●» وٺبقےٰ ملامح‘ ضحـگٺي .. فيها علاماٺ الألم ♣

بعيوني أريدك تجي لو بس حلم عآبر

إنطيني نسمة هوآ وبراحتك سافر

من دونك آنة ترة متلعثم وحآير

لو قلبي لو خآطري ، ما أعرف إيش كآسر

~

أهل نينوى ، وهسـة شلونكم زينين تفرحون بسؤالي ، لو يأذيكم

ما أطول عليكم ، هن وحدة إثنين وبعد كد البعد ما أعتب عليكم

صحيح لماي داعش كنتو عطشانين لو مايهم عبر من تحت رجليكم

عجبكم دينهم ؟ آني أدري عدكم دين وتشرف روس داعش غنم راعيكم

يا ميراث الصحابـة وقبلة الهادين ، منو البغدادي هذا اللي جاي يهديكم

إيش يعلمكم ؟ أصول الذبح بالسكين ! وبيمن ياترى برقاب أهاليكم

بايعتو خلافة دولة القذرين ، لحاياهم إتنشز وي معانيكم

المسيح إخوانكم بالأرض والتكوين صدك طلعو غُرب مو منكم وبيكم

سمعتو بالنجاشي وقصته لو ناسين ، النبي يدنك خجل يم عيسى يرضيكم

أقليـة الشبك فهموني شمسوين ؟ إنسبت نسوانهم بربوع أراضيكم

ونعى حتى الجبل حال اليزيديين ، شنو المشهد إيضحك ما يبكيكم

إغنمو بالغنائم والحلال الزين ، ومن ضلع اللي مشو عمرو صوانيكم

ولا إتخلون شيعي ، الشيعـة مرفوضين ، علي هوة الخليفة وبلغو واليكم

علي من تعتنولة زيارتة مرادين ، وإذا ما تعتنولة مراد ينطيكم

محوهة آثاركم ظلو إنتو متفرجين ، هدموهة الكنائس يللة شعليكم

أبو تمام شاعر تتبعة الغاوين ، لو مامنهدم تمثالة يهديكم

كل هذا وقلت ماتخلة من طيبين ، وأدورلكم عذر من يمر طاريكم

أباوع قبر يونس هِوة برمشة عين ! أفزِّع ولا كأن الأمر يعنيكم

يونس يعني موصل ميسرة ويمين ، خسفتوهة الأرض باللي كان بانيكم

إنهجمت نينوى من أجل حور العين ؟ قبر اللي طم الحوار اللي ترتبط بيكم

-

يا عراق

حبيت أعترف ، مرات مو مرة

وغازلت الحروف بمنتهى الخبرة

أدور عالصعب وبكلمة مني إيسيل

وأدخل بالعمق وأنفعل وأتجرأ

شفت كل شي وعفت جربت ما خليت

صنف خايف خجول ، وصنف يتعرى

بس حيّرني قلبي بآخر إستفتاء

صرخ بالساكنات ، إتفضلن برّة

كلهـة إتساقطت ما حظت حتة بشوق

بس لمسة كفوفك بقت متصدرة

ولا كأني قبل شايف خيال كفوف

ولا بيهن لعبت الكتبـة و الطرّة

أفتح إيدي إلك عش ينتظر عصفور

ترفرف يمنتك وإتصيدهة اليسرة

يا ومضة شعر كل كلمة بيك الله

صدر دافي وعجز من صاحبة إتبرة

يا بئر الحسن تعرف إيش كم مشروع

متوقف عليك وما أحد يقرّة

بنسماتك عسل يشفي العرب والروم

وإيحلي البحر وإيزودلك جرة

تعال وبوسني بكل الحرارة اللي بيك

مليت الشفاه الباردة المرّة

-

بوفاة الملك غازي إحتفلوا الناس ، إنتهى عصر الملوك الإنتهازي

ربك قال مهلاً لا تفرحون ، سبحآنه يعجبك من يجازي

ما خلاهـة هيج الحمد لله ، صار إيروح غازي ويجي غآزي

من هاي الوصاية إشوكت أرتاح ، عليمن أرتكز ضاع إرتكازي

بيّة إتكابلن سوّنني نصين ، رمح أمريكـا والسيف الحجازي

إنتخبنة وإنتة من ربعك إختاريت ، وأنة إختاريت واحد من طرازي

متخمرين بالمنطقة الخضراء ، لحد ما صار ظلهم تركوازي

يمثلون الشعب ؟ والله إنتة بطرآن ! على نيتك مع كل إعتزازي

فصل تشريع ؟ لا مو فصل تشريع ، فصل تشريب وأنواع القوازي

وياهو اللي قال ما عدهم شهادات ! ليش إتكول ما عدهم شهادات!

أشو تعبيرهم كولش مجازي @@

ماجستير بإلقاء الخطابات ، دكتوراه بتقديم التعآزي !

