أنت ذكى؟؟..فكر شوية

كنت فاكر نفسى ذكى..هه دايما كنت حاسس ان طريقة تفكيرى مختلفة عن كل الناس
دايما بحب أركز فى التفاصيل . دايما بحب أشوف اللى الناس مش شايفاه.
دايما اسمع كل كلمة حد بيقولها و افكر فيها . ساعات كانت كلمة واحدة تشغلنى ايام افكر فيها.
حافظ عدد سلالم كل مكان مهم كنت موجود فيه . دايما بتكلم مع كل شخص حسب شخصيته . و علشان كده عندى أصحاب كتير و عدد قليل جدا منهم صاحبى بجد.
دايما عايز أعرف حاجات جديدة و عايز أتعلم كل حاجة فى الدنيا .
بس نتيجة كل ده إيه؟؟
إنى بقيت غبى

طريقة تفكيرى مختلفة لأنى غبى.. بركز فى التفاصيل بس عمرى ما فهمت الشكل الكبير ..
بشوف اللى الناس مش شايفاه مع إن الناس شايفه صح.
باسمع كلام كتير و بفكر فيه بس مابفكرش فى الكلام اللى بقوله.
بكلم كل شخص حسب شخصيته بس أنا مليش شخصية أتكلم بيها .
عايز أتعلم كل حاجة فى الدنيا . بس عمرى ما اتعلمت حاجة بجد
..........................................
بعد كل ده تفتكر إزاى ممكن أبقى ذكى ؟ .. يمكن أنا عادى مش ذكى و مش غبى .. بجد مش عارف
يمكن لو فكرت ألاقى حاجة تميزنى و مش موجودة عند حد تانى .
طيب عندى فكرة .. ممكن كل واحد فيكم يكتب ميزة هو شايفها فى نفسه أو يكتب هو ذكى ولا غبى
أو يكتب هو ليه بيقول أنه ذكى أو غبى .....
ممكن ده يساعدنى و يساعدكم أنتم كمان أن كل واحد فينا يتعمق فى شخصيته أكتر و يفكر فى حاجات عمره ما فكر فيها قبل