وَ مَضيتُ وَحْدي فِي الطَريق. قدْ جِئتُ أبْحث عَن رَفيقْ ضَاعَ مِني مِن سِنينْ.. قَد ضاع في هذا الطريق ..َ

( 18 سبتمبر )

بداية دوامي بكلية الطب ، بدأنا بأربع محاضرات تتكلم عن القواعد والأنظمة وطريقة المذاكرة bla bla bla ، طبعاً محاضرات ماكانت tdih الفايدة لان ماحد يطبق هههههه .
أخذنا بريك ساعة ، صلينا بعدين كان فيه تنس طاولة فوق ، فقررنا ان نسوي دوري ونلعب ..
طبعاً طلعت من اول مباراة ههههههه .
شوي الا جانا واحد أكبر مننا من دفعة سابقة ، فقرر ان يهايط علينا عبارة انi احترافي بالتنس بحكم انه موجود بالكلية قبلنا .. الا انه تفاجأ بان صاحبي كسر راسه وفاز عليه بفوز مستحق ^^ .
اخر شي توزعنا على مجموعات ( عشان نناقش قضية طبية ) الا ان صادفنا واحد معنا في القروب من السنة الماضية راسب .. لذلك عقدت العزم ان اشد حيلي ضعف الي كنت ناوي اسويه باذن الله لان الوضع يخوف .

كان يوم سلسل ومتعب بعض الشيء .. وغدا أفضل بإذن الله .

شكراً لكم .

(21 ديسمبر )

قبل يومين جابوا لنا شخص ممثل انه مريض (عطوه سكربت و اعراض مَرضيه ) بحيث اننا من خلال اعراضه و تاريخه المرضي نشخص حالته ونعرف المرض الي فيه و نعالجه ..

طبعا مسكين جايبينه وحاطينه قدام حوالي 200 واحد (بين اولاد وبنات ) يسألونه اسأله مرضيه متخيلين الوضع كيف ؟!
طبعا جايبين واحد من مدينتنا نفسها .. ف نكلمه عربي كنا والدكتور هندي ف مايعرف عربي .، ف قام يطقطق علينا ونطقطق عليه والدكتور مايدري شالسالفة ههههه

الزبدة الرجال طلع عنده التهاب بالحلق ، بس الدكتور لازم يطول السالفة ، في عطانا اسم مرض (هو بالأساس التهاب حلق ولكن بإسم كشخة عشان يكون اسم علمي عبارة ) .

كان الوضع صعب شوي و ممتع ، غيرنا ع جو الدراسة

شرايكم انتوا ؟ لو يقولون لكم مثلوا دور مريض ونعطيكم فلوس تقبلون ؟

الى اللقاء .

(22 ديسمبر )

امس كان يوم غريب ..،
اخبرت فيه اول اختبار بروقرس ( اختبار طبي يختبرون فيه جميع طلاب الطب بمختلف سنواتهم ، يهدف الاختبار الى تحديد مقدار معلومات الطالب الطبيه )
المهم ..
الاختبار كان حوالي 191 سؤال و مدته 4 ساعات ..
طبعاً حليت انا 14 سؤال منهم ههههه
كان معظم الإختبار تشخيص لأمراض - شي لسى انا ماأخذته - يعني لطلاب السنوات الي اكبر مني .
الزبدة ان جاء سؤال صعب لحس مخي وخلاني اضحك بنص الاختبار .

السؤال يقولكم :
في إمرأة عمرها 80 سنة ، طاحت من فوق الدرج وماتت .. والدكتور بعد ما ماتت شاف ان فيه كسر بجمجمتها ..
السؤال هو هل الوفاة تعتبر :
A .وفاة من مؤثرات طبيعية .
B. وفاة من مؤثرات غير طبيعية .

شرايكم شتعتقدون الجواب ؟!

(4 اكتوبر )

اهلا وسهلا ..
صارت معي اشياء كثيرة خلال الفترة الماضية ، وانشغلت بالمذاكرة ولا قدرت اكتب ..

المهم ، خليني اقول لكم احد الأشياء الي حصلت ..

قبل فترة . كان عندنا بريك بالجامعة ( عادة يكون ساعة ) طلعت من الجامعة انا مع ثلة من الشباب ..
تداولنا اطراف الحديث ، الا ان واحد منهم يقولي ..
حسين .. انت اكثر واحد مستانس بالدوام هالسنة .
قلت له ليش ؟
قال من بدأت هالسنة واحنا نشوفك تضحك و تبتسم .. غير السنة التحضيرية كان طوال السنة ماكنا نشوفك تبتسم ابد .. لدرجة ان بعض الناس قاموا يتكلموا عنك وبعضهم فكروك نفسية ..

