مأساة روح {هالكه} في اوراق تائهه ~

السلام عليكم ..~

7\2\22 ..~


من وكت ما رجع رؤول ..~
اول اشي اليوم اللي قبل ما يرجع انا بعتله مسج , اكرام حكتلي انو اتصل ع الراس وحكى انو هو عالاكيد راجع , بس ضل عندي احتمال انو ما يرجع , لهيك يوم الاثنين بعتله مسج انو اشتكتلك وكتير متحمسه انك راجع التلاتاء وبتمنى تكون صحتك منيحه وانبسطت غاد وما تتاخر بكرا(غاد - المكسيك ) , انا بعرفه بيرجعلي حتى لو متاخر , بس ما رجع ولا حتى بيّن انو قرأ المسج , حكيت لعاد هاد الشب بدوش يرجع ومش مسترجي يرد عليا, لاني حكتله قبل ما يسافر اد ما بترجع نفس اليوم اللي حكيت راح ترجع فيه راح تشوفي وجهي الحقيقي معك لشهر(وجهي الحقيقي - اني اكون لئيمه ) , ومع هيك روحت عالشغل وكان عندي امل لو صغير اني اشوفه جاي , وبالزبط , اجى , مكدرتش اخبي الابتسامه ع وجهي , هو اجى قبلي عالشغل وكان متنشط وبسرعه فتح الباب وراح يطفي الانذار ولما اجى يسكر الباب انا عبرت وكتير كنت مبسوطه انو موجود وهو كمان ما خبى الابتسامه عن وجهه كمان , كانت الابتسامه ع وجهه كبيره كتير .

نحكي عن السواق الجديد زلمه كبير بالعمر يعني يمكن ببدايه الخمسينات بس ضخم , ومع هيك كتيرسريع نار بالشغل ومبسوطه عليه لانو سريع , بس المشكله الوحيده انو دايما ريحته طالعه, ومع هيك بخبيش عليكم ولا على حالي , كل يوم كل يوم كل ما يفتح الباب تبع المحزن لسا عندي الهاجس انو اللي يعبر منه يكون مايكل , وكل ما افتح الشاحنه او اسكرها طيفه لما يكعد جنبي ويكون مبتسم , كتير مشتاكه لهاد الاشي , وبنفس الوكت رؤول كتير مبسوط لما عرف انو فش مايكل , بحسه مرات بغار منه انو بيحكي معي وبيضحكني , لانو مايكل بيعرف كيف يتعامل معي , هيك طريقه لطيفه يغير مزاجي لما اكون متنكده

ماشي رؤول كبل ما يسافر سالني اد بدك اشي من المكسيك , حكتله مداليه , عندي عشق للمداليات وبحب من الناس اللي بعزهم يكون عندي منهم تذكار وهو المداليه , وبطريقنا ع غرفه الاستراحه لما اجى الوكت , كانوا الصبايا سابقينا ع الاستراحه , كنا ماشين جنب بعض ومد ايده واعطاني المداليه , عاد فكرت مد ايده بده يعطيني اشي بخصوص الشغل , كديش عجبتني وبيّن ع وجهي, كانت طقيه ما احلاها لمره بصورها, ما حكيت لحد ولا بدي حتى احكي , بس من وكت ما بلشنا الشغل في اول يوم شغل مع بعض بعد ما رجع واحنا نحكي , يالله كديش حكينا مع بعض , كان من اكتر الايام اللي ما وكفنا برم , عنجد انو احنا اصحاب لانو عنجد استغربت من حالي انو ما وكفت حكي معاه , والاساله والضحك والاسرار , ضلينا نحكي ونحكي , كنا نشتغل بس بعالم تاني واحنا نحكي , حتى صبايا 345 محدش فيهم نادى علينا او سالنا او حكى معانا, لانو كانوا شايفين كيف كنا نحكي .

عاد حكالي ليش ما رد ع المسج تبعي لانو بلفونه خربان , الشاشه اللمس ما بيشتغل من وكت مهو في المكسيك , بيكدر يشوف التنبيهات بس ما بكدر يعمل اي اشي بالبلفون , وكعد طوال الاسبوع بلفونه لسا خربان وكان يحكي ع عطله الاسبوع راح يشتري واحد بداله , لانو صار اشي تاني بيني وبين اختي فيث باليوم الي وراه

كان الاربعا وكان رجعت فينيسا , كنت كتير مبسوطه انها رجعت , لانها كانت مريضه وغابت حوالي اسبوع , بالصدفه كنت رايحه افتح الباب الرئيسي للبنات بحدود الساعه 8 ولكيتها بتنزل من السياره , عاد كعدت احكي معاها واطمن عليها وحكتلها بكمل الحكي بعدين , عاد بهاد اليوم كان في حكي بين كل بنات 345 انو في احتمال يكون شاحنه يوم السبت , يعني في شغل , 345 هي الساعه اللي ببلشو فيها بنات الشاحنه اللي هم اختي فيث وانجيلا وكاتي , انا ورؤول بنبلش 3 او 3 واشي , انا ورؤول علينا نجهز المخزن قبل ما يجيو لانو شفت الليل ما بنظف ولا بجهز المحزن النا , وعشان نكسب وكت انا ورؤول بنيجي ابدر لنجهز المحزن , هلكيت لما اعرفت انو في شاحنه يوم السبت وكعدت احكي لاختي فيث انو لو هي تغطي مكاني يوم السبت , انا بديش اجي عالشغل لانو بشتغل في الشغل التاني 6 ايام ورى بعض وراح اكون كتير تعبانه شغلين 6 ايام ورى بعض لا بنام لا ليل ولا نهار , وهاد ما عجبها وصارت تحكي انو هي اللي بدهاش تيجي عالشغل ومش متزكر شو صار حكي , ماشي وكملت الشغل وعادي ولا خطر ببالي انو كاين بكلامي مزعلها

بعد ما هي والبنات خلصوا شغل وروحوا انا كنت لسا بالشغل , كنت عم اتحوج شوفت ابريق للسقايه للورد وكان كتير عاجبني وضليت استنى انو ينزل ع التخفيظات ما نزل وخوفت يروح عليا لهيك عادوت اشتريته, الا جاني تلفون من فيث , كل ما اشوف منها مسج او تلفون بحكي اللهم اجعله خير , احكي يا عريس يا طوشه وكان طوشه , ولا عمرها حكت معي الا سمت بدني , ماشي بلشت تحكي وتغلط وتسب وانا مش عارف كيف هي فهمت الطلب اللي طلبته اشي تاني مش عارف ليش عملت طوشه كله عشان طلبت منها تغطي مكاني يوم السبت ؟!كيف شافت انو هاد الطلب تحكم فيها وقله احترام مش عارف , يعني كل ما افكر شو انا عملت وليش هي هيك فهمت الكصه مش عارف , وحكتلها حكك ع راسي ومش كصدي اني اقل احترام او ادّخل فيكي , انا بس طلبت تغطي مكاني , وعالفاضي لسا شايفه انو انا صرخت فيها وانو انا بقل احترامها وهي اكبر مني كدام لبنات 345 , وانو بنات 345 بحكو اني عصبيه وبصرخ فيها وبقل احترامها وانها اكبر مني وكل هالحكي ,اتأسفت منها وحكتلها كتير انو حكك عراسي ومش راح اعيد هالاشي من مره ومش كصدي وهي راحت وسكرت الخط , وانا وابتسمت الابتسامه الصفرا , انا بورجيكي وبورجيهم , كيف الحيوانات عم ينموا عليا ع اختي ؟ الحيوانات اللي كديش بساعدهم واللي بعزهم زي معزه اختي , كيف بدخلوا , كيف بالاصل بفهموا شو كنا كاعدين نحكي اد بالاصل بنحكي عربي بين بعض , شو عرفهم اني بقل احترام او بطاوش ,

طلبت من شب الامن اظن كان داريك انو اد في مجال اشوف فينيسا ,لاني صرت برى ساعه الشغل وممنوع تدخلي المكتب الا اشي طارئ , وحكالي ماشي , عبرت كان رؤول موجود ومكنتش بدي يكون موجود لاني هاي المره الوحيده اللي شافني ضعيفه فيها ولاني بعرفه كمان هو بصفها , الكل بصفها لانها هي الاخت الطيبه وانا الحيوانه اللئيمه , انا صغيره العايله يعني انا الدلوعه هاد شو بضل تحكيلهم , وانا اهلي بخلوني اعمل اللي بدي اياه , كل كلامها عني هيك بس شو الواحد يحكي اللي بيعرف بيعرف واللي ما بيعرف بحكي كف عدس , ماشي عبرت واول كلمه حكيتها لفينسا في خبر مش منيح بدي احكيلك اياه وهاد اتغير وجهها , حكتلها بدي اترك , وعيوني مرغرغين , ولا كدبت عليها , حكتلها انا بحبك وبحب هاد الشغل وهو اول شغل بعد سنين الي في امريكا مبسوطه فيه , حكتلي ليش يا مريم وشو في يعني صحه او اشي , ما رضيت احكي بالاول لاني بديش اطلع اختي انها مش منيحه, حكتلها اتكاتلت مع اختي والكل بحكيلها اني ما بحترمها واني الصغيره , وانا بصرخ وهم بعرفوا اني صوتي عالي وهاي مش اول مره بتعمل فيا هييك, حكتلي طيب بنغير الشفتات انو ما تشتغلوا ما بعض , حكتلها لأ هاد بيكبر المشكله راح تعرف اني السبب , حكتلي ما بينفع انو البنات يحكوا عنك هيك عم ما بيعرفوا اللغات والتقاليد بدك احكي معهم حكتلها لأ , خلص انا راح اترك وما تحكو اني تركت احكيلهم اني عملت غلط بالشغل وطردتوني , وحكى رؤول بدك اطلع من المكتب , حكتله لأ , حكى اسمعي انتي زعلانه خدي بكرا يوم عطله وفكري فيها, حكتله ماشي وسحبت حالي واطلعت من المكتب وبراسي اني مش راجعه

