مأساة روح {هالكه} في اوراق تائهه ~

السلام عليكم ..~

اليوم هو الاربعا || 10 بالليل || 7\17\19 ..|~

||

في البدايه راح اعمل كمان تحدي مع حالي هو بس اعطي حالي مجال اد بغيب عن المدونه فقط يومين مش اكتر , وراح اشوف راح افشل زي عوايدي ولا لأ ..~

؛

اصحيت حوالي ع 6 الصبح لاني كانت حاطط السياره في منطقه التنظيف , وخوفت اخد تكت , ومكنتش عارف انها الساعه 6 الصبح , كومت من التخت وما شوفتش امي فيه اكيد فش وكت , اخدت المفاتيح وطالعه من الدار الا امي بتنادي انو لسا 6 الصبح ارجعي نامي , ارجعت نمت وطول الوكت وانا نايمه بحلم بالسياره وبحلم بالشرطه وبالتكت , ع 8 الا شوي امي صحتني , اجى موعد تنظيف الشوارع روحت ركاض ع السياره شغلتها وحكيت وين انقلها هلكيت ؟ فش مكان وفش فيها بنزين حتى والعجل خربان , اتزكرت انو جيرانا مش بالدار وسيارتهم مش بالكراج , حكيت بدّخل السياره جوى والله يستر , بالزبط عبرّت السياره جوى الكراج وضليت ع العتبه باب البيت بالشارع استنى لتيجي سياره التنظيف وتنظف الشارع , والحمد لله اجت وبسرعه طلعت السياره من الكراج قبل ما يجيوا جيرانا وحدى يعرف , وانا بالسياره بلشت المسجات بيني وبين خواتي , من اول ما امي اجت هان من رمضان واحنا بنحكي بدنا نروح نفطر في مطعم , وحياه الله كل مره بدنا نروح يا امي بدهاش يا واحده من خواتي بدهاش , لاسباب كتيره بس هم وجه فقر , ازعلت منهم اليوم , بعدها حكو خلص بنطلع , بالزبط نص ساعه جهزت حالي انا وامي واطلعنا اتلاكينا معهم في المطعم المفضل عند امي , افطرنا بس طبعا حياتي كصص صعبه بتدخل فيها , زوج الكبيره اتصل وبده اياها بنفس اللحظه ترجع عالبيت , ما خلصت الصحن تبعها , وبعدها اتنكدنا وكلنا روحنا , لما اوصلنا عالبيت انا وامي فش مكان اصف السياره , وحسيت انو الهاند بريك تبع سيارتي خرب , ووكع قلبي عالارض لسا مليش فتره خربان الهاند بريك بالسياره الاولى وراحت ع المكب الزباله , واخ يا ربي , عطول وكفت السياره ع جنب , ورميت حالي ع الارض لاشوف السياره واد اشي انكسر فيها , مديت راسي تحت السياره الحمد لله فش اشي نازل , فش زيت عالارض , حكيت يمكن وانا اسوك خبطت ع اشي , ارجعنا عالبيت , ما كعدنا شوي الا خواتي بيتصلوا , لانو ما انبسطنا مع بعض الصبح وحكتلهم اد بكدروا نشوف بعض بعد الظهر نروح نعمل اظافرنا وصاروا يضحكوا , بس انا عنجد صرت اغصبهم انو لازم نطلع ونشم الهوى لازم انمتع حالي ولو يوم بالشهر , والحمد لله بعد حكي واقناع اطلعنا , اخدت امي ورحنا ع الصالون , واتلاكينا مع الوسطه وبعدها اجت الكبيره , وخلصنا , وكل واحده اتسهلت ع بيتها , اجيت انا وامي ع البيت وهيني ..~\\


