وَ مَضيتُ وَحْدي فِي الطَريق. قدْ جِئتُ أبْحث عَن رَفيقْ ضَاعَ مِني مِن سِنينْ.. قَد ضاع في هذا الطريق ..َ

المشاركة الأصلية كتبت بواسطة d.snake

(26 اكتوبر)
(1)

واهو يتكلم ذكر قصة حزينة جداَ ..
لدرجة ان الدكتور بدأ فيها ، شوي ولا نشوفه اختصر القصة وعطنا نصيحة و تغير صوته و جاته زي

(31 اكتوبر )

القصة كاتبتها المريضة بنفسها بالانجليزي ف بترجمها بالعربي ف لا تدققون واجد هههه

(قصة دكتورة امراض النساء ) :
" كُنت للتو عائدة مِن الخارج ، بعدما ذهبتُ مع اولادي لِتناول الغداء ، و عن طريق الصدفة شعرتُ به .
لا أعلم اهو مِن خلال حدسِ المرأة ، أو مِن خلال اختصِاصِي وتدريبي المِهني ، علمتُ ماذا يعني وجود ورم صغير في ثدي المرأة .
تفحصتُ العقد الليمفاوية الموجودة تحت منطقة الإبط ،أحسَسَتُ بوجود الورمِ هناك .
كان لا بد لي ن اتقبل الحقيقةَ المُرعِبة .
كطبيبة اختصاصية بأمراض النِساء ، كَشَفتَ على كثير من النِساء التي لديهن سَرطان بالثدي، ادركت ان الورم الذي تَحسستُه كان سرطان من نوع خطير جدا .
الفحوصات اكدت بوجود سَرطان الثدِي لدي ، وكان الأسوءَ والأخطر ،و في مرحلةٍ مُتقدمة .
كما لو انََ ذلك لم يكن يكفِي .. ، اضافة على ذلك، كان من اشرس وأخطر انواع السرطان .

بالنهاية ..
نصيحة من مريضة لكل الأطباء ..
كامرأة، كمريضة ، والأهم من ذلك ك طبيبة مختصة اناشد جميِع زُملائي بالحِرص على قيمة الوقاية المبكرة من سرطان الثدي .
من خلال وعينا وتعليمنا لمرضَانا ، يمكننا ان نحارب سرطان الثدي معاً .
هذا الشيء مهم لكي لا نخسر حياتنا فقط لاننا لم نقضي بضع دقائق للكشف على انفسنا "

قصة حزينة و مؤثرة جداً ،

فيه رسالتين هنا ،
الأولى : ان المرض لا يعرف احد قد يباغت اي انسان ، وهنا الشي المحزن جدا ان هذه كانت اختصاصاها أمراض النساء , و تفحص النساء لسرطان الثدي بالأخير جا لها المرض ، ف لاوم الوحدة تكشف عشان يُكتشف براحل مُبكرة ويتم علاجه .

الثانية : ان مهما بلغ الدكتور من العلم والمعرفة ، وتقدم بالسن ..
فهو يبقى انسان يتأثر بالمرضى ولديه أحاسيس . ف الله يعين الدكاترة على مسؤليتهم العظيمة .


هذا الي عندي اليوم . ان شاء الله انكم اتعظتوا واستفدتوا .

شرايكم بالقصة الحزينة ؟
+ ودي اتكلم شوي بنبذة بسيطة عن سرطان الثدي بالمشاركة القادم ، ماهو رأيكم ؟

(5 نوفمبر )

نزولاً عند رغبة احد الأعضاء الكِرام ، بتكلم بِنبذة مُختصرة عن (سَرطان الثدِي) ..

ماهو سرطان الثدي ؟
هو مرض يصيب النساء غالباً ، وقد يصيب الرجال وهو نادراً جدا ( ويكون أخطر )، وهو اكثر انواع السرطان انتشارا بالنسبة للنساء بالسعودية ، سبب الإصابة بمرض سرطان الثدي غير معروف تماماً ، ولكن هناك عوامل تزيد بنسبة الإصابة به .