كان عليا الشغل التاني في بانيرا ولانو بعرف انها بتشتغل غاد حكيت مع ليني المسوؤله في بانيرا انو بديش اجي عالشغل عشان اتكالت مع اختي وبديش اشوفها , حكتلي طيب تعالي وكت ما هي تطلع من الشغل , وهاد اللي عملته , وانا في بانيرا اجاني تلفون من فينيسا وحكتلها اني بالشغل بكدرش احكي برجعلك بالبريك تبعي , ولما ارجعتلها كعدت تحكيلي يا مريم كيف بدك تتركيني وتتركي المخازن وانت عارفه لو انتي تركتي رؤول راح يترك وراح تخرب المخازن ,حكتلها عن جانبي من الكصه انو كنت اطلب منها تغطي مكاني بالشغل وانها كبرت الكصه وانو لما احكيلها تعمل اشي بالشغل بتزعل ورؤول بدوش يحكيلها اشي بخليني انا اللي احكيلها , من كلامنا وعدتها انو هاي اخر فرصه وراح ارجع عالشغل وانو رؤول من يوم وطالع لازم هو اللي يحكليها شو تعمل , بس كنت لسا مكهوره وكنت عنجد كارهه الشغل وبديش ارجع

وانا لسا في بانيرا بعد ما خلصت تلفون مع فانبسا بربع ساعه اجاني مسج من رقم غريب , وكان رؤول كان كأنوا مستخدم رقم حد من اهله ليبعت المسج لانو لسا ما اشتري بلفون جديد ومش عارف كيف طال رقمي من تلفونه , المهم اجاني المسج انو انا رؤول وشو فكرتي بالكصه ولسا بدك تتركي , لانو كنت حاكيه مع فانبسا , سبحان الله لو كدّم بالمسج كان حكتله اه , حكتله تخافش مش تاركتك اعطيني يومين اكعد بالدار وبرجعلك , بعدها بعتلي مسج طويل يشرح وانو لازم انا اطول بالي وما اعصب الكل بيعرف اني بعصب , وانو كل هالحكي الفاضي اللي عينك عينك موكف مغ اختي , بس عادي انا متعوده ع انو الناس تفهمني غلط وع انو ما توكف معي , الوحيده اللي وكفت معي هي فانبسا وهاي اول مره بحياتي حد بوكف معي , يمكن لما اشتغلت معي اسبوع ونص لما كان رؤول باجازه شافت كيف كلامي ثقيل ع اختي , ارجعته بمسج طيب يا رؤول وسكرت ع الموضوع

اليوم اللي غيبت فيه كان الخميس , طبعا اكيد بنات 345 بعتولي مسجات ع الجروب انو وين يا مريم انتي جايه ؟, انا كنت بسابع نومه, ومسجات انو في شاحنه السبت بدك تيجي ولا شو ؟ انا اصحيت الصبح لكيت المسجات ولا رديت عليهم لاني كنت زعلانه منهم , حتى لحد الان زعلانه ولحد الان براسي اروح اواجهم بس بديش اكبر الكصه لان متاكد انو اختي حكت اشي تاني وبديش تطلع هي كدابه , بعرفش شو اللي صار المهم اني لليوم مش طايك اللي صار ولليوم بدي اعرف شو صار وشو اختي بتحكي عليا لما ما اكونش موجوده لانو دايما بتحب اطلعني اني مش منيحه وهم بصدقوا لاني قاسيه بالشغل بس في الله , وبنات 345 بعرفوني برد ع المسجات والتلفونات تبعات الشغل بنفس الوكت لانو شغل ومسؤوليه بس هالمره ولا سالت وضليت مطنش

اليوم الي وراه كان الجمعه , سبحان الله انسيت احط منبه وبالعاده بصحى ع نفس الميعاد بدون منبه بس ما اصحيت , بحدود الساع اصحيت ع تلفون من امي وبتحكيلي وينك شو فش عليكي شغل ؟ حكتلها راحت عليا نومه, مكنتش حاكي لامي عن المشكله وبنفس الوكت نمت وكان براسي اني اتركها عالتساهيل اد اروح ع الشغل ولا لأ , بعتت مسج لرؤول اني راح اتاخر لانو لسا هلكيت اصحيت , وجهزت حالي وروحت عالشغل , عبرت الشغل ووجهي بقطع الرزق , جد مكنتش طايك حد , عبرت المخزن وبديش احكي لحد صباح الخير , بس حكو معي ورديت صباح الخير , بسرعه ومشيت بسرعه وروحت ركاض مشان اشتغل مع رؤول اهرب اني اطلع في وجوهوهم وعيونهم عشان ما يبين عليا اني مش طايكهم , وكان جد من الايام اللي ما حكيت كم كلمه ع بعض مع اي حد , رؤول كان يضل يحكلي مريم خلص اختك وكل هالحكي حكتله بدي وكت ,اترك الامور للزمن الوكت بحلها , لما اجى وكت البريك بديش اخد بريك معاهم , ومع هيك سحبني رؤول اروح اخد البريك واحنا بالطريك انا وهو ماشين في الممر طالعه فيث من غرفه البريك وبتحكيلي اروح احكي معهم لبنات 345 بسالوا شو مالك روحي احكي معهم , شو احكي معهم خرى عليكم كلكم خرى , بتفهومني غلط وبتنموا عليا ومع هيك بتيجو تتدخلوا شو مالي ؟ مال امك مال ؟ اطلعوا من راسي , عبرت غزفه البريك وحكيت في امور شخصيه وفيث بلشت تحكي معي عشان تبين كدامهم انها المنيحه وانها اللي بتحكي , لما حبي كان يضل يحكي عنها تحتنيا معاه حك , بس عادي خليني الحيوانه وخليها الطيبه محدش بالاصل بصدك شو بحكي لشو احكيلهم
وارجعنا عالشغل بعد البريك وكنت اعد في عدد الكراتين وافرز بالعد وهي بتحكي كاعده , فكرتها بتحكي مع رؤول لانو كنت اعد ومعطيها ظهري ورءول جنبها ولما اعد بكون مركزه لانو مشكله اد العد طلع غلط , وصارت تصرخ انو بحكي معك وانتي بدكيش تحكي معي , لفيت راسي عليها ورفعت بلفوني لاني كنت اكتب العدد ورديت عليها وحكتلها بعد يختي بعد كاعده بديش اتلخبط , عالفاضي زعلت وراحت , بس ما سالت لاني لما قررت ارجع عالشغل حكيت بعقلي بديش احكي معاها وبدي اخفف الحكي لابعد حد

كانوا كل بنات 345 مقررين انو محدش فيهم بده يجي يوم السبت حتى لو في شاحنه , وروؤل اهبل ما استرجى يحكليهم لا لازم تيجيو ومين بده يعمل الشاحنه, وانا ما ادخلت لاني لسا مش طايكهم , كنت سامع كل كلامهم لانهم بحكوه كدامي انو بدناش نيجي , كأنهم بستنوني اجي احكي معهم كيف بدكم تتروكوني انا ورؤول نعمل الشاحنه لحالنا , ماسألتش لانو دايما عارف شو نيتي بالشغل , الشغل عندي بالاول , وبعرف ربنا دايما بهونها عليا بالشغل , اعمل الشاحنه لحالي مع رؤول عادي خرى عليهم خرى بتتدبر , عاد بالصدفه اجت فانيسا ومش عادتها تتيجي بدري , , اظن لانو رؤول اتصل عليها وحكالها ولا واحده منهم بدها تيجي عالشغل يوم السبت, وفانبسا لما اجت عبرت ع المخازن ولفت ع البنات وما سكتتلهم , حكتلهم اللي بدهاش تيجي السبت بدها تيجي غصب عنها الاحد يا بتيجي السبت يا بتيجي الاحد , وكعدت تحكي اللي عليها مواعيد وكصص بتعملها بعد التسعه الصبح , مين عنده مواعيد ع 345 ا لصبح . ما سكتت لاي حد , بيستاهلوا الله لا يردهم كديش انبسطت انها عملت فيهم هيك , اخدت حقي منهم انشفى غليلي

اجى السبت وكلهم اجو عالشغل وبتزكر كان يوم خفيف بالشغل فش كتير بضاعه وكان لسا كلامي خفيف مع الكل وحتى سلفيا كمان اجت , سلفيا كانت تشتغل معانا بس هلكيت بتكدرش تشتغل الا يوم السبت , واعرفت خبر مش منيح عن ابنها انو انسجن خمس سنين وهو لسا صعير 20 سنه, عاد بعد ما خلصت شغلي بالطريك اجاني مسج من اختي هوبز انو بدي احكي معك واشوفك , ضليت مكمل ع بيتها , هي من وكت ما صارت تشتغل مغ جوزها بطلت اشوفها كتير , اتصلت عليها وحكتلها هيني ع باب البيت افتحي , حكتلي طالعين بس بدي اعرف شو صاير بينك وبين فيث ؟ يم عطول فيث الحماره اللي بتعرفش تحل الامور وبتفسد وبتكبر الكصص , طب محنا بنحكي كيف رايحه تحكي لهوبز انو بنحكيش ؟! صح بنحكي خفيف بس مش محاربتها زي مهي حكت, حكتلي هوبز بدي اسمع الكصه من الطرفين وبديش احط زيت ع النار , حكتلها اطمني احنا بنحكي وانا مش محاربتها بس كلامي خفيف, مخفف كلام معاها بس , وراحت هوبز وانا ارجعت ع الدار

