مأساة روح {هالكه} في اوراق تائهه ~

يبي تعبانه بالشغل الليله.. مهدوده نعسانه، ما مصدكه يطلع الصبح، بدي كهوه.. بحلم فيها كاعد..
حكيت مع امي شوي، غيّرت الصورة عالفيس وحطيتها واحده بتضحك ومبسوطة وطايره من الفرح، عشاني العكس، ودايما بأخذ وكت لاغيّر الصور لان عندي خاله بضلها تتفلسف ع اي صوره بحطها بأنو كلهم حزينات تعيسات وحياتنا بكفيها اللي فيها، ف هاي المره حطيت سعاده واضحة بانو اللي بعرفني بعرف اني العكس، وبنفس الوكت بدي ابيّن لصاحب اني مشيت مع اني واكعه وبدي زمن عشان امشي، شايفين كيف مرات تصرفاتنا العكس، يعني بنكزب، كزااابين، ليش عملت هيك مع خالتي وحطيت صور سعاده لانها عملت اشي حلو لامي، فا انا بدي ارد الخدمه بهيك شغله، وليش بدي ابيّن لصاحبي اني مشيت؟ لانو اتحلّفت اني ما احكي معه وانا بخونش الوعد، مع اني من جوى بتقطّع اني بكدرش احكي معه وبحكي لو اتعرفنا بظروف تانيه كان لسا بنحكي، ولو ما اتحلفتش كان زي عوايدي وبكل بساطة بحكي معه وبفهمّه، فش حل الا استخدم هاي الكصه، وبدي هو يمشي وبديش يضل باله مشغول، مع انه هذا اشي مش متأكده منه وهو انو باله مشغول، بس عندي معزه لهدا الشب، او نحكي اسعدني بحياتي وكمان مش متأكده إذ كزب عليا او لا، بس اللي بتزكره اني كنت اضحك معه بصوت عالي، اني اكون مبسوطه من جواي وقليل ناس خلتني مبسوطة من جواي، اني بس اشوفه بيتصل عطول ارد عليه وين ما اكون، كلشي معه سهل وبسيط.
انا وعدتكم اني اكون صريحه لهيك بحاول كد ما اكدر اني احكي شو جواي، حتى لو صريح زياده، بس بضل اني ما اكزب عليكم.

مرات عشان ترتاح من الكصه لازم تحكيها وتجربها، بعدها بتحس انها بتسواش تعبك وتفكيرك، بتحس حالك وين عقلك كنت معطيها هالحجم وهي بتستاهلش والله، بعد ما اتعذبت فتره بالكصة تا بالاخر حكيتها وعملتها، وهيني مرتاحة عالاخر.. كأنه اشي ماسك رقبتي ومش مخليني اتنفس وهلكيت راح وارجعت اتنفس احسن ..

