غربة

بما انى مصرى الجنسية فهذة الخاطرة بالعاميه المصريه اتمنى تنال اعجابكم

يالى كنت فى يوم حبيبى وخنتنى
وسبت جوا القلب جرح
كان يجرى ايه لو قلبك ضمنى
وصاحبنى معاك الفرح
كان حضنى فارد جناحيه ليك
من الاذى يحميك
كان لك وطن
انت هجرته واخترت غربة
وبعتنى بارخص تمن
وهانت عليك ايامنا واحلامنا
تلاقيك كمان نسيت كلامنا
آآآآآآآآه يا زمن .......
حلفت ليا برب السما والارض
ووعدتنى ميت الف وعد
عملت ليا من الرمل ورد
وفى النهايه خيانه وبعد
على بعدنا فاتت سنة
والتانيه والتالته جايه
لكن مش قادرة انسى
دا انت صورتك حلم شالتو عنيا
وحد غيرك المفروض انه مكانك عايزنى انسى
ومين ينسى... اول حرف كتبه فى كراسته
ومين ينسى...اول واخر حب ... حب طفولته
ياريت يفهم ان نسيانك مش باديا
انك اول نور شافتو عنيا
انى شفت معاك احلامى الى جايه
انك انت وحدك تقدر تملى الدنيا عليا
رغم انك بعتنى انا مش كرهاك
رغم انك هجرتنى نفسى اكون وياك
رغم بعدك انا بقلبى معاك
رغم خيانتك انا لسه فكراك
ياريتك من الغربة ترجع
ويدق بابى الفرح
ياريتك ترجع
وتنسى الناس ان فى قلبى منك جرح
آآآه لو ترجع
يسوى ايه جمب فرحى الفرح
ساعتها بس هفرح
واقدر اجرح
رغم انى لسه بحبك
لازم ارد الجرح بجرح