مأساة روح {هالكه} في اوراق تائهه ~

السلام عليكم ..~

اليوم هو السبت والساعه حوالي 8 بالليل , 12\29\18 ..~

؛

بس مريضه ومصايب لهيك غايبه , ولما افضى ساعه ساعتين بالنهار قبل ما اطلع ع شفت الليل , يا بلعب بلستيشن يا اما بقرأ , او بسرح , وكل ليله شغل , وعم افكر اخد هيك اجازه اسبوع لانو عنجد صحتي بالارض الجسدي غير شكل , واحده من الصبايا رجعت تشتغل معانا , وضايل كمان واحده , وان شاء الله ساعتها بخف الشغل علينا واد بدي اخد اجازه في حد ياخد مكاني , دايما بفكر اجي اكتب في المدونه , واحكي معكم , بس بحكي عن شو بدي احكي ؟ مفش اشي حلو ينحكى او يضحّك وكله مصايب كبيره ورى بعض , حتى هدا الاسبوع كنا بالمستشفى وكانوا دموعي ينزلوا وانا لحالي , واعمل حالي كويّه كدام خواتي , بس انا اضعف واحده , وحتى مخبيّن الكصه عن امي , على امل تطلع الفحوص منيحه لانو خايفين , ومحدش بيعرف الا انا وخواتي , بس الدكاتره ما خوفونا , لهيك ان شاء الله كل خير , كتير بتيجي الينور في بالي وكلامها بانو حياتنا مسلسل عندهم .

اليوم عطلتي وبكرا كمان الحمد لله , صارلي حوالي كم يوم مش كادر اصيب اشي بالدار من الوجع , والدار كايمه كاعده , وبكونش مرتاحه اشوفها هيك, وبشتغل شفتات الليل غصب عني , بس الحمد لله اليوم صرت احسن , عنجد شو نفسي احكي عن مجريات الايام .

صارت الساعه 9 بالليل وكنت ع تلفونات مع امي واخواتي , نرجع ..~

اليوم اطلعت من الشغل , وكان الشغل صعب بس لدرجه اتحمله , او اظن عشان كلشي بصير حواليا , اوصلت للتبلّد وانو كد ما الشغل صعب مش لدرجه صعوبه حياتي وفي شغلات اهم افكر فيها , وروحت اشتريت كم غرض عشاني قبضت , ولما تكون النفسيه مش ولا بد , كتير بتفشش في صرف المصاري , صرفت نص القبضه او حتى اكتر , بخبركم عنهم ان شاء الله , اوصلت البيت حوالي 11 واشي الصبح , كنت بالباص اقرأ بالجزء التاني , وكنت كمان تلفونات , لما عبرت البيت وشوفت كيف انها مش مرتبه , اتنكدت , بس بكدرش اشتغل , لهيك رميت حالي عالتخت وكنت جعانه , اخوي كان عامل فطور , اكلت وارجعت اتمدد عالتخت وساده يلعب معي , بعدها عملت كهوه , والكهوه كانت هديه من اختي ايمان , عشان كل انواع الكهوه العربيه اللي جربتها من الامازون ما عجبتني , اوصلت لمرحله الكآبه عشان الكهوه مش عاجبتني , لهيك هي راحت على محل عربي بطحن الكهوه , جابتلي وعجبتني , مع انه مش زي رهابه كهوه الضفه , بس احسن من تبعت الامازون لانها جديده , لهيك اليوم اشربت كهوه ليوم الكهوه , كنت شوي هيك ارتب البيت وكل ما اشوف حالي مش كادره اكعد , كنت اشوف في مسلسل الهامشيه , وكنت اقرأ في المانغا , او العب توم رايدر , صارت الدنيا العصر الا ايمان بتتصل , حكت اد بتلاكى معهم رايحين على المنتزه , حكتلها ليوم تاني , لانو فش وكت يعني ما بوصل عندهم الا الدنيا المغرب , وعشاني مريضه السواكه بتتعبني غير شكل , بعدها ضليت عالتخت , واجى اخوي تلات عمل عشا , وبالعاده اد بنام في الدار بعمل ستيك لحمه لاني بحب الستيك اللي هو بيعمله , اتعشيت , واتحليت , واجيت اكتب الا التلفونات , وهيني كمان ارجعت اكمل ..~

؛



الناس بتيجي عشان تروح ..~

؛



نرجسيه بحت , يعني لو تكعد من هان لبكرا تتفلسف عليا وتنتقد فيا , انت واللوح واحد ..~