||

اتفكت مع المدير اللي بشتغل عنده انو بدي يوم الاربعا يكون عطلتي , لهيك الحمد لله كل اربعا يوم عطلتي , كيف شغلي معي ؟ بحب الشغل بالكهوه كتير وبحب الزباين عالاخر , كتير لطفين , كتير بضحكوني , صح بتعب جسدي عالاخر , لانو الكهوه اللي بشتغل فيها بس واحد بشتغل لحاله ولانها في مستشفى يعني في اجر عليها , لهيك انا بشتغل شفت مسائي وانا عليا تنظيفها كمان لاني اللي بسكّر الكهوه وعليا حسب المصاري والكاش واعمل التقرير عن اليوم وشو عنا زياده ونقصان من الاكل وابعته للمدير ولصاحبه الكهوه , بس نفسيتي كتير تمام لوكت ما احسب المصاري , اد بجيبوا بنات يدربوا دايما بطلع حساب غلط بالمصاري ومبالغ كبيره وعشان ما يفتحوا الكميرا بنغصب اني احط المبلغ من مصاريا , ليش بديش يفتحوا الكميرا .؟ لاني بعمل تخفظيات كتيره للزباين وبعطيهم شغلات زياده وهدا بعمل ع طردي بس مرات في مشردين جايين ع المستشفى وبشفق عليهم انو ما اعطيهم الاكل ببلاش , مرات زباين بعرفهم بكونوش معهم المبلغ الكافي عشان يدفعوا وبضل دين شفوي ليوم تاني . غير هيك الحمد لله دايما ..~

||

ليوم لازم احكيلكم عن الزباين المدوامين , او عن تبعون الامن او تبعون التنظيفات , في واحد من اللي بشتغلوا في المختبرات صارله فتره بضل يضحكني ينعن شكله , وانا بصراحه اللي بضحكني بعزه , مرات بكون مسكّر الكهوه وبلشت في روتين الاغلاق من العد والتنظيف وبكون مشغوله ما بشوفه الا بضرب ع الكزاز تبع الكهوه عشان يخوفني , او بيجي يسرق اكل وبحكي بعدين باجي ادفع , ودايما الحيوان بيجي وكت التسكير , لانو بعرف اني لما بدي اسكر بديش حد يجي يأخرني عن التسكير , مره شو عمل ؟ اخد قنينه مي وكت التسكير وحكتله خلص سكرّت الكاشير بكدرش احط مصاري فيه خليه ليوم تاني تدفع , لما اجى اليوم اللي وراه احزروا شو جاب ؟ جاي 100 $ عشان يدفع حك المي اللي هي 1 ونص $ , اطلّعت عليه وحكتله بضحّكش اد امفكر انو اشي بضحك وانا وجهي وتصرفاتي فارطه عحالي ضحك .

||







-"انشروا الايجابيات "
-"حاضر بس تنشف السلبيات "

السلام عليكم ..~

11 بالليل من يوم الجمعه || 7\19\19 ..~

اووه احنا 19 الشهر ! صارلي نص ساعه عم اطفي اللاب توب واضويه عشان حضرته يمشي معي ويبّطل يعلّك جنني , كسّرت اظافري وانا اخبط فيه , اي شو هاد ؟! كل الكرف اللي بحياتي , والاشي اللي بدي اعمله مشان اخفف من ضغوط يومي مش راضي كمان يمشي معي , من كتر ما بكون مخنوكه بلف في قائمه الاتصالات في بلفوني بلكيش حد اتصل عليه اخبره عن سوء ايامي وحياتي , برجع وباجي احكي عنه هون , ومع هيك هيني ..~

||

بكرا شغلي بدري يعني لازم انام ومش جاي عبالي , كلشي سيء في حياتنا امي بضّل تحكي مع انه بنترضى عليكم وليش هيك حياتكم صعبه , بحكيلها لو فش رضا كان حياتنا اطكع , مهي حياتنا ماشيه شوي لانو في رضا لو فش كان عنجد اصعب كانت ..~

فش اشي بحياتي بس الشغل ومحدش راح يشتغل مكاني بكرا , وغير هيك اخوي حشر سيارتي والله يهونها عليا بكرا الصبح كيف اطلعها ؟ الله يستر ما اخبط السيارات , يبي كديش خايفه, مهي كل حياتي خوف اقسم بالله , وانا اسوك السياره بضّل تطلع اصوات بحكي خلص روحت فيها , حبي في بالي , يعني ماله اشي ؟ مش جاي عبالي احكي معه , واظن عرس صاحبتي بهدا الشهر بس بعرفش امتى , اخ يبي ليش هيك انا صايره ..~

||




متأكده اللي جواي تبع الليل مبسوط , وتبع الصبح مكهور لما اصحى , كديش بكره شخص الليل الل جواي لانو بخليني اندم الصبح ..~

السلام عليكم ..~

عفكره عاجبني هدا النظام اللي ماشيه فيه , اللي هو اعطي حالي يومين اغيب عن المدونه مش اكتر , يومين احسن من يوم واحسن من اسبوع , حتى مشيت بهدا النظام بحياتي , زي متلا اقرأ , اغيب عن الكتاب يومين , او شغله بالبيت لازم اعملها ..~

؛

امبارح شوفت فلم عدّل نفسيتي عالاخر من الافلام السوداويه .

