموضوع ..~

بالنسبه الي بكل صراحه انا متعوده ع انو البنات يكرهوني , وهاي الغيره والحسد عشو مش عارفه , ودايما بشوفها اتفه المشاكل عندي انو حد يضّل ينم عليا ويفسد عليا , والاشاعات وكل هالكصص ما بلحكها , وهاي الصبيه الفلبنيه بتهمنيش شو تحكي وشو تعمل , طالما المدير ما اجى حكالي وطالما هي ما اجت تحكيلي بوجهي معناتن كلامها كدب معروف , بس بنت اختي بتتدايك من هيك كصص , واظن لانو الصبيه جننتها , وبعدين عبرنا بكصه اني برد السلام مع الناس ومش لازم , وانا بصراحه مش شايفه غلط , اللي بصير اني بالكهوه الزباين اللي دايما بيجيو ع الكهوه وصرت اعرفهم , اد شوفتهم برى الكهوه بسلّم عليهم يعني بحكيلهم مرحبا وكيفكم , اد شوفتهم بالمستشفى , اد شوفتهم بالشارع , لاني بشتغل بكهوه المستشفى اكيد نفس الممرضين والدكاتره بيجوا , نفس الشرطه والامن ونفس الطوارئ والاسعاف , ومش عارف وين الغلط هاد عند اختي ايمان وبنتها ؟ قال ما بتأمني للناس ؟ جايه اختي ايمان تحكيلي هدا الحكي ؟ وهي بتعرفني اكتر واحده ما بأمن للناس , وكل هالحكي اماني كانت معي وحكت كل اسبابكم مش مقنعه , وين الغلط انو مريم ترد السلام , وحكتلهم يعني هدا احترام واحنا ببلادنا مش بتردي السلام ع الجيران ؟ مش عارف عنجد شو بعقل اختي ايمان او ليش هي وبنتها حكوا هيك ؟!

وبعد ما نزلنا بنتها عا التدريب , طبعا انا اتاخرت ع الشغل ربع ساعه والصبيه كانت بدها تقتلني والله يستر , الشغل اليوم كان خفيف والبغشيش خفيف , والله يستر بكرا الصبيه شو راح تكعد تتفلسف عليا وع المصاري وع كل هالكصص , بس بضل مع هيك احسن من شفتات الليل , بضل اريح لراسي اشي مش طبيعي ..بالنسبه للزباين فهم محترمين وفي من حيوانين , ودايما كل يوم بصير طلبات غلط بتيجي ناس بدها تسرك , يعني دايما في كصص بتصير كل يوم معي , وكد ما بكدر بحاول اني ابسطّها وانو استمتع لانو محدش مصدكني اني عنجد بحب الكهوه وبحب اعمل كهوه زاكيه للناس والله لهيك مستمتعه ..~

||

اشي تاني وهو كنت بدي احكيه بعدين حكيت ما احكيه لانو راح ومش حاسس بالحكي اني احكيه , بعرف انو محدش فاهم راسه من رجليه ولاحتى انا ..انا بحكي اني احكيه !

اخوي واحد لما اجى عندي من يومين كعد يحكي انو ابنه بضل يعيّط بالليل , ابنه لسا صغير العمر كله الله يخليه الينا يا رب , يعني كم شهر , حكتله يخوي - اد الكبار بتعيّط بالليل - , استهدي بالله يخوي ..~

وانا عنجد بصحى المخده مبلوله من العياط , بنام وانا بعيّط صارلي يومين , مكهوره ع حبي , مكهوره اني مش عنده , اني مش معه , مكهوره انو لحاله , وبعرف والله بعرف انو حبي لو انا مريضه ما بتركني , واللي بكتشفه كل تصرف وكل لحظه انو عنجد بحبني اكتر ما انا بحبه , لاني بكدر اترك كلشي وانزل عنده , وبكدر ما اهتم لاهلي واهلي بمشّوها وبكدري اترك امريكا وما ارجعلها بس عشان اكون جمبه , بس لما افكر بهيك بكدرش اترك امريكا , ما تركتها لما اختي كانت بمشاكل تنزكر وما تنعاد عشاني وهي اختي , عنجد اني انانيه وبحب حالي اهم من كلشي , ومع هيك ببكي , طب شو بفيده البكا ؟ ولا اشي .. ولا اشي عملتله ولا اشي ..~

||

بعد ما خلصت شغلي اجيت عالبيت اكلت , واتمددت وحكيت مع امي ومع حبي ومع خواتي وهيني , بالعاده بالايام العاديه يمكن احكي مع حبي مره بالاسبوع او مره بالاسبوعين , بس بهدا الوكت كل لحظه , ولما اشوف انو بده مساحته بتركه , بس بعاود ارجع ..~

..~





الاشي اللي بضل يجي ببالي هو ليالي الصيف في بيت اهلي بالضفه او في بيت فد , ليالي الصيف مع اهلي ومع الناموس , ومع فد, كديش بشتاك لفد والسهر في بيتها , وشرب الكهوه بالليل والطرب والتوكيف ع الشبابيك , في شب ابن جيرانهم كديش كنت احب اشوفه , احب شعره الطويل وعيونه الفاتحه لما تضرب فيهم الشمس وطوله , اتوقع هلكيت صار ختيار لاني كنت صغيره , بس هالشب من الشخصيات الكريزما تبعتهم بحبها ..~ يمكن حكين هالحكي قبل هالمره يمكن , الله يطعمني اخد ورقي حتى لو فش امل بس عنجد بتمنى يا رب , وانزل اشوف حبي , اشوف اهلي , اشوف فد ..~