الاحد عطله بالراس بس مش في بانيرا , وبانيرا ما كنت اشوفها لانها هي ما كانت تروح عالشغل

اما الاثنين كنا عارفين انو في شب جديد بده يشتغل معانا , بس مكناش عارفين انو راح يكون بالهبل هاد ,واللي صار كمان اوكعت ههههههه وكعه اخت شلن لحد الان بكدرش امشي منيح هههه, اوكعت وانا بالشغل , كان عنا عفش كتير معبى كراتين , بالعاده بنط حواليهم وعليهم وبمشي ولا مره وكعت , بس هالمره مشيت عليهم وانسيت انو رؤول جنبي , لانو اللي بيعمله غلط ,وكعد يحكي تعملوش يا مريم , حكتله تخافش عليا , المهم نطيت عليهم مشان اروح ع الزاويه التانيه, اوصلت الزاويه التانيه وعملت اللي لازم اعمله , وارجعت نفس الطريك و لما نطيت من فوك الكراتين يعني متر ونص انطعجت او احكي انلوت اجري ووكعت وعند الجوزه بالعظم جنبها خبط بالارض خبطه طلعت من راسي , مسكت حالي كم ثانيه , رؤول كاين داير ظهره لما اوكعت , وانا عالارض عم امسك بحالي مشان اتحمل الوجع هو لف وجهه وحكى ايش مالك ؟وحكتله رؤول اوكعت وكعه اخت شلن الحك عليا استعجلت وما رديت عليك , بس طبعا انا وياه اد حد فينا بيوكع ما بنوكف ضحك عالتاني , بس هو شافني متوجعه جد بحكيلكهم زي كأنه حد مسك اجري وخبطهابالارض خبطه طلعت من راسي ,وكعد يضحك وبنفس الوكت يمسك حاله لانو بيّن عليا اني متوجعه, ومع هيك بلشت بنفس الوكت اعرج , وهو بلش يضحك ويضحك , , منيح انو مكانش الا ساعه لشغلي لما وكعت , وكنت خايفه حد يشوفني عالكميرا , لحد الان خايفه يجيني تلفون انو وكعتي بالشغل , وبديش حد يعرف اني اوكعت بالشغل , لحد الان الكل بيعرف اني وكعت بالشارع , وحكتله تحكيش لحد اني اوكعت بالشغل , بالساعه هاي اجري راحت فيها وانا اشتغل ورؤول بضحك وبنفس الوكت هاكل همي , يالله كديش هكل همي , هي المره اللي جد اشتغربت من كديش همه امري , اجى حواليا ويضل يحكي ويسال عنها وانو خلص اكعدي , ييعني كان امبين حتى ع وجهه .,

عاد ما اتاخرت بالشغل لانو كنت عارف اني اجري كل مالها بتزيد وجع وكان عليا موعد مهم بكصه كبيره اللي الله ينعن شكله لحد الان بضيع وكت ومش عامل اللي طالبته منه وانا معطيه المصاري مقدما, ما اوصلت الدار وكعدت نص ساعه وانا امشي من السياره لجوى الدار لانو اجري ورمت ورم مش طبيعي ووجع مش طبيعي , ومكنتش كادر احطها عالارض لو حط حفيف مكدرتش تملس الارض , وكعدت احكي كيف بدي اروح ع ميعادي ومع هيك هالميعاد اسبوعين ونص وانا استنى فيه بكدرش أتأخر عليه , لما عبرت البيت شافتني مرت اخوي تلات وحكتلي مالك وشو في ليش بتمشيش , حكتلها اوكعت , , عاد ضليت بالبيت نص ساعه احاول الاكي حل مشان امشي مشان الموعد اللي عليا , واتزكرت انو عندي في البيت عصايه لامي لما كمان مكناتش تكدر تمشي ع اجرها , عاد روحت ع موعدي بالعصا , ويالله كل ما اتزكر الوجع اللي كان فيا وكل ما اتزكر كيف كنت مكدرش امشي وانا بنص البلد بس انزل من الاوبر وامشي ع العماره كان عذاب بخوف , بعدها بعتت مسج لرؤول وحكتله انو مش كادره امشي من مره وبتوجع , حكى حطي عليها تلج وروحي شوفي دكتور

وهاد اللي عملته , ميّلت من موعدي ع الطوارئ , وكعدت من ا1 الصبح للخمسه , بالاول كنت انط وانا امشي بعدين لما اوصلت المستشفى ما رضو , جابولي كرسي لانو شكلها بخوف , وكنت استدعي ربنا ما تكون مكسوره لانو توكيف حياه لا سمح الله , لما طلعت الصور االاكستراي حكو ولا فيها اشي , بدها اسبوعين او تلات , وضلي خدي دوا للوجع وحطي تلج واعطوني العكزات مشان امشي عليهم لانو بعرفش الا ع اجري اليمين , الحمد لله فش كسروالحمد لله انها الشمال , عاد لما ارجعت عالدار , كانت وجع بخوف لاني ما رضيت اخد دوا وجع بحبش احده اد بكدر اتحمل وكنت كادره الحمد لله, بس كنت اضل احط عليها ثلح ولازم اضل لاففها بالمشدات , ورافعها ع مخده , ف ضليت عالتخت تلج عليها وبلشت حكي مع الكل , حكيت بالاول مع رؤول انو كنت بالطوارئ وانو فش فيها كسر بس بعرفش امشي لهيك مش راح اروح عالشغل التلاتاء متلك , لانو كانت يوم عطلته ,حكالي مش مشكل المهم اجرك اطيب وتصير احسن , وحكيت مع شغلي في بانيرا وبعتت الصوره وانو بكدرش اشتغل بعتها ل ليني حكتلي بعطيكي اسبوع اجازه , وبعتت مسج لفنيسا حكتلها اوكعت بالشارع وبعتت الصوره وحكتله مش راح اجي بكرا عالشغل وبعرفش عن الايام اللي وراها, وكديش زعلت لانو انا بساعدها ولانو هي تشتغل بدال رؤول لانو عطلته , يعني صعب عليها بدوني لاني انا اللي بعمل الشاحنه , وكمان بعتت مسج لصبايا 345 , وحكيت مع خواتي ووعدوني ما يحكوا لامي , هاد كان كله يوم الاثنين \6\13


يوم الثلاثاء , يوم عطله رؤول , اتصلت عليا ايمان فيس تايم وهي بالشغل , كانت هي وانجيلا بالشغل واتصلوا يطمنوا عليا , وحكولي عن الشغل والكصص , وعن الشب الجديد اسمه اغناسيو وعن فانيسا وكصص الشغل , لانو بعرفوني لازم اعرف كلشي عن الشغل , لاني مساعده رؤول , وكمان الظهر بعتلي رؤول مسج انو كيفني وكيف اجري , حكتله احسن بس لسا بكدرش احطها عالارض , بنفس اليوم حوالي 8 ونص بالليل بعتلي مسج انو لتكوني بتكدبي عليا واجرك مكسوره ؟ حكتله لأ وبعتله مسج طويل اشرحله انو فش فيها اشي ومع هيك انفتح فيا هالشب , زي كأنه كان محوّش كره الي وزعل , كعد يحكلي اسمعي انا عارف ومتاكد انك متوجعه , بس لما ترجعي عالشغل من يوم ورايح راح اتردي عليا وشو ما احكيلك تعمليه ولا بطردك من الشغل , وبكدر يطردني بصراحه لانو المعلم تبعي ولازم ارد عليه ,وحكالي انو القرار الغبي اللي انا عملته خلاه معلّق ,بعرفش شو كان كصده , وكعد يخبص انو انا ما بحترمه ولا برد عليه , وانا عصبت , وحكتله كل خرى وروح نام عليك شغل , وراح

تاني يوم الاربعا اصحيت وحكيت خليني احكي معاه اطمن عليه وهو بالشغل , بعتله , رجعلي وحكالي انه من مره مش منيح , لهيك اتصلت عليه وكعدنا نحكي , كان في مشاكل بالشغل وهو كتير بتوتر وكت المشاكل , بحسه دايما بدوش يتحمل المسؤوليه , بس دايما بحاول اعطيه دفعه واكون ايجابيه معاه مع اني صبيه سلبيه عالاخر , ضليت احكي معه وحكتله خلص باجي بكرا , انبسط وبنفس الوكت حكى لأ اد لسا متوجعه , بس بردش عليه

