مأساة روح {هالكه} في اوراق تائهه ~

السلام عليكم ..~

مكانش عندي وكت اني اشتاك للمدونه حتى , اجت كصص صعبه كتير عليا , وصلت لمرحله اني اترك امريكا , واهلي لما سمعوا هيك وخاصه امي , عطول اداينت مصاري وكطعت التكت وهيها عندي ههههه , وكمان انا اخدت اجازه لفوق الشهر من شغلي ههههه لانو البرميل تبعي كب وطفح ومش كادر اتحمل ,, والحمد لله اليوم اللي هو الاربعا كان اول يوم بعطلتي , عندي كتير كصص احكيها بس بعرفش اد راح اتزكرها لما يجي الوكت لاكتبها , وكتير مبسوطه انو امي عندي الحمد لله , بعرفش اد راح ااتابع ع المدونه ولا اتركها لانو وامي هون بستخدمش كتير الكمبيوتر او عالم النت بشكل عام , بس راح احاول لان بنبسط بوجودي هان ,كمان اتوقع ارجع للبلستيشن وللقرأه وخاصه انو امي جابلتي كتب معاها , غير انو ظهري اله فوق الاسبوع مرضوض ويمكن مشعور لاني اوقعت وقعه قويه فوق مهو كان يوجع , وبكدرش اعمل كتير كصص الا بس اضل متمدده , وهيني وانا اكتب بلّش يضرب برق ويوجع .. اشوفكم عخير

