مأساة روح {هالكه} في اوراق تائهه ~

السلام عليكم ..~

10 بالليل من يوم الاثنين

11\2\20..~

||

شهرين وبتخلص هالسنه عخير , مع انو مش متوقع اللي جاي احسن , ومع هيك بتمنى الكل بخير , من وين ابلّش بآخر مجريات صارت معي ؟ ما تتوقعوا اشي حلو صار معي , بس عالاغلب الكل اتعوّد ع ايامي , ومع هيك اللي بقرأه بالتقيم منكم ببسطني حتى لما يكون فاضي , بعرف في منكم بستدعيلي بالخير وكديش بحب هالاشي , من صمصومه قلبي شكرا حجم البحر والسمك اللي فيه .

||

ابلّش في اليوم ؟ المدير تبع شغلي اتغيّر وصار واحد تاني من حوالي اسبوعين وهو اسوء مليون مره , بس اليوم كان اول انذار الي عشان الطرد , عندي برصيدي من النقاط السود 5 وضايل 2 وبنطرد هههه , 7 نقاط وبتنطرد من الشغل ,( يا خايبه يا مسخمه )يا مريم ..المشكله انو في نقطتين وانا بالشغل الكديم وما شالوها , بالعكس جمعوهم مع الشغل الجديد , في نقظه كان يوم سيء , احلمت بحلم بعرف لما احلّم هالحلم بضل احكي اعوذ بالله من شر هالحلم وعالفاضي , المهم هاد الحلم بخليني اتوقع صدمات كبيره بيومي لهيك لما تصير الصدمات ما بتفاجئ , خرب معي الكمبيوتر وضليت ساعه وانا احاول فيه لوكت ما زبط , بس طبعا اتاخرت عن الشغل ساعه والنظام معندوش يما ارحميني , بس حكيت للمدير الحيوان وما حكى اي اشي ولا حتى اعترف انو الحق مش عليا , ما صدقني . وفي نقطه اخدتها هاد السبت عشان غيبت عن الشغل عشان اختي كانت عامله عزومه في يوم الهالووين وما زبط اني اخد ايام العطله تبعتي عشان المدير حيوان , وفي نقظه لحد الان مش عارف من شو وهيك صاروا 5 .

اما امبارح ع وجه المغرب . عندي ع باب البيت بالكراج في تلاجه عندي من زمان شاريتها لانو مرات التلاجه اللي بالمطبخ ما بكون فيها وسع , ومن وكت ما اجت المديره الجديده ع البيت وهي عامله التلاجه زي مسمار جحا , كل يوم وهي بتجنني انو ليش حاطه تلاجه زياده بالدار وبالكراج وكله حكي مشان تجنني وتطردني من الدار , صارلها حوالين 3 اشهر مجننتني , بالاخر طفيت التلاجه عشان اخرسها للحيوانه , بس خوفت انو الهجر يخربّها للتلاجه لهيك قررت انها ادخلها جوى البيت , طلبت من اخوي تلات انو نحملها مع بعض وندخلها , طبعا اخوي هاد طاكع , بدوش يعمل اي اشي بالدار , وكل ما يصير خراب في البيت بيجي عليا ركاض " مريم الكطعه هديك خربت صلحيها " كيف اطلب منه تع نحمل التلاجه , المهم اجينا نحمل التلاجه وبلّش نكد اخوي , وانا من جوى شوي وبدي اتفجر من كل يوم يصير خراب البيت وهو بدال ما يصلحه يجي يطلب مني وتراكم كتير , لهيك بلش يتفلسف ع التلاجه وما لسا حملتها الا اجت ع اصبع اخوي , راح اصبع اخوي ! ركاض ركاض روحنا ع الطوارئ , تصوير صور اشعه وسحب الدم تحت الاظفر وحاله , وانا طول الوكت بدعي وبتحسّب ع المسووله ع البيت لانها هي سبب تعبت البال حسبي الله عليها , الله يلهيها بحالها , بس الحمد لله اخوي جبار بالوجع بعرفه , ولسا اصبعه بوجع وحاله .

راح احكيلكم اشي , انا ببعد ع الناس لانو اد بزعل منهم والحق مش عليّا , بدّعي عليهم بالعاطل وبتحسّب ليل نهار عليهم وبكل صلاه لوكت ما اسمع خبر يشفي غليلي , وهاي المسووله من وكت ما عبرت عليا ع البيت وانا عندي الدار كل كم يوم مصيبه وخراب , لهيك امبارح اوصلت لمرحله ادوام ع التحسّب عليها والله كريم , لانو المسؤول اللي كان مسؤول عن الدار قبلها , كان كمان مجنني بس مش لهاي الدرجه , والله يمهل ولا يهمل , الله اخده عنده ع جهنم وبئس المصير , لهيك ابعدوا عني اد بدكم تظلموني . حسبي الله عليها وربنا يلهيها بحالها , ياخد شرها اخد عزيز مقتدر .

||

لسا في اشي تاني امبارح الاحد صار وهالاشي لحد الان مخوفني , اشي بحياتي مكنتش اتوقع انو يصير وصار , انسيت سيارتي شغاله طوال الليل ولا ببالي اني مشغلتها هههه, لا حول ولا قوه الا بالله . وين عقلي بس !! خلص البنزين وخايفه اروح اشغلها , هات احكيلكم شو صار ؟ السبت يوم الهالووين كان عندي الحدس انو سيارتي راح تخرب , لانو طوال الاسبوع الماضي كل ما بشغلها بسمع صوت مش عبعضه وبحكي الله يستر , الله ستر ! السبت لما شغلتها ما اشتغلت , بس ما اتنكدت بدكم الصراحه لانو كنت متوقع , وعندي بالبيت زي شاحن للسياره, لهيك حكيت عادي بشحنها , بس اكتشفت انو السياره فش فيها زيت ولا مي , لهيك روحت ركاض اشتريت زيت في جمب بيتي محل لزيت السيارات وحطيت فيها مي , وجربت اشحنها وانشحنت الحمد لله واشتغلت , حكيت بعقلي خليها شغاله لوكت ما تيجي اختي تاخدني , اجت حوالي ع الوحده الظهر ,اطلعت مع اختي وانسيت اني مشغّل سيارتي , وسيارتي مش جنب البيت انو اكدر اسمع صوتها , روحت ع العزومه واجى اخوي اخدني بالليل عبرت البيت ونمت ولا ببالي اني مشغّل السياره بتصدكوا ؟ ولا حد من الجيران اجى يحكلي ؟؟! يا عمي سيارتي بعيده كانت عن الدار وعن الجيران وصوتها واطي , كيف سبحان الله محدش سرقها ؟! عشو بدهم يسرقوها !! عاساس نيو هامر من جيمس , اصحيت الاحد وعم ادوّر ع مفتاح السياره مشان اروح اشغلها , قلبت البيت وحكيت يا عمي شو يعني واكع في دار اختي المفتاح ؟ مستحيل , اطلعت برى ع الشارع اطلعت ع سيارتي وهيك حسيت بتنادي عليا , ما روحت الا لكيت السياره شغاله وحاميه وفش بنزين , اخ يا قلبي اخ , طفيت السياره ولسا مصدومه من اللي صار لحد الان وخايفه اروح اشغلها . لا جد فش عقل صار هلكيت .

اتوقع هدول الكصص بكفوا لليوم ..~

السلام عليكم ...~

لأ كيف صارت يومين ورى بعض اكون بالمدونه ؟! اليوم التلاتاء 11\3\20 ..~

||

احكي عن اخر لعبه العبتها ع البستيشن , في حد اشتري بلستيشن 5 ؟ من يومين في الهالويين واحد من قرايب زوج اختي سالته اد شاريها لانو بعرف تبع هيك كصص, ينعن شكله شاريها واسبوع وبتوصله وحكى في ناس وصلتهم وباعوها ضعف السعر , وااال , عن حالي لأ مش وكت اشتري بلستيشن 5 ..~

10\30\20 نزلت لعبه littel hope وكنت استناها لانو اللي صانعيها صانعين العاب مفضله من انتيل دوان , لهيك كنت بمرحله متحطمه وبدي اهرب لهيك اشتريها اول ما نزلت وختمتها تاني يوم يوم الهالووين بس لسا ما اخدت التروفي فيها لاني ما عيدتها وكانت حلوه بس مش رهيبه زي اينتيل دوان , بس انصعقت شو كصتها , جد ولا خطر ببالي وين سواق الباص , بصراحه امبلا فيها مجريات حلوه وكصتها رهيبه , بس انتيل دوان احلى . ختمتها وشخص واحد بس مات معي من اللعبه الاولى , وعن حالي هاد اشي رهيب لاني بحب اقتل الشخصيات









بعرفش اد واضح بالصوره الالعاب التانيه اللي العبتها هالفتره وفي منها مكدرتش اختمها لانو معنديش وكت من مره ومنها ختمتها بس معنديش وكت لاعيدها مشان التروفي ..~


||




العبت Detroit هاللعبه كد ما كانت توكع كدامي بس لانها تصنيف خيال علمي ما اتشجعت اشتريها , بس اجى وكت انو العبت كل العاب الاختيارات اللي هو تصنيفي المفضل , وبدي لعبه اختيار لهيك حكيت خلص بشتريها ,خسران مصاري خسران , ويالله عنجد صارت لعبه مفضله عندي , كديش كنت مبسوطه وانا العبها وكديش حبيت خياراتي وكديش الجوده والتصميم رهيب رهيب وحتى الكصه , وهاي اول لعبه خيارات بنقذ الكل من اول لعبه , الكل عاش معي !! غريبه , يمكن لانو حبيت الشخصيات ومفش شخصيه بشعه , وكديش احزنت اني ختمتها , بس جد رائعه هاللعبه , بستنى الوكت لاخد التروفي فيها لانو عنجد بدي العبها كمان مره .