يوم الجمعه اللي هو نحكي بببلش الخميس بالليل من ال8 ,كان عليا شفت ليل وكان زفت وصعب كتير, وعصبت كتير بشغلي لدرجه كنت بدي اغلط غلطه تخسرّني اياه , بس ربنا سبحانه وقفني , لما تكون نفسيتي متحطمه وشغلي يبلش يصعب بكدرش اتحمله بصراحه, باللحظه بوصل لمرحله اني ارمي كلشي من كتر عصبيتي , ما صدكت طلع الصبح وبدلت الشفت واطلعت ركاض منه , واول ما اطلعت كنت مخنوكه واتصلت ع امي مشان افضفضلها , وبالطريك عالبيت خواتي كانوا ليلتها من كتر ما شايفيني محنوكه من كلشي حواليا , حكو راح نيجي عندك نشرب كهوه الصبح ,لان احنا زي صاحبات واكتر , واد شوفنا بعض لو نص ساعه باليوم وكعدنا نفضفض لبعض ,كتير بحسّن من نفسيتنا , المهم بطريكي عالبيت اتصلت عليا فيث وحكتلي بدنا نيجي عندك , وبالزبط اجو وجابو كهوه ودونتس , النا فتره بنطلب ستاربوكس لانو اعرفنا بالزبط شو نطلبها ونحكيلهم شو يحطو وشو ما يحطوا , لان دايما كل ما نطلبها يا اما مليانه حليب , يا اما حلوه كتير , يا اما مي ... كعدوا حوالي ساعه عندي واتسهلوا , لان كان عليا شغل بعد الظهر , وكان عليهم كمان مواعيد مع مدارس اولادهم , اطلعت ع شغل بعد الظهر وكنت مش مفطره الا ع الدونتس وجعانه , بالطريك عالشغل ميّلت اشتريت سوشي لان الي فتره مدمنه سوشي , وخلصت شفت العصر وميّلت ع شفت الليل منه , وانا بالطريك اتأخر الباص نص ساعه , وكانت سكعه يالله وليل فا يم انشفت , وفوك هاد في شب زنخ كان يستنى معي وطول الوكت يغني , وشو صوته يالله !!! زنخ تكيل دم ,, حطيت السماعات بداني وبلشت اسمع في فرقه جدل , وبعدها اوصلت شفت الليل .. وصارت بهاي الليله كصص غريبه !!
اولا واحد من اصحابي كان طافي لدرجه حكى حكي لو بعكله مستحيل حكالي اياه , حتى لو مش مصدكته بس بنفس الوكت مصدكته , هدا الصاحب من جديد صار يحكي عن حاله انه بجرب ,وشاف كيف ردت فعلي فا كأنه اطمن , وخاصه لما شوفته مره خاف فا حلّفته بامي انو محدش راح يعرف , ولما سمع هيك عالاخر اطمن بعدها , عشان هيك بتلاحظو مرات اني بحكي صاحبي بدون اسم او لقب , المهم فا صار هدا الصاحب يبعت فيديوهات وانا اضحك ع شكله وحاله , المهم لانه مسافر وان شاء الله يرجع بالسلامه , عم يجرب .. وبلش يحكي ويحكي ويبعت فيديوهات عن شو كان يومه ومن هالحكي , وسألني سؤال , ضليت اسكّر عالموضوع مع انه مش هالسؤال , بعدين جوابته عشان بلش يصير سوء فهم , ودايما كتير كصص بتخرب بين الناس لما يصير سوء فهم , لهيك بحب كلشي يكون معي عبلاطه عشان ما يصير سوء الفهم وما اخسر ناس بعزها , كان سؤال بسيط بس بديش احكي عن حالي وهو طافي , المهم سمع جوابي وحكالي ( مير بدي احكيلك الحكيكه) حكتله ( هات اشوف) اولها ضرب مزحه انه بحبني وانا فطست ضحك لان بعرف هدا الشب مستحيل يحكي هيك او مستحيل يحبني , لانو بعرف كديش تركت ناس حبتني, وكل مره نطاوش انا وهو اد برمي كلمه حلوه , لوكت ما فهم انو هدا اشي بكرهه , من بعدها وكف يجامل او يحكي بلطافه او غزل , ولا حتى عن المزح , فا عذرته عن هاي المزحه عشانه طافي
, المهم بعدها كمل حكي وهو عن اصحاب الي كنت اعرفهم بس مكنتش اعرف انه كانوا اصحابه الا من فتره من صاحب كديم الي , هدا الصاحب الكديم هو تبع هكر بخوف , وهدا الصاحب لولا صرت اخاف منه ابعدت عنه , بس هو جد جد خدمني خدمه مش راح انساله اياه , هدا الصاحب الكديم مره اجى وحكالي (انتبهي من صاحبك هاد لانه بجيب سيرتك عند الناس ) اللي هو الطافي ,من وكتها اعرفت انو صاحبي الطافي بحب يتباهى كدامهم انو بحكي معي واني صاحبته ع العظم , وبهمنيش بصراحه , لانه صاحب ومفش اشي نحكي شخصي كتير بعرفه عني انو اخاف من سيرتي عندهم , المهم صاحبي الطافي حكالي عن كصص كانت تصير بين هدول الاصحاب الناس وهو موجود معاهم وشو كانو يحكو عني ويفكروا وكصص عميقه ,عميقه لدرجه من جوى كنت مبسوطه كتير اني عذبت واتعست هالشباب وخاصه واحد كلب بينهم , يالله لما اسمعت شو كان يعمل عشاني وانا معيش خبر يالله شو انبسطت يالله , حكيتله انه( ليش ما حكيت هدا الحكي من زمان ) حكى( يا مير في شغلات بدها وكت لتطلع تنحكى وخاصه هيك كصص , بتنحكاش الا من وكت ما صرت اعرف انك اصيله ) بس انا بعرف انه كدب بهاي الكصه لانه كان هو كمان يحكي عني , وبكدرش بوكتها يجي يحكيلي انو بنحكي عنك وانو فلان بعمل هيك وهيك عشانك لاني اكيد راح اتركهه , حكالي( يا مير وصلت انو فلان كان يعمل هيك يا مير وانتي ما عندك خبر ؟) . الشغلات اللي كان يعملها شغلات خلتني احب حالي اكتر , شغلات خلت انتقامي منه هالحيوان بزياده وانا معيش خبر .
ومن بعدها حكالي كمان عن البنت اللي كان يحبها اللي ولا عمره حكى عنها ,وهي صاحبه الي , ولا عمرها هي حكت عنه ولا مره جابت سيرته مع انه تعرفني اني صاحبته عالعظم , تعرف دايما نضل نحكي ودايما هو يضحكني ومع هيك ما كانت زعلانه مني اني بحكي معه , انا مكنتش اعرف انهم ع علاقه , لو بعرف كان خففت عشان ما اجرحها او اشي , بس هي كانها بتعرفني لهيك كانت مكمله معي , وحتى كانت تحكيلي عن واحد بس مكنتش تحكي مين هو , المهم هم تركوا من زمان ولليوم هي ولا عمرها حكتلي عنه , يمكن لان بتعرفني كديش بعزه , بس لليوم انا بحكي مع الاتنين ولليوم ما خطر ببالي انو هدول التنين كانو جد ع علاقه ,وهي هلكيت بعلاقه وحكتلي عنه يمكن لاني بعرفش هاد , ومن كل كلامه انه جد حبها وانو بحنلها , بس بكل صراحه هاي البنت هي احلى بنت بين كل البنات اللي بعرفهم بالنسبه لجمالها , بين نحكي شله هدول البنات اللي اعرفتهم من عالم النت ومن هداك المكان من عالم النت , اما بالنسبه لذوقي انا ذوقي صعب بالبنات بخصوص الشكل والمنظر والجمال ,وبصراحه ولا حد من اصحابي ولا حد فيهم ورجاني عشيقه او حبيببه او صاحبه, رهيبه جمال بالنسبه لذوقي , حتى اخوتي كل عشيقاتهم او صاحباتهم حلوات بس بالنسبه الي مش رهيبات اني احكي يالله شو هالبنت رهيبه , شوفت بحياتي صبيه واحده خلتني جد اصفن تواني اول ما شوفتها , بتشتغل بمكتب اللي بتعامل مع القنصليه الامركانيه , وكانت دايره ظهرها ولما لفت تحكي معي , ضليت انا صافنه شوي وبعدين ابوي نادى عليا انو احكي يا مريم مالك ,هاي احلى بنت شوفتها بجياتي , الله يعين الشباب لما يشوفوها ..~
اخوي واحد ع ايام زمان واحنا بالضفه , مره رسم واحده من حبيباته ع الحيط بغرفته, , وهدا مش اشي جديد , اخوتي رسامين رومنسين ,واهلي اللي هم امي وابوي اخدوا بعض عن حب , فا اهلي هدا اشي حلو فيهم وانهم منفتحين بهاي الكصص , اخوي اتنين عنده دفتر راسم كل صاحباته فيه , لدرجه مره شوفت خوات صاحبتي ع ايام المدرسه وهم تؤام , وطول ما احكي معهم احكي بعكلي يا ربي وين شايفه هدول وين ؟بعد فتره وانا اشوف بدفتر اخوي شوفتهم واتزكرتهم , بس كل هاي الشغلات انتهت لما اتجوزوا , وكل اسراراهم مخبيه معي , دفاترهم الصور الهدايا ..~
المهم اخوي واحد كان راسم واحده ع الحيط وكانت تطليعت هالبنت رهييبه مع الجبين تبعها وشعرها الطاير , كانت عيونها جدابه عالاخر بالرسمه ,مع انه برسم بالفحم , بس هالبنت كانت جدابه ببساطتها وابتسامتها, روحت اسال حبي عنها , لان حبي واخوي واحد اصحاب عالعظم , حكتله (صاحبك راسم واحده عالحيط تبعه بتعرف مين هي ؟) حكالي (هاي فد ! ) حكتله (لأ ولك مش فد ) , حكى (كيف هي ؟) حكتله ( جبين طازز وعيون شوي بعاد عن بعض بس جدابات , ابتسامه لطيفه ) حكى (يمكن هاي البنت اللي هون) , بكصد البنت بالاردن , وللاسف ما شوفتها هالبنت عالواقع كان نفسي اشوفها او اشوف صورتها , ما صحلّي , وحبي كمان غرفته كان مرسوم عليها عشيقه اخوي تنين , واظن هاي البنت الها كصه لانو الرسمه من زماااان وحبي مش ماسحها واخوي تنين دايما كان يسأل عن الرسمه . . نيالهم نيالهم هالبنات كديش اخوتي حبوهم.


