مأساة روح {هالكه} في اوراق تائهه ~

السلام عليكم ..~

11 بالليل من يوم الجمعه || 8\23\19 ..~

امبارح كان من الايام السيئه عليا , لدرجه اتكاتلت مع زبونه واغلطت عليها وطلع عكلي عليها , كنت متوقع تتصل عليا مالكه الكهوه او المدير , لانو صار كتير مصايب بحياتنا من بدايه نهاري انا وخواتي , وبالشغل كتير شغل مرمي عليا وع غريس لانو الصبيه الجديده ما بتعمل اشي وكان في طلبيه كبيره من لوازم الكهوه وحضرته ما ساعدني فيها , كنت انقل البضايع لحالي وارتبهم مع عجكه الزباين لحالي , وفوك كل هاد كمان عاملين خربطه بالحساب بحوالي 70 $ , كل هاد عشان اخدت يومين عطله ورى بعض بنص الاسبوع الكهوه خربت , وجايه حضرتها وشايفه كيف الكهوه معجوكه بالزباين وبالبضاعه وانا عالخط مع المدير عشان حساب المصاري , وطلبت طلبيتها وحكتها غلط ولما عملتها , حكت مش هيك , وحكتلها امبلا انتي هيك حكيتي وكانت زبونه تانيه موجوده وحكتلها اه , حكت لأ بكصد هيك , حكتلها ماشي , وهي كل مره بتيجي وبتعمل نفس الكصه شو ما اعمل ما بعجبها وبتحكيلي اعملي غيرها , وانا حضرتي ساكته لاني غبيه , بس امبارح مع كل شي صعب عليا ولما رجعت الكاسه للمره التانيه , يعني بعد ما عملتها مرتين , بدها اعملها للمره التالته , خلص عكلي طفى وشروش مخي طاروا , رميتها بالزباله بوجهها وحكتلها "تجيش هان وانا بشتغل , مش عاجبك شو بعمل ما تيجي " وخدي احكي مع المدير لسا من دكيكتين كنت احكي معه" , سحبت حالها واتكعلت الله يجحمها عن كريب .. ويجحم كل واحد بظلمني وبتعبني , دنيا قبل اخره ..~ بديش اسامح ~

؛

بحكيلكم هاي الراحه اغلط ع مين ما بدي بدون محد يعرفني هون , كديش احساس حلو , كديش الفضفضه حلوه , لناس بعرفهموش , وما بعرفوني , لناس مش رابطهم ليسمعو كلامي , يبي شو حلو ..~

؛

اما بالنسبه لليوم اللي هو الجمعه , اصحيت متاخره شوي , ولسا بصح صح وبحكي مع امي الا جرس البيت برن , مين كان ؟ كانت اختي ايمان , انسيت انها حكت بدها تيجي تفطر عنا الجمعه , عملنا فطور وافطرنا وعملت كهوه ومع الكهوه بلشت المشاكل والطوش بينا , انا وامي وهي , نفس الكصص ونفس الكصص ونفس الكصص ونفس الاحلام , ازهكت منهم واتعبت , وبعدها هي اتسهلت ع موعد دكتور بيني وبينها واماني بس والموعد نص نص , لسا بدها كمان فحوصات والكصه بين تنتين , طرش او عاطل . ويا رب من عنده الكبير يكون في اشي تالت وهو فش اشي , وانا جهزت حالي واتسهلت ع الشغل ..~

الشغل متعب جسدي بس عالم رايكه , اغلبهم زباين , حافظ طلبات اغلبهم , واللي مش زباين , كانوا لطفين , اتوقع اني كتير بكسب سيئات بالشغل من كتر ما بطيل النظر , وبحمد الله اني مش شب , بعرفش ليش بعشق الجمال انا , بحب الصبايا الحلوات , بضل احكي عنجد ربنا خلق الجمال , وحتى الشباب , بحب الكريزما , خاصه الشيب في دكاتره لسا صغار , او تبعون الاسعاف , بكدرش اني ما اتبسّم بوجوه هيك حلوه لطيفه , اليوم اجت زبونه سبحان الله ع الجمال هي وابنها , كيف لو اني مش حلو ؟! يمكن بغار , بحمد الله اني بغارش , بعرف عندي تواضع واصل لعندكم ...~

؛

اوصلت البيت وكان اخوي واحد وهو وزوجته عنا , يالله اكسبت مكان اصف السياره , سلمت عليهم , وعبرت البيت وهم رجعوا ع بيتهم , ضليت متمدده ع التخت , واجى اخوي تلات من الشغل , وبضل كتير يبرم حكي فاضي , الله يساهل عليه , شو اعمل معنديش طاكه اسمع حد واحكي مع حد , بس احكي مع حالي ومعاكم هون جدا عادي , بضل احكي بعقلي منت عندك خطيبه روح افتح راسها بكلامك فك عني , اي انا مش حاكيه مع حبي بضل يبعت رسايل وبكعد ساعه صافن بالرساله شو ارد عليه , بالاخر ببعتش اشي ..~

انا انزويت اسمع لحد او احكي لحد او ارد ع مسجات وتلفونات حد , الناس الوحيدين اللث بحكي معهم بين عالم الواقع وعالم السراب هم خواتي وامي فقط ..ومجبوره احكي مع الزباين وكصص الشغل , اللي مشغوله فيه هلكيت مواعيد دكاترتي ودكاتره خواتي عشان كل هالاسبوعين علينا مواعيد وفحوص وكصص , لهيك ع اعصابنا ..~

؛





بعرفش اد الصور مكرره ولا لأ , عم احاول اعمل جرد لكل الصور ع اللاب توب , عم احاول ارمي كتير شغلات بحياتي , عم احاول ما احتفظ باشي , عم احاول اخلي حياتي بسيطه فيها بس الشغلات اللي انا عنجد بحاجتها , وانا عم اعمل الجرد بيطلع معي صور بتزكرني بشو كنت افكر لما صورتهم , لهيك بحطهم , بحب التصوير , خاصه السما , الغيوم , الغروب , الشجر , الكهوه , وساده كمان , وشو اشتريت من كريمات , يمكن الاشي الوحيد اللي مش كادر اعمل جرد او اخفف منه هو الكريمات , بس ما بحب اصور حالي ..~

؛

بديش اعرف ! نسيتني النوم ..~

السلام عليكم ..~

11 بالليل من يوم السبت || 8\24\19

؛

نهار نكد من بدايته لحد الان , امبارح وانا سهرانه اجاني مسجات من فد , هي الوحيده بين كل اللي بحكي معهم مفعّل التنبيهات ع التطبيق اللي بحكي فيه معاها , حتى لو بنحكي مره بالسنه , بحب رسايلها , مع اني كتير مضغوطه هالايام هاي , ومع هيك كل يوم بحكي بدي اروح افضفضلها , اللي بكهر انو فش مكان احكي فيه معاها محدش يسمع شو بحكي , عشان ماشاء الله ع صوتي الواطي اللي بوصل عندكم , وامي بعرفها بتحب تتنصت , او احكي الفضول عندها , وغير انه اختلاف الوكت ما بصدف انو نتلاكى بنفس الوكت , كان من مسجات شغلات شخصيه ما بحكيها, بس بينها شغلات بترسم الابتسامه ع وجهي لما اقرئها او اسمعها " اشتكتلك وخلينا نحكي " هي وحبي اد حد فيهم بعت هالمسجات بحكي بعقلي " لسا في حد ! " ومع هيك ما ارجعلتها الا لتاني يوم ..~

