مأساة روح {هالكه} في اوراق تائهه ~

السلام عليكم ..~

ليله احد || 11\24\19 ..~


|

غايب عنكم من يوم الخميس , اكيد مش لاسباب حلوه , اللي بتزكره من يوم الخميس انو اختي فيث اجت اخدتني الظهر من الدار وعزمتني مع بناتها ع مطعم تشانيز حكت اكله زاكي , صار معانا كصص مش طبيعيه بهدا اليوم بس عشان نروح ناكل في مطعم وفي الاخر الاكل مش زاكي كمان , مخسر عالفاضي وكيف انو الحياه حتى لما الواحد بده يجاكر بطلع ع راسه كمان , كيف لما بده يحارب ليبسط حاله كمان ما بنفع , وصحيح اللي مكتوب مكتوب وما بتغير ..~

راح ساعتين الوكت بالسياره من مطعم لمطعم لانو المطعم الاصلي مسّكر عشان بعملوا فيه تصليحات ومكانش معانا خبر الا لما اوصلنا للمطعم , والفرع التاني من المطعم ما عجبنني منظره لهيك روحنا ع الفرع التالت , وما عجبني الاكل , كان مقبول بس مش رهيب , وحكت مش متل المطعم الاصلي المسّكر , المهم مش راح اروح عليه مره تانيه , وبتزكر ارجعت البيت المغرب وحسيت حالي مريضه ونمت بدري ..~

||

اما بالنسبه ليوم الجمعه شوفت اني بلشت امرض ولما امرض بتوجعني الطحونه , ومع هيك طنشتها وكعدت اتسلى بالدار من ترتيب وهيك كصص حتى اوصلت لمرحله انو فش فيا حيل من اعراض المرض ’ لهي ضلت ع الكنبه , وكمان نمت بدري ..~

|


اما يوم السبت تنزكر وما تنعاد من الايام الصعبه عليا , طول الليل مش عارف انام من المرض , الهذيان والحمى اللي بعرفش امييز بين الحلم والواقع , بيدخل عليا كوابيس بشغلات بخاف منها وبكرهها واسرار مخبيها عن الكل , مواقف خايف تصير معي , وبتدخل في الحلم وانها صارت ,بصحى وانا خايفه وعرقانه وبحمد الله انها احلام , ما صدكت يطلع النهار من كتر ما كان الليل طويل , وبالنهار كان اصعب لسا , الدوا اللي باخده ولا مأثر معي , وطحونتي وصلت لمرحله اصعب وجع , كان كلشي بجسمي يضرب ع بعض , وانا احكي مع حالي من كتر الوجع , وحتى جربت نوع الدهون اللي بنحط ع الطاحونه , بالزبط زي مخدر البنج وبنفس الوكت الوجع نفسه , يعني نص راسي اتخدر ولا مأثر ع الوجع , والله انه حكي فاضي وسعره غالي اخ بس , لأ والبكهر انو شغلي الكديم الكهوه بتصلوا وببعتو مسجات اني اد بكدر اشتغل وشغل التمريض كمان , يعني نهار صعب من كل النواحي , ومكدرتش الا اني اتصل ع خواتي واسالهم شو اشتري دوا وشو اعمل , وهدول لما سمعوا هيك انجنو , وحتى اختي الكبيره هوبز كانت مريضه بالطوائ بالليل وانا معيش خبر يعني احنا التنتين كنا مراض واحده في المستشفى وواحده بالدار , ولو بعرف ما حكتلها عن حالي , وكان عليها تروح ع دكتوره الظهر , خلصت من عند الدكتور وكانت اختي فيث معاها وعطول اشتروا الي دوا واجو عندي , وانا من النوع اللي لما امرض عطول بيظهر عليا , ولما شافوني انصعقوا , اخدت دوا وضليت بالتخت وهم ضلوا عندي للمغرب والحمد لله استفدت ع الدوا . ونمت بدري ..~

||

اليوم الاحد كان احسن لانو الدوا مفعوله منيح , اجو عندي خواتي واخوتي اجتمعوا عندي الظهر اتغدينا الظهر واشربنا كهوه خاصه انو الي يومين باكلش من مره ولا بشرب كهوه عشاني مريضه , يا دوب كنت اكل لكمه بس عشان الدوا , بعد ما هم اتسهلوا ع بيوتهم , انا العبت ساعه وبعدها شوفت حلقه من مسلسل واجيت ع المدونه , اللي بكهر انو لما امرض بتفح عليا مرضي الكديم وهو ظهري , لهيك بديش اطوّل وانا بستخدم اللاب توب والكيبورد واللعب ..~

||



بحب الشمس والظل اللي بتعمله , وما بصدق توقع كدامي هيك مناظر

نحارب الخوف .

السلام عليكم ..~

11\28\19 من نهار الخميس ..~

صارلي يومين زايد مرضي , الحمد لله اليوم صبحت احسن بكتير , بس امبارح واللي قبله مكدرتش اترك التخت , فش عندي توازن وراسي تكيل ومش كادر اتنفس , وحمى وكصص , بس الحمد لله الله طيبني اليوم , ضليت اتحمل مشان معيش تامين صحي , بستنى لنهايه هدا الشهر وبدايه الشهر الجاي وان شاء الله راح يبعتولي تأمين ع حسب كلامهم , عشان عطول اعمل موعد للعمليه , عشان هيك غيبت عن المدونه , مكنتش حتى كادر اصلي وكنت انام وانا كاعده , لاني اد بحرّك راسي عطول بوكع , بس الحمد لله يا رب كديش مرتاحه هلكيت ومبسوطه بدكم الصراحه اني طيبت , خواتي امبارح كانوا بدهم اروح معاهم ع العزا وحكتلهم كزبه وحجه مشان ما اروح بديش يعرفوا اني كتير مريضه , واخوي تلات اللي عايشه معه حلّفته الامانه ما يحكي لحد ,ف الحمد لله مشت الامور بخير و انا بخير هلكيت ,وان شاءا لله انتو كمان , وبعرف في كم شخص بستدعولي بالخير من اللي كاعدين بقرأو ف شكرا من صمصومه قلبي .

اليوم اصحيت ولما شوفت حاالي منيحه الحمد لله , اكيد رتبت ونظفت وغسلت ملان عليا كصص الدار مكومه تكوم , وكنت كرفانه حالي ف كعدت ساعتين في الشاور اليوم , وكديش انبسطت اني صليت اليوم , هداا اشي ما بذكره بالمدونه بس عنجد بدي الثبات بالدين والثبات بالصلاه , هدا اشي دايما بفكر فيه , واجيت ع المدونه , بعد ما خلصت روايه قصيره خفيفه .. وهيني ..~


حكيت راح اجي مشان احكيلكم عن كريمات بستخدمهم مع انو اللي بشوفه انو فش بنات متابعيني , اكيد عادي ومتعوده وحكيت عنه قبل هالمره , الاناث ما بحبوني ..~

بس مشاني بالمستقبل ارشيف :~

السيروم اللي بستخدمه بالوكت هاد ...|

وعندي السيروم من الكريمات المهمه في روتيني الليلي او بالنهار , اهم اشي !



||



اد راح تستخدميه لحاله راح تكرهيه , لانو ريحته مش حلو , انناس مش حلوه من مره , وكمان دبّق ع الوجه وتكيل , مزعج !

