مأساة روح {هالكه} في اوراق تائهه ~

السلام عليكم ..~

نص ليل الخميس || 2\11\21 ..~

||

اليوم كان يوم معجوك شوي , اصحيت بدري وكان براسي اطلع بدري مشان اخلص مشاويري ع البدري , لهيك حكيت مش بحاجه افطر وبشرب كهوه برى , اجيت بدي اجهز حالي , ما لكيتش الجينيز تبعي , عندي جينيز مفضل وصارله سنين وبحبش الا البسه بين كل الجينزات اللي عندي , اتزكرت انو بشنتي للسفر , واتنكدت اني روحت ع الغرفه اللي فيها الشناتي واحزنت عحالي , عارفين عشان شو , بسرعه طولت الجينز وتركت الغرفه بسرعه وجهزت حالي واطلعت , كالعاده جارنا الاسبنيولي الحسود دايما عالباب دايما , صبحت عليه وحكيت معه شوي , ورحت عسيارتي واتسلهت , بس بالاول بدي اشتري كهوه اشربها عشان اكدر امشي بيومي , وبعد ما اشتريت الكهوه جهزت حالي وبلشت بمشاويري .~

ولانو خلصت الكهوه العربيه اللي عندي وبعرفش اكعد بدون كهوه عربيه , وحكيت اروح اشتريتها من المحل العربي اللي ع راس الجبل , احسن ما استنى الامازون يومين ( ليوم لازم اورجيكم انواع الكهوه اللي بشربها ) هالمحل العربي من احسن المحلات العربيه ( مش عارفه شو اسمه لحد الان ) غالي زيه زيه كل المحلات العربيه , بس بكل صراحه نظيف كتير المحل , بفتح النفس , واصحابه مؤدبين ومحترمين , واحب ما عليا اعبر محلات عرب اصحابها محترمين , روحت اشتريت الكهوه ودردشت شوي معاه وطلبت منه اد بكدّر يدبّر كهوه من الضفه عنا وتكون جديده , لنشوف لاني حكيت لابنه قبل هالمره ..~

بعدها روحت نظفت السياره من جوى , في اماكن فيها فاكيوم(شفّاط)خصوصا لشفط وتنظيف السياره جنب الكازيه(محطه البنزين) وبكون قوي ومش غالي ,( 2$ لكل 3 دقايق ) لانو لما اسوك بخلّي شبابيك السياره مفتوحات والسكف وكتير بتتغبر السياره , وبعدها روحت ع البنك عشان اسد الدين بالكردت كارد وكت مصاريف السفر اللي راحوا عالفاضي , كان معي شويت كاش حاططهم ع جنب وهيني سديت الدين فيهم , حتى كان في 100$ كديمه لهيك ال ATM ما رضت تاخدها , وفكرت انها مزوره , لانو ملان مصاري مزوره , بس الحمد لله طلعت بس كديمه , وبعدها روحت اشوف اد في شتل ورد نازل بالسوك حلو بس ما لكيت , وبس اشتريت كاسه للمي عشان اضل جنب التخت , لانو بضّل عطشانه كتير ..~

ارجعت ع البيت وطبعا يوم الخميس بكون في تنظيف للشارع بس بنفس الوكت يوم الخميس بنظفوا الشارع بدري وحتى لو ارجعت الظهر بلاكي مكان جنب الدار لاصف السياره , بس اليوم لكيت بس مكاني والمشكل مكان ضيّق , هلكيت بالحاره خلص كل واحد معروف وين بصف سيارته , بالعاده لما ارجع الظهر بكون في وساع اني اكدر اصف سيارتي , ومفش سياره كدامي ولا سياره وراي اني ادحش سيارتي , بس اليوم اجيت متأخره لهيك في مكاني في سياره كدامي وسياره وراي , وانا بكل صراحه بعرفش اصف بين سيارتين من مره وخاصه ع طلوع او نزول , كنت اعرف اصف بالبلاد لانو معلمه السواقه حكتلي عن خدعه وهلكيت انا متزكر نص الخدعه لهيك ما بعرفش اصف , ولما دورت ع مكان تاني اسهل اصف السياره ما لكيت , اخ يبي من امتى الخميس فش مكان للسياره , لهيك انجبرت ارجع ع مكاني واحاول ادحش السياره , والحمد لله زبطت , استغربت من حالي بدكم الصراحه كيف زبطت من كل هالعيون , ولانو وانا اصف فيها كل الجيران كانوا واكفين بحكوا مع بعض من الحسود لللسُكرجي لتكيل الدم , اه بعرفش اسمائهم , بحكي معهم وبدردش بس بعرفش اسمائهم لهيك بفضل القاب , اخ كديش صف السياره عامل مشكل عندي لانو اد بصف بعيد عن البيت اكتر من يوم بيجني انذار ومخالفه ووبالمنطقه المخالفه 130 $ , بس عند خواتي 40$ ,شايفين الفرق !! وكل فتره وفتره بزيدوا ..~

ارجعت ع البيت اكلت واشربت كهوه , طلّعت ساده ع الحوش ,اخدت نفس من كل عجكه الصبح , وجهزت حالي لانو عليا موعد دكتور سنان , بكره مواعيد دكاتره سنان , وبتوتر طوال الوكت , دكتور الاسنان بالحاره , يعني مشي ربع ساعه , بحب اروح مشي ع سوك الحاره , عبرت ع العياده ولانو اول زياره ولانو كورونا لهيك كلشي غلبه , بين تعبي ورق وتجاوبي ع اساله , هاي العياده من العيادات الشعبيه اللي الحكومه ع شغلي الكديم راح تساعدني في مصاريف طواحيني , ومش عالاكيد كمان , في فرق شاسع بين هالعياده وبين العياده اللي خلعت طاحونتي فيها , ومع هيك اد الحكومه بتساعدني بالتكاليف ليش لأ , بس ما عجبني الممرضات ولا المكتب ولا حتى الدكتوره ,في ممرضه ايدها تكيله كتير , وفي ممرضه هبله بتعرفش راسها من اجريها , والدكتوره بتحكيش اشي بس عليها تفحص سناني وتكتب ملاحظات حتى لما اسالها ما بتحكي , تهز براسها .

