مأساة روح {هالكه} في اوراق تائهه ~

السلام عليكم ..~

يوم التلاتاء || 2\25\20 ..~

بتمنى من حالي اني ما امسح واضيف هالمشاركه , معاكم كل الحك تزعلوا مني , بس اظن الكل وصل لمرحله انو بتيجي لمير ساعات وايام واشهر تغيب ع المدونه , وشكرا لكل حد بتحمل هاد الاشي , اليوم عندي خبر حلو كبل ما احكي عن هالخبر احكي شو شغلات رئيسيه صارت بحياتي ..~

حالي :

كصه الصحه :~
مش بعد التدريب الاول اللي رسبت فيه ومكدرتش عليه , لهيك حطوني بتدريب تاني , وبدايه كان ما احلاه , لانو خففو الدروس الكميرا عالنت , وكنت ماشي معاهم , بعدين اجتني نكسه الصحه , خلال فتره التدريب التاني عملت العمليه الحمد لله الحمد لله كتير اني عملتها , كديش اتعبت بالعمليه بس حكولي اني جباره والدكتوره طلعت منيحه ,والورم بعيد عنكم طلع كبير , الله لا يرجعه ولا يذوق حد من كل الاورام , يبعدها عننا , بس اخدت يوم عطله واحد اللي هو يوم العمليه , واجت معي بس اختي الكبيره هوبز , اختي فيث ما اجت لانو زوجها ما بده اياه تطلع وهي اكيد كالعاده زوحها اهم مني , داخليا ازعلت انها ما اجت , لانو مش اول مره هاي الاخت بتعمل هيك ع شغلات تافهه مع زوجها واهله , اهم من شغلات كبيره من اهلها , ومع هيك الله هونها عليا بالعمليه , تاني يوم من العمليه ارجعت ع التدريب , بس كنت متوجعه , والدكتوره ما خوفتني من العمليه , انو ارتاح ولا اشي , وانا كمان فش مجال اني اترك التدريب لانو بنطرد , لهيك كنت اسوك عالشعل كل يوم روح ورجعه , والتدريب كان متعب الكرسي مش مرتاحه عليه , اليوم الخامس بعد العمليه , صابني نزيف الله لا يورجيكم , الجرح انفتح , حتى تاني يوم العمليه صابتني فلونزه قويه , وكأنه من كتر الكح انفتح الجرح , ومن التعب , ملان شغلات شوفتها انها السبب بالنزبف , والنزيف مش راضي يوكف , وانا لسا بالتدريب , اغيب ساعه واشوف انو النزيف بزيد كاعد , ضليت من الصبح للظهر نزيف , بعد الظهر صار النزيف بزياده , اوصلت للعصر وحكيت بنفعش اسكت لهدرجه لاني بلشت اتعب , اتصلت ع اختي الكبيره ولما سمعت انجنت فيا انو ليش ساكته عحالي , حكتلي هلكيت اتركي الشغل وينعن ابوه ع ابو التدريب وروحي ع الطوارئ هلكيت واتصلي ع دكتورتك حطيلها مسج , وهدا اللي عملته , كان يوم جمعه , ومديره الشغل عطول حكتلي اتركي كلشي وروحي ع الطورئ , بالطريق حطيت مسج لدكتورتي , واوصلت الطوارئ , يالله كديش هالدكتور والممرضين كانوا مناح معي اشي مش طبيعي , وعشان مرض الكورونا وعشان شافني بكح وملفوزه , بس بنفس الوكت بعرفش ليش بهداك الوكت كنت مش معصبه وكنت لطيفه , يمكن لانو شوفتهم هيك معي , شوفتهم احترموا اني مسلمه واني بدي دكتوره انثى تفحصني , مش قله احترام للدكتور الرهيب , فحصوني واتغلبوا لانو النزيف مش راضي يوكف , وحكالي الدكتور فش اشي تخافي منه , وفش اشي نعمله الا انو نستى النزيف يوكف من حاله بس الافضل تروحي ع دكتورتك اللي عملت العمليه , واد بتشوفي حالك تعبانه ودايخه تعي ع الطوارئ نعطيكي دم , وانا بالطوارى كنت ع تلفونات مع خواتي هم اللي كانوا يعرفوا بالكصه , هو بصراحه محدش بيعرف الا انا وخواتي , لا خكيت لاخوتي ولا امي ولابوي لشو , وبعتت مسج لاخوي اني راح اتاخر بالتدريب , وحكيت لخواتي يتصلوا ع امي لانها بضل تتصل عليا وبديش ارد تعرف , وانو يحكولها متاخره بالتدريب , الحمد لله الله هونها عليا وارجعت ع الدار , بس النزيف ما وكف , منتمتش الليل بصراحه من الخوف , ع وجه الصبح شوفت انو النزيف بلش يخف , وطلبت من مديره الشغل اني اخد يومين اجازه لانو عنجد مكنتش كادر اترك التخت , كل ما اتحرك اشوف بصيبني النزيف , لهيك بكل صراحه ضليت السبت والاحد بالدار عالتخت , لا اكل ولا اتحرك , كنت بس اشرب مي وعصاير بس , وع ظهري نايمه بس ع ظهري , وحكيت لامي ولاخوي انو عطله من التدريب السبت والاخد , ومكدرتش اروح ع دكتورتي لانو العياده مسكره كل سبت واحد هون هيك في امريكا , وشوفته انتبه ع ايدي مكان سحب الدم لونها الازرق بس ما حكى اشي ,الممرض اللي سحب الدم مني كان لطيف , سحبوا كتير دم مني 7 قناني , ولسا النزيف بس الحمد لله اخف , يوم الاثنين كمان ما روحت ع التدريب لاني بدي اروح بدون موعد ع دكتورتي , مكانتش مداومه بس اجتني دكتوره بديله وعملوا فحصوص والترا ساوند وكصص , وحكو في يمكن اشي او تجلط دم او مكان الجرح , بس لازم نستنى ليوكف النزيف ع الاخر لنعرف ع المزبوط , واليوم الحمد لله يا اصحابي روحت ع الدكتوره وعالاكيد ويا رب التمام عخير فش اشي فيا , بس بدهم يعطوني كمان شهر واراجع الشهر الجاي , لهيك انا مبسوطه .. الحمد لله يا رب , صارلي سنه كامله بتوجع ومش مرتاحه من الورم , سنه واشهر وانا بطارد ع الورق عشان اعالج حالي , سنه كامله بخوف وسنه كامله بعياط واسرار , بس الله كبير , الله جبرني يا اصحابي , وكف معي لما مكنتش استاهل , الحمد والشكر لله الحمد لله يا رب .وشكرا لكل حد كان يستدعيلي الله يوفكم ويسعدكم متل ما انا مبسوطه هلكيت ..~

