قد تكون الهداية في توالي الصدمات .. ( مسابقة قصة هداية )

الَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ




ما قبل الهداية



.. من طفولتي كانت عندي قاعدة

الا صلاتي ما اتركها

من عمري 13 سنة ما تركت فرض .. الله العالم كيف صلاتي بس اهم شي اني اصلي

ما اقول لكم اني كنت خاشع بس كنت اصلي كل فرض بوقته

كبرت وكان كل همي وقاعدتي في الحياة ..

استمتع بيومك

طبعا المستقبل هذاا شي ع الهامش لا اهمية له عندي ابدا

تركت الدراسة وانا في عمر الـ 19

دائما كنت اسمي المستقبل مستقلب .. يعني مقلب الكل ماخذه فيه

ولا فكرت اكمل ع الرغم ان امي كانت كل امالهاا علي لاني على قولتهم كنت صافي

من اول ما تركت الدراسة تفرغتلتوافه الامور

كنت ادخن ولهناا هذا ما يعرفه اهلي عني

كنت دايم بالمشاكل مع اهلي ..

كلهم يحاولون فيني اتغير بس مافي فايدة

لاني انا ما ابي اتغير

مرت خمس سنوات ع التدخين

لين جا ذاك اليوم اللي كنت سهران مع الشباب .. ورجعت البيت كانت امي تنتظرني

صار بيننا جدال كالعادة بس كان ها الجدال نهايته مختلفة

طردتني امي من البيت ..!!



اول مره تطردني والسبب كنت عاصي ما اسمع كلامها

ذاك اليوم رجعت للشباب ولا قلت لهم شي

لكن سهرتهم كانت مختلفه عن اللي كنت اظنه

كانت في سيجارة مختلفة يتناقلوها بينهم

قلت عطوني بجرب ..

نصحوني لااا ياخي هذي مو لك

من النكد اللي فيني قلت الا لي جيبوها بس بجرب

وفعلاا مسكتهاا وجربت بدووون اي رادع .. تغيب ضميري هذه اللحظة

قالوا لي بس يكفي لا تكمل

سحبت منها سم ارربع مرات

والله يا جماعه حسيت بشي غريب

شي مؤلم .. حلقي جف ودموعي كانت بتنزل احس فيها حرارة خمول بجسمي

الشي المؤلم مو هذا

اللي زاد الالم حسيت بشي يسحبني للظلاام حسيت بخوف حسيت اني غلط

حسيت ان الطريق اللي بديته نهايته مو سهلة



وكانت هذي بدايتي مع الحشيش

صدمات .. لم توقظني



الصدمة الاولى ..



استمريت ع الحشيش فترة لا بأس بها

وطبعا لا ادرس ولا اشتغل ففلوس القطة .. هذي جريمة تنظم لجرائمي

كنا انا وعيال الحارة نجمع مبلغ الحشيش حق يوم واحد

وكانت سهرتي معاهم دايم بعد صلاة العشاء عشان لا تروح علي الصلاة

هذا من غير انها يوم واحد في الاسبوع

وبيوم جمعتنا قال واحد من عيال الحارة : روح امي تبيك في خدمة

قلت تم وسمعت امه تناديني تبيني اجيب لها غرض من البقالة

اخذت فلوسها ورحت

رجعت للشباب

وكانتالصدمة

دخلت الغرفة ووالله العظيم وانا محشش ودايخ من اللي تسممت فيه

الا ان ها المنظر زي الكف اللي اخذته

ما ابي اقول الوضع كيف كان ولكن اكتفي بانها جريمة يهتز لها عرش الرحمن



وانا واقف وبكامل قوتي طحت ع الارض من الصدمة

رجعت يومها البيت وحبيت اختلي مع نفسي

خوووف وضياع ..الم وربي الم كبير بقلبي

جلست بسطح بيتنا لحالي لين اذن الفجر

وكالعادة اشوف امي تنتظرني








الصدمة الثانية



بعد الصدمة الاولى توظفت واعتزلت الشباب فصارت مصائبي لحالي

فبراتبي اقدر اوفر لي الحشيش اللي يكفيني شهر

مرت الايام على ها الحال

وبيوم جاني الم بكليتي اشتد الالم رحت المستشفى وانا شوي وابكي

المهم ايامها ما كانت معنا جوالات

وامي شوي وتنجن علي

من مستشفى لمستشفى تدور وراي

راحوا هي واخوي اللي اصغر مني 3 مستشفيات لين وصلولنا

واول ما وصلت كنت انا اخذ مغذيات

اسمعها تبكي وتدعي ياارب فيني ولا فيه

قلب امي كان كبيييير والله لحظتها كرهت نفسي اللي زعلتها







الصدمة الثالثة ( ما قبل اليقضة )



يوم من الايام قالوا لي امك بالمستشفى ..!!