أمس صار إنفجار وماتو هوآي ، لطم وجهـة الرصيف وصآح يازي

سدوهة الطرق وإستنفر الجيش ، وبدة إيحلل يوازي او لا يوازي

ترة اللي ماتو لأهلهم ما يرجعون ! إلمن بعد إجراء إحترازي

أسافر وين ؟ رفضتني المطارات

قسم قالوا إرهابي ، وقسم نآزي

علة أوراقي شافو آثار بارود

عدل وإشتمو الموت بجوآزي

حصتي من الوطن بس نشرة أخبار

نفطي إنباع وإستثمرو غآزي

أجي للبيت ألكة المآي مكطوع

أسئلك حمرة لو خضرة المخازي ؟

أخبار النفط ما تروي عطشان

إحفرو للشعب بير إرتوازي

-

عرفتك يا وطن غالي بغلاة الروح ، أشم تراب أرضك والدموع إتهل

يا أول جهنم تشبه الفردوس ، دخلناهة بمزاج ونرفض إنحوّل

بظنك بالغت ! لا ما بالغت والله أحكيلك أمر وإنتة إستشف إيش إيدل

نيران الحرب وصلت لباب الدار ، وأسعار المنازل بالعالي ما تنزل

عراق ، وحتة موتك ماأدري من يا موت ، جديد علة البشر مو موت مستعمل

غريب ويختلف وأجوائه غير أجواء ، تأبين وتهاني ونبكي وإنهلهل

ولد رب الحياة اللي سجلو ميتين ، يدفنهم ! يزفهم ؟ حآر اللي إيغسل

غادرت الوطن ، يالغادرت محروس ، دورلك عِرف بال un ، وسجّل

وبالك تشتبه ماكو كرم للضيف ، إذا ظلك عبر تدفع ضريبة إتظل

وعلمت القلب بالغربة ما يشتاق ، لكن يا عراق عيوني ما قدرن

ما جنهن بصر ، جنهن ثدايا النوق بس أفطم عليهن شوفتك درن

صحيح إتخلصت من صيفك اللهاب ، إهنا برداً سلاماً ما شفت حراً

إهنا خضرة الجروح شلون كوللي إتطيب الجروح ، عراق خلاف شمسك وين ينشرن

جاورت البحر وأطلع للإستجمام وأمس إغمة علي وأحوالي ما سرن

كالوا من دوار البحر ما يدرون ، بقن دجلة وفرات براسي يفترن

ورغم ملح البحر طافح بوجه المآي ، ما غزر أبد ذنيج اللي يغزرن

-

بالأمس في دائرة الهجرة رأيتهُ ، المُتعب الجريح مُدمِن الحروب

رأيتهُ ورآهُ كل الناس ، تقدم العراق حاملاً أوراقهُ

تقدم العراق طالباً مرحمـة اللجوء ، صار العراق خارج العراق

مُخلفاً ورائـهُ النيران والدخان ، مُخلفاً ورائه جُمجُمة الحضآرة

من اليمن للبحرين للصين ، للقاهرة لبيروت للسين

الأردن السودان الجزائر، دبي ليبيا تونس فلسطين

هبّت ملايين الملايين ، هّبت مثل ما هّبت الريح

غطّت سماء الله تسآبيح ، الله يحرسك يا عراق

الله يحرسك يا جريح ، يل ما شفت رآحة بحياتك

من فتحت عينك ولليوم ، فتن وحروب مطوقاتك

يا أبو المآسي لا تحزن وإرفع راسك ، طايح عقل من رادك إتطيح

وإنتة الشمس والبحــر والريــح

لليوم ما مات الحُسين ، ولليوم ما مات المسيــح