||

كصه التدريب ..~

عشان غيبت اربع ايام اللي هم كانوا الايام اللي لازم اخلص كلشي وانا مكدرتش اخلص , وكان الكل لئيم معي لحد الان وبكرهوني , اوصلت لمرحله فش معي الا يوم واحد اللي هو التلاتاء لانو الاربعا لازم يكون كل الفديوهات اللي عملتها جاهزه وكل الامنحانات علامات ناجحه , عملت كل اشي وخلصت تلات امتحانات من اربعه ناجحه , والامتحان الواحد لحاله فيه 40 سوال , اخ يبي اخ يبي بديش اتزكر , الا امتحان واحد ما انجحت فيه وكان معي اعاده مره , واد ما انجحت كل تعبي بروح ع الفاضي وبنطرد , اوصلت لمرحله حكيت للمديره تبعتي انو تساعدني في الاجوبه لاني ما درست , والحمد لله ساعدتني وانجحت وارتحت من تدريب الكمبيوتر , ما بتتخيلوا لما عملت التلفون الاخير مع الاساتده وحكولي خلص انجحتي , انجحت يا عالم , اطلعت من المكتب وكانوا كل اللي بشتغلوا معي ع الارض بالمحل , اطلعت ورفعت اديا وحكتلهم انجحت , محدش صدك , اد انا نفسي ما صدكت , شهر كامل بعذاب التدريب الكمبيوتر وحاله شهر .ولاني بعشق الكهوه اشتريت للكل كهوه حلوان , وانا هلكيت تدريب الارض بحكوله اللي هو اراقب شو بعملوا واتعلم منهم , وهو كتير صعب كتير , وبكرهوني اشي مش طبيعي , بس بحكيلكم , طز فيهم , لاكعد ع قلوبهم والله يكون معي ويساعدني اني اتعلم واصير بدونهم , بدون جمايلهم وكرفهم , تعرفوا اكتر عن شغلي ؟ بشتغل في شركه اتصالات بياعه , بلفونات وخطوط نت وتلفون , بشتغل شفت ليل , من الظهر لليل , عليا اسكر المحل , مين بشتغل معي , المديره ديلينا اللي هي من هدولاك , بس حلوه ينعن شكلها , لانو مخلطه من اسيويه وفرنسيه وسمرا وكصص , لهيك ماخده الحلاوه , معجبه في صبيه بتشتغل الحرس والشرطه في المول اللي بنشتغل فيه , الصبيه المعجبه فيها بحكيلكم اول ما شوفتها حكيت عنها بعقلي حلوه , بتشبه انجلينا جولي شوي , بس انجلينا احلى , وانا صبيه اتربيت ع حلا انجلينا , لهيك امبين انو الشرطيه كمان معجبه بالمديره لانو كتير بتزور المحل تبعنا , ديلينا بصراحه شخصيتها رهيبه , ك مديره وك شخصيه وك تعامل مع الزباين وك بتعرف كلشي ينعن شكلها , كلشي , بس لئيمه اشي مش طبيعي , كديش كره اللئم تبعها لانو مع الكل , لو بس تكون الطف واصبر . وبشتغل معي كمان صبيه جسيكا , مخلوطه بيضا وسمرا واسبنيلويه , كمان ينعن شكلها شو بتعرف كلشي , وشو كل لبسها اغراء اشي مش طبيعي , وتصرفاتها , دايما بتركص بالمحل وبتعلي الاغاني وبتضحك وبتعلب ومرتبه ع اخر تكه كل يوم بتيجي عالشغل مرتبه ع اخر تكه , بس مغيوره اشي مش طبيعي مش طبيعي , بعرفش ليش مرات بتساعد بتكون كتير منيحه ومرات يالله شو عاطله , هيك بعرفش شو مزاجها وليش بتعمل هيك , وكمان صبيه اللي هي بنت اختي هوبز شهيره , اول الشغل مشاكل انا وياها لانها ما بتحترمني ولئيمه وما بتساعد وبخيله , فيها كل الصفات اللي بكرها , بس مع الوكت صرنا اصحاب ع العظم , صرنا نضحك ونساعد بعض ونشتري لبعض ونخطط مع بعض لدرجه كل اللي بالشغل صار يكرهنا اكتر وبدوش نضل نحكي مع بعض , بس هي بشوفها جاهله , بكون نفسي تكون مغريه اكتر وتساعد اكتر , بشوفها بتكره تساعد . نيجي للشباب , كلهم طاكعين محدش محرز من كصه الجمال لكصه التصرفات لكل شي , في شب عربي اللي هو طارق وصغير , عمره متل عمر بنت اختي , كسول زي بنت اختي وبحبش يساعد ولئيم بس دايما مرتب دايما , بحبش احكي معه لانو ممل , والشب التاني اللي هو جولان شب اسمر هو اكتر واحد بساعدني اكتر واحد وشاطر وبحب يساعد الزباين , بس مش مرتب وريحته طالعه , وشب فلبيني تحت المديره بعرف كلشي بس هو ماخذ اجازه لهيك لسا ما اتعاملت كتير معاه , بالعاده انا بشتغل من الظهر لليل , نص النهار مع البنات وبعد العصر بضل لحالي مع الشباب لليل ,فش حديث حلو معاهم , مملين زنخين , كتير بضلوا يجحروني ويحسسوني تكيله بوجودي معاها ومزعجتهم , بس لأ بدي اكعد ع قلوبهم اكتر لاخنكهم , وانا صبيه بحب اضحك بموت ع الضحك وع اي شي يضحكني , لهيك بجب لما ما يكون في زباين اشوف ع التلفزيون مسلسلات كوميديا وبضل اضحك غصب عني , واكتشفت اني زودتها من عيون اللي بشتغلوا معي , بس عنجد بكدرش ما اضحك , وصاروا كل ما يشوفني يسالوني شو بدك تحضري اليوم يا مريم ؟! اكعد اضحك بدون سبب لاني اتخيلت المسلسلات اللي بدي احضرها واني كاعد بضحك , هاد كان الهرب عندي من كل حياتي لانو في شغلات صارت معي شغلات كبيره بحكي عنها مع الايام , بس خلينا اليوم مبسوطين , من زمان زمان مش مبسوطين ..~