؛


اصحيت بدري عشان اقضي مشواير مع امي قبل ما اطلع ع شغلي , وخلصت المشواير معاها وارجعنا ع البيت 11 , ومكناش مفطرين حتى , وحضرتها بدهاش ناكل برى , اجينا ع البيت افطرنا واشربنا كهوه وجهزت حالي واطلعت ع الشغل , بالطريك اتصلت عليا الفلبنيه غريس وحكتلي بدنا حليب للكهوه اد بشتري وبجيه الشغل , وبالزبط هدا اللي عملته , وبلش شغلي كان متعب وما كعدتش من مره , اللي صار بآخر ساعه بالشغل , اجى حد مكنتش متوقع انو يجي , اخو الاكس تبعي ,اتفاجأنا ببعض , وبعدها اجو خوااتي , مش جاي عبالي اكمل حكي ..~

؛

صارلي فتره طويله بوكفش اسمع هالاغنيه ..~

؛

السلام عليكم ..~

؛

ايش اشتريت ؟

زمان ما حكيت عن شو اشتريت , واغلب الشغلات اللي بشتريها بتكون من الامازون ! وكل هالكصص كديمه عندي بس لسا الصور موجوده عندي وبدي احكي عنها ..~

؛



انصعقت لما جربتها من انو عنجد بتحفظ الحراره , بتكعد 10 ساعات المي كتير بارده او كتير سخنه , بعد العشرساعات بشوف انو درجه حراره المي اتغيرت بس مش هالتغير الكبير , بالعاده بحب اشرب مي دافيه الصبح ومرات بحط فيها شويت ميراميه عشان معدتي دايما متوتره , خاصه لما كنت اشتغل شفتات الليل , فا كانت رفيقتي بكل الليالي , وبالوكت هاد اد اجاني مشاوير الصبح مع امي هي صارت تحب تستخدمها عشان تعمل شاي برى ..بالنسبه لسعرها وشو بتعمل بتستاهل ومش ندمانه اني اشتريتها وخلتني احب الشركه ..~


20$

||




من الشغلات اللي جربتها عشان الحب ع وجهي هو هدا القناع , هل خفف ؟ قناع ضوء جربته لوكت ما خلصت ال 30 جلسه , وكل جلسه كانت حوالي 10 دكايك اظن , كل يوم او كل يومين استخدمه مره واحده باليوم , بس كنت ما افتح عيوني لانو اشوف الضو مؤذي كتير ويعمل وجع راس لما افتح عيوني , لهيك طوال العشر دكايك انا مغمضه عيوني , كنت بالعاده استخدمه بعد التونر , وبعد ما اخلصت منه اكمل روتيني من كريمات ع وجهي , كنت عنجد اشوف نتيجه بانو ينشّف الحب بسرعه وما يزيدوا , خلصت ال 30 جلسه وبس عليا اشتري المحوّل اد بدي كمان , لانو القناع شغال ومش بحاجه قناع , بس الحمد لله يا رب انا بمرحله الحب خفيف هاي الايام وعطول بقضي عليه , لاني اتعبت ع بشرتي عشان اخفف الحب , هو سعره غالي بس نفع مع الحب بصراحه , يعني مش حكي فاضي ,و مش رهيب , معك مصاري زياده جربيه , المتعه من انو احطه ع وجهي كتير حلوه وكتير اكون مستمتعه ..~

40 $


||



كعدت فتره احب الشعر المموج ولحد الان , لهيك اشتريت هدا لانو حد نصحني بالشركه , هو عنجد بسرعه بعمل الشعر مموج , بس مشكلته انو ما بثبت , يعني اد ما حطيت مثبت شعري بعد ساعتين عطول بسحل , بحب استخدم الجحم الصغير اكتر اشي مشان بحبه يثبت وبعجبني الشكل , بس بصراحه ما بنصح فيه , لاني جربته كتير وبضّل يطلع معي كصه انه ما يثبت واكره احط المثبت لانو بعمل راسي زي الخشب ..~

100$

السلام عليكم ..~

اليوم الجمعه والساعه 9 بالليل || 7\26\19 ..~

||

معنديش اخبار جديده , بس شغل وكصص الدار , وقبل شوي وكع بلفوني بالمي والله يستر , هيني مدفيته بعرفش اد راح يشتغل او راح يخرب فيه اشي , بعرفش سو كصه المي ع بلفوناتي , اليوم شوفت الهندي وهاي اول مره بيجي وبضل كاعد بالكهوه , ينعن شكله كديش بحب عيونه , وكتير مرتاحه انو بكرا فش عليا شغل , عليا الاحد ..~