؛

اما اليوم من ليله مش منيح , كل ما امي تشوفني بصحى بالليل بتبلش تفتح بكصص احلامها , اني اتجوز فلان , وبضل ساكته بديش ازعلها لاني بعرف حالي اني حيوانه من صراحتي , في السكوت معي احسن شي لانو لما افتح تمي بخرّب الدنيا وما بتتصلّح , وبجرح ,وانا اتعبت وازهكت لاخر درجه , عقدوني وكرهوني بحياتي , صرت اتمنى الموت بكل لحظه معاهم , امرضت , وفش عندي بال وفش عندي قوه اني اتحملهم , الزن اشي بشع , بانو 24 ساعه نفس الموضوع ونفس الكصه وكله مش بايدي , بعمل اللي عليا واكتر ومع هيك مش زابطه معي الامور , خلص ربنا مش راضي لسبب والله ! بعرف انا التانيه كمان زودتها بالحكي عنهم , بس جد هاي المره انا عنجد مش طايكهم ولا حتى طايك امي , الله يسامحني بس ويهديني ..~

واول ما اصحيت طبعا ع تلفوناتها مع الاهل ساعتين الصبح وهي حره عادي اتعودت , وصارلي اشهر بطلب منها تعملي هالاكله افطر عليها وكل يوم بتنسى او بتلتهي او بنكون متكاتلين او فش وكت او فش مكونات , بكزبش عليكم وحكتلها , هالمره من مره مش مبسوط بزيارتك , بين مرضها والخوف عليها وبين النكد والزن بالكصه , ما لسا بلشت بدي افطر , وما حطيت اللكمه في تمي اللي هي بلشت بالموضوع , صعقتني فيه , بحكيلكم صايره انا حتى حساسه , بلشو دموعي ينزلوا ع خدي بدون سبب ومش راضين يوكفوا , وطلعت الكلمه من تمي انو " بطلت احب اكعد معك يما " بعرف مش لازم احكيلها , بس امي مش راضيه تفهم انو نصيب , وسحبت حالي وكومت عن الفطور ..بعرف بدهم مصلحتي كلهم , بس يا رب شو بايدي اعمله لارضيهم ولتزبط الكصص ..~


؛


بعدها اتصلت ايمان انو اروح اجيبها تيجي عنا , وانا كانت نفسيتي محطمه , مش جاي عبالي اشوف حد واعبر بنفس الكصه كمان مره , وامي حكت بدها تيجي معي , روحنا نجيب ايمان والبنات واجى اخوي واحد كمان , ما اوصلنا الدار الا اماني بتتصل انو نروح نجيبها , راحوا هم وانا ضليت بالدار , اجو وكعدنا ونفس الكصه انفتحت يالله نفسها مل يوم وكل ساعه وكل دكيكه , فش الا بس هي تنفتح , واحكيلهم بديش وانسو , وعالفاضي , امي وايمان يحكو توشوش عني ويخططوا شو بدهم يعملوا , وانا فاهمه عليهم , وحكتلهم لأ , وعالفاضي , دك المي وهي مي , واماني كانت مع صفي , واخوي كان نص نص ..~

؛

اجى وكت ترويحتهم , ووصلت النص والنص التاني اجت بنت اختي اخدتهم بسيارتهم , ما لسا كعدت بعد ما رتبت البيت من حوسه الصغار , الا ايمان بتتصل جروب عليا وع اماني , وعامله المخطط اللي هي اتفكت عليه مع امي , واخدوا اكبر خازوء , حكتلها بتستاهلي , حكتلهم كلهم وامي كانت كاعده جمبي , انو طول عمركم ما بتردوا عليا وبتروحوا بتوكعوني بالمشاكل وانا ولا معي خبر بالكصه بعدين بتيجوا ركاض عليا وانو شو صار وانا سمعتي بالارض صارت هان , كم مره صار هدا الاشي , وكعدت اعد لايمان عن كل المرات اللي اخدوا فيها خوازيئ, وليش مش راضيه تتعلم ليش ؟! واتكاتلنا , وغمضت عيوني بالطوشه لانو صابني صداع مش طبيعي , فقدت التوازن ومسكت حالي بالغصب , وامي زعلت وحكت ما الها دخل وهي سبب المشكله وطوش للسما صارت وصراخ , وحكتلهم كم مره يا ربي كم مره حكتلكم ما تعملوا هيك , ما تأمنو , ما تصدكوا , فش حد منيح , وعالفاضي اخ يا ربي , انتهى التلفون بس اتصالحنا لانو الحك مش عليا عشان يحاربوني , الحك عليهم لانهم بردوش , بالنسبه لانا وامي ولا زي كانه هي حطت سمعتي بالارض , عندها اشي عادي في سبيل اني اتزوج , الله يزوجتي وارتاح من كل هالكصه , اللي اظن كمان جننتكم فيها ..~

؛





وين اروح ؟ اد المكان الوحيد اللي بحبه صار رماد ؟؟!

كيف اعرف ؟ اد حبي الوحيد راح يتغيّر ؟؟!

كيف اعيش ؟اد كنت عايشه بالاصل احسن ايام حياتي ؟؟!

لحالي معك وبدونك !

السلام عليكم ..~


ايش اشتريت .. زمان ..~

؛



(ليفه) اللي هي اسفنجه للجسم ومعاها الصابون , بس بتحطي شويت مي وعطول (بترغي) بتطلع رغوه , وللاستخدام لوكت ما تشوفي انو الاسفنجه توكّف رغي , حسب ما استخدمتها كعدت حوالي 10 مرات او اكتر اظن وبعدها ع الرمي ..~

ريحه ورغوه ونظافه رهيبه , من الشغلات اللي راح اشتريها , وكعدت فتره مختفيه عن السوك بس عاودت رجعت واشتريت نوع تاني ..~

بكون سعرها بين 15 و 20 $

؛




هالورانيك اسيد من شركه 111 skin , اللي هي من الشركات المفضله عندي بالوكت هاد ع كد ما جربت شركات , لاتي صبيه بتعاني من الحب ومن علامات الحب الكديمه , وبتاخد وكت طويل لتروح , مع التجارب والتفتيش شوفت انو فش بعد هالورنيك اسيد وفيتامين سي , هدا كان من احب الشغلات عليا اللي كنت استخدمها بالليل بالعاده عشان مش منيح يتفاعل مع الشمس بالنهار ,بين احط كم نقطه ع وجهي لحاله او بين (اخلطه) ادمجه مع السيروم او المرطب , وكان حتى يفتّح وجهي ويشدّه وشوفت نتيجه بوكت كصير , ومش ندمانه ع سعره , واظن مع الوكت برجع بشتريه ..~