هدايا كرسمس 2018..~

بيعرفوا اني بحتفلش فيه , بس مع هيك بعطوني هدايا لانهم هم بيحتفلوا فيه ..~

ليله الكرسمس اشتغلت , ويوم الكرسمس بالليل كمان اشتغلت , هم هيك بيحتفلوا , اجت ليله الكرسمس يوم الاثنين , واجى يوم الكرسمس يوم الثلاثاء , بالليله اشتغلت مع كارمليتا , اجت المسؤوله ستيفاني علينا حوالي بنص الليل , كعدت عشر دكايك تتفلسف وكانت طافيه لانها شاربه كتير ومش مخليّه , بعرفش وين عقلها اجت علينا بعد ما كانت في حفله , بس انا متأكده مكانش موجود عقلها وكتها , وع كد ما بشوف الناس الطافيه , الا اني دايما لما اشوف تصرفاتهم , واسمع كلامهم , بكدرش اتحمّل الا اني اوكع ع الارض من الضحك , لهيك اصاحبي دايما بضحك عليهم كدامهم بس بنفس الوكت بحكي " سامحوني " , ستيفاني تحكي وتمسك حالها وهي تحكي , انا اعطيها ظهري لاني مش كادره امسك حالي عن الضحك عليها , وبعرف اني راح انطرد من الشغل لاني زودتها , ومع هيك ايدي ع تمّي , واهرب من كدامها , وكارمليتا كانت التانيه تضحك عليا انا عشاني بضحك , ما صدكنا تنقلع , وبلّشت كارمليتا تقلّد فيها , اما باليوم اشتغلت مع فرجينا ..~

؛



؛

جورج بالعاده بعطيني مصاري اكتر , امبين امفلّس , بس بحب تعيده براس السنه بدل من الكرسمس على البطاقه , وصحيح اعطاني علبه شكلاته روشيه بس اكلتها قبل ما اصورّها لاني باكلها على نهار ..~



؛

بالنسبه لشغلنا اعطونا كل واحده بطاقه هديه من محل اسمه تارغيت بقيمه 50$ لكل حد بيشتغل , ودايما بخليّها لامي لانها بتحب تارغيت



؛

اما اختي اماني هيك بدون مناسبه الكرسمس واحنا طالعين اشتريلي شكلاته الموند روكا , والحكت اخد صوره اليوم قبل ما تخلص اخر كم حبه فيها



؛

وكارمليتا اعطتني شكلاته وسمسميه , بالنسبه لشكلاته غودرون ولا مره جربتها اظن , ولسا حتى ما فتحتها فا بعرفش كيف طعمها . بالنسبه لشكلاته توبليرون كتير بحبها مع الكهوه





؛

للاسف بس هدول هدايا الكرسمس , السنه الماضيه كان في من ماري وجوي , واللي قبلها كان في من ماري والينور ومارج وجورج , اخ بس كل سنه الاشي بخف ..~

السلام عليكم

اليوم هو الاحد والساعه 9 بالليل , 12\30\18 ..~

الحمد لله اليوم انا معطله ونايمه بالدار , اكيد نفسيتي احسن شوي عشان فش شغل , اليوم اصحيت شبعانه نوم , يالله ما احلى النفسيه لما اكون شبعانه نوم , ضليت ع التخت ولفيت في البلفون , وبعدها اتصلت ع امي وكانت نايمه , وابوي اللي رد عليه ومن كلامه امبين هو التاني بده ينام وانا صحيته , حكتله تصبحو عخير , وبعدها كومت عملت فطور , وقررت اني انظف الدار لانو فش معي وكت تاني عشان من بكرا برجع عالشغل , بس طبعا كنت لسا مريضه ولازم كل ما اتوجع ارتاح , وضليت للظهر , وكنت اتأخر عن شرب الكهوه , واتزكرت كارمليتا لما كعدت احكيلها حياتي ركض في ركض , حتى الكهوه بطلّت اتهنى عليها , بشربها وانا بشتغل , وبديش اكون هيك , لهيك سبيت على كل شي , وحكيت بدي اتهنى اليوم ع الكهوه واشربها وانا كاعده , وبالزبط كعدت اشرب في الغلّه نص ساعه , فنجان ورى فنجان , وبعملش اشي الا صافنه وسارحه بالسما , وبعدها كملت شغلي , الا التلفون برن وكان اخوي تلات وحكى خلينا نطلع نتحوج , هو حكالي امبارح بس مكنتش عنجد كادره , وفش وكت بالايام الجايه , لهيك حكتله تعال خدني , اطلعنا اتحوجنا , واحنا بالطريك خواتي بيتصلوا عشان جايين بالطريك علينا , حكتلهم احنا مش بالدار , لهيك اتأجل جيّت خواتي عالدار ليوم تاني , بعد ما خلصت حواجه انا واخوي , اجينا ع البيت , هو عمل الاكل و انا رتبت الحواجه وكملت ترتيب الدار , واتعشينا , وبعدها , شغلّت البلستيشن والعبت كم ساعه وهيني ..~

