مأساة روح {هالكه} في اوراق تائهه ~

السلام عليكم ..~

ليل الجمعه || 12\13\19 ..~

||

هاليومين اللي مروا كان مناح عليا الحمد لله , صح مش عاجب اللي حواليا , وصح مريضه فيهم , بس بنفس الوكت عن حالي مرتاحه ..~

امي طبعا بدها اد جينفر بتتصل عليا اني اشتغل فاوافق وبعذرها لانو بتعرفش اني مريضه , بكفي يومين مع جينفر , يوم طويل ويوم قصير , ووصلت لمرحله اني طلبت من جينفر انو راح اترك الشركه رسمي اخر هالشهر , بصراحه في عميل بعرفه صارلي خمس سنين , وهو اول عميل من بدايه شغلي لحد الان , عنجد حاسس بالاسف اني راح اتركه لانو من احسن الناس اللي مروا عليا بحياتي كلها .

ع نهايه الشهر في موعد دكتور عشان بعده موعد العمليه اللي كديش بستناه لانو كل شهر بشوف حالي اضعف والمناعه بتقل , يا رب يهونها علينا لوكتها , وكمان في شغله تانيه اد زبطت بخبركم وحتى لو ما زبطت كمان بخبركم , وعنجد كديش بستنى نهايه الشهر عشان ملان حكي بخصوص هالاشي التاني نفسي اشاركه معاكم , نفسي اطلعه من جواي لانو كديش بضل متوتره بخصوصه.

امبارح الخميس اصحيت متنكده اشي مش طبيعي لانو ليله الاربعا اجاني ايميل وكعدت ساعه كامله وانا اعبّي البيانات , مرات داخليا بحكي بديش هالشغله تزبط من كتر ما اتغلبت فيها ,بس بنفس الوكت بحكي فرصه كبيره والكل متشجع عليها , بعدها ضليت بالبيت وعملت جوله ترتيبات كبيره وجذريه فيه وكنت مبسوطه ع النتيجه , وع المغرب بلشت امرض بزياده لهيك ما عملت اشي لوكت ما نمت ..~

اما اليوم اصحيت بدري ع امل انجز باليوم , ضليت بالتخت ساعه , كومت افطرت واشربت كهوه بعد ما خلصت تلفون قصير مع امي , وبلشت في ترتيب جذري بالبيت كمان انبسطت عليه , وع الظهر عملت الروتين تبع يوم الجمعه , اخوي تلات بضل يتصل عليا مشان يشوف اد اطلعت من الدار ولا لأ لانو كسول جدا ع انه يشتري حواجه للدار او يشتري اي اشي, وبركن عليا فا حكتله بديش اطلع , كديش صعب لما تخبّي مرضّك ووجودهم حواليك لازم تظهر انو فش فيك اشي وانك شخص بدك اضل بالبيت انبساط , مش لانك مريض وفش فيك حيل تطلع , وانو تركت الشغل عشان مرضي مش عشان بديش اشتغل , هو صح داخليا بديش اشتغل , بس حياتي بدها مصاري والتزامات , وما تركت الشغل الا لاني اوصلت لمرحله بكدرش اشتغل عشان صحتي , وع العصر خلص بنشرت , لهيك كعدت وهيني ..~

||