مأساة روح {هالكه} في اوراق تائهه ~

السلام عليكم ..~

اليوم الخميس 11\1\18 || والساعه 9 واشي بالليل ..~

اليوم كان بالنسبه الي يوم تنظيف عالمي , من اول ما اصحيت لقبل ساعه وانا اشتغل وانقل وارتب , وما بين مشاوير , مكانش يوم عطله لنفسي من مره , من مره هالاسبوع كان عليا , يلا مهي بتيجي مش بس ايام , كمان اسابيع مش منيحه ..~

؛

حتى اثنين وثلاثاء شفتات الليل كانت عمى , لدرجه كعدت ادوّر ع النت ع شغل عشان خلص بدي اترك شغلي , بس يخساره ملكيتش , نفسي اشتغل شغل مش عشان المصاري , اشتغله بس عشاني , من فتره بفكر اشتغل في سينما بس عشان اشوف افلام ببلاش , بس ما بدهومش حد هلكيت ..~

؛



وانا ابعبش بالاغراض طولت الكميرا وزمان عنها , واخدت صوره لساده ..~

؛



وطولت كمان الطابعه وطبعت صور وحطيتهم بدفتر مزكراتي اللي زمان عنهم كمان ..~

؛

الاشي الحلو الوحيد اللي صار انو وصل احدى كتب المانغا اللي طلبتها , يخساره ملكيتش الا المجلد التاني والتالت ووصل التاني , ام المجلد الاول لكيته بموقع تاني وخوفت اشتريه ويكون نصب , بس وانا ادوّر لكيت انو موجود باحدى محلات المانغا في "مدينه اليابان" بحاول اروح مع انه المجلد الاول بس 3 فصول فيه لهيك مش متشجعه وخاصه مفش اشي محرز فيه , يعني بالعاده اول 3 فصول مش كتير بقرأهم , بخصوص الرابع والخامس مش متأكده بانو المنشورين عالنت ترجمه انجليزي واد هم ولا نصب لهيك بدري عليهم مع انه يالله شو فيهم شغلات رهيبه , هاي المانغا صرت مدمنه عليها بانو اضل اعيد في الفصول لدرجه حفظت محادثاتهم ..~

لما وصلني المجلد , كنت رايحه افتح الباب لانو ايمان كانت جايه عندي , وكان تبع التوصيل حاطط الكرتونه ع الباب , حملت الكرتونه وحطيتها بالكراج , ما عبّرته معي الدار عشان اتجنب اي سؤال بينتطرح من ايمان , وشكله انو جواه كتاب , لانو كانوا حاكين انو الشحنه بتاخد وكت حوالي اسبوعين , لهيك كنت مش متأكده اد هو الكتاب ولا طلبيه تاني لاني كنت بفتره موصيه ع كتير شغلات , عبرت ايمان البيت وشوفتها بتحكي ع البلفون , وانا من جوى متحمسه اد الكتاب ولا لأ , ارجعت اطلعت ع الكراج وبسرعه وبسرعه افتح واشوف اد هو المجلد ولا لأ , واشوف اد هو التاني ولا التالت , ولما شوفته والمجلد التاني , عطول لفيته بالورق وعبرت البيت ودخلت غرفتي , وكعدت اقرأ بالفصل المحبب عندي, والابتسامه بوجهي من الدان للدان , ولكيت انو ترجمه المجلد غير عن ترجمه النت من المواقع اللي بقرأ فيها , وحتى كمان لكيت انو في مقتطفات مظظله ينعن شكلهم , ومع هيك ما آثر عليا بعرفش ليش , كنت بس مستمتعه , وبعدها اسمعت انو ايمان سكرّت البلفون وجايه ع غرفتي , حملت المجلد وحطيته تحت المخدا , ليش كلنا عنا مكان التخبايه تحت المخدا , واه هدا من الكتب اللي بتتخبى من ايمان , لانو صاير تفكيرها ديّك وبديش اعبر بأي نقاش معاها لانو بنضل نتكاتل ولانها مش كد الثقه ..~

؛





اسمع ,, بدي اياك تعرف انك مهم عند حد , وانو في حد بهتم فيك , بس مش انا , بس في حد ..~

|..~

السلام عليكم ..~

اليوم هو السبت والساعه حوالي 3 ونص العصر || 11\3\18

ما مصدكه يصير التوكيت شتوي , ولسا مريضه وبروح عالشغل غصب عني لانو مفش حد يشتغل مكاني , وكارمليتا كانت بدها نطلع ع مشوار مع بعض , وبالاول مكنتش بدي , بعدين حكيت يلا مش مشكل خليني اروح ووافكت واتفكنا ع الاحد ولحد الآن ما ردت خبر امبين انها انشغلت بكصه , وداخليا انا بديش نطلع , فا مش فاركه معي ..~

ارجع لاحكي عن مجريات ايامي , يوم الخميس لما كنت ع المدونه , وانا على المدونه اتصلت امي وحكيت معاها , وكنت حوالي كم يوم بحكيش معاها لانها كانت مسافره ع الاردن , وراحت زارت بيت حبي لانو بتعرف امه حتى لو احنا بهدا الوكت امي وامه مش ولا بُد , بس بعرفش عن الاميات بحس بحطّوا الكصص ع جنب , وخاصه امي بشوفها كتير طيبه وكتير بتحط الكصص ع جنب , ولما راحت اخدت معاها الهدايا اللي بعتهم معاها زمان لحبي , لانو كل مره امه تنزل ع الضفه بديش امه تاخد الهدايا , بدي هو بنفسه بالايد ياخدهم لاني بثقش في امه , واشي بشوفه اني صبيه بتأثر ع اصحابي والناس , كأني بدفشهم على انهم يعملوا شغلات في حالهم , صح انا بحب اشوف الناس تتعذب , بشوف كلامي بيترك آثر فيهم بخليهم يفكروا , وعشان يهربوا منه او يفكروا اكتر , بياخدوا شغلات اضيّع العقل , يمكن لاني صريحه , بشوف اني بحطّم الناس , لهيك كل ما الدنيا تسكّر البواب بوجهي , او تكون صعبه معي برضى , بحكي يمكن عقاب ..~

بعدها ما خلصت حكي مع امي , طفيت اللاب توب , وطفيت الضواض , ورميت البلفون , واتمددت بالتخت اسرح واسرح , بدي انام بس مش نعسانه ,’ كنت بس تعبانه وكل عضله في جسمي بتضرب عليا وبتوجع , وصلت لبعد نص الليل وانا بس بتحرّك وبفكر , مرات بفضّل اني اضل مشغوله باشي ولا افكر عشان ما اوصل لمرحله اكره كل شي اكتر من اللازم , بعدين اسمعت صوت بلفوني برن , حكيت بعقلي منيح انو حدا اجى , كان حبي , صارلنا زمان مش حاكيين تلفون لانه اختفى فتره عشان الدنيا صعبه معه , كعدنا نحكي ومكانش طافي هاي المره , مع اني بحب يكون طافي عشان بحب اضحك وعشان اسمع شغلات بحكيهاش وهو صاحي وبعقله , ضلينا لحوالي 4 الصبح او خمسه , مش متزكر , بس اللي متزكره اني حكتله تعبانه ويمكن اغفى وانا فاتح الخط معك , وهاي شغله كنت بعملها مع اغلب اصحابي اني بنام وانا عالخط معاهم , وهاي الشغله بصراحه خلت اتنين يتجاوزوا حد معي اللي هو حد بعد الصُحبه لهيك تركتهم وبطلّت اعملها الا مع حبي .