راح احكيلكم عن اشي كبير عملته من حوالي كم اسبوع , اللي صار هو واحده اسبنيوليه بتقرأ في البطاقات , كيف اللي بفتحوا بالفنجان , بس هي بتفتح بالبطاقات ,حكت تعملي واختار البطااقات , هيك عن مزح , وكعدت تحكي عن صفاتي وتفكيري وكصص كبير محدش بيعرفها الا انا , وحكتلي في واحد بحياتك بضل يدخلها ويطلعها , حد بضل وراكي , حد بضّلي في عقله وبفكر فيكي , وانا عارف عن مين بتحكي , بتحكي عن حبي , حبي حكالي زمان بعد ما تركت الاكس" ولا بتخيّلك اني اشوفك متجوزه ",وبالزبط ما زبطت كصتي مع الاكس ولا مع حد غيره , ومن وكت ما صار بيني وبين الاسبنيوليه , كل ليله , كل ليله بحلم في حبي , بحلم باحلام متكرره معاه , بحلم بشغلات صارت بالواقع معاه , بحلم بلحظه وداعنا قبل ما ارتبط بالاكس تبعي , عيونه وسواد وجهه , بحلم بالليل وكصص الليل ووحدتي فيه ..~

||

مبسوطه عشان امبارح اخدته عطله وعملت جرد كامل ع الحوش ونظفته ورتبته وخليته يفتح النفس انو نكعد فيه , خاصه لانه كان ملان حشيش والورد مش مرتب وفي ورد بده رزاعه , لهيك طول امبارح ضليت بالحوش بس اشتغل فيه وانظف , طلّعت ساده معي شوي وبعدها خوفت يروح عند الجيران وعند الجاج تبعهم ..~

||

وكمان في كتاب ضايل 10 صفحات بخلّصه , صارلي سنه بقرأ فيه عشانه من البلفون , ومش هالحلاوه وكمان مش هالبشاعه بس عشان كصه الغربه حبيت اقرأه , ضايل عليا النهايه , لاشوف لانو الها درجه كبيره عندي ..~

||

السلام عليكم ..~

اليوم الاثنين 10 بالليل || 7\29\19

||

الحمد لله بلفوني اشتغل بعد الوكعه , شغلي منيح , خلصت الكتاب ومش عاجبني من مره , بس صحتي عم اتجاهلها واتجاهل مرضي بس بضل يخبّط ع الباب ويزكرني , وكد ما بسال هون وهون علاجي بكلّف , امفكره ارجع للبلستيشن حتى لو معنديش وكت , بس مش عارف اي لعبه اشتريها , واخره فتره ادمنت العاب الاختيارات , اخ يبي ودايما اختيارتي غلط ودايما بموتوا الابطال من اختياراتي , يبي كديش بكون اضحك مع حالي ع اختياراتي ..~

الكتاب اللي كنت اقرأ فيه هو (غُربة الياسمين ) ,حد قرأها ؟! بخصوصي !! الابطال شخصيات مثاليه مش لهدرجه موجوده في الدنيا , وكمان كيف بفتره قصيره يتغيّر الحب ؟! كيف كل بطل يحب بطل تاني ويتبادلوا الادوار اشي بشع مش لهدرجه كمان .. خلصّت الكتاب وما ترك اشي واحد فيا ولا اتعلمت اشي منه .. الاشي الوحيد اللي شدني عشان اقرأه هو اسمه لاني بنت عايشه في الغربه , ولاني بنت ببحث وين مكان ع ناس عرب يفهموا حواليا اتعرف عليهم ومش لاكيهم , لهيك كصه البطله لما التقت مع البطل في القطار كديش اشي شدني , وكديش كان نفسي تكمل الكصص بينهم !