مهمته انو يبيّض الوجه(تفتيح) لانو فيه فيتامين سي , ويعيطي اضاءه حلوه , ونعومه , ويوحد الوجه كمان من علامات حب .

عن حالي لاني ما بستخدمه لحاله , بحط فوقه كريم ليل او كريم نهار , بعد ما استنى شوي ع وجهي يشّربه , ما بتظهر مشكله الدبق او الريحه , ومع الوكت لانو كرّب يخلّص معي , فتّح الوجه , ما كان يطلع حب , ونعومه حلوه .

اما كصه يشيل العلامات تبعات الحب مش هو السبب في روتيني و ما تكتري منه لانو نوع زيتي فا يعني زيت ع كل وجهك مش حلو وخاصه اد ما نشف قبل ما تحطي الكريم اللي بعده ..~

هل راح اشتريه كمان مره ؟ ما انحط في قائمه المفضله عندي , ويعني مش هالاشي الرهيب اللي نحكي عنه واو وبعمل نتيجه فوريه , بس كمان مش سيء . يمكن !

امازون سعره 50 $


||




هدا مفضل عندي 100% , الشركه ولا مره اسمعت فيها وما جربتها قبله , وزمان اشتريته من سفورا لاني حبيت ريحته وملمسه لما جربته بالمحل قبل ما اشتريه , ناسي السعر ..

مهمته بعطي نظاره وجمال وترطيب .
معنديش ولا مشكله معه الا انه بسرعه بخلص .
ريحته رهيبه عطر خفيف مش مزعج , وملمسه رهيب ناعم وملس , وبسرعه وجهك بشربه , وبنفس اللحظه بحلّي الوجه كأنه بصغر او بعطي نضاره او رونق .

بستخدمه بالليل او بالنهار اد عليا مشوار وبدي وجهي يكون حلو , دايما بيطلع وجهي فيه كأني سامعه خبر حلو, او شبعانه نوم , او مرتاحه نفسي ..~

||



اووه هدا كارثه , بس جربته 3 ايام , كل مره لما احطه ع وجهي عطول وجهي بستفز منه , بنفس اللحظه , بانو الحب اللي تحت الجلد بوجهي بيطلع وبصير بده يصير حب بخوف , وبصير حب بخوف , فا مش عارفه اعطيه كمان فرصه ؟ خايف من الفرص اللي اعطيها يخرب وجهي , زي ما بعطي لناس فرص وبخربوا حياتي ..~

اللي بكهر انو سعره غالي واشتريت قبل التخفيظ , والكل بحكي عنه رهيب , يعني لهدرجه تحت جلد وجهي في كائنات بتستنى هيك سيروم لتطلع . اكيد برجعلكم اد اعطيته فرصه .

السلام عليكم ..~

خلصت روتيني الليلي وحكيت اجي احكي هان ببصوت عالي احسن ما اضل احكي مع حالي وانجن بزياده . من ليله الجمعه وشوي بيدخل يوم السبت ..~

||

اطلعت الصبح بدري لا افطرت ولا اشي مشان اعمل تحويله اجار البيت من البنك , وحكيت اعمل جوله بالمحلات اشوف شو في شغلات في البلاك فرايدي محرز , وما لكيت ولا عجبني اشي , بس اتحوجت نواكص البيت وارجعت ع البيت, المهم عندي ظهر يوم الجمعه عشان روتينه , وبعدها ضليت ع الكنبه بين الاكل والشرب والمسلسلات الافلام والكتب , كتير كان يوم حلو خفيف , ونفسي هيك اضل اعيش لفتره , فش تواصل مع حد وفش تلفونات وفش مسووليات , حلو هيك ..~

اتصلت عليا اليوم جينفر وحكتلي اد بشتغل بكرا , بس من اول ما سمعت صوتي حكتلي انك مريضه برجعلك اد ما لكيت حد, وما رجعت الحمد لله .

عنا الدنيا مطر ومطر بخوف , وكل سنه لازم المجلى تبع المطبخ تسكّر من المي تبعت المطر , لانو مربوطه مع الماصوره تبعت مي الشتا اللي بتنزل من السطح الرووف , بالعاده دايما بتصل ع توني الاسبنيولي يجي يصلحها , بس بعرف انو ترك الشغل مع صاحب البيت اللي ساكنه فيه , لهيك فش حل الا انا ازبطا من حالي ,وكانت مرحله طوارئ انو لازم اعمل اشي ولا كل البيت بتملى مي , كانت الدنيا ليل بعد ال 10 , وكنت بالمطبخ وما شوفت الا المجلى كاعد بتعبى مي , وبسرعه بسرعه , اطلعت برى بالمطر وخطر ببالي اكسر الماصوره اللي بتنّزل مي من السطح , عشان تنزل مي ع الارض مش بالماصوره التانيه المربوطه مع تبعت المطبخ , والحمد لله زبطت , هون المواصير صغار ومي الشتا كتير بخوف , هلكيت بعدين بصلحها , بس بالوكت الحاضر احسن من ولا اشي ..~

امي كل تلفون بتحكي فيه معي وهي ما شاء الله بتحكي معي اربع او خمس مرات باليوم لازم تفتح كصتين معي شو فش عليكي شغل ؟ شو ما اتعرفتي ع عريس ؟ هاد اول اشي بتحكيه معي لدرحه صرت اكره لما يرن بلفوني وتكون هي , اليوم الحمد لله نامت طول الليل عندهم لهيك ما اتصلت الا ع صلاه الصبح حكيت شوي وراحت .

اما امبارح صارت كصص بالتلفونات تبعاتها , كاينه تحكي هي واختي الكبيره هوبز , واختي الكبيره هي اللي اتصلت بالاول , وكانت متصله من بلفون بنتها , لانو ابنها ع بلفونها 24 ساعه ع الالعاب , وما كانت بالبيت , كانت طالعه تزور حماتها , ووصلوا ع منطقه فش ارسال فيها وكطع الاتصال , ابنها مكانش معاها ,لهيك امي رجعت تتصل ع اختي خافت من قطع الاتصال , بس ع وين اتصلت ؟ ع بلفون اختي , وكان ابنها الصغير عليه , وامي لما سمعت صوته بتحكيله وين امك ؟ اعطيني اياها ؟ حكالها امي مش هان وهو زعلان , وانا متاكد ردت فعله ع الزعل لانو امي قطعت عليه اللعبه , وامي مكانتش تعرف انو ابنها مش معاها , لهيك سقط قلبها , هي امي بس شوي وبتوصل لمرحله انو بتخاف من كلشي , انا معاها عشان اختي هاي هي وبنتها , كتير صار حوادث معاهم , لهيك امي راح الوسواس ع العاطل , وهدا امي تتصل عليا , وصوتها مش طبيعي , ومكناتش مسكره معي من عشر دكايك , بحكيلها اه يما شوفي ليش مش نايمه ؟ حكت ابصر شو صار باختك ؟ ابنها بحكي انها مش هان وهاي بنتها بتسرع بالسواكه وكصص , كصص , يعني بتخوّف الا بعمره ما خاف , حكتلها يا حرمه هلكيت بشوف شو صار وبرجعلك .. بنرفزه , عملت تلفونات , الاول ع بلفون اختي وطلع ابنها , وكعدت استفهم منه وين امك ؟ مش راضي يحكي بس بده يسكر البلفون ويروح , بالاخر انجنيت فيه انو ينادي حد من خواته , واجت اخته واستفهمت , اشي بكهر والله لشو البلفونات عشان الصغار يلعبوا عليهم ؟ كال ليش بكره الصغار , وبعدين اتصلت ع بنت اختي واعرفت الكصه اللي زي ما حكيت بالاول وارجعت لامي وطمنتها وحكتلها يما روحي نامي .