واصحيت يوم الجمعه حوالي 7 الصبح لانو كان صايبني وجع راس بخوف , كنت صاحيه عرقانه غير شكل , لهيك كومت اخدت دوا , واني احاول انام عالفاضي , حاولت بس هيك اصفن واطلّع من الشباك بالشجر وهو يتحرك والعصافير وهي اطيّر , وحوالي ع 8 واشي الصبح بلّش يخف وجع الراس , لهيك كعدت اقرأ بالمانغا , وحاولت اني ما اركزش كتير عشان ما يزيد وجع الراس , وع 9 الا بلفوني برن وكانت ايمان , حكت انها صفت في مكان بعيد عن الدار واد باجي وبساعدها لانها جايه عندي , اجت وعبرنا وافطرنا واشربنا كهوه ع السريع , وضليت متممده ع الكنبه في الصاله , وانا من النوع اللي بكون عندي في ملان افلام ومسلسلات وانمي في قائمه الانتظار , بس بضل اعيد بالافلام والملسلسلات اللي شايفها اكتر من مرتين وتلات , وانا بالصاله احضرت الحلقه المفضله من احدى المسلسلات العربيه , وخليت ايمان تشوفها معي وحكتلها اد راح تفهمها ولا كيف , الحلقه بتحكي عن اشي رهيب لهيك صرت شايفه الحلقه اربع مرات , وبعدها كمان ضليت متمدده وبلشت اشوف بفلم عربي عنجد كمان بحبه , وعشان ايمان تشوفه معي , بس ما عجبها , هي ضلت ع البلفون وانا ضليت اشوف بالفلم لوكت الظهر .

ع الظهر اماني بتتصل وبتحكي هيها ع الباب جايه عنا , اجت اماني اكلنا واشربنا كهوه ع السريع لانو ايمان كان عليها تجيب بنتها من التدريب وحكت اد بنروح معاها , روحنا معاها وعاودت رجعتنا ع البيت انا واماني , ضليت اماني عندي حوالي ع 2 ونص العصر وبعدين اتسهلت , وبعدين رتبت الدار بسرعه بسرعه , وطوال اليوم خليت ساده يطلع برى ع الحوش , كنت زمان اخاف , ولحد الان بخاف انه يضيع او يندعش , بس بنفس الوكت بستغرب هان انو كل الهرر بخلوهم جوى البيت وبشفق عليهم , وساده بضل ع شباكي او شباك المطبخ وبكون نفسه يطلع برى يلحك العصافير وكل هالكصص , لهيك صرت كل يوم لو اطلّعه ساعه , بس يوم الجمعه خليته كل النهار برى , عبرّت حوالي ع 3 لما اجيت اتمدد عالتخت .

اتمددت ع التخت وبلشت اقرأ بالمانغا , وبحكيلكم , لاني عنجد بعشقها للمانغا عنجد اني مستمتعه فيها لاني بضّحكني وهو فش اشي يضّحك فيها , وغير انه الرسوم روعه , اشكالهم , وكلامهم , ومبادئهم , وعشانهم ياكوزا وانا بعشق الياكوزا , ليهك بضل اعيد بالصفحات , وما قرأت شوي الا جرس البيت برن , والرنه تبعت اخوي واحد , زمان عنه , وكان لابس تيشرت الشغل وبلشت مسخره عليه لانها كبيره عليه ولانو عليها شيطان , بعدين حكى معي بريك ساعتين وحكيت اجي انام عندك قبل ما ارجع عالشغل , لانو بيتنا اقرب ع شغله من بيته , راح ينام , وانا اجيت ع غرفتي وحكيت يا ريت انا انام , ما اجيت انام الا امي بتتصل , واستغربت انها صاحيه كتير بدري , وحكينا حوالي ساعه واشي , واخوي واحد كان طالب مني اصحيّه ع ساعه محدده , وانا احكي مع امي عملت كهوه قبل ما اصحيّ اخوي وامي اتسهلت , بعدين صحيّته وجهزتله الكهوه وجهّز حاله واتسهل عالشغل , وانا جهزت حالي واتسهلت عالشغل لانو كان عليا شفت ليل .

وانا كاعده برى ع العتبه تبعت الباب اجى عندي جارنا الصيني وكعد يحكي معي , حكيت بعقلي انا بدي اكعد لحالي بالهوا لحالي عشان اريح راسي , مش عشان احكي مع حد , وبعدين انكلع , وضليت حوالي خمس دكايك الا هو جارنا الختيار جاي عندي , حكيت لا حول ولا قوه الا بالله اطلع عالشغل احسن , كعد يحكي معي وفاطس عحاله ضحك لانه دايما سكران , وطلبت الاوبر والحمد لله كعد بس دكيكتين , واوصلت الشغل وكانت ليله مكرفه عالاخر , اه بدكم تتعودوا ع انه كل الليالي زفت وبدي اضل احكي عن كل ليله زفت معي .

اليوم الصبح السبت اغفيت وانا بالشغل حوالي نص ساعه , احلمت بناس بعرفش مين هم مع انه بعرف الا ما يكون عقلي الجواني بيعرفهم , بس كأنه الكراج تبعنا زي محطه او اشي لانو ملان عالم تيجي وتروح , تيجي وتروح , وصار حريق بالكراج بساعه الكهربا , كان كابوس الحلم , وكنت مخنوكه من كل هالعالم اللي تيجي وتروح , اما الحريق مكنتش خايفه منه , وحكيت طالما مش بالدار تبعتنا بهمنيش ينحرقوا كلهم , اخ يا ربي ليش هيك بفكر دايما انا , واصحيت وكالعاده زي كل مره بسب ع النوم وع النص الساعه البريم تبعي وبحكي اضل صاحيه احسن , ولاني لسا تعبانه روّخت في اوبر مش بالباص , شوفت فش فيا حيل لامشي .

اوصلت الدار حوالي 8 ونص الصبح , الحمد لله الاوبر ما اتأخر , واول ما عبرت الدار اتصلت ع امي حكتلها يما تعبانه ونعسانه بدي انام وبحكي معك بعدين , حتى ساده جنني لاني كنت احط راسي تحت الحرام بديش الشمس تعبر في عنيّا لانو قناع العيون التلات ضايعات لانو ساعده بضل يلعب فيهم , وفش فيا حيل ادوّر عليهم , وهو يدّخل راسه تحت الحرام ويعيّط , ولا سألت عنه لاني عنجد نعسانه , والحمد لله الله هداني نمت واصحيت حوالي ع 10 ونص , وضليت بالتخت لا نايمه ولاصاحيه لوكت الظهر .

الظهر بتتصل عليا اماني وبتحكي انها عالباب وليش الكراج مفتوح , كانوا جيران المستأجرين فوق عم يصلحوا بالدار , وانا معيش خبر لاني مسمعتش اصوات ولاني ما اطلعتش من غرفتي , اجت اماني هي وبناتها الكبيره والصغيره , افطرنا وهي طبختلنا اليوم , واشربنا كهوه , واتصلنا ع ايمان حكينا معاها , وبنات خواتي بحبوا اعمللهم اظافرهم , وكل مايجيوا بجب يختاروا مناكير واعمللهم , وكنت لسا مسطوله , وحكينا وعملت اظافرهم وممنوع حد منهم يعبر غرفتي , الا بنت اختي ايمان الكبيره , اما غيرهم لأ , حتى خواتي مش كتير بحب يعبروا غرفتي , وزمان وكت مكانش عندي ساده , كان ولا حد يعبر غرفتي الا اخوتي تلات وواحد وامي , لانو غرفتي كانت ملانه صور من عارضات وحبي , وخواتي بشوفهم اد شافوا صوره حبي معبيّه الحيطان بكعدوا يتفلسفوا , ولو شو ما احكيلهم شو اللي جواي وشو بفكر عالفاضي بفهموهوش , اما اخوتي الشباب بحكوش اشي , وخاصه اخوي واحد , لما كان ساكن معانا كتير يجي ع غرفتي وبتزكر اول ما اجى وشاف صورته مع حبي اللي اتصورها في الاسبوع اللي قبل ما يتجوز اخوي فيه , حكى وال زمان عن هاليوم , وكانت الصوره مسخره لانهم كانوا صاحين من النوم وشعرهم طايّر والغرفه كايمه كاعده , وانا بحب هيك صور لهيك بعتولي اياها , وامي كمان بتفهم ايش اللي بيني وبين حبي , بس لما اجت هان امي هاي المره شلت كل الصور عشان بتعرفش تنام في غرفه فيها صور .