بس اجاني تلفون من صاحبتي صوص ومكدرتش احكي معاها عشان كنت مع اخوي , بس من مسجاتها انو حُبها كان العرس تبعه هاليومين ومنزّل فيديوهات ومبسوط , وهي كانت مكهوره , وكد ما اتصلت عليها ما بترد امبين نايمه , يا ريت تتصل عليا الليله , اخ بس راح كمّل حياته , وبعرف كديش صوص حبته , وكديش ضّحت , ومش عارف شو اعمل عشان اساعدها لاني بصراحه انا بكرهه وبغلط عليه وكنت عارف انه حيوان وحكتلها بس مره واحده , ولما شوفت كديش بتحبه تركتها تتهنى معه , مع انه من جواي عارفه انهم مش لبعض , بس بهيك كصص لازم نتركهم يغرقوا عشان ما يصير الندم على اي شي حلو ممكن يصير وما صار , وكتير شغلات حلوه صارت لسنين بينهم , اما يجي الندم ع اي شي مش حلو فهدا اشي طبيعي بالدنيا , كنت احب اسمع كل كصصهم , بكل تفاصيلها الصغيره , كنت لما اسمع الكصص من جواي احترم صوص عالاخر , ولحد الان هي ملكه الرومنسيه عندي , هي شو هو الحب , اخوي تلات كان يحكيلي " اللي بحب ما بيتزوج " يعني اي حد حب ووعد وما اخد اللي بحبه , ما يروح يتزوج غيره عشان سنه الحياه ويكملها لحياته , يعني كون وفي للي حبيته , بس مين بيعمل هيك ؟الله يهونها عليها , راح اضل استدعيلها مشان ما تمرض من الكهر , كل ما بيخطر ببالي شو هو عمل وشو هي بتعمل مرات عشان تجاكره , بتزكر " كلٌ على درب , كلٌ بلا قلب , كأننا ما هوينا " بحكي انا راح اصير هيك ؟ اد اتزوجت راح اجاكر حبي ؟ لسا من يومين بحكيلي " انزلي اتزوجك مشان نلم المتعوس ع المتعوسه " وبرجع بحكليه " مش لبعض " وبحكي " ما اسمعتش " .

؛



لهدرجه بسرعه بنتسى ؟

؛



بخونش , بدّور ع الاحسن .~

شغلات .. عشان هجرت المدونه بدي اعوّض .. ومزاجي منيح ومعي وكت .. ولاني بفتره برمي شغلات ما بستخدمها , عشان بحاول اخفف من كلشي حوالي لاخلّي الحياه ابسط واسهل , الاشي اللي بشوف فيه حكايه بخبركم عنه ..~
؛



شيسيدو هالشركه كديش بحب كريماتها , هي شركه يابانيه على ما اظن وهي اول شركه غاليه اشتريت منها كريمات , وبتزكرني ببداياتي في الصرف المحرز في امريكا , وحبيت كل الكريمات من الترطيب للغسول لكريم العيون , بالوكت الماضي كنت بستخدم الغسول وعندي نوعين , بالايام بخبّر عنهم , بس هم مرمين بالحزانه لانو السنه هاي وجهي صاير ميكدرش يتحمّلها , اي شي بحطّه منها عطول وجهي بصيبه حساسيه , لهيك مرمي بالجرار وزعلانه عليه وع سعره ..~
مع انه بكون الاستعمال التاني بعد ما خلّصت العلب الاولى من الغسول والكريمات , هدا التونر كديش بيبيّض الوجه , وبوحّده , عشان هيك بحب كريماتهم , لانو من الكريمات اللي بنفس اللحظه بريّح الوجه وبيعطي نظاره وبياض .. الكريم للوجه امي حبّته لهيك اخدته معاها ع الضفه , اما الغسول كنت استخدمهم بفترات وهلكيت متوقفه لانو في بديل , والتونر هو اكتر اشي مؤذي منهم لهيك من مره ما بستخدمه ..~
اسعارهم غاليه فوق 40$ للكطعه الوحده بس بصراحه لولا وجهي حساس , ولا كان لا يعلى عليهم من فعاليه وملمس وريحه ..~

؛





مجموعه الطواكي تبعاتي , وهاي اول سنه بتمّر وما بشتري , يمكن عشان ما لكيت اشي يعجبني , او استكفيت , اغلى واحده الرماديه , واكتر واحده بلبسها البيضا , خاصه بالايام اللي مش امشّط شعري لانها بتغطّي كل شعري ولانها خفيفه وما بتحزك عالراس ..والحُمر هديه من اخوي واحد يمكن حكيت عنهم بالمشاركات الكديمه , والوحش اول واحده اشتريتها ..~

؛



من الشغلات اللي رميتها لما نظّفت حزانتي هدا الافرول , ولانو ابوي كان يحبّه عليا لهيك اخدت وكت لارميه , لانه بزكرني بتواجد ابوي هان وابتسامته الله لا يحرمني منه ويعافيه ويرحم اموات المسلمين , بس عشان ما بلبسه وبديش شغلات ما بلبسها اضّل بخزانتي , ورميته مشان التمزّع كِبر وصار جسمي يبيّن عشان انصحت ..~

؛



هدول اللّفافات للشعر كديش بحبهم , وكديش بخلّوا الشعر ثابت لايام , وكديش سريعين وانا استخدمهم , بس مشكلتهم عشان شعري طويل ما بكفّوا ولازم الخُصل تكون صغيره , لهيك اشتريت نوعين , واندمت ع النوع التاني , لانو ما بثبت عالشعر , يعني عيارهم ساعتين وبرجع بسحل شعري ..~



هدا هو النوع التاني اللي رميته , النوع الاول لليوم بستخدمه , ولازم مره بالشهر استخدمها .