فحصوا سناني وكانوا مستغربين من تحملي الوجع , لانو زي ما حكتلكم في جهه فيها طاحونه محفوره غير اللي خلعتها من شهر , وبكدرش اطب فيها , حكو بدك تتحملي كمان ووصولي ع دوا لازم اشتريه , وحكولي بدك كمان تنظيف عميق ومعروف عني كل سنه بعمله الا السنه الماضيه ما عملته, وكديش بحب هاد التنظيف العميق , لانو بكعد فتره تمي منيح والحبوب ع وجهي بتخف والوجع وهيك بحس تمي بكون خفيف , جربته مع 3 دكاتره ومحدش كان شاطر , وامبين هاي الدكتوره راح تكون اتيس واحده فيهم كمان , ف يعني حاطط ايدي ع قلبي بكل صراحه , هو مش كصه شحاد ومتشرط , كصه طوال حياتي من وانا صغيره بطارد ع دكاتره سنان ودايما بخربوا لثتي وسناني لهيك بكره دكاتره السنان وفش الي نصيب مع دكاتره مناح الا بكل صراحه اخر دكتور خلعت عنده من شهر , هاد الدكتور والممرضه اللي تحت ايده كانوا رهيبين ,حتى العياده واللي ع مكتب الاستقبال كانوا راقين وبفهموا , هلكيت نهايه الموعد اليوم هو انو عندي طاحونه في حفره وسن فيه حفره صغيره , وطواحين العقل بدهم شيل , عاساس عندي عقل , وتنظيف عميق , وحكولي لازم استنى ت نشوف اد الحكومه من شغلي الكديم راح تساعدني بالتصليحات ولا لأ , وعلي استنى شهر او 45 يوم ليرجعولهم في القبول والرفض .

بعد ما خلصت من دكتور الاسنان ميلت اشتري غدا , عشان طواحيني بوجعوا , لهيك حكيت اروح ع محل الصفر اللي هم الصين عندهم شوريه بحبها , شوربه توفو مع خضرا , كتير زاكيه وطريه , وبعدها ارجعت ع البيت ما اجى عبالي اعمل اشي , لهيك بين الاكل والشرب والمشاهده وهيني ..~




من صمصومه قلبي شكرا لكل حد بقيّم , كل واحد فيكم تقيهمه احلى من التاني , وشكرا انكم لسا صامدين معي وما يأستوا مني , وشكرا للمجهولين الزوار , وشكرا لكل حد ماشي معي بالتحدي , سامحوني بعرفش احكي حكي حلو , وسامحوني اني ما بذكركم , بدي بس اخليكم الي , بديش احرقكم او اكبّر من روسكم , وحتى لو بكون مقصّره في الشكر , اعرفوا انو وحتى انا ساكته من جواي بنبسط وبشكركم , وهاي هي طريقتي ..~
الحرق : الاكل المحروق
اكبر من روسكم : شوفت الحال
بديش اضل اقلب واحرّك فيكم في الطنجره وتنحرقوا ويبطل وجودكم بهجه الي , وبديش تشوفوا حالكم ويصير تقيماتكم بس عشان اذكركم بالمدونه مش عشاني ..~
سامحوني عالصراحه

السلام عليكم ..~

نص ليل الجمعه || 2\12\21 ..~

||

بتعرفوا كيف لما الواحد يوصل لوكت بزهك كلشي حتى المفضل عنده , انا اليوم هيك كنت , مفش اشي هيك يعدل المزاج , لا كتاب ولا مانغا ولا فلم ولا حتى لعبه , لهيك حكيت خليني انفشّ بالشغل , وعملت حمله تنظيف عميق للمطبخ بس ما خلصته كله لانو اتعبت ..~

||

راح اورجيكم فطوري في الايام اللي بكون رايكه عالاخر (وهي ايام قليله جدا ) , لانو بالايام المستعجله , بفطر ع لبن او طمر , لانو بعقلي بكون بس بدي كهوه وبكونش جعانه ..~

||













||

اللي لازم ينعرف هو bacon اللي بالصور اللي هو بصراحه بعرفش اسمه بالعربي الا انو نوع من انواع لحمه مقدده , مش خنزير , هو حبش يعني لحمه الديك الرومي , لانو هون لازم ننتبه وصعب تلاكي لحمه الديك الرومي منه لانو كل اهل امريكا بحب الخنزير وبكون كتير ارخص , هاد بالنسبه للفطور ..~

||

تعو نحكي عن الكهوه ..~











||

كالعاده كهوتي الامركانيه لازم تكون سودا , وكالعاده اغلب صباحاتي لازم اشرب كهوه ولازم احط اقنعه تحت عيوني , لانو عندي سواد وتجاعيد ولانو بنامش ولانو بضّل اعيّط , لهيك اتخيلوا كيف عيوني يكونوا كل صبح , واتخيلوا كميه الحكي اللي راح اسمعه اد حد شافني , واه , امي مرات بتتصل كميرا مشان تشوف وجهي , لانو بتصدكش لما احكيلها اني منيحه وخواتي كمان مشان كلنا عندنا وجع راس , بنكدرش انضل نكتب لبعض مسجات , لهيك بنتصل ع بعض جروب كميرا ودايما بكون الصبح , وهدول هم بحاول كد ما اكدر اكون كدامهم سعيده ..~