ضلت عندي اماني للعصر , وبعدين اتسهلت , وانا اجيت عالمدونه , بس اكلت وحكيت مع خواتي كمان مره وحكيت مع اخوتي , وهيني عليا الليه كمان سهر والله يستر , ويمكن في تغير وكت شتوي ويعني راح نشتغل الليله 13 ساعه مش 12 , تبا بس , وحتى ايمان بعتتلي فيس حد من الشباب بده يتعرف وشو رأيي فيه وكل هالكصص , مكدرتش احكيلها انه متخلف مفلسف مش مصدك حاله, وانو اهل هاي المناطق غير عن تفكيرنا , وانو الشخص مش هو نفسه اللي بنشره عالنت , ويمكن حتى انا هيك , ومع هيك عشان اتجنب اني اتكاتل معاها لانها بتشوف كل الناس مناح الا انا بس العاطله , لهيك حكتلها بسأل امي بالاول , وامبين انها حكت لاخوي واحد وحكالها ابعدي عن هدول الناس , واكيد سمعتله لانو مش عاطل ..~

اووه كديش اليوم حكيت هه

؛






محدش بيفهم عليا , وانا بعرفش افهّم كمان !!..~

السلام عليكم ..~

اليوم هو الاحد والساعه 6 ونص بالليل || 11\4\18 ..~

؛

امبارح اتسهلت ع شغل الليل , وكانت ليله عمى وزفت عالاخر , ومن كتر ما انضغطت اتصلت ع امي افضفضلها واحكي معاها وانا بالشغل , اجى الصبح وما صدكت يطلع النهار لانو صار توكيت شتوي وعنّا بيتغير ع الساعه 2 بالليل , بس مش معروف اد راح يدفعولنا اجار 13 ساعه ولا بس 12 ساعه , لما طلع الصبح اتصلت عليا كارمليتا وحكتلي انو اد بنروح ليوم تاني لانها مشغوله اليوم , حكيت بعقلي اجيتي والله جابك , بالاصل انا بديش اروح لانو كنت ممغوصه من كتر ما اتوترت بالشغل , وما اجاش عبالي اروح عالبيت , لان كانت نفسيتي مش منيحه , حكيت بعقلي مهو المحيط بعيد عن شغلي 5 شوارع بس , خليني اروح عليه , لاني صبيه بشوف حالي لما اشوف المحيط نفسيتي بتتحسن , مع اني بكره هدا الشط لانو ملان عالم , ولانو في فقمات ورحيتهم وريحه المحيط بتكون زفاره بتقتل الواحد وبتقلب المعده , روحت كعدت بس عشر دكايك وانفتح راسي من صوت الفقمات وانقلبت معدتي وخواصري بلشوا يمغصوا اكتر , سحبت حالي وحكيت اروّح احسن ,’ وكانت امي معي عالتلفون وكانت هي التانيه حتى مريضه , ااركبت الباص وحكيت بدي اقرأ , بدي اشوف شو شو بصير اكتر , مع انه راسي بوجع ومعدتي , حملت الكتاب وانا بالباص وبقرأ غصب عني , مش كادر اركز , بعدين بلش راسي يهدا ومعدتي , وعاودت ارجعت اقرأ , وقرأت هدا الفصل تلات مرات وانا في الباصات من كتر مهو حلو , واوصلت البيت , وانا بمشي بالشارع وقربت اوصل البيت , شوفت المسؤول عن الدار في سيارته واقف باب الدار , حكيت يا الله بديش اشوفه عشان ما ينادي عليا ويكعد بتفلسف عن الدار , لانه هدا حيوان وبده ايانا نترك الدار , الله بحبني انو بنفس الوكت اللي وصلت ع باب الدار , نزلت المستأجره في الطابق اللي فوقنا وشافها وكعد يحكي معاها , وهو جاي عشان كصه بزبطوا بالدار من امبارح , حمدت الله وبسرعه بسرعه فتحت الباب وعبرت الدار , ساده كالعاده لما يسمع صوت الباب بيجي ركاض , وبرمي حاله عالارض عشان ادلّعه , وانا برمي حاله معه عالارض , بعدين بعد بكم دكيكه لما نزهك من بعض , انا بروح بكمّل رمي حالي عالتخت , وكانت معدتي موّلعه وخواصري , ضلت بالتخت وكنت ارج وسكعانه , حطيت عحالي اربع حرامات , وكنت بين النوم والهلوسه والعرق والشوب وساده من جهه بلعب بشعري وبدّخل راسه تحت الحرام بصحيني , ضليت هيك حوالي للساعه 1 ونص الظهر , لا اكل ولا شرب ولا اي اشي , كنت تعبانه ومريضه كتير , واد بتحرّك خواصري بيوجعوا اكتر , واللي صحاني هو رن الجرس تبع البيت , كان كتير يضل يرن , ويدخل في احلامي وكوابيسي , غصبت عحالي وكومت من التخت , فكرت واحده من خواتي , مع انه حكتلهم محدش يجي الاحد لانو يمكن اطلع مع كارمليتا وغير انه شوفت اماني السبت وايمان بعرفها بتطلع الاحد من الدار الا للضروره , ما اطلعت فتحت الباب مكانش حد , سحبت حالي واطلعت عالشارع ولكيت حد هو وصاحبه بالسياره , نزل من السياره وكعد يحكي معي , وبحكيلكم يحكي وانا سامعه صوته ومتابعه مع ملامح وجهه بس والله ما بفهم شو كاعد بحكي , خلص حكيه وبستنى الجواب مني , وكانت ملامحي انو مش فاهمه عليك يا زلمه , عاود هو من حاله عاد من كلامه , ولسا والله مش فاهمه شو بحكي , عم احاول اركز شو بيحكي مش كادره , كان في غباش على سمعي , وفكّر اني جكر بغلبه , بس انا عنجد لسا صاحيه ملخومه ,بعدين قرّب عليا وحكتله , يعني سامحني مش فامهم عليك , وعاود تالت مره يحكي , وانا بلشت افهم كلمات من الجمل اللي بحكيها , وبلشت اجاوبه وكان جاي يسأل عن صاحبت البيت اللي ماتت ووين بنتها وهو بكون اخو اللي ماتت وهيك كصص , اعطيته رقم صاحبه البيت واتصلت عليها وما ردت ,بعرف هي بتحكيش معانا , لهيك بعتت مسج انو اعطيت رقمها لخالها , وبعدين ارجعت عالتخت , وساده بعيّط بده اطلّعه برى , وانا بكدرش لاني خايفه اغفى وباب غرفتي مفتوح عليا , وكمان حكيت بديش اطلّعه واسكر الباب عليه يصير ما يصير , لهيك هو فقد الامل واجى نام , انا عاودت اغفيت , واصحيت ع تلفون من اخوي تلات انو بده يجي ياكل اد بجهزله اكل , كومت عملتله اكل , وبعدين هو اتسهل , وانا خلص ضليت صاحيه , طلّعت ساده عالحوش , وانا افطرت واشربت كهوه , وضليت عالتخت بقرأ , الا امي بتتصل حكيت معاها , وهيني ..~