امي بالمستشفى

ليه ..؟

اروح ولا هم يقولو لي انها تعبانة وطلع عندها فشل كلوي

لحظة .. امي قالت

امي تمنت المرض فيها ولا فيني

اعوذ بالله ما فكرت ان الله قدر كل شي ولا بيدي احكم من راسي

لكن والله صدمة كبيرة

والاكبر كانت لما دخلت اشوفها

وهم مركبين جهاز الغسيل برقبتها

ما تكلمت بس جا خالي وهاوشني وقال انه انا السبب

والله كرهت نفسي للمرة

فعلااا امي صارت كذا بسببي انا .. انا كنت احرقها بتصرفاتي

وارفع لها الضغط بافعالي .

نقطة تحول .. بداية الهداية ..



مرت الحياة وبعد مرور يمكن اقل من شهر

خلص الحشيش .. وانتهت فلوسي .. مافي سم وانا كنت طفشان ابي ارتاح

رحت للموزع < ما احب اسميه بتسميات اخرى

وقلت له ابي حشيش بس ما معي فلوس

قال تعال معاي

ركبت سيارته وسقت انا هو ما كان قادر يسوق

مشينا

شوي قال : انا جوي مو زي جوك .. وطلع سيجارة وقال : تجرب معاي ..؟

اخذتها وطبعا ضميري واقف بعيد يتفرج يائس مني

جربت كم مره معاه

اوووف كانت اكبر مما كنت استخدمه باضعاف

صداع .. دوخة حتى الغثيان حسيت فيه

كنت اسوق

وهو طفى فجأة .. لكن انا لااازم اوصل البيت بسرعه

انام وفجأة استوعب اني بالسيارة

اقوم مفجوع

وكذا لييين كملت الطريق لبيته

اعوذ بالله كرهت نفسي كثير بس مثل ذالك اليوم لااا ولا بيصير

وقفت ورميته ببيته

وروحت

وصلت البيت ندمان وتعباان

حلقي جاف

ما قدرت امشي كملت على اطرافي الاربع لين وصلت غرفتي

عطشششان

رحت المطبخ بشرب

ولقيت امي جالسة تنتظرني بالصالة

للان امي ما تعرف اني استخدم الحشيش حدها الدخان

..



حسيت انها النهاية

ببكي .. مليان ذنوب .. ثقل المعصية اتعبني ..

سالتني امي .. وش فيك ..؟

قلت لهاا عطشان

ودي افضفض لها وخايف عليها كفاية اتعبتها كثير

وقتها احارب نفسي

لين لقيتني لا شعوريا جلست وحطيت راسي على رجولها

قالت وش فيك ..؟

رديت عليها بس بـ : الدنيا فوق راسي ..!

قالت : شوف هذا .. ورفعت يدها

( نقلوا الجهاز من رقبتها ليدها )

شفت مثل الزجاج لما نرمي عليه حجر كيف يتشطب ..؟!

زي كذا مكان الابرة والعروق حولها

وقوة التركيز صارت اعلى فصرت والله ما اشوف الا يدها

والعروق البارزة

تعمقت وحسيت اني اشوف حتى دمها وهو يجري في اوردتها

: هذا بسببك ..

قالتها ..!!

ابكي .. ايوالله بكيت وانا اقول : هذا مني انا

قالت : تعبتني كثير .. تركت الدراسة ولا ادري عنك ..!

قلت لها : امي وش اسوي ..

قالت : كل همومك انثرها على سجادتك .. صلي .. خل قلبك يتكلم

قمت بعد كلامها ونزلت وانا ابكي

خفت احد يشوفني توضيت وصليت ولازال تأثير الحشيش

سجدت ولا عرفت وش اقول



لذة ايمانية

..

جا اليوم الثاني ما قدرت انام

صورة امي ما تفارقني

انتظرت لليل

ومروني عيال الحارة

قالوا : تعال اسهر معنااا زمان عنك يا ابن الحلال

قلت لهم : اسسسف عندي موعد

وما بين سخرية وشماته انقلعوا عني

جات الساعه 1 الليل وانا كل اللي ببالي كلمة امي وهي تقول ( خل قلبك يتكلم )

جاء الموعد مع ربي

جا الوقت اللي افضفض فيه ولا احد يمسك علي زلتي

ربي اعلم بحالي ونيتي

ووالله العظيم للان ومهما سويت مستحيل احس بلذة مثل اللي ذقتها وقت تلك الصلاة

سجدت وابتديت بنثر شكواي لربي

بكيت وندمت واستغفرت

طلعت حق الثمان سنوات كككلها اللي راحت علي

حسيت اني خفيييييف

ارتحت والله ارتحت ولان ربي هو اللي معاي ارتحت

انتهيت وقلت لازم اصلح غلطتي

..

