يوميات صيدلي s5

اڷسڷام عڷيڪم ۈرحمـۃ اڷڷـہ ٺعاڷى ۈبرڪاٺہ

أسعد اڷڷـہ صباحڪم ۈمساڪم بأڷف خير إن شـاء اڷڷـہ.. !!

ۈ اهلا

بجميع اعضاء منتدي العاشق وخاصۃ رواد القسم الادبي

اتمني تڪۈنۈا بأتم اڷصحة ۈاڷعافيۃ إن شاء

اليوم اقدم لكم ان شاء اڷڷـہ الفصل الخامس من يوميات صيدلي ان شاء الله يعجيكم

وهو عبارة عن قصص ساخره مكونه من عشرة اجزاء بعنوان يوميات صيدلي

ان شاء الله تعجبكم

واسف علي عدم الالتزام بالجدول الزمني بسبب الدراسه

ارجوا ان ينال اعجابكم هذا الجزء





تنبية .القصه خياليه ولا تمت للواقع بصله والشخصيات الموجودة بها واقع الخيال
واي تشابه بينها وبين الواقع فهو اغرب من الخيال
اه نسيت اقولكم هذه القصه لجميع الاعمار
( المصريين فقط يعرفون هذه مقدمه اي )

العاملون علي الموضوع

مؤلف القصه : dr.mahmoud elmakawy صديقي العزيز
فكرة وتنسيق وكتابه الموضوع : lelouch lamperouge
تصميم : Assa550ssino المبدع دائما
البنر


(يوميات صيدلى) .... الحلقه الخامسه


النهارده هو اسعد ايام حياتى .. طبعا كلنا عارفين ليه .. عشان النهارده هو يوم القبض .. لأ ومش اى قبض ..
د أنا هاقبض 400 جنييييييييه حته واحده :D
المشكله انهم بيفرقعوا بعدها بأسبوع بس اهم حاجه احساس الواحد وهو بيقبض
احساس كده مايتوصفش .. حاجه كده زى فرحه ممزوجه مع تفاؤل .. وتحس كده ف يوم القبض ده انك مقبل على الحياه
يا ترى هاعمل ايه بكل الثروه دى ؟ .. دول ف عنيا كأنهم 4000 جنيه :D

قمت الصبحيه منشكح .. ناوى انزل افتح الصيدليه قبل معادى (يوم القبض بقه) :D

برضه زى كل يوم القميص ماتكواش بس مش مشكله .. ماتخليش اى حاجه تعكنن عليك ياد يا مجدى النهارده

واكيد معظم اللى ف سنى ربنا رازقهم بأخ( أو اخت) اصغر منه غتيت ورزيل و عمره مابينفذلك اى طلب

حتى من ايام الدراسه.. تيجى تبعته يشتريلك حاجه من بره يرد عليك بطريقه مستفزه ويقولك( لأ) ..

وفى اللحظه دى تبقى عايز تولع فيه .. ولما تيجى تلمسه يشغل سرينة الاسعاف : بابااااااااااااااا :D
فجأه تلاقى نفسك لامم نفسك ومتكوم ف اى جنب
:S
طبعا الكلام ده ينطبق على اخويا احمد( الصوغنون ) .....

-احمااااااااد
محدش بيرد
- احماااااااااااد .. رد يا زفت مش بنده عليك ؟؟
)-بكل برود) : نعم
-تعالى اكويلى القميص ده على اما اخد دش
- لأ
استغفر الله العظيم يا رب .. هامسك نفسى برضه وهحاول اسحب معاه ناعم

-خد يا حماده بس هاقولك .. لو كويتلى القميص هاجيبلك حاجه حلوه النهارده وانا راجع من الشغل
-هاتجيبلى ايه ؟؟
-ملكش دعوه بقه قولتلك هاظبطك بس انجز انت واكويلى القميص عشان الحق انزل
- وربنا لو ضحكت علي زى المره اللى فاتت لمعرفك
- انا اقدر برضه يا حماده .. دانت حبيبى :D

على قد ماهو بينرفزنى طول الوقت بس والله الواد احمد ده طيب وقلبه ابيض ..
المهم الواد طسلقلى القميص اى كلام ونسى يكوى الكومام ... ونزلت فتحت الصيدليه...