؛





احلى شي وصلني اليوم " انتي حلوه زي نص شيكل موجود في الدزدان راح يكمّل أجره ال 4 شيكل مع ال 3 شيكل ونص اللي في جيبتي بدون ما احتاج افك ال 100 ..~

السلام عليكم ..~

اليوم هو الثلاثاء والساعه 4 ونص || 11\6\18

اخر مره كنت ع المدونه يوم الاحد بالليل , وكانت ليله بالبيت , وكان عليا اكمّل ترتيب الكصص لاني بدي اغيّر ديكور غرفتي بس لاني كنت مريضه وتعبانه مكدرتش , اللي بتزكره انو يوم الاحد نمت بدري وعشان كان توكيت شتوي اشبعت نوم , لانو كان مكسور عليا نوم ..~

اصحيت يوم الاثنين لانو كان عليا شفت صباحي , واللي صحّاني امي , اتصلت عليا ع 7 ونص الصبح ونسيت انو اتغيّر عنا التوكيت , واتأسفت انها صحتني , وحكتلها والله اني شبعانه نوم , بس مع هيك ضلت حاسه بالذب حكتلي روحي ارجعي نامي , طبعا معرفتش ارجع انام , بس ضليت بالتخت , افكّر وافكر , افطرت وجهزّت حالي, وهاي المره من مره ما اترتبت لانو مكانش معي وكت , بس كثّرت الايلانير عشان اخفي السواد حوالين عيوني , وحكيت يا رب متكون السياره محشوره , لاني بتزكر لما صفيتها بهدا المكان من قبل كانت محشوره ومعرفتش اطلّعها وكان معي اخوي واحد وهو اللي طلّعها إلي , وكان عندي هدا الخوف انها تكون محشوره , ولما اوصلت عند السياره حكيت اووه الحمد لله مش محشوره , ولما كرّبت طلعت محشوره حشره اخت شلن , صابني صداع لما شوفتها هيك , وفتحت السياره وكانت الدنيا شمس والشمس بعيوني , فا يم انعميت وسطّلت اكتر , وكعدت احكي مع حالي اد ما اروح عالشغل في السياره , اد اروح بالباص او الاوبر , بعدين حكيت بنفعش هيك كل شوي اوكع بهاي الكصه , حكيت طيب اد بلاكي حد بالشارع احكيله يساعدني , لكيت واحد من الصين , وخدوها في بالكم انهم بيعرفوش يسوكوا من مره , لما انزلت من السياره وكربّت عليه عرفت انه صيني , في الاول عشان الشمس في عيوني ما انتبهت , بعدين لما اعرفت انه صيني , هو بستنى فيّا احكي معه , فا انا حكتله ولا شي شكرا , وسحبت حالي وحكيت معيش الا اقل من نص متر بين سيارتين على نزول , يعني عالاكيد راح اخبط السياره الكدامي , او السياره اللي وراي , ايش اعمل يا مير تغامري ؟ وغامرت وإيدي على قلبي , 5 مرات اقدّم وارجّع كدرت اطلّع السياره وكديش انبسطت بدون اصابات , واتسلهت عالشغل واتغلبت في مكان اصف فيه عشان في تتظيف الشوارع , وكان معي عشر دكايك , حكيت مع امي , وبعدين عبرت الشغل ..~

لما اطلعت من الشغل حكيت بدي اروح ع المحيط , ما حطيت إجري في السياره اللي بلفوني برن وكانت امي وحكتلي انو اختي ايمان بتستناني باب الدار , حكيت منيح انك حكتيلي , وسحبت حالي وروحت عالبيت وكانت ايمان تستناني , عبرنا البيت , وكان من الايام الغريبه اللي اتناقشنا انا وايمان بدون ما نتكاتل , اول مره هيك بنتفاهم , وهيك هي بتفهمني , كديش انبسطت بصراحه , وطوّلت عندي ضلت حوالي لل 3 العصر ومكانش عبالها تروّح كانت زهكانه ..~

انا كنت لسا تعبانه ومعدتي مش عبعضها , جهزت حالي واتسهلت عالشغل , واطلعت ابدر من الميعاد عشان عنجد بحب امشي صايره بالليل بمنطقه شغلي , زمان كنت اخاف عشان ملان ناس بيتعطوا , بس بنفس الوكت ملان عالم راقيه وبتفهم وشغلات بالشوارع حلوه , وغير انه هوا وهيك تعديل لوجع راسي , بس مع هيك تبعت الاوبر حماره بتعرفش تسوك , وكل مره بدنا نخبط حد , او حد بده يخبطنا , والكل يزّمر وحاله , عنجد امبارح حكيت خلص الله اعلم اوصل الشغل عايشه , وكانت امي في بالي , والحمد لله الحمد لله اوصلت عالسلامه بعد ميه خوفه ..~

اوصلت الشغل وكالعاده , ليله زفت عمى تعب وارهاق ونعس ووجع راس , وانا وكارمليتا مع هيك نضحك ونتمسخر ع بعض عشان اشكالنا زي الزومبين وعشان فش فينا حيل نتحرك ونشتغل , واتصلت حكيت مع امي , حتى صوص صارلها فتره بضل تبعتلي مسجات وامبين في بتمها حكي , بس والله مليش نفس احكي مع حد ..~

اجى صبح الثلاثاء , واطلعت من الشغل , اخدت الباصات وكنت اقرأ ومبسوطه , مع اني قرّبت اختم الكتاب وبالعاد بكون بفتره حزن , او بكعد سنه بالكتاب , بس لانو هاي الروايه اربع كتب لهيك لسا شايف حالي زي كأني ببدايه الكتاب , واوصلت البيت وافطرت , اجيت بدي اعمل كهوه , الا ايمان بتتصل وبتحكي ويني ؟ وما انامش ! حكتلها نطلع نشرب كهوه ؟ واجت اخدتني , وشربنا كهوه , واتحوجنا , وبعدين رجعتني عالدار , ما عبرت اكلت وبدي اشرب كهوه , الا اماني بتتصل بدها تيجي عندي , اجت وكعدنا وضلت لل 3 , بعدين الي من زمان بحكي بدي ارتب غرفتي وازبّط الكصص , ورتبت نصها بعدين اتعبت , اكلت واتمددت وهيني ..~


؛





||

السلام عليكم ..~

اليوم هو الاربعا والساعه هلكيت حوالي 8 بالليل || 11\7\18 ..~

اخر مره نمت فيها كانت ليله الاحد لصبحيه يوم الاثنين في البيت , هيني اليوم الاربعا ومن الاثنين حتى ليله الاربعا ما نمت ولا دكيكه , لا ليل ولا نهار , وشايف الديك ارنب , معنديش وكت للنوم بالنهار , وبشتغل بالليل , بالنهار بين كصص خواتي وكصص الدار , والليل الشفتات اللي حتى بريك نص ساعه\ ساعه بطلنا ناخده ..~

امبارح بعد ما كنت ع المدونه صارت كصص بين خواتي واخوي تلات واتزاعلوا , وخاصه اختي اماني , والحك ع اخوي , بس لانو انا عنجد تعبانه وبديش اطوّل في المدونه بس بحكي هيك عشان اتزكر , وكمان الشغل كانت متعب شفت الليل , واخوي واحد اتصل عليا بالشغل وبده خدمه ومكنتش بدي اعملها , والحمد لله اجت من ربنا انو بطّلوا , مع انه حاسس انو اخوي زعلان لاني حكتله الساعه 11 بكدرش عليا موعد وهم بدهم ع ال 11 , فا بس اشوفه بستفهم اكتر , واكيد وانا بالشغل كنت بين تلفونات بين خواتي واخوتي وامي وابوي عشان الطوشه , كانت ليله متعبه وضغط من كل الجهات ..~