السلام عليكم ..~

يوم الخميس || 2\27\20 ..~

راح اكمل عن مجرياتي الكديمه ..~

||
اخوي حكى لامي عن مرضي :~

بالايام اللي كنت احكي فيها تلفونات مع خواتي وكت مرضي , كأنه اخوي اللي عايشه معه سامع شو كنا نحكي , وسامع كديش كنت مريضه وشو صاير معي , بس هالاخو ما بيدّخل فيا , مع مين احكي وشو احكي وسهر الليالي وصوتي ع البلفونات , ولا مره سمعني بحكي اشي ونقله لاهلي او اجى يحكي شو بتحكي ومع مين بتحكي وكل هالاشي , بس تاني يوم الصبح , امي بتتصل عليا بدري كتير , وصوتها مش عبعضه من مره , واول ما حكيت الو حكتلي بصوت عالي وبزعل , انتي مريضه يما مالك شو في ؟شو مرضك ؟ وابوي جمبها وكاعدين بحكو مع بعض وانو البنت راحت , بحكيلكم للحظه اجيت بدي احكي لامي كلشي , بلحظه حسيت عم اكدب عليها وخونت الثقه انو بحكيلها كلشي , بس بهاي اللحظه اسمعت ابوي بحكي انو امي الله سترها لما سمعت الخبر ومرضت , عطول الله نطقني انو املفوزه بس وظهري بيوجع من السواكه وتعبانه من التدريب ومفش اشي يخافوا منه وانو اخوي مش فاهم عليا ولو في اشي بخبيش عليكم , والحمد لله سدكوا , وامي كبل ما تتصل عليا اتصلت ع خواتي , واختي الكبيره حكتلها مريم تعبانه من الشغل واتحججت باي اشي مشان مضلش عالخط مع امي وتطلع كلمه هيك ولا هيك , وباللحظه اللي بحكي مع امي بعتت اختي مسج انو امي من شوي حكت معاها واختي بس حكت اني تعبانه من الشغل . اما اخوي عملت حالي معيش خبر شو عمل , لانو بعمره ما عملها بس عشان مرضي خاف كأنه .

||

الشب الامركاني كريس :~

الشب العربي دلني ع شب امركاني اسمه كريس, عشان كصه شغل والحمد لله زبطت , اظن حكيت هاد الحكي , بس ولا مره حكيتلكم عنه للشب الاجنبي , الشب الاجنبي ستايلي اشي مش طبيعي , بس الحلاوه بالسوك وحلو اشوفه , شو ستايله ؟ ستايل شباب ميتل بيض وشعر طويل واشقر وووجه فيه نمش , شعره طويل ناعم , اول مره شوفته فكرته بنت من شعره , وبموت ع الورد والزراعه كل فتره بشوفه طالع عالحوش بزرع ورد وبنظفه , وعنده هر اسمه روميو والهر تبعه نفس اللون اللي بحلم يكون عندي اللي هو رمادي , ودايما بلبس شوز كونفرست , لأ وفوك كل هاد ينعن شكله صاحباته , صاحباته كل واحده احلى من التانيه ينعن شكله ,شوفت اربعه منهم , لهيك كل ما اشوفه بحب اعمله كهوه , انا صبيه بحب اشرّب الناس كهوه , بس بعمل غله كهوه عربي وبطلع عنده ع الحوش وبكون بده يحكي معي بس انا بديش احكي معه ,لاني مش راح اكدر الا اتبسم بوجه واحكي سبحان الجمال والحلاوه .وبحكيلكم انا صبيه بعرف ذوقي صعب احكي عن واحد حلو , بين كل المروا عليا بحياتي شب واحد كان حلو الله يبارلكه بصحته وجماله لانو بضله مريض . ومره احزرو شو عامل ؟ كنت بحكي مع امي ع البلفون وسامع صوت حركه بالحوش ,’ رفعت راسي اشوفه شو كاين عامل ؟ قاصص شعره , لألألأ , كعدت اضحك ع ردت فعلي , انو ليش هيك ازعلت ؟ لانو مضلش شباب حواليا بحياتي شعرهم طويل الا اخوي , انا متاكده انو هالشب من هدولاك مع انه تصرفاته مش مايعه وبتمنى انو يضل الشغل بينا لانه بسيط وراييك ولطيف ..~

||

اما بخصوص الشب العربي , مرات بكون احكي بعقلي اطلع معه من كتر الزهك انو فش حد عربي اطلع معه وخاصه لما اتكاتلت مع خواتي (كصه كبيره صارت ولازم احكي عنها بالايام وبحمد الله اني موجوده هلكيت معاكم ) ومضلش حد بالدنيا كلها اشوفه واحكي معه , بس بكدرش كل ما افكر بعيونه , وكنت افكر انو عمره صغير , بس لما اتاكدت طلع لأ وانجنيت داخليا , بس ينعن شكله شو عقله بفهم وشو بحب احكي معه , وهو بعرف هاد الاشي , لاني حكتله . بالفتره اللي كنت مريضه , اجى عندي ع الدار لانو اختي كانت عامله اكله مرتبه وبتحب تحسب حسابه بالاكل , اتصلت عليه وحكتله اختي عملت طبيخ وهيها حسبت حسابك وبعتته اد بدك تيجي تاخده من عندي , ما صدّك احكيله , وكالعاده اللي بيجي عندي بخليه يكعد بالكراج , ومكانش فيا حيل احمل الاكل لاني كنت مريضه ومش كادر امشي , حمله عني وضل بالكراج , بدوش يروح !!! وبلش يفتح وبلش بده ياكل , وانا اخجلت انو ياكل وهو واكف , حكتله هلكيت بجيبلك طاوله , وبالزبط رتبت طاوله بالكراج ياكل عليها وتركته ياكل ع راحته وانا عبرت الدار , بعد بشوي نادى عليا وحكى ضلك نحكي , ومع انه عرف اني مريضه وشاف اديا , ضل عندي حوالي تلات ساعات واشي واحنا لسا نحكي ونحكي وما خلص الحكي ولو في كمان وكت كان ضلينا نحكي , نساني المرض بصراحه , وبين الحكي حسيت انو كاعد بكدب , بس ما حكيتله ! بس اطلعت على عيونه وعطول حكى انا بكدبش , وانا كنت ماسك الضحك وكعدت اضحك , بالحكي عنه اشتكتله بصراحه , ابصر شو اخبار القضيه تبعته .

||

اخر مره اضحكت فيها كتير ونزلوا دموعي لدرجه المسكارا ساحت :~

وانا بالتدريب ع الكمبيوتر كنت اشوف اللي بشتغل معاهم بيلعبو مونوبولي , واكون اتحسر اني بكدرش العب , لهيك بعد ما خلصت تدريب الكمبيوتر واطلعت ع تدريب الارض , كان حلمي العبها معاهم , لهيك باحدى ايام الارض كان يوم بطيئ وفش زباين والمديره مش مداومه لانو منعت لعبه المونوبولي , ولا بنت اختي مدوامه عشان ما اضل تحكي معي , لهيك طلبت من اللي بشتغل معاهم انو نلعبها , العبت انا وجيسكا وجولان , طارق كان مشاهد بس وكان يشوفني لما اسرق بس ما يحكي اشي , كنت اغمزه , يالله شو اضحكت باللعبه يالله شو كنت مبسوطه , اسمعو انا بغش بالالعاب اد بصحلي , خاصه في المونوبولي , وبحب التدمير اشي مش طبيعي , لهيك اجى الحظ معي في اللعبه هداك اليوم , كنت اخد نفس الاراضي نفس اللون , وبدون ما حد ينتبه لما يكونوا مشغولين بتلفون او زبون , اروح احط دار ع ارضي بدون ما حد ينتبه , واسرق مصاري من البنك , وحتى اسرق اراضي من اللي كاعدين جنبي وكد ما يحكو انهم ارضهم اكدبهم , ولما يوكعوا في احدى اراضي يفلسو , بس احلى اشي صار , كل الضرايب اللي كنا نحطها , اجى الحظ معي واوكعت بالموقف اللي بصحلي فيه كل الضرايب , صرت غنيه اشي مش طبيعي , وجولان كعد يحكي , بدها ادمرنا , وانا مكدرتش اوكف ضحك ودموعي ينزلوا لانو مناظر جولان وجيسيكا واليأس انهم بخسروا كاعدين اشي هيك عوّض كل النكد بايام تدريب الكمبيوتر , كانت من ايام المونوبولي اللي ما بتنتسى , زكرتني بايام مع حبي واخوتي وخواتي , وبصراحه اتعلمت الغش والسرقه باللعبه من حبي .