نيجي للتصنيف التاني المفضل اللي هو رعب ..

العبت remothered tormented fathers الجزء الاول , وختمتها واخدت التروفي , هو فش فيها تروفي اظن بس ختمتها 100 % , وحكيت بدي اشتري الجزء التاني مع الوكت , بصراحه عاديه ما بتخوّف , حلوه بس مش رهيبه وهاد السبب اللي خلاني اخد وكت واترك الجزء التاني للزمن , ما كنت اخاف ولا انكز فيها للعبه بس الكصه كانت حلوه كتير , الجوده مش ولابد والتحكم سيء بس ما بكزب وبحكي انها بشعه , لأ بالنسبه لالعاب الرعب منيحه .

العبت layers of fear كمان عاديه مش رهيبه , بس في مقاطع عشان كتير سواد ما اشوف اشي كنت اتغلب وانا العب وخاصه لما تتغير الشاشه , ومع هيك مره خوفت فيها , او احكي نكزت نكزه اخت شلن , وحتى طلّعت صوت واجى اخوي عليا فكر مالي اشي , ختمتها ومكنتش فاهم الكصه كتير , ما كانت ممله كانت عاديه , بعرفش عاد اد بعيدها عشان التروفي لانو مش رهيبه لاعيدها .

عم العب في :~

the evil within الجزء الاول , لسا في بدايه اللعبه ومعنديش وكت اكملها .
the witcher 3 wild hunt كمان لسا في بدايه اللعبه بس عنجد هاللعبه رهيبه , المشكله بدها وكت وبال مشان اقتل الوحوش , وما عندي لهيك للزمن بكملها .

بكفي لليوم , الحكي عن البلستيشن خلاني افكر اروح اشغلها والعب .

السلام عليكم ...~

ليل الخميس .. 11/5/20 ..~


||

يوم الهالووين سنه 2020 حكت اختي فيث انو امفكره تعمل عزومه بنفس اليوم , الكل عارض عشان حرام , بس انا ما اعترضت لانو بدي اي اشي يبسطني , وبحب الهالووين مشان تلبس شو تلبس محدش بحكم عليك , بالاخر الكل وافك وعملتها ورحت ..~

شويت صور اخدتهم قبل ما الحفله تصير , جت اختي اخدتني بدري مشان اساعدها بالعزومه , بس التهيت بالعزومه والناس والاكل والصغار لهيك ما صورت ..~









||

ايش كان اللبس اللي البسته ؟.




اكيد راح اكون غوثيك , الناس اللي بتعرفني من زمان زمان , قبل ما اجي ع امريكا كنت احلم البس متلهم بس مش عملي بالحياه اليومي , حلمي كان البس بدله عروس سودا , ما صار , لهيك حكيت البسها في يوم الهالووين , دورت ع بدله سودا بس ما لكيت اشي يعجبني , وحكيت بعقلي اد اشتريت من هاد الموقع لازم اشتري اشي البسه بالمستقبل كمان عشان مش بس لبسه وبالخزانه , هاد الفستان كان قطعتين تنوره مع قميص مخمل , اول ما شوفته وقعت بغرامه , فيه كل شي بحبه , المخمل مع الدنتيل واللون الاخضر الغامق وتنوره رفرف , مكدرتش الا افكر فيه , ومع هيك كعدت يومين ابحث في كل المواقع ع اشي بشبهه او ع اي اصلي مش تقليد لانو كل المواقع التانيه التعليقات والصور انو كله كدب ومخسر , لهيك بعد يومين تفكير وبحث , قررت ادفع هالمبلغ عليه واشتريه , اشتريته واشتريت النفاش تحت التنوره واشتريت باروكه شعر قصير اسود , وكله تمام ,صورت حالي وبعتتها لخواتي , عطول حكو " لأ " ما تلبسي بدله وتيجي كدام القرايب . يا فرحه ما تمت يا مريم , لهيك البلست كل النص الفوكاني بدون التنوره , البست جينز اسود وبنفس الوكت طلعت اللبسه حلوه وانبسطت بالهالووين لاني كنت بدي ابسط حالي ..~ بتشوفوا اللبسه ع الجينز في الاسك تبعي لانو ممنوع الصور هون ..~


||

"شو ما هي حياتي انا وشو اللي وصلتله بخصني انا , انا اللي بقرر , لانو وقتي وحياتي وصحتي وجسمي "

ضحكتني , حياتك وبتخصّك لحالك ؟ امبين انسيت كلامك .
(وعدتك راح اضحي بحياتي لاحميكي واعملي فيّا اللي بدك اياه ) ..~

|||~

السلام عليكم ..~

ليل السبت || 11/7/20 ..~

||

هداك اليوم لما كان التلاتاء الاشي الحلو اللي صار , صاحبي عيونه بعتلي مسج " شخبارك"ما صدكت , سبحان الله من اسبوع كل يوم بحكي بدي اتصل عليه بس بخاف يفكر عشان المصلحه اللي بينا لهيك بتجنب اتصل عليه ,بعتلي مسج قبل البريك تبعي بنص ساعه , حكتله برجعلك بس اخد البريك تبعي , مكنتش متوقع اني لما اتصل عليه يرد عليا , واخر موقف صار بينا اخجلت احكي معه , اللي صار عشان المصلحه حكى في صبيه عربيه بدها المصلحه , حكتله حلو تعال انت وياها عندي عالدار وبنحكي , لما اجو وفتحت الباب , انا بعزه هالشب لانو منيح معي وخدوم لابعد حد , سلمت عليه وكيف حالك وهي كانت معه وعيونها بدهم يقتلوني , عادي عشان انتو ما بتعرفوني بالمدونه بحب احكيلكم اني صبيه مش محبوبه من جنسي من مره ومتعوده ع هاد الاشي , وحتى مش حب , في كره مش طبيعي من جنسي الي , من اول ما يشوفني هيك كره وحقد , يصراحه ما سالته اد هي حبيبتك او صاحبتك قبل ما يجيبها لانو بهمنيش لانو بصريح العباره مش حاطط عيني عليه هو شب لعوب هامل وسخ بس مش علينا يا مندلينا, وبهمنيش لانو متل ما حكيت هو منيح معي , المهم كعدنا نحكي عن المصلحه وهو يدافع عنها , بس شوفت انو كلامها فيه كدب , حكيت غريبه عيونه مش منتبه انها بتكدب , بنحكي انا وهي وكل شوي اتغير كلامها , حكيت بعقلي ايوى هاد الناكص , بعدين ازهكت كدبها , وعيونه انتبه انو الوضع مش عاجبني وراح طلع برى وضليت انا وهي وبراسي انو بديش المصلحه , لما رجع خلص كنا انا وهي واصلين لمرحله بنفكر بالكصه وبنرجع لبعض بتلفون , اجى يودعني وراح وزعلان انو الوضع مش عاجنبي , بحياه امك وابوك وخالتك يعني عشان توصل للي بدك اياه معاها تحطني ببوز المدفع , وبعدها ما حكينا مع بعض الا مره مسج عشان المصلحه وكان مسج كصير ,وبس , و مرت تلات اشهر وهاي اليوم اللي حكى معي , كتير انبسطت من مسجه ولما اخديت البريك تبعي الساعه عطول اتصلت عليه, كعدنا ساعه واحنا نحكي وما اشبعنا من بعض حكي , كديش حكالي يا مريم تعالي نطلع نتمشى ع الشط تعالي ع الروف تبع بيتي تعالي اعرفك ع كلب صاحبتي , حكتله بخاف منك ما باجي ولا بوعدك , ضل يحكي ويحكي , حكتله كله بيرجع لمزاجي اد بكرا هيك اجى عبالي بتصل عليك وبحكيلك هيني بالطريق بس 1 % انو اجى , حكى راح اضل احلم في هالواحد عشان تيجي , بس بحكيلكم بخاف منه هالشب وما بثق فيه ومع انو كتير بتمنى اشوفه نطلع نتمشى ع الشط , بعزه بس ما بثق فيه هاد كل اشي .

اجى يوم الاربعا وكان بعقلي انو شو بدي بوجع الراس منه , طالما فش مصلحه لشو اروح اشوفه , اه فش مصلحه وانا صبيه مصلحه مع حد بثقش فيه , اد بثق بحد وكان صاحبي يا ما احلاه , اجى الظهر وهيك فجاه مزاجي حكالي اطلعي شوفيه , باللحظه اللي بلبس اواعيا فيها امي بتتصل عليا , كنت احكي مع حالي يا رب ابعتلي اشارات اد هالطلعه بدها تعملي وجع راس , لما اتصلت امي , حكتلها بدي انزل ع نص البلد ايش رايك ؟ ما حكتلها بدي اشوف عيونه لانو بعرف امي , امي عندها انو ليش ما اصاحب عشان اتزوج , بس عيونه مش تبع جيزه , هي ما شايفته هيك , حكتلي لأ , ايه ليش ؟ استغربت , حكت الاوضاع صعبه عندكم عشان الانتخابات , اوعك تنزلي يما لا او عك , وهيك كلامها زي كأنه مصيبه كبيره جاييه , حكتلها حاضر , وبالزبط الاربعا ما اطلعت من البيت, ع نص الليل شوفت تلفوني برن , بخاف من رنه الليل , خاصه اني بفتره بحكيش مع حد من مره , كان هو عيونه , كعدت احكي بعقلي شو بده هاد ؟ اه كيفك وشو سهران ومن هالحكي ضلينا ساعه نحكي وبعدها انعست وحكتله عليا شغل بدري , كل كلامه نفس الحكي انو تعي تعي تعي , حكتله الله كريم .