السلام عليكم ..~

6 ونص المغرب من يوم التلاتاء || 10\18\22

||

راح احاول ارجع للمدونه لانو شوفت حالي ضعت من وكت ما وكفت احكي معكم ومن وكت ما وكفت اكتب في مذكراتي , عم اغلط وعم ابعد عن ربنا ولاني ما بكتب مجريات ايامي ما براجع حالي , صاير غباش مش طبيعي ع عيوني مخليني اكمل الغلط اللي اعمله , خلاني اتغير واصير الصبيه الضعيفه اللي بتكدرش تحكي لأ , الصبيه اللي بتستنى , واللي بتطلب مساعده , واللي بتهتم بغيرها ..~


|

احط صور واحكي عنها ..~

اللاب توب جنني عشان اعرف احط صور , الماوس بمشي عكيفه , وزي كأني عم بلعب زكوّطه معاه


|








الجمعه الماضيه روحنا شوفنا فلم هالووين , ما عجبش ولا حد فينا , كان بطيء وما بخاوف والسينما ملانه لانو اول عرض , اخسرنا مصاري بلاوي عالفاضي ..~

|






روحت مع خواتي نشرب كهوه وشاي عدن في محل كهوه عربي اسمه دله في سانفراسيسكو , بنحب كهوتهم وبنحب كعدتهم , صح بنتغلب في مكان للسياره وبكون معجوك بس بنفس الوكت بننبسط فيه

|



كاتي راحت عطله ع لوس انجليس وجابت الينا حلو من محل مشهور هناك

|

مش جاي عبالي اكمل

السلام عليكم

الاثنين || 7\4\22 ..~

||


الخميس بعد يومين غياب عن شغل الراس ارجعت , كنت باليومين احكي مع امي نفس الميعاد واكدب عليها واحكيلها اني هيني رايحه عالشغل , بس اكون رايحه او راجعه للنوم , بديش اياها تحس او تعرف , لما روحت الخميس عالشغل اخدت العصايه تبعت امي لانو من مره بعرفش امشي وكنت كتير بطيئه , بس انو خلص بديش رؤول يضل مكتئب لاني بساعده كتير بالشغل , وبعرف انو حتى لو روحت اشتغل معاهم مش راح يتعبوني وراح اشتغل وانا كاعده , كنت اشوف حالي متل احب بطل عندي اللي هو الدكتور هاوس , روحت عالشغل , وكعدت فتره ت انزل من السياره وامشي ع باب الشغل , غم اعرج عرج مش طبيعي , وكان رؤول يستنى فيا ع الباب , بوجهه وعيونه الزعلانين , واول ما حكالي هو " كديش انك غبيبه " , وبنفس الوكت ابتسم الابتسامه ع وجهه اني اجيت واني موجوده , وحكتله مش مشكل المهم انو هالاشي بخليني اشوفك مبتسم , بلشت الشغل والكل اجى ركاض علي صبايا 345 يطمن عليا , كنت امشي شوي شوي , والكل يحكيلي اكعدي تشتغليش , بس عارفه حالي بردش عحد , كنت اشتغل ع الخفيف , , كنت اتشبك باشي وانا عم استخدم المسدس مشان تنزيل البضاعه من الشاحنه , وكل ما اتعب واجري تضرب عليا اكعد لانو مكدرش اتنفس , ومش متزكر اد كنت اشتغل فل ولا نص بالشغل , ضليت هيك لمده اسبوع كامل , وجع صعب , ومرات ازهك هالوجع ازهك انو اجري ما طابت ولسا بتوجع , ورؤول يضل يحكيلي" نفسي يا مريم اشوط اجرك زي الفطبول لاني ازهتكها وازهكتك وانتي هيك بطيئه بالشغل " , اه كنت بطيئه وكنت متوجعه وامبين عليا الوجع , ومرات بالغلط اجري تصيب اشي او اخبط ع اشي بالغلط وهون يا حبيب اصير انط من الوجع

نبعد شوي من رؤول ونحكي عن حبي :~

غاب عني فتره طويله اللي هم 21 يوم , كنت اتصل عليه دولي تلفونه مسكر , خوفت بصراحه ومعرفتش كيف اوصل لاخباره , لانو اخر مره حكينا كان كلشي تمام يعني مش اني مزعلته , وغير انو حتى لو صار اشي بعرفه بعاود يرد عليا ويطعميني بهدله , ما سالت اخوي واحد عنه لانو اخوي كان بفتره مشاكل كبيره وصعبه وحكيت مش وكت اسال اخوي عنه , كنت ادخل فيس اختي اشوف اد هو متاح عالفيس ما كنت اشوفه متاح ولا حتى ع الواتس , بالاخر سالت امي وبعد فتره جابت خبر انو ممكن يكون بالسجن , وطلع جد بالسجن , اول ما طلع بعتلي مسج بخبرك كلشي تشغليش بالك اعطيني كم يوم وبرجعلك , صرت استغرب من حالي انو صايره اعطي للناس وكت وفرص لوكت ما هم يجيو يحكولي , المهم رجعلي بعد بيوم وخبرني كل الكصه , كعدنا يمكن بس ساعه نحكي , لانو كنت رايحه من شغل لشغل ومش نايمه وعليا شغل ومعي ساعه انام , يعني يومين شغل وداخله في اليوم التالت لهيك بعد ما اطمنت عليه نمت ساعه وروحت ع شغلي , وحكالي بدي اجي ع امريكا , حكتله لو اجيت باخدك لانك بامريكا , واستغربت انو كلامي اعطاه مزاج حلو , واندمت اني اعطيه هالامل , خايفه اد اجى ما اعمل الوعد اللي وعدته وهو اني اخده

الاشي التاني اللي صار وهو روحت ع الملاهي مش مره مرتين , مع خواتي واولادهم
كديش انبسطت وكديش العبت وكديش احكي كل لعبه راح العب فيها راح اخاف , ما خوفت الا بلعبه واحده اللي هي ارمي حالي في الحبل , كان دايما عندي الفضول اعرف شو شعور السقوط , وبكل صراحه لحظه السقوط اولها خوفت , وااال كل ما بفكر فيها انو لحظه احساس حلو كتير , ع كد ما خوفت, خوفت ثانيه , بس هاي الثانيه اللي يسقط جسمك لا ارادي بفكر بالخوف بس لما تعرفي بعقلك انك مربوطه في الحبل , بتنبسطي , انبساط احلى انبساط بكل الالعاب اللي العبتها


في يوم كان الاربعا , كلنا اتفكنا صبايا 345 ورؤول وفانيسا وحتى الشب الجديد انو نروح ع مطعم ناكل كلنا مع بعض بعد الشغل , الشب الجديد اغناسيو كان بالاول بده يروح وبعدين حكى بكدرش , وانا هالشب ما بطيكه , بس عارف انو اللي فيه مش بايده هو كأنه مريض نفسي او نحكي بطئ عقليا , يعني التعامل معه لازم يكون زي ولد 7 سنين , وهو عمره 27 وانا بكره الصغار وبعرفش اتعامل معاهم لاني شديده وقاسيه , وبنرفز بالشغل , انو احكيله اعمل يمين بعمل شمال , غبي لدرجه بتتعب الكل , يعني الكل بدوش يشتغل معاه , وانا مفكعه معي لاني لما اشتغل معه بكون جد شديده عليه وبديش اياه يترك الشغل عشان ما اخسر الرهان , اه انا بحب اراهن وراهنت رؤول اد الشب بكعد شهر بالشغل عليه يعطيني 20 دولار, بس بنفس الوكت الشغل شغل والكل بعرفني بالشغل عادله وتبعت حق , والكل بعرف بحسبها ع الدقيقه, بحبش اللي بضيع وكت وهو كتير بضيع وكت لانو بطئ, لهيك كل شوي بحكيله هاي اغناسيو شد حيكلك اسرع , هاي اغناسيو هاد غلط اللي بتعمله , هاي اغناسيو , يا حرام جننته لاغناسيو ههههه والكل بطلع عليا وببتسم وبضحكو لاني جد شديده عليه , ف بعدها حكيت خلص بدي اخف عليه حرام , وبالزبط خفيت عليه ولنشوف بالايام الجاي شو يصير ؟

اما فانيسا ما كدرت لانو المانجر اللي تحت ايدها اتصل وبكدرش يجي عالشغل لهيك هي راح تغطي مكانه ف بتكدرش تيجي معانا وكديش ازعلت لاني بجب وجود فانيسا , اتفكنا انو نروح الظهر ونوقف سياراتنا عند الراس ويروحوا كلهم في سياره اختي , وحكتلهم انا بجيب رؤول لانو عليه يتاخر بالشغل لوكت ما تيجي فانيسيا وكمان عليه يروح ع البنك حكى ليسحب مصاري , بتزكر لما كعدنا نحكي عن سحب المصاري من بنكه , حكالي مريم اعطيكي بطاقتي وانتي تسحبي المصاري ؟وهو لسا بالشغل لاني روحت قبله ! فطست ضحك وحكتله تثقش فيا يا رؤول , حكي شو يعني بدك تسرقيني , بتكدريش لانو معاي رقمك وبتشتغلي هون واختك بتشتغل معانا , حكتله لأ مش اسركك بس تثقش فيا , المهم الظهر بنات 345 سبقونا ع المطعم وانا كنت استنى رؤول ع باب الراس كان عليه يسجل خروج , وبعدها روحنا انا وهو ع البنك وسحب مصاري وروحنا ع المطعم وانبسطنا غاد كتير