||

اما بالنسبه لهاي الاقنعه , هي الاقنعه اللي مش كتير محرزه , يعني بتعمل تعديل خفيف مؤقت ع التعب والنفخه تحت العيون , وهي للايام العاديه , في اقنعه مهمه ما بحطها الا بالايام المهمه , زي متلا بدي اروح اعمل اغراء لحد ..~

||

بس في ايام بشرب مع كريمر اللي هو بحكو عنه half and half الازكى heavy whipping cream , لانو الكل حكى زاكي وجربته وكان منيح بس هاي الكاسه ما بتعدل مزاجي من مره لازم اشرب كمان واحده وخاصه الصبح , الاشي الحلو اللي عنجد بحبه , مرات اخوي تلات قبل ما يطلع ع الشغل بحسب حسابي بالكهوه , لما يعمل لحاله بزيد كاسه عشان بس اصحى اشربها وبتكون خارطه وعطول بتمخمخ عليها ..~

السلام عليكم ..~

ليل السبت || 2\13\21 ..~

اليوم جد غصبت حالي اجي ع المدونه عشان ما اخسر التحدي , وبديش اخسر مش عشان الخسران , الخسران اشي متعوده عليه وعالاكيد انا الاولى باني ما اكونش الاولى بأي اشي او فايزه بأي اشي والوجه متعود ع اللطيم (الكفوف) ..بس بديش احط صوره وجهي واضح , شو بعرفني عن حالي كتبت اشي وانا مش بعقلي وما راجعته حتى امسحه , هاي مشكلتي بالمدونه انو بضل اكتب بنص الليل وبعرفش شو كتبت وبثق بحالي اني ما ارجع للكتبته ..~

ليش بديش اجي ع المدونه , لانو صار اشي كبيره معي مش منيح والدنيا بدها تاخد حتى الحوش بدها تاخده مني , منفسي الوحيد الي ولساده بدها تاخده وتخليني اشاركه وحد يتحكم فيه , طب ليش ؟! وكلب يجي يكعد فيه كمان ؟! ليش؟! ليش النجاسه ليش ؟! صبّحت من الكهر مريضه وصايباني حمى وكل جسمي تعبان , كأنوا حد يحملني ويخبطني بالحيط طوال الليل..~
جسمي معبى لزكات من كل خبطات الايام والسنين عليا وبتيجي زي هيك خبطه اخت شلن بتعمل حادث بتقلبني فوك تحت وبتخلع كل اللزكات معاها لتخليني احس تربل بلس اكسترا ماكس وجع , لتخليني احزن عحالي وعمري وحياتي , لتخليني اتوجع كمان مره عن كل خبطه اخدتها بحياتي , لتزكرني انو ولا اشي بزبط معك ولا اشي بيسعدك ختى لو مشيتي الحيط الحيط , لانو الحيط مش مايل يا مير مش مايل , الحيط مهدود ومكسّر ع راسك وعمرك وحياتك ولا بحياتك تفكري انو خبطه بتيجي وفيها وراها ورد راح يعوضك , بالعكس مصارش الي اسبوعين مخبط حادث اخو شلن بكصه السفر , وبتيجي هاي الخبط تبعت الحوش , بس حسبي الله ونعم الوكيل بس فيك يا كاشف ,. الله يجعلك تتلكها عن كريب باللي عملته , بتخافش الله ..~

لا حول ولا قوه الا بالله العلي العظيم , نستنى الخير .

||

ايش اليوم مجريات صارت ؟ اصحيت مريضه , (صاير جسمي حساس مع العمر ومكدرش اتحمل كهر ) ع اصوات المسؤوله عن البيت مع اللي جاين معاها من الصبح وانكلعوا , (لهيك ما اكدرتش اول ما اصحى اطلع ع الحوش اشم هوا واشوف السما واطلع ساده ) و اكلت لبن واشربت دوا ايببروفين لانو مش كادره اتنفس , عندي سخونه وبرد بنفس الوكت بعرفش كيف اوصفه؟! بس جسمي بكون تلج ووجهي نار , اشربت دوا كحه وحطيت التدفئه ع درجه عاليه مشان اعمل الصاله زي الفرن, وجهزت كهوه ومي ورحت رميت حالي ع الكتبه بالصاله وحطيت اشوف فيديوهات ع اليوتيوب اللي بشوفها للمره الالف كل ما بدي اضحك عن ناس بجربوا توووت (شغلات مش لازم احكيها) .. ضليت ع الكنبه لوكت ما مشى مفعول الدوا والكهوه , كانت امي تتصل مكنتش ارد , بعد بساعه حكو معي خواتي ومش راح يجيو عندي اليوم لانو ع واحد من اولاد الكبيره عليه موعد دكتور , ضليت للظهر ع الكنبه , واجاني تلفون من اختي الكبيره بدها اروح معاها ع الدكتور مشان ابنها , حكتلي بتطلعي بتشمي هوا , مكدرتش احكي لأ , خوفت احكي لأ ويصير حكي من وراي انو مالي اشي , وهو مالي اشي , بس بدي اضل اكون سعيده كدامهم ..~