||

فقره الكريمات ..~

في شركه rodial



جربت هاد المذوب للمكياج , كان رهيب لدرجه رهيبه , بذوب المكياج ومع الاستعمال اعرفت امتى احط المي وامتى ما احط وكم الكميه وهيك وفرت ع حالي , ريحته خفيفه جدا , ما بيطلع حب , ولا بتك الرموش , ولا بوجع العيون , وحتى ما بيضل ملمس لزج من بعد ما اغسله , ولا مره شوفت عيوني سود منه , عن حالي رهيب وبستاهل سعره وراح اشتريه لانو صار مفضل ..~

65 $

||



اووه هاد السيروم رهيب جدا جدا , خليت خواتي مره يجربوه من كتر ما حبيته وعشان اقنعهم انو الكريمات بتريّح الوجه , وكيف شافوا وجوهم ارتاحت اول ما حطوه وحتى امي , ريحته روعه وملمسه رهيب وبسرعه وجهك بيشربه وبعطي نظاره واشراق من اول ما تحطيه ع وجهك , اكيد راح اشتريه كمان مره ..~

لما اشتريته كان سعره 200$ وهلكيت صار 150 $

هالشركه انضافت للمفضله عندي , بعشق هالشركات اللي بدفع مصاري وبلاكي نتيجه تعجبني , بس طبعا الاسعار بيني وبينكم لو امي بتعرف بدفع هيك مبالغ ع كريمات يا حبيبي , بس متعه عندي لما اعطي لنفسي وكت اسعد حالي وادلع حالي فيهم .


||

الشغلات اللي رميتها وانا بعيّط ع المصاري اللي دفعتها ..~



فيتامين سي رو , يعني مش مدموج باشي صافي , نوع زي نوع الطحين , وبحط زي رشه مع اي نوع كريم وبدمجهم , اول شي الفكره بتخوف شوي , بس لانو كنت بفتره كتير يطلع حب ع وجهي ويضل اسود مكانهم , اعرفت انو فيتامين سي بفتح مكان الحبوب , جربته , كان قوي حتى لو خففت الجرعه , كان يطلع حب صغير بروس بيضا بسرعه , كان يشعط الوجه , وكان لونه يتغير , ف خوفت منه ورميته

35 $

||




اوووه هاد الكريم كديش زعلانه اني رميته , بالاول ريحته بتقتل اشي مش طبيعي , بحياتي ما مر عليا كريم هيك ريحته , ريحته اشي مش منيح , ولا حتى ملمسه , يا سلام ع ملمسه مش عارف كيف اوصفه , ملمسه مؤذي ومقرف , ولما احطه ع وجهي بصير زي كانه مشمع وبلاستيك ومش لازم احركه مكان ما بحطه , لازم هيك اطبّل ع وجهي لاني وانا ادهن فيه زي ما الكل بدهن بصير ملمسه ابصير كيف وبنشف, وبطلع في اصابعي , يعني بكل صراحه اغرب كريم مر عليا بحياتي من كل النواحي , كنت احس بالذنب انو ابصر من شو مصنوع وابصر كم حيوان رايح فيه منه , لدرجه لحد الان ما قرات محتوياته ولا اعرفت اشي عنه لانو خايفه اشوف اشي يكهرني , وحتى بتتزكروا حكيت مره هان عن كريم عمل حساسيه وصار وجهي احمر وكصص , هاد هو !
والكريم مخصص مرتين باالاسبوع بس , وبنتهي مفغوله بعد 6 اشهر من فتحه , مستحيل اخلصه في 6 اشهر اد بده مرتين بالاسبوع , وكنت اشوفه كوي لهيك كنت احط مره بالاسبوع ومكنتش اكتر لاني كنت اشوف في عوارض اد بكتر واخر مره عمل اشي بخوف لهيك قررت ارميه .
بس مع هيك ينعن شكلهم ينعن شكلهم , المره اللي كنت احطها بالليل , اصحى تاني يوم , يالله شو وجهي مرتاح ومفتح حتى لو مكنتش نايمه , كان وجهي يكون زي مشدود وفيه حيوايه بنفس الوكت , اشوف يصغر وجهي بالعمر , استخدمته كتير حوالي عشر مرات او اكتر بس عمل مشاكل معي مرتين , مره شوي لما كترت من الكميه , ومره اشي بخوف واظن انو اتفاعل مع كريم تاني , لانو مع التجارب ما لازم احط كريم نوع تاني تحته او فوقه , بس لانو زمان صارله عندي معناتن انتهى مفعوله واتأكسد والله ستر ما صار بوجهي اشي منه لهيك الله بعوض بسعره , بس المشكله يمكن اجرب الشركه 100$ .

السلام عليكم ..~

ليل الاثنين || 3\2\20 ..~

في بحياتي بالفتره اللي غيبت عنها عن المدونه صارت كصص كبيره , كل يوم بحكي لحالي انو لازم اجي واحكيلكم عنها , بس بعدين لما بدي ابلش اكتبها بحس بنفس الوجع وبديش اتزكر وبديش اتوجع , لهيك ابلش بمجريات هالاسبوع هاد ..~

السبت اطلعت مع كارمليتا ::~
متزكرين كارمليتا ؟؟! كاليمروا ؟ صار تلفون بينا وانو نشوف بعض ونحكي شو صار بحياتنا , لهيك اتفكنا نشوف بعض صبح السبت في آي هاب نفطر مع بعض , وكان ع الساعه 8 الصبح عشان عليا شغل الظهر وهي عليها اشغال , هي اللي دفعت وما خلتني ادفع من مره , ويالله شو حكينا وشو كان عنا حكي عن شو صار بعد هالغياب بحياتنا وشو بخصوص الشغل والزباين وانها كمان زهكت التمريض وصحتها وملان ملان كصص حكينا منهم بتحزن ومنها بضّحك , بكزبش عليكم انبسطت معاها وحنيت الها ولجينفر بس مش للزباين ولا للشركه ..~

