لا تَعيشوا لِأنَفْسكم ِفَقَط .. بَل إحْمِلِوا هَمّ " الدين " ..!

أحب مدونتها
هي الوحيدة اللي ادخل اتابعها
الله يسعدها <3

الفيس اللي طالع من عينه قلوووب ��

يعني انا اللي قلتي عنهاا كذاا

في مدونه هنا كل ما اشوف ان صاحبها كتب فيها
شيء جديد انبسط وأروح أشوفها بسرعه ..
الحين كل واحد بيقول اكيد تقصدني
عاد لا تتحمسون مدونه ما اعتقد احد رح يتوقع انها المقصوده

ما بصير نشبه واكون مو انا المقصوده وتسلكي وتقولي الا انتي بس يخي فيني شي يقول بالله قولي انتي

..

نورتي يا جميله مدونتي المتواضعه وصراحة جاني دعم نفسي لان اكمل مسيرتي الكتابيه في مدونتي

وسالفة النسخ واللصق في المدونات للاسف كنت انسخ والصق لكن ما لقيت متعه فيها

فاحلا شي لما يكون الكلام ارتجالي بيصير له ذكريات ممعته

عني كل ما مليت ادخل اقرا هياطي واضحك على نفسي احيانا سخريه واحيانا ولا اخفي عليكم اعجاب

اما عن التويتر فمن جد ما فقع قلبي الا التحزبات اللي فيه والهجوم المبالغ الغير مقنعه اسبابه

بس احيانا احس انه يجمع كللل اخبار العالم ويحدثها بالدقيقه فاعود له مرغمه

اما عن حسابي ما اشارك فيه بس اقرا وابحث فيه لان اختك في الله لو تحمست تخربها

وتكتب كلام متهور فاخوي عشان يضبطني تابعني وحالف لو يلقى لي شي بيطيرني

وانا وعدته اني ما اتهور فصرت اتابع بس لكن من عيوني برسله لك

فانتي دخلتي القلب من اقصر طرقاته

صباحكم ايجابيه

شهر 8 كااامل كنت اصحى الفجر وانام الليل وجا رمضان اجبرت على السهر

وللان احاول اتفاهم مع نفسي اني ارجع زي شهر 8

لكنها مصره ع السهر ولححححد يلومني

من بعد الظهر يصير بيتناا ازعاااااااااااج وانا من النوع اللي احب اجلس لحاااالي واروق مع نفسي

وصراحة ما احب اكل الا الليل فلما يجي الهدوء بعد 11 احس اني ادخل في انسجام ذاتي

واحس اني اصير امتلك اللحظة فيكون جوي رايق لاي شي من طبخ من كتابه من مشاهده من متابعه

في فرق بين مشاهده ومتابعه

نهاية كل يوم اصرح بقرار يكون صارم وجامع لاحداث اليوم

ف احيانا اقرر ادخل العسكريه واحيانا اخذ الوزاره واحيانا اصير مخرجة واحيانا اتهور واقرر ارجع الماضي لتحسين بعض القناعات

ايه اشوا انكم لاحظتوا ان قراراتي بعيده جدددا عن الواقع

لكن للاسف ولا قرار واقعي اتحمس لتنفيذه

عشان كذا اغيره كل يوم

نفسي احيانا مع الامنيات المستحيله والقناعه التامه ان ربي ما اختار لي شي الا انه هو الافضل

اجرب ولو لساعه وحده كيف بكون بالحالات الاخرى ..؟

عشان اسكت ذاك الشيطان اللي امتحني لو لو لو

ارجع اقول الخيال بخليني ع الاقل اجرب ولو جزء منهاا

ولكني انشب في حدث واحد بس يخليني احمد ربي ع النعمه الكبيره اللي خلقني عليها

صراحة الله خلقنا وهو اعلم بحالنا واعلم بما لم يكن لو كان كيف كان يكون

وما انا الا امة ضعيفه جدا امام حكمة وقدرة وعلم الله

ومالي الا ان اسلم جمييييع اموري لله

..