...

وكمان حكيت مع صاحب , هدا الصاحب اللي اتكاتلت معه واغلطت عليه وبنفس الوكت حكيتله حكي حلو , هالصاحب اللي كنت اضحك عشغلات هبل من كتر الجنون اللي ضاربني , حكالي (مريم تتجوزيني) لماا سمعت هاي الكلمه .. اتزكرت حبي , لانها بنفس النبره ,, اختها للنبره ,, ضليت ساكته وما عجبه .. وبالاخر حكالي (المكالمه صارت ممله خلص روحي) , مكانش عاجبني الوضع ولا عاجبه , هاي اكبر مشكله لما تعزّي حد وبالاخر يدّخل مشاعره بالنص عشان كل واحد فينا يروح بطريك يا حيوان يا حيوان , مع انه هالصاحب بعرف بلاوي زورك عني , هالصاحب شافني بابشع مواقف وجاي يحكي هيك ..~

||

يالله يا ابو سمرا يا حبي ولك نيالي انك حبيتني , ولك جد فش بعدك , ولك وقسم بتستاهل كل تكه ضيعتها من عمري عشانك , كل ما اتزكر شو كان يصير بينا اعرف انو جد حبيتني ولك , ولك بتستاهل انو صورك معبيه الدنيا بحياتي , وبتستاهل اني بتباهى كدام الكل فيك , وانو اه غصب عنكم كلكم , بس احنا مش لبعض