السلام عليكم ..~

يوم السبت 7\16\22 ..~



يوم اتصل عليا رؤول بالليل بدون ما حتى يحكيلي بدي اتصل , بالعاده بحكيلي مشغوله بكدر اتصل ؟ ودايما بحكيله لأ فاضيه اتصل ! سبحان الله دايما حظه بكون فاضيه , وبعرف لما يتصل عليا بكون متنكد من الشغل وبده يفضفض , لانو بنفس اليوم في صبايا الاواعي (الملابس) كدبوا عليه وحطوه في مشكل , كأنه استنى الليل مشان يحكي معي , وهو بالعاده بنام بدري , مره لازم احكيلكم عن صفاته لانو فش فيه اشي محرز لا شكل ولا شخصيه ,الاشي البحبه فيه هو اهتمامه , يعني بهتم فينا وبنشغل باله علينا وع صحتنا , وبحب عيونه واكتافه بصراحه , اكتافه اعراض والشيب اللي براسه , وبحكيلكم بفتره غيابه بالاجازه تبعته , الكل حكى انو انا غيرته لرؤول , هو ما كان يحكي مع حد ولا عمرهم شافوه بضحك , بس من وكت ما انا اجيت صاروا يسمعو صوته ويشوفه بضحك ويضل يحكي , اختي صارت تحكي مريم بتغير الشباب من حواليها , ما علينا , نحكي عن التلفون , هاي اول مره بحكي معي ساعتين ونص بالليل , وهو بنام بدري , بس ضل يحكي معي لل احدى عشر ونص بالليل وهو بنام ع التمنيه !! وكان علينا شغل بس ضل صاحي وضل يحكي معي , ما راح الا لما نام وهو ع التلفون معي , لما اسمعته انو كاعد بشخر سكرت البلفون وانبسطت انو راح نام لانو كلامه شوي ما كان يعجبني , بضل شب امريكي كافر فش حدود , عم احاول اعمل حدود زي ما بعملها مع كل اصحابي الشباب العرب ,ومش عارفه اد بتزبط ولا شو لانو مش كتير بنحكي بالبلفون هالمره هاي وفي كمان مره تانيه لما كان طافي بحكيلكم عنها , كانت مره كنت استناها واتعبت مشان اوصللها مشان ارضي غروري , المره الاولى وهو واعي كان تلفون طويل ,بالساعتين اللي حكينا فيها , كتير كعد يسال اساله خاصه وانا بحكيش هيك اشي , حكتله ليش بعملش هيك كصص عشان الاسلام , وحكتله عن كم شغله بعملها بس بحكيهاش لحد حتى هون بالمدونه , شغله بتخليني اوكف لما بدي اعصي ربنا , استغرب وما صدك هالاشي , معاه حك , الكل معاهم حك ما يصدكوني , بعدين حكتله احنا مش اصحاب بدك نكون اصحاب , حكى لأ , انبسطت من جواي , وانا بحكيلكم من جواي بهمني امره بس عشان بنشتغل مع بعض ,المعزه من الشغل وشو بعمل معي بالشغل ,’ كتير منيح معي بالشغل بامور الشغل , ما بدي اكون صديقه لاني عارفه راح اكون الطرف او الصديق اللي بيعمل كلشي وهو لأ , فش عنده المقدره انو يعمل اشي لو كان صديق , وكان يحكي انو هو بكرهني وكانت تيجي عليه ايام يا انا يا هو بالشغل من كتر ما انا لئيمه , وضل يحكي انتي بتهتميش بحد وانانيه وبتعملي اللي بدك اياه , اه عجّب بالحكي معي عني , وكل كلامه صحيح وكنت احكيله بدك اهتم فيك يعني ؟ حكى لأ لانك انانيه وليئمه حكتله احسن , وضل وراي مشان سر ليش الشباب العرب اللي لما بدي ارتبط فيهم بيعرفوا هاد السر ببطلوا بدهم يرتبطو فيا , بس ما حزره من مره , ومع هيك لا عالبال ولا عالخاطر حكى اليوم كنتي لابسه هالجينز الاسود اول مره بتلبسيه وانتي قصيره وشعرك الويفي وعصبتي عليا لما اجيت اطلع من الباب بدون ما انادي عليكي تطلعي معي , عنا في باب ممنوع حد يطلع منه لحاله لانو بنعبر في مشاكل كبيره بالشغل , لانو دايما كل يوم بشيكوا ع الكميرا , هاد الباب ما بنطلع منه الا لما بدنا نرمي قطعه عفش او كراتين وممنوع حد يعمله لحاله لانو بفكروا انو بدنا نسرق , ودايما بناكل بهادل وهو بكعد يعيط , طب رد وما تطلع لحالك ,ف كنت امشي باجري اللي بعرج فيها وروحت ركاض , هو حكى هيك وانو يا مريم كنتي كتير كيوت وانتي معصبه ,يا ريت تلبسي الجينز كمان مره بكرا , حكتله بتحلم كاعد ! بتعرفني بردش على حد , وبعدها ابصر شو كعدنا نحكي بس ملان حكي صار , دايما هيك البدايات انو في حكي ينحكى وفش ملل , شغلات بتنسال لتنعرف ف بتكون متعه بالحكي

طبعا نمنا كم ساعه وروحنا شوفنا بعض بالشغل وكملنا حكي عن شغلات تانيه عن المسلسل اللي بنشوفه او اللعبه اللي بنلعبها وضل ورى السر ت بالصدفه عرفه , مكدرتش اكزب لانو بيبين عليا , وكان كتير مبسوط , من الايام اللي كان يحكي فيها ويمزح ومبتسم عكس اغلب الايام اللي وجهه نكد ومكشر وبفكره مرات بكون زعلان من كتر البوز اللي بكون ضاربه ع وجهه, بعرف انو مرات الواحد بده وكت ليصحى ويبلش يصحصح , بس بحبش البوز عالصبح وبحبش عن حالي اتصبح بشخص بوزه شبرين كدامه, في ايام بكون جد زعلان ومنكد وبوزه شبرين بكدرش امزح معه ولا احكي معه وبكون احكي بعقلي وينك يا مايكل ؟الوجه البشوش

ماشي احكيلكم عن اليوم اللي اتصل عليا وهو طافي , بالاول احكي عن اليوم القبله اللي كان الخميس كان صارلوه كم يوم مريض , حتى ما صدكت انو مريض بس لما تابعت شو بيعمل وكيف وجهه شوفت انو عنجد مريض وحتى لما حكيتله انك بتكدب حكى امبلا عندي سخونه وصيبي وجهي لتتأكدي, اطلّعت عليه من فوك لتحت انو شو هالهبل اللي بتطلبه كاعد , بعدين شوفت انو وجهه زعل , حكيتله طيب , ف صيبته في اصبعي , اصبع واحد ع جبينه وطلع عنده شويت سخونه ,, اليوم اللي اتصل عليا كان يوم جمعه وانا بالعاده روحت جيبته من بيته بالسياره , امي بضل تحكيلي خديه معك عالشغل لانو هو ساكن اخر الشارع من مكان الشغل من تحت كتير كريب عالشغل , وبدهاش اني اكعد استنى باب الشغل بالسياره لحالي , لهيك اجيبه من بيته ونروح عالشغل مع بعض عند امي آمن احسن , وكنت شاريه عصير خصوصا للكحه , اعطيته اياه بس ما شربه , حكى كتير بارد بده يستنى بس يدفى العصير , بالشغل كان يوم متعب اللي بتزكره , وكان الحيوان اغناسيو بطئ وبكعد ساعه ليعمل الاشي وهاد الاشي بوترنا, وكان في طوشه ع تعليقات الاواعي بين البنات وعشان الطوشه اللي صارت والتوتر اللي صار مع رؤول وهو مريض , روحت ادخلت بالكصه وحكيت للصبايا انا اللي راح اجهز التعليقات واساعدكم , وكان هو معصب ويحكي معاهم ويكاتل لهيك ادخلت , وكان لسا مريض وامبين عليه كتير لهيك ماطلبت منه يشتغل او يعمل هيك ولا هيك وحتى لو المعلم تبعي بحبش تضيع الوكت , لاني بصراحه انا صبيه شديده بالشغل , بالعاده اد بشوفه بده يتركني اشتغل لحالي وما يساعدني ما بسكت , بس هالمره زي كل مره بشوف انو مريض او نفسيته زي العمى , ما بحكيله يساعدني من مره . فكان واكف جنبي وانا اعمل التعليقات وكعدنا نحكي ونحكي وكان بشرب بالعصير وما عجبه لانه من النوع الكوي , كعد يسال اد بينفع نطلع مع بعض حكيتله بنفعش وحكيتله السبب , حكى لو فينيسا معانا حكتله اه عادي, كعد يسال عن شغلات غلط عملتها وكعد هو يحكي عن شغلات غلط هو عملها , كانت ساعه حلوه , بحكيلكم الحلو بس البدايات , بعدها كلشي بصير ملل وزهك لانو بدنا كمان بس فش هالكمان وبعدها الدنيا بتاخدهم مني لتتركني لحالي زي عوايدها , لما خلصنا الشغل مرات برجعه عالبيت حسب مزاجي ووكتي وكمان اد هو بطلب انو نروح مع بعض , لانو بشوفه بهكل هم اللي بنشتغل معاهم انو ليش دايما بنطلع مع بعض لما نخلص الشغل , بس كل اللي بالشغل بعرفوني ما بصاحب ولا بدخل بعلاقات , ومش راح اكزب عليكم اختي فيث بتعرفش اني بجيبه عالشغل او برجعه عالبيت , امي الوحيده اللي بتعرف اني بجيبه عالشغل ومرات برجعه عالبيت , لما نزلته ع الكورنه تبعت شارع بيته كنت عارفه انو راح يحتفل بالعيد تبع 4 اوف جولاي , لانو حكى مقررين يعملوا حفله , وطلبت منه اد بشرب يتصل عليا , مع اني طوال الاسبوع احكيه بس تشرب اتصل عليا , حكى لأ , ب لما نزلته حكتله بتشرب اتصل عليا , واخيرا حكى اه , اللي بعرفه عشان وجع معدته ما بشرب هاد شو كان يحكي , مكنتش اصدك , بس طلع عنجد موكف الشرب وانا اللي خليته يرجعله ههه

اتصل عليا وحكالي هاي انا طالع عالمنطقه كيت ما كيت مع قرايبي واستأجرنا فندق , كان المشوار تلات ساعات , حكتيلي اد بشرب اتصل عليكي , هيني رايح اشرب برجعلك , ما بتصدكوا الحماس اللي كان جواي لما اسمعت هالحكي والانبساط وانا كاعده استنى بتلفونه وهو طافي , شو صار حكي بالتلفون اللي صار بينا , اللي ضلينا نحكي من المغرب لصلاه الصبح تاني يوم ؟!