؛



هاي الشكلاته من هاواي اجتني من حمات اخوي واحد , لانو لما اخوي راح ع هاواي جاب منها وحبيتها كتير ..~



~

السلام عليكم ..~

اليوم هو الاثنين والساعه 5 واشي المغرب || 12\31\18

اليوم راس السنه وراح اشتغل فيه والله يستر , بعرفش اد من مكان شغلي راح اشوف الالعاب الناريه , بس متأكده راح اسمعه .

كنت بفتره الراحه تبعتي من شوي , عندي ساعه بالنهار اللي بحبش اعمل فيها واشي وبحب اتهنى على كاسه الكهوه اللي بشربها , واريّح اعصابي , يمكن اكون اكتب او اقرأ , بس عالاكيد بكون اسمع اغاني , بتكون الساعه عالاغلب ع وكت المغرب ..~

امبارح نمت بدري لانو اليوم كان في موعد لاختي اماني مع الدكتور , وهدا الشهر الله يسهله علينا , لانو في كتير شغلات مصيريه ومواعيد مصيريه فيه , بالنسبه لاختي في خوف عليها بخصوص مرضها , راح احكي مع الوكت , يا رب الله يشفيها وما يطلع اشي معاها , اصحيت حوالي ع 7 الصبح من اصوات الهوا بدها تخلع الدار , ومن صوت الشجره واغصانها اللي بضّل يضرب في الكزاز تبع شباك غرفتي , ومن ساده , عطول افطرت وجهزت حالي , الا خواتي بيتصلوا وبيحكوا هيهم كربّوا يوصلوا , اجو عندي حوالي ع 8 الا اشي لانو عياده الدكتور قريبه على داري , اوصلنا ع الموعد , ومع هيك كل كلام الدكتور نص نص , يعني لا هو معروف اد في او فش , كله من الفحوص والتصوير , وعشان فتره اعياد مش كل الدكاتره بيشتغلوا , لهيك راح نستى للاربعا ت تتصل وتعمل موعد عشان تعمل الفحوص والصور والله يستر , واحنا بالعياده امي بتتصل علينا كلنا , واحنا مخبيّن الخبر ع امي , بدناش اياها تعرف عشان معاها ضغط وسكري وخايفين ع صحتها , واتصلت عليا 11 مره , وغير ما اتصلت اربع او خمس مرات ع كل واحده من خواتي , وبدناش نرد عشان عند الدكتور , وبس اطلعنا من الدكتور اتصلنا عليها وكزّبت عليها انو "كنت نايمه والبلفون صامت وخواتي اللي صحوني وهم يرنوا عالجرس " وامي زعلت وسكرّت البلفون بوجهي بعد ما واكلت بهدله من ابوي " انو امي ارتفع عليها الضغط عشان ما رديت وانو في اشي واحنا مخبينه " دخيل الله شو قلب الام والابو بحس , وعاودنا اتصلنا عليها نراضيها وعاودنا اتزاعلنا وسكرت البلفون كمان مره بوجه اختي , والله عايله احنا بنزعل من بعض وبنرضى بخمس دكايك بس , اشربنا كهوه وكنا انا وخواتي متوترين ومنكدين , وراح انضل ع اعصابنا طول هالشهر , بس يا رب من عندك يطلع كلشي منيح معاها , بعد ما خلصوا الكهوه اتسهلوا , وانا بسرعه رتبت الدار وعملت كم شغله , وبعدها كملّت في الهامشيه , وهيني ..~


اليوم حتى حكيت لخواتي ميلادي باخر شهر واحد , بدي تعملولي حفله , وبعدها وكعت ع الارض من الضحك لما اتخيلت شو حكيت وخواتي كعدوا يضحكوا , بانو مير اللي ولا عمرها تبعت هيك اشي , هي بنفسها بتطلبه , اللي بتهرب منا يوم ميلادها عشان محدش يعيد عليها , وبعدها اندمت لانو بديش,كلها مزح لتغير الجو والحاله النفسيه تبعتنا ..~

؛



" لا تجلس وحيدا , اكعد لحالك احسنلك "



الحياه كابوس ..~

السلام عليكم ..~

اليوم هو الاربعا والساعه 8 واشي بالليل || 1\2\19

اووه كتبت 19 , هدا رقم مميز عندي لانو اول حرفين من اسم حبي , الجحش .~

ع كد ما بالي مشغول , ونفسيتي مش كتير , بس بحارب في حالي مشان ما اغيب عن المدونه ,الحمد لله ارجعت لنظامي بالشغل وهو الاربعا بكون عطلتي وبنام بالبيت , بس بكرا برجع للكرّف , يالله بعين الله , كلها كم شهر وبيجي رمضان ع خير وباخد اجازه , وكمان لسا براسي اشتري كميرا فوجي فيلم ..~

مش راح كتير احكي عن مجريات ايامي خلال هدا الشهر , وخاصه بخصوص اهلي لانو متل ما حكيت في شغلات مصيريه صعبه علينا وبديش احكي بالوكت هاد , لانو ع اعصابنا وحاله , لهيك راح اهرب والتهي بشغلات تانيه في سبيل ما اهجر المدونه ..~