؛

السلام عليكم ..~

اليوم الخميس || 10 بالليل || 8\1\19


||

دايما بنحطّ بين اشوف فلم او اكتب في المدونه , وبيروح اختياري ع الفلم , عشان هيك صرت لو اكتب اشي بسيط بالمدونه ولا اهجرها , والحمد لله ما في اشي جديد بحياتي عشان احكي عنه , ومع هيك يلا لاحكي مجريات يومي لأي حد بهمه الامر ..~

||


طول الليل انا وامي نصحى وننام , وبالاصح انا اللي ارجع انام , وامي اضل صاحيه , كالعاده زي كل ليله امي مريضه , لازم تزيد من جرعات الدوا , وانا بكدرش اسهر معاها بعرفش ليش بطلت اكدر اسهر معاها , الا ما اتركها وانام واعاود اصحى , وكل ما يخف الضغط عليها او الغده اللي صايره معاها , تتصل تلفونات ع ابوي عشان يسال الدكتور اللي رايح عليه, وع خالتي عشان تسال اصحابها الدكاتره لانها بتشتغل بالمستشفى معهم , وغير انه خالتي راحت تعمل فيزا سياحه تيجي ع امريكا عنا وما وافكوا عليا , وغير انه ام زوجه خالي اتوفت , لهيك كنا طول الليل مكهورين وكصص عليا من كل التلفونات اللي صارت , لوكت ما اجى الصبح , كديش صعب الليل كان عليا , انا نمت شوي الصبح لوكت ما امي عملت فطور , وكان يدخل كلامها في احلامي ويعمل كوابيس ..~

اصحيت افطرت ولازم اطلع ع شغلي بدري اليوم عشان اروح ع البنك اعمل تحويل مصاري الاجار للمسؤل عن البيت , بسرعه افطرت واشربت كهوه وجهزت حالي واطلعت , وكديش حمدت الله انو صافف السياره جمب البيت , صارت الطلعه مكان ما بصفها في مالطا تزيد من وجع ظهري , لهيك اتسهلت , وروحت ع البنك وعملت التحويله , وبعدها روحت ع الشغل ..~

بالشغل , غريس حكت راخ تاخد عطله كم يوم , يا سلام ويا حبيبي انا روحت فيها , لانها هي بتعمل الشغلات الكبيره وانا مبسوط عليها , هلكيت برتمى الكصص عليا , وبديش ! الله يستر من بكرا لانو لايز هي اللي راح تشتغل ودايما هالبنت بتعمل خربطه في المصاري وبدفع من جيبتي ..~

الشغل كان بسيط ازمه نفس الزباين ونفس الحكي بينهم , بس اجت زبونه جننتي فش محال بدها تسرق , هو بالاول خليتها تاخد اللي بدها اياه وحكتلها خلص ما تدفعي مصاري , بعدها انكلعت وعاودت رجعت , حكيت يا حيوانه فوك ما انا عمتلك في منيح وسامحتك جاي بدك كمان !! شو هالوقاحه هاي , اتكاتلت معاها بكل هدوئ اد بدك اشي بدك تدفعي ويا اما بتصل ع الامن , بالاخر انكلعت ! صار تلفونات بينا , بنت اختي الصغيره صار معاها حساسيه من اشي وما افهمت ولا حد فهمني , لهيك التغى مشوار خواتي يجيبو عندي , بصراحه احسن , مكانش جاي عبالي يجيو ويعجكولي المحل واتاخر , بس مع هيك اجت الكبيره اعطتني كم غرض لامي , واتصلت الصغيره تحكي لو اجيب لبنتها كم شغله من المحل , لهيك بعد ما خلصت المحل اخدت كم غرض وورحت عند بيت الصغيره واعطيتهم الاغراض , واجيت عالبيت , اتعشيت وهيني ..~







لا نوم متل الناس ..~ ولا حتى الناس زي الناس ..~

السلام عليكم ...~

ايييش , حد اشتاااك ؟ انا والله كانت المدونه كل يوم تيجي ببالي , وكل يوم ادخل المنتدى اني اكتب , بعدين احكي بعقلي , لأ مش وكته .. بس هلكيت وكته ..~

اليوم هو الجمعه || والساعه 10 بالليل || 8\16\2019 ..~

||

ايش اخر الاخبار ؟! بالاول خلصت روتيني الليلي , احسن ما اجي ابلّش كتابه واتكاسل اعمله , عم اشرب ميراميه لانو اعصاب معدتي موجعه عالاخر من كتر ما بضّل معصبه ومكهوره من شغلات كتيره صارت , وعم اسم اغاني..~