الية عمله :
" سرطان الثدي يعني ان عددا من خلايا الثدي بدات تتكاثر بشكل غير طبيعي. هذه الخلايا تنقسم بسرعة اكبر من الخلايا السليمة ويمكن ان تبدا في الانتشار (نقيلات - Metastasis) في جميع انحاء نسيج الثدي، الى داخل الغدد الليمفاوية، بل والى اعضاء اخرى في الجسم. "

ماهي اشهر العوامل التي تَزيد بنسبة الإصابة فيه ؟ (Risk Factors )
التقدم العمر ، كون الشخص عمره +50 سنة يزيد بنسبة الإصابة بالمرض .
2- وراثة الجينات ، أي: ان اذا كان احد افراد العائلة اصيب بهذا المرض - لا قدر الله - يزيد بنسبة احتمالية ان الشخص يصاب فيه اكثر من الشخص العادي .
3- الحيض المبكر ، او انقطاع الطمث بعد 55 سنة .
4- الوزن الزائد .
5- التعرض الزائد للإشعاعات .
6- الكحول .
7- عدم الإنجاب ، او ولادة اول طفل بعد سن 35 .

ماهي أعراض وعلامات الإصابة بسرطان الثدي ؟ ( مهم جدا )
1- وَرم بمنطقة بالثدي او تحت الإبط .
2- تغير بحجم وشكل الثدي.
3- إفرازات من الحَلمة .
4- انقلاب الحلمة الى الداخل .

ماهي طرق الكشف عنه ؟
1- " الكشف الذاتي " ( وهو اسهل طريقة واسرعها )
الكشف الذاتي مهم جدا جدا ، لان لو أُكتُشف السرطان مبكر يكون من السهل القضاء عليه ، بعكس لو كان بمراحله المتأخرة .
https://www.youtube.com/watch?v=ORNNvInlXcE

هذا الرابط يوضح لكم كيف الكشف ^

2- الفحص بالعيادة الطبية .
3- تصوير الثدي الشعاعي .
4- الرنين المغناطيسي
و يوجد طرق كثيرة أخرى ..


العلاج :
الجراحة، وهي افضل خيار لإستئصال الورم كامل .( اذا كان بمرحلة مبكرة )
2- الكيماوي .
3- العلاج بالإشعة .
4- بالهورمونات .
5- العلاج باستخدام سائل يستهدف الخلايا الضارة فقط .

بالنهاية انتهوا يااخواتي ، 5 دقائق قد تنقذ حياتك و حياة احبابك بالكشف المبكر . مثل القصة الي ذكرتها بالمشاركة السابقة ^ .

(لان سلامتك تهمنا .. اكشفي )

لمزيد من الإطلاع ،هذي المصادر الي اخذت منها المعلومات :
https://medlineplus.gov/breastcancer.html

https://www.webteb.com/cancer/diseas...andriskfactors

http://www.webmd.com/

اعتذر لو كان فيه قصور ، وان شاء الله تستفيدوا ، والله يحفظنا ويحفظ جميع المسلمين والمسلمات .


اذا احد عنده سؤال يسأل لايستحي وان شاء الله اقدر اجاوب ،

الى اللقاء .

( 7 نوفمبر )

حياكم الله تعالى .،

اليوم دام اني ساحب ع الدوام قلت اجي اشطح لكم بسالفة سريعية ،

كل واحد فينا بس يكبر يتذكر مواقف صارت له محرجة او غريبة حصلت له بالماضي ويضحك عليها .
اليوم و رجوعاً لعام 2011 وتحديداً لمن كنت بثاني متوسط .. حدثت لي هالقصة

كان عندنا حصة لغة عربية ( ما اذكر اي مادة بالضبط ) .. المهم
كان المدرس معصب شوي الله يجزاه خير ذاك اليوم ، بينما كان طالب من الطلاب يقرأ موضوع بالكتاب .. شوي الا المدرس قال له وقف قراءة !