صحتي من مره , كتير متوجعه , وكل انواع الدوا ما بتفيد , والشغل بزيد الوجع , ووجهي امبيّن عليه المرض , خواتي بيطّلعوا عليا بشفقه لانو عارفين فش حل , بس بعرف حالي كمان شوي , كلها كم يوم يا بمرض وبروح ع الطوارئ يا بتحسّن وبرجع حديد ..ومش شايف وجعي وومرضي هالاشي مع مرض خواتي والكصص الكبيره تبعتهم , لهيك لشو الدلع ..~

كصه مزعجاني وهو في نمل بالبيت , واللي بكهر مش ع اشي , هو بس بمشي طوابير بدون سبب , وانا بكره النمل لسبب , وهو في منه بدّل ع الترحال لهيك بكرهه , بزكرني بالايام اللي امي بتكون بدها تسافر من عنا , وبزكرني بكصه ستّي لما حكت ع ايام 48 كان يطلع نمل في بيوتهم ودليل ع الترحال .. وكديش بشيله وبحط منظفات وحاله بيرجع وبقتل ملان وبيرجع والله بشوفه انتحاري جاي , الله يبعده عننا ويريحني , بديش ارحل من الدار هلكيت بديش ..~


من كتر ادماني ع المانغا طلبت الفصلين اللي مش مترجمين انجليزي , طلبتهم من الامازون بس عشان بيجيوا من اليابان بياخدوا اشهر , واليوم وصل واحد منهم , بشوف حالي متعّلقه بالجمادات اكتر من البشر , ولما شوفت المجلد كديش انبسطت , عنجد انبسطت ..~


؛

السلام عليكم ..~

اليوم هو الخميس والساعه 5 واشي المغرب || 1\3\19 ..~

اصحيت بدري لانو عليا شفت صباحي , والحمد لله كنت شوي شبعانه نوم , جهزت حالي واخدت فطوري معي واتسهلت عالشغل , وطول ما انا اسوك وامي تتصل , وعشان عجكت الصبح , مكدرتش امسك البلفون عشان احكيلها بسوك , وكنت انجن لما يجي مقطع حلو من اللي بسمعه وينقطع من صوت رنه البلفون , احكي يبي استني يما استني بعقلي , وصحلّي احكي معاها تواني " يما بسوك برجعلك " ولما اوصلت الشغل الحمد لله لكيت مكان اصف السياره كريب عشان في تنظيف الشارع , سبحان الله تنظيف الشوارع في منطقه شغلي الصباحي في الايام اللي بشتغل فيها , وكعدت احكي مع امي عن شو الكصص اللي صارت عنا وهي نفس الشي , وكنت كمان افطر وانا احكي معاها , وحكيت لامي عن واحد من الشباب الي بده يتعرف عليا, وحكتلي " ذوّبيه " عنجد اضحت ع كلمتها غير شكل ..~

وبعدها دخلت الشغل , وصار تلفونات كتيره بيني وبين خواتي , ع كصه مهمه بخصوصي وبخصوص الدار , وغير انه في موعد لاختي عشان ابنها في المستشفى مشان العميله اللي عملها , وكان الشغل رهيب لطيف حلو , ختى اخدت معي عالشغل المانغا مشان اقرأها وانا فيه , دخلّتني في مزاج حلو,..~

بعد ما خلصت الشغل , واجيت عالبيت وحمدت الله اني لكيت مكان اصف السياره كريب ع دارنا , عبرت البيت وكان في موعد مع حد من المعارف لازم احكي معه كميرا , اخ شو بكره هاي الكصص , وانتهيت من هالكصه اللي كانت زي اشي ضاغط ع روحي , وكمان المحامي عم اتصل عليه بردش عليا , وانا عنجد مستعجله عشان الورق تبعي وخايفه , وصرت حاطط تسجيل صوتي مرتين ومش راجع الي , وهديك اليوم حكيت لمرته بدي موعد منه , شوفتها ما عجبها , يا رب يرجعلي احسن ما يطلع عقلي واروح اطب هيك على دارهم ..~

وبعدها شوفت الحلقه الاخيره من الموسم الرابع من الهامشيه , وبعدها قرأت , وكتبت في دفتر مذكراتي , والعبت مع ساده , واخدت البريك تبع يومي وكان فيه كهوه وشكلاته وعنايه في حالي, وبعدها هيني ..~

يوم معجوك كصص وافكار وحاله , بس صحتي الحمد لله احسن الجسدي , بس النفسيه مش كتير وخاصه عليا كرف الليله ..~

؛



"انني اود ان اعرفك مره والى الابد , ان افضل لحظه للتعارف هي في رايي اللحظه التي تسبق الفراق "
ب 5 \ ف 3 \ص 148 \س 23

||




"يصفك بانك (قبر) انا انا فاقول انك (لغز) ولم استطيع ان احل هذا اللغز حتى الان "
ب 5 \ ف 3 \ ص 149 \ س 11

||


من الشغلات اللي اشتريتها ..~:




كاسه الي وصحن لساده , 15$ , بعرفش ليش اشتريتهم مع انه ملان عندي كاسات , بس عشاني بحب ساده وبدي يكون اشي مشترك بينا ..~

احنا بنحكي للهر 7 ارواح , وهم بيحكو 9 ارواح ..~

السلام عليكم ..~

اليوم هو الجمعه والساعه هلكيت 6 الا اشي المسا || 1\4\19

كان شفت الليل صعب كتير , صايره اتعب جسدي حتى فيه , وبطّل الي نفس اضحك , يعني العاده بفتح التلفزيون وبحب اسمع واشوف في المسلسلات الكوميديه وانا بشتغل , بس مش عارف ليش هاد الاسبوع بطّل اشي فيهم يضّحكتي , كان الشفت مع كارمليتا , حتى هي التانيه تعبت ..~

اطلعت الصبح من الشفت وكنت مش مصدكه اوصل البيت , بس كنت ناسيه اني دافعه لبطاقه الباص لشهر 1 , وكد ما عصّرت مخي امتى شاريها مش عارف , عبرت الباص وبايد المصاري وبايد التاني البطاقه , حكيت اد اشتغلت كان بها , ما اشتغلت بدفع , بس اشتغلت واستغربت , ولما قرأت شو مكتوب ع المكينه اللي في الباص , انو بتنتهي البطاقه في شهر 2 , حكيت يا ربي امتى شاريها انا تبعت هدا الشهر , اطلعت بالباص الاول واتصلت ع امي احكي معها , وبعدها انزلت منه واطلعت في الباص التاني , وكنت لسا ع تلفونات مع امي ..,~

انزلت من الباص وبعدها اوصلت الدار , وكان في موعد مع حد عشان كصه , وخواتي بدهم يجيوا عشان هالحد , وكان الموعد بعد الظهر , لهيك حكيت مع خواتي الصبح اشوف اد لسا عالموعد , وطلع اه , حكيت خليني انام لوكت ما هم يجيوا , كنت بالاول جعانه , افطرت , وكان ساده حزين لانه زهكان لحاله , وانا حزنانه عليه كمان , بكدرش اطلعه برى عشان بعملي مشاكل , لهيك كعدت العب معه وبعدها رميت حالي عالتخت ونمت حوالي نص ساعه ..~

اصحيت ع البلفون وكانت اختي اماني , وسالت شو نوع البرجر والكهوه اللي بدي اياهم , وانا بفتره بحب برجر الجاج , وحليب اللوز في الكهوه , وحتى حكتلي شو مال صوتك ؟ خكتلها نايمه , وهو عنجد انا اليوم من مره مش عبعضي , سكّرت البلفون , وحكيت بلكي اعرف ارجع انام لوكت ما يجيوا , بس معرفتش , كومت من التخت وبصراحه مش عارف شو صار بعدها , صايره انسى , المهم اجى عبالي اطلع اكعد ع العتبّه تبع الباب بالشمس , اخدت البلفون واطلعت اكعد ع العتبه , وحبيت احط اغنيه (رساله من امراه) كديش بجبها هالاغنيه تبعت فايزه احمد , بس امي كانت اضّل تحكيلي ليش بضّلك تسمعي اغاني حزينه هيك , كانت اضل تحكي يا اغاني شياطين يا اغاني حزينه , عشاني بسمع ميتل /m\ , وبعدين دايما والله بتصدف دايما , كل ما اطلع برى الاكي جارتنا المكسيكيه , كديش بكرها لان هي بتكرهني , وكنت اولها ارد عليها السلام وهي تعمل حالها مش سامعه ولا شايفه لهيك بطّلت , وصرت اقلب بوزي فيها زي ما هي بتعمل بالزبط , ويعني اليوم عنجد لاحظت انها وهي بتحكي مع جوزها كأنها بتغلط عليا , لانها بتغلط وهي عيونها في عيوني واكتر من مره , بس طبعا انا بكسرش عيني , وبجلطها وانا اضل اطلّع عليها ت هي تكسر عينها .. الا شوفت سياره خواتي ..~

اجو مع الصغار , وفي منهم واحد بخاف من ساده لهيك دايما كبل ما يدخل الدار بسأل وين ساده, وجابوا اكل وكهوه , وكان في كصص كبيره معانا ويا رب تستر , عطول اخدت كاسه هالكهوه وبلشنا بحكي وكصص , وبنستنى بالموعد , وحكتلهم بديش اكون معاكم بالموعد وهم وافقوا , بس اللي صار اليوم , جرس الباب رن 6 مرات كان في توصيل من الامازون ( حبر للطابعه ) ( مانغا نانا المجلد 1 ) بحكي عنها مع الوكت ( تراب لساده) ( اكل لساده) ومره رن كانوا بنات اختي اماني , ومره رن كان اخوي تلات , والرنه الاخيره السابعه كانت صاحب الموعد , كل مره يرن الجرس يطلعوا خواتي يفتحوا الباب ع امل انو صاحب الموعد , وانفكسوا 6 مرات , وانا عنجد اضحكت من قلبي , لانو كل مره يطلع مش صاحب الموعد ويجيوا عليا بدهم يقتلوني , مكنتش متوقع انو التوصيل يجي ورى بعض وكل واحد لحاله , ومكنّاش عارفين انو اخوي ولا بنات اختي كمان جايين , لهيك كل مره يرن الجرس , خواتي يحطوا الحجاب ع راسهم ويطلعوا يفتحوا الباب وما يكونش اللي بستنوه ..~