عنا بالحاره حيوانات اخ يبي كد ما بحاول اتزكر اسمه ناسيه , اتزكرت الراكون . بيجي بنص الليل ع الحوش مشان فيها شجره انجاص , بيجي هو وكل عايلته , وبضلوا يكركعوا بنص الليل وهيهم ,اول ما سكنت بالهبيت كنت افكر حراميه , بعدين قويت حالي وفتحت البال وطلعوا حيوانات , ومن وقتها اعرفت انو الازعاج بنص الليل بالحوش من حيوانات يا مير مش من بشر فا تخافيش .

جيرانا الحيط الحيط الاسبنيول , جابوا من فتره مستاجر جديد , شب اهبل , مشكلته يا ريت انو وكح , بالعكس مأدب , او مضروب من اللي بياخده ,مشكلته انو بضل يحشش طول الوكت وهو بالدار ريحه ماريجوانا علينا , وبحكيلكم ريحتها بتكتل ويتكّرف , لما امي كانت هان واعبر البيت اتخوث عليها انها كاينه تحشش , ومش عارف شو اعمل , عنا قانوني تاخدها لهيك بتكدرش تفسد , مرات بولع بخور بس كمان بصراحه , ريحه الباخور بتكون كويه مرات بنخنك منها كمان .

حلو الواحده تخون , بفتره الخيانه مغامرات حلوه واحاسيك مخلوطه حلوه , احلها مع المتزوجين , الشب بضغط ع الصبيه لتترك كلشي مشانه وبالاخر هو بتركها بدون حتى مع السلامه , هو بختار الصح حتى لو بحبها , وكالعاده الصبيه هي اللي بنتنرك لحالها .

السلام عليكم ..~

من عشا السبت || 11\30\29 .

||

اصحيت متاخره اليوم 10 الصبح لاني نمت متاخره بعد 2 , عاد كنت مخططه اتصل ع فد اول ما اصحى بس كاين رايح الوكت , شوفت مسجات من خواتي انهم راح يجيو عندي الظهر , لهيك رتبت وافطرت وحكيت تلفون مع امي , وانا ع التلفون رن جرس البيت , كان واحد من معارفي شب عربي , حكيت لامي استني برجعلك فلان ع الباب , هالشب بعرفه صارلي كم شهر , بشوفه يمكن مره بالشهر عشان كصه شغل , عمره حوالي ببدايه العشرينات يمكن او اصغر , صار حديث مهم بينا عن كصه الشغل , بصراحه مكدرتش عليه , كد ما حاولت اقنع فيه ونحكي عالفاضي , وكعدت احلف وهو كمان كعد يحلف وعالفاضي كمان , محدش فينا اتنازل , ضرب كلمه وحكى " اخلاقي ما بتسمحلي " اسمعت هالكلمه وحكيت بعقلي يالله زمان ما اسمعت هيك , وين الطيبين تبعون الاخلاق بحياتي , وعطول اتبسمت بوجهه وحكتله الله يعوضك . ولما ارجعت ع بلفوني لكيت امي عنجد بتستنى وحكتلها الكصه ..~

حوالي ع 1 اجو خواتي عندي , وضلوا لل 4 العصر , بس كان علينا مشوار قصير , اطلعنا وعاودنا ارجعنا بعد المشوار , بس عشان زمان محنا شايفين بعض ملان حكي وكل الكصص ننسى نكملها من كتر ما الحكي بجر حكي , بعد ما اتسهلوا رتبت البيت واجيت اكعد الا جينفر بتتصل وبتحكي انو اد بكدر اشتغل بكرا ضروري لانو مفش حد يشتغل , حكيت اه بشتغل , بس الله يعيني , شغل فوق 10 ساعات مع ناس لئيمين كتير , وتعب نفسي وجسدي , بس يالله الله بهونها ان شاء الله , راح احاول كد ما اكدر اطنّش ..~

لا قرأت ولا شوفت فلم او حلقه من مسلسل ولا حتى كعدت كعده رواك مع حالي ..~

الله يهونها علينا كلنا بكرا , وبدي ابلش هلكيت بوكتي مع الشغلات اللي بحبها .

||

السلام عليكم ..~

ليله الاحد وبدايه اخر شهر بالسنه , واد بدي اعمل تغير بحياتي ف السنه الجديده راح اتغيير للاسوء طبعا , اللي بده يشاركني يطلب رقم بلفوني ..~