قال هالكلمة الفلاني ( نسيت شنو كانت ) مين يقدر يعربها لي ؟
طبعا انا تحمست وبكل ثقة رفعت يدي اول واحد ، الا ان الاستاذ هذاك اليوم كان معصب كما أسلفت ، ف طلب من طالب جالس بالزاوية انه يجاوب .. هذاك الطلاب ماعرف طبعاً .
ف عصب عليه لان الكلمة اعرابها سهل ، ف قاله .. ( ماتشوف حسين كيف ان شاطر و مجتهد و منتبه للدرس و دائما يتفاعل و درجاته عالي و و و ... ) رفعني للسماء الزبدة ذاك اليوم حتى انا ماعرفت نفسي
المهم ، بعد ما هزأ هذاك الطالب وغسل شراعه ، قالي يا حسين يلا جاوب وعلمهم !
انا من زود ما المدرس مدحني .. شكيت بجوابي الي كنت بجاوبه ، فغيرته الى جواب ثاني وقلته !
وطلع خطأ ، وجوابي الي كنت مفكر فيه اول هو الصح ههههههه
كان الموقف جدا خايس ، مااشوف الا المدرس قالي ( افااااا ) ، شوي الا جا صوت من بعيد من نفس الطالب الي كان يهزأه قاله ( هذا حتى حسين ماعرف يجاوب شفت كيف ؟! ) .
مسكين المدرس ماعرف كيف يرقع .، قاله ع الاقل هو منتبه للشرح ههههههه .

كان الوضع محرج والله ، بس يلا الحمدلله ع كل حال .

صارت لكم مواقف كذا انتوا ولا بس انا ؟ ههههه .

الى اللقاء .

( 10 نوفمبر )

شكرا لكل من علَق ، أسعد بِحق لمن اشوف فيه تعليقات جميلة من الصباح .

دام اني معطل ، ف راح ازل التعليقات دام اني فاضي ( عندنا اجازة - وهمية - 10 ايام ) ، علما اني باخذ منها يومين فقط اجازة والباقي بذاكر فيهم للاختبار النهائي الواقع في اول يوم احد بعد الإجازة ، الحمدلله ع كل حال ..
نبدأ من الأسفل ..




1- اي والله تباً ..، انها النكبة ياصديقي ههههههههههه

2- اووووبس شييت شييت .. عييد ياصاحبي عييد هههههههههههه ، الله لا يحطنا بهالمواقف ، اصلا احلى شي الصراحة هههههههه

3- الله يسعدنا جميعا ، شكراً لكِ، ممتن لك بتعليقاتك


شكرا لكم جميعا ، ونسألكم الدعاء لي ولجميع الطلاب و الطالبات .

(23 نوفمبر )

the mind is its own place and in itself can make a heaven of hell and a hell of heaven

السلام عليكم جميعا ، كيف الحال ؟

في اشياء زحممة ودي اتكلم عنها بس للاسف ماكان مافي وقت + ماادري شابدأ فيه وشخلي

اهم شي ان امس خلصت الاختبار الي بقيت اذاكر له في الاجازة كاملة ، وطلع صعب والله ، لدرجة ان يوم طلعنا من االاختبار ماحد له خلق يراجع الاجوبة ، كل واحد قاعد يحسب كام درجة بقى له وينجح هههههه ، كنا ك ضحايا حرب ، صرعى بالجامعة ، لان اختبار الميدتيرم كان سهل جدا ف طلعوا حرتهم بهالاختبار الادارة .
الله يستر من الدرجات بس ، اكره شي ان الواحد يكون يذاكر مدة طويلة بعدين مايلاقي هالتعب يطلع في الاسئلة لانها كانت صعبة جدا .
عموما هذا كان قبل اخر اختبار بهابلوك ، بقى شوط ثاني بكرة واختبار اخير .

بعدين بيخلص هالبلوك ونبدأ بلوك جديد الاسبوع الجاي .
الشي الغربيب انه طار والله بسرعة مخيفة ، ف لازم الواحد ياخذ حسابه ان الوقت يطير والله .
والشي الثاني ان ( سَيمُر كُل مُر) فهمهما كان حالك ، ف غدا اجمل بإذن الله ، طبعا بالنسبة لي غدا اختبار بس يلا ماعليه .

الشي الجميل المبكي ، ان بين البلوكين مافي الا ويكند بس ، ف لازم اسوي شي استمتع فيه جداا عشان استثمره صح .

ف لو انكم مكاني شنو اهم الاشيا الي بستوونها بيومين بس ؟

شكرا لكم .

(27 نوفمبر )

اهلا وسهلا ..