||


الشغل :~

كتير حلو وكتير مبسوطه نفسيا فيه ,بس مرات بيطلع غلط في الحساب وبدفع من جيبتي مصاري , وايام البغشيش ولا اشي محرز , وبكون دايما ازمه وبضل واكف ع اجريا , ومع هيك مش متنكده وبحبه كتير , وبستمتع لابعد حد مع الزباين اللي كتير مناح معي ومنهم كتير بضحكوني , وبكدرش اخبّي ابتسامتي لما اشوفهم بيدخلوا ع الكهوه , او لم اشوف غمزات بعض الدكاتره , الاشي الوحيد اللي زعلّني هو اغلبهم صاروا يشتغلوا بارت تايم بالمستشفى , صارت تغيرات ونقل , لهيك اغلب اللي بحب اشوفهم يا دوب يجيوا يوم بالاسبوع او حتى يوم بالاسبوعين وبالشهر , منهم الهبيله , اللي مره شوفته بعد اسبوعين غياب وعم احكيله " وينك زمان عنك ؟! " شوفت عيونه بلعوني وعرفت من وكتها انو اغلبهم خلص تركوا هدا المستشفى بس للحالات الطارئه , حكيت بعقلي بعد ما يصير في شخص بضحكني بحياتي ويترك اثر بختفي , حتى الهندي حكالي انا بشغتل ع حاله , لهيك كلهم كلهم راحوا ..~

؛

الحب :~

حبي زمان مش حاكيه معه حتى بالعيد , ما عيدت عليه , بعرفش مالي , بس بعد كتير حكي طلع براسي انو هو اخترع كصه مرضه !! عشان اترك امريكا وانزل عنده , وبكون احكي يا ريت تطلع كدبه المهم ما يكونش مريض , ومرات بحكي امبلا هو مريض وبتعالج , وبيني وبينكم مش عارف مالي مع انه دايما بيجي ببالي , بس بديش احكي معه , دايما بستدعيله , ومع هيك بديش احكي معه , بعرف بضعف وبشتاكله وبندم اني غيبت عنه , ومع هيك انا بحكيش مع حد هالفتره , الله يوفكه ويوفكني كمان ..~

بتتزكروا كصه الشب اللي انبسطت وانا احكي معه , رفضني , مش اشي جديد عليا , الكل برفضني , الكل بدوش يكمل معي , وبتوقعش اشي من حد طالما ما وعدني باشي , ومع هيك وصلني حكي انو يمكن يرجع , وامي ما صدكت لما سمعت هالحكي , لانو بحكيلكم , هدا الشب كان متفهم لعقلي اللي عجنب , وهدا شو بدي في حياتي , شو بدي بالشخص اللي يتزوجني , انو يرضاني شو منا , باسراري وعقدي وجنوني , ومع هيك حد حكالي "لأ" في الاول ! اد رجع شو بعمل بالعاده , كمان بحكي "لأ" بكدرش ارضاها ع مبادئي .. بتمنى ما يرجع عشان ما انحط في احراجات وتحليفات من امي انو اوافك , بس هدا كله اد برجع , واللي بكهر مع امي انها خياليه حالمه عايشه بامل كبير , وبتحاول انها تخليني متلها , اني احلم وانو يصير عندي امل , امي كل كلامها لو ويمكن وبجوز , وانا واقعيه بحت , لهيك من وكت ما وصلها اشاعه انو يمكن يرجع وهي كل دكيكه واحنا مع بعض بتخطط وبتحلم احلام يقظه اتعبتني فيها , وصرت اتكاتلت معاها وازهكت كل كلامها الفاضي اللي بالهوى واللي كله احلام يا ربي ..~

||

اهلي ..~

خواتي :~

دايما مقاتل عشان كصه الجيزه , وحضرت ايمان بتجيب ناس اتعرف عليهم وكلهم طاكعين , ودايما زعل وتسكير البلفونات ومقاتل وصراخ وحرد , واخر فتره صارت تبعتلي حد ع الكهوه لدرجه اوصلت لمرحله بدي اترك شغل الكهوه , كلهم متخلفين بدهم يضحكو عليا بكلمتين , كلهم بشوفني بنضحكش عليا بتركوني , لهيك ازهكت , ازهكت الكصه تنفتح باليوم بكل تانيه , انو كصه جيزتي مصيبه كبيره وشغل لازم ينعمل , ,التحكم بكل شي والزن والغصب , ليش مش راضين بالنصيب ؟ يمكن ربنا مش عامل الي نصيب بالجيزه , عشاني مريضه وعقلي عجنب , بس هم مش مستوعبين , عندهم اخد مين ما كان بس المهم اني اتزوج , لو بدي مين ما كان ,, كان ما تركت الاول ..~

اخوتي :~

اللي عايش معه من مره بدفعش مصروف البيت الا بس الاجار , كل المصروف عليا وانا بالاصل شغلي ع كدي , والتاني بضل يتصلبط عليا بالفواتير تبعات بلفوناته وبلفون مرته وكصص كبيره , وازهكت ادفع من جيبتي عشان امي ما تزعلش , امي بتشوفه مسكين وبتشوفيش احنا مساكين , بتشوف انو عادي ادفع عنه , لهيك كمان مكاتل مع امي عشانه , عم احكيلكم عم اتكاتل مع الكل صايره !