؛

امبارح بعد ما خلصّت من المدونه , اتصلت ع امي مشّان اخبّرها انو بدّي انام بدّري عشّان عليا شغل ,فا حاولي يا امي العزيزه ما تتصلي عليا ,( بتحلموا احط حركه الشدّه ع كل حرف مشان اكعد لبكرا في المدونه(_ّ) بالاصل بعرف انو كلامي مش مفهوم وصعب اللهجه ومع هيك بحاولش اجمّل في المدونه لانو بكفى حلاتي بالصور الل بحطها ) لانو عنجد بكره هدا الاحساس لما اوقع في بدايه نومي , واكرها عليا اصحى بعد هالاحساس هاد . وطفيت كلشي واتمددت بالتخت حوالي 10 ونص بالليل , حتى ساده مكانش بالغرفه عندي, كنت لوحدي ومع نفسي ولحالي , وهيك اجتني لحظه اشتياق بدون سبب لحبي , عبرت بحرب مع حالي ساعه كامله , كل ما بدي اتصل اتزكر العمى زي وجهه اللي عمله وانو بستاهلش احكي معه , وكتير اسمعت كلام انو اتغير ومش هو , وبديش اياه يتغير , ومع هيك بعرفه بشوفني كد الدنيا لما بتصل عليه , وبعرفه بنساش هيك تصرفات مني , وحكيت طز طزين بعقلي , حكيت احط كلشي ع جنب واتصل عليه لاني بحبه , وانا لما بتصل بتصل دولي لانو عند عقلي مضمون انو بيرن , مش زي النت يمكن يرن ويمكن يظهر العكس واعبر في كصص الثقه اللي براسي(معنديش ثقه) , اتصلت لمده دقيقه بالزبط , لا رد ولا حتى قطع الخط , بالعاده يا برد بعد رنتين بالزبط , يا بقطع الخط مشان ما يخسرني تكاليف الاتصال الدولي , او انا ما بزيدها بالرن , بس كانت ليله امبارح زياده وانا ارن ومن جواي مكنتش سائل عن شو راح يجيب هالاتصال عليا او عليه كصص , لما ما رد , اعرفت انو قله الجواب جواب , واعرفت انو جد اتغير وحتى بطلت مهمه ,وما بلومه, اني ابطل اكون مهمه عنده لاني انانيه , بس بهمني اد الدنيا غيرته للشب اللي بده الصح لحياته , انا بدي اكون عشيقه فقط , اغلب الاوكات اكون سر ,استمتاع , بس حلو مرات اكون سبب بمشاكل ,لاني بعرف كديش هم اغبيا ليتكاتلوا عشاني , حطيت هالبلفون جمبي وابتسمت ابتسامه صفرا , حكيت اللي بحلم فيه صار , نهايه بدون وداع , كديش بحلم بهاي الكصه معاه , اد بعرفني فا بعرف انو الحكي الفاضي والحجج ما بتمشي معي , لهيك مش راح يبعت السبب . وبعدها بلشت اغفى , الا بلفوني برن حكيت يا ربي امي مش وكتها , الا طلع هو ! وحكينا , وما اتكاتلنا , بس كلشي هو بحكيه بحكي بعقلي اخ يا ربي كال ليش بديش احكي معه , لانو عقلي مش مستوعب انو اللي بحكيه صح , بضل يحكيلي عقلي هيه بكدب , كداب , كاعد بكدب عليكي , شايفين هالعذاب اللي بصير وانا بحكي معه , وكلامي كان حجار معاه , انو يا حبي بشوفك مش ميت, انو يا حبي انت كاعد بتكدب ,وكل اشي كنت احكيه كان يضل يحكي ماشي , او يضل ساكت , اخ يا ربي كاعده بعذبه معي , كل هالشك صار من وكت مرضه , مش عارفه يعني هو عنجد مريض وعقلي الباطني مش كادر يستوعب انو عنجد مريض لهيك عقلي بضحك عليا وبوهمني انو حبي بكدب ! طولنا ع الخط , لوكت ما انا انعست ومعيش وكت لازم انام لانو بس معي كم ساعه كبل الشغل , نمت حوالي 3 واشي واصحيت خمسه واشي عشان شغلي , جهزت حالي واطلعت عالشغل , وكد ما اخوي تلات حكى انو ياخدني ع ا لشغل بالسياره ما رضيت , بحب اروح ع نص البلد بالباص وخاصه بالمطر والدنيا صبح الاحد , يعني الشوارع فاضيه والباصات , يعني بكعد ساعه واشي بالباص حسب, بس بتكون هيك استجمام , بس مكانش معي وكت اعمل كهوه , لهيك اشتريت كهوه بالطريك , وروحت ع الشغل , وكان شغل صعب بس الحمد لله عملت زي ما وعدت حالي انو اطنش , وغير انه هاليوم مش هالاشي الكبير , خلصت الشغل وارجعت ع الدار بالباص وليل ومطر وشوارع فاضيه , كلشي زي ما بدي وزي ما بحب , اتعشيت ورتبت المطبخ واتمددت وهيني , لازم كمان انام بدري مشان عليا كمان بكرا شغل ولازم اصحى بدري ..~

||













طبشتها اليوم حتى لو الصور مكرره ..~

هدول الصور من اكتر الصوره المفضله عندي اللي صورتهم بحياتي , هم بالحاره تبعتي وع غروب الشمس وبتصدف واحده منهم مع الضباب , وليش مفضله ؟ سبب شخصي بحت ومعبى اسرار , وكل ما يمر عليا هيك مناظر عطول بصورهم , وانا اصورهم عطول بمر شريط , لهيك عمرك سألت حالك بشو كنت تفكر لما كنت تصوّر ؟ هيك مناظر بتخليني افكر بالسر اللي جواي .السر اللي بخليني سعيده..~

السلام عليكم ..~

الاثنين || 12\2\19 ..~

||

اصحيت بدري مشان عليا شغل كم ساعه , ومع هيك اصحيت مش شبعانه نوم , وصارلي كم يوم بصحى صنّم , بكدرش اتحرك , ورقبتي مش مرتاحه , لهيك يمكن بدي مخده جديده , جهزت حالي وافطرت واتسهلت ع الشغل , واطلعت متأخره عشان ما ادخل في الازمه , اوصلت الشغل والحمد لله لكيت مكان كريب من الشغل للسياره عشان الدنيا مطر ولسا مش شايف حالي طيبت عالاخر , لهيك مش ناكصني امرض لانو مناعتي مش منيحه صايره هالايام هاي , واتصلت ع امي اطمن عليهم واعرف اخبارهم وانا لسا السياره لانو كان معي وكت , بعدها دخلت الشغل , ويوم الاثنين بكون شغل خفيف حلو رهيب , خلصته وكبل ما اطلع اتصلت ع خواتي مشان نشوف شو قررنا مخططات واتفكنا ع وين نلتقى ..~

اطلعت من الشغل واتسهلت ع الموعد مع خواتي , وبخاف من السواكه بالمطر والضباب , ولانو سيارتي عجالها مش مناح من مره , لهيك بضل ع اعصابي وانا اسوك , بس الحمد لله اتهونت عليا , اوصلت ع المكان وبعد بدكيكه اجو خواتي , الحمد لله ع الموعد هالمره , انزلت من سيارتي ورحت معاهم , روحنا ع المكان اللي النا فتره بنحكي بدنا نروح نشتري كطعه مهمه للدار , الحمد لله مشت الامور بخير ويا رب النهايه كمان تكون تمام , وبعد ما خلصنا هالكصه , روحنا نجيب ابن اختي من المدرسه , وبعدها كنا جعانين , لهيك ميلنا اكلنا , وبعدها ميلنا اشربنا كهوه , وبعدها , كل واحده اتسهلت ع امورها ومسوولياتها ..~

اجيت ع البيت حوالي الساعه 4 وعليا ملان تلفونات اعملها وورق معاملات اعبيّه وايميلات ارد عليها مع المحاميه وكله عشان كصص كبيره , وكلها تكوّم عليا لانو الاسبوع الماضي كان اعياد لهيك محدش كان فاتح واللي في اجازات ومسافرين , فا اليوم هو العوده بعد اعيادهم , والمشكله انو التلفون الواحد بكعد فيه نص ساعه , خلصت كل الكصص وضايل الرد والله يستر ويهونها ..~

وهيني , في شغلات كبيره داخله على حياتي , بس بصراحه كل اللي راسي مشغول فيه تزبط التحويلات واعمل هالعمليه هاد اكتر اشي بالي مشغول فيه ويا رب تهونها ..~

||

السلام عليكم ..~

الاربعا || 12\4\19 ..~

||

بالنسبه ليوم التلاتاء , من الايام اللي انشغلت فيها كتير لدرجه وجع الراس ..~

8 الصبح اصحيت وضليت بالتخت لل 9 , وانا بالتخت اتصلت ع امي وع خواتي , ولما كومت من التخت مشان اعمل فطور وكهوه اجاني اتصال بستناه بالراحه شهر , تركت كلشي بعمله ورديت ع التلفون ع امل انو هو الاتصال والحمد لله طلع هو , كعدت ربع ساعه بالاتصال , وباللحظه اللي انا بحكي فيها , الكل بتصل عليا خلاني اتوتر وحاله وخاصه انو لغتي الانجليزي مش ولابد , واخدت موعد مشان اكمل الاتصال بس وجه لوجه اسهل , خلصت الاتصال وشايف اني ما عملت اللي نفسي فيه , وبعد ما خلصته ارجعت لخواتي ولامي عشان اخبّرهم شو صار بالاتصال ..~