اجى صاحب الموعد , وما طوّل , وبعدها اتصل اخوي واحد وحكى معانا عشان بنشوفوش كتير , وبعدها عملت كهوه عربيه لانو بصراحه احنا عايله الكهوه الامركانيه هي مسح زور ما بتعدّل الراس , وملان عندي تسالي , ولسا ع حكي وحكي , واتصلت امي وكعدت حوالي ساعه وهي معانا عالخط , وبعدها اتسهلوا خواتي , بس الله يخليهم رتبوا الدار قبل ما طلعوا , مش الترتيب تبعي لانو كل واحد بيعرف باغراضه اكتر , بس المهم عندي المطبخ لاني عنجد بكره اشتغل بالمطبخ , وخواتي حكولي عنجد مش عبعضك يا مريم اليوم..~

بعد ما اتسهلوا ارتميت ع التخت الا امي بتتصل , وكعدت معي كمان ساعه , بعرفش مالها مشغول بالها عليا , وهي من النوع اللي بنامش بالليل , امي نومها خفيف , بتنام ساعتين بالليل ومرات تلات , حسب , لهيك لما تكون ليل عندها بكون نهار عندي , لهيك بتزهك وبضّل تتصل تحكي , وانا فش وراي اشي وبحب احكي معاها , عشان هيك مستغني عن الاصحاب لان هي بتسوى كلشي عندي وبتفهمني اكتر , وجيبنا سيره حبي وغلطت عليه , اللي صار انو مره من المرات هو حاكي لمرت اخوي اتنين " ولا عمري بنسى مريم وراح يضل نفسي فيها " ومرت اخوي حكت لامي هدا الحكي , حكتلكم كبل هالمره , انا واهلي متفاهمين غير شكل كله عشان بكون صادقه معهم وعشان الثقه اللي بينا , وامي بضّل تحكي "هو عشان نفسه فيكي انتي لحد مش متجوزه ومسّكره عليكي "وكل هالحكي وانا مش عارف بصراحه , لانو لليوم الا ما تيجي مره ويحكي " ولا مره بتخيّل انك راح تتزوجي " يعني عنجد مرات بحكي ماله هاد شو هالثقه اللي فيه انو مش راح اتزوج , وامي بدها اتزوج , طب انا شو بدي ؟ ..~ اخ عليا شفت الليله ..~

بعدها بلشت اقرأ بمانغا نانا ..~
كل حد عنده انمي مفضل وانا عندي انمي المفضل هو نانا , وعشان صايره بفتره حب قراءه المانغا لهيك حبيت ابلش بتجميع المجلدات تبعت نانا ..~

هدا الاسبوع راح يكون في لخبطه بالشغل وزياده ايام , وكمان كصص كبيره بخصوص اهلي ويا رب تستر يا رب ..~


؛

شكرا لكل حد متابع معي مجريات ايامي الكئيبه وحياتي الممله , واللهجه الصعبه , والصبيه الصعبه , يا رب تتسهل امورنا بالهدنيا ويجي كلشي احسن ..~

؛







لما ابلش احب ببلش الفراغ جواي ..~

||

ايش اشتريت ..~



متزكرين تبعت تومي , الدزدان ما عجبني , وحتى هاد مش عاجبني , شكله حلو وبجنن وبحب تصاميم ستيف مادن , دايما الاشي اللي بحبه بكون تصميمه , بس المشكله مش عملي , يعني بضّل محل الكبسّه يفتح , وكبير عالفاضي , مش عارفه بدي دزدان عملي وحلو , هدا حلو بس مش عملي , وتومي مش حلو ومش عملي ,,~
وسعره غالي ابن اللزينه , ندمانه اني اشتريته , وراح ادّور ع غيره يا ريت الاكي ..~

؛

السلام عليكم ..~

اليوم هو الاحد والساعه 7 ونص المسا || 1\6\19

اخر مره كنت الجمعه , وكان عليا شفت وكان صعب , بس انبسطت انو فرجينا اللي اشتغلت معي مش اوبري , في شغله بضّل في بالي هالفتره , وصرت احكي بدي اسال اختي ايمان اشوف شو رأيها فيها , بس مش جاي الوكت اللي نكون لحالنا مشان اسألها ..~

عم احاول اتزكر شو صار كصص معي امبارح السبت , كنت تعبانه ومريضه ونعسانه , لا عارفه انام ولاحتى الكهوه مساعده , اغلبه ضليت بين ترتيب الدار وبين الموسم الاخير من الهامشيه وبين القرأه , خواتي قرروا انو نطلع بدهم يعزموني عشاني كنت مش عبعضي يوم الجمعه , لهيك السبت اتصلوا عليا الصبح وحكوا بدهم يعزموني ع الغدا برى وانا بختار المطعم , انبسطت , وكعدت اجهز حالي , بعد ما جهزت حالي واجيت اطلع مع انه الدنيا مطر , الا ايمان بتتصل وبتحكي التغى المشوار , ابن اماني مريض واخدته ع المستشفى , وصارت تحكي ايمان اد نطلع انا وهي لحالنا , حكيت لأ , كيف هديك بالمستشفى واحنا نشم هوا ..~