يوم السبت.. بعد ما طلع الصبح واطلعت من شغلي، وكان الحمد لله الشفت لطيف عليا، يمكن لان اصحابي كانوا موجودين، ولانه يوم السبت دايما الصبح بتكون في مشكله في الباصات انو نص الخطوط ما بتبلش الا ع 8 لانو هان السبت والأحد عطله، لهيك غيّرت خط الباص، وكعدت احكي مع امي طول الطريك، بعدين ميّلت اشتريت شويت حواجة، اختي فيث حكتلي (انو يمكن تطلع ويمكن لا وعالاغلب لأ) هوبز حكت( اد بدكوش تطلعوا خليني اجي عندك يا مريم اطبخلك) عالجهتين انا مستفيدة، اوصلت البيت وكان واصلني الطلب اللي طلبته من الأمازون يوم الجمعه بالليل، وانا مكنتش بالبيت لهيك طلبت من اخوي واحد يحطلي اياه بغرفتي، وكنت شاريه كريمات شعر، انا بنت كتير بستخدم كريمات لشعري عشان بحبش استخدم حراره، ، وكنت شاريه لعبه من اول ما نزلت وانا احكي بدي اشتريها بس بنفس الوكت بديش ادمن ع البلستيشن، بس لاني بفتره حزن وبضل افكر بكصه اكلت راسي اكل وعشان اهرب منها لازم ادمن اشي، بورجيكم الشغلات اللي اشتريتها بس ادخل المنتدى من اللاب توب، المهم كنت كتير مبسوطة ع اللعبه، وافطرت، واختي فيث حكت (خلص ما راح تكدر تطلع) واختي هوبز حكتلي ( انا باجي بطبخلك) وانا بلشت العب بس ما عجبني البلستيشن ع البروجكتر، مش واضح كتير، بس بديش اطلّع البلستيشن من الغرفه واشبكها ع تلفزيون الصاله لان اختي هوبز جايه مع اولادها، ومع هيك حكيت بعكلي ( لما يجيو بفتحش الباب الهم الا لما ارجعهّا ع غرفتي) لانهم صغار وبخاف يخربولي اياها وانا بكل صراحة مين ما كان بحبش يصيب غرضي وخاصه اشي غالي وبحبه لاني بتعب عليه لاجيبه، وانا مش من النوع اللي إد وصلت للاشي اتركه ويبطل يهمني، بالعكس بدير بالي عليه اكتر وبحمد الله، المهم وانا العب اتصلت عليا امي وحكينا شوي وحكتلها ( يما الي من زمان مش فاتحة البلستيشن، وهيني بلعب عليها، روحي انتي نامي وبس تصحي بالليل زي عوايدك اتصلي عليا) اتسلهت امي، وشوي اللي اختي فيث بترن عليا ( مريم اطلعي عراس الجبل، كلنا طالعين ع المنتزه حتى تيجي معانا) طفيت البلستيشن واستغربت تغير المخطط واطلعت من الدار، الا امي رجعت تحكي معي، وحكتلي ( فش نوم بعيوني خليني ادردش معك) حكتلها انو خواتي طالعين وبدي الاكيهم ع راس الجبل، و ضلينا نحكي انا وياها لوكت ما اوصلت ع راس الجبل وشوفت خواتي وكعدوا يحكوا معاها، وروحنا كلنا مع الصغار ع المنتزه، ضلينا كتير، وبعدين اخوي تلات اجى كمان عنا، لما صارت الدنيا العصر، روحنّا، خواتي مع بعض، وانا واخوي مع بعض، بالطريك حكالي اخوي تلات ( شو رايك نروح نتحوج من كاسكو اد فش عليكي شفت ليل؟ ) وافكت وبالطريك كاسكو جمب المقابر وبعرفني اخوي بحب المقابر، حكالي ( تدخلي؟) وافكت وكعدت شوي وبعدين اطلعنا، وجمب المقابر في محلات ورد، حكالي ( بدك؟) اكيد وافكت هههه وجابلي ضُمة محرزه وكنت كتير مبسوطه عليها، بعدين روحنا ع كاسكو، و رجعنا عالبيت، انا بحكيلكم الله يخليلي اخوتي وخواتي واهلي، لولا هدول هم بحياتي كان انا زمان كتلت حالي وانتحرت ، كتير بخففو الدنيا عليا و ساعدوني وبحاولوا يبسطوني، كعدنا اتعشينا ودردشنا وحكيت مع امي، اجى صاحبي المسافر ضل يحكي معي عالواتس، ولان الواتس معي بزبطش التلفونات بعرفش ليش، عشاني بامريكا يمكن، فا كنا نحكي صوت، وكان ليلتها طافي طااافي اشي بضحك، ولما اتسهل نام، حكيت بعكلي بدي اتصل ع صاحبي، المجنون اللي بتوهم انه حبني وهات عاد، كعدت ارن عليه، كعد يرن فيس تايم، فكرت انه كابس بالغلط، طلع جد بده يحكي فيس تايم، كالعاده انا، فتحت وكعدنا نحكي، اول ما افتح الكميرا اول كلمه دايما بسمعها منه ( يا ويل قلبي انا) وانا بجحره بعيني بدي اقتله وهو بفطس ضحك، يمكن حوالي اسبوع او اكتر، مش حاكين فيس تايم، ولان اوضاعي النفسيه زفت انا عطول بيطلع بوجهي حب، فا حكى مالك وليش هيك شو صار وهو عارف شو صار عاااارف، بعدين حكى شو قرر يعمل، وانا لما اسمعت يالله انكهرت وعصبت ووجهي صار يغلي، هالشب اتغير اتغير، صار يكره الدنيا وصار يأسان، حكى نفس الحكي اللي انا اضل احكيله اياه ( لو الدنيا بدها تكون معي منيحة وتعطيني اللي بدي اياه كان أعطيتني اياه زمان، ومن اول مره، ما راح تعطيني اياه بعد المحاوله المية). هالشب كديش خسر وتعب وضيّع لأجل يوصل أمريكا، ولما جاي هيك يحكيلي انو خلص سحب الورق وبدوش أمريكا وفتره يعني اقل من شهر راح ينزل، بعرفش شو اللي غيره، بعرفش كيف رمى سنين كتيره هون بالهوا، كعد يحكي ابوه، كعد يحكي بده يتجوز، كعد يحكي بده ولد، كعد يحكي بده يهرب مني، كعد يحكي حبيتك وانتي اكتر واحده بتعرفي لما احب شو بعمل، كعد يحكي انا كانت عندي كرامه وكيمه هناك وهناك كلشي موجود، كعد يحكي اصحابي، كعد يحكي بدي انبسط، كعد يحكي خواتي بدي اشوف خواتي، حكتله راح تندم ومش راح ترجع هان.، حكتله انت بتحبنيش يا اهبل لان عيونك بضلهم يرمشو وانت تحكي ودليل ع انك بتكدب أو مش متأكد من كلامك، رجع حكى لان عيوني بيوجعوني، حكتله اللي ببرر وبعطي حجج دليل ع انه عالاكيد بكزب، سكّر عالموضوع بأنه شو برقبتي وبكصد السنسال، حكتله الولد راح يتركك، حكتله ابوك مش دايم، خواتك راح يتجوزوا، اصحابك راح يلتهو عنك، وانا يا صاحبي ما بستاهل تعمل بحالك هيك، اوعك عشاني اوعك عشان بنت تخرب بيتك، رجع حكى مش عشانك مش عشانك كله عشاني عشاني، وعصّب وحكى خلص سحبت الورق وانتهت الكصه، سكرّي عالموضوع، وكعدنا نحكي كصص مع كصص لوكت ما خلص بدي انام لأن عليا شغل الصبح، وسكرت ونمت..
وكنت اصحى ع تلفونات من صاحب تاني وبصراحة مكانش الي نفس احكي مع حد، حطيت البلفون صامت وارجعت انام، واصحيت ع المنبه بسرعه جهزت حالي وحكيت لاخوي تلات اد بوصلني عالشغل لان جد كنت مكهوره، وصلت الشغل وارجعت اتصل ع صاحبي اللي كهرني بالليل عليه، بدي اطمن عليه وكان صوته منيح وتمام، وحكتله بحكي معك بالليل، سكرت وبلشت شغلي وافطرت وفي البريك تبعي شوفته بيتصل عليا فيس تايم؟ رديت، بتزكر لما مره حكالي ( يا مريم فيكي اشي حلو وهو بتردي عالتلفون بسرعه، بتخلنيش استنى وحتى لو فيس تايم) اول ما اسمعت كلمه اشي حلو كنت بدي اكص لسانه بس لما كملها شوفتها انها مش مجامله، بتزكر اخوتي وبتزكر صحاب تانين كمان كانوا يحكو نفس الشي وهو اني برد عالتلفون وانو ع ايام السكايب لما كانوا بتصلوا كنت عادي ارد باي وكت حتى لو اني بالشارع بالباص بالشغل، بشوفوش اشي غلط، وبشوفوش اني لازم اكون مرتبه ع اخر تكه لما يشوفوني وجد بحب هدا الاشي فيا اني اكون نفسي وطبيعيه، المهم كعدنا نحكي ونحكي وطلب اشي، هلكيت انا بالليل لماحكيت معه اشتكتله وحكتله لو يجي هان يودعني ومنه بشوف اختي فيث ، حكى بديش اجي اتحسر، فا بالنهار طلب مني طلب وهو اني اروح عنده، اييييييييش يا روح خالتك ايش؟ فطست ضحك وحكتله (ولك يا جحش انا بعملها؟ هههههه مستحيل ولك اعملها)، حكى (ولك ليش)، حكتله (لاني بخاف منك)، حكى (شو انا العو)، حكتله لسا بتخوّف اكتر منه)، حكى (طب احكيلي اجي عندك، اد بضلك معي تلات ايام أجري ع اجرك)، حكتله (بضمنكش، بضمنش الشباب انا يا زلمه)، حكى (والله ما راح اعمل اشي)، حكتله (احكي للكزاب احلف حكى اجى الفرج)، رجع حلف وصار يحكي( باجي وبنضل نطش هان وهان وننبسط مع بعض)...//، بعيد عن المحادثة، انا داخليا بدي اياه يجي وداخليا عارفه انه جد جد راح يبسطني وراح نكيف وننبسط ونضحك ونغامر، بس بكدرش اغامر مع شب، الشباب ملهومش امان، خاصه بدون معرفه حد، وبدون معرفه أهله كمان،.. يعني اصحابي التانين اهلينا تعرف بعض وفي امان بينا \\ صفنت بالكصه لاني جد نفسي اضمنه وجد نفسي اشوفه، بس عارف مخططه، يعمل اشي فيا ليحطني تحت الامر الواقع مشان أخذه غصب عني وحكتله هدا الحكي وما عجبه، بس حكيت (لا) واتسكرت ع الكصه. كان يطلّع عليا بده يكتلني، ويتحسّر ، ومش هو لحاله يعني، انا اخسرت اغلب اصحابي وكت ما اتجوزوا، وفي منهم كانوا صامدين لوكت ما خلّفوا عالاخر تركوني، فهذا الشب هو مش داري عن حاله بأنه اول ما يترك أمريكا وينزل، ابوه راح يكون مجهزّله صبيه ليتجوزها وراح تخلّف وراح يمشي بالدنيا زي كلهم، مع انه ضل يحكي بديش جيزه تقلديه، بس راحت عليه ليحكي هيك لان كل عكله بالولد، وفي أصحاب اتجوزوا بس عشان الولد وعنجد الله يخليهم اولادهم نسوهم الدنيا، كانوا عارفين شو بدهم، نياله اللي بيعرف شو بده، انا مش عارفه شو بدي.
رمى كلمه اليوم ينعن شكله (بس انزل مش راح اشوف هاي العيون) عطول انا حطيت ايدي اغطّي الكميرا، لاني احزنت عحالي بانو راح اخسر هيك صاحب لاني عارفه شو هاد الصاحب، كعدت كم تانيه وارجعت احكي معه وكملنا حكي لوكت انو خلص لازم أنا اروح .. وخواتي حكو معي عالسناب انهم متكاتلين مع اخوي واحد وحاله.. وهلكيت بلش الاسبوع بسهر ليالي وشفتات وحاله.