تنظيف الحاضر

..

رحت لامي وقلت لها : اذا انا سبب فشل كليتك تراي رحت المستشفى وسالت

وقالوا اقدر اتبرع لك بكلية

ناظرتني وقالت : انت دمك فاسد كله دخان وبتتبرعلي ..؟

فعلا وقتها كانت على حق

وبديت احط لي هدف اخر بعد توبتي اتوب كمان من الدخان

مرت 3 شهور وانا احاول ولا فائدة تذكر

كل ما شميت ريحته رجعت ولا كاني نويت اتوب

لين قلت بنفسي الله هو قادر على حل مشكلتي

وفعلاا قمت اخر الليل ودعيت من قلبي

واكثر شي كنت اكرره " ربي 8 سنوات ادخن وما لقيت الراحة ..

يا رب انت ترزقني المال الحلال وانا ادمر به نفسي

يا رب اعطيتني جسمي امانه وانا خذلتها "

والله خير معين

بعدها وكلت امري لله



الدعاء يحقق المعجزات

..

من كثر ما يئست شريت باكيت دخان

وطلعت الاولى بكل ثقة بأتسممبها

سحبت هواء منها للمرة الاولى

وفجأة وقفت بحلقي

وكحيت باقوى شي ليين دمعت عيوني

وحسيت اني برجع

اخذت هواء نقي وتنفست شوي وما تبت فكرت اعيد التجربة

وعدتها ونفس الطريقة

قلت خلني اتركها ساعه واجرب

وفعلااا بعد ساعتين ولعتهاا < الشيطان ما ييأس

واخذت منهاا ( السيجارة )

وكحيت من قلللب لين رجعت وحسيت ان معدتي بتخرج كمان

مدري ليه حسيت بفرحة

رميته وانا ببكي من السعادة

روحت البيت

ودخلت المجلس ولقيت اخوي + عيال خالي + ولد اخوي وكككلهم يدخنون

وقلت وانا فرحان : باركولي شباب لي يوم كامل ما دخنت

اخوي .. رمى الباكيت علي

وولد خالي .. رمى علي خمس ريا قال روح حبيبي اشتري دخان وتعال هيص معنا

اما ولد اخوي الشيطان المتشكل ببشر

جاب لي السيجارة مولعه جاهزة وقال : خذ جرب

تقوى علي الشيطان لحظتها

وفعلا اخذتها ومن المرة الاولى وقفت بحلقي وقمت اكح قدامهم

طلعت الشارع وبديت ارجع واطفي السيجارة ووالله اني ارجع وانا ابكي من الفرحة




ما بعد الهداية
.


ومن بعدهاا مرت 3 شهور وانا اعاني من اثار خروج النيكوتين من جسمي

لكن والله كل شي له لذة دامها في طاعة الله

رحت لامي وقلت لها : الان دمي نظيف يمه اقدر اتبرع لك

قالت : يا ولدي انت باقي شباب وانا ربي قدر علي ها المرض

كنت قبل فترة تعاني انت كمان من كليتك

خلها لك والله يجزاك الخير كله

وفعلااا بعد فترة جات لامي كلية جاهزة مطابقه لدمها لكنها رفضت

مرت الايام وانا عندي امي بالدنيا كلها واجاهد في طاعة الله

واقطع كل سبل الشيطان

ماتت الله يرحمهاا ويتقبل منها

وانقفل باب لي من ابواب الجنة

..

شفت امي باحلام كثيرة تبشرني انها بخير ولله الحمد

ولا زلت اشوفها ويارب نتقابل انا واياها على منابر من نور بالجنة ..





النهاية


نصيحتي لكل من يقرأ كلامي او يعرف قصتي

لا تنتظروا مصيبة عشان تصحوا من غفلتكم

والله الالم اشد واقوى ابدأو من الان التغيير

جددوا توبتكم رحمة ربي واسعه ..

حافظوا على الصلاة فوالله الكثير من المواقف كنت بأنفمس فيها لولا رحمة الله

ثم الصلاة



كل من عنده ام .. انت عندك نهر جاري من الحسنات استغله قبل لا يجف

فوالله بيجي يوم تتمنى جلسه معاها هواشها عليك .. توبيخها لك ما تلقاه

..





اسفة على الاطالة

هذي يدي لا تعمقت في الوصف محد يوقفها

كل ماتذكر دموعه وهو يحكيني

احس اني لازم اوصل الشعور نفسه

اسأل الله له القبول في الدنيا والاخرة

..