سعره 160$

؛






عندي اربع قطع من شركه vanity planet ..ومش ندمانه ع اي واحده فيهم لانهم عنجد غيروا حياتي خاصه فرشاه التنظيف للوجه حتى لو انضحك عليا بالسعر ..~

وفرشاه الاسنان هاي منهم , عندي سناني بسرعه بصيروا صفر لاني كتير بشرب كهوه , وحساسات وحاله , لهيك دكتور الاسنان حكى لازم فرشاه ع كهربا , جربت اوربت وكانت رهيبه , بس ضل عندي نفس المشاكل بس اخف , لهيك وكع تحت ايدي هاي الشركه ودورت ع كود خصم لانو سعرها نااار , وكان الشحن رهيب وكل شي تمام من الموقع تبعهم, واتعاملت معاهم بعدها في كطعتين اللي اكتشفت بالوكت هاد انو صار سعرهم ارخص من النص , ووصلت لمرحله اشتري الكطعه الاخيره منهم من الامازون مش من موقعهم الرئيسي لانو شوفت فرق بين السعر ..~

بس عنجد كديش رهيبه , وبكعد شهر واكتر لاشحنها , وموقته لمده دقيقتين وخلتني انبسط ع تنظيف اسناني واكعد دكيكتين كاملات وانا انظفهم ..~

سعرها مش متزكر بس اظن 50 او اكتر بعد كود الخصم , مش عارفه بصراحه ..~

؛



وكع تحت ايدي الكتاب وما كدرتش اني امشي عنه , لانو صعب الاكي كتب عربيه , ولحد الان مش فاتحته , لانو عندي كم واحد اخلّص منهم وبعدين برجعله ..

20 $


؛

الاشي الوحيد اللي بدفع مبالغ محترمه عليه هو الكريمات والعنايه , لهيك كل معاشي ومصاري بتروح ع هاي الكصص , ع كد ما هاد الاسبوع صعب كان علينا , بس ما حبيت اعبر دخول زي عوايدي ع المدونه لاحكي عن المأساي , حبيت احكي شو اشتريت , وبرجع لاحكي عن مجريات الاسبوع الكئيبه ..~

السلام عليكم ..~

مليش عين احكي معكم ع تأخرتي ..~

لهيك راح اسكتكم بصوّر , بكلي تنفع الرشوه معكم ..~

؛









وانا مش منيحه ^^

السلام عليكم ..~


الاثنين بالليل || 11\11\19 ..~

||

اصحيت ع 9 الصبح مع انو نمت بدري لانو امبارح كان يوم صعب عليا , وما اجى عبالي اترك التخت , بس لانو السياره في مكان تنظيف الشارع وخوفت اخد تكت , لهيك جريت حالي جر , حملت مفاتيح السياره وانزلت ع الشارع , وبحكي بعقلي انو وين بدي الاكي مكان هلكيت احط السياره , كان اشي محبط واشي متعب انو كل يوم ع نفس الكصه وصايره ادوّر بزياده ع كلشي محبط بصير معي , بس الحمد لله ربنا رزقني بشارع فش عليه تنظيف , صفيت السياره وارجعت ع البيت بسرعه افطرت لاني كنت جعانه , ع معده فاضي يوم كامل لاني ما اكلت بالشغل ولا حتى اتعشيت بالبيت من كتر النفسيه والتعب اللي صار معي , وبلشت اشوف بمسلسل , الا اخوي واحد بيتصل , وبيتصل فيس تايم , حكيت ناكصني اشوف مرته , ما رديت وارجعت عليه بتلفون عادي ..~
سال " وين انا واد فاضيه "
حكتله " بالدار واه "
طلب اني اروح عنده
وسالت اد" مرته بالدار"
وحكى" لأ "
حكتله" ماشي مسافه الطريك وبكون عندك"
اطلعت زي ما انا , وبعتت مسج لخواتي اني رايحه عنده .. اوصلت عنده , وحتى مكان مهو ساكن فش مكان اصف السياره لانو عندهم تنظيف شوارع كمان , اشي بجلط , بخلي الواحد ما يطلع , وعاودت لكيت الحمد لله , انزلت وانا رايحه ع داره كنت شامم ريحه هش ونش ,وحكيت امبين انو عازمني وكاين اه هو يعمل ..~

بحب حوش بيته لانو مش مكشوف لا الجيران بشوفنا ولا احنا بنشوف الجيران ولانه نظيف وبحب الحاره تبعته لانها هاديه , وبحب شارع بيته لانو بشوف المحيط مكشوف عالاخر , هو جمب الشارع اللي كنت سكانه فيه زمان , كنت عنجد احب منظر المحيط من باب الدار , وبحب اروح عنده لما ما تكون مرته بالبيت لاني بحبهاش وبحبش تشوفني لانو عيونها بصيبوا الواحد بشغلات مش منيحه , حسوده غيوره , ولانها كمان مش منيحه معانا , واد الدنيا اعطتني الخيار اني اشوفها او لأ , دايما بختار لأ , هيك بحافظ عحالي وبحمي حالي من عيونها , ضليت طول الوكت بالحوش هو يعمل الهش والنش ونحكي ناكل ونشرب كهوه هدا المهم عندي , حتى من يومين حكالي عن لعبه ع البلفون وعنجد ادمنتها انا , لوكت ما بعتت اختي الكبيره مسج انها تعبانه ومخنوكه من الدار , وبدها تطلع تعزمني ع كهوه , بكدرش احكي لأ لكهوه معاها , فا حكيتله عليا مشوار وبرجعلك لانو كان يستنى في اخوي تلات , لان حكى اخوي تلات بده يجي يكعد معانا , الاخوه ضلوا البيت , وانا تركتهم واخدت اختي من بيتها واطلعنا.

,في شغلات كتيره انا وخواتي ما بدنا اخوتي يعرفوها , لان اخوتي من النوع اللي بحكوا لزوجاتهم كلشي , وفي شغلات بدناش نسوانهم يعرفوها , لهيك من اجل المحافظه ع امورنا بنحكيهاش لاخوتي , لهيك تركت اخوتي وحكتلهم عليا مشوار صغير , اشترينا كهوه وتحلايه , وروحنا ميّلنا عند بنت اختي في شغلها عشان كان البريك تبعها , كعدنا معاها شوي , ورجعت اختي الكبيره ع بيتها وانا ارجعت عند اخوي واشتريت بطريقي بيتزا ودونتس ..~

ضليت عنده لقبل المغرب بشوي , اشربت عنده كهوه مع الدونتس رهيبه وكعدنا نحكي عن احلامه هو , اخ يبي شو بحلم هالاخو , هو زي امي اللي بعرف كله كلام بالهوا , كد ما بمسك حالي انو ما اظهر ع وجهي بس بكدرش , وبحكيله يخوي اضلكش تفكر , لانو الاحلام مش النا وعالفاضي . كديش بعصر بحالي انو ما يطلع كلام يحطمه , لانو الحلم ومعاه الامل هم من البدايات بالحياه اللي بتخليك تتحطم, اه خصوصا احلامه هو .