ايييييش , عشاني اخدت عطله من الشغل فا يم ملتهيه , غير انه من وكت ما ارجعت للبلستيشن بطلت اعمل اشي الا اني اضل العب عليها , واليوم اشتريت تلفزيووووون واخيرا , مشان البروجكتر ما كتير زابط معي عالبلستيشن , فا اشتريت اليوم لانه البلاك فرايدي , اشتريت واحد صغير ع كدي مشان اشبك البلستيشن عليه , واشتريت كمان كم شغله , وملاااان مجريات صارت معي ونفسي اجي اكتبها واحكيها , واورجيكم كل اللي اشتريته , بس يا عمي مكسور عليا نوم ونعسااانه ومشتااااكه , حطيت اليوم خلفيه اللاب توب صوره لحيه حبي لانها شايبه , وانا ابعبش بالصور شوفتها واااخ يا قلبي ينعن شكله , عفكره كرّب ميلاده ومش عارف شو اشتريه وغير انه بنحكيش , دايما كل ميلاد بنكون نحكيش , هديك السنه اشترتله ولعه صنع يدوي ع شكل حمار لانه حمار واشتريت معاها منفضه على شكل رئتين عشان وهو يعمل الحشيش وكمان ملقط مصاري فضه عليه سياره كاديلاك اظن موديل 74 لانه بعشق السيارات الكديمه , بس هاي المره معنديش افكار , اشتريت عليه بورا بورا لانه بحب العطر هاد , واشريت محفظه تيمبلاند لانه بحب هالماركه , بس مع هيك هدول مش شايفهم اشياء محرزه , بدي لازم اشتري البستار وشغله هيك مميزه وخاصه , ابصر لاشوف شو بيطلع معي , بس اليوم اشتريتلي جينز كاحت ليفايز ويالله شو استغربت انه واخيرا لكيت هاي الكحته , بدون ما اشوف سعره اشتريته , مشتاكه لامي , وعفكره الوكعه اللي اوكعتها اطلعت منها , بس يا رب هو ما يكون طلع منها يا رب يا رب , وصح اتكاتلت مع اختي هوبز عشان عريس وما عريس , حكيت مع شخص بحب الشعر , وبعد ما حكينا ساعه كامله , اخر الكلام بلش يحكيلي شعر وانا زي عوايدي بكدرش امسك ضحكتي , فطست ضحك لاني بحبش الشعر ولما بلشت اسمع فيه امسك بحالي وامسك بحالي وبالاخر فطست ضحك , يالله شو ضجكني بالشعر تبعه , وهو زعل , اي طييير ناكصني انا , احلى شي صاحبي الفصح , يضل يتصل عليا , ويورجيني سفرته , ويحكيلي " مير صحابي ودعو من صوتك " مكنتش عارف ايش يعني ودعو طلعت دابوا , الله ينعن شكله ناكصني ذنوب انا , ايناس متكاتله مع اهلي ومحكتليش , ابوي اتصل عليا وخبرني , بعاود اكمل بس خليني اشيل المكياج واناااام وجايه الايام اللي اكمل جايه ... وانا بهواك بضمير