انا وقفت للحظة ..
وتذكرت كلمة قالها لي معلمي بمتوسط ..
قالي مره : ( انا ودي اشوف هالولد - يقصدني - مو مبتسم .. ماشاء الله عليك كل مبتسم وتضحك وعندك الدنيا وناسة )

ف تيقنت ان الضغط النفسي -مهما كان - قد يجبر الشخص بعض الاحيان ان يغير طبعه .، ويخليه انسان اخر ، ويخرج اسوأ مافيه ، ويجعله بدوامه من الإحباط .
ولكن المفروض يبذل جهده بأن يفصل ضغط الدراسة عن التواصل مع الناس لانهم ببساطة مالهم ذنب يشوفون واحد مكشر بسبب هم مالهم دخل فيه .

اعتذر .. تخيلوا ان في رموز والوان للكتابة وكذا ^ لان ماعندي وقت انسق هههههه

شكرا لكم .

5 اكتوبر .

الأسبوع الجاي بالجامعة بيكون مريح جدا ماراح ناخذ الا 3 محاضرات تقريبا طوال الأسبوع ..
بس مو لان الجامعه تحبنا مسويه كذا ههههه
الجدول الاسبوع الجاي خفيف لان الاسبوع الي بعد عندنا اختبار ميدتيرم .
والله خايف منه .. لان السنة الماضيه كانت سنة سيئئة دراسيا بالنسبة لي ..
وأكره شي لمن تشوف ناس اقل منك مستوى يجيبون اعلى منك درجات ..
بس لان كانت نفسيتي سيئة ومافي احد امشي معاه و كل شي جديد بالنسة لي .. ف كل هذا اثر ع مستواي الدراسي ..

ف من بداية هالسنة وانا شاد حيلي واذاكر اول باول ومعزم اني اجيب دراجات عالية باذن الله .. ف أسال الله سبحانه ان اجيب الدرجة الي ابيها بالميدتيرم و ارجع الثقة بمذاكرتي وبنفسي يارب .

ولكن خايف ان مااجيب الدرجة الي ابيها ويضيع كل تعبي .. ولكن الله كريم.

دعواتكم يااخوان

المشاركة الأصلية كتبت بواسطة d.snake

(22 ديسمبر )
السؤال يقولكم :
في إمرأة عمرها 80 سنة ، طاحت من فوق الدرج وماتت .. والدكتور بعد ما ماتت شاف ان فيه كسر بجمجمتها ..
السؤال هو هل الوفاة تعتبر :
A .وفاة من مؤثرات طبيعية .
B. وفاة من مؤثرات غير طبيعية .

شرايكم شتعتقدون الجواب ؟!

فيه اثنين ردوا و واحد منهم توقع اجابة ولكن للاسف غير صحيحة ^_^ .، شكرا ع مشاركتكم اعزائي
نجي للشرح ..
الوفاة من مؤثرات/ اسباب طبيعية ( natural causes) :
هو لمن يموت الانسان من موته متوقعه بسبب مرض معين او فشل عضوي (غالبا لايمكن الوقاية منه ) ، مثال يكون عنده سرطان ، امراض بالقلب ، داء السكري ، او جلطة بالدماغ ..الخ .

اما الوفاة من مؤثرات/ اسباب غير طبيعية ( unnatural causes)
فهو على العكس .، يكون فيه عامل لموته واضح ، مثل ان يموت الانسان من طلقة نار ، جرعة زائدة من الدواء ، او الانتحار ..

نرجع لسؤالنا ..
أجابنا عليه احد دكاترتنا ، الاجابة هي (ب) .
ماتت من اسباب غير طبيعية
، يعني تسببت بومتتها بنفسها - على مااعتقد -
اكثر من كذا مااقدر افصل اعتذر ..
لان هالسؤال للمتقدمين عمراً مني بالطب ومابعد نأخذ هالاشيا ، ف ماعندي تفاصيل كثيرة ، وماابي اعطيكم معلومات غير دقيقة .

شكرا لتفاعلكم مرة ثانية . ودعواتكم لي .