السبت بالليل حكيت مع كريس ..~

اول ما عبرت البيت من الشغل حوالي 10 بالليل , كنت لسا بالكراج لاني شوفت ساده بلعب فيه وكعدت اسلم ع ساده الا بحكيلي اخوي تنين انو " جارنا كريس سال عنك وبده يحكي معك " كنت متنكده ع الكصص اللي صارت معي بالشغل وكصص عند اهلي بالضفه لهيك مكنتش طايك اشي , بس عشان بدي ازكر كريس في الهر تبعه روميو حكيت خليني اروح اشوف ايش بده ,طبلت عليه ع الباب وفتح وطلع ع العتبه وكان بده يسال عن المديره الجديده للبيت , الحيوانه اجتني اعطل من هداك الحيوان الله يلهيها بحالها لانها زادت الاجار عليا , واحنا كاعدين نحكي فتحنا كصص الاجار وكصص ساده وروميو , حكتله انو بسمع صوت رميو وبحزن عليه انو دايما لحاله , حكى اد بدي افتح الباب ع روميو واخده عند ساده يتعرفوا ع بعض اي وكت بدي لانو مش راح يسكر غرفته بالمفتاح , وخلصنا الحكي .

اما الاحد كريس مكانش بغرفته لاني اسمعت صوت روميو بنادي وبنادي حكيت بدي اغامر واروح افتح الغرفه , وعطول طلع روميو من الغرفه وحبّني اكتر ما ساده بحبني , وضل حواليا وما كان منيح مع ساده من مره , بس ساده كان طيب وما حكى اشي , ضله من بعيد يطلع ع روميو وكل ما بده يقرب ع روميو ما يعجب روميو الوضع , بس كنت مبسوطه ع روميو بصراحه , لانو كان دلوع وخلاني احمله وادلعه ومبسوط عليا وبعد بحوالي ربع ساعه رجعته لغرفته .

||

بخصوص الشغل ..~

اتكاتلت اكتر من مره مع اكتر من حد , وسمعت حكي لدرجه بنت اختي حكتلي " خالتي اعطيهم فرص " ومع هيك اشي بنرفز اللي بصير , يعني فش مكان اكعد ارتاح فيه بالبريك تبعي عشان حضرتهم بدهم يلعبوا ورق , وخليتهم مرتين يعملوا هاد الاشي المره التالته , حملت صحن الاكل ورميته بالتلاجه وسمعّت كلمتين مش مناح وخبطت باب المكتب , وحاربوني , احسن , ومش اللي بشتغل معهم , بعرفش مالي مليش نفس احكي واكتب , حاسس بظلم المجريات , اعمل تلفون وبرجع . واكلت تسالي وهيني .~
ماشي نحكي عن الكصه , في حرس الامن في المول , اللي كل واحد فيهم متخلف اكتر من التاني وزنخين , زودوها , بانو في البريك تبعهم او مش بالبريك تبعهم بضلو عنا بالمحل دايما واللي بكهر بدخلو ع المكتب يعني ع المكان اللي ممنوع حد يدخل عليه الا بشتغل اللي هو احنا , واد بدنا ناكل بنعبر المكتب , هم حضرتهم استلموا هاد الاشي وصاروا يجي ياكلوا في المكتب او يجيي يعلبوا ولما اكون بوكت الاكل تبعي , اجو مرتين وكنت اكوم واخليهم خلص يكعدوا احترام واحكي بيجوز يفهموا وما يعدوها , بس طلعوا بفهموش , اجو المره التالته وكعدوا يبعدوا بالاغراض عن الطاوله وانو بطريق غير مبشار بحكو كومي بدنا نلعب , وانا عصبت وصار اللي حكيته بالاول , اللي بكهر انو المديره هي معطياهم وجه اخ بس , واللي بكهر كمان انو دايما عيونهم علينا , المحل اللي بشتغل فيه ع زاويه طابق ارضي , ما بنشوف الا هم ع الطابق التاني وواكفين بضلوا يتبصبصوا .

اما بخصوص الزباين :~
امبارح اجى زبون , اتعاملت انا وطارق معاه , هاي اول مره طارق بساعدني , دايما كسول بدوش يساعد او بدوش يكون حواليا , هاد طارق حكايه نفسي عنجد اعرف بشو بفكر , لازم اكتر حكي عنه بالايام الجايه , نرجع للزبون , الزبون ريحته خمره بتكتل , بسيطه ع كصه الريحه , كصه انا عارف شو بعمل بس هو بدوش واحده جديده , بده حد يعرف الشغل , وانا داخليا بديش اعمله عشان بديش ادوخ من ريحته , وحكتله انا لسا جديده , صار يحكي مش تزعلي بس انا بدي الاشي يزبط , حكتله اه ماشي وكنت اضحك لاني صبيه بضحك واي شي بضحكني , فا ناديت ع طارق الاهبل وعمل حاله مش سامع , بعدين ناديت كمان مره واجى , وحكالي انو اه كل اللي بتعمليه صح كملي , خلصت الشغل وحطيت الشريحه في بلفون الزبون , وعشان اشوف انو الارسال شغال , اجيت اضوي بلفونه , شوفت اشي ما لازم ينشاف , صوره غلط زياده عن اللزوم , يعني يا حمار يا تيس يا الللي بتفهمش جاي ع محل بلفونات وعارف انو راح نفتح بلفونك ,’ بتكون حاطط الخلفيه هيك صوره ؟ اول ما شوفت الصوره , وجهي سحل , بحكيلكم متاكده انو جولان وطارق انتبهو عليا , وحتى الزبون , بس عطول اتزكرت شغلات براسي وانو بهمش بس خلصي من هالزبون يا مريم , وانا احكي للزبون حط الباسكود تبعك لنتاكد , اجى طارق ومسك البلفون وبلش هو يشتغل عليه , بس انا بصراحه وبعرف هاد اشي غلط , مكدرتش اني ما اضحك , عم احكي مع الزبون والبلفون في ايد طارق وبضحك مع الزبون , هو داخليا بضحك عليه وبضحك ع الموقف اللي صار , ولما انكلع الزبون , طارق ما فتح كصه الصوره , بس انا فتحتها واعرفت انو جولان انتبه عليا اول ما سحل وجهي .


||

ما احط امل ع اي اشي بالدنيا الا فيكي , لا بتحكمي عليا ولا بتتحكمي فيا ولا بتزعليني وبتسمعيلي , دموعي عم ينزلوا ع الكيبورد وانا عم اكتب والله يستر ما ينحرق لأ ,ومش عارف شو كصه الكريم اللي ع وجهي اللي اتأكسد مع دموعي لدرجه خلى وجهي يحرق , كله عم يحكيلي وكفي عياط .