جهزت حالي واليوم من الايام اللي حطيت مكياج وزياده عن اللزوم , لانو بدي اخبي كل التعب عن وجهي , بعد ما خلصت اطلعت ع وجهي بالمرايا وفطست ضحك , زمان منا هيك حاطط مكياج , اخر مره عملت هيك بالهاللوين , بعرفش مالي بخصوص المكياج صايره احاول اكون طبيعيه لانو صرنا بزمن فش اشي مميز من المكياج وخاصه بامريكا , صار نيالك اد كنتي طبيعيه ونيالها اللي عندها القوه تعمل هيك , هيني اليوم اضعفت ومكدرتش اطلع بدونه , وارجعت اعمل كهوه وضليت استنى في اختي الكبيره لوكت ما اجت اخدتني , راحوا ع موعد الدكتور وممنوع حد يروح معه لهيك ضليت بالسياره بالشمس اللي عنجد من الايام اللي حبيت الشمس فيها لانو اعطتني طاقه حلوه , بعدها اتغدينا ولفينا بالاسواق شوي واشربنها كهوه ورجعتني ع البيت ع 4 العصر , بس اوصلت ع الدار تعبانه , اكلت لكمتين بس عشان بدي اشرب دوا ورميت عحالي ع التخت وهيني ..~

||



||

راح تاخدني مع كل الشوائب ؟
بس بدي "السعاده"
مشتاق لحالك ؟
كون شخص جيد
في شغلات بتنحكاش
ليش بكدرش اكون متلهم؟
احنا زي ابطال فلم
تثقش باهل النت
وين بتروح اد النوم ما بيشفيك ؟
غلطانين , مرات بخليه يحطّمني مشان يفكّر اني بحبه !
سامحني .. اجيت وحطمت حياتك .

السلام عليكم ..~

ليل الاحد , 2\14\2021 ..~

||

الايام اللي بتكون انشغال طواله مع خواتي واولادهم , لهيك بكون يوم معنديش الوكت امسك الهم لحالي واكعد , بيجيو خواتي مع اولادهم وبنكعد بيم الطبيخ والحكي والاكل واللعب للعصر ولبعد العصر بشوي , وبعدها هم بيتساهلوا , وانا بلتهي بترتيب البيت , الحمد لله اليوم ما اتكالت مع اي واحده , يمكن لانو كنت العب مع الصغار , ويمكن لانو كنت اكوم لما تنفتح كصص كبيره , لانو بديش اتكاتل وبديش امشي مع الكصص لهيك بهرب , وبحب هيك ايام لانو بتخليني التهي عن حالي , ولانو بترويحتهم ما بتيزد الهم عليا لما اكون منكاتله معاهم ..~

||

فقره اليوم من اكتر الفقرات اللي الكل بكرها ومحدش بيحبها , بس هون بحكي عنها عشاني بالمستقبل اشوف اد لسا ع نفس الراي ولا اتغير الاشي معي اد فكرت اعاود اشتريه !


ايش خلصت :~



kylie skin foaming face wash 25$

غسول وجه رغوه

بتعرفوا كيف لما تصير ضجه ع شغلات نازله , لهيك جربته ومش انا اللي اشتريته , اجاني , ولما اجيت اجربّه اول ما حطيت شوي منه ع ايدي , هيك اجاني الهاجس انو ما احطّه ع وجهي , لهيك جربته ع جسمي بالاول , ويا حبيبي يا حلاوه , كنت اعمله غسول جسم , وكان يعمل احمرار لجسمي ويطلع حبوب كتير , من اول استعمال , حكيت بلكي مش منه , اعطيته 3 محاولات , وكل مره يعمل حبوب , بالاخر بعيد عن قدركم عملته غسول اقدام , لانو جسمي ما استحمله ..~

نصيحه وكل واحد بشرته غير عن الكل , ما بنصح حد يشتريه !

||




terre mere toner 30$

تونر تقشير للوجه

هالشركه من الشركات الغاليه جدا بس اللي بتحسسك انك غنيه وانت تسخدمي كريماتها , هاد التونر من الانواع اللي كتير حبيتها , كان يصفّي وجهي ويبيّضه خلال ايام اد دوامت عليه , دخل في تصنيف تونر مفضل .

كيف طريقه استخدامي للتونر , كل واحد وحسب تصنيفه , لانو في منهم ترطيب ومنهم تقشير , نوع التقشير زي هاد , كنت استخدمه بالعاده الصبح , بدال ما اغسل وجهي , احط شوي منه بالصحن الزهري , واحط حبه من اقنعه ناشفه مكبوسه , بعرفش بالزبط كيف بتنحكي بالعربي , compress face mask , وعطول الحبه بتشرب التونر وبصير قناع تحطيه ع وجهك , وبحطه ع وجهي وانا لسا بالتخت بخليه عشر دكايك وبعدها لما اكوم من التخت بشل القناع ومش بحاجه اغسل وجهي , ومع الاستمرار كتير كنت اشوف نتيجه حلوه , وما كان يعمل اي احمرار ولا حبوب

||



Nassif MD Cleansing Detox Pads 15$

من الشغلات اللي اشتريتها قبل هالمره وكل ما اروح ع كاسكو بشتريه كمان لانو بكون ارخص بكتير من المحلات التانيه , ومن الانواع اللي جد جد ساعدتني بالحبوب والنظاره والتبيض والصفاء لوجهي بس ريحته مزعجه عندي ..~


||




goat milk moisturizer kate somerville 40$

مرطب وجه

هالشركه كل شي جربته منها بعشقه , بس مكنتش متوقع انو هيك كريم احبه لهدرجه , وكان من اسرع الكريمات اللي خلصتها بحياتي , وكنت استكفي فيه من كتر ما احب مفعوله من ترطيب , ومن ملمس وحتى فش ريحه , كان عنجد رهيب , ما كان يعمل اي احمرار من مره من مره ولا حبوب ولا يزعني بريحته لانو فش ريحه , رهيب جدا اد معك شويت مصاري اشتريه ..~


||

خلّص تحميل اللعبه , رايحه العب بلستيشن , بعدين برجع احكي عن الباكي ..~

السلام عليكم ..~

ليل الاثنين || 2\15\2021 ..~

||

راح اكمل عن الشغلات الفاضيه , بالعاده لما العب بلستيشن بنسى حالي وبياخدني الوكت ع المزبوط , وما بطفيها الا لما ابطّل اشوف والدنيا تلف فيا "لفي بينا يا دُنيا دوخينا يا دُنيا " , مع انه هالالعاب مش واو بس يالله اهرب من التفكير !