وجيبنا كمان سيره حبي , لانو بفتره ضعف حكيت لاخوي انو حبي بحكي عن حاله مريض , بس بده يصير للكصه فتره طويله ولو انه مريض كان الكل لاحظ , وفكّعت معي لهيك لما اليوم انفتحت سيرته حكيت لاخوي امبيّن صاحبك بكزب ولك , حكى يمكن بس هو ضعفان صاير هيكل عظمي , حكتله ان شاء الله مكيونش مريض بس يروح ينظز بكزب كاعد , وصارلي فتره مش حاكيه مع حبي لانو عمل مش شغله واحد , شغلتين عندي هدول الشغلات اللي اشي كبير واللي عندي بعمل عليهم مشاكل ومحاربه سنين , وامبين بلشت , وبكل صراحه نفسي اقتله , بس بستنى لوكت شغله بدها تصير بتكون هي الاشي اللي بخليني اروح اعمل مشكل وبديش تيجي هالكصه , اخ يبي كلشي معقد ما اظنش تفهموا ..~

اطلعت من عنده المغرب واجيت عالبيت وكعدت ربع ساعه وانا الف وادور بالحاره عشان مكان اصف فيه , لكيت مكان بعيد شوي , وسحبت حالي واجيت عالبيت , كنت جايب معي بيتزا لهيك حكيت بديش نطبخ وهو مش انا اللي بطبخ , اخوي تلات , بس بعجكلي الدار عجك , ولما هو اجي بالليل عمل مقالاي اتعشينا ونظيفت كل الدار بعد العشا لانو اليوم ما اشتغلت فيها ولا اشي ..~

؛

اما بالنسبه للشغلات الكبيره اللي صارت بحياتي في كل فتره هالغياب ..~

لسا مريضه ولسا بستنى في تحويلات عشان اعمل العميله وهدا المرض اخد مني شغله كبيره ومهمه لهيك اغلب اوقاتي مكهوره ومتوتره , واد اتاخرت بالعمليه لا سمح بصير اشي مش منيح , بس هيك نصيبي بالدنيا انو كل شي فيها صعب , وانو كلها ابتلائات كبيره وان شاء الله ربنا بفرجها بالاخر عليّا وعليكم ..وانا متأكده انو هدا اللي صار فيا من كتر ما كنت ادعي عحالي بالموت بكل صلاه من الضغط اللي امي وخواتي كانوا ضاغطين عليا فيه بكصه الجيزه , لهيك ربنا حكالي خدي , طبعا امي معهاش خبر , بس انا وخواتي , ولليوم ضليت انا وخواتي بس اللي نعرف لاىنو شعله كبيره وشغله راح تزيد من مرض امي اد عرفت ..~

امي رجعت ع الضفه , لانها وصلت لمرحله انو مرضها زاد عن حده , ما حزنت ع سفرها هاي اول مره بحياتي , لا دمعت ولا بكيت ولا حتى عيوني رغرغوا , بالاصل كنت استنى ت هي ترجع ع الضفه من كتر الخوف من مرضها عليها , وامي كانت تكليه عليها هاي المره , وكمان هاي اول مره بحس هيك لامي , مكنتش كادر اتحملها ولا اتحمل كلامها ولا حتى اتحمل وجودها , ولا عمري اتخيلت انو انا هيك اصير , هي خلتني هيك , وبحكيلكم لاني صريحه لدرجه الحيوانه , حكتلها انو مش راح ازعل ع سفرك , وانتي ما ابسطيتي هاي المره , وكديش كنت اترجاكي تعالجي حالك قبل ما تيجي هان , وحكتلها , مشغول بالك ع اولادك بالضفه , بس زي مهو الهم حق عليكي وتكعدي عندهم , احنا كمان النا حق عليكي , ليش يعني بضلوا يسالوا امتى بدك ترجعي , ليش بالاصل بحكوا انو اتاخرتي ., بشوفش حالي انا وخواتي هان بنكد عليهم وانتي عندهم , وبنحكي امتى بدك تيجي , الحياه لازم نساوي ونعدل , لازم اخوتي بالضفه يعرفوا هدا الاشي , خواتي حكولي اني قاسيه , شو استفدت من كل العياط طول هالسنه ؟ صحتي راحت ونفسيتي اتحطمت ؟.! انحل اشي ؟ انحل كصه ورقي ؟ ولا اشي . فا اه قاسيه واللي مش عاجبه يلقط حواجبه .

تركت شغل الكهوه , لانو صحتي بطلت معي , بضل ادوخ والدنيا تلف فيا , لهيك مش امان من مره اشتغل , كيف بدي اكعد بدون مصاري ؟ مش عارف ومش مفكر بالكصه كمان , وصلت لمرحله التبلد بالدنيا , الكهوه ما كانت هالمعاش المنيح والمرتب عالتعب اللي كنت اتعبه , بس كانت نفستي معاهم من احلى النفسيات اللي شوفت حالي فيها , كتير الزباين كانوا لما بشوفوني يجيوا ركاض لانهم كانوا يحبوا كهوتي , وكنت كتير تحب اللعبه اللي كنا نلعبها بالبغشيش , في زباين عندي ايام ما ارضى اخده لانهم كانوا بايام تانيه يعطوني كتير , وكتير فهموا عليا انو مش مهم عندي المصاري والبغشيش عندي هو انك منيح معي , راح استاق ؟ لأ , بحن وبفكر بالزباين وبالشغل ؟ كمان لأ , يالله ليش هيك بطل عندي اشي مهم بالدنيا ؟! امبين اني لازم اعبر بكصه وعلاقات مع ناس اتسلى معاهم يضحكوني للصبح زي زمان , وبعدها يجيوا يحكوا بنحبك , واعطيهم بلوك وبلش بغيرهم .يمكن هاد بعمل رضا عندي ؟! مين حكى , بس هدا بضيع وكتي في اشي مضحك احسن من حياتي المره , بس يعني صرت اشوفه وجع راس وبديش , لعاد اعمل حياتي ع التوقيف المؤقت , بحكيلكم بكل صراحه مش عارف شو اعمل بحياتي عشان انبسط فيها , في فتره مرت عليا اعرفت وكتها اني لحالي , لانو كنت متزاعله مع خواتي ومع امي ومع حبي , وكان اليوم الاخير الي بشغل الكهوه , فا كان مش يومي , ولمع براسي انو مضلش حد ..كديش اشي بخوف .