؛

السلام عليكم

بدايه من اول وجديد فش مسح لأي اشي

من ليله التلاتاء 3\3\20 ..~

نمت متأخره بس اصحيت بدري شبعانه نوم لانو ليلتين مش نايمه في كصص بضل افكر فيها وكصص مش حلوه وولا منيحه , اصحيت بدري وخلصت اغلب اشغال البيت , اطلعت ع العتبه مع ساده انبسطنا , وجهزت حالي للشغل , كنت ع تلفونات مع امي وخواتي , بالشغل المديره اجت بس ساعه وكانت مريضه لهيك رجعت ع البيت , ضليت انا وبنت اختي للعصر لما اجى ميعاد طارق وبعدها بشوي خلص شفت بنت اختي ضليت انا وطارق , والمسا خلص الشفت وارجعت ع البيت .

لما حكيت مع اختي فيث اليوم كانت عالاخر نفسيتها متحطمه , وحكتلها بشوفها قبل ما اروح ع شغلي بس هي ما رضت , وكانت اضل تحكي انو هلكيت عرفت الناس اكتر من وكت ما صارت تشتغل وانو معي حك اكره الناس واتزاعل معاهم .

وانا هلكيت نفسيتي متحطمه غير شكل , بس ما علينا , لاني الحمد لله صحتي منيحه وطيبت , وبديش اكهر حالي عشان ما ارجع امرض , وكنت عارف هاد الاشي .

صايرع اسرع بالسواكه كتير , وما احلى السواكه بالليل فش كتير عالم وسيارات , الله يحميني وبسترني لاني زودتها بالسرعه والتجاوز وغير الشرطه اللي معبيا الدنيا , بس بعرفش ليش هيك صايره , انو بدي اطير وانا اسوك , واخر مره عملت تجاوز ع اشاره حمرا ع شارع باتجاه غلط وخايفه يوصلني تكت ع البيت لانو الاشاره عليها كميرا , ومرتين الله ستر ما خبطت لانو سيارات مفضله اشوفها كدامي واحكي يا رب تطعمني دنيا واخره هيك سيارات .

مش بمزاج النوم وعندي نص ليل , وكديش بكره حالي لما اعمل منيح واشوف الاحراج انو ليش تعمليه , ليش هيك الدنيا صايره انو الواحد ينحرج لما يعمل منيح ولما يساعد ليش ؟ انو الشخص اللي بساعده بطّلع عليا انو شو جابك وشو دخلك تساعديني ؟! الله ياخدكم منيح , بتكون احسن مساعده للدنيا .

السلام عليكم ...~

اليوم الاربعا , العطله تبعتي واخيرا , 3\4\20 , العصر ..~

||

امبارح بعد ما خلصت من المدونه , صارت تلفونات كتيره مع اصحاب كتيره , مع اني هربت منهم فتره بس امبارح انمسكت , ضليت ع تلفونات من صاحب لصاحبه لكصص حزينه وعيشه يأس عليا وعليهم , عم استنى حد فيهم يحكي اشي حلو معاه !! الصاحبه اللي دعست ولد والله ستر , والصاحبه لحد الان ربنا مش مطعمها ولد , والصاحبه اللي جوزها عمل حادث وكاعد بالدار من اجره المكسوره , وما اضحكتش , محدش ضحكني ! نمت مكتئبه اشي كبير , واحلمت بحبي , واصحيت متنكده , امبين اد صادق بكصه صحته صاير معاه اشي كبير , لاني اتصلت عليه وما رد ولا حتى رجعلي ؟؟!! ومع هيك هيك ارجعت نمت , واصحيت ع صوت المنبه مشان لازم اشيل السياره في تنظيف للشارع احسن ما اخد تكت , وكنت ملهي بكصه السياره لدرجه ما انتبهت ع بلفوني اد حبي متصل او باعت اشي .

السياره كانت ع شارع التنظيف , حملت المفتاح واطلعت اني اشوف وين احطها فش مكان , فكرت ادخلها ع الكراج لانو جيرانا مش بالدار والكراج فاضي , وهاد اللي عملته , بس احزرو شو صار ؟ وانا بدي ادخلها عملت ريفيرس , وضربت الشجره المزروعه ع باب البيت , كنت ع التلفون وانا اسوك بحكي مع امي , وانا معصبه وحالتي حاله ع الحكي اللي امي بتحكيه انعمى ضوي وانا ارجع خبطت الشجره وسامع صوت اشي بخبط بس مش مركزه من وين , وبعدين انتبهت ع جارنا عم يرفع ايده , فكرته عم يرد عليا الصباح , ف رفعت ايدي انا التانيه , اخ يا ربي ع الهبل تبعي , ولسا برجع ريفيرز وبخبط بالشجره , بعدين انتبهت انو الصوت مني واني انا اللي كاعده بخبط الله ستر والله , بعدين عبرتها الكراج واستنيت لوكت ما اجت السياره اللي بتنظف الشوارع ونظفت الشارع وطلعتها من الكراج وصفيتها بالشارع .

عملت فطور وكهوه واطلعت ع العتبه مع ساده لاني صايره احب اكعد ع العتبه معاه عشانه ,بعدين اتصلت ايمان وحكت هيها بالطريك جايه عندي تفطر , كبل ما تيجي , انتبهت انو كريس مش بغرفته لهيك فتحت الباب ع روميو وخليته يلعب شوي , واجت عندي ايمان وضلت للعصر وهيني ..~

اشي مسحته بدري ع اني اكتبه وعالاغلب خيال بس بتمنى ..~

||

الحلو بالشغل مع بنت اختي بضل تحط كتابات هان وهان وكديش بحبها منها ..~



هان الخزاين لكل واحد فينا بالشغل وهي اسمها شهيره وبحب خزانتها وبحب كلشي بنحطه عليها لانو عليها كاتبات بضّحك .



بضل تحكي عني حجه عشاني ختيرت



بتعرفني بحب البرواني لهيك لكيت هديك اليوم منها بخزانتي

لهيك بحب اخد صور عن كلشي بتكتبه ع حزانتي .

نكمل ايش استخدمت ..~



تونر , نوع من انواع التقشير الخفيف للوجه , اد ما بحياتك جربتي التقشير لما تجربيه راح تشوفي نتيجه حلوه مع الزمن , اولها راح يتنرفز وجهك منه , بس مع الوكت راح يصفى الوجه ويوحد اللون والملمس , كان من انواع التونر الحلوه بس مشكلته بالريحه , بكره ريحته كتير , ولانه تقشير يعني بنشّف الوجه لهيك لازم تحطي مرطب تكيل بعده ..~

هل راح اشتريه ؟ هو عجبني بس مش توب عشان ريحته وملمسه , ومع الزمن وكف يعمل اي اشي لوجهي , شوفت انو وجهي بده شي اقوى .