حقه لو الدكتور زودنى الشهر ده ؟؟ .. دا يبقى راجل محترم والله

وكمان انا بقالى كام يوم بقفل بعد معادى بنص ساعه .. لازم اقوله عالحكايه دى عشان يحن عليا بخمسينايه زياده ولا حاجه ..

اخر النهار لقيت واحده كده شكلها مش غريب عليا داخلالى ..الست دى انا شفتها قبل كده فييين ؟؟

الله؟؟ .. دى الدكتوره ناهد بتاعة التحليليه .. يااااا .. والله العظيم دى من اطيب واكتر الدكاتره المحترمين فى كليتنا

د/ناهد: السلامعليكم .. لو سمحت عايزه فيتامينات رويال فيت جى

- حاضر .. رحت جبته وانا محرج .. لازم اقولها انها كانت بتدرسلى ف الكليه ...

- اتفضلى

-متشكره اوى

- على فكره يا دكتوره حضرتك كنتى بتدرسيلى تحليليه وانا ف تانيه

-والله .. انت دفعه كام؟

- 2011.. والله العظيم يا دكتوره امتحانك كام جميل جدا وحضرتك من الدكاتره المحبوبين ف الكليه عندنا بجد

-متشكره اوى .. وانت عملت ايه ف التحليليه ؟
-مقبول :D

-ليه كده ؟
- وربنا ماحطيت قلم ف جزء الدكتور فتح الله :D
- يالله خير ربنا يوفقك فى مستقبلك ان شاء

مشت الدكتوره ناهد ولقيت الدكتور(صاحب الصيدليه) داخل عليا .. يا سلاااااام .. حان موعد القبض

انا عارف الدكتور قاصد يجي دلوقتى عشان يقبضنى سريع سريع كده ...

- ازيك يابو مجدى .. اخبارك ايه ؟؟

- الحمد لله.. بقولك يا دوك.. الحاج عبد الفتاح جه النهارده ودفع ال30 جنيه اللى عليه

- الله يحرقه مطرح ما جه .. هو لسه فاكر يدفعهم ؟ .. اش حال انه بانى لأبنه عماره فى الشارع اللى ورانا مستخسر يدفع ال تلاتين جنيه اللى عليه ؟؟

زباين هم
-روق دماغك يا دوك وسيبك منه (مش ناقص حاجه تعكنن عليك اليوم ده بالذات)
:D
....
الدوك قعد معايا نصايه كده وبعدين راح قايم فجأه وفاتح الخزنه بتاعته ومطلع الفلوس وقعد يعد .. اخيييرا افتكرنى .. يا فرج الله .. قعدت اعد معاه فسرى

ميه .. متين .. تلتميه .. ربعميه ... الله ؟؟ دا بيزود .. ربعميه وخمسين ... يا خبر ابيض ؟؟ ... خمسميه حته واحده ؟؟

لقيته جاى نحيتى .. وانا راسم على وشى ابتسامة الخجل بقه ( أكيد كل اللى بيقبض بيبتسم الابتسامه دى ) :D
وبعدين قالى : خد يابو مجدى

-شكرا يا دوك ماتحرمش منك

- شكرا ايه؟؟ .. الخمسمية جنيه دول تقفل بيهم مطالبة(المتحده) اللى هاتجيلك كمان شويه ...

والربعمية جنيه بتوعك هاديهملك بكره معلش بقه انت عارف الجو اليومين دول هادى اوى .... يالله مش عايز حاجه ؟؟ سلام
.......
الله انى لا أسألك رد القضاء ولاكنى اسألك اللطف فيه :S
...........
روحت البيت ايد ورا وايد قدام .. احمد اخويا واقف مستنينى ف البلكونه بقاله ساعتين ..
أحمد: هااااااا .... جبتلى ايه؟؟؟
-يالله يالا روح العب بعيد
- باباااااااااااااااااااا


To Be Continueee .... ^_^


الاجزاء السابقة

يوميات صيدلي s1

يوميات صيدلي s2 ‏

يوميات صيدلي s3

يوميات صيدلي s4
ها وقد وصلنا الي نهاية الجزء الخامس من السلسله
واسف علي عدم وضع المفاهيم الصعبه وسأضعها في الجزء القادم ان شاء الله
ارجو ان تعجبكم
اسستودعكم المولـى

---

التعديل الأخير تم بواسطة ℓєℓσυcн ; 02-18-2013 الساعة 05:54 PM