السلام عليكم ..~

يبي كديش حكي كان جواي جايه اكتبه , وأول ما فتحت المدونه واجيت اكتبه طار , امي ضغطها بضل يرتفع لمعدل الخطر وباخدها ع الدكاتره والمستشفيات وكله نفس الحكي , اضّل اتابع في الدوا اللي معاها وما تفكر وتشغل بالها , وخايف عليها كتير , وملهاش اسبوعين هون وعندي انانيه انو بديش اخليها ترجع عالضفه , لسا ما اشبعت منها , بعرف انو صحتها ابدى بس مش كادره , وظهري الحمد لله الي كم يوم احسن بكتير الحمد لله , بس حبي كمان وكع واتكسّر وهيه اسبوع بالفرشى , الله يشفيه , دايما هاي كلمه الله يشفيه بحسها مسبّه , وهاي اول مره امي بتيجي هون وما ببعت اشي معاها لاني سمعتّه كلمتين بخصوص الهديه , خاصه انو ما بعت مع اختي ايمان اللي اجت هون قبل امي , وحسيته خجل وحس فيها انه مقصّر , لانه كل ما حد ينزل ع الاردن ببعت اله هدايا مرتبه غاليه بلاوي , وهاي المره بعتت اله واتشارك معي اخوي واحد بالهديه لانه صاحبه ع العظم , اما هلكيت هو بعتلي مسج انه ما عرف شو يبعت الي مع اختي ايمان , حكتله (اللي بده يبعت ببعت وانت بتعرف كديش بحب الفضه والمداليات وبعدين بديش اشي منك لان حضرتك كلشي بتحكيه لامك وبديش امك تعرف عشان لسا بضّل حاطه امل ).. هو بعدها ما رد عليا . وبكصد بالامل انو بتفكر انو في نصيب وهو فش , حكتلكم بحب اكون عشيقه ومش مع مبدأ اخد اللي بحبه وغير اني اتخيرت بينه وبين امريكا وانا اخترت امريكا , ومع هيك لانه من الانواع اللي بايعين حياتهم لليوم بهددني انو بس يشوفني ما راح يتركني بحالي وعلى قد ما بعرف كديش الشباب كزابين ع كد ما انا مصدكته بهاي الكصه , لانو قبل ما اجي ع امريكا صارت طوشه وكان بده يمزع الجواز تبعي واخوي واحد ادّخل بالكصه وكله عشان صحه امي , بس بضله اغلى شب على قلبي ينعن شكله , محدش بعد هالعمر دخل قلبي , ينعن شكله الله يشفيه . اختي اماني طلع معاها الصداع النصفي مش متاكده من اسمه بس فش علاج الا الراحه وتتجنب الازعاج وهي بتكدرش , حتى بطلنا نحكي معاها تلفونات عشان كلشي بتعمله بحياتها بوجع راسها وبغمى عليها من شده الوجع , وحكولها بس عليكي تتأقلمي مع الوجع , اتخيلوا , مع كل شي بنتعود عليه وبنتأقلم معاه , حتى كمان الوجع لازم نتعود عليه , اتزاعلت من زمان مع اختي ايمان وعندي حقد مش كادر انسى شو عملت كتير كصص معي , عم اتعامل معاها زي عوايدي وزي كانه مفش اشي صار , بس داخليا كتير زعلانه لحد الان , بضل تكزب صايره وفي كصص بنفعش اضل تكزب عليا عشان مصلحتها وعشان تمشايه لانو دايما في كزبها بتوقعني بمشاكل وبتخسّرني , وخاصه لما توقعني بمشاكل مع الناس , لانها من النوع الكسول واللي برتكنش عليها لا مبالايه , يعني بكون حد من معارفنا طالب اشي منها ولاني بعرفها مش تبعت هيك كصص بسألها (ايمان بدك تعملي هدا الاشي ) بكون جوابها ( عملته وخلصت ) وبعدين بمر الزمن ليجي هدا السخص ويسألني شو صار بالكصه ليش مش عاملينها , ولما اسال اختي بتحكيلي ما انا حكتلك انتي يا مير اعمليها , ايش ؟. مهو هدا الاشي البكهر انو لهيك سالتك مشان اد ما عمليتها انا اعملها , بس هيها كدبت وتلات مرات عملتها , لانو كل مره احكي بعقلي مش مشكله الله يعينها , بس الله يعينا كلنا على مصايبنا يعني , مش هي لحالها عندها مصايب .. وغير انه صايره صلبتجيه كلشي مير انتي ادفعي , ولو كان هدا الاشي الها على قلبي زي العسل وربنا شاهد انو احب ما عليا اشتريلها الها هي , بس مش لدار حماها , وبس مره واحده وبعدها حكتلها بدفعش انا مش اغنى منهم وانتي بتعرفي , وأخر شي كمان صار لما طلبت اشتريها من موقع عالنت ودفعت 200$ وسالتها لاني مش مؤمنه بكل مواقع الشرا عالنت , لهيك بسال , بس سالتها هي وحكتلها جربتيه انتي هدا الموقع ؟ حكتلي اه ؟ وطلع نصب الموقع فوق ما خسرت 200 $ , كمان بطاقه البنك تبعتي انسرقت وحد اشتري فوق 5000$ وهو معيش الا 300$ بحسابي وقتها , وعطول تبعون البنك اتصلوا عليا والله رحمني ما صار دين عليا , وعطول شطبوا البطاقه , اكتشفت انها النوع الخبيث اللي بيظهر حاله طيب واهبل وبعرفش اشي وهي بالزبط هيك بس بنفس الوكت بتكون تحتانيه , يعني بتحب تظهر حالها هيك عشان الناس تحبها وعشان مصلحه , وغير اني كتير كرهت تصرفات منها مع الناس بالضفه , انهم ولا اشي , بكره الناس اللي بتنسى شو هي وشو اصلها وهي مش احسن منهم , بس بنفس الوكت بعرف انو كله تفشش وضغط من كلشي زفت بصير معاها , لهيك كل تصرفاتها هي كبت شو هي بحياتها هون , بسس اكيد ضليت ساكت وما حكتلها لانها صايره كتيره حساسه وبرجع بحكي من كلشي زفت صاير معاها فهي حره , بس هاي كصص بحب اكتبها لاتزكرها عشان احذر منها , وخاصه لما صارت كمان طوشه بينا بخصوص البيت اللي انا واخوي متأجرينه وانو مش عاجبهم وبدهومش يجيوا عنا , وانهم شافوا واحد بمنظقه زفت لسا من فتره صار فيها طخ ومات حد يعني منطقه تجار مخدرات , وحتى البيت اللي شافوه لسا اصغر من هاد وبعرفش وين عقلهم , المشكله هي ما بفكروا لابعد من منخارهم , ودايما من العجله تبعتهم وهدا التفكير الديّق بوقعوا بمشاكل وبرموها عليّا لاني الشمّاعه اللي بتحملها وبتحلها , وانا ازهكت , لهيك صرت من بدايتها احارب مشان ما يرموا مشاكل عليا , وكعدت معهم وفهمتهم وهم بس ضلوا ساكتين لانو كل كلامي صح ومع هيك لسا بدهم الدار وبرمضان كمان , اكعد برمضان اناقل بالعفش والاغراض لحالي وظهري رايح فيها , وهدا كانت الريشه اللي كسرت ظهري , لهيك حكتلهم ( انا راح اترك كلشي , وبدش اوراقي وكل صبري وتضيع عمري والشقى والتعب والسهر , بديش امريكا , انتو استأجروا الدار اللي بدكم اياها بدوني , وانقلوا العفش بدوني , وانا خلص راح انزل عالضفه عند امي وابوي اشرفلي ) وبالزبط بلشت احكي مع المحامين وسبحان الله محدش وقتها رد عليا , حتى التسجيل الصوتي ما زبط , وحكيت مع امي وابوي , واكيد انجنوا ) لهيك امي سحبت حالها واجت عندي والتغت قصه الدار الجديده اللي بدهم يعيشو بغرفه من مطبخ وصاله وكلشي . اما بخصوص سفر امي فكان تعب وقهر وحاله , امي سافرت الاثنين عندهم ووصلت الجمعه عنّا , والشرق الاوسط سابقنا بالوقت بحوالي 11 ساعه , بالاول امي سافرت من الضفه على الاردن , وبالاردن راحت عليها الطياره لهيك راحت عتد بيت حبي وطلعت تاني يوم عالمطار , ولانو راح التكت تبعها دفعت مصاري من جديد , ولانو فش طيارات ياخدوها من الاردن على ولايه شيكاغو , راحت بالطياره من الادرن ع نيويورك , ولانو في تفتيش بخوّف على المسلمين طبعا عشان امي لابسه ع راسها , لما وصلت الطياره نيويورك كعدوا يفتشوا فيها وراحت عليها كمان الطياره اللي من نيويروك علينا هون سانفرانسيسكو , وعلييها كمان تستنى يوم , واستنت يوم بالمطار , واجت بطياره من نيويورك هون , ولما اجت هون لان الطياره الاصليه سابقه بيوم , وشناتيها فيها لما شوفنها ما انبسطنا لانو فش شناتي ووجها مش على بعض ههههه لا حول ولا قوه الا بالله على كل التعب والتعتسه معانا , يالله ع النصيب , عنجد شر البليه ما يضحك , وبعدين حكيت لاخوتي يشوفوا المكتب ليسألوا عن الشناتي ورجعوا فاضين وانجنيت , طلعوا مش سائلين من اصله , ارجعت انا وامي نسال والحمد لله لكيناهم ,لسا ما خلصت المصايب , في التفتيش بينيويورك رموا لامي نص الاغراض اللي جايباها , وطبعا امي انكهرت ع الاغراض , ولحد الان امي متغلبّه بالنوم عشان تغير الجو , وكمان ظغطها عالي والله يحميها , بضل اصحى بالليل اطمن عليها وبضل خايفه , الله يطوّل بعمرها وبعمر جميع الاميات والاهالي يا رب ..~
يا سيدي كله بهون وكلشي مؤقت , فيه منه كدب هاي الجمله ..~
يمكن اصحى وامحي الكلام !