||



من نفس الشركه بكسي , نوع من انواع نحكي القطن اللي فيها ماده بتساعد ع انو تخفف الحبوب ع وجهك , كنت استخدمه كل يومين او كل يوم بالليل اد شوفت وجهي بيطلع حب صغير لانو عطول يخفف منه وما يخليه يكبر , بنشّف , وبعدها بدكيكه اغسل وجهي بمي ما اخليه ع وجهي , لانو ريحته بكرهها , ولانو ملمسه كمان بكرهه متل التونر , ولانو بدي يكون بس موقت زي معقم لوجهي مش اكتر , لانو كتير بعمل اقنعه رمل واقنعه تقشير , وبديش احرق وجهي .
هل راخ اشتريه ؟ بالوكت هاد جربت نوع من شركه تانيه ومعنديش ولا مشكله وشوفته احسن منه , لهيك ببهاد الوكت لأ , بس بكزبش بانو عنجد كان يحفف الحب الصغير ع وجهي ..~

||


لاني صبيه بنامش كتير بالليل من ارق وتلفونات وسرحان , لهيك دايما عيوني حواليهم اسود ولاني كبرت صرت انتبه ع خط , لهيك بعرفش اكعد بدون كريمات عيون واقنعه ..~



اقنعه للعيون بستخدمها بين تلات او اربع مرات بالاسبوع في الصبح , بحب ريحتها , وبحب الترطيب اللي بتعمله حلو ورهيب , بس مشكلتهم مش عمليات , يعني بكدرش احطهم واكعد اتحرك لانو راح يسحلوا , وكمان ملمس الوجه بعد ما ينشف بصير دبق , لهيك لازم احط بعدهم اي نوع كريم عيون قبل ما ينشفوا مشان ما وجهي يصير مدبّق , وجربت انواع تانيه وضلت مفضله اكتر من هاي , بس هاي عشان السعر مناسب للعدد , وبعرفش اد راح اشتريهم .

40$

||



هاد كريم عيون رهيب جدا جدا , اد كعدت يوم ما استخدمه راح اشوف الفرق , ونقطه صغير بتكفي , وكعد فتره طويله عندي , ونوع خفيف بسرعه تحت عيوني بشربه , رهيب بصراحه , وراح احط الشركه ع التجريب .

60$

||



هاد كريم عيون جربته اسبوعين , لانو الخط تحت عيوني في ايام بشوفه بكبر , وحكيت بدي اجرب نوع مخصوص للخطوط والتجاعيد للعيون , حبيته بصراحه بس من ناحيه التجاعيد , اما ناحيه الترطيب او ناحيه التنفخ ماشوفته عمل اشي , وكنت بفتره اختي فيث بدها كريم عيون لهيك اعطيتها اياه , لهيك بكدرش احكم ع المزبوط عليه .

45$

السلام عليكم .

ليله الخميس 3\5\20 ..

اليوم كمان عطله , امبارح بعد ما كنت ع المدونه اطلعت ع الحوش ونظفته وبعدها العبت ع البلستيشن واجاني مسج من كريس شوفته لدكايك وكنت تعبانه لهيك اغفيت بدري وانا ع البلفون ومش مستعده للنوم , واصحيت الصبح ع بلفوني برن حوالي 6 ونص الصبح وضليت صاحيه بالتخت . حكيت مع امي شوي وعلمت فطور الا اختي فيث بتتصل وبتحكي هي حوالين الحاره تبعتي اد تيجي عندي تشرب كهوه , وافكت وحكتلها فش عليا مشاوير ولا شغل , لما اجت عندي كان في تنظيف للشارع لهيك فش مكان تصف سيارتها اتصلت وحكتلي انها باب داري و اجي معاها نطلع نشرب كهوه برى , اسمعو راح احكي اشي عن حالي , انا صبيه بحب البيجامات كتير , كنت نايمه في بيجامه ولما اتصلت عليا اختي كانت ع باب داري , لهيك اطلعت بعد ما اخدت بلفوني ومفاتيح الدار واطلعت زي ما انا بالزبط ختى شعري مش مشّط , اختي اطلّعت عليا من تحت لفوك ودايما بتعملها لما تشوفني في البيجامات , هو انا مش عارفه صايره حساسه ولا شو ؟ بس ما اهتمت بس انتبهت ع تطليعتها , روحنا نشتري اكل لبنتها الصغيره , وبعدها روحنا نشتري كهوه بس فش فيه مكان نشتري بالسياره , يعني لازم انزل انا اشتري , لهيك نزلتني ع باب المحل , والكل كان يطلّع عليا , شكلي بالزبط طالعه من التخت , وكان ملان عالم اخدت وكت وانا استنى , حملت الكاسات واطلعت من المحل وكانت اختي صافه السياره في مالطا , وبعدين روحنا نجيب بنتها التانيه من الكليه وصار حكي كتير بينا واتصلت علينا اختي الكبيره هوبز وصار حكي كبير كبير , بس انا وعدت حالي انو ما يكون عندي اي رده فعل لكلامهم , بس داخليا كلامهم مش عاجبني , مش عاجبني , داخليا زي دايما صرت اندم اني اشوفهم واحكي معهم , داخليا صرت حساسه من كلامهم اللي بسّم البدن والغلط اللي بغلطوه عليا , ومع هيك وانا معاهم عم اتناسى الحكي اللي بحكوه , عم اتنسى كل المسبات اللي بسبوها عليا , عم اتنسى التحكم في سبيل مصلحتي وهم بعرفوا اكتر عنها , كنت اسرح واحلم باشي تاني عشان ما يدخل كلامهم عقلي , وبعد التلفون وصلتني اختي ع الدار , عبرت البيت وبلشت ابكي وابكي , وعم ادعلي ربنا انو ما يصير اللي هم بدهم اياه .
طلعت ساده يلعب مع روميو , بس روميو اليوم كرهته لانو كتير عاطل مع ساده وبدوش يتعرف عليه , وكيف لما شوفت ساده طيب وبسيط وواكف بعيد بس بستنى ع امل انو روميو يجي يحكي معه , وروميو مطنشّه , ليش محدش بحب ساده ؟ الكل بحكي انو ساده متلي محدش بحبه ! بس هاي التصرفات خلتني احب ساده اكتر منهم , خلتني اشوف كديش هو طيب وكديش راضي اني عم العب روميو .
ولانو يوم عطلتي بالزبط عطلت وما عملت اشي , ضليت ع التلفزيون بشوف بمسلسل زنخ , بس لاني بحب البطله وشخصيتها ولبسها , ينعن شكلها ع الذوق في لبسها .

||

نحكي عن ..~

الكتب اللي خلصتها خلال هالشهرين ..

الليالي البيضاء , قصيره رهيبه روعه , قراتها ع البلفون ومن كتر ما حبيتها وصيت اني اشتريها تكون عندي وعشان اعاود اقرئها كمان مره .
الاخوه كارامازوف الجزء التاني وصارلي فتره طويله بقرا فيه , بس وكفت عند فصل لانو ما عجبني وكنت كل فتره اقرا بالفصل صفحه صفحتين بعدين اوكف قراءه , بالاخر ما قراته للفصل بصراحه ومشيت عن الفصل , وهاي اول مره بحياتي بمشي ع اشي بالقراءه , بس مش كادر اتحمل الكلام اللي بنحكى فيه , وبعدين حسيت بالذنب وبالغبى واني ما قدّرت الكتاب لهيك عاودت ارجعلته غصب عني وقراته مرتين وكمان مش عاجبني .