||



Murad Acne Clarifying Mask 40$

بعرف سعره نار , مع انه قناع رمل رهيب للحبوب , بس عسعره ما اظنش اشتريه كمان مره , بس رهيب جدا بأنو من اول استعمال بنشّف مكان الحبوب , وشوي منه بعبّي كل الوجه وبسرعه بنشف من ع الوجه , بس مش يعني ما راح يطلع حبوب , وما كان يحسسني انو غالي , بمعنى مرات لما تشتري كريمات غاليه بكون مفعولها رهيب متله , بس من ريحه وملمس ما بشوف حالي غنيه ..~ بس هالشركه اي اشي لونه ازرق رهيب لانو جربت كريم وجه وكان جدا رهيب للحبوب كمان ..~

||



Use Me Hair 6 in 1 Daily Vitamist 20$

كريم للشعر رهيب جدا , بخفف من نشفان وجفاف الشعر , ريحته رهيبه , شوي منه بكفي , وبحمي من الحراره وبساعد ع تخفيف الشعر المهنفّش , كان من الشغلات الحلوه اللي استخدمتها لشعري من نتيجه واحساس , كنت استخدمه من نص شعري للجذور , وكنت استخدمه ع شعري المبلول , لما كنت استخدمه ع شعري الناشف كنت اشوف شعري يلبّط وما اكدر امشّطه تاني يوم ..~


||




Mon Shampoing - Nourishing Mask

قناع للشعر 30$

بالعاده كنت اتركه ع شعري زي البلسم لمده خمس او عشر دكايك , وكان جدا رهيب من ريحه وكميه ومفعول , كان يغذي شعري ويكثّفه ويرطبه ويخلي ملمسه ناعم وحتى لما كنت اسحب شعري يخلي شعري يملع , من اقنعه الشعر الحلوه اللي جربتها وما اشتريته الا لما كان ع التخفظيات ..~

||

The Mayan Factor
Beauty and the Beast


||

السلام عليكم ..~

ليل التلاتاء || 2\16\2021 ..~

||

يوم هادي جدا الحمد لله , ما اتعاملت مع حد ولا شوفت حد , بس اطلعت اجيب دوا لطواحيني وارجعت ع البيت , اغلب الوكت ع البلستيشن ومن شوي طفيتها وحكيت اجي احكي معكم

||

هالاسبوعين هدول كنت اشوف كل ليله فلم رعب , منها سيء ومنها منيح ومنها حلو , راح احكي عن الحلو :~ كل واحد وذوقه وشخصيته ..~
زمان كنت احكي عن الافلام بقسم الافلام , بس كلهم تركوا وهجروه ومنهم انا , بس ما هجرتش المشاهده وخاصه الرعب ..~




May the Devil Take You 2018 , اندونيسيا

بيحكي الفلم عن شخص بده يصير غني لهيك بتعامل مع مشعوذه وشو اجارها مشان تخليه غني ؟!







الثروه سعرها ارواح

||||..~



Tigers Are Not Afraid 2017 || المكسيك

الفلم اعمق من انو بس فلم رعب , بيحكي عن العيشه بالمكسيك وانو ملان ناس بموتوا وما بنعرفوا وينهم (اشباح), والاولاد اللي بضلوا بدون اهل وشو بصيروا (عصابه), ليتلقوا ويمشوا في طريق الانتقام مع طفله معاها 3 امنيات بمساعده الاشباح ..~






||



Mandy 2018 , الولايات المتحده

بحكي الفلم عن نيكلوس اللي طائفه بتخطف مرته , وهو بنتقم الها , كصه محروكه عاديه , بس اللي مش عادي الاخراج للفلم كان رهيب جدا , الالوان والتمثيل والشخصيات والمبادئ والجنون , رهيب جدا عندي ..~






ملان صور رهيبه بالفلم صعب اختار ..~

السلام عليكم ..~


ليل الاربعا || 2\17\2021 ..~

||

كالعاده بصحى ع بلفوني برن وبكون يا امي يا خواتي , هالمره كانت امي , وكل مره بتصحيني بتحكي " شو كوّمتك من النوم؟ الحك عليا! " وانا بحكيلها " لأ يما صاحيه من زمان بس بالتخت " وبنبلش بالحكي , وبتزعل لما تشوف معنديش حكي , طيب يما منا كنت نايمه وحكيت معك قبل ما انام , يعني في حكي بصير بالاحلام وانا معيش خبر ! عندهم تلج ويا رب ما يثبت , عنا الثلج مشكله مش فرحه , لانو بكسّر الشجر والبيوت وبخرّب السيارات وبسكر الطُرق ..~
بكوم وبجهز حالي وبفطر وبشرب كهوه وبطلع ساده ع الحوش , برتب البيت وبجهز للطبيخ , روتين هادي , كالعاده المسوؤله ع البيت في ايميلاتها اللي يا رب تاخد شرها وشر كااشف عننا , بضل تجنني وهي كل شوي باعته ايميلات ع شغلات فضايه والله فاضيه , فش مجال بدها اضل تجنن فيا مشان تخلينا نطلع من البيت , بس هي تريد والله يفعل ما يريد , بس بدها يا مير شويت صبر مع ادعيه وتحسّب واستغفار , ويا رب يا رب عن كريب يا رب تاخده شرها يا رب وتلهيها بحالها وتبعدها عننا يا رب , وغير المحاميه للورق لخطيبه اخوي , عشان فتحوا بخصوص معاملات السياحه لهيك بضّل اسال المحاميه ومجننتها , وبعدين تلفونات لمواعيد لاخوي عشان صحته , خلصت كل هالكصص , الحمد لله عخير ..~