بعد ما خلصت البلفونات كان عليا كصص اعملها قبل ما اروح ع موعد الوجه لوجه , اولها اعمل ورقه احكي فيه كصص , ولازم تكون الاملاء ولا غلطه فيها , كعدت ادور عالنت واعرفت اسهل طريقه اني اعملها بس ادفع مصاري , وعند مير بتحب السهوله , لهيك عملت الورقه وعشان الاملاء والتنسيق , هاي من الكزب اللي بعملها وبكون داخليا مش مرتاحه اني بكزب , وبعد ما خلصت الورقه لازم اطبعها , ويا حبيبي الطابعه مش شغّاله , عم تطبع نص الكلام والنص التاني مغبّش ومش واضح , والحل اني اروح اطبعها في مكتبه , حكيت مش مشكل وانا بطريقي بميّل ع المكتبه , وبعدها بلشت اجهّز بحالي ولازم اكون ع اخر تكّه , يعني مرتبه وانيقه ومش زياده عن اللزوم , واطلعت قبل الموعد بساعتين مشان بعرف حياتي وبعرف الابواب المسكّره , وخاصه انو الطابعه ما اشتغلت يعني الحبل ع الجرار بانو كصص تانيه تصير , هدا مش تشاؤم يا اصحابي , هدا من وقائع بحياتي ومن تجارب بحياتي اني لازم احسب حساب مطبات بطريقي , اد بدي حياتي تمشي وتزبط فيها الامور ..~

اطلعت من الدار , وشغلّت هالسياره الا بنت اختي بتتصل اد هي تاخدني ع الموعد , ليش ؟ لانو الموعد في مكان ولا عمري روحت سوكت فيه , في مكان معجوك , في مكان بخوّف السواكه فيه وانا خويّفه بالشوارع الجديده وبهاي المنطقه , حكتلها انا بدبّر حالي وبشوف شو راح اعمل . وبالزبط مكنتش عارف شو اعمل اد اروح في سيارتي او اد اطلب اوبر , كان براسي اني لازم اطبع الورقه وبعدها بشوف كصه الوصول . وبسرعه روحت ع المكتبه وهيك انزلت من السياره متنشطه ومبسوطه عشان لكيت مكان للسياره جمب المكتبه , وشوفت انو الحمد لله معاي ملااان وكت بلكي اشتري اشي اكله واشرب كهوه لاني ما افطرت ولا اشربت كهوه , واوصلت باب المكتبه وهو بالعاده بفتح لحاله , بحكي ليش مش راضي يفتح شو خربان , حاولت افتحه في ايدي مش زابط , حكيت مستحيل تكون مسكّره الساعه 11 , طب وين اللافته تبعت المواعيد , شوفت انو يوم التلاتاء هو اليوم الوحيد اللي المكتبه بتفتح فيه ع 12 , اخلع , لسا مسطوله باللي صاير وكاعده بحكي مع حالي وشو اعمل طيب ؟ ارجعت ع السياره كعدت ادور ع مكان بطبع , لكيت مكان كريب , بسرعه روحت عليه وكعدت اسال , حكو كنا نطبع بس بطّلنا , وهدا اتغيّر وجهي , عنجد خوفت , والصبيه حكتلي في مكان بهديك المنطقه كريب عالاكيد بطبعوا , اجاني الفرج الحمد لله , وبسرعه روحت ع المكان التالت مشان اطبع , بس كان ازمه ملان عالم فيه , وبعد ما عملت كل الكصص مشان اطبع هالورقه هاي اللي كلّفتني 5$ وهي بالاصل في المكتبه بتكلّف ربع دولار , ومع هيك حمدت الله انو بالاصل زبط واكدرت اطبعها , وححكيت اروح اكعد بالسياره اخد نفس واشوف شو بدي اعمل ...~

كعدت بالسياره وبلشت افكر اد اتجرأ واخاطر واروح بسيارتي ؟! وبالاخر قررت هيك , غريبه انا بالزمن هاد صرت خويفه وما بدي اجرب واتجرأ وكل هالكصص , بس بنفس الوكت هيك اشي حكالي روحي , ورحت من طريق ابعد عن العجكه وتهت وضعيت , روحت ع منطقه صناعيه طرق اتجاه واحد وضيقه وحاله , الشاحنات بالطرق التانيه واشوف حالي صغيره بالسياره وبدي اندعس من هالشاحنات الكبيره , والمشكله كمان اني بحب الشاحنات وشكلهم وانسى حالي واستمعت وانا اشوف فيهم , واضحك عحالي عشان ضعت وتهت , واحكي مع حالي وكصص , يعني مغامره , بس بحكيلكم تهت كتير مش شوي , والجي بي اس كانت اضيّع فيّا اكتر , الله يلعنها , بعد كل اللي صار فيّا اوصلت واخيرا ومش مصّدق حالي , اتصلت ع خواتي عشان اطمنهم ومكانش معي وكت من مره اني افطر واشرب كهوه , وبسرعه روحت ع الموعد , كنت متوتره وخايفه وكمان ما زبطت , اخ يا ربي , حسيت حالي اني ضعيفه ومش كد هالكصه ونفسي اكون كدها , خلصت الموعد وارجعت ع السياره اخد نفس ..~

حكيت مع خواتي شو صار , والكبيره طلبت اد باخدها ع مشوار كبل ما ارجع عالدار , بالترويحه حكيت شو اعمل ارجع من محل المكان اللي اجيت منه من الطرق اللي تهت فيها ولا اتجرأ اكتر واروح مع العجكات , حكيت بديش ارجع اضيع , لهيك ارجعت من مكان جديد بين العجكات ويالله كديش كان اسهل , اوصلت عند اختي اخدتها ع مشوارها بسرعه واخدت بنتها ع مشوار تاني ,كنت ميته جوع ومسطّله عالاخر , لهيك ميّلت اتحوجت , وارجعت ع البيت بلشت اكل الا اخوي بتصل عليا انو بده يجي من الشغل عليا يشرب معي كهوه , حكتله اجيت والله جابك , لاني عنجد بدي اشرب كهوه وحلو اشربها مع حد , اجى اخوي وصار حكينا بينا واشربنا كهوه , واتسهل وصارت الساعه 6 , خلصت اتعبت من كل هالجكات اللي صارت وما صدكت احط راسي وانام .~