السلام عليكم ..~

7\30\2020 ..~

مسا السبت

||

مش عارف شو احكي عن حياتي ؟! فش اشي حلو صاير فيها , وكل ما افكر بعمري والسنين بتمشي وانا مكاني لا متجوزه ولا مخلفه بنجن اكتر وفوك كل هاد صاير عليا دين مبلغ مرتب والشغل اللي بشتغله مش مساعد اسده للدين , لأ والاطكع كمان اني شايفه حالي بلشت اوكع في رؤول كله لانو بحارب حاله وبحارب مشاعره ..~

حبي بالضفه وعايش مع اهلي , اتعرفت ع شب بخصوص زواج وما زواج ومش عاجبني شخصيته , شايفه من النوع اللي بده زواج الحب وكلشي ببلاش بمقابل الحب وما حب , ومش علينا يا مندلينا ؟؟~

ساده اكل قتله مرتبه مش عارف من مين , واجى عالبيت مريض ومتصاوب وذنين مشطبيّن وضعيف , وكعد يومين بالتخت ومتوجع , امبين قطط الحاره مطعمينه قتله وكديش خوفت عليه ..~

مشتاكه لاخوي واحد بدكم الصراحه , ومبتدعه عن ربنا استغفر الله العظيم يا رب ترجعني وتثبتني ؟؟~

شغلي في الراس منيح بس مش طايك اغناسيو , وحتى مرات روؤل لانو صاير لئيم ودايما امبوز وبكدرش امزج معه واختي اللي بتفضحني كدام اللي بشتغل معاهم ..~

اما شغلي في بانيرا الحمد لله يومين او 3 بالاسبوع بس , مرات بعمل اغلاط بس بنفس الوكت ماشيه فيه , المنجر الجديد اللي مش عارفه اسمه منيح معي , بس بنفس الوكت صرت ما ارتاحش بوجوده من تطليعاته وزناخته ..~


|

اخر مره حكيت لما رؤول اتصل , الليله اللي اتصل فيها عليا يوم ما رجع للشرب بعد فتره طويله حكالي انو معجب فيا , كان بدايه شهر سبعه ,وانا كنت اعرف انو معجب فيا , بس بنفس الوكت بعرفه هو النوع القوي اللي بمشي بمشاعره وبوكفها , لهيك كنت بدي يحكي معي وهو طافي مشان اشوف اد لسا معجب فيا ولا لأ , ليش بدي اشوف ؟ لانو بدي يوكف اعجابه مشان اعرف اتصرف بحريه انو ما اجرحه , لاني صبيه لئيمه وبستمتع بهاد الاشي , بس بنفس الوكت مشان بنشتغل مع بعض بديش يصير اي حزاز بينا , لانو بساعدني كتير بالشغل واد صار حزاز يعني فش مساعده ..~

بالاول حكى بطريق ضرب مثل انو اد بدي اصاحب او اطلع بموعد بطلع مع اي حد؟! حكتله بتعرف انو بس بدورع شباب مسلمين , وبعدها ضرب مزح انو حرام اصاحبه وبعدها بلش يحكي شغلات انو عنجد معجب فيا , بس كان بضحك وبصوت عالي , كان مبسوط , وهو مع الزمن اكتشفت انو احب شخص عندي بين كل الاصحاب اللي بشربوا , لانو جد جدا لطيف وهو طافي وبكون جد مبسوط ومبتسم لابعد حد , لهيك بحب اشوفه وهو طافي واحكي معه ..~

والاشي اللي خلاني استغربه انو معجب في طولي , وانا صبيه قصيره وناصحه , وبعتز بالنصاحه لانو الاشي اللي بميز البنات من الشباب , اد بسمح كلام اعجاب من حد , بكون دايما عيوني هاد اول شخص بيجي بيحكي عن طولي , ولما حكتله لأ , وانت عارف ليش لأ , انو ليش ما بصاحب , وكتير حكي صار ناسيه نصه , بس اللي بتزكره كنت كتير مبسوطه وهو يحكي معي , كان يزعل ويحكيلي انتي رمتيني كدام الباص ولا سألتي بنفعش تعملي هيك تلعبي بمشاعر الشباب وتمشي معهم لوكت ما توصلي لقبل النهايه بشوي وترميهم , وبالزبط هاد شو ! زي ما بتعرفوني وزي ما تعودتي عليا بالمدونه , بكون جدا صريحه بمشاعري وتصرفاتي ..~

انا هاي الصبيه اللي عالواقع وحتى عالنت بلعب , بحب اللعب بس مش لدرجه العب بمشاعرهم , الكل حر بمشاعره , معنديش المقدره اتحكم بمشاعر حد , بس بوعدش حد , كل اللي عليا اعمله هو اني اتصرف بطبيعتي , وامبين كلهم بحبو طبيعتي , كتير اجاني كلام من الشباب انو وكفي ضحك , او قصي شعرك , تلبسيش هيك , ما تتطلعي عليا هيك بعيونك , التكبر اللي عندك مميز , يا غريبه ومجنونه , ليش ما تكوني طبيعه زي البنات العاديات , تحكيش اللي براسك ,بس برجع وبعمل اللي انا بدي اياه وهو اكون انا ما اغير حالي , وما تفكروا هاد الاشي بساعدني بحياتي, هيني لحالي ومش متجوزه لانو كلهم بدهم صحبه وحب , وانا بدي استقرار ..~

كعد طوال الليل وهو يحكي معي , كل ما ينشغل مع اصحابه وقرايبه يحكيلي برجعلك , ويرجع , ويفتح الموضوع وااحكيله لأ وفش مستقبل بينا , ويبلش مرات يعصب ويحكي حكي مش منيح , يسب ويغلط وبعدين يحكيلي عادي ارجع اتصل عليكي , احكيله اه , يروح يغيب شوي ويعاود يرجع يتصل واول كلمه يحكيها , " انتي زعلانه ؟" احكيله لأ وعنجد ما اكونش زعلانه لانو عارفه انو طافي , وعارفه انو متوجع شوي لانو انرفض مني , قضينا كل الليله هيك لوكت ما اوصلت لمرحله انو خلص بدي انام , وروحت نمت , واصحيت ع تلفون منه يمكن بحدود التسعه او عشره الصبح , وكان تلفونه انو سامحيني مش كاصد الحكي اللي حكيته وانو يا ريت متكونيش ازعلتي , لانو بصراحه عجب بالحكي معي , بس بعرف حالي متفهمه لابعد حد مع اللي بشربوا , وانا اللي طلبت منه يتصل عليا وهو طافي ..~

كعد باليومين اللي وراهم يحكي معي مسجات خفيفه جدا , حسيت انو ندم وخجل انو حكالي , وكان عليا عطله 3 ايام ورى بعض , عشان عيد ال 4 من شهر 7 هان , وهو احتفل يوم الاثنين ومكانش علينا شغل , لهيك ما شوفته الا يوم التلاتاء , بس يوم الاثنين بالليل بعت مسج اد بنفع اجيبه من بيته عالشغل معي , حكتله اه ,حسيتها حركشه , لما روحت اجيبه الثلاثاء ,, كنت خايفه انو يصير اي حزاز بينا , بس اتعامل معي جدا عادي وما اعطه للامر اي اهميه ولا كأنه صار ..~

بعدها باسبوع , حكى معي مره بالعطله السبت وحكالي انو لو نطلع عالشط مع بعض , ما ارضيت , يوم الاثنين بعد ما خلصنا شغلنا , حكتله نروح عالشط مع بعض ؟ كنت متأكده انو راح يرفض عشان هيك سألته , بس ينعن شكله ما رفض , لهيك روحنا عالشط عالمحيط اللي بحبه والمكان اللي بحبه , واحنا واكفين اعلى الجبل حكتله شايف الكرسي اللي غاد ؟ بدك نروح غاد ؟ مشوار طويل , بس مكان مش كتير عالم بروحوا عليه وانا بديش حد من قرايب ازواج اختي يشوفوني وادخل بمشاكل مع خواتي , لليوم خايفه يكون حد شافني واعبر مشاكل كبيره كبيره مع خواتي , اني طالعه مع شب كافر ! ف روحنا عالكرسي وضلينا ساعات وساعات نحكي ونحكي , كان التاريخ 11 شهر 7 ..~

