مأساة روح {هالكه} في اوراق تائهه ~

السلام عليكم ..~

ليل الاحد || 2\21\2021 ..~

||

يوم تعب بالبيت من ترتيب ونظيف وطبيخ والحوش اللي اخد كل وكتي اليوم , اليوم اجيت متاخره شوي ع المدونه لانو انسيت حالي وانا العب ..~

في كصه بكرا من طرف المسؤوله عن البيت عاد يا رب تهونها علينا , لانو في مشاكل بالطريك !

وامبارح اللي صار , ساده مسك فار بالبيت , فار لسا صغير , يبي شو صغير , بس ساده عباره عن هر اهبل , بمسك الفار بتمّه وبكون بنفس الوكت يدّور ع الفار , ولما يهرب الفار من ساده , ساده ما بشوف الفار وهو بكون كدامه , والاهبل كمان بنادي عليا مشان اساعده في مسك الفار , اللي لازم ينعرف انو هون البيوت خشب وكدااام , وملان حيوانات , من فيران وراكون وسنجاب , الفيران ما بتعبر البيت عندي من وكت ما جيبت ساده , بس عندي محزن تحت البيت وامبين فيه فيران , لانو شوفت بالليل فيران كبار كان يطلعوا ياكلوا من الاكل الموجود في بيت العصافير الاحمر , وما بهمني طالما الفيران برى البيت , وما بهمني اد بتاكل اكل العصافير , وانو الحل اشيل اكل العصافير , ما بدي اشيل اكل العصافير , العصافير والحمام اللي بيجي ياكل بحبه وبحب اشوف , والله دايما برزكني في رزكه هدول الطيور .

كعدت افتش ع اي مكان ممكن يعبر منه هاد الفار الصغير عشان اسكّره , اعرفت من مكان جرّه الغاز وبربيج الغاز ,بكدّرش اسكّره ,عاد ما يجيو اخوته للفار جوى البيت . نرجع لكصه الفار وساده , انا الحمد لله ربنا معطيني القوه بخصوص الفيران انو ما بخاف منهم بس بكرف , بس بنفس الوكت عشان اكون صادقه معاكم مش هالكرف اللي لاااا بكدرش اشوف او امسك الفار بالمحرمه , عادي عندي امسك الفار بالمحرمه وارميه برى البيت , او احطّه كدام ساده مشان حضرته ياكله ويريحني لانو انا بكدرش اقتل الفيران , طوال امبارح المغرب , وهو ساده يلعب مع الفار , وبنفس الوكت الفار يصرّخ وساده ينكز من صوته ويخاف , او يهرب الفار من ساده بس انا عيوني عليه للفار اكتر من ساده , اجى الوكت اللي اجاني تلفون وكان اخوي وبده اساعده بالاغراض اللي بده ينزلهم من السياره , روحت اشوف اخوي واجيب الاغراض , اجيت لكيت الفار مختفي , دخل اخوي وحكتله في فار بالدار , وانجن اخوي , حكى ليش كال ما انا قتلت الفار , حكتله بقتلش فيران , وصار يتفلسف ع ساده وكيف يهرب منه وبدناش ساده بالدار , حكيت بعقلي اخ يا ربي , هو انا ناكصني حكي ولجّى ع ساده يروح يصير فيه اشي او تيجي المسووله عن البيت تحكي ممنوع حيوانات وليش عندك هر , بكدرش بهاد الوكت تجيني كمان صدمه كبيره , لسا انا بصدمه البيت والله يهونها هالشهر هاد منها حسبي الله عليها .

وانتبهت ع ساده انو جنب الكنبه , حكيت لاخوي يمكن الفار تحت الكنبه , رفعناها , وطلع اه الفار تحتها وساده مسك الفار , حكيت لاخوي اقتل الفار وريحنا , بلّش في الحجج تبعاته وبحكي الفاضي والفلسفه , انو في اشي بده يتقل الفار وكيف يقتله ووين , حكتله خلص هلكيت بنطلع الفار برى , خليني اروح افتح الباب , والله ما روحت كم ثانيه فتحت الباب وجاي مشان احمل الفار الا اخوي بيحكي الفار هرب وعبر غرفته , لا حول ولا قوه الا بالله , ليش هيك حياتي مع ناس وحيوانات هبله , ليش كلشي لازم انا اعمله واد ما عملته بدي اكعد احل , عشان هيك اتعبت ! وانجن اخوي , انجن , وانو الحك عليا وع ساده , اني ما قتل الفار , هو صح ساده والله بحياتي ما شوفت هيك هر ,طوال عمري عندي هرر, بس بحياتي كلها , هاد بشوف الفار وما بقتله , بالعكس بتركه وكال بفكّر انو الفار راح يضل يستنى فيه , وبده احنا اللي نمسكله الفار ,امفكره زي الفييران اللعبه اللي عنده كأنه ؟! وانا بعرف حالي بكدرش اقتل فيران , حكتله يا عمي فيران امريكا ما بتاكل اشي تخافش ع اواعيك (ملابس), وهاد لسا صغير , خلي باب غرفتك فاتح وساده الا ما يمسكه بالليل , طوال الليل لحوالي الساعه 2 وساده لسا بغرفه اخوي وهو يستنى الفار , ولما مسكه جابه غرفني يورجيني اياه , وفكركم شو عملت , حطيت راسي ونمت , وحكيت ان شاء الله الفار ياكلني احسن , واصحيت وبعرفش اد ساده اكل الفار اد هرب الفار , بعرفش وبهمنيش , لانو عنجد هاي مشكله بضّحك بحياتي , ومعنديش اشي اخاف عليه من الفار ..~

زكرتني هالكصه مع اخوي واحد لما كديش كان يكرف من الفار ومكدروش اجريا يحملوني من كتر الضحك لما شوفت رده فعله ع الفار عشان مايجي عليه ..~

اد اليوم وانا انظف بالحوش والحشيش ملان حشرات ودود يطلع من الارض بين التراب والحشيش , وحتى ام 44 اجر , وما شوفتش حالي رده فعل زياده , وال يمكن الغلط مني , اخ ع الحياه اللي بتخلينا نسترجل لنكدر نتحمل شو فيها وبالاخر بتسمعي حكي انو ليش مش طالعه دلوعه ومايعه , بعد شو بعد ما نختيّر من التعب والمسؤوله والجبال اللي حاملينها , بيجيو يحكو الغلط فينا ..~


||



الخميس روحت اشوف المحيط , وارجعت ع البيت في مشاكل ونكد !



كل ما امر فيه لازم اخد صوره في اوله او اخره للهشارع !

||

bob marley
no woman no cry