اعتذر عن الخيال والاطالة واللي ما فهم يسحب عليه وافقت لكم

ليش الكبت ^^" الموسيقى ليش تحذفيها ==" ؟

عشان اصلي ثم انام وعداد سيئاتي شغال يحسب بسبب موسيقى اخر الليل تجيب صداع

لا هي موسيقى مثل ما يقولوا تبعث الاسترخاء والاطمئنان ولا سلمنا من الذنب

نورت التقييمات واعتذر عن التاخير

...............

سؤال جميل ! =\ بماانه الاختبارا مقبلة ! اختار وزارة التربية والتعليم

حلو اجل اقابلك بمجلس الوزراء بصفتي وزيرة الاعلام << فيس يسوي كل حركات الغرور

نورت

..........

حيوانيييييييييين .. الليبرالي دا لما يتكلم ضد الهيئة يقول كلام يحسسك انو المجتمع ملائكي ..
ويوم يتكلم ع الارهاب والتطرف يرمي مجتمعنا بالدعشنة وانهم متعطشين للدماء ..
وما عندهم مشكلة لو يرمون اغلب المجتمع .. مالهم وجه واحد .. حسبي الله عليهم ..

ما عندهم مبدا فمع الخيل يا شقرا لا الى هؤلاء ولا الى هؤلاء

اهم شي يحققوا اللي براسهم وطز بالقيم والدين والمجتمع

كذا حسيت شوي ويطق لك عرق بسببهم بالتالي انتقل الحماس لي

وش رايك تصير وزير معانا وبنحطك بمنصب جديد اسمه .. قاهرهم ..

كلامك صحيح 100 %

لوهلة حسيت انها قرارات ملكية .. انتي سموة الاميرة ول انا غلطان .. عههعهعهع

لا كيلواا انا راقيه ادري ان هيبة اسمي كهيبة ملك بس بتواضع واقول اني مجرد عضوه مسحوب عليها بمنتدى العاشق

وانت منور كالعادة خيي

.............

الحمدلله على العافيه جميل أن السعودية لا تسوق لان الشعب قبل ان يقود عليه أن يقود عقله
و أكبر دليل سناب شات الذي اظهر بعض أسرار البيوت الله المستعان = (

ايه بالله مرتاحبن الحمد لله .. والفئة اللي بالسناب لا تمثل الشعب ولا تعتبر دليل للانطباع عن الشعب

انا ادرك ان السناب فتنه عظيمه ومعاك حق الانسان لازم يقود عقله لكن صدقني ان الغباء الموجود في السناب لا يمثلنا

^^

كاني نسيت الموضوع ونشبت بسالفة لا يمثلنا ..زي الاطفال تعلمت كلمة جديده وبكشخ فيها

نورت خيي ومدونتي وشكرا ع التقييم واعتذر ع النشبه

في مدونة قيمت رد فيهاا وحسيت اني كشخه مع الكلام اللي كتبته وضيعتهاا ..!!

وش اسوي عشان القاها بشوف جاني رد على تقييمي ولا لا ..؟

صباحكم نوايا كثيرة لم تنفذ

<< محد منتظر خمس تقييمات .. اتوقع ان صاحبها تورط كان يحسب ان الكل بيتجاهل امر التقييمات لكن طلعنا نشبه

لم ولن ننسى وكل حرف كتبته عليه تقييم

.........

مساء الخير

امس ولد اختي عمره سنه ماسك سلاح < مسدس مويه

ويقول جغ جغ جغ < صوت الطلقات

ناهيكم عن التصرف الوحشي اللي يسويه ولد اختي

لكن تتوقعون لو انتشر هالفيديو وش بتكون ردة الفعل ..؟

اتوقع والله اعلم بينكتب تحته .. هكذا هم اطفال المتشددين ..

