مأساة روح {هالكه} في اوراق تائهه ~

الاحد 17\24\9 اغلبه شغل من النهار لتاني يوم , بس بعتبره شغل منيح ومرتب مع انه مع شركه تاني وبشتغلش معهم الا يوم الاحد .. لهيك فش مجريات فيه لان بتعاملش مع حد الا اللي بشتغل معهم
كان الخبر الحلو انو مرت صاحبي جابت الولد


||

نحكي عن الاتنين 17\25\9

الصبح اول ما مسكت البلفون اجاني مسج من السكرتيره جين وكنت استدعي انه تحكيلي التغى الشفت . بس لأ , طلع بدها اشتغل شفت الليل يوم الاثنين !! شوووو ؟حكتلها (اد بشتغل اليوم الاثنين بشتغلش بكرا الثلاثاء , الي من يوم الخميس بنام برى البيت شفتات ليل اندبحت ) طول الليل بنامش وتعب وصرت اخاف ع صحتي لان بضل مريضه , قله النوم محدش بيفهمها الا المجربها وخاصه تكعدي ايام بدون نوم لا ليل ولا نهار , ويكون عليكي كمان مسؤوليه بيت ,, تعب لابو موزه , ردت عليا بكلمه (fine) فاين يا حماره , فاين تطلع بعينك طب احكيلي بزيدك مصاري , احكيلي بعطيكي عطله ...اخ بس اتنكدت من الصبح , لسا لسا كملوا معي لنشوف , فا جهرت حالي كان عليا شفت نهار بارت تايم , اول ما اطلعت حكيت مع اهلي بالضفه لاني بدي اشوف شو ردت فعل امي ع انو صاحبي طلعت مرته فيها ولد لانه كان كادب عالكل انو معاها بنت وحتى عليا , كعد 6 اشهر مش حاكيلي يمكن لانو بالاصل احنا مكناش نحكي بالست الاشهر الا اد بدي منه مصلحه ومش عشاني عشان اهلي , يعني نكون متحاربين ماشي , بس اهلي بدهم اشي من اهله ويحطونا ببوز المدفع انو نطلب من بعض هاي الكصص , فا اجى يوم حكيت مع امه عالبلفون وحكتلي ( صاحبك بضل عالسطح ودايما مش عبعضه ومن هالكصص , ومرته طلع فيها بنت ) اصحابي اد بضلوا عالسطح معروفه ايش يعني , وانا زعلت لما اعرفت انو مع مرته بنت , روحت اتحركشت فيه وانو ( اسمعت انو مع مرتك بنت يا رب تيجي بصحه وحلوه وما تغلبك ) فا الحيوان حكالي (معاها ولد ) وانا انجنيت لان كيف تكدب عليا ؟ انا بكره للسما الكدب واي حد بكدب عليا بتركه مين ما كان وشو ما كان بينا وهو بعرف هدا الاشي , لان عقلي مبرمج ع انه كل اللي صار كدب وكل اللي يصير كمان كدب وبتعب عكلي ولشو اتعبه , اكطع التعب من اوله واترك الشخص , بس بنفس الوكت انبسطت انو ولد يالله كديش الخبطه هانت عليا لما اعرفت انه ولد , وحكتله ليش وكان جوابه ابصر ,, حكتله( كزاب خبث ) وتركته يمكن اظن كم يوم ,بعدين اتصالحنا ينعن شكله , لهيك لما مرته راحت عالمستشفى وكل كصصها كان يبعت اول باول وحتى صوره الولد , اخ يبي شو بضل اكتب , المهم المهم يا مير انو لما حكيت مع اهلي امي طلعت مش بالبيت , وحكيت مع ابوي .
ابوي : امك عند دار سيدك ستك لسا مريضه, وامك كانت مريضه امبارح بالليل اجينا ناخدها عالمستشقى ارتفع ضغطها كتير لانها بضل تفكر فيكي وبالشغل وبلاه بلاه بلاه
مير : ماشي يابا انا حكتلها معاها هدا الاسبوع اد بضل هيك متعبه حالها عشاني وعشان الشغل , بديش اشتغل .
ابوي : لا يا بايا خلص مهي مراحتش عالمستشفى وخف ضغطها

لعاد يابا لشو رمي هالحكي ؟ يعني بدي اطير من عندي لعندكم ؟ وهاي مش اول مره بحيكها ابوي , وانو شغلك متعب امك وابصر شو !!! طيب حكتلكم خلوني اترك الشغل , بدك اتركه ؟ احكيلي بلاش هدا اللف والدوار والخبث .. اه ابوي عنده خبث واحنا اد فينا خبث فهو منه , انا جد من فتره خلص بديش اشتغل اد بضلوا هاكلين همي , يعمي مشان الله محدش يهكل همي ويشغل باله فيا ,, مشان الله اتركوني انا لحالي بدير بالي عحالي , خليني احمل همي لحالي ,, وانتو ما تزيدوها بانو كمان تمرضوا واحمل همكم وانا بعيده عنكم بكدرش اعمل اشي بكدرش ,, راح ابوي الله يساهل عليه ويعطيه الصحه والعافيه , بشوفش حاله هو لما يزعل امي , بعرف انا بزودها ع اهلي , مهو بالدنيا يا بتكون طيب والناس توجعك يا اما قاسي وتوجع الناس وانا الصنف التاني اظن , روحت عالشغل وخلصته الظهر ولما اطلعت امي عطول اتصلت عليا , اكيد مهي بتعرف موعدي عالاخر , بدها تحكيلي عن صاحبي وزعلت انه خبى عليها , واتكاتلنا انا وامي عشان كصه الجيزه وعشان الشغل وهي والله مهي عارفه ايش بدها , بضل تحلم امي بضل تحلم , انا بكدرش اتحمل الناس اللي بتحلم وهي عارفه انو احلامها خيال وانو كلها ع كلمه لو .. ولو بتعمي الضو , بالهدنيا مع الك الا نصيبك ماشي , هيك بس افتح عينك شوي شوف كيف نصيبك ؟ شوف كيف الاشي اللي بدك تعمله كيف بمشي معك , شوف كيف لما اطك الباب بفتح معك ؟ بس الشغلات البسيطه بحياتك بتمشي بسهوله معك ؟ انا ولا اشي بمشي بسهوله معي , الباب بطكه مليون مره , كل شي بسيط بالدنيا وبدوش تعب معاااي بس معاااي لازم اموت ميت موته ليصير , عندي اد بدي اوصل للكاسه اللي عالطاوله مشان ما توقع وانا بمد ايدي راح توكع , لسا ايدي ما وصلتها , وانا بمشي الحيط الحيط بس الحيط اقسم بالله مهدود عليا وانا بمشي !! لهيك انا من النوع اللي ما اعملش الاشي من اصله ليش ؟ لان عالجهتين ما راح يصير فلشو تعبي النفسي والجسدي وانا عارفه انو مش راح يصير , وانا مش بنت اليوم حتى ما اعرفش كيف الدنيا معي !! فا مشان الله يما بلا احلامك هاي اد انا فيها .. يا رب تعطي امي وابوي الصحه والعافيه وهداه البال يا رب يا رب وتعطييها لكل اهالي الناس اللي عم تقرأ بس والله زمنا متعب , الا الصحه يما دير بالك عحالك وبس .