واجيت اكعد , بتتصل اختي الكبيره وبتحكي بعد ساعه راح تيجي تاخدني نطلع مشوار , مشوار رايحين مشوار , حكت اجهز حالي واستناها , حكيت بعقلي مش بحاجه اجهز حالي بطلع بالبجامه اللي عليا , حكيت اعمل كهوه واشرب لوكت ما تيجي , الا هي رجعت بتلفون العجل بنشّر معها بالطريق والتغى المشوار , فش زعل ع المشوار , الزعل ع العجل اللي نفّس والله ستر , وراح اخوي تلات يساعدها فيه , لانو جوزها عنده الشغل اهم , بخيل وكاعد !

لهيك حكيت العب بلستيشن باللعبه الممله الزنخه وهيني ..~ هاي الايام احب ايام عليا بكل صراحه بيني وبينكم , لا احكي مع حد ولا اشوف حد .. بحس هاي الايام بتعطيني طاقه للايام المعجوكه الجايه ..~

واللي صار كمان اختي الوسطى حكت عن العريس بده ياخد موعد مشان يجي يشوفني , لنشوف شو جاي , اه شو جاي , لانو بكل صريح العباره كل اللي بتجيبهم يا انا ما بعجبهم يا هم ما بعجبوني ,ودايما بنتقاتل انا وخواتي دايما , لانهم بزودها بالحكي معاي والزفاره , وانا صايره حساسه دلوعه وما اتحمل واتعقدت كمان , لهيك صارت كصه عرسان دايما كصه حساسه وهي بدايه نووي بصير بعدها ..~(اد اجى بخبركم شو بصير)

واللي صار كمان انها كبل شوي عملتلنا كصه اخت شلن , الاسبوع الماضي لما اجو عندي فتحو سيره حبي وحكتلهم عن مشكل هو فيه مشان يسكروا ع الموضوع عنه, لانو كل ما يشوفني بضلوا يحكيو شو بحط ع الفيس وكل هالكصص , وما حكتلهم اني حكيت معه بعدها , وانا حكيت معه بتتزكروا حكتلكم اضعفت وحكيت ومن بعدها ما حكيت ولا بدي احكي معه لانو اعرفت شغله كبيره صايره وربنا عارف اني مش السبب , بس الكل , الكل حتى اهلي راح يحكو اني السبب بهاي المشكله الكبيره اللي صايره معاه , اد هو حكالي اد هم ماسكينه من ايده اللي بتوجع مش سائل , اه انا ايده اللي بتوجع ومش سائل عني ولا عنهم , تخرب تعمر بطّل هامه , المهم حضرتها راحت اليوم فتحت الكصه لامي , وكان ابوي جنبها وهات عاد , هااات عاد , هاي مشكله صايره عندي , مرات بحكي وبنسى انو خواتي بطلوا يحفظوا سر , ومش بزعل ع السر , بزعل عحالي انو طلع مني السر وهو بطلعش مني اسرار , بعدين فكرت فيها مع حالي انو لازم حضرتها تخترع كدبه لتغطي ع السر , وهي تحكي مع امي وابوي تلفون كانت بنفس الوكت عم تبعت مسجات وشو تعمل ومعهاش خبر انو ما حكيت لامي عن سره , حكت الكدبه لامي ولابوي وصدقوها وبعد ما خلصت التلفون مع اهلي بتتصل عليا وبتحكي مفش حكي تحكيه مع امي لهيك فتحت كصته , من عقلها ؟! مش عارفه شو تفتح كصص مع امي جابت كصه كبيره عن حبي ! وابوي كاعد كمان !! حكتلها ما تفتحي كصصه كدام اهلي , بتعرفي كيف الاهل الحكي بسرعه بطلع وكل واحد بحكي لاخوه ولاخته وليش ؟! ليش يطلع الحكي مننا ليش ؟! كنت ماسك حالي بالحكي معاها مشان ما اتقاتل , والحمد لله ما اتقتلنا وحكت خلص مش راح تفتح سيرته مره تانيه كدامهم , طبعا انا ما بصدّقها لاختي هاي , بمعنى بتعرفش تتعامل بالمواقف , وهي من النوع تبع الحكي فقط , مش تبعت وعود ولا تبعت استخدام عقل , بتعرفوا هدول الناس اللي بضلوا يحكو عن حالهم انهم طيبين , هي مش طيبه هي هبله والناس بتضحك ع اشكالها لهيك دايما بتجيبلنا وجع راس لانو بتصدك الناس وهات عاد معي اللي بصدكش حد , خلص داخليا بين بعض جوانا حزازات عشان اولاد الحرام اللي بتجيبهم واللي بضحكو عليها واللي تبصدقهم وما بتصدقني ..~