اجى الخميس وبنص ليل الخميس كمان بتصل , اخلع هاد الناكص , كال بعتلي صوره بكلاوه عشان بعرفني بحب البكلاوه وحكى بشتريلك بس تعالي وبتجربيها , ارجعت وحكتله الله كريم .

الجمعه حكيت بعقلي خليني اروح اجرب هالشب , خليني اشوف اد اطلعت معه نهار شو راح يعمل ؟ وبكزبش عليكم كنت خايفه , وكنت احكي بعقلي يا رب تبعتلي اشارات يا رب , المهم عندي كان انو ما اعمل مشاكل لخواتي ويا رب ما اعمل ويصير , جهزت حالي انو اطلع وقررت انو ما اروح عالشغل واخدت نقطه سودا , بس عفكره كل ما تكبر كل ما الكصص بتأثرش اكتر , ما زبطت حالي كتير ولبست لبس بيت سبورت , بس عشان يوم جمعه بحب اعمل روتينه , لهيك عملت الروتين قبل ما اطلع , اجيت حط القران فوك الحزانه مكانه , اوكعت , هاي اول مره بوكع هيك وكعه , ووكعه اخت شلن كمان , بعرفش كيف اختل توازني بعد ما حطيت القران وانا واكف ع التخت واوكعت ع طولي ع جنبي اليمين ع الارض , ضليت متمدده ع طولي اليمين , وبعرفش اصبع اجري الصغير اليمين بشو خبط , بس خبط خبطه , خلاني انط من الوجع ههه, حكيت بعقلي مريم هاي اشاره من ربنا لولا القران حماكي , ما تروحي تشوفي الشب , بعدين تناقض حكيت روحي وارتاحي من هالمشوار , المهم بعتله مسج بس اصلي بطلع , واطلعت وانا في الاوبر , بتصل عليا وبحكيلي صلي العصر وتعالي , حكتله بحياه ستّك ! عشر دكايك وبكون عندك حكتلك بعد الصلاه , حكى فكرت بتحكي عن العصر وانتي ما حكيتي انك اطلعتي , شو امفكرني ؟ بتكّل عليه او لازم احكيله كل حركه بعملها ؟! , حكتله برجع فش مشكل , حكى لا استنيني , ماشي , ارجعت حكيت بعقلي مريم اشاره من ربنا ارجعي , لا يا مريم ارتاحي من هالمشوار والجميله تبعته , اوصلت عند بيته وكان بمنطقه عمى , يا حبيبي يا حلاوه , ايش هالمنطقه الطاكعه هاي ؟ كال انا بنص البلد بحكي عن حاله وشايفه العماره اللي ساكن فيها منيحه , والله لو انها ببلاش مستحيل اسكن بهيك منطقه , كرف ووساخه ومخدرات ومشردين وحاله , قشعر بدني , بعتله مسج وحكتله المنطكه طاكعه انا مروحه , مش راح استناك , حكالي هيني نازل اد بكيش تطلعي , تطلع روح اللي بكرهوني , استغربت فيه انو لشو لازم يرتب حاله ؟ هي انا ما رتبت حالي , عادي مش كانو عريس وعروس , يا عم اصحاب , المهم نزل واخيرا وجابلي بكلاوه , جابلي بس حبه واحده ! بس حبه واحده ؟ شو عم يصير ؟ يا ربي ليش كل الناس الحواليا بخلاء ليش ؟ وكال انا بعطيكي رقم اللي بتعمل بكلاوه تشتري منها ؟؟! اخ بس اخ ع النصيب حتى مع الاصحاب , حكيت بعقلي تبا تبا , ليش اجيت ؟ امتى ارجع ع البيت امتى !! وكليها مريم كليها عشان تتطلبي , مكدرتش امسك حالي من الضحك ع البخل , حكتله مش هلكيت , حكى بده يروح يجيب الكلب من عند الاكس تبعته , كال هو وياها بس اصحاب , لشو بده يوصل هاد الشب ؟! حكتله ماشي يلا , وكل كلامه بالطريك طاااكع طاااكع , بحكيلكم بكل صراحه , هل راح اطلع معه كمان مره ؟ مليون لأ !! وين الشب اللي لما نحكي تلفون يعرف يسمع ؟ او هيك شوي مقبول , كان طوال المشوار زنخ , يمكن عشان شوفت حبه بكلاوه واحده كشيت منه صار كخه !! المهم روحنا نجيب الكلب , وكديش كان يتبايخ مع الكلب , لما شوفت الاكس تبعته بحكيلي شو حلوه , حكتله اه مش بطاله , حكى لما كانت حبيتي كانت احلى وكل هالحكي, بيني وبينكم هل هي حلوه . من لمحه بكدرش اقرر , بس جسمها لأ , ماشي بيضا وشقرا بس مش ذوقي ولا هي ملكه جمال , في بنات بخطفوا عيوني وشباب كمان , بس حبيبها الجديد ع ايده وشم رهيب وكأنه مجنّس يعني ياباني ع ايطالي منيح كمان , اخدنا هالكلب وجنني فيه وانو لتكوني بتخافي منه وانو اوعك يعظك وكل هالحكي , بعدين شاف كيف ردت فعلي انو شايفني مش خايفه منه وشايف ما بلمسه لاني بصراحه هيك كنت كرفانه 100 ايد صابته ولسا ع وضوء ويوم جمعه وانو يعني مش هالاشي الواو , لو انه سياره فراري اه , او نيو هامر من جميس يا ربي , حتى بالطريك اشوف سيارات احلامي بورش واشوف البيوت البنى القديم وبعدها روحنا ع المحيط كعدنا ساعه وانا ازهكت منه , شوفته انو بخيل جدا وكل كلامه احلام وكل كلامه مادي جدا وانو شو بستنى اصرف عليه اللي ع قولته انو هو بطلّع 1000$ باليوم , بكص ايدي اد مش هو بنات بصرفوا عليه , لهيك بحكيلكم , كشيت منه عالاخر , وكديش انبسطت انو اطلعت معه نهار لاجربه عشان بالمستقبل اعرف مين هو , كاسه كهوه ما عزم عليا , وكل ما يحكي اشي اجاوبه انو فهمانه عليك يغيّر كلامه , بطلت اعرف امتى بكدب او امتى بحكي الصدك اد لسا في الاصل صدك بكلامه, وهدول صفات باشخاص بكدرش اكمل معاهم او احكي اتعمق معاهم , المهم عندي اني اشوف المحيط ..~

بتعرفوا شو اللي صار خلاني اتزكر اصحابي بالبلاد , اصحابي بالجامعه , ومعارفي !! كديش فرق شاسع في الذوق والاخلاق والاحترام , الله يحميهم ..~

السلام عليكم ...~

لسا ما كتبت اشي وكاعده بضحك مع حالي عالكصص الجاي اخبّركم اياها , اخ يا ربي الله يهديني !

اليوم هو التلاتاء بعد العشره في الليل , اليوم واحد الشهر ..~

||

اللي صار يا اصحابي انو تركت الشغل , بس محدش بيعرف , حكيت لاهلي وللكل انو انطردت من الشغل , ما حكتلهم اني انا اللي تركته , لانو بكدرش , اد بالاصل لما حكيت لامي انهم راح يطردوني وراح يكون شهر 11 اخر شهر معاهم امي مرضت وارتفع عليها الضغط والله يشفيها ولحد الان زعلانه بس مش مظهره , اتخيلوا احكيلها انو انا اللي تركت , وانا اوصلت لمرحله اتعبت ومتحطمه وحالتي حاله لاني قرّبت اصير 30 , وصرت اتصرف كصص بدون ما افكر , ما فكرت شو بدي اعمل بدون شغل وما فكرت كيف راح اتصرف في المصاري ولا اي اشي , اخر فتره بطلت انام من ضغط الشغل , اخر شهرين مكنتش انام ساعتين تلات الصبح وفيهم كوابيس بتخوّف , واضعفت كتير لانو بطلت اكل وكل حياتي شغل وكهوه بس , كعدت اصّبر حالي ومكدرتش , كعدت اتحمّل ومفش اشي واحد يخليني اتحمل , وملكيتش حد أساله انو اترك الشغل ولا اكمّل ! لهيك حكيت مهي خربانه خربانه اترك الشغل , وبعتت ايميل للمدير تبعي انو بدي اترك , عطول المدير بعتلي مسج انو بس تخلصي الزبون اللي معك اتصلي عليا , ولما حكيت معه سال السبب ! حكتله ما بعرف ابيع ومش عارف كيف ابيع الناس , مش كادر اكدب عليهم , في حل انو اشتغل بمكان مش بحاجه اني ابيع ؟ لأ فش ! شوفت زعل اني بدي اترك , بيني وبينكم هاد المدير اسمه ايريك , شب صغير بالعمر يمكن اصغر مني , بس لطيف معي لابعد حد بعيد عن الشغل وكصص البيع , يعني لما نجتمع زووم وكميرا بحسسني انو صاحب , بكعد يسالني عن البلسيتشن وعن شعراته ويورجيني اياهم وغرفته وعن اهلي ووعن ساده هيك كصص وبكدرش الا اني احكي معه واسمعه واضحك , حكالي امتى بدك تتركي , حكتله اخر شهر 11 , وهاد اللي صار .