ارجع احكي عن أسبوعي وابلش من يوم الاثنين، مش كتير متزكره كصص، بس دايما برجع عالسناب والصور بتزكرني عن ايامي، عفكره مفش صور عن يوم الاثنين، الا الصبح، وهو سلمت الشفت ولاني اتكاتلت مع الفلبية الاثنين اللي قبل هاد فا بطلنا نحكي لما نبدّل الشفتات وهو احسن الي بكتير، ما اظنش شوفت خواتي، بس اه حكيت مع هدا الشاعر الاهبل، وبعرفش إذ شغلّت البلستيشن أو لا، وكان عليا شفت ليل وصايره اكره شفتات الليل عالاخر لانها صارت صعبة عليا وانا صايره عصبيه ومعنديش طولت البال لاتحمل.

يوم الثلاثاء كمان مش متزكره ايش صار فيه، وكان عليا شفت ليل كمان فيه، وكنت مرات نحكي انا وصوص.

نيجي ليوم الاربعا، لاني كرفانه شغل الليل ولانه جاي البلاك فرايدي وكنت ناويه اشتري تلفزيون والحمد لله ربنا حكك اللي كنت بدي اياه، طلبت عطله، واستغربت انها وافكت تعطيني لانو بالعاده محدش بيشتغل بالأعياد، فكانت عطلتي الاربعاء والخميس لا ليل ولا نهار وكديش بحب العطل انا صايره، الاربعاء الصبح اطلعت من شغلي اللي هو كان الثلاثاء بالليل، واجيت عالبيت وكنت احلم بالبلستيشن، وبكل صراحة البلستيشن الها فضل اني التهيت عن كصة كانت تأكل عكلي، ولاني شفت ليل والي يومين مش نايمه وبديش انام الاربعاء الصبح لاني زي ما حكيت بحلم بالبلستيشن، روحت فتحت علبه ريدبول وبلشت العب بلستيشن، لوكت ما خواتي اتصلوا عليا وبدهم يطلعوا، فيث اخدتني ع البسيفكا وبعدين اتلاكينا مع هوبز، كعدنا نحكي، بعدين ارجعت عالبيت متأخره شوي ومكانش عندي الوكت لالعب ع البلستيشن، كعدت مع اخوي تلات سهرنا مع بعض لوكت ما حسيت اني مش كادر افتح عيوني، وكانت لسا تسعه المسا، بس لان ليلتين ورى بعض ولا نوم ولا ساعه، جسمي مش كادر يتحمل، طلبت الأسف من اخوي اني بدي انام وبعدين نكمل كصصنا، وبالزبط حطيت راسي عالمخدا ونمت بسرعه ما اصحيت الا الخميس ع التسعه الصبح.