||

اما اليوم الاربعا اصحيت متاخره ع 9 , حكيت تلفونات مع الاهل , وبسرعه كومت عملت فطور وكهوه وبلشت ارتب في البيت لانو امبارح نمت بدون ما اعمل اشي من التعب والانتظار , اجاني تلفون مهم تكمله لكل كصه امبارح , كعدت فيه نص ساعه , وكمان بلشت تلفونات بخصوص تحويلات العمليه , كعدت بالزبط ساعتين , من عياده لمستشفى لمراكز والي بكهر انو بضيع الوكت وانا استنى تحوويلات التلفون انو محدش بيرد , عملت كصص الدنيا عشان حد يقبلني , محدش قابلني , بالاخر عياده حكتلي اجي عليهم ومعي كل المطلوب من ورق واثبات , لهيك ع امل انو بكرا توصل ورقه مهمه ع البيت مشان احطها مع الورق اللي معي و اروح ع العياده ويا رب كل هالكصص تصير هاي السنه لانو اخر هدا الشهر في اشي جديد بحياتي راح اكون مشغوله وفش وكت , ويا رب هالاشي الجديد يكون خير عليا يا رب . وخلصت التلفونات الحمد لله وكان عليا ملان ايميلات وصلتني اليوم لازم ارجعلها بخصوص الكصه تبعت اخر الشهر , منها معاملات وفحوص لازم اعملهاا كمان بس هدول الساعتين اتعبوني ووجعوا راسي لهيك كنت بدي فتره اريح راسي واخد نفس , الا بلفوني برن وكانت اختي فيث , حكت اد اطلع معاها هيك ساعه نتغدا , حكتلها اه .

اجت اختي اخدتني وهاي المره صارت كصه كبيره وطوشه عشان بدهاش انا اللي اعزمها عشان معيش مصاري زي زمان لاني بشتغلش زي زمان, وعاساس هي شغلها يعني بيطلع مصاري وما بيطلع من مره , المهم انا فوزت وانا دفعت , وهاي المره جربنا برغر جديد وهاد ازكى برجر بحياتي في امريكا اكلته , رهيييب .. باقرب وكت لازم اروح عليه كمان مره لانو عنجد لسا الطعم بتمي , وبعدها ارجعت ع البيت حوالي العصر ..~

وبلشت بتكمله الايميلات والمعاملات , ولسا ضايل عليا كمان كصص بس اتعبت وما عملتش اشي لنفسي وبكره هيك يمر يوم بدون ما اعمل اشي لنفسي .. لهيك بشوفكم ..~


||

السلام عليكم ..~

من ليله الاثنين || 12\9\19 ..~

واال غايب عنكم خمس ايام , عاد حسيتهم اكتر , كالعاده ايام انشغلت فيها , وايام اجى صاحبي الاكتئاب , راح احاول كد ما اكدر اتزكر شو صار معي كصص , بس في شغله متزكرها وراح تاخد كل الحكي ..~

||

الخميس كان عليا شغل , شفت صغير كم ساعه الصبح , وبس خلصت منه اجتمعت مع اختي الكبيره , افطرنا واشربنا كهوه واتحوجنا وجيبنا ابنها من المدرسه وكانت عامله طبيخ لهيك اعطتني اياه , دايما خواتي بحسبو حسابي انا واخوي تلات بالطبيخ , لانو بعرفوني بحبش اطبخ , حتى لو اخوي تلات بعمل طبيخ ,بحب طبيخ خواتي اكتر من اخوتي, ارجعت العصر ع البيت ومش متزكر شو صار كصص معي , اظن ارجعت كملت الايميلات والاتصالات بخصوص كصتين بحياتي بخبركم عنهم بالوكت , ونمت بدري عشان يوم الجمعه لانو كان عليا موعد مهم اعمله ..~

||

اصحيت بدري عشان اروح ع موعدي يوم الجمعه , وكان يوم الجمعه من ايام الصعبه عليا اشي مش طبيعي , هيني بتزكر فيه وكاعده بتنهد من كتر ما اتعبت منه هاليوم , ومن كتر ما نكد ع نفسيتي لليوم متنكده من شو صار , وبعرفش ليش هيك رده فعلي , لاني بالعاده ما بتأثر من ناس مروا مرور بحياتي , وبالعاده ما باخده هيك مواقف اشي شخصي ,هدا اشي حلو بعمله بحياتي ومبسوطه عليه انو فش وجع راس ونفسيه, بس اللي صار حسسني انو صار شخصي , وخلاني اضل اسال حالي ليش هيك عمل معي , شو انا عملت حتى هو هيك يعمل , ضليت افكر وما لكيت جواب .

بسرعه اصحيت وبسرعه جهزت حالي واطلعت من الدار , كان عليا فحص لازم اعمله , ولكيت مركز فحص (مختبر) كريب من بيتي لهيك حكيت بروح عليه احسن ما اروح ع نص البلد , وبالطريك اتصلت ع امي وبصراحه كانت لجت امي مش منيحه , ولما عرفت انو لسا مش رايحه بلشت بالقلق تبعها انو راح اتاخر وراح يضيع النهار , وكل كلامها كأنه بعت طاكه نكدّت عليا يومي , يا ربي تغفري , تاني بديش احكيلها , بحكي بعد ما اخلص من الكصه, اركبت بالباص وعشر دكايك وكنت جمب المختبر , بسرعه انزلت منه وبسرعه عبرت المختبر وكديش انبسطت لما عبرت وما لكيت كدامي حد , غريبه هيك السهوله ؟! سجلّت دخولي واجت الصبيه وبسرعه بلشت تسال شو الفحص اللي بدي اياه , وحكتلها شو بدي , بلشت تشتغل ع الكمبيوتر بعد ما اخدت هويتي وما لكت اسمي في النظام عشان تعمل الفحص , اعطتني رقم وحكتلي اتصلي وخبريهم , لما اتصلت اللي ردت عليا حكتلي اه اسمك مش بالنظام ومن البحث شايفه انو بدهومش حد لهيك لازم ترجعي للشخص اللي بعتك من اصله , لهيك اتصلت ع الشخص الاصلي اللي طلب اعمل الفحص ما رد , حكيت اروح ع موعدي التاني احسن , ارجعت اركبت بالباص وما مشيت الا الشخص الاصلي بتصل وبحكيلي هيني حطيت اسمك بالنظام بس معك للعصر وبنتهي , لهيك انزلت من الباص وارجعت ع المختبر بعد ما اوصلت لمنطقه فش باصات لهيك لازم امشي وتقطموا اجريا من المشي وكانت الدنيا شمش وهوا ومعيش نظارات ومش شارب كهوه ولا مفطره لانو لازم اصوم عشان الفحص , ف يعني كنت مش باحسن حالاتي .