راح اقرا يا الاخوه الجزئ التالت يا نيتوتشكا .. لسا مش مقرر .

العاب ..

اللعبه اللي العبتها ع البلستيشن هي a plague tale innocence , يالله شو بشعه وبايخه وزنحه وسهله وممله , محدش يشتريها , خلصتها بيوم ونص وضايل كم كاس بختمها , بس انا بلعب مشان انبسط بس هاي اللعبه بشعه .

راح العب red dead 2 , الشباب اللي بشتغل معاهم طارق وجولان حكو انها لعبتهم المفضله لنشوف .


مشاهده ..

دولار .. عجبني
Chocolate عادي واقل زنخ
Crash Landing on You منيح بس مش رهيب

لسا بشوف في :~
انمي جوجو
نسر الصعيد
فندق ديل لونا

||

احدى الليالي , كنت بطريق اني انام حوالي ع 2 بالليل , بعدين اسمعت اصوات سيارات عم يفحطو بالسيارات اخ ع هديك الايام بالضفه والادرن , ليش فش هان عندي هيك اصحاب ؟!وكنت مبسوطه ع اصواتهم وعم اعد بالدكايك , ضلوا عشرين دكيكه , وكل ما تمر دكيكه بحكي بعقلي خلص بكفوا ليجي الشرطه , وبالزبط اجت الشرطه لاني بعرف حارتنا فسادين حيوانين , واسمعت الشرطي بحكي في مكبر السياره وكف , فا امبين انو حد منهم انمسك . يا حراام ..~

||

السلام عليكم ..~

كنت بمزاج احكي وملان عندي حكي , اجاني تلفون نكد عليا , بعدين كعدت ابعبش في صور لكيت صور بضّحك عدلت المزاج , فهيني ..~

ليله الاحد وصار عنا توكيت صيفي , يعني اصحيت اليوم وراحت عليا نومه وعليا شغل بدري , الله بحبني اني اصحيت , مكانش معي الا نص ساعه اجهز حالي واوصل سيارتي اللي هي بمكان بدي بركض اوصللها ربع ساعه , يعني معي ربع ساعه بالزبط اجهز حالي , بسرعه غيرت واخدت تمر وكهوه بالطريك لانو معيش وكت , والحمد لله اوصلت الشغل ع الميعاد بالزبط والكل استغرب اني مكنتش بدري زي عوايدي , كان الشغل اليوم مع جولان وطارق وكان بطيئ فش زباين كتير الا زباين امبارح اللي صارت مشكله في نظام الانترنت والاجهزه وخرب لهيك امبارح بالشغل طردنا كل الزباين وحكينالهم يرجعوا اليوم .

عنا الوضع صار يخوف عشان كورونا , وامي بضل ع اعصابها عليا لهيك الله يحمينا ويحميهم . صارلي فتره بحكي مع اصحابي , والكل استغرب , كل تلفون بصير عشان برد عليهم اسمعت كلمه " غريبه انك رديتي " تلات مرات , هو والله انا بصراحه اللي بتصل عليا برد عليه اد مكنتش عامل طيران , لانو بعرف انو عنجد بده يحكي وعنده حكي , بس اجت فتره كنت مكتئبه وفتره بالشغل بكدرش ارد ع تلفونات اد المديره موجوده , بس الحمد لله اني ابسطتهم . لسا روميو بكره ساده وبدوش يتعرف عليه , لاني خلص صرت كل يوم اد كريس مش بغرفته اطلع روميو يلعب شوي . بالشغل اليوم حضرت فلم بريف هارت , يالله هالفلم كد ما اشوفه زي كاني شوفته اول مره , وبعدها شوفت مسلسل ولا مره شوفته الا من وكت ما بلشت شغل اسمه ذا ويينز بروز >>The wayans bros , وما بيجي كل يوم , بس بكون استناه استني , عنجد مسلسل كوميدي اشي مش طبيعي , بوصل لمرحله دموعي ينزلوا من الضحك , هالمسلسل راح يغلب من مسلسلات المفضله ويل سميث , بيل اير , لانو عنجد هدول نهفه اشي مش طبيعي , انا لما اشوف اشكالهم بكعد اضحك خاصه الاخو الصغير يالله شو بضحكني .. عنجد هالمسلسل هوّن عليا ايام صعبه كتيره بالشغل وبحياتي لانو كان ينسيني كلشي , طبعا بسمع حكي انو ممنوع , بس طالما فش زباين خلوني اشوفه والله مكرفين .





؛







||

اما ويل سميث ..~





..

السلام عليكم ..~

من نص ليل الاربعا || 3\11\20 ..~

||

عندي مجريات احكيها عن هالكم اليوم اللي غيبت بس تعبانه , وبديش اظلم المجريات , بس بنفس الوكت بعرف انو اد ما حكيت بنسى , ومع هيك ما بنحكى الا النصيب شو رايد , من شوي عبرت الدار , وبسرعه خلصت اهم شغلتين اعملهم بالعاده وهيني اجيت ع المدونه قبل ما انام وحتى ما اتعشيت مش جعانه , ظهري رجع يوجع ومعدتي كمان , بس الحمد لله مش كتير سائل عنهم , ومن وكت ما بلش هالتوقيت الصيفي مش شبعانه نوم , ولما ما اشبع بيطلع ع وجهي حب وبتسكّر نفسي عن الاكل , ولحد الان ما قرات ولا حتى العبت ع البلستيشن حتى بيوم عطلتي , شايف حالي مش ملحق ع اي شي من شغل دار لشغلي وحتى طارت الساعه اللي بتكون فيها لنفسي اعمل شو انا بحب , ولما هديك اليوم اطلعت ع الحوش وشوفت الترتيب وانواع الصبار , حكيت بعقلي كلمه بحتفظ فيها , واليوم الصبح مكنتش منتبه , اللي صار انو شوفت روميو واكف ع الشباك وعيونه بلمعوا انو شافني , يعني تعي طلعيني , كنت خايفه انو كريس بالغرفه , بس بنفس الوكت طنشت , لهيك خبطت ع الباب وعطول اجى روميو , طلعته شوي والله اعلم انو كريس كان نايم والله خزاوه , وبالشغل اليوم كان بس انا وجوليان لحالنا , وامبارح كانت عطلتي واطلعت من الدار 10 الصبح , ارجعت 4 العصر , ما ضبيت الاغراض ورتبت الا صارت الساعه 9 بالليل انهديت , ولازم اصحى بدري عشان السياره في مكان تنظيف الشارع , يعني كلشي ركاض بركاض , والاحلام اللي بضل احلم فيها بصحى ناشف ريقي وبصيبني قلق وارق وبالاصل هي كوابيس , كوابيس ! وبحكي معاكم وانا بنص عين من التعب ..~

||