ولا ... ام تربي اطفالها باسلوب داعشي

وتجيكم التعليقات .. هذه نتيجة مدارس تحفيظ القران

.. هل هذا ما يامر به الاسلام ..؟

وينتشر الفيديو في امريكا باسم .. طفل سعودي يحرض على القتل

وتقوم امريكا بمساندة مجلس الامن تحقق بالقضية

وتنصح كل ام عربيه انها تشغل موسيقى على راس ورعهاا للتخفيف من هذا الفكر

ويغرد متحرري عصرنا بانه يجب ان تكون هناك حصص موسيقى في مدارسنا

وان السبب الرئيسي في تصرف ولد اختي هو تقييد حرية المراة والحل الوحيد هو


(( قيادة المراة للسيارة ))



وبالاخير حاتم ولد اختي حاول يطلق جغجغاته على اخوه وما تاثر بشي قام حاتم صفق راس اخوه بالسلاح عشان يتاثر

وانتقم اخوه منه بنفس اللحظة وعم الصراخ في المكان

هههههههههههههههههه ييب والله من جد جبتيهااا + من زمااان عن مدونتك كنت اتابع تدويناتك قبل عامين

اذكرك يا جميله وفقدتك خيتي .. نورت

..

مساء الخير

يسلم عليكم قولوني ويقول لكم فرحوني اللي فيه مكفيه

قلت له ترا مالك الا الكلام

اصلا لو فيه خير يهدا شوي بس مااااش كني انفخ في قربه مشقوقه

مدري باقي لي حسنات من كثر ما اتشكى منه

احس احيانا ودي اجلس معاه جلسة حوار هادئ

بعرف كل الناس كذا ولا قولوني بس

اشوف الناسمبسوطين مرتاحين متفاهمين

وانا واياه ( قولوني ) بالمشاكل

بساله كذاا ... انت وش هدفك من الحياة ..؟ وهل انت مرتاح الان وانت تشوفني تافله العافيه بسببك ..؟!!

صدقوني مهما كانت اجابته بحاول اتحلى بروح ايجابيه وبقنعه انه يا يصير هادئ او يهيج مع نفسه انا لا يدخلني في الموضوع

وفي كل الحالات ما ظنتي بنتوصل لنتيجة لان الروح الايجابيه هذي دورت عليها بنفسي ما لقيت ولا ريحة منها

انا قررت اليوم اني اطلب اعفاء من منصب وزيرة الاعلام صراحة قولوني ماراح يتحمل سخافة زياده

5 والأخير كده الهدية وصلت

عديتها وتاكدت انها خمسه بلا زيادة او نقصان

لكن لحظة كيف صارت هديه ..!؟؟

بعد ما تعبت وانا اكتب الخمس حروف وانبحح صوتي تقول هديه

للاسف هذي حصلتها بمجهودي وشقاي بتهدي زيد تقييم واحد ع الاقل وقول هديه

وبالمره الجايه خليها 20 تقييم لو سمحت وانا بكتب غريبه اربع مرات

وشكراا ع الهديه

.............

صباحكم عناد اطفال

الاطفال بالنسبة لي كالزينه اشوفهم من بعييييد لكن اختكم في الله ناشبه معاهم

زمان كانوا يسالوني ليه تتابعي مسلسلات اقول لهم انا ما اتابع عشان اتونس لااا

اناا اتابع عشان اتعلم ثقافات الدول الاخرى مدري احد اقتنع ولاحتى انتوا ما قدرت اضحك عليكم ..!

المهم مشيت السالفة على اختي الكبيره باين انها انشغلت عن تتمة الحوار

والاهم اني انا كنت مقتنعه

ما لقيت الا ثقافة الهند اللي كلها كلها ضد المراة

يعني متحرري عصرنا يتركونا يالسعوديات ويروحون يشوفون بسس ما يساندون في تحرير المراة الهنديه

تجلس ببيت ابوهاا عار في نظره ويزوجها لاول واحد يخطب كمان بعد عرض ومدري وش

وبعد الطقوس اللي تجيب مغص كلها تحكي انواع التصغير لاهل العروسة مع غرور اهل العريس