حكيت مع جين انو تحط اسمي ع الطورائ بشغلي التمريض الكديم , وهي ما صدكت , لهيك يمكن اشتغل يوم او يومين بالاسبوع .. زي ما اشتغلت امبارح وكان من اسوء ايام الشغل وهو يوم العوده , دخيل الله بالاشارات اللي بتصير معي , ايش اعمل طيب ؟! وال مرحله بحياتي مش عارف اشي .



هلكيت لازم تعرفوا اشي عني , من روتيني الليل , يا اقرأ او اشوف مسلسل او فلم , او العب ع اللاب توب او العب ع البلستيشن ,واحد من هدول الشغلات لازم اعمله بالليل قبل ما انام احسن بنام متحطمه ع مجريات يومي , ولازم احط المدونه براسي من الشغلات اللي تدخل روتيني الليلي , هو اسمعوا عندي وكت بصراحه , بس المشكله انو حياتي ملانه نكد ومشاكل ومصايب , ودايما بشوف انو مش حلو اضل احكي عن هيك شغلات , طب شو اعمل يعني اخترع واكزب عن حياه حلوه بس عشان تعجبكم ! هون بدخل في التزيف وبديش ادخل فيه , واشي تاني كمان , امفكره اعطي سنابي هممم , هدا كلشي طلع معي ..~ بشوفكم عخير ()

السلام عليكم ..~

من ليله التلاتاء || 11\12\19 ..~

||

اصحيت ع 6 الصبح , وضليت انام واصحى لما صارت الساعه 9 الصبح , بلشت اصحصح , بس مع هيك ضليت بالتخت , وما كومت منه الا لما اختي الكبيره بعتت مسج انها راح تستناني ع العشره في تارغيت عشان تعطيني اكل , حكتلها بس الكهوه عليكي , كومت ع 9 والنص بسرعه اكلت شو ما كان , وجهزت حالي واطلعت , اوصلت نص الطريق وفكدت بلفوني واطلعت ناسيه بالدار , ارجعت من نص الطريك عالبيت , وحمدت الله انو بالدار مش كاين واكع مني , هدا شو بصير معي لما يكون البلفون اخر همي , وعشان كمان مش شارب كهوه ف يم كنت امبنشره , ووبعدها ارجعت اطلعت وكنت متأخر ربع ساعه عليها , اتلاكينا في تارغيت ,ولما شافتني حكتلي مالك ليش هيك وجهك ؟ عنجد اليوم وجهي كان منفّخ وعيوني مش طبيعين , يمكن عشان مش شارب كهوه , او عشان نفستي مش منيحه , او هالكريم الجديد اللي استخدمته لوجهي , مش عارف , المهم طلبت كهوه وكعدنا نشرب وبلشت كتير كصص , منها كصص التحويلات عشان عمليتي واخدت صدمه غير شكل حطمتني ,اتصلت عليهم تبعون المعامله وحكو انو لازم اعمل الورق من اول وجديد وكصص طويله وتضيع وكت وانا ع اعصابي , وصارلنا فتره مش شايفين اختي الوسطى من كتر مهي مشغوله , لهيك صحلّها تيجي نص ساعه تكعد معانا , وبعدها اجت بنت اختي الكبيره كمان كعدت معانا , ضلينا للظهر , وبعدها كل واحد راح ع كصصه ..~

||

عن حالي عالخبر اللي اسمعته وع الكصص الكبيره اللي لسا بالطريق وع صحتي والخوف , كان مش جاي عبالي اعمل اشي , لهيك لغيت كل المخططات اللي كنت ناوي اعملها , واجيت عالبيت , وما لكيت مكان اصف السياره وانجلطت اكتر , اخ بس مالي هيك اليوم , وبعدها لكيت مكان صعب اصف السياره , وضليت احاول واحاول , وكان نفسي اروح اطلب من جارنا يجي يعملها الي , وبعدها الحمد لله ربنا وكف معي وزبطت واخيرا ..~

انزلت ع البيت ورميت عحالي ع الكنبه في الصاله وفتحت التلفزيون وطولت الاكل اللي اخدته من اختي وكعدت , وكان صايبني وجع راس لانو عندي وجه اسنان ومش كادر اروح ع الدكتور لانو فش معي مصاري , وكمان كان ضايل اخر حبه دوا , لهيك يم هلكيت وجع الراس ضارب لابو موزه معي , وهيني ..~

||

من الشغلات الحلوه اللي صارت معي خلال الفتره اللي مرت هي :~






روحت ع حفله لمروان خوري , اللي صار من كتر التحطيم اللي صار بحياتي , وكع تحت ايد اختي الوسطى رابط الحفله , لهيك هي مزحه بعتتلي رابط الحفله تجاكر مشان بتعرفني بحب مروان , وانا ما صدكت , لهيك طلبت منها انو شو رايك اعزمك نروح عليها , كالعاده حكت زوجها مش راح يوافك وكل هالكصص , واكيد اختي الكبيره مش تبعت هيك شغلات , وامي اعوذ بالله تروح ع هيك كصص , واخوي واحد بعشق مروان متلي بس بديش احكيله عشان ما بدي مرته تيجي , لهيك ايأست انو حد يجي معي , بس مع الوكت اختي الوسطى وافكت وحكت انها اقنعت زوجها , وضلينا انا وياها ورى اختي الكبيره زن زن زن , وطلبنا من بناتها للكبيره انو بنعطيكم اشي محرز اد بديروا بالهم ع الاولاد الصغار , بالاخر وافكت وروحنا , وكان عنجد من الليالي الرهيبه اللي مرت علينا , كنا كراب عليه غير شكل , كنا بالصف الخامس ع الزاويه والمسرح كريب وواطي , فكنا شايفينه واضح , وكديش كان متواضع ولطيف , الاشي اللي ما عجبني انو ما غنى الاغاني المفضله عندي , كديش الجمهور كان هادي وذوق وراقي , راقي لابعد حد لدرجه الاسترخاء والراحه , ولو اجى مرة تاني راح اروح , ولو اجى مغني بحبه ع هدا المسرح اكيد راح اروح , وكان سعر التذكره 150 للواحد , فا كلشي تمام , لاني عزمت خواتي عليا التذاكر , وع واحده بنزين السياره , وع واحده تكت في مجمع السيارات , وكانت الحفله ساعتين رهيبات ..~

كانت الحفله تاني يوم حديثنا لامي ولاخوتي , والكل شاف كديش كنا مبسوطين وكديش حبينا مروان اكتر !