ساده :~

ساده بصراحه من وكت ما امي اجت عندي وهو من منيح لاحسن الحمد لله , بحب امي كتير , وعشانها من النوع اللي بعرفش ينام بالليل وهو بنامش من اصله بالليل , بتونّش مع امي بالليل , وبحب يلعب مع امي بالليل لدرجه هي بتزهك منه وبترميه من التخت , هو بصراحه بحب يعضعض اصابع اجرين امي , بمد راسه تحت الحرام عند اجريها وبكعد يلعب فيهم , وكتير انا بصحى ع الحرب اللي بينه وبين امي , واد امي ضلت توكّعه من التخت هو ببعد عن التخت وبعدين بيجي ركاض بنط ع اجريها وحاله , او بروح بنام ع شعرها وراسها , بحكيلكم استغنى عني من وكت ما امي اجت ..~

انعست وعليا اصحى بدري , لهيك تصبحوا عخير وبشوفكم مره تانيه لاخبركم اكتر ..~

السلام عليكم ..~

||

الساعه 11 بالليل من يوم السبت عطلتي || ولسا 8\17\19 ..~

؛
خلصت روتيني الليلي , وشوفت اعاده مقطع من الحلقه الاخيره من مسلسل مفضل عندي لما احدى الابطال يموت , ومشيت بملف من ملفات الصور امسح المش مهم واعدّل المهم , فكرت اعمل كهوه وبعدين امي زكرتني لازم اصحى بدري عشان عليا مشوار بدري ..~

ساده عندي وبضّل يحرّك في دنيه لما يسمع صوت مفاتيح الكيبورد , وهيني ..~

||

مجريات يومي ..~

اصحيت بدري لانو كان في عزومه , اخوي واحد عزمنا ع مطعم وانا اخترت المطعم , لانو فطور ولانو في ازكى صحن فطور عندي بحبه بهدا المطعم , المطعم اسمه بوليفارد , اصحيت ومنكتش عارف اي ساعه الموعد لهيك اتصلت عليه وحكالي بنكون غاد ع 9 ونص الصبح , اختي اماني بتكدرش تيجي , لهيك اجت اختي ايمان مع بنتين الصغيره والكبيره بس , وروحت انا وامي , وكان هو ومرته وابنه , ايمان اول مره بتكون قبلنا , بالعاده بتتأخر , وحجزت لانو المطعم خاصه في العطله بكون ملان عالم ولازم تستنى , اوصلنا مع بعض , وايمان كانت حاجزه , افطرنا ومحدش عجبه الاكل تبعه وكلهم نفس الطلب اللي هو عجّه مع خضرا , انا كالعاده كل ما اروح عند هالمطعم بطلب صحني الللي هو ارضي شوك مع بيض وجبنه وانجليش مفن ..خصلنا الاكل .. والكل راح ع مشاويره ..~

||

انا وامي كان علينا كم مشوار ومنهم حواجه , واوصلنا البيت حوالي 3 العصر , طبعا الدار كانت بدها ترتيب , لهيك رتبت وفكرت انقل حزانه الاواعي تبعتي وارمي منها لانو اشتريت كم كطعه , وانا صبيه مش مغرمه بالاواعي , لهيك اد بشتري اشي جديد , لازم ارمي من خزانتي , اسهل للبس وللتصفيط , بس المشكله انو كل ما ارمي كطع , بشوف امي مخبيتهم ومرجعتهم , وكد ما بحكيلها يما فش وسع هون , بتحكي اسكتي ! حتى اشتريت ورده وحكيت ازرعها اليوم وما ضل معي وكت , لانو اتغلبت وانا انقل الحزانه لحالي , وامي انجنت ولما اجت تساعدني خربتها واتكاتلنا وحاله , اخ يا ربي امتى ما بتكاتل معاها انا , بضّل تحكي استنى ليجي حد يساعدك كصدها اخوتي اللي بعرفهم الواحد بلفونه بدوش يحمله , ولا خواتي اللي الله اعلم يجيو بكرا ولا لأ , او يدخلوا غرفتي اللي عنجد بحبش حد يدخلها لانو لما يشوفوا الكريمات والكصص , اسكت احسن , لهيك بحياتي كلها متعوده ع مبدأ اليد الواحده تستطيع التصفيق لوحدها , يعني اعملي شغلتك لحالك احسنلك وتطلبش من حد خدمه ,المهم اني الحمد لله نقلت الخزانه ورتبت الاواعي وكتير مبسوط بالنتيجه وبيني وبينكم ظهري بوجع ,لهيك امي انجنت اني عملتها لحالي لانو عارفه ظهري , مش مشكل عندي موعد دكتور الاسبوع هاد , يا رب يطلع دكتوره وصيت عليهم , انا بحاجه الى دكتوره انثى اد سمحتو ..~