وكل ما صار شي بالغلط قالوا هذا نذير شؤم

يكفي ال 100 كيلو اللي تلبسه العروس يوم الزواج < حسيت بحراره لما تخيلت اللبس

ولما تتزوج تاخذ هي كلللل مسؤولية بيت اهل الزوج وهو منسدح ولا منه اي فايده

وربي جاني كرب لما تخيلت نفسي اصير كنة بيت هندي

لا والكل يشوف هذا واجبهاا

هذا من غير ان اكثر الطقوس المؤلمة ع الحرمة مدري وش قصتهم يحبون يعذبون انفسهم

زي ان الدعاء عشان يستجاب من الالهة لازم الوحدة تعاني من اشياء فوق طاقتهاا

تمشي حافية لين المعبد ،، تصوم ايام كثيرة متتاليه طبعا صومهم لليوم كامل مو نصه مثلنا

تمشي ع الجمر ،، وللان ما شفت رجال ولا بعمل هندي سوا شي لزوجته ما غير منبطح بالبيت ياكل وينفخ

هذا كله كله وامر الطبقية شي ثاني

احتقار للفقراء وتعظيم الاغنياء

من غير المليون اله كل ناس يعبدون اله غير

حتى كل واحد يقدر يسافر بالهه معاه .. لاحول ولا قوة

شركيات كثيره جداا الواحد منها كفيل انه يخرجنا من دائرة الاسلام

هذا اللي صوره لي اعلامهم ما جبت شي من راسي

هذا اللي يبغونا نعرفه عنهم

طبعا انا اقصد الهندوس بكلامي

احمد الله اني مسلمه وانه عندنا الايمان بالقضاء والقدر والاحتساب

اقلها لو ضرني شي متاكدة اني لو صبرت ربي يجازيني على صبري

اما القضاء والقدر فلا اشيل هم شي ابد وامسح من قاموسي كلمة نذير شؤم فكل شي يجيني احمد الله عليه

متى يرتفع الضغط وينزل ويرتفع بنفس اللحظة

يعني يجي ارتفاع ثم هبوط ثم إرتفاع وهكذااا

هذا الله يسلمكم لما اجي اذاكر لاي احد

صبري قليل بالفطرة ويوازي الصفر لما اذاكر لاحد

احد الدنيا تصير سودا فجأة

مع كذاا كيف لما اذاكر لبزر أولى ابتدائي

هذا حالي مع احد النتف الصغار

لو يشوفني احد بيقول هذي تحتضر

يبغاله صبر وهذا الشي في هذا الظرف بالذات مو موجود

أسأل الله تعالى يزيدني صبر وطول بال ويختبر ويجيب درجات سنعه

مدوناتكم كلهاا مدرسه واختبار تجيب الهم

الله يعافيكم كما عافانا

المهم بعد سنوات طووويله مرت من اخر اختبار لي

حتى نسيت وش تعني كلمة اختبار

احس ان قاموسي حاط استفهامات عند معنى ها الكلمة

عندي اختبار بعد اسبوع

حتى قدرتي على المذاكره تحولت لطاقة كامنه لا يمكنها الحركة بتاتاً

الان بالله كيف بذاكر

والله احسني عااااجزه عن التخيل بس اتي بختبر

كلللها سهله اختباري سهل لكن عند الفصل الاخير هنااا اوقف

احس ان مخي بيضرب

المشكله فيني انا سنوات ومخي خامل

والان ابغاه يشتغل

هذا لو قلت له فكر كيف اقوم واسويلي اندومي بيتكاسل

بيقول لي مافيني شده

والان اكلفه باختبار

المشكله اني لااازم اختبر < فيس يبكي

................. < بعد دقائق من الجلد الذاتي والتهزيئ

انا اقدر اختبر

صدقوني هي صعبه صح لكن النجاح ما يجي بسهوله

لازم نثبت لانفسنا اننا قد كللل اللي يواجهناا < ع الاقل طبقي اللي تكتبه

ما غير اهايط لا تحرموا انفسكم لذة الانتصار ومدري وش

والان عشان اختبار قعدت اتبكبك

المهم دعواتكم

ومساء الورد للجميع

اختبرت اخيراا

واجتزت المستوى الأول

وجبت 96

بعد اسبوع من الحفظ المستمر اخيرااا صرت طالبة مستوى ثاني

عقبال جميع اللي عندهم اختبارات يا رب