~

السلام عليكم ..~

الخميس || 11\14\19 ..~

||

الاربعا اصحيت حوالي ع 9 , واجاني تلفون من اختي فيث بدها تيجي معي ع المقابله , حكتلها لشو ! كان عليا كمان مقابله بخصوص معاملتي مشان العميله , بدهم ينشّفوا دمي عشان يساعدوني بالدفعيه , ومتاكد بالاخر بتطلع ع الفاشوش , كل المطارادات ع الفاشوش(الفاضي) , بس يلا بجوز تزبط ويا ريت , جهزت حالي وافطرت والمهم اشرب كهوه لانو صاير اصحى مش شبعانه نوم , بعرفش شو الكصه بضل اقلق بالليل اشي مش طبيعي يمكن الطاحونه مأثر ع النوم . واتسلهت ع المقابله وكعدت ساعتين وحاله, ارجعت ع البيت ركاض وركاض , اكلت وعملت كمان كهوه وكان عليا حواجه , البيت ناكصه لوازم , خلصت الحواجه واتصلت عليا اختي هوبز انو بدها تيجي معي ع الموعد التاني , حكتلها لشو ! كان لسا معي وكت قبل موعدي لهيك روحت عند لينا صالون التجميل , والحكت اخلّص عندها قبل موعدي والحمد لله موعدي التاني خلصته بسرعه , بس فش نتيجه مأكده لسا ..~

خلصت كلشي واجيت متحطمه ع الدار , وكديش انبسكت اني لكيت مكان اصف السياره كريب , رتبت الدار وخلصت اللي عليا فيها , ومشكل الطاحونه اللي فترات بكون نفسي اخبط راسي بالحيط من الوجع , ومع كل الحواجه يا ربي انسيت اشتري الدوا الها , كانت ليله صعبه عليا ..~

؛

اصحيت الخميس اليوم بدري لانو كان عليا شغل بارت تايم , افطرت وعملت كهوه , واطلعت , وكان الجو ضباب بارد حلو رهيب , بس مع هيك كنت بردانه , واتسهلت ع الشغل وكان الطريق ازمه مش طبيعيه اليوم , اول مره هيك , وكانت السياره بدها بنزين , وكانت الكزيه (محطه البنزين )معجوكه , وبعدها كملت الطريق ع الشغل , واجتني حاله وجع الطاحونه , كنت اسوك وانا مش بعقلي , وجع الله لا يدوقه لحد , مكدرتش اسوك , خوفت اعمل حادث , وكفت ع جنب بالطريق ودورت ع اقرب صيدليه اروح عليها , وعطول ركاض اشتري دوا , واخدته بدون مي , واتاخرت ع شغلي حتى ..~

كان الشغل حلو خفيف , واتصلت عليا جين اد اشتغل اليوم كمان العصر , حكتلها بكدرش ! وكتير حكيت مع خواتي لانو صرنا ما نتلاكى عشان كصصنا ومواعيدنا . بعد ما خلصت الشغل كان في شغله مهمه لازم اعملها واد بتزبط بخبركم عنها , لاني من النوع اللي اد بخبر حد بشغله مهم بدها تصير , بتبّطل تصير , لهيك بحكيهاش الا لما تصير ..~

وبعد ما خلصت الشغله المهمه , امي اتصلت عليا وصارلنا فتره مش حاكين لانو يا انا بنام يا هي بتنام , لهيك حكينا وطولنا , وبعدها خلصت شغل البيت وكعدت اشوف ع التلفزيون الا جاي خوي عملنا عشا وهيني ..~

الحلو انو خلصت نيلز , صارلي يمكن شهرين متابعته , بعرفش ليش بجب اشوف كرتون زمان !


||
من الشغلات اللي استخدمتها :~



kopari coconut oil 30$

من الشغلات اللي صاير استخدمها عشان اشيل المكياج , بذّوب المكياج بدون ما يضر الوجه , هو نوع من زيت جوز الهند , وبكل صراحه بعد التجربه اي شي جوز هند مش منيح لوجهي انا لانو بيطلع حب ع وجهي منه ..~

كيف بستخدمه : بحط تلات كبسات في كف ايدي وبعدين بدهنهم ع وجهي وببلش اشوف المكياج عم يذوب , وبعده بحط شويت مي ع وجهي عشان الزيت بتحول لشكل متل الحليب وهدا بذّوب المكياج اكتر واكتر , وبعدها بغسله , وبستخدم غسول نوع تاني لانو النوع الاول هو بس بذّوب المكياج مش بشيله ..~

اول شي بوجع العيون اد دخل فيها لدرجه مره بحاجه قطره للعين من كتر الوجع , بدي اضل الف والف والف بوجهي حتى اشوف انو ذوب المكياج , يعني بوجع وجهي وانا اضل احت فيه , ريحته مش مغرم فيها لاني مش كتير من عشاق ريحه جوز الهند في الكريمات , ومع هيك بكتشف انو تاني يوم لسا في اثار من المكياج تحت عيوني ..~

ما راح اشتريه كمان مره من مره عالاخر وما بنصح فيه لانو اد استخدمته تاني يوم من استخدامه بيطلع حب ع وجهي عطول ..~

~

السلام عليكم ..~

6 المغرب من يوم الجمعه || 11\15\19 ..

||

اصحيت بدري حوالي 7 الصبح , لانو امبارح قررننا انا وخواتي انو نطلع نفطر برى , صارلنا زمان مش طالعين كلنا كاعدين مع بعض , لانو التزامات وشغل وكصص دكاتره ومدارس لهيك مش لاكين الوكت اللي كلنا نكون فاضين فيه بنفس الوكت , والحمد لله , اليوم الصبح كلنا فاضين , واتفكنا بين 8ونص و9 نكون بالمكان المحدد , كالعاده انا اول واحده بكون , الحمد لله عشان معنديش كصص ولاد صغار وكصص حماه وسلفه وزوج , لهيك بوصل اول واحده , ومرات بنجلط لانهم بتاخروا زياده عن اللزوم , بس بعاود بحكي لحالي يالله ان شاء الله الزمن بلف وبصير انا اتاخر ..~

قبل ما اطلع من الدار اتصلت ع اهلي بالبلاد امي كانت نايمه هاد شو حكالي ابوي , والحمد لله السياره كانت كريبه ع البيت لانو اليوم الدنيا صبّحت مطر الحمد لله , فا بسرعه بوصلها ! ما اخدتش معي الا حالي , لاني الصبح بكل صراحه اد مكنتش شارب كهوه فش تركيز وطاكه عندي , يا دوب عيوني اكدر افتحهم , الكهوه اشي مهم عندي عشان اكدر اتحرك , منيح اني سوكت عخير , بسرعه اطلعت بالسياره , وكل شوي ابعت مسج لخواتي اني وين صرت مشان حضراتهم يشدوا اجريهم وعالفاضي ما نفع هالاشي .