هاد كان مكتبي في اخر يوم شغل استعلامات في شركه اتصالات , كان يوم سبت 11/28/2020

|| الاحد كان يوم عطلتي ف مش محسوب

امبارح الاثنين كان اخر يوم في البرنامج ما دوامت , ما اجى عبالي , اصحيت شبعانه نوم من زماااان منا هيك صاحيه , وروحت رميت حالي اكمل النومه ع الكنبه في الصاله جنب الدفى , واهم اشي انو ساده اجى عندي اللي بالعاده ما بحبش , بس كأنه كان حاسس بانبساطي ؟!

ومحدش بيعرف انو ما اشتغلت , لهيك محدش يزعجني بتلفونات , وضليت لوكت ما اتزكرت عليا ادفع الاجار , لهيك سحبت حالي وروحت ع البنك , خلصت اللي عليا وارجعت ع البيت , جهزت نص اغراض الشغل لانو لازم ارجعهم , اللي هي الكمبيوتر وهيك كصص , ان شاء الله بكرا اخلصهم , واشحنهم ويوصلوا ما يصير كصص بالشحن عاد , ورتبت البيت لانو الاحد كانت لمه خواتي واخوتي والصغار ومفش اشي بمكانه وما نظفت ولا رتبت الاحد , لهيك رتبت الاثنين وكنت بستنى في لعبه كان ميعادها واحد الشهر , لهيك لما نزلت العبت نصها ع الاغلب ونمت ..~





وهاي راح تكون لعبه الوداع , لاني هلكيت ما بشتغل يعني فش اخضر اللي هو المصاري يعني فش صرف ع العاب يا مريم , خلص نهايتها باللعبه هاي وبس , بدي اعيّط انو مش راح اكدر اشتري العاب , يالله بلتهي باللي عندي وبحاول اخد كؤؤؤس بالوكت الضائع ..~

||


اجى اليوم التلاتاء اصحيت بدري لانو كنت ناويه اصلّح سيارتي , بتتزكروا يوم ما انسيت السياره شغاله طوال الليل ؟! وكنت خايف ارجع اشغلها ؟! الحمد لله ارجعت شغلتها واشتغلت , بس كان براسي انو لازم اروح اغيّر الزيت , وبدّي اروح اعمل فحص شامل للسياره عشان يطمئن قلبي, وكمان في فحص شامل تاني مشان ترخيص السياره , وامبارح وانا في البنك شوفت محل تصليح سيارات جنبه , ف مريت عليه وسالته عن سيارتي واتفكت انو اروح اليوم , لهيك اليوم كنت مستعجله بدي اطمن ع سيارتي , بحكيلكم بكل صراحه سيارتي ما بتسوى اشي بس بحبها كتير , وبنكهر لما تخرب وبدها تصليح لانو تصليحها اغلى من سعرها , المهم اصحيت واتسلهت ع المحل شوفت شب غير اللي شوفت امبارح , وكنت جواي خايفه يضحكوا عليا , وينصبو عليا , بس بنفس الوكت لازم اطمن ع سيارتي , حكتله شو بدي , بدي تغير زيت للمطور واد بكدر يعملي فحص شامل , لانو البريك خفيف معي ,وفي عندي في اللوحه ضو بضل مضوي اللي هو فحص للمطور وانو المطور تبع السياره فيه مشكله , وكد ما اخدت هالسياره الكل ما عرفش مشكله هالضو وليش مضوي , تركت السياره واتفكنا ع التصليحات وكم السعر وسخنت ع المبلغ بصراحه اللي هو بس تغير زيت مع فحص شامل ليعرفوا المشكله تبعت الضو , مشان بعدها نتحاسب ع حل المشكل لحاله اللي يمكن يطلع كد سعر السياره , وارجعت ع البيت, بعد بحوالي 3 ساعات اتصل عليا وحكى السياره جاهزه , روحت وفهمني انو لسا كمان مش عارفين مشكله الضو , وهو يحكي كنت اضحك مع حالي من جوى لانو حتى سيارتي عتيقه ومش معروف شو مالها زي صاحبتها واشي ما مر عليهم , حكى غيرت الزيت وفحصنا البريكات في تهريب انتبهي انو لازم تفحصي الزيت والمي والكهربا شوي كمان و 100 كصه وكصه فيها هالسياره , طيب والضو ؟ حكى عملت زي تحديث بالكهربا للسياره وعليكي تفحصيها لازم تسوكيها وبعدين نشوف اد بيرجع الضو , وهاد صار معي قبل هالمره مع ناس غيره , حد هيك عمل بسيارتي بس الضو تاني يوم رجع , وكمان لما غيّرت البطاريه للسياره راح وعاود رجع , وحكالي اد رجع الضو بدنا نعمل فحص تاني اعمق , لانو مستحيل تاخدي ترخيص للسياره بدون الفحص الشامل التاني , وارجعت ع البيت , وكملت لعب ع البلستشن ..وختمت اللعبه .. يبي صح محدش مات معي بس الكصه مش هحالاوه وما كانش عندي اداور شخصيات ومش هالشخصيات الحلوه , حتى اغاني باللعبه فش , ما بتستاهل بصراحه , ما تركت اشي شخصي عندي .

هلكيت لانو فش عندي شغل , بس في عندي التزامات تانيه ملانه , بس بضل اهون لهيك اتوقعوا انكم تشوفني بالمدونه ..~

السلام عليكم ...~

والله زمن , شو شهرين غايبه , يا خساره وعدتكم اني اجي بس مكدرتش .. سامحوني !

يوم السبت ,2\6\2021 , هاي اول مره بالسنه الجديده ..~

ملان كصص كبيره صارت معي ومنها كصه دعستني دعس لسا محطمه منها .~

شهر 12 , بدايته كانت منيحه لانو فش شغل , بس كنت كتير مشغوله في التزمات بخصوص البيت , وبعدها بشوي , اسناني صاروا يوجعوا وامرضت , ضليت اتحمل لاسبوعين , بعدها وصلت درجه الوجع 9\10 , وطبعا ما عندي تامين صحي من الحكومه ولا عندي تامين من الشغل لهيك كنت اضل اتحمل الوجع ع امل انو اطيب لحاله بس ما طاب , مكنتش اكل ولا انام , بس بيني وبينكم من جواي مكانش هالغضب , بالعكس لما ما انام من الوجع , اكوم اشوفلي فلم او العب بلستيشن , كتير البلستيشن الهتني ع الوجع , وكنت عايشه ع الدوا والكهوه واضعفت كتير , لانو حتى لو مانمت ما اهكل هم تاني يوم عليا دوام وشغل وبكدرش ما اداوم , بس بعد اسبوعين طاحونتي حكتلي وين رايحه انتي ؟! بلش ما يفيد الدوا ولا البلستيشن , واوصلت الحد ! لهيك ضليت ادور ع دكتور اروح اخلعها , والحمد لله لكيت دكتور بعد بيومين وروحت وحكالي منكوشه , بمعنى فيها حفره وعندي حل اني اصلحها اد بدي , اصلّح مين يا روح امك , هو انا معي مصاري للتصليح ؟؟! حكتله لأ بدي اخلعها , ما نصحني لانو كتير مخلّع طواحين , بس هيك الدنيا معي , اعطاني دوا ليخف الالتهاب ووبعدها بخلعها , وكلفتني عشان بس اخلعها 800 $ , واوصلت لمرحله طويله من مره ما اكل لانو لسا لحد الان في عندي وجع في طواحين الجهه التانيه بس طالما ما بطب فيهم بضلوا مخروسين , اما الجهه اللي خلعتها كمان مكنتش اكدر اكل عليها لانو الجرح جديد , لهيك كعدت طوال شهر 12 بدون اكل محرز , كنت بس ع الشوربه , والدوا , واضعفت , وكعدت اسال حالي كيف الناس بتعمل دايت انو عنجد اشي متعب تكعد بدون اكل وضليت هيك لبعد الاسبوع الاول من شهر واحد , هلكيت الحمد لله باكل عادي ع الجهه المخلوعه لانو الجهه التانيه بتوجع اد مي بطب فيها ..~

الاشي التاني كمان اللي مجنني هي المسؤوله عن البيت , اللي الحيوانه عم اضل اتنكوش (تبحث)علينا بالبيت مشان تطردنا , وكل كصص البيت مرميه عليا , وازهكت منها انو كل كم يوم تبعتلي ايميل او تتصل عليا وتسمعني حكي فلسفه انو ليش هيك عاملين وليش هيك عاملين , لانو حضره الناس اللي كانوا ساكنين فوكنا ما كدروا يتحملوها وتركوا البيت , وهي عم تتفشش فينا ,وانا كنت مريضه ومش كادر ع حرب ومشاكل مع حد , واخوي طبعا برمي كلشي عليا وفوك كل هاد بيجي بيحكي حكي انو اه هاي مش دارنا واحنا مستأجرين , وانا بنجن بزياده , ولهيك حضرتها كل كم يوم بتيجي مشان تورجي البيت لاي حد بده يتأجر البيت فوك , وكل شوي فاتحه الكراج وتعبر ع الحوش عليا بدون احم ودستور , حسبي الله عليها , يا الله يالله شو بتحسّب عليها , يا رب يا رب يا كبير تاخد شرها عننا وتلهيها بحالها يا رب ,وبنكدرش نطلع من هالبيت لانو فش معانا مصاري , احنا عايشين في مدينه نار الحياه فيها مشان نضل قراب ع بعض , الاجارات كتير غاليه في سانفراسيسكوا , حتى مع الاوضاع هاي لسا الاجارات هون غاليه , فا هاي المسؤوليه اللي والله متعباني نفسيا لانو والله من اول ما اتأجرنا ولا مره واحده اتاخرنا في الاجار حتى في اوضاع كورنا ودايما اساسي عنا انو نحوش اجار الشهر , ودايما مرتبين البيت جوى برى وكل الجيران بشكرونا , لاني ايام بنظف باب البيت ع الشارع وبنظف كدام الجيران , عشان هيك بزعل ع انو تتركنا بحالنا , ايش يعني عندي فزيزر بالبيت او ماكينات اثقال شو دخلها , بعد ما طيبت من طاحونتي , حكيت معاها وشليتها ولعنتها ومن وكتها بطلت تحكي , بس لسا بتعبر ع الحوش زي الحراميه اللي بدها تشوف شو بنعمل مشان تتصيّد في المي الوسخه زي وجهها !