ارجعت بتلفون لاهلي عشان اشوف شو صار واد صدقوا الكدبه , وابوي اللي ردع التفون واول ما حكى "اسمعي الكلام يا مريم , خليني احكي واسمعيني ! ما تقاطعيني " وكان ابوي معصب وصوته عالي , يا حبيبي عحالي كله من هبلتها حطتني بهيك موقف , والحمدلله اتفكنا وصافي يا لبن بيني وبين اهلي , بكدرش احكي عن سره ومشكلته والكدبه اللي عملناها مشان نغطي ع السر , المهم انو اهلي صدقوا الكدبه والمهم انو ولا كأنه صار اشي وما راح يحكو لحد واتسكرت ع الكصه ..~


||

ايش اليوم صوّرت ؟~



فطور اليوم بيض , لبن نكهه بسكوت اوريو


||



كهوتي مع قناع عيون اليوم


||



مش كادر اتخيّل انو كمان شوي مش راح اكدر افتح غرفتي هيك واشوف هيك منظر , حسبي الله ونعم الوكيل

||



السما كانت حلوه

||




ع العشا اجو بنات اختي الكبيره بالسياره نزلوا حلو وراحو , عاملين هاد الحلو فرواله مغطّيه بشكلاطه وبعرفوا كديش بحبه , لهيك جابولي اياه , وكديش انبسطت عليه , هيك شغلات بسيطه بتبسطني كتير وبشوفها كد الدنيا ..~

(مصنوع بحب زياده إلك يا حبيبتي ) شرين
حبيبتي هي الكلمه العربيه اللي بعرفوها بس , وبعرفوا كديش بكرهها كمان هههه

||

وهاد كان شو مجريات يومي , معكن خبر انو لسا احنا في 17 الشهر , ضايل 12 يوم للتحدي , الله يقويني , بس ما تخافوا احتياط احتياط مجهز صوره وجهي مش واضح هههههه مش غش هاد ! ضلوا احلموا اني اخسر ..~

السلام عليكم ..~

ليل الخميس

يوم سيء جدا عليا , منيح ما عملت حادث بالسياره وربنا ستر , اتكاتلت مع خواتي , واتكاتلت مع المسووله عن البيت وانا ضايعه هلكيت ..~

عم اهلوّس وبشوف شغلات مشتاقه الها !

شوفت اصحابي مغرومين وعندهم اولاد , حسيت بالفراغ والوحده ..~

سامحوني مش كادر اكمّل , بضل احكي واحكي في الغاز واحجيات !

السلام عليكم

ليل الجمعه || 2\19\2021 ..~

||

بدكم الحك , مشاركه امبارح مش عاجباني , لهيك قررت اعترف اني خسرت بالتحدي وكعدت ادور ع الصوره اللي بدي احطها انعمى ضوي وانا ادور عليها ولما لكيتها , فكرت وحكيت خليني ارجع اقرأ شو كاتب عن التحدي "اسمعو راح اعمل تحدي مع حالي , اضل لاخر يوم بشهر 2 وانا باجي ع المدونه وبكتب كل يوم كل يوم " وكان التحدي انو اجي كل يوم واكتب عن يومي , مش مهم كصص طويله او مختصر , المهم اجي واكتب وما اقطعها ولا يوم طوال شهر 2 , لهيك ما اخسرت بالتحدي صح ولا بعمل حجج ؟؟ اتوترت لما اجت الكصه ع الصوره ولا اجيت جد بدي احطها , بس عالاغلب اني لسا ما اخسرت , مش حلو اخسر هلكيت , ومش حلو اخسر من اصله , بدي افوز باشي ..~

امبارح طبعا ما نمتش الا ساعتين , من الكهر والمرض , وصبحت مريضه وتعبانه كالعاده مع كل مشكل بصير بحياتي ,عملت تلفون مهم مشان اشوف اد في حل مع المسؤوله عن البيت مشان تبطّل تجنني وما لكيت , اه الدنيا عليا هالمره , وهالمره كمان دعاوي مش زابطه , كأنوا لما تحكي الاشي اللي بصير ببطل يصير ويزبط , يا رب عن كريب يزبط ع هداه بالي يا رب ..~

اكلت لبن غصب عني مشان اخد دوا وكهوه , وكنت مش كادر اتحرك , بعتت مسج لصاحبتي فد "صاحيه " عطول اتصلت عليا كميرا وكعدنا ساعات نحكي ونحكي , ومع هيك ما اوصلت للي بدي اياه مشان اخفف الهم ع حالي ..~

اليوم الجمعه , كديش اتكاسلت اعمل روتينه , كديش كنت امشي زي الزومبي انو مالي هيك صايره ضعيفه , اد فد حتى حكتلي من امتى انا صايره هيك ؟ الله عاود هداني وعملت روتين الجمعه الحمد لله ويارب اثبتني ع ديني يا رب ..~

وبعدها فتحت البلستيشن وكعدت العب عليها وضليت معلّك بالمرحله , متت كتير وكتير , وكل ما ازعل ارمي ايد البلستيشن واطفيها , الف شوي بالدار وتيجيني سوسوه التفكير , لهيك ارجع افتح البلستيشن والعب وكل ما اموت كتير , ازعل واحرد واطفيها , اليوم عقلي من مره مش معي , ضليت اموت لقبل شوي واخيرا اطلعت من هالمرحله , وعبرت بمرحله تانيه اصعب من اللي قبلها , حكيت هو انا ناكص حرق دم .~.