اوصلت وبعد ربع ساعه اجت هوبز , وبعدها بعشر دكايك من الربع ساعه اجت فيث كالعاده اخر واحده , اجينا بدنا نروح ع اول مكان وبعد الحكي شوفنا انو راح يكون ملغوم , يعني راح يكون فيه ملان ناس بنعرفهم وبدناش هالشوفه , روحنا ع المكان التاني ودخلنا وكعدنا نشوف انو الاكل والاسعار مش مناسبه وانو هالمطعم عن حالي بحبوش , لا كعده ولا اكل , بس عشان كريب علينا كلنا , سحبنا حالنا واطلعنا , وروحنا ع اخر مطعم , افطرنا وملان حكي حكيناه ولسا ما خلصنا كمان ..~

بعدها بلشت المواعيد ع خواتي , الحمد لله انا مبسوطه انو فش عليا اشي يوم الجمعه , بحب يوم الجمعه يكون فاضي فيه الظهر , يعني اقل منها يا ربي مكدرش اعمل روتين الجمعه , الحمد لله اوصلت البيت بعد ما ما ودعت خواتي , وعملت روتين الجمعه الحمد لله , وحتى اليوم خليت ساده يطلع برى بالحوش وهو اكيد بضّلش بالحوش بروح عند جاج الجيران بسرعه , بس مع هيك اشفقت عليه انو دايما هو بالدار لحاله , وبغيب عنه , لهيك اتوكلت ع الله وطلعته , وغاب حوالي 3 ساعات , انا رتبت البيت وخلصت كلشي الحمد لله وهيني ..~

اليومين الجايات عليا شغل التمريض من الصبح لليل , يعني فوق ال 10 ساعات كل يوم , واخ يا ربي الله يهونها , لهيك ما اظنش بس اوصل البيت اجي ع المدونه ..~

؛



النليونير : هو الشخص الذي لا يمتلك اي نقود لكن الناس تعتقد انه غني .

انا منهم مين كمان ؟..~

السلام عليكم ..~

ليله الاثنين || 11\18\19 ..~

؛

السبت والاحد كنت اصحى 5 ونص الصبح واطلع من البيت 6 ونص الصبح , واوصل الشغل ع 8 الصبح واضل فيه لل 6 باليل واوصل البيت 7 ونص بالليل ..~
كان شغل متعب بس كأنه حد مستدعي الي لانو كد ما كان صعب , كد ما كانت نفسيتي هاديه ومش حارك اعصابي ولا سائله , ومع هيك جين عطول اتصلت عليا انو اجهز حالي كل سبت و احد اني اشتغل , وبصراحه بديش !! بس بعرفش شو بصير معي , كديش نفسي اكعد بالبيت بدون شغل هيك لفتره , صارلي خمس سنين بهدا الشغل وانهديت , ولما اشتغلت بالكهوه شغل اسبوع فيه عن شغل تلات ايام بالتمريض , ومع هيك ازهكت واتعبت ومن وكت ما امرضت اكرهت الدنيا اكتر , ولما وصلني خبر عن الاوراق اياست انو اعمل اشي بالدنيا وشوفت انو الشغل عالفاضي والمصاري عالفاضي , شوفت انو الحياه كلها عالفاضي , وخلال هالكم شهر ما لكيت حد او اشي هيك يدخل حب الدنيا فيا , ما لكيت هالنور اللي بيحكو عنه اللي يخليني اصحى كل يوم مبسوطه يوم جديد وبدايه جديده , من كتر ما بصير وصح ربنا بستر وبحلها وبهونها , ومع هيك فش راحه , يالله الحمد لله ع كل حال .

يوم السبت بعد ما اوصلت البيت كنت جعانه لاني ما افضيت اكل ولا اشي بالشغل , بس لولا اكلت الفطور بالدار ولا كان كعدت يومين بدون اكل , عطول اكلت ومتممده ع الكنبه , لوكت ما اجاني تلفون من اخوي واحد بيحكي بده يجي ينام عنا , حكتله تعال , وتلاكى مع اخوي تلات , وانا مكانش عندي الطاكه اسهر معه , ضليت معه لنص الليل , لوكت ما اوصلت لمرحله احكي معه في عين ونص من كتر النعس , عاد كديش كان في حكي بدنا نحكيه ..~

اما بالنسبه للاحد فكان نفس الشي ما افضيت اكل بالشغل , ما صدكت اوصل البيت , وكنت طول الطريك بحكي مع امي ع البلفون , وما صدكت اوصل البيت لاحكليها برجعلك , كعدت اكل وكانوا خواتي جاين ع الدار مع اخوتي , الله يخليهم ويعطيهم الصحه ويحقق اللي نفسهم فيه يا رب , مرتبين الدار ومنظفينها الي ويم زي الورده الدار كانت , بس عبرت كديش انبسطت ولا كمان طابخين اكله بحبها , اكلت وتمددت ومكدرتش اصمد بعد ال 9 , نمت بدون هز , الاشي الوحيد اللي كد ما اكون تعبانه الا ما اعمله من روتين ليلي , جزء منه للروتين اللي هو كريمات لوجهي , التعب ما بمنعني احطهم , وعطول نمت وليش ؟ لانو كمان عندي شغل صبح الاثنين ..~

اليوم الصبح اصحيت 7 , وكنت الحمد لله شبعانه نوم , ولكيت اخوي تلات الله يخليه عاملي فطور قبل ما يطلع هو ع الشغل , اكلت وجهزت حالي واطلعت ع الشغل , وشغل الاثنين الكم ساعه بكون بسيط ع قلبي خفيف , خلصت الشغل واتسهلت اشوف خواتي , اتغدينا واشربنا كهوه وحكينا كتير , وعالعصر كل واحده راحت ع اشغالها , الله يعين فيث هلكيت هي صارت تشغل شغلين غير شغل البيت ومسؤلياته ..~

لسا طاحونتي بتوجع وامبين انهم طواحين العقل لانو مش عارف اي واحده ولانو لما خواتي شافوا تمي حكو طاحونه العقل والله يسترني , كد ما باخد دوا مش راضي يروح الوجع ولا يخف , وساعات ساعات هيك مزاجيه هالطحونه , يعني مرات ولا بتوجع ومرات نار بدون سبب , اخ بس انا ضعيفه كدام الطواحين ووجعهم ..~

اليوم ما العبت ولا قرأت ولا حتى شوفت حلقه من مسلسل ,منيح انو اجيت ع المدونه فش وكت !