اما بخصوص السياره , اد حكيت عنها , الضو اللي كان يضل مضوي انو ماطور السياره في خراب وحكولي لازم تروحي تمشي بالسياره لكم ميل ونشوف اد الضو بيرجع , مشيت فيها كتير والحمد لله الضو ما رجع لهيك عملولي فحص وعملولي كمان فحص مشان اعمل ترخيص للسياره لسنه 2021 , والحمد لله عملت الترخيص , لاني كنت كتير كتير هاكله الهم انو يرجع الضو ومكدرش اعمل ترخيص لانو هون بامريكا ممنوع ينعمل ترخيص الا لما يفحصوا السياره انها صالحه للسواقه , وخوفت الضو يرجع واكون بحاجه اصّلح السياره ومعيش مصاري , المهم كلشي تمام , لوكت الاسبوع الماضي , رجع الضو ههههه , ما انكهرت لانو عملت الترخيص قبل ما يرجع الضو , بس راح تكون مشكله للسنه الجاي اد ضليت وانا هالسياره عايشين !


هلكيت بدي احكي عن اشي كبير مصيري بحياتي , وهون بتمنى من حالي ما اعيّط وانا احكي عنه لانو لحد الان موجوعه , لا ما تخافوا حبي لسا عايش ما مات , بس لسا بنحكيش , وراح يجي دوره لاحكي عنه , لانو في اشي فريش عنه !

اوصلت لمرحله بحياتي ازهكت كتير , وعشان طواحيني بيوجعوا , ولما بس خلعت واحده كلفتني 800$ , حكيت بعقلي , ليش ما انزل ع الضفه اصلّح اسناني ؟! اشي كبير صح , مريم اللي في مشاكل ع ورقها واد بتنزل ع الضفه مش راح تكدر لا سمح الله ترجع ع امريكا, بس بكدر في 800$ اشتري تكت وانزل , منه اصلّح سناني , منه اساعد امي لانها مريضه ودايما بتهكل هم تروح ع دكاتره , ومنه اشوف صاحباتي واسهر معاهم , ومنه ارتاح من مسؤوليه البيت , اروح اكعد مع اهلي واكل طبيخ امي سخن واشرب كهوه هلكيت طالعه من المحمصه واكل بكلاوه وكنافه سخنه , وافطر ع حمص وفلافل وشاورما , اه هاي شغلات مهمه كتير عندي لانو محدش هون بيعرف يعمل حمص وشاورما او حلو زاكي , وحكيت اكعد غاد لمده شهر واحد , وعشان الرئيس الجديد وفي احتمال ما يطردني , سالت اهلي وحكتلهم انو اشتقت , وانو نفسي انزل اغيّر جو معاكم , استغربت انو اهلي وافكوا , بتصدكوا , ومين بكصد باهلي ؟ امي وابوي ! حكو اه تعالي , وهاد الحكي كان في نص شهر واحد , لهيك قررت اني انزل ع البلاد , ما بتتخليوا الفرحه اللي كنت فيها , من زمان ما كنت متشجعه ع اشي وفرحانه , وحكيت لاهلي ما حد يعرف , لاني صبيه لما الناس تعرف عني اشي ما بزبط !

ماشي كنت كتير مبسوطه , وما حكيت لاي حد من صاحباتي , حكيت بدي افاجئهم , وبديش لجه من حد , وكان قلبي يرفرف اني بدي اروح اسهر معاهم زي ايام زمان , نحكي ع الناس وندخن ونأرجل لانهم اللي بفتحو نفسي , ونحكي عن عشاقنا .. واكتر صديقه كنت طايره من الفرحه اني بدي اشوفها هي فد , فد اللي 10% عن حالي ما بطلعه الا كدامها , في شغلات فييا الناس بتحكم غلط اد عرفتها او ما بتعملها معي بس مش فد , فد الا اشوفها طافيه , واللي نسهر لنص الليل هون وهون .

وكنت بدي اروح اضل جنب امي وابوي واخدمهم واريّح العيشه عليهم شوي , واكيد كنت مشتاقه للحوش ولورد امي وهالبساس (الهرر) اللي عند اهلي اللي اد بشوف حد بيجيو ركاض عليه , واكيد لشمس اللوز !

حجزت التكت , وجهزت الشناتي واخدت كمان شناتي زياده ددفعت عليهم مصاري زياده , وعملت كل الاجراءات عشان كورنا , ع وقت ما قطعت التكت كان لازم اعمل فحص في 500$ لانو مسافره دولي , وبصراحه ما اهتميت ع اشي ادفعه مشان اني اروح انبسط , وما كان في حظر , وكان الجسر فاتح , وكانوا يقبلوا تامين دوله اللي قطعته مشان سفرتي , يعني كنت جاهزه مجهزه . وعملت تلفون ع كل دوله بدي انزل فيها وعبرت كل مواقعهم وشو بدهم .

امي طوال الاسبوع اللي قبل سفرتي كل ما تحكي معي تلفون تسالني عن حبي , انو بدي اشوفه ؟ اني لما انزل في المطار في الاردن خليّه يجي ع المطار يشوفني , وانو زمان مش شايفني , وانو بنفعش ما يشوفني , امي كانت واكفه في صفّه اشي مش طبيعي , انا لسا ما اتصالحت معه , وحكيت لامي اللي عمله اشي كبير مش كادر انساه , ماشي بعزّه , بحكي لامي اني بعزّه , بس بكدرش احكيلها اني بحبه , لانو من جواي اه بحبه , وحكتلها يما هلكيت مش راح احكيله اشي , بس بعرفش يما , لما احط اجري في مطار الاردن يمكن اه اتصل عليه واحكيله هيني في المطار ويمكن لأ , وهون انا بحكي الصراحه , الطوشه اللي قبل الاخيره حكالي , انا بكرهك وبطلت احبك زي زمان , اد كنت احبك 100% هلكيت يالله يالله ربع هالحب , حكى كتير حكي اتوجعت منه بس بنفس الوكت كان يحكي الصراحه عني وشو انا واني السبب باللي هو بحكيه , بعرف حالي بخلّي الناس تبعد عني , لهيك بلومش حد , عشان هيك راح احكيلكم اشي ما حكيته لحد ولا راح احكيه , خوفت اني لما احكيله هيني بالمطار , خوفت انو ما يهتم وانكسر منه , لانو حكى انو بطّل يحبني , وفي اشي جواي , بده اياه لسا يضل يحبني بعرف انانيه شوي , الاشي التاني كمان خوفت احكيله هيني بالمطار وعنجد يجي , وخوفت اشوفه , لاني بعرف حالي لو كد ما اكون قويه هاد الشخص اد بشوفه او بسمع صوته بضعف لابعد حد , وبفكرش شو بعد هالضعف ! لهيك خوفت لما اشوفه اروح ركاض عليه !

