مأساة روح {هالكه} في اوراق تائهه ~

بما انه من زمان مش حاطه صور فا بحب كل فتره احط وخاصه لما اكون بالبيت , لان بالعاده انا بستخدم المنتدى من البلفون , لهيك بعرفش احط صور , واول ما اشوف عندي الوكت لاحط الصور , بفتح اللاب توب وعطول بحطهم , بعدين بخبركم عن مجريات يومي ..~
عم اسمع في اغنيه عمر دياب يا احلى حاجه , واليوم فش عليا شفت ليل ياااهو واخيرا بدي انام بالبيت .



هدا الرف من اكتر الشغلات اللي بحبها بغرفتي .. لانه كله شغلات بحبها , ابلش من اليمين فوق

المانغا اللي بحبها لنفس الكاتب وصنف رعب والمفضله عندي هي (tomie) هاي شخصيه رهيبه لانها بتوقع الشباب وبتخليهم يقتلوا حالهم عشانها , بتلعب بعقولهم , وبحبوها لدرجه يقتلوها كمان , وبتموتش , يعني بترجع اقوى واحلى ..~
هدول ديك وجاجه صنع يدوي خشب اشتريهم لامي من (مدينه اليابان) وسعرهم بلاوي , بس لانو امي بتحب مناظر الجاج وخاصه الديك اشتريتهم الها وما حكتلها سعرهم الحكيكي احسن ترميهم , وكل مره بتيجي هان وبنسى اعطيها اياهم تاخدهم عالضفه معاها , ولان بزكروني فيها خليتهم بوجهي ..~
وراهم هدا فيل اشتراه ابوي الي احطه بالغرفه , وبكون جواه ورد ناشف معطّر , ريحته حلوه ..~
هدول دفاتر مزكراتي او معلومات خاصه عن الناس او شغلات للزمن , فيهم شغلات مش لازم تنقرأ او تنشاف , بس لاني الحمد لله في بيت ما بيدّخلوا شو بتعملي لهيك بخليهم بوجهي , في منهم منتهيات بمعنى فش فراغ , ومنهم فاضيات وبدهم تكمله ..~
هون الكتب , الطنطوريه الرهيبه وعزازيل , وقاموس اجاني هديه اول ما اجيت ع امريكا وكت مكانش معي بلفون يترجم لهيك كنت كتير استخدمه , هلكيت نيجي لهاي الروايه اللي كل مره بحكي بدي ابلش وبخاف , اشتريتها مره واحده ودوستويفسكي كاتبي المفضل , وفد عم تجمعلي كتب الي بالضفه , عندي الجريمه والعقاب بجزئيه هون , وطلبت تشتريلي الابله لاني بعشقها , مش راح تشوفوا الجريمه والعقاب معاهم لانهم بضلوا جمب راسي كل ما بدي اتزكر اشي بقرأ فيهم ..~
الرف التحت ..~
هاي الكاسه عباره عن بقره لاسباب اشتريتها من فتره مش بعيده ..~
وراها راح تشوفو كل المصاري اللي بحوشهم ..~
هاي الصغيره هي جاجه منفوخه من الكزاز من نفس المكان ولامي كمان..~
صندوق الموسيقي اليدوي و الكميرا اللي مرات بستخدمها , ومشكلتها انو الافلام غاليه ومش دايما الصور واضحه ..~
كلهم محطوطين ع صندوق الالعاب اللي اجاني هديه خشب بلوط حقيقي , وفيه شطرنج وهيك كصص كنت مرات العب مع ابوي وهو هان .~
والديفيدهات اللي عندي ..~