ومش عارف شو اشوف من افلام ومسلسلات مشان اغيّر الجو , وطبعا لما ما اعرف بروح بشوف في مسلسل الندم , الكاتب عامل احلى مسلسلات عندي , عامل الانتظار , الندم , فوضى , السراب , زمن العار , وايش كمان يا مير ؟! بس هدول اكتر مسلسلات بتزكرهم واشي عن المدينه كمان , لازم مره اروح اشوف مسلسلاته الكديمه , اسم الكاتب حسن سامي يوسف , وحطو ببالكم كل مسلسلاته نهاياتها مش سعيده ابدا , نهاياتها واقعنا , واقع ..او مفتوحه ..~

ما تهرب وغوص بالعاصفه , احرق كلشي ..~

السلام عليكم ..~

ليل السبت || 2\20\2021 ..~

||

يوم معجوك مع خواتي واولادهم , وهاكل هم يوم الاثنين عشان المسوؤله عن البيت , نفسيتي اصلح اليوم الحمد لله , يمكن لانو ما وصلني اشي يسم البدن من المسؤوله , ولا حتى اتكاتلت مع خواتي , بس في رمي حكي منهم , بس اليوم كنت اجاوبهم بعقلي مشان ما اتكاتل معاهم , ما طلعت اشي من تمي ..~

||

ايش عم اشوف بالوكت هاد ؟! كل واحد وذوقه ..~

مسلسلات عربيه :~
حادث قلب || أنا || غفوة القلوب ...~
لحد الان ولا واحد فيهم حلو , لهيك وانا اشوف فيهم بكون احوس بالبيت , يعني يا اطبخ يا انظف البيت او ع البلفون بحكي والمسلسلات شغّاله , ما بعطيها كل تركيزي ..~

مسلسلات اجنبيه :~
لسا معلّك في ..
Breaking Bad اخر حلقات الموسم الثالث , لانو المسلسل بشدّني كتير وبوترني , لهيك انا بوكت ما عندي الطاقه لاركز بالحلقات وبديش اظلم المسلسل معي , وبديش اتوتر لانو بوكت متوتره خُلقه .

Entourage الموسم التاني , ضاع التورنت , امبين ماسحه من اللاب توب ومعيش خبر , ولما دورت اشوفه اون لاين حلقات مش شغّاله , مش ناكصني حرق دم .

Fargo الموسم التالت , بالعاده بشوفه عطول كل ما ينزل موسم , بس هالمره نزل الموسم التالت وانا مش بمزاج اشوفه والسبب مني , معنديش البال اللي اكدر اركّز بالحلقات .

||

أنمي :~
كمان لسا معلّك في اعاده ..
Initial D الموسم الرابع , لانو كتير بحب هالانمي وكتير بركز فيه , وبديش اخرّبه في مزاجي .

ومعلّك في ..
Gintama الموسم التالت , كمان عشان مزاجي , لانو بضّحكني وصرت ما اضحك لانو ما اركز بالحلقات .

بس لسا متابع لكونان مع كل حلقه بتنزل كل اسبوع .

||

كوري :~
بشوف في Something in the Rain 2018 لسا في الحلقات الاولى , بحب الميلودراما , لانو بكون حزين , كل اسبوع او اسبوعين بشوف دراما كوريا صنف ميلودراما , لانو بتخليني اروك وما افكر ولا اركز ولا اتعب , بس هيك اشي بمشي بدون ما يزعج , ولازم تكون منتهيه البث .

بشوف في The Penthouse 2020 الموسم التاني , هاي الدراما اللي جد جد بحب استني كل اسبوع مشان تنزل الحلقات , الموسم الاول كان حلو بالنسبه الي وكانت الحلقات تحمسني استناها وامبارح نزل الموسم التاني وبدايه موفقه .

بشوف في برنامج 1 Night 2 Days الموسم الرابع اللي كمان بحب استنى كل اسبوع مشان اشوف الحلقات , ولا مره شوفت المواسم الاولى للبرنامج ولا امفكره حتى , بس بلشت بالموسم الرابع معاهم لانو بحب كل الشخصيات ال 6 اللي بالبرنامج , والمنتيجه او المخرجه لانها نذله .

||

بالنسبه للقراه :~
بلشت في الجزء الرابع من كارامازوف ومشيت فيه , اظن راح اكعد سنه واشي ت اخلّص هاد الجزء , ومن جواي حزينه انو بلشت بالجزء الرابع , يعني كربت اخلص الروايه لااااا

بالنسبه للمانغا , سامحوني , المانغا اللي بشوفهم منها غلط ومنها رعب غلط , بكدرش احكيها

||

بالنسبه للبلستيشن بلعب ع :~
watch dogs 2 , ومش عاجبتني , حبيت العبها لانو تصوير سانفراسيسيكوا , وانا مش النوع اللي بحب هيك تصنيف العاب , بس لسا بلعبها , اكيد دافع حكها مصاري مش مضيعهم عالفاضي

hellblade senuas sacrifice , بحب العاب البطله تكون بنت , بس مش عارف بخصوص هاللعبه , العبت عليها ساعتينن بكدرش احكم لسا , بس بنفس الوكت ما شدتني .

واللاب توب :~
لسا بلعب ع sims 4 , ولا عمري بزكها هاللعبه من عمري 13 لما كنت العب sims 3

alice madness returns , هاللعبه كانت حلمي , اكبرت وانسيتها ولما اتزكرتها اشتريتها وبلعبها , بس دايما في شويت غلبّه لما اشبك ايد البلستيشن ع اللاب توب لهيك بكسّل وخاصه لما اكون العب ع البلستيشن ..~

||


هدول الشغلات اللي بعملها وكت فراغي وبتحسّن من نفسيتي , وبتمنى اد الله بده يبعت شريك حياه يكون يحب هالكصص وخاصه لعب البلستيشن والسينما ..~

||

بلطي
يا حسره