يوم الخميس، كان يوم البلاك فرايدي وعيد الشكر، خواتي كانوا ملهيات بعملوا بالحبش، وانا اصحيت وضليت ع البلستيشن من الصبح للمسا، وجهي ما غسلته، كان يجي عندي اخوي واحد يشوف كيف بعرفش العب وبضحك عليا، وطبعا مرته الحيوانه اللي تنجن انو بحكي معي لانها غيوره متملكه عالاخر، لما اجى المسا، اطلعت مشان البلاك فرايدي، هوبز وعدتنا تيجي بس صار عندها ظرف ما اجت، لهيك كنت انا وفيث وبناتها، اخوي تلات حكى باجي بعدين، اشتريت التلفزيون وكم غرض، اجى اخوي، وصارت طوشه بيني وبين فيث ولحد الان بنحكيش، انا بعرف اني حيوانه، بس هي زودتها وزكرتني بكصه صارت بينا زمان ع نفس الشغله، كصة الجيزه، اختي فيث حكيت عنها كبل هالمره انها تحتانيه يعني مصلحجيه وخبيثه، وبتحطش حدود اد احنا أهل واصحاب لازم نراعي الكلام اللي بنحكيه بينا، انو بعيد عن تحميل الجمايل والمعايير، يعني تعايرني، هي بضل تعايير انها بضل تلاكي شباب للجيزه وانا بديش وأنها تعبت واني ختياره وشايفه حالي ومش عاجبني اشي، كصه الشباب، حكتلها بدهم واحده معاها ورق وانا معيش ورق يعني هم بدهومش، كصةتعبت، حكتلها مية مره انو ما طلبت منك، انتي من حالك بتعملي، كصة شايف حالي ومش عاجبني هذا اشي تاني ملوش دخل باللي هي بتعمله، اه كصة ختياره فا اه انا ختياره وكبرت، ومع هيك كصة الجيزه فش فيها غصب، فش فيها ع كيف غيري، اهلي امي وابوي ولا عمرهم غصبوني ع شب، بغصبوني بكصه الجيزه ولازم اتجوز، بس مش ع اي حد وشو ما كان، هي عندها اي حد اي حد لازم اوافق. اللي صار كمان انو ورجتني صورة شب وحكتلها منيح بس بشبه هيك ناس، وهدا لما سمعت هيك انجنت وزعلت، وطبعا كل هالحديث كان بوجود اخوي تلات، ورجينا الصوره لاخوي، واخوي حكى (صحيح بشبه هدول الناس)، هي نطت تحكي ( حبك مش احلى منه) حكتلها يا بنت ليش دخلتي حبي بالكصه؟ رجع اخوي اتمعن بالصوره وحكى ( صح يا مريم حبك مش احلى) هوهو عاد، متكعدوش تقارنوا حبي بالناس، هذا خط أحمر زي ما امي خط أحمر، ومعاهم حق انو حبي مش احلى بس مش هاي الكصه، ومش اني عشان حبي بديش اتجوز، امبلا بدي اتجوز امبلا بس بدي واحد يعجبني، بدي واحد مش ممل وتقليدي، مفش بلاش عاد. المهم اتزاعلنا وكل واحد راح بطريك، ولحد الان تكعد تبعتلي حكي زفت عالمسنجر وتغلط عليا وحالة، وبديش افسد اهلي عليها، بعرفها بتكدرش عاللي عايشه معهم فا بتعمل حالها زلمه عليا وخليها، راضيه اكون مفشه عندها، بس بورجيها باشي تاني، اللي اتعلمته انو ما اخليش اختي فيث تعملي اشي طول حياتي، لانها بتعايير، لان هدا الاشي هي من حالها عملته وبتعايير، ومن جوى زعلانه منها.
يوم الجمعه كان عليا شفت ليل.
ويوم السبت طوله ضليت بالبيت بلعب ع البلستيشن وختمت اللعبه وانجنيت انها مش كتير حلوه طلعت وكتير سهله وانا بعرفش العب، اتصلت عليا انناس شوي وكنت بدي افتح كصة الطوشه اللي صارت بينها وبين اهلي بس مكانش في وكت، وكنت بدي احكيلها عن اختي فيث.
وهينا بيوم الأحد.
في عندي صور احطهم، بس كل ما اكون بالبيت افتح البلستيشن ما يجي عبالي ادخل المنتدى من اللاب توب.. بعاود

لان معي شويت وكت خليني بسرعه احط الصور من اللاب توب ..~

الاغراض اللي اشتريتها في بلاك فرايدي

التلفزيون البسيط , ما حطيت الصوره من الوسط مشان في عليه بنات وممنوع صور البنات




البوت , احنا بنحكي عنه هيك بوت اللي هو الحذاء , طبعا مش اسم وهدا خلى اختي تستغرب اني اشتري بوت مش اسم , بس لاني بحاجه , وشوفته ابيض بسيط ولان الابيض الكديم تبعي اخوي اخده لانه عجبه , فا لازم يكون عندي بوت ابيض , طبعا مش مريح من مره , بس امشي فيه لوكت ما اشتري المحرز



وهدا نوع تاني لاني بحب البوات العاليه لاني قصيره , وبحب هيك تصميم حتى لو بوزه يعني من الامام معاق بس لانه تصميم ياباني حبيته , حتى لو عليه نجمه , لو كانت جمجمه احلى , ولانه مخمل وانا بحب الاشياء المخمل




وهدا الجينز اللي راح يصير المفضل عندي هو ليفايز 501 بحب التصميم تبع 501 مع انه نُمره اصغر انا بلبس 28 , لان 27 بشوفه حزك يعني بس مع هيك بكدرش اشوفه كدامي وما اخده لان لونه بين الازرق الفاتح والسكني اللي هو الرمادي






واخر شي هو الليغن اللي هو التايت , وهدا كتير غالي ومع هيك اشترتيه لان لونه رمادي محيّر وانا بحب البس رمادي وكمان مُخمل فا يم توب .




||



هون بعد ما شبكت التلفزيون , راح تشوفوا تحت التلفزيون مش كتيرو اضح الديفيدي لان مرات بحب اشوف انجل , راح تشوفوا البروجكتر عالشمال وتحته البلستيشن , ولاب توب تبعي اللي هو لينافو y520 , مره حكيت راح اصوره ولحد الان ما ورجيته الكم , اشتريته اول ما نزل ب 1200$ لما سألت حد من اصحابي طازه نصحني فيه وبصراحه ما اندمت كتير رهيب وعجبني , بعاود اصوره ان شاء الله .

||



هون اللعبه اللي حكتلكم عنها تومب رايدر اللي اول مره بلعبها وهيك بتكون سهله زنخه , مع انها كانت المفصله عندي الا هاي النسخه , وكريمات الشعر اللي حتى لو رخاص عجبوني كتير .