اليوم اللي وراه كان وجهي احمر ! انا صبيه حساسه جدا للهوا تبع المحيط وللشمس , ومكنتش حاطط واقي , وغير انو انا ومعاه بالشط امي كانت تتصل وبديش اكزب عليها لهيك مكنتش ارد على تلفوناتها , بكره الكزب ,وبعدها لما رديت عبرت بمشكله كبيره مع خواتي انو ليش بردش ع تلفون امي وانو الكل انشغل باله عليا , شو بعرفني عن امي الله يخليها بتتصل عليا عشر مرات باليوم واد رديت ع 9 مرات وما رديت ع المره العاشره بعبر في مشكله معاها ومع ابوي ومع خواتي , خواتي اللي بيحكولي امي بتجننا وهي تتصل علينا واحنا مش فاضين نحكي معاها , وابوي اللي بحيكلي انتي خليتي امك مريضه عشانك ما رديتي ع تلفونها , وهي اللي بتحكيلي مرضيني وليش بترديش شو صاير معك ومش حاكيه, لهيك صرت اكزب عليها , شايفين كيف بخلونا نكدب ! عشان مره ما رديت ع التلفون , عشان مره اجبر قلب مكسور , عشان مره اروح عالشط مع شخص ..~

ف زي ما حكتلكم وجهي بصير احمر , لهيك لما روحت تاني يوم عالشغل , الكل حكى مال وجهك احمر , حكتلهم ما بعرف اصحيت لكيته هيك , واختي فضحتني كدام اللي بشتغل معاهم انو مريم ما رديت ع تلفون امي وطلعتني قليله احترام , احب ما عليها اطلعني مش منيحه وعاطله عشان هي تكون المنيحه , وكعدت تحكي حكي ورؤول كان يعمل حاله مش موجود مشان ما يحسسني اني منحرجه كدامه , لانو بيعرفني بحبش انحط بمواكف الكدب , وكان يحكيلي اد هالاشي اللي هو نطلع مع بعض بخليكي تكدبي وانتي بدكيش بلاش , اظن مره راح احكيله بلاش واشوف شو راح تكون ردت فعله لانو بحكي عكس اللي جواه ..~

بعدها بيومين , اتصل عليا وكنا مخلصين شغل وراجعين عالبيت , اظن بحوالي ساعتين , اتصل عليا وكان صوته مش عبعض , ناسيه شو صار حكي , بس اللي بتزكره انو سال اد بنكدر نطلع ك اصحاب يا مريم ؟! وانا المره الوحيده اللي اطلعنا فيها عالشط قبل يومين حكتله تسألش مره تانيه انو نطلع مع بعض هاي اول مره واخر مره نطلع مع بعض لانك سألت اكتر من مره , ف خلص ارضيك وانتهينا , لهيك لما سأل حكتله بفكر فيها , وسكر الخط وراح , بس نبره صوته من مره مش منيحه , كان يوم الاربعا وكان 13 شهر 7 ..~

لهيك ارجعتله بمسج انو يعني بدك تطلع هلكيت يعني وانت منيح ؟ حكى اه هلكيت ! كان في اشي مش طبيعي معه , حكتله مسافه الطريك , كيف واكفت اطلع ؟ كيف ما فكرت مش عارفه ؟! يمكن لانو حكالي ك اصحاب ؟! وانو مش معجب فيا وكلشي انتهي ؟! بحكيلكم شو صار بهاد اليوم بعدين ..~

المهم انو خلص بطلنا نطلع وحكينا خفيف لانو وكف شرب , وامبين انو الشرب هو اللي بخليه يحكي معي , اما وهو صاحي ولا بسال عني , حتى بالشغل , ومرات بنبلش الشغل وبكون بوزه شبرين كدامه وكديش بكره هالاشي , اكره ما عليا اشتغل مع ناس ما بضحكوني , عاد نشوف شو الايام بتجيب ؟!

السلام عليكم ...~

عصر يوم الخميس || 10\20\22 .~.


|||

زعلانه ع الاوضاع اللي بالضفه وما في الا الدعاء , واللي زاد الطين بله هو رؤول راح يترك الشغل , يمكن خلال اسبوعين يختفي , اد انا لسا بفكر في مايكل لليوم , مع انو سواق الشاحنه ارتولوا , كتير منيح وسريع , بس مايكل كان دايما يبسطني ويضحكني ومش نكد وهاد اكتر اشي مشتاق ..~

رؤول علاقتنا صارت اقوى وتجاوزت الحد , ايام مش طايكته وبنتكاتل وبنكعد ساعات ما بنحكي ومرات يوم كامل واكتر , بس بالاخر انا اللي برجع احكي معه لاني بتزكر كل منيحه معي , ومع هيك بكره حالي لاني بعمل هاد الاشي لانو بنفس الوكت بعملش اشي الي , الاشي المنيح فيه هو ببسرعه بسامحني , يعني لو اتكاتلنا وروحت احكي معه وامسح سوء الفهم عطول بنسى الطوشه وبرجع يحكي ولا كأنه صار اشي , وانا نفس الشي لما ازعل منه واتكاتل معه واتحلّف مش راح احكي معه وراح اعاقبه , بس ما بهون عليا زعله , لهيك لما يحاول يتحركش فيا عطول بنسى الطوشه وبرجع احكي معه ..~

تجينا ايام نضل من الشغل عالشط لليل , بين مكاتل وضحك وحرد وزعل وعياط , ايام لتوصل لاسابيع , وبين وجع معدته من الشرب ويكون طفيان ومكدرش امسك حالي من الضحك عليه , والاسرار اللي اسمعاها منه , كل هاد راح وراح يروح بزيادده , اظن من الدعاء انو يا رب تريحني من الشب وما ادخله جواي مشان ما يخاب ظني ..~

اكيد راح ازعل بس بنفس الوكت اتعلمت انو الناس بتيجي لتروح , واتعلمت انو الدنيا بتاخد كل حد بكون ونيس الي وكت الملل , اتعلمت كل سنه راح اخسر حد , اتعملت الكل بمشي وانا بمكاني , بس هالمره الخبطه راح تكون اخف لاني بلشت استعد لغيابه !

صارلي اسبوع بس علاقه شغل مش اكتر , لا في شط ولا في دار ولا في سياره , لا في طلبات ولا اساله , واتعلمت التوتر والتفكير بمرضني اشهر , وانا لسا من اخر خبطه لسا بسمعش في ذاني والصوت الزن اللي جواها اللي مش راضي يروح , وبدي اتحمل كل فركه ذان بتصيبني من الدنيا , لانو نصيب ..~

نصيب يا مير نصيب , احتبارات عم تخسري فيها ..~

متبكيش || نور الدين طيار ونصري


||

السلام عليكم ..~

ليل الخميس || 10\27\22 ..~


بكرا عليا شغل بس بديش اروح لهيك سهرانه , راح احكي عن اسبوعي , من الاسبوع الماضي معروف انو رؤول راح يترك الشغل , بس لما اجى هاد الاسبوع فش حكي منه انو راح يترك الشغل , وما سالته لاني كل اللي براسي انو انتهى , لهيك يوم الاثنين صار اجتماع من فينسا النا كلنا , كل اللي بيشتغلوا , بس اغلب الحكي عن اللي بيشتغلوا بالمحزن , اللي هو احنا الخمسه مع صبايا تانين بيشتغلوا ع السبعه , احنا الخمسه اللي بنشتغل ع 4 الا ربع او ع ال3 , حكيت عن اي ساعه بنبلش بمشاركات كديمه ...~

ماشي كان كل الكلام موجه الي و رؤول عشان احنا المسؤولين عن المحزن وعن البنات , احنا اللي بناكل البهادل عن كل اغلاط البنات , احنا اللي لازم نشتغل مع البنات مشان يخلصوا اللي عليهم بالوكت المحدد , ولانو احنا الاتنين اللي دايما براقبونا بالكميرات , شو بنعمل , ولو غلطه صغيره عملناها نهايه الدنيا عند المسؤولين الكبار اللي هم اكبر من فنيسا واللي هي اسمها ايجاكي , يعني ابسط مثال ليش بناخد كاسه كهوه معانا ع المخزن ؟! ممنوع ! بفهموش انو بنبلش شغلنا ع ال 3 الصبح ويالله يالله نكدر نغسل وجهنا قبل ما نيجي عالشغل ..~

وابسط مثال كمان انو اول ما ندخل المخزن ليش بنوكف دكيكتين نحكي انا و رؤول ؟! بفهموش انو كل اللي بيشتغلوا في شفت الليل برموا كل الشغل علينا احنا شفت الصبح , لهيك ما ندخل المخزن بنكعد نفكر انا وهو من وين نبلش وشو نعمل ونكسم الشغل ..

وابسط مثال لما شفت ال الاربعه الا ربع يدخلوا ع المحزن ويبلشوا يصبحوا ع بعض ونحكي كديش الكراتين اللي جايين بالشاحنه وشو اللي جاي ؟! انو احنا بنوكف بدون ما نشتغل !

بحسبوا علينا كل دكيكه ع معاش زفت وواطي , لانهم عنجد اشي غريب فيهم انو بس بضلوا يطلعوا علينا بالكميرا والتسجيل , بس بيجيوا يفتشوا علينا بالكميرات شو عملنا بالايام اللي كبلها والساعات هاي وهاي وبيجوا يتفلسفوا ع فنيسا وهي بتيجي بتحكي عن كل الاغلاط وانو لازمما نعيدها !