وجينفر اتصلت عليا وحكت في تغير في البرنامج وانا انبسطت لانو عنجد مكانش نفسي اشتغل , لهيك نمت بالدار , ونمت متأخره , بس غامرت امبارح وخليت ساده يطلع برى , لاني بعرفه بحب يلعب في المطر , خليته حوالي 3 ساعات , كان يوم عادي , بس ارهاق مش طبيعي , صايره ضعيفه وكسوله ..~

بالنسبه لليوم الاحد , اصحيت شبعانه نوم , واصحيت ع ازعاج من ساده , يضل يعيّط وينادي , كومت ضربته كفيّن عشان يسكت لاني لسا بدي انام كمان , وكان بده يطلع برى عشان الدنيا مطر , بس حبيت اضل بالتخت كمان ساعه , لما اصحيت طلّعته برى , وعنجد انه مجنون , بحياتي ما شوفت هر بحب المطر , وبحب المي , لما يشوف الدنيا مطر كتير بضّل يعيط مشان يطلع يلعب فيه , ومرات بخاف يمرض , لانو بيجي مبلول غير شكل, ..~

وكان المطبخ كايم كاعد من عشا امبارح , بعد ما افطرت واشربت كهوه , بسرعه حكيت خليني ارتاح من المطبخ , خلصته واجيت ابلّش اكمّل في الهامشيه , الا اخوي واحد بيتصل وبيحكي جهزّي الكهوه احنا بالطريط عليكي , استغربت بصراحه عشان الدنيا كتير مطر , وحكيت شو بده يجيبهم عليا في المطر , اليوم اجتمعنا كلنا , اخوتي وخواتي والصغار , ضلوا عندي حوالي ساعتين , وبعدها اتسهلوا وهيني ..~

؛






كلامه تلج وعيونه نار ..~

السلام عليكم ..~

اليوم هو الاربعا والساعه 5 واشي المغرب || 1\9\19

صار اشي مش منيح معي , واتحطمت فوك ما انا محطمه من اصله , كنت على امل انو تكون هالسنه سنه خير وكل التعب والشقى والصبر وتضيع العمر والسنين يرجع بفايده , وكل سحابات الصيف طول هالسنين اللي احكي بتعدّي وبتروح , بس سبحان الله اللي بخته عظمه راح يضل عظمه طول العمر وما بعد الصبر الا القبر والامل مش الي ..~

هدا اللي صار معي خلص فش حياه الي وكلشي راح بالهوا ! لهيك بصراحه اوصلت لمرحله عنجد فش اشي زابط معي , ضايل شغله بتخص اختي , اد هاي الشغله لا سمح الله طلعت مش منيحه , بعرفش شو يطلع معي ويصير ..~

لما اطلعت من عند المحامي امبارح , والدنيا كانت ليل , وانا بنزل عن الدرج , شوفت انو العتمه بتبلعني وانا كل ما بنزل اكتر واكتر , وعيوني يرغرغوا , وما خبيت ع اي حد من اهلي انو اه زعلانه ومكهوره وبدي احرق الدنيا , طول الطريك بالسياره مع اخوي وانا بغلط وبسب , وما مصدّك اوصل البيت بديش دموعي ينزلوا كدام حد , واكيد امي اتصلت وحكيت معاها وابوي كمان , بس ما همني , همني بس انو بديش احكي مع حد وبدي انام بس , ضلت التلفونات معي عشان يخففوا عليا وانو ربنا ما بنساني وكل هالحكي اللي كلنا بنضحك ع بعض وبنكزب عبعض فيه انو بكرا احلى , مش معانا يا عالم انو بكرا احلى , لو بكرا احلى كان اجى من سنه , واال بدي اصير 28 سنه ومن عمري 19 وحياتي موقفه ..~

الاشي اللي بكهر انو اللي صاير معي بكدرش احكيه لحبي لانو راح ينبسط داخليا , اني راح اترحل من امريكا واني اول عن اخر برجعله , ينعن شكله بس , امي بضل تحكي انو هو السبب اني مش متوفقه بحياتي لان بضل يدعي ما اتوفق في امريكا مشان انزل وارجعله ..~

لا حول ولا قوه الا بالله , لسا مكهوره ولسا كل ما افكر بالكصه عيوني برغرغوا بزياده , لسا مش طيّب من الكصه لسا مجروحه منها , اتحطمت , لانو فش حل , خلص انتهيت عالاخر , راح كلشي عالفاضي ..~

بالعاده متعوده عالصدمات والخبطات لانو بتأملش , بس هاي المره حكيت خلص اوصلت ع الحفّه ومكنتش متوقع من مره انو الشغله ما تزبط , بس خلص سقطت ..~

|