ارجعت ع المختبر ودخلت وكمان ما كان حد كدامي , حكيت الله يستر هاي المره ! وحكتلها اني عملت التلفون واني هلكيت بالنظام , عملت كمان مره وكمان مره وكمان مره ومش طالع اسمي , لهيك اجت الصبيه التاني وحكت اني اروح اجرب مختبر تاني, مرات هيك بصير انو ببعتوا المعلومات ع مختبر محدد , اعطتني عنوانين وحكتلي اد بتلاكي واحد منهم مسكر بتروحي ع التاني , وحكتلي كالاكيد عندهم بتلاكي اسمك , وكانوا بنص البلد , حكيت يالله بعين الله , ارجعت اركبت في الباص واللي بكهر بلفوني بهداك اليوم كان خربان مش راضي الارسال يزبط , لهيك جلطتني الخرائط مشان اشوف شو الباصات اللي اركبها , لانو الخرائط مش زابطه , وكد ما طفيت البلفون وضويته مش راضي يزبط معي النت , وحاولت اشبك في اي وايفاي كمان ما لكيت ,لهيك حسب الطرق اللي بعرفها بنص البلد استنتجت انو لازم اركب بعد الباص بقطار لهيك انزلت من الباص واركبت بالقطار بس ما بوصلني للمختبر لانو بروح طريق تاني , بعد ما انزلت من القطار كد ما كعدت ادور ع باص بروح ع طريق المختبر ما لكيت ,لا لكيت مواقف ولا لكيت باصات بالشوارع اني الحقها لهيك انجبرت امشي , بكره المشي وانا جعانه ومع الشمس , لا حول ولا قوه الا بالله , كله عشان مستحيل اروح بسيارتي ع نص البلد لانو مستحيل الاكي مكان اصفها ومستحيل اوصل صاغ سليم , يعني الا ما اخبط حد او حد يخطبني لهيك روحت في الباص .

اوصلت المختبر والله يكطع هيك مختبر , ويكطع اللي بشتغل فيه حسبي الله عليه دنيا واخره , كهرني الله ياخده ويجحمه , هو كان من هدولاك , اكيد احنا بسانفراسيسكو , كلامه المايع اللي بخليني بدي استفرغ , ومع هيك بعرف حالي مستحيل اظهر هدا الاشي ع وجهي , المهم نادى ع اسمي واول ما شافني هيك كعد يجحر فيا من فوك لتحت, مش مهم عندي لانو بعرف حالي , رده الفعل الاولى لناس عني مش منيحه واغلب الناس اول ما تشوفني ما بعجبهم , عادي ما اهتميت للكصه , وحكتله لشو جايه وشو نوع الفحص ولمين الفحص , عمل حاله مش سامع وحكى اعيد , روحت عادي عدت ونادى عليا مشان اعمل الفحص وطلب الهويه ومعلومات الفحص وبحكي معي بجكامه مش طبيعيه بس كله تمام , المهم عندي اعمل الفحص وارتاح والمهم انو يلاكي اسمي في النظام , بلش بده يعمل الفحص , والحمد لله انبسطت انو اسمي موجود في النظام ,وبس اعطاني نص دكيكه , مستحيل يكون اعطاني دكيكه , لانو اللي عملته هو اني اسكر شنتتي واحطها ع جنب ع الارض عشان الفحص لانو مش راح اكدر احملها, وهاد وكف انو يعمل الفحص وكعد يحكي لازم تكعدي تشربي مي كل نص ساعه واضلك تلات ساعات بالمختبر وممنوع تتركي المختبر , الحيوان الله ياخده , طب شو عملت يا ربي شو استنتج , بصدكش هاد كأنه عنجد كان يستنى باشي مني عشان ما يعملي الفحص , طيب ليش ؟ مع انه بحكيلكم اللي من هدولاك كتير لطفاء وكتير مناح , هاد اول واحد هيك مر عليا , وانجبرت اني اضل بالمختبر تلات ساعات سجن , خلال هالتلات ساعات خلصت نص كتاب وانا اقرا , واللي بكهر اكتر انو بكدرش اجي ليوم تاني لانو بنتهي اسمي من النظام , وع حدود الساعتين خلص ازهكت وناديت عليه وحكتله انو اسمي بالنظام بنتهي كمان ساعه لازم اعمل الفحص , والحيوان كال راح اتاكد ورجع نادى عليا واخيرا عملت الفحص , بس شو كنت مستويه من الجوع والتعب والنفسيه منه , ولليوم مش عارف ليش هيك اتصرف معي .

كنت كتير تعبانه بس بنفس الوكت لازم اعمل الموعد التاني عشاني صحتي , والعياده كانت بنفس المنطقه , بس بعرفش ليش شوفتها بعيده وشوفت اني مشيت كتير , اوصلت العياده وعملت ورق مهم اثبات عشان صحتي , وبعدها عملت موعد عشان تبلش الفحوص من اول وجديد بدل ما يعملو العمليه , بس يالله الحمد لله انهم قبلوني , بس بعرفش كم نسبه الدفع ع العلاج , المهم قبلوني بعد عذاب سنه , ويا رب يضل ساتر ع صحتي , لانو انا بمرحله خطره وخايف يصير فيا اشي قبل العمليه وبديش لانو محدش بيعرف الا خواتي , وارجعت ع البيت وانا بحكي مع حالي ومتنكده , اكلت واشربت كهوه , والله يكطعه راح عليا روتين الجمعه , اوصلت الدار المغرب , وحكيت يا ربي اعمل الرويتن المغرب ؟ بضلوا يوم جمعه , وعملته ويا رب يتقبّل , وحكيت مع امي واتمددت ع التخت ونمت ..~

السبت اجو عندي خواتي واولادهم وانا صرت عنجد ما احب اولادهم فش احترام من مره لهيك بكره الصغار وبشوفش حد حواليا اولاده مناح معاه او معاي , وبحكي لشو الخلف عشان لما نكبر نلاكي حد ؟ طيب عن حالي هيني كبيره واخر مره لما امي كانت عندي , اتغيرت تجاها , وحكيت اد انا اللي كنت احطها كدام صحتي وكدام روحي اتغيرت , لهيك الاولاد حكي فاضي , وحكيت لخواتي شو صار معي بالمختبر , حكولي اشي خلاني احسن شوي , وهو انو في من هدولاك مغيورين بانو ليش انتي هيك مش هم , وحكو عن تجارب صارت معهم , ومع هيك الله يجحمه ويسم بدنه , ونمت بدري لانو كان عليا شغل الاحد , لانو جينفر ضلت تتصل مشان اشتغل وانا بصراحه بخاف من الشفتات الطويله عشان صحتي , بس الحمد لله ربنا هونها وسترها الحمد لله ..~

الاحد اصحيت بدري كتير ع 4 بسرعه افطرت وجهزت حالي واشربت كهوه , واطلعت ع الخمسه ونص من الدار , كانت رذاذ حلو وعتمه وفش حد بالشوارع , واطلعت بالباص واوصلت الشغل وكان معي ربع ساعه , لهيك ميلت اشتريت غدا لانو شغلي هاي المره 12 ساعه , وما لكيت اشي بالدار اخده معي , الدار فيها كحط , يا عمي الدنيا شتا وانا بضل اكل بخليش اشي , شغلي كان الحمد لله منيح وكنت زي عوايدي باثرش عليا كصص وبضل مطنشه لاخر ساعه من شغلي , صار موقف طلع عقلي , وطلع صوتي , بس الحمد لله انحلت الكصه وخلصت شفتي 7 واشي بالليل , وجهزت حالي واطلعت منه والباص سابقني بدقيقه لهيك عشان ليله الاحد كعد ربع ساعه ت اجى ومع هيك كلشي حلو لانو مطر خفيف وليل , اوصلت البيت 9 الااشي , كان اخوي عامل اكل , اكلت وحكيت مع امي اطمنها عن حالي ونمت لانو عليا شغل بدري ..~