||

بعرفش اد عندي وكت احط باكي الصور ,, بشوف وبشوفكم ..~

بدك تصاحبني اعزمني ع كهوه مع بكلاوه , بس بكلاوه الضفه مش امريكا .. هاي صوره بعرفش ليش بحبها وحبيت احطها بالمدونه مع انها مش اشي محرز



||

الضمه اللي عنجد لحد الان مبسوط عليها لانو اخوي اشتراها بنفس يعني من نفسه من جوى ولحد الان مش ذابله , عكس اللي انا دايما بشرتيهم يومين وعطول بذبلوا .






||

راح احط صور هيك بحب احطهم بالمدونه لانهم عاجبيني, او عاجبني اللحظه اللي بصورها , او الاقتباس اللي بضيفه , كلهم بايامي عالسناب لان بستخدم السناب كا ذكريات














||

صحيح هون المقبره اللي حكتلكم عنها



||











بشوفكم عخير ان شاء الله ..

امبارح بالليل اتكاتلت مع اختي فيث، وحكتلها ( اد راح اضلك تحكي معي بهاي الطريكه تجيش تحكي معي) وهي حكت ( انا مش جابرك تحكي معي) حكتلها ( خلص اسكتي) من كتر ما فكعت معي، طبعا برضاش احكيلها اخرسي او سكري تمك او حكي زفت زي ما هيا بتحكي معي، ليش؟ لانو في احترام عندي ومستحيل اغيره مع ناس بيني وبينهم نفس الدم، وسكرت البلفون وفكعت كهر، والأكثر انو ملكيتش حد افضفضله، بتصدكوا، ليش لما تخنكني الدنيا بلكيش حد، ليش عكلي الزفت اللي بحارب الكل، ولما اكون بحاجتهم بكدرش اروح احكي معهم لاني مكاتلتهم، بكونش الي عين احكي معهم، المهم وبنص الليل بعتتلي حوالي عشرين مسج بانو ( انا طيبه وبسامح) هي بتكصد حالها ومن هالحكي الفاضي، استني استني، هلكيت صار الحك عليا؟ هلكيت انا الغلطانه؟ واللي بمدح حاله بكون كزاب، طيب هي طيبه بس الحك عليها عليها، يا سيدي، مكملتش المسجات لأنه حكي فاضي عندي، ولا رديت عليها لانو فعل فاضي هههه بس اتعملت درس منها، واليوم الظهر بعد ما خلصت شغلي، بيتصلوا عليا اني اشوفهم، بكصد خواتي لو نص ساعه، جابولي كهوه وكيك لانو معروف مير كاسه الكهوه اشي مميز عندها ، حكينا شوي، وكان التعامل بيني وبين فيث ولا كأنه في اشي، بس جواي متعلم درس وانا بحقدش ع أهلي، بس بتعلم، شوفنا صاحبه فيث اسمها صابرين وانا بصراحة بحترمها لصابرين، يعني صبيه شافت الويل بحياتها وقد حالها جباره وبحب الجبارين، فا صارت تحكي صابرين ( الدنيا بتفتح باب وبتسكر باب) بليز يعني تحكوش عن الدنيا وحلاوتها كدامي لاني مش متفائله، حكتلها ( الدنيا معانا دايما البواب مسكره) وبعدها فطست ضحك بصوت عالي، انو مش لازم احكي هيك، بنفعش!



هلكيت برى كلشي، اد حضرتك متابع المدونه وبدك تتعرف عليا يا ريت تيجي، لاني كرفانه وبدي اتعرف ع ناس جداد، وتخافش مش راح اكلك، كنت من المنتدى أو من برى، شب أو صبيه، تعال .. شكرا



كمان ما بينفع اعمل المدونه صوتيه؟ يعني بصوتي؟ ممنوع! مين لازم اسأل؟ لان إذ بينفع بيكون اشي اسهل الي وبسيط خفيف.

محدش حكالي اشي بخصوص المدونه الصوتيه، فا أن شاءالله، بس افضى واكون بالدار اجرب اشوف شو اعمل مشان تسمعو صوتي (غمزه) هههه. عم اعمل اغراء هههه

مش عارف امتى اخر مره اجيت ع المدونه، بس أسبوعي كان متعب كالعاده، ومكاتل، ولحالي، ومشتاكه لامي، اد بتلاحظو الي فتره بجيبش سيرتها بعدين بخبركم، واللي اكتشفته اني ضغفانه كتير وهاي مش خبريه ووجهي خربان، يعني بس ليلتين بالاسبوع بنام بالدار والباكي شفتات ليل وبنامش بالنهار فا بصراحة جسمي خربان ووجهي تعبان ونفسيتي متوتره، وحتى الليالي اللي بنام فيها لازم اصحى بدري ع شفتات نهار، عنا بالبيت مشاكل وعند خواتي، لولا انا ملتهيه بالشغل الزفت وبكرفه، حكى معي صاحبي بعد اسبوع ويوم واحنا من مره مش حاكين وانا استغربت انو اجى يحكي، يالله شو استغربت وطلب مني اكون اطلطل عليه ووعدته، ولما اجيت اتصل عليه ما رد، حكيت بعكلي طريك غير مباشر انو خلص بدوش يحكي معي، او يمكن عنده ظرف، هاي شغلات مش لازم اتعب حالي فيها لانو اللي بيجي والله معنديش مشكله بحكي معه واللي بدوش يجي كمان معنديش مشكله والله، لأنه عالجهتين هاي شغلات بسيطة مع المشاكل والكصص اللي واكعه فيها، يعني لا هي كصه شوفت حال ولا كصه ثقل، كصة انا مش ماسك ورابط حد، اعملوا اللي بدكم اياه، يبي مليش ساعه مبلش شفت الليل بس مهدوده لانو كان عليا شفت نهار، الله يهونها واراكم .