~

جنت لازمهـة العصا من المنتصف ، إتشوف كولش زين وإتغض الطرف

إستغلو طيبتك كَالو ضعيف ، وما دِرة إيش ضميت للبيك إستخف

كَوم وإلزمهة العصا من الأخير ، سوكَهم ما ينفع إسلوب الترف

داعش إيش جابـة وتوغل بالعراق ؟ هوَ صم أحجار ولوحده إنكَطف

ندري يا مسموم مهدلـة الطريق ، ونعرف الناس اللي قلبهم ما نِظَف

يرفض الجيش العراقي إيطب عليه ، يمنع الجندي حفاظاً عالشرف

ياللي تسولف بالشرف وين الكلام ؟ أشو منوم داعش بنص الغرف !

قال لك تنظيم إسمنة القاعدة ، ما نِكرهة بعظمة لسانه إعترف

هم سألتة إببيتي خلة إشكم يتيم ، وهم سألته شكثر من أهلي خِطف

وهم سألتة شلون تصرخ الأمهات ، وهم حكالك فعلتة ببنت الطرف

حاطّة إبيتك ولك كتال أخوك ، ولك هاي ما يرضاهة إبن العراق الأصيل

غسل بالدم عار داعش واللي ورآه ، حتى لا يدخل وطنـة بمنعطف

راهنت عالقاعدة وضاع الرهان ، روح دور روسهم جوة السرف

اللي شرد منهم وين يشرد ما يضيع ، زلم عدنة إتكف براري الصحرا كف

غضب زلزل فوقهم نار وجحيم ، ما رجع واحد وداعاً للحياة

رجال العراق ما يخسرون ، ما عدهم صرف

~

آنــة من الجرح يا صاحبي إتعافيـت ، عُبرتني المنيـة ويومهـة إتبدل

لملمت السنين ولحقكَت عالظال ، عالجت المصوفر قبل لا يذبل

تانيت أمنياتي اللي ما منعسة إتنام ، حتى أقدر بسكتة من القيود أفتل

عفت بيت أبوذيـة على العش مكتوب ، قلبي بفركَـة الخلان وجناح

وبديت أنحـاز للشمات وأجناح ، صدكَ خليتني ريشات وجناح

لكن صفكَ جنحي لحد غيمـة ، عفت ذاك الغصن هيمـة

عُمُر وياك أدور حل ، كبيـرة السما وين أسئل

أخاف أشرد وما أندل ، إلى أن قررت حسيت عمري اللي ضاع

شفتـة الطير ثاري من يطير أسهل ، أثاري العش عذر للي ما يعرف إيطير

أكَـول إشبيــه الشامـت ما يريد أرحل

~

حِكِت لأخطائك بنصين قلبي أعذار ، ترفــة إتغار منهـة حياكـة المغزل

أضوكَك بالجفن وأستطعمك بالروح ، وأتجمد ببعدك وبهواك أنحل

مدينـة ظني تشبه دولـة أفلاطون ، شفتك بيهـة فكرة إستبعدت تفشل

طيني إتغلب بقوة على نار إبليس ، تغلط و وآني أشوفك بس أبين أغفل

وأتلمس جفونك لمسـة المكفوف ، أريد ألكَالي دمعـة لو جفن مبتل

وأتركك وأسمع بعزتك تصهي الخيل ، خطوة أتكلك إمشي .. خطوة لا تنذل

وأنـة غيمـة برد ما بيهـة بس إفيآي ، أنطي الشمس ظهري وأنكوي أتحمل

مرآت أختنكَ لمن يجيني الليل ، أفك شباك هجرك وأوقف أتأمل

صيآد أحس روحي والنهر وشل ، أشوفك جاي ليـة وأركض أتخيل

أوصل للنهايــة وأبتدي من أول

~