السلام عليكم ..~

في سر صغير عملته بالمشاركه السابقه ومحدش انتبه عليها واظن راح اعملها دايما ..~

كل سنه وانتو سالمين حتى لو متأخره , وان شاء الله رمضان كان حلو وخفيف عليكم , بالنسبه الي كان عطلتي من شغلي وهالشهرين من اسوء الاشهر عليا وعلينا بشكل عام , كان يجي عبالي مرات ادخل المدونه وبس ادخل المنتدى عطول اعاود اطلع , ولسا الحياه صعبه وصغيره واظن كل ما تشد بتعاود ترخي وهيني بستنى لترخي , ارجعت لشغلي وقرفي , امي لسا هون وكتير تيجي عليا ايام بدي اخسرها عشان صحتها عالاخر مدهوره , واحكي الاشي الوحيد المصبّرني بالهدنيا هي , وان شاء الله عوده للمدونه ومجرياتي وكصصي الممله وحياتي الكئيبه , والاشي التاني البشع اني فلسّت مصاري , وتركت شغلي مع شركه البارت تايم , وتركت شغلي مع تايلر اللي هو الكلب لانه باخر فتره صار يمرض كتير وصرت احزن عليه وخاصه لما اعرفت انو صابه المرض العاطل وكل لحظه معه بضّل بخوف انه يموت معي , وصايره ضعيفه انا ومعنديش مقدره ع اني اتحمل , لهيك تركت الشغل معاه , وامي اكيد زعلت لانو بخسر مصاري , بس بعرفش مالي انا كرفانه كتير , وحتى بضل اتكاتل مع امي وخواتي واخوتي وكل حد بحكي معه , ومليش كم يوم راجعه عالشغل واكرهت كل شي اكتر بحياتي , لدرجه هديك المره بالشغل صفنت وحكيت بعقلي " شو الشي اللي الزابط معك يا مريم ؟"
الله يشفي امي وجميع المسلمين ان شاء الله ..~

السلام عليكم ..~

اليوم هو الاربعا عندي بتاريخ 6\27\18 وعندي الساعه بعد 11 بالليل ..~

بدايته اجت عنا اختي فيث من الصبح ودايما لازم هي اللي تصحيني وبكون مش شبعانه نوم , وكتير حكي صار بينا وامي معانا , وكالعاده اتكاتل معهم , افطرنا واشربنا كهوه وبعدين سحبنا حالنا واطلعنا , اول شي لاني مفلسه ومعيش مصاري , كنت محوّش مصاري لهيك حطيتهم بالبنك وبعدين اتحوجنا انا وامي , وكان على ابن اختي هوبز موعد مع الدكتور لانه طول رمضان كان يضل مريض ويضلوا بالطوارئ بنصاص الليالي لان كان عنده زي حساسيه على كل جسمه ومش عارفين الدكاتره من شو , لهيك بعد ما صح موعد مع مستشفى كبير اسمه ستاندفورد , والحمد لله اطمنا مش هالاشي الكبير والبخوف حتى لو الحساسيه بتخوف عليه , ولانه مرض كتير وامي كتير خافت عليه , شوفناه اليوم بعد اكتر من سنه واحنا ولا مره شوفناه لمشاكل كتير , وبعدها ارجعنا عالبيت , وامي اليوم كانت صايمه اليوم .. هدا كان كل مجريات يومي والحمد لله مكانش عليا شغل ..~

||

شوفت فلم , وحكيت باجي بحكي عن مجريات يومي لانو مليش نفس اشوف اشي او اعمل اشي

||



وهديتني ورده فرجيتا لاصحابي .. وتمسخرنا عليك .. وكبيتها بالزباله

~

السلام عليكم ..~

اليوم الخميس 6\28\18 وعندي الساعه بعد العشره ونص بالليل ..~

كان اليوم من الايام اللي اتسكرت بوجهي بابين !