وصلت لقبل السفر بيومين , ومحدش كان يعرف اني بدي اسافر الا امي وابوي وخواتي , خواتي انبسطولي كتير وحكولي اه تغيري جو ونفسيه , ووصيت خواتي انو اولادهم ما يعرفوا , بعدين حكيت لاخوي تلات اللي عايشه معه انو بدي اسافر , ما وافك , وزعل واتنكد ونكد عليا , وكعد يحكي كيف بدك تسافري وانتي معكيش ورق , كيف بدك اضلك بالبلاد تعيشي وانتي اتعودتي ع هون , يالله شو نكّد عليا , يالله شو هكل هم مسؤوليه البيت وهكل هم ساده وحكى لو ابعته عند حد , يالله ما انبسطلي من مره ! حكتله لا تحكي لخطيبتك ولا لحد لانو بدي اوصل ع السلامه وبديش لجه حد , حضرته راح حكى تاني يوم لاخوي واحد , واخوي اجى عندي بنفس اليوم بعد شغله وكمان بدوش اياني انزل , وحكتله تحكيش لمرتك عن سفرتي بديش حد يعرف , بتعرف حياتي صعبه , وتاني يوم اجى اخوي واحد وجاب شويت اغراض وحكى من مرته هداايا لاهل الضفه , وخطيبه اخوي تلات اتصلت ع اهلي وحكتلهم بدها تيجي اخر الاسبوع تنام عند اهلي لانو عرفت اني بدي اكون عندهم , واليوم اللي موعد سفرتي وانا بالمطار , حكولي خواتي انو بناتهم عرفوا وانهم بدهم يجيو ع المطار يودعوني , ولما شافوني حكو ليش اسافر لحالي وليش ما اخدتهم وزعلنات , وانا كمان بالمطار امي حكتلي انو بنات اخوي اثنين اللي غاد سامعات امي بتحكي انو عمتهم مريم بدها تيجي وراحو حكو لابوهم وابوهم حكى لمرته ولاهل مرته ولدار سيدي وعماتي وللجيران , وهاد كله صار باليوم اللي انا بالمطار الصبح بجهز بحالي للسفر , كأني بحكي للعالم اوعكو تحفظولي سر , لازم تفزعوا الدنيا ع اني بدي انزل ع البلاد , كأني بحكي للعالم انو انا صبيه محظوظه وكل ما الناس كترت لتعرف عن شو بدي اعمل كل ما بزبط الاشي وبنجح , كأنو فش وراي خوف ع كصه ورقي من امريكا , كأنوا معي ورق ومصاري ومش بحاجه اي خوف وحكي العالم من عيونهم اللي بتبطح جمل , ومع هيك والله العظيم انو الفرحه اللي جواي وكتها اني بدي اسافر ما خلتني اهتم انو كل العالم عرفوا انو الامركانيه مريم جايه ع البلاد , ولا هكلت هم ولا اتشأمت باشي بعرفه من تجارب بحياتي فال مش منيح ! وانا بالمطار طلعت فحص كورنا الحمد لله سلبي , وبلشت اجهز بحالي من الشناتي ودخلت المطار ع 8 الصبح وطيارتي كانت ع 3 العصر , بس روحت بدري لاني كنت مبسوطه وجهزت الشناتي وحالي , كان يوم ثلاثاء 1\26\2021 , بلشت كصص ومطبات تطلعي , انو الشناتي وزن زياده ف ما اهتميت حكيت بدفع ع الوزن الزياده ودفعت , بس بطاقه البنك ما زبطت فكروا حد بده يسرقها لهيك رفضو اي دفعات بتصير بالمطار , اطريت اكعد ساعه ع الخط مع البنك مشان يتأكدوا اني الصبيه صاحبه البطاقه واني اللي بعمل هيد دفعيات في المطار , بعدين اجت مشاكل تانيه , مشاكل انو الجسر سكّر ع حظي , الجسر من الاردن ع الضفه راح يسكّر في اليوم اللي راح اوصل فيه الاردن وراح يضل اسبوع , وهاد التسكير صار لا ع البال ولا ع الخاطر ولا حتى حكو الا قبل بيوم , وانتو سابقينا بقبل يوم , وكمان ع حظي لازم في حظر لمده سبع ايام , قبل ما اروح ع الضفه , والتامين اللي عاملته ما بزبط في الدول العربيه الا بس هون في امريكا , وحاولت اشتري تامين وانا في المطار ولا حد زبط معي , وراحت الطياره , بتصدكوا كنت اول واحده في الطابور , وراحت عليا الطياره مشان التامين , ساعتها فكعت عياط , ضليت لاخر دقيقه عم اعطي حالي امل وانو مستحيل تروح الطياره , وانو راح الاقي تامين للسفر , هون بلسشت الصعوبه !

انا صبيه بتوقع السيء والاسوء بحياتي , وكان ببالي انو اه احنا بفتره كورنا لهيك السفر صعب جدا , صح التكت صار اقل من نص السعر العادي , بس وين مكان في فت مصاري , وهاد اشي ما كان اشي كبير عندي (دفع المصاري) بس قبل بيوم انا عملت تلفونات لاتأكد انو اوصل المطار وما ناكصني اشي , وما في ولا نكص ! كل تلفون اتاكد من تاميني الصحي , اتاكد انو راح اعمل فحص كورنا السفر الدولي , اتاكد اد في وزن زياده بدفع مصاري زياده , كنت حاسبه حساب كلشي صعب ممكن اواجه , بس ولا ذره واحده اجى ببالي اني ما راح اسافر من اصله من امريكا , ولا ذره اجى ببالي انو بعد يومين سفر لما اوصل الجسر راح يكون مسكر لاسبوع , ولا خطر ببالي انو باليوم اللي بدي اسافر فيه يصير الحظر لسبع ايام , ولا خطر ببالي انو الطياره تروح عليا عشان مش زابط ولا تامين بدي اشتريه , هون اتحطمت , انو كلشي صعب بحياتي , احكي مش مشكل بيجي اشي كبير منيح بحياتي بيعوضني عليه , وبعرف انو الخيره في ما اختاره ربنا , وبعرف انو ربنا عمل هيك عشان مصلحتي وعشان منيح الي لاشي انو بعرفوش ! بس ليش!! ليش هالمره بحياتي لما بدي اشي ع كل تعبني ما يزبط , ليش لما طوال حياتي بعرف انو لو كد ما تعبت ع شغله ما راح يخليها الي , لهيك بطلت اتعب ع اشي لانو مش راح اخده , بس هالمره ! هالمره ! رديت ع كلام الكل , انو انا ما بحاول اعمل اشي او اتعب عليه , لو بتعب ع اشي بزبط ! وهيني اتعبت نفسي وجسدي ومالي وما زبط ! ليش ما كانت هالمره فيها خيره الي انو اسافر وكلشي يزبط وارجع ّ , ليش كل تعبي ومنيحي راح ع الفاضي معاكي يا دنيا ؟! هون انجنيت , في المطار حكولي راح نأجل سفرك لبعد يومين اد بدك , كنت بالفتره بالمطار بالنكد والامل , الامل اللي طوال عمري بحكيه انو مش الي , مش النا الامل مش النا , في امل بس مش النا ! والصبر , الصبر انو راح الاكي تامين وراح اسافر , بس ما بعد الصبر الا القبر !! كعدت اعيّط واعيّط انو هيك الشغله ما زبطت من اول مره ف مش راح تزبط لو بعد مليون مره , كنت بتلفونات مع اهلي وخواتي , فوق كل اللي فيا لسا بحكولي تحكيش هالحكي يا مريم , خلص هي اتغير وكت التكت لبعد يومين وبتيجي , وين اجي ؟! مهو بعد هاليومين الجسر مسكر وفي حظر , وارجعت ع البيت , ما وكفت عياط ولا نكد ولا كرف ولا كأبه , وروحت نمت لتاني يوم ! واتصلت ع اني اكنسل السفر من اصله , وفش رجعه للمصاري تبعات التكت ع وتبعات الشناتي او تبع فحص كورنا , كأني روحت صرفت مصاري ع الهموم واجيت , كأني اه اشتريت الهم واجيت ! ومن وكتها وانا منكده , بدل ما اكون عندهم ومعاهم انا هون بكرف الحياه ومشاكل البيت !

نرجع لكصه الجديده عن حبي , امبارح اختي الكبيره تحاول تبعتلي رابط ع الفيس ومش زابط معي افتحه , وما حكت شو هو الرابط , بس حكتلي بدوش يزبط بلاش , اليوم لما اجو عندي , اول ما اجت اختي وكعدت ع الكرسي عطول فتحت الرابط من بلفونها تورجيني اياه , طلع حبي ناشر اشي ع صفحته وبدها تورجيني اياه وانه كاصدني فيه !ما كان يفتح معي لانو عامله بلوك ع الفيس , اه عامله بلوك ع الاشي اللي صار اخر مره منه , عشان ما ينعاد ولا يجيني وجع راس ! بس اختي صاحبته ودايما بعلقوا ع منشورات بعض , ومرات اكتشفت انو اختي تحب تحط صوري ع الفيس تبعها , لما الطوشه اللي صارت اخر مره عرفت اختي عنها , راحت حطت صورتي ع الفيس تبعها ! واترجيتها انو تشيلها , ولا اهتمت شو حكيت ! الحمد لله كانت صوره بشعه , ف المنشور صارت تحكي انو بكصدني وحتى اختي التانيه كمان , بس حكتلهم انا عامله بلوك يعني بكدرش اشوف شو بينزل يعني بعرف اني بشوفش شو بنزل لهيك ما بنزل اشي ع الفيس يكصدني فيه مستحيل , هاد بكصد واحده من صاحباته او اصحابه حتى , يا بنات هو بطّل يحبني مش انا المكصوده ! اد في ايام العز يعني ايام ما كنا نحكي ما كان ينشر اشي يكصدني فيه ع الفيس لانو بعرفني بتابعش شو هو بنزّل , لانو بعرفني مش تبعت لف ودوران وما بلقطها ع الطاير , لازم يجي ويحكي شو بده او شو ماله او شو مزعله مني , اما كصص ينشر ويخليني انا من حالي افهم , والله انا مش شاطره بهيك اشي عشان افهمها , لازم تنحكى الكصص ع بلاطه , وهاي من الكصص اللي كمان الناس بتحاسبني عليها وما بلومهم , وداخليا بديش اكون انا المكصوده , وكعدوا يحكو صارله فتره بنشر حزن وكآبه وحالته حاله , حتى اخوي تلات حكالي هاد حبك بضّل ينشر حزن وكصص ! بس يا عالم من واقع وتجارب معاه ولا مره بنشر اشي بخصني فيه لانو بعرفني ما بتابع .. ومع هيك ! مع هيك امبين عليه بوكت صعب كتير , ولما اعرف انو بوكت صعب , بحط كل هالكصص ع جنب وبروح احكي معه , خايفه الليله اروح اعملها ! بس من جواي كصه مرضه اكيد كدبه اكيد ..~