(12 اكتوبر)

(اللّهُمَّ اَنْتَ ثِقَتي في كُلِّ كَرْبٍ وَرَجائِي في كُلِّ شِدَّة وَاَنْتَ لي في كُلِّ اَمْرٍ نَزَلَ بي ثِقَةٌ وَعُدَّة كَمْ مِن هَمٍ يَضْعُفُ مِنهُ الفُؤاد وَيَقِلُّ فِيهِ الحِيَل وَيَخْذُلُ فِيهِ الصَّديق وَيَشمَتُ فِيهِ العَدوُّ اَنْزَلتُهُ بِك وَشَكَوتُهُ اِلَيْك رَغبَةً مِنّي اِلَيْك عَمَّنْ سِواكَ فَفَرَّجْتَهُ وَكَشَفتَهُ وَاَنْتَ وَليُّ كُلِّ نِعْمَةٍ وَصَاحِبُ كُلِّ حَسَنَةٍ وَمُنْتَهىٍّ كُلِّ رَغبَة..... )

كما قلت سابقاَ ..، هذ المدونة خصصتها عشان افضفض فيها ..

اليوم طلعت نتائج اختبار البروقرس - ( كما ذكرت سابقا ، هو اختباريقيس مدى معلومات الطالب الطبية ، يختبرون فيه كل طلاب الطب بمختلف سنواتهم ولكن نسبة النجاح كل سنة تختلف عن الأخرى ) - ، وللاسف رسبت فيه مع ان كانت نسبة النجاح جدا بسيطة (علما ان هذا الاختبار يقام 4 مرات في كل فصل ولازم انجح في 2 منهم يعني لسى بقى لي 3 اختبارات ) ..اول مره ارسب بشي كذا

ع العموم ، انا اكره ان احط اللوم ع اشياء اخرى واطلع اعذار ، خصوصا ان اغلب ربعي نجحوا فيه .
كان الاختبار في اول اسبوع دراسة و اول مرة اختبره ف اخذت فكرة عنه حتى ولو فشلت باول تجربه .

الشي الي يحزنني صحيح هو ان درجاتي كانت عالية بثانوي ، ولمن جيت الجامعه كل الي معي بثانوي يتوقعون ان درجاتي لسى عالية بالجامعه ف كل ما صار عندنا اختبار ونزلت درجاته يسألوني "كام جبت ؟" وانا اجاوبهم بحرج لين ما هم يستحون يسألوني عشان انا مااانحرج بالجواب > وهذا اكره شي مااحبه ، وغير كذا في شيين يضايقونني ، لمن اشوف الي اقل مني مستوى يصير يجيب درجات اعلى ( علما اني مااحب اقارن نفسي بأحد ) ولمن درجاتي تنزل تأثر ع نفسيتي و اكره اقول لاهلي ان درجاتي نزلت لانهم يصيرون يخافون علي اكثر مني .

الشي الي يضايقني صحيح ..اني اذاكر كثير بس مااجيب درجات عالية ،
مما جعلني اتسائل هل انا مناسب للكلية صحيح ام لا ؟!

ولكن ماراح اجاوب على هالسؤال الا اذا تفوقت وصرت افضل طلاب الكلية ..
عندها بقرر اذا انا صحيح مناسب ام لا ، غير كذا مافي مجال اني افكر اطلع بفشل
(هذا الوقت سيمضي ) و يوماَ ما، قريباً .. برجع حق هالتدوينة وانا متفوق بكليتي واضحك عليها ..

وبرويها كـ قصة كيف كنت فاشل وصرت متفوق - باذن الله -
.


ان كنت كملت قراءة حلطمتي ف شكرا لك ياعزيزي

(19 اكتوبر)

(مشاركة شكر فقط .،)

قبل كام يوم وصلتني تقييمات تثلج الصدر والله ..،

أحد الاشياء الجميلة بالمدوينة ان يكون فيه مثل هالناس وهالتعليقات الي ينبسط الواحد بس يشوفها ..
كنت توني طالع من الاختبار وشفت تعليق (سآيو ) ، عباراتها كانت جميلة جدا ، والكلمات كانت في محلها ، أدخلت السرور ع قلبي الله يسعدها ..ف شكرا من نياط القلب من الاذين الايمن تحديدا هههههه ز
وشكرا للجميع الي يعلقون و متحملين حلطمتي . هههه

ان شاء الله شوي بس بخلص لي محاضرة او ثنتين وبرجع اقول سالفة هالاسبوع

شكرا لكم جميعاً.

(20 اكتوبر )
و العُمر عِندي لحظة تتحطمُ الأسوَار فِيها.. و الجسُور
تتجسد الأفكار فيها و الشعُور
إن عاشها الإنسَان يوما ليسَ تعنيه الشُهور..