بدايته اصحيت حوالي ع 10 الصبح مع انه كان عليا مقابله عشان الشغل , وكنت بالتخت ومليش نفس اكوم منه , واللي صحّاني اختي فيث , مكنتش متاكد اد راح اشوفها قبل ما اطلع ع المقابله , فكرت راح تيجي الظهر عنا , بلشت اجهّز حالي مشان المقابله , بس اجاني تلفون من المسؤوله بالشغل انو اتأجلت مقابلتي لتصير بعد بساعه من الموعد , حكيت احسن وعملنا فطور وافطرنا بسرعه حتى ما لحكَنا نشرب كهوه لاني اتأخرت , بس الحمد لله اختي هي اللي وصلتني على مكان المقابله الجديده , اوصلت ع مكتب الوظيفه الجديد ع الموعد بالزبط . وهو بلشت اشوف اد بكدر اشتغل بمكان جديد لانو زي ما حكيت تركت شغل كتير , وكان اليوم عليا مقابله عمل مع شركه جديده , اول ما عبرت الشركه حسيت انو ما راح اعجبهم , دايما عندي هدا الكلام براسي انو كل ما اروح ع وظيفه جديده ما راح يوافقوا عليا , وكانت اللي بدي اعمل مقابله معاها حتى متأخره , وحكولي استناها , كعدت حوالي ربع ساعه اللي هي جايه , اول ما شوفتها ما عجبتني وخوفت منها , عندي فوبيا من الناس صايره انا , صرت مكدرش اتحمل اتعامل مع حد جديد بحياتي , او لقاءات مع ناس , بديش انافق ولا اجامل وهدا اشي خلاني اخسر الوظيفه اليوم ,كعدت تسأل اسأله بخصوص شغلي وكم سنه الي بالشغل , واسأله كتير بتخص الشغل , وانا كنت مش عبعضي بعرفش مالي , وكنت اجاوبها زي شو ما بحكي لحالي , راحت عن بالي اني بمقابله واني لازم اكزب واختار الاجابه اللي هم بدهم يسمعوها مش اللي انا بحكيه لحالي , ولما سألتني ليش بتشتغلي هدا الشغل , حكتلها لانه شغل بس , ما عجباها هدا الحكي , لسا منيح ما حكتلها بشتغله عشان المصاري , ولما شافت السنسال اللي برقبتي وهو علم فلسطين جكمت بوزها عالاخر , وحكتلي استني برجعلك , ولما رجعتلي حكتلي متأسفه يعني واحنا مش بحاجه حد بالوكت الحاضر , سحبت حالي واطلعت من المكتب وكأنه كيس طحين على قلبي وانشال ,كتير ارتحت , كانت لسا امي واختي بستنوا فيا بالسياره وحكتلهم بالزبط شو صار , ما حكو اشي لانو بعرفوا مريم كرفانه الشغل ..~
بعدها روحنا كلنا , خواتي واولادهم على مكادونلز بعيد لانو فيه العاب للصغار عشان احنا الكبار نحكي وعم يضلوا يلعبوا , بعدين اجتنا الخبريه الزفت التانيه , وعفكره انا ازعلت مش عالخساره , ازعلت ع انو الاشي بزبطش بدرجه الجنون , والي فتره صاير احب كهوه ستاربوكس اسبريسو مع تلج , صايره تعدل المخل معي ..~
اسهرت شوي مع امي نحكي قبل شوي , وكتير امي اليوم غلطت ع حبي , هي حاسه انو في شغله بحياتي مش زابطه عشان حبي بضل يدعي , ومعاها حك ..~

||



ليلة أخرى حزينة ومليئة بأفكار سيئة لن يفهمها أحد ..

~

السلام عليكم ..~

اليوم الجمعه 6\29\18 وعندي الساعه بعد العشره بالليل .