خواتي جابولي هدايا بعد بكم يوم من كصه التغاء السفر , عشان تتحسن نفسيتي , بعرفوني بحب الورد والشكلاطه وفستان ..~

السلام عليكم ..~

ليل الاحد || 2\7\21 ..~

||

ايش صاير بالدنيا يومين ورى بعض بالمدونه ؟! اسمعو راح اعمل تحدي مع حالي , اضل لاخر يوم بشهر 2 وانا باجي ع المدونه وبكتب كل يوم كل يوم , واد خسرت بحط صورتي ع الاسك ؟! ااووه اتحمست اني ما اخسر عشان صورتي ! اه صورتي بوجهي كامل مش نص ! بس هاد اكيد بالاحلام ولوكت ما ينوّر الملح ..~


؛

نحكي عن مجريات يومي , بتعرفوا اني امبارح بعد ما خلصت كتابه من المدونه , اجيت اشوف حلقه من مسلسل الندم , بس حكيت بالاول خليني اسمع اغاني المسلسل , توب الا اجى اخوي بحكيلي , في صوت في الدار اللي فوك , في حد في الدار اللي فوك , ما صدكت حكتله يخوي هاد اكيد الراكون , حكالي في فرق بين صوت الراكون وصوت حد بمشي , بتعرفوا محدش ساكن فوك لحد الان , عاد اطلعنا ع الكراج شوفنا , الباب اللي بيطلع من الكراج ع الحوش مفتوح شوي , وشوفنا الباب اللي من الكراج للطابق التاني كمان مفتوح , واطلعنا برى ع الشارع نشوف اد في سياره حد او في ضو مضوي بالدار , وشوفنا في ضو مضوي في الدار اللي فوك , بس فش سيارات ووالباب تبع الدار الفوك اللي بطّل ع الشارع مسكّر , خوفنا بصراحه ,.حكينا مين جاي ع الدار بنص الليل , ف عطول اخدنا صور للبواب وللدار وانو الضو مضوي , وبعتناهم لصاحب الدار واتصلنا عليه , وحكيناله انو اسمعنا صوت بالدار واني في ضو مضوي , هاد صاحب الدار الحيوان حسبي الله عليه , خاف وخوفنا معاه , حكى لأ ما اجى ع الدار ولا بعرف انو حد بده يجي ع الدار , وحكى بده يتصل ع مسوؤله الدار مشان يتاكد اد هي اجت ع الدار ويرجعلنا , لما رجعلنا بتلفون حكة المسؤوله عن الدار ما ردت ع تلفونهه وبده يتصل ع الشرطه , حكيناله اه احسن يا ريت .

بعد بعشر دكايك او اقل حتى اجت الشرطه , سيارتين , 4 زلام شرطه , حكينالهم بالزبط شو صار , اسمعنا صوت اجرين بالدار اللي فوك ومحدش عايش فوك , وفي ضو مضوي وحكينا لصاحب الدار وهو اللي اتصل عليكم مشان تيجيو , اول مره بكل صراحه بشوف شرطه لطفين , عنا هان الشرطه لئيمه اشي بحت وقويه وخاصه بسانفرانسيسكوا , كعدوا ينادوا وهم تحت بالكراج اد حد بالدار ويطلع يسلم حاله , لفوا بالدار تحت و بالحوش وهون وهون ليتاكد فش مكان حد يهرب منه , طولوا وهم يفحصوا الدار من كل الجهات حوش وشارع وبعدها طلعوا ع الدار الفوك وطولوا وهم يفحصوا فيها , ونزلوا وحكو فش حد بس اه في ضواض مضويه , لعاد صوت مين اللي اجى ع الدار ؟! حكيت بعقلي؟! وبتعرفوا اد الشرطه بتيجي ع حد كل الناس والجيران بطلعوا وخاصه هالحد هو عرب مسلمين بالحاره هالصبيه اللي دايما صوتها عالي وبتحكي مع كل الجيران .

ولما نزلوا الشرطه وكلنا كنا بالشارع نحكي مع بعض ويفهموني انو فش حد وما تخافوا بس احتياط اد الابواب بتلاكيها مفتوحه مره تانيه اتصلوا علينا , طلعت جارتي نيكول واول ما شافت الشرطه يالله شو استغربت من رده فعلها اللي عمري ما انساه ودايما راح احمد ربنا انو بعتلي هيك جاره جبرت خاطري , لاني دايما بشوف وبحس انو جيرانا بخافوا مننا عشانا مسلمين , صح بنحكي مع بعض انا ونيكول بس داخليا كنت حاطط نيه سيئه انها بتحبناش , بس طلع العكس الحمد لله , نيكول عطول حكت للشرطه انا بعرف مريم وهاي جارتي من زمان منيحه هي واخوها ولا بعملو مشاكل , نيكول فكرت الشرطه جايه علينا عشان اشي عاطل عاملينه , بس حكولها الشرطه لا بس فكروا اصوات حد بالدار , حكت نيكول يمكن المسوؤله عن الدار اجت ونسيت البواب مفتوحه والضواض , لعاد امبين نيكول شافت المسؤوله عن البيت جايه بالليل . والحمد لله انو اطمنا مش حرامي او مشرد جاي ع الدار , ولانو اصحاب الدار ما بيثقوا فينا وبستنونا ع غلط مشان يركبونا اي غلط مشان يطرودنا , وهاي المسؤوله شكيت وان بعض الظن اثم , بس والله شكيت اجت بنص الليل تعمل هالفنط مشان تيجي يوم تاني وتحكي في حد فاتح الدار وتتهمنا , بس حسبي الله عليها ! لانو تصرفاتها معانا شر اشي مش طبيعي !

بعدها راحت الشرطه , وراحت نيكول , وانا واخوي عبرنا الدار , ونص الجيران كانوا يطلعوا علينا بالعتمه , حكيت مع امي عن الكصه , واضعفت واتصلت ع حبي , اه ينعن شكله , اتصلت عليه دولي , لاني ما بأمن ارجع اشيل البلوك من الفيس , اتصلت وما ردش عليا الحيوان ؟!!! , صفنت كم دكيكه مع حالي , انو مش طايقني وانو اه الربع طار من محبته , وحكيت ما رد لعاد اد كنت شوي اخفف عنه بالدنيا , راح هالتخفف , ف صرت زي زي غيري ! ينعن شكله , وبعدها حكيت , حطيت الطوشه ع جنب واتصلت عليه مشان اخفف عليه اللي منكد عليه , مش لاني مستاقه للحكي معه , هو انا مشتاقه بس هالمره هالتلفون مش عشاني , لهيك فش زعل من جواي يا مير !

وما شوفت حالي الا نايمه , وااال ! شو انا لهدرجه بحسّش ؟؟! واصحيت الصبح , وما لكيت اي رد منه؟!! اه حتى لو عامله بلوك ع الفيس , مرات بيكدر يوصلني غ الواتس بمسج , بس ما وصلني اشي منه , ارجعت اتصلت عليه كمان مره لانو هاد بعطيه فرص اكتر من غيره بحياتي , كمان ما ردش ! حكيت اخلّع يا مير ! راحت عليكي !! سامحوني اد كتير صريحه , بس ليش اكدب هون ؟! لا بنعرف بعض لا راح اناسيب بعض , وهو المكان اللي بحكي شغلات مع حالي بس انتو شاهدين ! حكيت يالله راح الحب ؟! (كلن على درب كلن بلا قلب )هون ازعلت مش منه , من انو الشوي اللي بشوف حالي فيها رااحت , ينعن شكله حيوان جحش حمار !

واختي جابتلي عريس , كالعاده , المشكله كبرت ! حكتكلم صار عمري 30 بشهر 1 من هالسنه ؟ لاااا ! لعاد لنشوف شو نهايه الكصه مع هالعريس !

||

السلام عليكم ..~

ليل يوم الاثنين || 2\8\21 ..~

||

امبارح بالليل عندي اجاني مسج ع الواتس من حبي بيحكي " انتي منيحه " انصعقت انو رجعلي , لانو وصلت لمرحله مش راح يرجع لما كنت اتصل وهو ما يرد , ف ارجعلته بنفس اللحظه بتلفون دولي وكعدنا ساعتين , كان طافي , يمكن عشان هيك رجعلي لانو لما كان بعقله ما رد على تلفوناتي , نص كلامي معه , ايش مش فاهمه مش سامعه شو عيد اللي حكيته , ومش كادر اوكف ضحك , وبحب يحكي معي وهو طافي لانو راح يحكي عن شغلات ما بحكي عنها وهو بعقله , اكيد ابصر شو معجب حتى هيك طافي , ورجعلت حليمه لعادتها الكديمه بكل كلامه , اندمت اني حكيت معه , كان تلفوني بس اطمن عليه , ومكنتش متوقع انو الربع لسا موجود , ولما كان براسي اني انزل ع البلاد كان عقلي مستبعد حبي من اي تصرفات منه , بس بعد تلفون امبارح , ارجعت خوفت ! اه بكدرش انزل وهاد الشب لسا حاططني براسه , وهاي المره اخوي واحد مش معي يوكفه .

||

اليوم كان يوم خفيف , اصحيت ع تلفون من خواتي , امي حكتلهم انو اجو الشرطه عنا وخافوا خواتي يكون في اشي واتصلوا يسمعوا الكصه ,. وبعدها بين تنظيف وطبيخ ونفسي , بين قراءه ومشاهده ولعب , يوم الاثنين بطلعش من البيت لانو بكون في تنظيف شوارع بالحاره يعني بكونش في مكان ارجع اصف السياره , وكمان كان الجو شوب وشمس وبحبش اطلع بهيك جو , غير انو كنت سهرانه طوال الليل , فا ولا اشي شجعني ع اني اطلع من البيت ..~


||

في محل دونتس من المحلات الزاكيه بنص البلد , كل فتره بعملوا دونتس نكهات مختلفه , وكل ما يعملوا نكهات بحب اجربها , بس بضّل الشكلاطه من ازكى اشي عندهم , وليش بحب الدونتس تبعهم لانو طري كتير , امبين عجينه مرتب , بالنسبه للكهوه تبعتهم زاكيه وفيها نكهه بندق بس مرات بشوف انو بتكون محروقه وفيها نكهه الحرق , لهيك مش دايما بطلب قهوتهم !





||

كيف بتكدروا تسامحوا حالكم ؟ ع الشغلات اللي ما اوصلتوا الها ؟؟!