ما جبت من عندي اي زيادة

صاحب القصة اعطاني رؤس الاقلام

وترك مهمة السرد علي

هذي مشاركتي في اول مسابقة ادخلها في حياتي

دعواتي لكم

ملاحظة ..
القصة ليست منقولة
سمعتها شخصيا من صاحبها

تثبيت + تقييم + شكر +

و عليكم السلام ورحمة الله و بركاته

أهلا و سهلا بك نورتي القسم كيفك ان شاء الله تمام؟

حقيقة القصة جدا جدا مؤثرة نسأل الله لصاحبها الثبات والقبول و التوفيق

و ماشاء الله عليك اسلوبك في سرد القصة كان واضح و رائع و كأنه هو المتحدث

أجدتِ نقل مشاعر صاحبها و نسأل الله أن يجعل في هذه القصة عبرة لمن يعتبر

و أن تكون حافزًا لكل من يتردد في التوبة لأن الله يقبل التوبة النصوح و يغفر الذنوب جميعا

إلا أن يشرك به.

أشكرك كثيرا على هذا الموضوع الرائع جزاك الله خيرا و كثر من أمثالك و أثابك الفردوس

ووفقك لكل خير من خيري الدنيا و الأخرى ونسأل الله أن يتقبل توبة كل من تاب

و أن يهدي كل من ضل عن الطريق القويم و زل إنه غفور رحيم.

في أمان الله .

الــسـلام عـلـيـكم ورحـمـة الله وبـركـاتـه
شو الأخبار ؟؟ إن شاء الله تمام .. يدوووم


تبارك الله ، موضوع رآإئع بكل ما تعنيه الكلمة
وجزاك الله خيرآ على طرحك المفيد والمميز

الله يعطيك العافيه موضوعك اكثر من رائع ومفيد
ومهم والالف بين المسلمين

لقد استفدت كثيراً من موضوعك يالطيبه
رضى الله من رضى الوالدين

تسلم الأيادي على هذا الإبداع
مآأ أقدر أقــوول إلآأ سلمت يدآك ع الطرح

يعطيكِ العآفيــه ع المجهود المبذول
و بالتاكيد تم لكي احلى تقيم+شكر

لآ تبخلي علينا بجديدك و ابداعاتك
و ننتظر منك المزيد

في امان المولى و حفظه

السلام عليكم ورحمة الله وبركاته ..
تحية طيبة وبعد ..

حقيقة استمتعت بكل كلمة ذكرتيها في موضوعك .. عشت أجواء هذه التوبة و هذه القصة وهذه الآلام
فخير وسيلة لتعرف محنة أحدهم ، هي أن تضع نفسك مكانه ، وتحمد ربك الف مرة على نعمته !!

بدأتِ الطرح كأنكِ الشخص المقصود اعجبتني هذه البداية بلا مقدمات ولا شئ
تمنيت أن يكون هذا الموضوع الجبار مصحوبا بطقم معبّر ، وتنسيق أفضل بالطبع .. ~

حبذت لو أن الفصول كانت في ذات الموضوع لا في الردود لكن لا بأس ..

موضوعك جداً رائع ، وواضح التعب عليه يعني ..
بارك الله بك وسدد خطاك ..

♥

السلام عليكم ورحمة الله وبركاته ,,
آخبارك اخوي ؟ ان شاء الله بخير ~

قصة مؤثرة بالفعل آخوي , صراحة كل كلمة أقرأها في القصة أتأثر اكثر ..
سردك جميل ولو نسقت ايضا اكثر لـ اصبح سردها أفضل بكثير
طرحك على أنك آنت الشخص صاحب القصة جدا رائغة وجميلة ,,
وتعبك على الموضوع واضح بالفعل اخوي الغالي .. موفق ~

السلام عليكم و رحمة الله و بركاته

هكذا حال سائر المُدمنين يعمدون في بادئ الأمر إلى ممارسة التدخين , و مع توالي الأيام و الأشهُر

و تعاقُب الأعوام يتطور هذا الأمر حتى يصِل بهم إلى مرحلة التعاطي و الإدمان , و إلى إقتراف كبائر

الذنوب التي نصّ الدين الإسلامي الحنيف على تحريمها , فينبغي على هؤلاء عدم التسويف في

التوبة , و أن يحذو حذو صاحب هذه القصة في عقد العزم على التوبة و الإنابة إلى الخالق و الإلتحاق

بركب التائبين و قوافِل العائدين ليمُن الغفور عليهم بالعفو و المغفرة .

صِدقاً أجدتِ سرد القصة , جزيل الشكر لك و لمجهودك العظيم

دُمتِ في حفظ الله و رعايته .

تقييم + شكر

للموضوع الجميل

الذي لا يصفه اللسان و لا يتخيله العقل

ابداع×ابداع

تابع على هذا المنوال

تقبل مروري