اما بخصوص اليوم , فكان عليا موعد لهيك بعد ما اطلعت من الشغل , وكنت بدي انام بالباص وفش فيّا حيل ابدا افتح عيوني او امشي , كنت تعبانه يالله , اوصلت البيت وافطرت وعملت كهوه واخدتها معي اشربها وانا اسوك , وخلصت موعدي , وشوفت خواتي عشر دكايك , وبعدين ارجعت عالبيت , كان نفسي اني ارمي حالي عالتخت وانام , بس مكدرتش لانو ملان عليا اشغال وكصص اعملها , من الدار اللي كتير بدها ترتيب , وجبل الغسيل اللي بده تسفيط , والجلي, وحتى بعيد عندكم السطل تبع الزباله لانو هان في امريكا في 3 سطول زباله , والواحد طولي , شوفتهم بدهم تنظيف , لانو صرت احطّهم بالكراج وبحبش كل ما امشي من جمبه اشم الريحه , لهيك كعدت نص ساعه اغسل وانظّف فيهم , وبعدين الحوش مع انه مليش زمان منظّفه من الانجاص والورق تبعهم , ومع هيك ولا كأني منظّفته , ومش عاجبني منظره كل ما افتح باب غرفتي واكعد ع العتبه , لهيك الله عاني وعاودت لميت كل الانجاص والورق وكان في ملان كوام اغراض بديش ااياهم موجودين بالحوش ومن اخر مره اجى العُمال يزبطو المجلى نفلّوا الاغراض لانو كانوا جمب المواصير , لهيك عاودت رتبت الاغراض وشلت الحشيش من حوالين الورد , يعني ضليت برى بالحوش حوالي 4 ساعات لوكت ما وكّف ظهري , وصارت اتصالات بيني وبين المسؤول عن الدار وعن كصه تزبيط المكيّف , وبعدها عبرت البيت وكملّت تسفيط جبل الغسيل , ورتبت واخيرا غرفتي بعد كل تغير الديكور , وطوال اليوم كهوه وكهوه وكهوه , وهيني عملت عشا وخلصت المطبخ , ورميت حالي عالتخت , وحكيت احط قناع واجي احكي معكم بالوكت .~

الاشي المهم اللي بدي اكتبه عشان اعاود ارجع احكي عنه مشان ما انسى هو في صبيه بعرفها عالنت , وصارلها فتره غايبه , وانا حكيت انو هاي البنت بلّشت حياه جديده وتركت كل الناس , لهيك ما كنت استناها , الحلو فيّا اني بستناش حد , بس بنكرش انها كانت تيجي ببالي مرات واستدعيلها انو لعله خير ونها لو تكون مبسوطه , بس اليوم بعتتلي مسجات من رقم جديد وبعرفها بتحب القلوب البنفسجيه , لما اجتني الرساله من هدا الرقم وكانت "مير؟" وشوفت القلب البنفسجي عطول هي اللي اجت ببالي , وطلعت اه هي , استغربت يالله انو كل هالغيبه وترجع , بحب اللي بيرجعوا , وبلشت تحكي عن ظروفها , وكد ما بحاول اصدّق هالصبيه , كد ما بحكي بتكذب , وبضل تبعت بمسجاتها انو اشتاكت الي , وانو بتحبني , وانو كنت في ببالها وكل هالحكي اللي انا بشوفه فاضي , ويمكن مش فاضي عندها , لانو بعرفها صبيه حساسه وبتحب الحكي الحلو اللي انا مش من هيك انواع والحكي عندي شو ما كان هو فاضي , ولاني بعرفش اتعامل مع حد ولاني بصدّكّش اني بنحب او اني في بال حد , مش عارف كيف ارجع اتعامل معاها , مع انو حكتلها اني انا صرت انطوائيه هلكيت اكتر وبحكيش مع حد من مره ومختفيه ..~

الاشي العنجد التاني اللي بدي احكيه هو ساده وكصه الجاج تبع جيرانا وكصه انو كل الجيران حوالينا مزعوجين منه وخايف يفسدوا عليا خاصه اني مسلمه وانهم بكرهوني ..~

كله بعاود برجعله , بس عنجد بدي اروح انام ..~

؛






؛

سمّي بالله واطلع من راسي ..~

ايش اشتريت ..~





اخدتها في 13 $ وحبيت ريحتها لانها متل ريحه عطر الشباب وبحب عطر الشباب , بزكرني في ايام حلوه ..~

بالعاده بستخدمها يومين او تلات بالاسبوع , في الليالي اللي بنام فيها بالبيت اد بسهر , لاني بحب الريحه بالليل عشان السرحان والاطياف ..~

؛



اخدتها 15 $ ولن الكهوه , واخيرا وصلت علّاقه المفاتيح , وبعد التجربه , اول شي كبيره , بس وين مش وكته اشتري غيرها , بس المهم عندي انو المفاتيح ما يوكعوا منها , وحبيت لونها , وحبيت انها بتحمل مفاتيح كتير وبتحمل المداليات كمان ..~

؛




اخدته 8 $ والعلبه صغيره , اظافري من النوع اللي بتكسّر بسرعه ولما استخدم الاستون بتكسّروا اسرع وبحبش منظرهم وهما ناشفين منه , لهيك حبيت اجرب نوع جديد . وبالزبط هدا نوع لحد الان رهيب , بس بده وكت ليشيل المناكير , يعني اد بتسخدمه زي الانواع العاديه وتفكر المناكير بينشال , ف لأ , بده تخليه ثواني طويله ع الاظفر وبعدها عنجد بشيل المناكير , ولطيف جدا ع الاظافر وحوالين الاظافر , لانه زيت فعنجد عجبني ..~

السلام عليكم ..~

اليوم هو الخميس والساعه هلكيت 7 واشي المغرب || 11\8\18

اصحيت حوالي ع 8 الصبح لانو كان في عليا شفت صباحي , كنت بدي اروح عالشغل بالبجامه اللي نايمه فيها , بعدين حكيت لأ احسن ما يجيني مشوار , لهيك جهزت حالي بس ما لحكّت افطر , عملت ساندويشات بسرعه اخدهم معي , ولسا معدتي مش عبعضها وبحب الصبح انا اشرب مي فاتره او ميراميه ع معده فاضيه , لهيك عملت كاسه واخدتها اشربتها وانا اسوك , وكنت صافف السياره اعلى الشارع تبعنا , آخره ولازم امشي حوالي 4 شوارع طلوع , وطلوع بخوّف , ما اوصلت اعلى الشارع الا انا ناشف ريكي وعرقانه بالشوب هاليومين انشويت من الشمس , اوصلت السياره , واتسهلت عالشغل ..~

الحمد لله كان الصباح منيح ومكانش في عجكه سير , وكله تمام , حتى بسرعه لكيت مكان اصف السياره عند شغلي حتى لو في تنظيف الشارع كمان عندهم , سبحان الله عندهم تنظيف الشوارع بالايام اللي بشتغل فيها بس , وكان معي عشر دكايك , واجيت بدي افطر بالسياره الا امي بتتصل وفتحت سيره بحبش تنفتح واتنكدت , وكد ما حاولت اني اكزب عحالي وانو الموضوع بدوش نكد على حالي , عالفاضي ..~

عبرت الشغل وافطرت فيه واشربت كهوه لاني بحب اعمل بهدا الشغل كهوه عربي لاني فيه كل شغلات الكهوه العربيه ومحدش اعترض وحتى صاروا يشربوها معي , وخلصت الظهر , وكان في اتصالات بيني وبين ايمان واهلي بخصوص نفس كصه الصبح وانا بالشغل , بعرفش كيف حكيت اه يمكن لانو ازهكت ..~