شايف حالي تعبانه وبدي انام بدري , بس لانو نايمه بالبيت بحب استغله باني اكتب بالمدونه , من خبريات امبارح وكصصها اليوم كنت زعلانه ومنكده , اصحيت حوالي تسعه الصبح ع صوت امي وهي بتحكي بالتلفون , واعرفت انو خواتي راح يجيوا بعد الظهر عنا, لهيك بسرعه افطرت واشربت كهوه , لانو كان ناكصنا كم غرض حواجه , لهيك اطلعت انا وامي واتحوجنا , ولما ارجعت كان براسي اشوف شو كصه التلاجه , لانو امبارح وانا سهرانه اسمعت صوتها عالي وبخوف , صوت المروحه تبعت الفريزر , فا شلت كل الاغراض من الفزيزر وشوفت بانو في ملان تلج حوالين المروحه , واتزكرت مصلّح تلاجات بالضفه لما خربت تبعتنا وكانت المشكله بالتلج , لهيك ضليت اشيل بالتلج عنها , وررفعت الشبك لاشوف لسا ملان تلج جواها , والحمد لله كلشي تمام , وبعدين الا اجو خواتي وما طوّلوا عنا وحتى انا كنت منكده ومصعبه ومعنديش بال , وهدا كان كل مجريات يومي , كان يوم خفيف الحمد لله ..~

||



.

عفكره اجيت ابعت ارسال المشاركه واجاني تلفون والي ساعه بحكي وراسي بده ينفجر وطار النوم , حكيت مع (يمكن) فوق الساعه , اتوترت وانا احكي معه , ليش دايما ربنا ببعتلي هيك اشكال , كلهم نفس الاشكال , بياعين حكي رومنسين وطاكعين بس بضحكوني , بضحكوني ينعن شكلهم .~

السلام عليكم ..~

اليوم التلاتاء 7\3\18 وعندي الساعه بعد العشره ونص بالليل !

بما انو بشتغل شفتات ليل يوم السبت والاحد , لهيك ما حكيت عن مجريات الايام , اما الاثنين كان مكسور عليا نوم لهيك نمت بدري , حتى اليوم التلاتاء كنت متمدده عالتخت وفكرت اجي اكتب او احط راسي وانام , وما شوفت حالي الا هيني ..~

؛

بالنسبه ليوم السبت , كان يوم اتحوجت فيه اغراض كم كطعه وصرفت مبلغ تحويش مرتب , لان هاي السنه هي اول سنه ما بشتري فيها اغراض محرزه الي لاني كنت كتير مدايكه بالمصاري , ومع هيك ضليت احوش بمبلغ لاشتري شو ما بدي بدون اي حكي ونكد من المبلغ اللي بدي اصرفه , هدا كان الاتفاك مع امي , بس للاسف كتير شغلات كان لسا بدي اشتريها بس امي مرضت من الشوب لهيك ما كملت الشرا , راح احكي عن الشغلات اللي اشتريهم واصورهم بمشاركه مع الوكت ..~

لهيك طول النهار يوم السبت كنت برى البيت, ولما اوصلت البيت جهزت حالي واطلعت على شفت الليل ..~

||

اما بخصوص يوم الاحد , خلصت شغلي ع 8 الصبح وعطول طلبت اوبر واجيت عالبيت لاني كنت تعبانه كتير من الشغل , لانو شفتي 12 ساعه سحبه واحده وفي ليالي بيكونش في بريك لارتاح لو ربع ساعه , لهيك اوصلت البيت وركاض رميت حالي عالتخت , حتى فطور ما افطرت , نمت واصحيت الظهر يمكن كانت الساعه 1 , اللي صحّاني اختي فيث , دايما اختي فيث صايره هي اللي تصحيني , اجت مع بناتها عندنا , وحتى اخوي واحد يمكن فوك الاسبوع مش شايفينه لان صارت مشاكل عنا بالدار وهو السبب , اجى عنا واخوي تلات اخد اجازه وضل بالبيت واجتمعنا , اما اختي هوبز ما كدرت تيجي , ورجيتهم شو اشتريت عشان في هدايا , بس لسا كانت الاوضاع متوتره بينا مع اخوي واحد , ولما ورجيتهم البوت اللي اشتريته , اول ما رفعت الكرتونه اختي فيث بتحكي "لمين هاد " , نط اخوي واحد بيحكي " لحبها" , عنا بالبيت بيعرفوا انو دايما بشتريله , وبعدين بعد ما اتسهلوا كل واحد ع بيته , بسرعه رتبت البيت وكنت مهدوده بصراحه , وجهزت حالي وكان عليا شفت ليل ..~