انا لسا بعيده عن شو ما بدي .~

السلام عليكم ..~

اخ يا ربي وين عقلي لما عملت هالتحدي مع حالي , ما الي نفس احكي وتعبانه كمان , وبحبش اكتب كلمتين مشان بس اثبات وجود ..~

نص ليل التلاتاء || 2\9\21 ..~

||

اليوم اصحيت وكنت ناويه اطلع من البيت اقضي شويت مشاوير , لهيك اصحيت بدري وجهزت حالي واطلعت , في شغلات بعملها بحياتي يمكن ما بتسوى , بس بعرفش ليش عندي بشوفها بتسوى وبتدخل بهجه عليا , كل كم يوم لانو الحمد لله فاضيه انا هلكيت ومش مربوطه في شغل , لهيك كل ما بحوّش(بجمّع) اكل زياده بالبيت عنا , في منظقه فيها بحيرات صغيره وعايش فيها بط وطيور احكي , وهي من المناطق اللي مسموح تطعم البط والطيور , لهيك كل ما اشوف الاكل اللي عندي محرز بسحب حالي وباخده ع البحيرات , وبحب اكعد هيك بعيد عن كلشي , بس اليوم ما زبط ابعد عن كلشي , الحمد لله ع الاقل اني اخدت الاكل للطيور , بس امي طوال اليوم عنا واللي هم بكون ليل عندكم وهي مش نايمه واضل تتصل عليا وتحكي معي , خواتي بكدروش يحكو معاها بكونوا مشغولين باولادها وازواجهم , واخواتي كمان بكدروش يحكو معاها , لهيك بضل بس تتصل عليا وتكعد ساعات وتعيد نفس الاسطوانه ونفسي الحكي واحلام اليقظه تبعتها , لهيك ما استمتعت بالكعده عند هالبحيرات .!

بعد ما خلصت , سحبت حالي وحكيت خليني اشتري دونتس لجارتي نيكول مشان اشكرها ع الليله اللي اجت فيها الشرطه , لانو بعرفها بتحب الدونتس , وكان في دونتس بمناسبه عيد الحب هون , بكون في 14 هاد الشهر اظن .. واشتريت النا كمان .. بالطرق حكيت مع خواتي وكمان مع امي , وروحت اتحوج شوي اغراض ناكصه للبيت , وما صدكت ارجع ع البيت , كتير صايره اكره اطلع من البيت , كل الاماكن الحلوه مسكرين , وكمان ما معي سيوله مصاري وكل ما بطلع بشتري , وفوك هاد لما ارجع ما بلاكي مكان اصف السياره الا في مالطا .!

لما ارجعت ع البيت روحت عند نيكول شوي وكعدنا نحكي , وما كترنا لانها بالدوام وكانت في بريك الغدا , كديش بحب الاواعي اللي بتلبسهم لانهم بجامات سيبورت بس حلوات ومشكلتهم كصار لهيك بكدرش اشتري متلهم ! وبعدها ارجعت ع البيت وكان صايبني احباط مشان اخوي واحد عمللنا مشكل , وكالعاده اهلي بوكفوا معه , وانو انا اللي لازم اتحمله وانو هو مسكين , واساعده كمان , دايما هيك لما اهلك يتعودا عليك انك بتتحمل لهيك الخبط ع راسك بصير زياده , مش عارفه شو عم اخبّص حكي ..~


العبت شوي وقرات شوي وشوفت شوي ورتبت شوي , طواحيني بيوجعوا وهيني !

||

صور اخدتهم اليوم :~



البط واحده من البحيرات والاكل .

||



دونتس الحب لسنه 2021 .

||



وهون احلى اشي , الشتل اللي جابوه خواتي هديه وحبيت احط المرايه بينهم لانو الجوري ريحته حلوه وبحب لما احط اشي ع وجهي اضل شامم ريحته .


||

هي مش ملاك !


||
اسمعو , جد جد سامحوني اد كل اللي بكتبه حزن ويأس وكأبه .. سواااد .. واد بأثر فيكم ,, اد حد حساس وبتحسوس .. سامحوني .. ع انو بدّس هالحزن بالحكي .. بس هاد ملجئي ..~

السلام عليكم ..~


نص ليل الاربعاء || 2\10\21 ..~

||

اليوم صبّحت متنكده من حضره المسؤوله ع البيت , جابت عالم يشوفوا الدار وكالعاده بدون علمي , وبهمني الامر لاني عايشه بالطابق الارضي وعندي غرفه بالكراج وهي حضرتها بتجي لا عالبال ولا ع الخاطر تبفتح باب الكراج وبتعبر البيت ولا كأني عايشه بالكراج , وكصه يجوا العالم طالما انهم فوك مش نازلين تحت ولا بهمني الامر , بس كأنه والله العظيم جكر بتيجي هيك عالكراج وعطول ع الحوش مشان تكشف بيتنا , لانو انا بخلّي دايما الشبابيك مفتوحه وكاشفه عشان الشمس والهوا يعبر البيت , وبفتح باب غرفتي ع الحوش , وما بشوفها الا جايه في عيونها الحسد والخبث فيهم , انا صبيه بخاف من العيون بشوفها حق وسحر , هاي المسؤوله عيونها فيهم حسد مش طبيعي , كل ما بتيجي بصير عندي مصيبه بالدار , وبصير اشي فيا او في اخوي او حتى في ساده , دايما هيك حاسدنا ع حياتنا اللي ربنا اعلم فيها , لهيك بديش اصتصبح فيها , وكصه اني مطوّل بالي لانو ازهكت من هالدنيا , لانو حتى لو قاتلت وعملت مشكل وحكيت ما بصير اللي بدي اياه , ما عليا الا الدعاء عليها , متل ما ربنا اخد المسوؤل اللي قبلها عنده , الله يبليها ويبعدها عننا ..~

||

ما عملت اشي اليوم ولا ختى لنفسي , هيك صابني نكد وضليت انفش بالاكل ..~

||

قبل شوي نظفت شنتي وحكيت اصورلكم شو فيها :~

الحمد لله الحمدلله اني ما بشتغل , ومش مشتاقه للشغل من مره ولا ببالي ولاحتى زهكانه من كعدت الدار ,بس اديا بنمنمو بدهم مصاري , بس هاد الاشي , لهيك شنتي بالايام العاديه والمشواير , دايما بحط عن شو بشنتي بالتدوينات الكديمه , وحكيت عنها هالشنته وليش اشتريتها وكل هالكصص , اظن هالاشي الوحيد الناكص هو فش كتاب ..~







||



الدزدان dooney & bourke وهاد احب دزدان بحياتي كلها , صارله زمن معي وزي مهو ومش زهكانته من مره , من لونه وملمس جلده , مع المصاري اللي كان بالشنته وكت ما اكون مستعجله وما بدي اطول الدزدان , لهيك برمي بالمصاري في الشنته , والدواير الخُضر مش راح احكي شو هم .

||



اقنعه مع المعقم وهدول اكتر اقنعه بستخدمهم لانهم بنغسلو وكمان بلبكوا ع لبسي !

||



فواتير مع ورق مهم عشان الضرايب , ودفتري بكتب فيه مهام او كصص مهمه !

||



اكل بحب يكون معي تسالي وخاصه مكسرات وفواكه مجففه , مع انو بكدرش ع طواحيني , بس بكون بدي طاقه , ومسكه وخاصه النوع للتم الجاف عشان الاقنعه بتعمل جفاف مش طبيعي لما البسها , لهيك بحب استخدم الحلو والمسكه !

||



ايلاينر اسود من اسوء الانواع , وكحل ابيض منيح مقبول , الايلانير مع الكحل الابيض هدول محطوطين بالشنته بس هيك , لاني بصراحه مكياجي المفضل لسا بشنتته السفر ولسا ما شلتهم من الشنته , ومرطب شفايف رهيب elizabeth arden , وعطر وكريم tory burch اللي صاير عطري مفضلي هلكيت , او احكي عندي 3 انواع عطر كلهم مركز واحد مع بعض , والاصفر هاد طُبع للحبوب ع الوجه ع شكل نجوم صُفر , لاني بحب الطُبع واخدت هدول حجه بحاجه مشان احطهم ع وجهي زي الصغار !

||



والمفاتيح وفيهم المداليات اللي الحمد لله لسا عايش منهم ونفسي بكمان !

||

امبين محدش راح يشوف وجهي لاني مش راح اخسر التحدي هاهاهاي ..~