||

ايش اشتريت ..~






كعدت فتره احب احط المناكير كل يوم , قبل ما اطلع ع الشغل ولما ارجع عالبيت امسحهم , هريت اظافري هري , حبيت اللوان وخاصه الابيض ..~

اما الاستون , كان منيح , بشيل بسرعه المناكير , بس بكسّرهم وبنشّفهم كمان , لهيك وصلت لمرحله الزهك من هاي الكصه ..~

بس لما يجيو الصغار كتير بحب احط ع اظارفهم , كتير بحبوه , ووصلت لمرحله اروح اعمل اظافري برى مره بالشهر لمده اسبوع واشيلهم كمان عندهم احسن , لهيك موكّف الاستون والمناكير بالبيت هالايام هاي ..~

||





ورده بتحكي " روح عد اوراق الشجر , عد حبات المطر , عد النجوم , عد البشر " ..~

والله احلى من كنّس الصحرا , بلّط البحر ..~

السلام عليكم ..~

الساعه شوي وبتصير 10 بالليل من يوم الاربعا ..~

؛

اخدت عطله تلاتاء واربعا عشان مواعيد الداكتره معي , الاخبار مش منيحه من مره , ع الاغلب راح اعمل عمليه , ولازم اضل اطارد واركض من دكتور لدكتور من فحصوات وتصويرات , امبارح كان من اسوء ايام حياتي ,مكدرتش الا اني اعيّط كدام الدكتوره وخواتي , نفس اللي مرت فيه اختي انا مريت فيه , في ورم بمنطقه وبدهم يعملوا فحوص بس عالاكيد لازم اعمل عمليه , ان شاء الله حميدي وعالاغلب , الخبر مخبى عن امي , بس انا وخواتي , اللي بكهر اكتر انو طول هدا الاسبوع انا وخواتي مراض عالاخر , واحده طلع في ذانها زي تلول وفش حل للعمليه وهدا بسرّع من انها تبطل تسمع لانو ع احدى اعصاب السمع , ولازم تتعود ع وجع الراس منه , وتتقبل الوجع والطرش والرنين ,فش دوا , وصعب جدا العمليه , والتانيه لازم تعمل عمليه عشان الاحماض في معدتها , لانو كل ما تاكل لازم تستفرغ وبطلت تاكل اشي وضعفت النص , كل اوقاتنا بس مرض ومطارده ع الدكاتره , بس يالله كلها اختبارات من ربنا ..الحمد لله ع كل حال , والمهم امي ما تمرض علينا , لهيك صارت تلفوناتنا بين بعض بالسر ..~

؛

لهيك بتجنب الحكي مع اي حد , بحكيش مع حد الا خواتي , وبعملش اشي بحياتي الا شغلي للدار والحكي مع خواتي , اعصابي مهزوزه , وراح اضل هيك لوكت كل الفحوصات والعمليات , اللي بكهر اكتر كمان انو انا بطّل معي مصاري من مره , كل هالمطارده خسرت بلاوي , بس برجع وبصبر حالي انو اختبار من ربنا , وانو عملت اشي كبير بحياتي اتعاقبت عليه بالدنيا وراضيه بالعقاب , وكمان بعرف انو ربنا كبير بآخر لحظه بفرجها علينا ..~

؛

مرات بفكر اترك الشغل , معنديش الطاكه اتحمل الزباين واضحك واتبسم , اعمل كهوه زاكيه , بس كل المصاري اللي كنت حاططهم ع جنب لهيك ظروف طاروا , معيش اشي هلكيت , كديش صعب تكعد بدون مصاري ليومك الاسود ..~

؛







؛