وما الحكت اوصل عالبيت وعم ادوّر على مكان اصف السياره ,’ الا مي بتتصل , حكيت" شو في ليش مش نايمه لحد الان " وكنت احكي معاها هي وابوي وانا اصف بالسياره وكنت متنكده , واتكاتلت معاها هي وابوي , ع نفس كصه الصبح , بحكيلكم هاي الكصه بدي اياها تزبط وهي مش زابطه , وكان صوتي عالي وكتير متنكده وكله من ايمان , كله منها هي اللي بتجيب وجع الراس الي , وكد ما بحكيلها انسيني من هالكصه خلص في الي رب , عالفاضي ..~

واجيت عالبيت ولسا اهلي معي عالخط , وفي عنا مستأجر عربي وانا دايما صوتي عالي ودايما بكاتل وحاله ,بكون احكي يا رب ما يسمعني بعد ما اسكر التلفون , لاني بنسى وانا معصبه , بنسى كلشي , وما بتزكر المستأجر الا بعد ما اسكر التلفون , بعدين وانا لسا عالخط مع اهلي , وبالبيت, كنت جعانه وعملت اكل وانا احكي معاهم واكلت ,وخواتي بعتوا مسجات انو محدش جاي عندي اليوم , حكيت بعقلي احسن لاني عنجد بدي يوم الي , واهلي طلبوا مني اني اتصل على معارفهم , في حد من اصحابهم هون وانا عنجد هالزلمه شو بحترمه وبعزّه , هو كبير بعمر ابوي بس يالله شو محترم , الله يطوّل بعمره ويشفيه , هو مريض هاليومين , واهلي بدهم انا اللي اتصل عليه , دايما كلشي عليا انا حتى بالتلفونات , حكيت ماشي هلكيت بتصل عليه اطمّن عليه , الا هو ما ردّش عليا , وارجعت ع اهلي واتصالحنا وراحوا يناموا , وانا اجيبت بدي اعمل كهوه , الا الزلمه برجعلي بتلفون وبحكيلي تعالي عندي عالمكتب , حكتله هلكيت ؟ حكى اه , حكتله يلا ..~

وسحبت حالي وحكيت بعقلي بشرب عنده كهوه , روحت عنده وكعدت حوالي نص ساعه , او ساعه الا اشي لانو كان عليه موعد وصاحب الموعد وصل , لهيك سحبت حالي وروّحت عالبيت , وبالطريك اتصل عليا توني , اللي هو الشغيّل اللي بشتغل كلشي لما الدار تكون بحاجه تصليح , اتصل عليا عشان كصه المكيّف لانو المكيّف جننهم ومش عارفين شو الحل معاه , لهيك حكوا بدهم يشتروا واحد جديد , واخيرا ! وحكى بده يجي ياخد المقاس والاسم وكل هالكصص , حكتله تع بعد عشر دكايك لاني بالطريك عالبيت , وما اوصلت الدار الحمد لله لكيت مكان اصف السياره , واجيت عالدار ..~

وحتى كنت مخليّه ساده برى لانو لما اتصل عليا الزلمه واني اروح عنده , كان ساده برى وبعرف بكعد ساعه ت امسكه ليدخل الدار , لهيك اتوكلت ع الله وحكيت يا رب ما يجنن الجيران وما يصير فيه اشي , ما عبرت الدار وروحت ركاض عالحوش اطمّن ع ساده الا هو لما سمع صوت الباب وصوتي وانا انادي عليه , اجى بس اطلع عليا من تحت لتحت وما خلاني امسكه , واعطاني ظهره وعاود راح عند الجيران , وبعدها ما اسمعت الا الجرس تبع البيت برن , وكان توني , عبر البيت واخد المقاسات وبعدين حكى بنشوف امتى راح نيجي ..~

وحكيت بعقلي واخيرا اجى وكتي لنفسي , عملت كهوه , وشغلّت سبوتفاي , ورميت حالي عالتخت اقرأ واشرب كهوه , وكنت صحيح شاريه كرتونه دونتس , اكل واشرب واقرأ مانغا , بعدين كان في وجبه غسيل صغيره بالغساله نشرتها ولميت الغسيل الكديم اللي عالحبل , عبرّت ساده الدار , وبلشت بفلم , وضويت الشمعه وهيني ..~

؛

ارجع لكم كصص حكيت عنهم بالمشاركات الكديمه , تبعت مشكل اخوي تلات , وتبعت ساده ..~

بخصوص كصه اخوي , اخوي كان يحكلي عن صبيه انو هم اصحاب وانو هو بعمل خير معاها عشان فش الها حد وكل هالحكي الفاضي عندي , كنت اسمعله زمان , بس بعدين وصلت لمرحله بديش اسمعله بخصوصها لاني شفتها واحده كدابه بتضحك عليه عشان يشتريلها وياخدها هان وهان , وحكتله هدا الحكي بس هو مش مستوعب , وخليني اكون صريحه معكم اكتر , هو عقله برسه بيعرف خلاصه , لهيك حكيت هو حر شو اعمله اد هو بنفسه جايب وجع الراس لراسه وراضي , واول عن اخر بعرف من حاله حتى لو وكع , انا حكتله شو كصه هالبنت وما سمع , وبدوش يسمع بالاصل , لهيك انا كمان بهمنيش اسمع عن شغلات بشوفها كدب , مش شغلات بشوفها حلوه تنسمع زي تضحيات صوص , كديش كنت احب كصصها الرومنسيه اللي بينها وبين حُبها , او فد وفلسفتها بالدنيا , او اخوي واحد ونهفاته , كلها هاي كصص عندي واقعيه حلوه , اما كصه اخوي تلات هاي كصه هبل لانها هي اللي بتضحك عليه مش هو , اه انا مع هو اللي يضحك عليها لاني كلنا بنعرف لما الصبيه تعبر بكصه مع شب بكونوا الاتنين عارفين لوين بدهم يوصلوا , مش كصه حب شريف , فش منه هدا , لهيك بعد اخر مره اجى يحكلي عنها , كطمتها معه وحكتله "بديش اعرف عنها اشي , ما تجيبلي سيرتها " لهيك حضرته راح يحكي لخواتي , وكنت اوصيه انو متحكيش لحد لانو بعرف شو خواتي وشو بفهموا الكصص , ولما عرفت ايمان كان يحكليها شغلات ما كان يحكي الي , يعني اخوي كزاب , واجت ايمان تحكيلي وانا حكتلها "بهمنيش" , وبعدين لما حكى لاختي اماني بلشت الكصه الكبيره , اختي اماني حكتلنا "بنفعش نسكت , وبطلع الحك علينا احنا اد كبرت الكصه لانو ما حكينا , ولازم نحكي لاهلي ولازم ننصحه حتى لو يزعل ومش عاجبه " لهيك وصلنّا الخبر لاهلي وهو زعل واتكاتل مع خواتي وكعد يغلط عليهم بصراحه , هاي مشكلتنا , كد ما نكون مناح ما اخوتنا , بس بضلوا بنات العالم احسن مننا , وانا بعرف هاي الكصص, من عمري 13 سنه لاني عشت مع اخوتي اكتر من خواتي , عشان هيك ما بدّخل بخصوص كصص "بنات" اخوتي بحبوهم او بيعرفوهم , لاني بعرف 100% انو محدش بوكف معي , واني بكدرش ع طوش مع بنات لاني بخسر حتى لو كنت ع حك , وبعرفش اد اتصالحوا لاني ما سألت خواتي ولا حتى سألته هو , بس طول اليوم وهو يحكيلي" خواتي بردوش ع البلفون" , حكتله محكتيش مع حد ولا شوفت حد , اه كزبت , انا صبيه بحبش وجع الراس , وبعرف كد ما نتكاتل بنرجع لبعض ولا كأنه صار اشي ..~