كان هالاسبوع طويل نوعا ما ، كان عندي اختبار ميدتيرم يوم الأحد و بريزينتيشن الأربعاء ،
ولله الحمد اختبار الميد كان كويس نوعا ما و ننتظر النتائج ,

الجدير بالذكر هو (بريزينتيشن الانتقام ) الي حصل بالأمس هههههه

خلونا نرجع شوي حول اسبوعين مَضوا ، كنت لاوم اسوي تقرير عن حالة مريض ( يجيبون لنا شخص بالكلية على اسا انه مريض و نسأله اسأله الى ان نقدر نشخصه بمرض ما و نقترح عليه علاج )
المشكلة وين كانت يااصحابي تتوقعون ؟
المشكلة ان على حظي الجميل - الي انا اذا صعدت بسلم هو ينزلني بمصعد - ههههه
المشكلة في ان المريض الي كنت مفروض اشخصه كان انسان معتوه ولا عرف يمثل دوره ف صار صعب علي أشخصه \: ..
ف رحت الفق انا ومجوعة من الأشخاص تقرير ملفق عشان اعرضه ع الدكتور واخلص من هالشغلة .، طبعا ماخلصت من التقرير الا حد بحد ،بحيث بنفس الدقيقة الي خلصت فيها التقرير كان الموعد الي مفروض اروح للدكتور واقوله التقرير ..

المهم لان المريض كان معتوه و التقرير صار معتوه انا بعض اسماء الادوية وبعض الاشيا ماعرفت اقولها عدل و ارتبكت شوي ، لان اصلا ما مداني اتمرن ع التقرير (ماكان فيه وقت ) صارت شغلة فاجأتني .
الدكتور المفروض يعطيني رأيه عن تقريري ، الزبدة قالي جملة وحدة (تفتقد للثقة بالنفس )
طبعا انا اول مره احد يوقولي كذا ، معروف ولله الحمد ان ثقتي بنفسي موجودة بس بسبب الظروف ارتبكت شوي ، طبعاً ظلت هالجملة تطن برأسي الى ان جاء هذا الأسبوع ..

هذا الاسبوع عندي بريزينتيشن و بيقيمني عليه نفس الدكتور ،
ف عشان اكسر عينه واثبت له انه غلطان تمرنت على البريزينتشن كثيير ، لدرجة اني سحبت ع المحاضرات وماقمت اذاكر محاضرات هالأسبوع ،
الى ان جاء يوم أمس وصار موعد البريزينتشن .. رحت بكل ثقة لنفس مرددا ( واثق الخطى يمشي ملكا ) متوكلا على الله سبحانه ..وقدمت عرضي .
وكان شي قوي ولله الحمد لدرجة ان الدكتور تفاجأ والطلاب تفاجأوا ف كأني قلت لهم ( سبرااايسز هذا انا )
الزبدة ان عطاني أعلى درجة بالكلاس ،درجة ماحد أخذها قبلي .
وبكذا حسيت اني انتصرت ، واثبت له انه غلطان وكسرت عينه هههه

ف الي حاب اوصله هنا ، ان احيانا نسقط قليلا ، لنرتفع عاليا باتجاه السماء



شكرا لكم ..

(26 اكتوبر)
(1)
ب ذِمَّةِ اللهِ ما ألقَى وما أجِدُ
أهذِهِ صَخرةٌ أمْ هذِه كبِدُ
قدْ يقتُلُ الحُزنُ مَنْ أحبابهُ بَعُدوا
عنه فكيفَ بمنْ أحبابُهُ فُقِدوا


اهلا وسهلاً ..
بتكلم عن موضوع مهم و لطيف ف جهزوا الشاي واستعدوا
.
.
.

قبل عدة ايام اخذنا محاضرة عن (سرطان الثدي ) - وهو أكثر سرطان منتشر بالسعودية بالنسبة للبنات - ، ف دكتورنا كان يشرح كيف يصير السرطان و ماهي خطورته و كيف الشخص يقدر يكشف عن نفسه اذا عنده او لا ( الكشف الذاتي ) ، المهم ..
واهو يتكلم ذكر قصة حزينة جداَ ..
لدرجة ان الدكتور بدأ فيها ، شوي ولا نشوفه اختصر القصة وعطنا نصيحة و تغير صوته و جاته زي الغبنه والحزن ، وختم القصة باستعراض الفائدة منها و انتقل سريعاً للعنوان التالي ..
بهالحظة تفاجأنا كلنا ، وكل واحد فينا من الطالب صار يطالع الثاني باستغراب و حيرة من تصرف الدكتور .
تتوقعون كيف بيكون سيناريو هذه القصة الي تأثر فيها الدكتور لهالدرجة؟

بذكر شاللي حصل بالرد القادم ، ولكن عطوني تخمينكم ^^
.
.
.