اووه اوصلت لليوم , والله شاطره حكيت الكم عن خمس الايام اللي غيبت فيها , وعفكره هلكيت نفسيتي توب التوب بعد ما حكيت عن الله يجحمه , لهيك اوصلت لمرحله عنجد بحب المدونه , وعنجد لما احكي عن مشاكلي بتخف حتى لو بس نفسيا , اليوم اصحيت بدري وجهزت حالي عشان الشغل ومع هيك مش شبعانه نوم , اخدت اشي اكله بالسياره , واوصلت الشغل ع خير , وكان حلو خفيف , اتواصلت مع خواتي اد حد بده اشوفه وكنت داخليا بديش , لاني عنجد الدار بدها تنظيف , من يوم السبت من وكت ما اجو الصغار لا جالي ولا منظف ولا غاسله ولا حتى متحوجه , لهيك خواتي كانوا مشغولات , بس خلصت شغلي روحت اتحوجت للبيت , واجيت اتغديت واشربت كهوه واتحليت وبلشت تنظيف وترتيب وجلي وغسيل وما خلصت , ضايل عليا شغلات صغيره , وبعد العشا كمان صار جلي , بس حكيت اجكي ع المدونه ولبكرا التنظيف ..~


|||

السلام عليكم ..~

من الشغلات اللي استخدمتها زمان ..~

||



مزيل عرق , اسوء نوع مر عليا , هو مكتوب عليه فحم بس ما وصلت لمرحله انو يعمل اللي عمله , بسمّر اشي مش طبيعي , استخدمته لمده اسبوع ولما شوفت كيف بسمّر ع الزباله بعيد عنكم ..~

||



بحمي الشعر من الحراره لما استخدم سشوار او كاوي , وبساعد في هيشان الشعر , عن حالي هاي الشركه بالنسبه لكريمات الشعر هي احسن شركه من ناحيه الريحه ,دايما الريحه كتير حلوه , بخلو ريحه شعري حلوه ,منيح بس بعرفش اد بشتريه كمان مره بس بنفس الوكت حبيته ..~

||



هالورانيك اسيد , كتير ساعد في ترطيب بشرتي ومن اي جفاف بصير من دهون الحبوب ع وجهي , وكان بس نقطه وتملّي كل وجهي , لهيك ضل عندي فتره طويله ..~

||

اما بالنسبه للهالووين شو كانوا اواعيّا ..~



اواعيا كانوا كلشي اسود , وحطيت الجنحان والطوك , وكل الصغار حكوا هدا بالزبط شو انا , شيطانه, وخواتي حكوا هدا اللي ناكص تحط مير ع راسها ريشه , كان يوم كتير حلو ومن احلى ايام الهلووين اللي مروا عليا كتير انبسطت ..~

السلام عليكم ..~

من عشا الاربعا || 12\11\19 ..~

||

امبارح التلاتاء من الايام النكده عليا , اصحيت متاخره لانو كان مكسور عليا نوم , وكمان اسهرت وانا احكي مع حبي ليله الاثنين , لهيك نمت كتير متاخره , اصحيت وكان عليا تكمله ترتيب وتنظيف الدار , واجاني تلفون من خواتي راح يجيو عندي الظهر ..~

بعد ما خلصت شغل الدار واجيت اكعد بدي اشرب كهوتي , الا بتجيني اتصالات وايميلات اخبار مش منيحه عن كصه بحياتي , وهدا اشي خوفني بصراحه انو في خوف ع ورقي في امريكا , ضليت اعمل الاتصالات , وبالاخر بعتولي ايميل ورق لازم اعبيّه ..~

وانا ع الاتصالات الا خواتي اجو , خبرتهم شو صار معي , كعدوا عندي حوالي ساعه الا اشي , وكان نفسنا نكعد اكتر بس اختي الكبيره وبطريك ترويحتهم طلبت منهم ياخدوني معهم وينزلوني عند المكتبه عشان اعبّي الورق واعمل طباعه وكصص , ازهكت حالي وانا اعمل بهاي الكصص , بس الحمد لله بعد كل الخوف والنكد اللي مر عليا , زبط الورق وارسلته وضليت بخوف انو يفتح عليا كصص بالورق لانو ما لكيت رد منهم ..~

ارجعت ع البيت وبحاله منكده , الا امي بتتصل وكاينه اختي الكبيره فاتحه موضوع الورق تبعي معاها , وامي خايفه وبلشت بالتفكير تبعها وما نامت , وانجنيت انو ليش تحكيلها , اختي هاي صايره كلشي تحكيه كد ما الواحد بحكيلها ما تحكي بتنسى , وامي كعدت 3 ساعات تتصل عليا وتحكي وتروح وتعاود ترجع تتصل وتحكي وتروح يالله شو ازهكت من كلامها امبارح لانو كل كلامها بلكي ويمكن وبجوز ويالله فوك كل النكد والخوف اللي انا فيه لاني انا صاحبه الموضوع , هي زادت الكصه عليا بلاوي , وامي مريضه لحد الان مش عارفين شو مالها كد ما بتروح ع الدكاتره مش عارفين مالها , وبضّل تجرب دوا ومش نافع وبتجرب غيره , وكلشي بزيد لما تتوتر ,بده يصير عمري 30 سنه ولسا مش متزوجه وهاد اشي كبير عندها وعامل الها ضغط وتوتر , بالاصل هاد الاشي اللي خلى بينا مشاكل , لانها مش مستوعبه انو هيك ربنا بده ومش بايدي , وغير هيك كمان كصه ورقي في امريكا من كصه اصير قانوينه , لهيك عن حالي بضل احكيلها اني منيحه وانو الامور منيحه وصحتي منيحه , لهيك انجنيت لما اعرفت انو اختي فاتحه الموضوع , ولما ارجعت لاختي بتحكي هي فهمت غلط وامفكره انو امي معاها خبر .. المهم بعد كل هالتوتر اللي كنت فيه امبارح نمت بدري ..~

||

اصحيت بدري والحمد لله لكيت ايميل بحكو فيه انو الورق اللي عبيته امبارح منيح بالوكت الحاضر , واصحيت بدري لسبب اللي هو موعد توصيل اشي , بتتزكروا لما حكيت اشتريت غرض للبيت من فتره , وكان التوصيل يوم الجمعه الماضي بس لغوه , لهيك عملوا التوصيل اليوم الاربعا , اللي هي نشافه واخيرا وصلت الحمد لله وركبولي اياها وعنجد الله يبارك في شغلهم لانهم عنجد كانوا سرعين , خلصت من النشافه , وجهزت حالي واطلعت اتحوجت للبيت لانو طول ما انا بالدار راح يكون في كحط اكل , وارجعت ع البيت وهيني ..~

يوم حلو خفيف فش فيه اي اشي , لا تواصل ولا مشاكل ولا وجع راس والتزمات كبيره .

||





..~