( دايما بحكي لحالي في نوعين مشاكل , مشاكل من ربنا هيك بتنزل ما النا دخل فيها لانها ابتلائات, ومشاكل احنا بنجيبها لحالنا , ولما اشوف واحد هو بجيب مشكله لحاله , بحكيله شو رأيي بالكصه وبعدها هو حر , بده يجيب المشكل لحاله هو حر , انا بديش اجيب وجع راس لحالي من مشكلته , بعرف اني كتير صريحه , وبعرف اني قاسيه , وراح تيجي ايام مش راح الاكي حد حواليا عشان هيك , حتى لو هلكيت هو فش حد , بس في اهلي , وبعرف راح تيجي ايام حتى اهلي ما راح يكونوا , نصيب ) ..~

؛

اما بخصوص ساده , عندي جاره احنا مسمينها حسن صبي عشان زي الاولاد , بس بعرفش اد هي من هدولاك , بس ما اظن , وعندها هرتين ,ودايما الهرر تبعاتها بالحوش تبعها , بس مرات بيطلعوا عالسور المشترك بينا وبكونوا يحكوا مع ساده وهو جوى الدار , بس مرات انتبهت انو واحده منهم بدها اتكاتل ساده , وعشان صرت اطلّع ساده برى صاروا يتلاكوا وبدهم يتكاتلوا , بس حسن صبي تنادي ع الهر تبعها وبرد عليها وبيدخل الدار , اما انا ساده ولا عامل اي اعتبار إلي , وصرت اشوف انها صارت تتدايك من ساده مع انه بيدخلش الحوش تبعها , بس بكون على شجره الانجاص ويطلّع ع الهرر بالحوش تبع حسن صبي , بس المشكله مش حسن صبي والهرر تبعتها , المشكله جاره تانيه اسمها كيري هي وزوجها ينعن شكلهم شو حلوين , وشو بيتهم حلو , والحوش تبعهم والشجر , وعندهم جاج , مع انه ممنوع بامريكا تربي الجاج بين البيوت , بس بعرفش اد هدول معهم ترخيص , المهم ساده بحب يروح عالحوش تبع كيري , وبحب يلعب مع الجاجات ودايما بسمع صوت الجاجات ولما اوقف عالسور المشترك بينا بشوفه بضّل يلحك الجاجات , وهم بخافوش منه بالعكس بلحكوه كمان , بس بديش اوكع بمشاكل من حضرته , لهيك بشفق عليه وبخليّه يطلع يلعب , وبنفس الوكت خايفه يعملي مشاكل مع الجيران .

؛







بديش اخلق اعذار لناس بكرها ..~

السلام عليكم ..~


اليوم هو السبت والساعه حوالي 6 الا اشي المغرب || 11\10\18

؛

يبي شو بكون نفسي اجي اكتب بالمدونه لانو بتيجي ساعات كآبه وساعات كرف وبديش انفش بحد , بس معنديش وكت , كديش حياتي ركاض بركاض , حتى هلكيت معيش هالوكت اللي راح اكتب فيه زي العالم والناس , واكسد راح انسى كصص من الركض ..~

بس بتعرفوا شو نفسي ؟! نفسي زي ايام زمان اجتمع مع فد في البيت المهجور , ونضحك ونبكي ونتفلسف ونغلط ونسب ونتصور ونتهبل , نفسي عنجد اجتمع معاها , لاني عنجد كرفانه اشي مش طبيعي , ولولا عليّا التزامات بخصوص اشي مصيّري هو اللي مثبّتني بالشغل لاني بدي مصاري , ولا كان خلص تركته ومش شايف اي حد عنده اي اعتراض لانو شافوا شو بصير بحالتي , معيش وكت لاشي وبنامش وباكلش منيح ونفسيتي عمى ..~

الخميس الحمد لله بالليل كنت نايمه بالدار , وكمان نمت بدري , بحس دايما مكسور عليا نوم , لا كملّت الفلم ولا اسهرت ولا ما يحزنون , وكديش مبسوطه ع التوكيت الشتوي , لاني كد ما بصحى بالليل بس بحكي " اه يا ربي الحمد لله اني بالدار نايمه والحمد لله لسا ما طلع الصبح , اه يا ربي معي وكت انام كمان وكمان " والابتسامه ع وجهي من الدان للدان ..~

اما يوم الجمعه , اصحيت حوالي ع 8 من صوت ساده بعيّط , بده اطلعه عالحوش , فتحتله هالباب وحكتله " انكلع ع الصبح مش ناكصني عياط , خليني رايكه " واتمددت عالتخت اشوف شو المخططات لليوم , بس اول شي اشرب اشي دافي عشان معدتي ما توّلع , عملت ميراميه , وبلشت اقرأ بالمانغا الا هي الساعه صارت 9 الصبح وجرس الدار برن , حكيت بعقلي اكيد هاي ايمان , بس مش بدري !! عطّول اخبّي الكتاب , وروحت فتحت الباب وبحكيلها " بدي ارجع انام بدري , لسا الموعد ع 11 " حكت " اي 11 هاي وشو لسا مش لابسه , روحي البسي وهيني بستناكي بالسياره " حكتلها " بالاصل الشغله امبينه من اولها مش راح تزبط " روحت بس البست , واخدت اغراضي وحكيت بزبّط حالي بالسياره , واخدت حتى بسكوت عالسريع مسح زور , ما عبرت السياره وبلشنا نحكي ونشوف شو نعمل , حكتلها " ايمان مش كادر اتحمل سناني , بدي اروح افرشيهم " عندي شغله فيا اني بكره اطلع بدون ما افرشي سناني , بحس حالي بكدرش افتح تمي واحكي , لهيك روحت ارجعت ع الدار فرشيت اسناني واتصلنا ع اماني وشوفنا بخصوص الموعد , واتسلهنا ع منتزه عشان بنتها تلعب فيه شوي , بعدين عالموعد , بس اماني مكدرت تيجي والموعد بالاصل التغى , داخليا كديش انبسطت , لهيك عاودنا ارجعنا ع الدار عنا , وكنا مش شاربين كهوه ولا مفطرين واشكالنا زومبين , افطرنا واشربنا الا اماني جايه , وضلوا حوالي لل 2 واتسهلوا ..~

وانا كانت الدار كايمه كاعده لانو ايمان كانت عندي وبنتها من فطور وكهوه وكصص , كل الدار خربت واتكوم جلي , خلصت كل الكصص اللي عليا لانو عليا شغل , وخلصت كل هالكصص ع 5 , انهديت , بعدين كعدت ربع ساعه ت كدرت امسك ساده عشان اعبّره البيت لانه من الصبح هو برى , عبرّته وجهزت حالي واتسهلت عالشغل , اه ليله زفت زي العوايد , وحتى وانا بالطريك كرمليتا اتصلت عليا وحكتلي انو ليلتها يوم الخميس كانت زفت مع فرجينا ومن الليالي العمى اللي بتيجي مره مرتين بالشهر , ولما شوفت فرجينا يوم الجمعه حكتلي نفس الشي , وكنت احكي مع امي كتير بالشغل لانو الاوضاع صعبه عندهم وفي مشاكل واحزان وكصص , حتى امبارح عيوني رغرغوا من كتر المصايب ..~