كل اللي حكت عنه مش سألين عليه بكل صراحه عم احكيلكم , كنت اتكاتل مع فينسا لانو كل الكلام اللي بسمعه منها مش طبيعي , اسمه تعجيز , وبالاخر هي زهكت وانا سكتت لانو محدش وكف معي حتى رؤول كان ساكت , كانت اختي فيث و انجيلا واكفين معي ويحكوا معي , ومن وكتها يحلموا انو ما اخد كهوتي اشربها بالمحزن , يحلموا ما اصبّح ع صاحباتي واطمن عليهم كل صبح , يحلموا ...~

خلصت شغلي وبعد الشغل انا وفيث حكينا نروح عند اختي هوبز نفطر ونشرب كهوه , طبعا الاجتماع كان طويل وانتهى بانو الكل كان زعلان , وانتهى ع ميعاد ترويحتنا من الشغل , لهيك ما حكينا عن الكصه مع بعض ’ حكينا كلنا فيها مع بعض تاني يوم ’ بس بنفس اليوم اجاني تلفون من رؤول وحكالي انو ضروري بده يشوفني , وانا بديش اطلع معه , بس من صوته حكيت الوضع صعب معاه , اتفكنا واطلعنا ,,~


كان شربان زي عوايده , وكان زعلان ويحكي ويحكي عن الاجتماع , كعد ساعتين يحكي ويحكي وانا اسمع وازهك من سمعه واحكيله ازهكت من الكصه اللي بتعيد فيها وانو خلص اخرس , وصار حكي تاني عن شغلات تانيه , وانا معه بتيجيني مسجات او تلفونات من اصحاب ومعارف , واجاني مسج انو حد بعرف اتوفى , وانا اتغير وجهي واخدت فتره هيك مسطوله , هلكيت اللي بعرفه هو معرفه بعيده , بس انا عندي نقط ضعف الموت والصحه , هدول كتير بأثروا عليا حتى لو بعاد ..~

هو سال مالك وبحبش احكيله اشي , لانو هو مش صديق , انا صديقه جدا عنده لانو كل ما يحتاجني بلاكيني عكسه تماما , ولا عمري بلاكيه لهيك ما بحكيله اشي عن حياتي , بحكيله بس عن حبي لانو مره سال عن قلوب محطوطين بسيارتي وحكتله من حبي عشان ما يفكر يحبني , ماشي مع الحكي حكتله يا رؤول انا بخسر ناس وصعب خساره الناس خاصه لما يموتوا , هو حكى انو خسر سته اللي هي جدته ام امه يوم السبت , واحنا كنا يوم الاثنين , يعني من يومين بس !

انا راح احكيلكم اشي , علاقتنا كبرت لما ماتت عمته من حوالي اظن 3 اشهر او اكتر , كنت حواليه بكل اشي وبكل وكت , ليل نهار بالشغل وبعد الشغل وبالايام اللي ما كان يجي ع الشغل , كان محطم لدرجه كبيره , بتزكر يوم العزا , طلع من نص العزا وكان سكران اشي مش طبيعي , وحكالي تعي خديني وكان انا عليا شغل في بانيرا , بس ضل يتصل ويتصل , لغيت شغلي في بانيرا وحكتلهم بكدرش اروح عالشغل , وروحت جيبته , وكانوا كل اهله يضلوا يتصلوا عليه ويحكوله تعال وتعال وارجع , وكان حاشر دموعه اشي مش طبيعي , وضليت طوال الوكت معه , وحكالي ع كد ما انتي كتير لئيمه بس بتهممي وعندك حنيّه .

اسمعوا انا بعرف حالي لما حد يموت او الصحه مش ع بعضها اه بيطلع مني حنيّه واهتمام للاشخاص اللي خسروا او مرضوا , وما بتشوفوا مني الا كل منيح ومحبه وظهر وكتف , اظن هو عرف هاد الاشي عني , لهيك الاثنين بده كان ظهر وكتف حكالي انو خسر جدته , وانا حطيت حزني ع جنب ووكفت معه وانقلبت للصبيه المنيحه عطول معه , وحكالي انك يا مريم انتي بتحبنيش , حكتله اه بس بهاد الوكت بوعدك احبك ليوم , هو بيني وبينك مستحيل احبه بس اطريت اكزب واحكيله اني راح احبك , واتعامل معك ع صبيه بتحبك , وبالزبط هاد اللي صار !

تاني يوم الثلاثاء كنت صبيه معجبه برؤول انو كتير كتير منيحه معه واسمع كل كلامه واعمله كهوه واكل واتصل احكي معه واطمن عليه وكل هاللعب عشانه وعد , بس كان عليا بانيرا , الاربعا , كنت منيحه معه احسن واحسن , كانت الابتسامه والضحك معبي وجهه والدنيا مش واسعاه , لوكت ما اجى وكت البريك تبع الاربعه الا ربع , وبالغلط حكى اشي عن امه انها بالدار ؟؟! ايش يعني الغريب انو امه بالدار ؟! لانو الاثنين حكالي امه راحت سافرت ع المكسيك عشان امها ماتت ؟! حكيت يا بنت ليش تشغلي بالك يمكن رجعت .

اجى اليوم اللي هو الخميس , كمان صار نفس الاشي بالبريك وهو حكى , امي كانت تحكي مع جدتي ع التلفون وصار هيك وهيك ! ايش عم يحكي هاد؟! معناتن جدته مش ميته ؟! بكزب ؟! مش غريبه مكل الشباب بكزبوا , بس مش بالمووت؟! وهو ما عنده الا جده واحده , لانو التانيه ماتت من وهو صغير ! نرفزت وحكيت اترك الكلام للزمن , ما صار وكت من مره انو نكون انا وهو لحالنا مشان اواجه الكداب , انا خسرت اغلب صحابي من الكدب , ولك كون عندك الجراه تغلط عليا بوجهي ولا تكدب بالمنيح عليا , بس روحت ع الدار واعرفت ميعاد ترويحته , اتصلت عليه .

صوتي ع البلفون معصبه وبدي اقاتل , لهيك سالته معك دكيكه اسالك هالسؤال عشان ما يصير سوء فهم , حكى لا انا شوي مشغول بس شو في ؟!حكتله معك دكيه ولا لأ , رجع سال ليش؟! حكتله باي وسكررت البلفون , رجعلته بعد بنص ساعه , وعطول سالته ؟ جدتك ميته ؟ ماتت السبت الماضي زي ما حكيت ؟! حكى لأ بس وصلت لمرحله انو تموت , حكتله ما صار اشي انا اتعلمت درس يلا باي . رجعلي وحكالي تنسيش الموعد تبع الشغل بكرا , حكتله مش جاي ! حكى ليش ؟! حكتله بديش اشوف وجه , رجع سال ليش؟ حكتله بديش اتكاتل يلا باي

عشان هيك بديش اروح ع الشغل بكرا , لاني جد بديش اشوف وجهه لاني راح اكون حيوانه معه , وبكدرش اخبي تصرفاتي معه وبديش تطلع كدام الصبايا , بس بنفس الوكت هاكل هم اختي فيث انو تشتغل دبل شغل لحالها لانو هيك بعمل معاها لما اغيب , وانا صبيه ما بغيب ولا مره غيبت الا لما انكسرت اجري , بس كل ما بدي اغيب واكمل نومتي بتصلوا عليا بحكولي تعي , بس بكرا عالاكيد ما حد راح يتصل عليا لانو فش كتير بضاعه بالشاحنه ف بدبروا حالهم بدوني , لهيك سهرانه لانو راح انام واشبع نوم

السلام عليكم ..~

2\10\23

عصر الجمعه .. يالله زمان .. يالله كديش الوكت بمشي بسرعه وانا مكاني يالله ع الحياه!

ابصر كم صارلي غايبه . يالله حاسس كأنه امبارح لانو متغيرش اشي بحياتي واكفه , كلشي سيء صار وبصير, الكل بمشي بحياته وانا حياتي واكفه , وبرجعو وبحكولي انو مش النصيب , انو اختياري واللي بصير فيا من ايدي .

بشو ابلش باالاخبار البشعه , ابشع اشي صار هو انا هلكيت مخالفه في امريكا , اخدوا مني الكرت الاخضر ومعيش ورق وبقدرش اكدم ع شغل جديد , لهيك لسا بنفس شغلي اللي كسر ظهري .

رؤول انطرد من الشغل وكديش زعلانه وبنفس الوكت مرتاحه , لانو اتعمقت علاقتنا كتير وبنفس الوكت خربت كتير , كتير في ايام حلوه كانت بينا وايام يالله شو بشعه , وباخر ايام كانت كتير كتير بشعه لهيك ارتحت انو انطرد من الشغل , عندي هاد الاحساس انو هو من الاغلاط الكبيره اللي عملتها بحياتي .

الاشي الوحيد انو فش عنا شب يشتغل وانو الشغل كتير متعب وانا والمنجر نايموي كتير انهدينا من وكت ما طردوه , مرات بشتاق لوجوده , بس بدي وكت لانو الوكت بنسي , بس هيني ما انسيت مايكل , كل فتره وفتره بسأل السواق ارتورو اد بشوف مايكل او بعرفه ولحد الان ما شافه ولا بعرف عنه اشي , بس مايكل غير , ولا مره عمل اشي زعلني ولا مره , هو من الشباب بحياتي اللي جد فش غلطه واحده عملها معي , عكس رؤول اللي عنجد بس افكر 90 % اغلاط معي , بس يالله اتعلمت درس بشع بالدنيا .


خربت سيارتي ولسا هيني بسوكها وهي خربانه وبعمل تصليحات ومحدش عارف شو مالها وانو كل ما نصلح اشي لسا مش زابطه .

حبي بحكيش معه وندمانه اني تركته وغايبه عنه , يالله كديش مشتاكه والزمن حكالي انو فش بعده , كيف الواحد بنسى غلط عمله وندمانه عليه وبتمنى انو ما صار , كيف امشي بعزه نفس وانا عارفه حالي اني غلاطه .