ذگرياٺ ٺائهـۃ علےٰ قارعـۃ الطريق !!

# موقف

السلام عليكم ورحمة الله وبركاته

اعذروني بتكلّم عامي شوي

قبل شوية اشتهيت رز ولحم لي فترة ما أكلته وقلت في نفسي جرّب مطعم مختلف هذي المرة

تعبت من مطعم نجد ومطعم الرياض فقلت في نفسي جرّب مطعم حراء وش بتخسر

المهم وأروح لمطعم حراء وأقوله عندكـ رز ولحم قال إيه عندنا " زربيان " قلت أوكيه خلينا نجرّب جيب نفر

ويجيب لي نفر من هذا الزربيان اللي أسمع به ولاعمري جربته ويعطيني ملعقة

وبدأت آكل بالملعقة بس ماعجبني الوضع ماني متعود آكل رز ولحم بالملعقة أفا هذي فيها علوم قبايل

وارمي الملعقة وأدق من النعمة واللي حولي كلهم يطالعون وش ذا البدوي ياكل بيدهـ

وأنا ولاعلي من أحد قاعد آكل ومستمتع مع إنه كان دسم شوي أكثر من الرز واللحم اللي تعودت عليه

وانتهيت ولله الحمد ورحت أغسل يدي ولاكأني غسلت وأزيد الصابون والدسم مو راضي يروح

لاحول ولاقوة إلا بالله هيا لو أكلت بالملعقة ماكان تورطت

المهم رجعت للبيت وأخذت لي صابون تايد وفركت يدي فيه لما طلع الدسم

هو أنا عادي عندي آكل الملعقة واتكيت وزي كذا بس عند الرز واللحم يطلع البدوي اللي بداخلي

يقولي أفا وش ذا العلم تاكل بالملعقة يالورع اغد رجال وكل بيدكـ واتركـ عنكـ الدلع