عم احكي معكم وانا كتير نعسانه بس يلا الحمد لله لانو كان يوم خفيف بسيط عليا , ولاني صرفت كل القبضه تبعتي ع كريمات فا نفسيتي منيحه ,دايما عندي خوف اني اخلّص من الكريمات اللي عندي... ضايل عليا كم شغله كبيره بحياتي , اولها العمليه اللي لما عملت الاتصالات في امل ؟! بس شو هو الامل ؟؟ الخطوه الاولى وبدايه الطريك للخذلان والكأبه ولا اشي زابط ..~




حتى كهوتي سودا ..~

السلام عليكم ..~

ليله الاربعا || 11\20\19 ..~

؛

عم احاول اتزكر شو عملت امبارح التلاتاء , امبين كان يوم خفيف الحمد لله , اطلعت اتحوجت وارجعت ع البيت وضليت ع التلفزيون من حلقه لحلقه , وبالليل اتكاتلت مع امي والله عاقبني عطول واكتأبت واجيت انام معرفتش , حكيت لازم اروح اراضيها وصارت كصص ..~

بلش التلاتا عخير لما اصحيت بدري ومع هيك ضليت بالتخت لل 9 , كومت افطرت وحكيت مع امي اطمن عليها , وجهزت حالي وحكيت اروح اتحوج للبيت , ما طولتش بالحواجه , وارجعت ع البيت , رتبته وخليته زي الورده , بعدها اتمددت ع الكنبه ومن حلقه لحلقه لوكت الليل ,بكون احكي دايما ليش ما الوكت يوكف لانو بضيع غالفاضي , حكيت مع امي واتكاتلنا وسكرت نفسي ع العشا , وصلت لنص الليل والذنب قاتلني وحكيت خليني اتصل عليها عشان اطلب رضها , بتصل عليهم فش عندهم نت , انا مركبه قطعه عندهم بالضفه اسمها اوما , بس بحاجه نت وخط تلفون , وبصير عندك خط ارضي امركاني ,وبدفع بالشهر 20$ فاتوره , واحكي كد ما تحكي او ما حكيت بضلوا 20$ عليك , بس اد فش نت ما بتزبط ,ولازم يكون قوي وعشان دايما بكون فش نت او ضعيف او خربان او هم ما بكونوا بالبيت , بلفوني عليه دولي اني احكي مع اي حد بالشرق الاوسط وبزبط , صح غالي بنحسب ع الدقيقه غير الاشتراك 20$ بالشهر بس مش غالي ع بالي , عشان اريّحه , بحب لما ما يزبط الارضي اوما , اتصل ع بلفون ابوي دولي وبطمن , روحت ا تصلت ع بلفون ابوي , عم يطلع ناس غلط , وكل مره واحد غير , وحكيت يا ربي شو في ؟ خوفت ! ضليت اتصل لدرجه انو اللي بيطلعولي فكروني بدي اتسلى واصاحب , انجلطت هدا من اكتر وجع الراس اللي بكرهه بحياتي ,عم احكي معهم وطولت بالي عليهم , ودق المي وهي مي , صح مرات اكعد اضحك ع هبلهم بس افهموا , بالاخر اتصلت ع اخوي تنين , وهدا الاخو ما بيرتكن عليه , حكالي انو الكل بخير بس الاسلاك تبعت النت خربانه وبزبطو فيها , ما صدكتش كلامه , لانو بعرفوا هدا الاخو بضل يتخوث , بالاصل هو بغلبني بالتخوث وما بنعرف امتى بمزح وامتى جد , وانا لسا قلبي مش مطمن , ومعيش رقم مرت اخوي تنين , عشان علاقتي مش منيجه معهم , معي بس الماسنجر تبعها , روحت احكي مع خطيبه اخوي تلات وطلبت منها الارقام لاتاكد وطلع نفس الرقم اللي عندي هو رقم ابوي , وعاودت اتصلت بيطلع ناس بعرفهومش ومش ابوي , ازهكت ! طلبت منها تحكي لابوي انو هو اللي يتصل عليا , اتصل عليا وحكتله الحكايه , وحكى بصير لخطبه تلفونات وانهم هو بخير وفش اشي , الحمد لله ..وراح يورجع ع الاتصالات ليخبرهم ولنشوف ..~

الشي اللي بضل دايما بتكرر كل ليله معي هو عم اقتل حبي , عنجد نفسي اقتله بدم بارد ! جد قتل بديش اياه يضل عايش , بس بديش اجرحه مش من مبادئي لاني عنجد بحبه وبنساش كبلشي حلو ومنيح عمله وبعمله , بس بدي يموت ! بتمنى ما اوصل لهاي المرحله وهو كدامي . بصحى كتير بالليل من ساده , بس بيني وبينكم مبسوطه اني ما بشتغل , هيك اصحى وكت ما بدي , وانام وكت ما بدي , واد اصحيت بالليل ما انكهر لانو معي وكت للنوم , اخ بس بدي مصاري بنفس الوكت , ومع هيك بدي انبسط بالايام اللي فش عليا اي شغل فيها ..~

اما بالنسبه لليوم الاربعا ..~

اصحيت بدري , ومكانش جاي عبالي اكل , بس حكيت مع امي , ورتبت البيت , لانو دايما بالليل ع العشا عالاغلب لما اكون زعلانه ما بنظف زي امبارح , لهيك نظفت البيت وجهزت حالي لانو عليا تطوع اليوم , بس طول الصبح وانا بس اشرب كهوه واكل تحلايه بس , الاكل مش بنفسي اليوم , اطلعت الظهر واتفكت مع خواتي وين الاقيهم , وركنو عليا اشتري كهوه , لما ميلت اشتر كهوه المحل مسكر , غريبه , بالطريك ع المحل التاني فيث اتصلت عليا اني اجي اخدها لانها بتكدرش تاخد سيارتها , روحت جيبتها من بيتها , وكان زوجها ع الباب مع ابن اخوه , وشوفت سياره شافرليه نوفا اللي شاريها , رهيبه كانت هالسياره كديمه ولونها ناري رهيب , عطول انزلت من سيارتي والف حواليها للنوفا , بكدرش اقاوم السيارات الكديمه , قلبي عنجد لا يتحمل , واجى زوج اختي وبحكي شو بتعملي قاعده ؟ حكتله بدي اسرق النوفا , وهدا وجهه اتغير وخاف ! وال حكيت بعقلي هدا ما بنمزح معه .الله لا يبعتلي واحد هيك , بكدرش اعيش بدون مسخره وتخوث . وسحبت حالي وارجعت لسيارتي الا جايه فيث وروحنا اشترينا كهوه وبعدها اتلاكينا مع هوبز بالمكان وكان الصندوق تبع سيارتها خربان وكعدنا نص ساعه واحنا نحاول نزبط فيه , اتكسروا اظافرنا , ويا يالله اوصلنا لمرحله انو هيك حياتنا صعبه صعبه , واالحمد لله زبطت . وضلينا بالتطوع لل 5 ونص انا وهوبز , اما فيث عشان عليها شغل ضلت بس لل 4 عن حالي انهديت وانشليت , بس بدي انام هلكيت ..~



||





هديك اليوم كعدت اقرا في مشاركاتي بالمدونه وحياتي , ونزلوا دموعي من كتر ما اضحكت عحالي وع حياتي وع طريقتي , مع انو لما كنت اكتبها كنت مكهوره ومفكعه معي , ولما اتزكر المواقف كانت جد صعبه وكنت مهمومه , بس ليش لما قراتها اوحتلي انو كلشي بخير ؟! الله يبعتلنا الخير دايما ..~