||
يوم الاثنين شوفت (دون) هو شخص بشتغل معه ودايما بضحكني واظن حكيت عنه بمشاركات سابقه ,دردشنا شويه قبل ما اطلع من الشغل , انا عنجد بحب شعره لانه ناعم طويل , وكان عليا شفت نهار خفيف , لهيك بعد ما خلصت شفت الليل سحبت حالي واجيت ع شغل النهار , وشو كنت ؟ مش كادره افتح عيوني , كنت اغفى وانا بالقطار , ما صدكت اوصل الشغل مشان اعمل كهوه واشربها , واحب ما عليا لما تيجي اختي فيث تاخدني من الشغل وتوصلني البيت , كعدت عنا شوي وبعدين اتسهلت , وانا كنت جد تعبانه ومهدوده بس معرفتش انام , ما صدكت يجي الليل لاحط راسي وانام ..~

||

اليوم اللي هو التلاتاء , اصحيت بدري لاني نمت بدري , واجت الصبح عنا اختي فيث , كعدت شوي وبعدين اتسهلت , واشتريت كم غرض من الامازون , كمن بحكي عنهم مع الوكت , وبعدها اجت اختي هوبز كمان كعدت شوي واتسهلت , وبعدين اجى اخوي واحد وحكتله اد بس ياخدني ع مكان اشتري كم غرض وبرَوح لحالي , واتحوجت كم غرض واجيت عالبيت , ضليت متمدده عالتخت بين الاكل والمشاهده وهيني ..~

؛

في الشهرين اللي غبت فيهم في كصص كبيره صارت , منها حبي انتحر , بس الله سلّم وضل عايش حتى لو مكسّر , بعاود بطيب المهم ما مات كافر ..~

السلام عليكم ..~

نرجع لابسي لشهر خمسه ..~





ابلّش من اليمين لليسار ..~

بودره tarte , بعرفش بالبودره لاني بستخدمهاش , وهاي جربتها مرتين وعجبتني بالمرتين كتير , اي مناسبه كبيره راح استخدمها ..~

ماسكارا doucce , كتير استخدمتها وضايل فيها شوي وبتخلص , لاني صبيه بعشق الرموش وعندي المسكارا هي اكتر شي بستخدمه حتى بالبيت , وهاي كتير استخدمتها , بس هل راح اشتريها او كانت مفضله ؟ لأ ..~

روج nyx نمره smlc04 كمان مش ضايل فيه كتير ودايما بستخدمه وبحب ادمج الوان معاه , دايما بشنتي وين مكان باخده معي , حبيت انه ما بنشّف الشفايف , ولونه جدا طبيعي عليا ولا كأني حاطه , هل راح اشتريه او مفضّل ؟ لأ ..~

آيلانير eyeko , انا بفتره صايره اكره كلشي بغيّر من شكلي وبأخد منه , يعني لما احط الايلانير صاير اكون شكل تاني بدونه وبجبش هيك , صايره احاول كد ما اكدر اكون طبيعيه , ولما استخدمه احب احط خط رفيع جدا , لهيك لحد الان هدا الايلانير ما جربته لسا جديد ..~

بلسم رش للشعر من briogeo , رهيب جدا هالسبرّي , دايما بشنتي , احب ريحته , احب مفعوله بتنعيم الشعر , احب انه بيضّل شعري مرتب لفتره طويله , ولما استخدمه بعد الحمام عالشعر المبلول جدا رهيب ,, هدا النوع راح اشتريه باقرب وكت ..~


؛

السلام عليكم من جديد ..~

مجريات اليوم الاربعا 7\4\18وعندي الساعه بعد ال 11 بالليل ..