اجى الصبح واطلعت من الشغل وكربّت اخلّص الكتاب , بعرفش كيف هيك صار بانو بضّل اقرأ مع الاعاده ومع هيك صرت بدي اخلّصه , اوصلت البيت وساده بعيّط بده اطلعه برى , ما رضيت لانو بدي انام وخايفه يعملي مشكل , لهيك حكيت مع امي وافطرت وبعدين كعدت ساعه ت نمت واصحيت ع صوت جرس الباب , وحكيت مين ؟ خواتي حكو مش راح يجيو عنا اليوم, طلعوا مستبشرين , حكتلهم "انا مسلمه ومعتزه بالاسلام تبعي , وبتمنلكم يوم سعيد باي باي " وسكرت الباب ومعرفنتش ارجع انام , يعني بس نمت ساعه او ساعه ونص , اخ بس , لهيك ضليت التخت وعملت كهوه وبلشت اقرأ بالمانغا , هاي المانغا مأثره عليا وبضل اعيد فيها وفي الفصول والمحادثات , وبعد ما خلصت , فتحت اللاب توب وبلشت بفلم , الا جروب العايله بتصلوا وانهم بدهم يجيوا عندي بعد ربع ساعه , وجهزي الكهوه , حكيت بدري ع الكهوه , وبلشت بكتاب جديد ملوش دخل بالكتب اللي بقرأها وبعدين اطلعت عالحوش سقيت الورد ورتبته , الا هم جايين , كعدوا عندي ودردشنا وكانوا خواتي واخوي واحد , اخوي تلات مش جاي وامبين في اشي صاير , بعد ما اتسهلوا انا رتبت الدار لانو مع كل الصغار والكيك والبزر اللي هدا يالله شو بوسّخ والكهوه والاكل ما ضل اشي ع حاله والمجلى اتعبى , جليت ورتبت , هيني ..~

ايمان امبارح سألتني عن حبي اد انا بحكي معه , حكتلها " لأ " حكتلي " كزابه " ضليت ساكته , وحكتلي " انتي يا مريم بتحكيش كلشي , انتي وامي بتخبوا علينا " حكتلها " لانك بتفهمي غلط " بس بضّل تفتح كصص عميقه معي , عن الحياه والرجال والحب وكل هالكصص , وكل سؤال كانت تسأله كنت اجاوب عليه بكل صراحه , مكانش يهمنّي شو تحكي عني , اني خاينه او عندي نداله , او قاسيه , مكانش يهمني شو راح تحكي عني وشو نظرتها الي , لاني عنجد بدي اياها تفهمني ,واختي تتفاجئ من صراحتي , لدرجه اخر سؤال لما سمعت الاجابه اختي كانت كاعده ع الكنبه ووكفت وتركتني بالصاله بدوت تعليق وراحت طلعت ع الحوش , احلى شي الصراحه وبدون كزب بشغلات من تجارب وشو اللي نفسنا فيه لو يصحلنا , ومكدرتش تحكي انو لو اني انا انحطيت بالمواقف بصير اشي تاني , لانو انا انحطيت بكل المواقف اللي هي سألتني عنها وحكتلها شو عملت , يعني مش لو او يمكن , عالاكيد شو صار ..~

في المانغا اللي بقرأها وحطوها ببالكم لما اقرأ ويكون غلط زياده عن اللزوم بحكيش اسمه عشان القوانين , رئيس العصابه لما انطّخ وكان بالاسعاف وشاف كيف صاحبه يرجف عليه , اتزكر ماضيه وشغلات صعبه صارت معه , وكعد يحكي لحاله وهو ينازع " اني ارضيت بكلشي زفت صار معي وضليت اعيش , ولا كنت حزين او كنت الوم حد , ولا حتى كنت الوم حياتي والدنيا , حتى اتعلمت كيف احب حد وما يكون إلي , اتعلمت زياده عن اللزوم بالهدنيا " .

حتى اليوم فتحت دفتر مزكراتي وكتبت شغلات فيه وكتبت شو بيحكي الرئيس ..~

؛

السلام عليكم ..~

اليوم الاحد والساعه هلكيت حوالي 8 بالليل || 11\11\18

؛

الليله الحمد لله نايمه بالدار , بس بالاول احكي عن يومي ..~

امبارح بعد ما كنت ع المدونه , جهّزت حالي واتسهلت عالشغل , وبالطريك كان على الفري واي حادثين بالطريك , واحد كريب علينا , والسياره رايحه فيها بس محدش ميت , والتاني 7 سيارات ورى بعض , سبحان الله حادث بضّحك , بس بتزكر كل ما اشوف حادث جمله صاحبتي " لو اطلعتي ابدر كان الحادث صار فيكي " , واوصلت الشغل وكانت ليله زفت زياده عن اللزوم وما اخدت ولا بريك نص ساعه من كتر ما اتعبناا وانشغلنا فش وكت حتى لبريك وخوف انو تشتغل واحده لحالها , لهيك ما صدّقنا يطلع الصبح عخير ..~

اجى الصبح يوم الاحد ومن كتر التعب فش فيا حيل كنت اخد باصات و لهيط طلبت اوبر , وتبع الاوبر واحد زنخ بضّل يحكي عالصبح وعشان حد كان بده يطلع معه بس سيارته صغيره ما كان في وساع للشناتي تبع الراكب التاني , فا زعل وطول الطريك وهو يحكي مع حاله ويغلط ويحكي حكي مش منيح , طب انا شو دخلني , فك عنّي , ما صدّكت اوصل البيت ..~

ما دخلت البيت وساده ركاض عليا , يرمي حاله عالارض وانا كمان , وبعدها فتحتله باب الحوش وطلّعته برى , وانا كنت مهدوده اشي مش طبيعي , فش فيا حيل امشي , رميت حالي ع الكنبه تبعت الصاله , واخدت نفس , وعملت فطور بسرعه , كعدت اكل الا بلفوني برن , حكيت بس دكيكتين لانو كانت هي التانيه تعبانه , فتحت التفزيون لانو بعرفش اليوم ليش اجى عبالي اضل ع الكنبه بالصاله مش ادخل غرفتي , بس كانت صايبتني رجه بجسمي , لهيك ما كملت فطوري , من وجع معدتي والرجّه بجسمي , كنت اضل ارتعش وسكعانه , وضليت متمدده عالكنبه ومتغطيه , كعدّت اقلّب بالتلفزيون وشوفت فلم اجنبي شوفته قبل هالمره لهيك عاودت شوفته كمان مره لانه حلو , وبعد ما خلّص كومت عملت كهوه , ولفيت عالتلفزيون كمان مره ما لكيت اشي , بس شوفت شو في افلام عربي نازله بالقائمه وكان في فلم فلسطيني اسمه ( واجب ) , يالله شو عجبني , مع انه متأكده مع عجب حد وراح يحكوا ممل , بس عندي هو قمه الدراما , عنجد كنت اشوف حياتنا , يمكن لهيك بعشق افلام تصنيف دراما , وبعشق الافلام الفرنسي لانو عنجد الكاتبه والمخرجه عجبتني بكل شي عملته بالفلم , وكنت اشرب كهوه واشوفه ومستمته غير شكل , المشاكل اللي بتصير بالفلم , المحادثات , المبادئ , يالله شو واقعنا , وبعدين اسمعت صوت بالكراج , والصوت قرّب عليا وفجأه فتح باب الدار عليا , وسقط قلبي , حكيت مين بعكلي بفتح الباب عليا , انا شو مش لاقطّته ؟ وطلع اخوي تلات , استغربت ما رن الجرس , يمكن لانو بفكرني نايمه , واستغربت انو اجى بهيك وكت , كعد كم دكيكه وراح ينام , وانا خلصت الفلم , وبعدين سحبت حالي وروحت عالحوش وعملت كمان مره كهوه وبلشت بالسرحان والصفن وبعدها بلشت اقرأ بالمانغا وخلّصت المجلدين وكنت مستمته غير شكل , وبعدها بلشت في دراما , وطول اليوم بين الكتب والمشاهده والسرحان والاكل والكهوه , كان يوم هادي , بدون تعاملات مع ناس , اتصالات , شغل , بس لنفسي واحب ما عليا هيك ايام ..~

؛

؛

https://d.top4top.net/m_1050fnxqn1.m4a

؛