اصحيت وكانوا خواتي مقررين انو نعمل اليوم هش ونش اللي هو البربيكيو , اصحيت ع تلفون من اخوي واحد , بده نروح نعمل الهش والنش عند الشط او عند المنتزه اللي جمب الدار , حكتله عنا صغار وبنخاف عليهم , بس اسال هوبز , بس هوبز ضلت ع انه نعمل عنا بالبيت , بعد ما اصحيت وافطرت انا وامي وشربنا كهوه , امي اتغيرت صحتها عطول واختلفت , راحت ضلت متمدده , وما حبيت احكي لخواتي عشان ما تتأجل الكصه , وخاصه انو خواتي بدهم نعمل اليوم مشان اولادهم معطلين من المدارس الصيفيه , والاغراض اللي اشتريناها , بعدها بلشوا يجيوا خواتي ورى بعض مع اولادهم , وطول اليوم واحنا مشغولين , وامي طول اليوم كانت بالتخت , وكنا مش عارفين كلنا شو نعمللها , كل دواها بتاخده ومش عارفين مالها , وبالليل بلشت تمرض بزياده وهيها بسالها اخدك ع المستشفى , بس بدهاش لانها بتكره المستشفيات ولانو ما الها تأمين وكل ما نروح بندفغ مبلغ مرتب وهدا كمان بزيد من مرضها ..~

||

حبي حكى معي من شوي وبسأل عن اخوي واحد انه مش عبعضه واد في اشي , حكتله شوفته اليوم بس عادي كان , وبعدين اخوي واحد خربت الكصه بينا وبطلنا نحكي لبعض اشي , الا اد الاشي بخص اصحابنا وحبي ,خربت الكصه مع اخوي لانه خذلني باشي كبير , باشي بحياتي مع اتوقعت انه يخذلني فيه , وهو داخليا عارف , بس لما الشخص يبّدل مصلحته على اي اشي بالدنيا , مع اني ولا عمري خذلته , ولا عمري حطيت مصلحتي كدام مصلحته , بس الدنيا والزمن بغيّر , لهيك هو بالنسبه الي مش سند , واهلي عارفين هدا الاشي والكل استغرب من تصرفه , والكل استغرب انو ع كد ما كانت علاقتنا قويه ع كد ما هلكيت لأ , بس كمان الكل بعرف انو مريم مش بحاجه سند لهيك مش هالاشي , بس داخليا عن نفسي ازعلت , ازعلت لما الكل يشوفك قوي وكد المسؤوليه , وانه بتوقعش وبتتعبش , وانه بتكدر تعيش لحالك , بس مرات بتعب وبكدرش وبزهك , ليش محد يجي يحمل عني ؟ لو شوي ! اخ بس اللي مكتوب عليه الشقى راح يضله طول عمره !


الله يشفيكي يما , ويشفي جميع امهات المسلمين .
~

السلام عليكم ..~

ابسي لشهر 6 ..



الاقنعه مش عارفه اد جربتهم ولا لسا

؛



؛





لونه ما عجبني , وبياخد وكت لينشف , وبسرعه بيطلع من الاظفر , من مره ما عجبني

؛




هدا اول ما شوفته وكعت عالارض من الضحك , شو هاللون البشع هاد ؟ ولما جربته وورجيته لامي وانا مش موكف ضحك , امي عجبها بتصدكوا ؟ اكيد مهي كلشي زهري بتحبه , وكلشي زهري عندي هي اللي بتشتريه الي وغصب عني البسه عشانها , بس لما دمجته مع روج اعطى لمعه وعجبني , بس مع هيك ما بتخيل حالي احط اشي بلمع زهري ..~

؛



مرطب شفايف واعشق اي اشي مرطبات , ولسا ما جربته لانو عندي ملان وبديش افتح وارمي الا لوكت ما اخلّص اللي بستخدمه ..~

؛



كتير رهيب وعجبني واتوقع راح اشتري متله , برايمر مع مرطب , استخدمه اغلب الايام اللي اطلع فيهم بعد ما احط السيروم , احب ملمسه وريحته , وبالعاده عندي هاي المركه رقم تنين كتير بحب كلشي بوقع تحت ايدي منهم ..~