طبعا تعليقاً ع الاجازة الي عندي الي قلت لكم عليها ف كل اللي ردوا نصحوني بالنوم
وفي أحدهم لجأ الى النوم راجياً ان يمده الله بالصبر على الاختبارات والزحمة الي عنده ، اهنيه صراحة هههههههه ، واعرف انك ( لست وحدك )

اما بالنسبة لي ف كانت الخطة اني اشوف فلم و اخلص كتابين كان بودي قِرأتهم من زمان .
ولكن ابشركم قرأت 0 كتاب و شاهدت 0 فلم هههههههه
لان انشغلت بشغلة مُهمة أُخرَوِية ،وبنهاية الويكند اخذت نصيحتكم ونمت نومة الأسد ه

عموما، اليوم بدينا البلوك الجديد مع بعض المخاوف ، وطبعا ارسلوا لنا الجدول و ع حظي طلع عندي عرض تقديمي اول اسبوع ، المواضيع هالبلوك صعبة عموما ، ولكن نقول الحمدلله ع كل حال ، يمديني اخلصه من البداية وارتاح بعدين > واضح اني قاعد اسلك لروحي .
ولكن حاليا جاتني الحالة الي اصير أفكر فيها ليه دخلت الطب ؟ وهي تجي كل فترة .
فترة وتعدي باذن الله .

اليوم ذكر لنا قصة الدكتور جميلة وفيها عبرة
الدكتور باكستاني ، ف يقول ان في باكستان كان في جراح عصبي مشهور وناجح وغني جداً وعنده ولد واحد ..
ف جاء يوم من الايام ، وجاته حالة بالمستشفى تحتاج عملية مستعجلة ، وصاحب هالحالة من دون رخصة او اي شي يدل على اسمه او معلومات عنه ، ف أول سؤال سأله هالدكتور للشخص الي قاله ان عنده حالة تحتاج عملية .. "هل هذا الشخص عنده تأمين طبي " ؟ ف قاله الشخص " لا يوجد اي معلومات عن الشخص المصاب لان ماحصلنا اي اثباتات له " ف قالهم الدكتور ، اجل مافي عملية خلاص صرفوه .

اي نعم ، المصاب كان ولده الوحيد واهو تخلى عنه واهو مايدري لان كان يعتقد ان ماعند تأمين طبي او فلوس . طبعا دكتورنا يقول ان هالدكتور استجن وترك ثروته وكل مايملك و هرب الى مكان ماحد يدري عنه .

ف الرسالة هنا ، ان مهما الله رزقك من فلوس لازم تتذكر ان الهدف الاساسي من مهنة الطب اهي معالجة الناس سواء كانت فقيرة او غنية او مهما كانوا ، و ان الدنيا دوارة فلربما اهو موت احد فقير من قبل لان ماعنده فلوس ، ف الله ابتلاه .

ترددت اني احطها هالقصة اولا ، ولكن قررت اني اكتبها

.
.
صحيح في شي اخر غريب ، كل الناس الي يتابعون the walking dead فجأة صاروا يحطون صورة شخصية وحدة ، اشغلونا فيها ، في كل مكان موجودة صورة نفس الشخصية .
شي مثير للغرابة .

شكرا لكم .

( 30 نوفمبر )

it's just another bad day

اليوم كان عندي برييزينتيشنين ( عرضيين تقديميين ) واحد حق هالبلوك الي كنت اتكلم عنه ^ ، والثاني إعادة للإختبار البريزينتشن النهائي الشي المضحك اني ماخذ 9.9 بالبلوك الأول ولكن بالاختبار النهائي مانجحت ، والسبب مو تقديمي للبريزينتيشن، السبب الاسئلة الي كانت فيه .. وتفاجأت ان 6 راسبين غيري و 5 منهم من نفس دكتوري .،
المهم مو بالبريزينتشن الي عدته ( لان عدته بشكل سهل و سألوني اسئلة سهلة وقالوا لي امورك طيب )

المشكلة بالبريزينتشين الي حق هالبلوك الأساسي ..
طبعا موضوع البريزنتيشن عرفته يوم الأحد وقررت اني اسويه الأثنين ، الا ان يوم الاثنين جاتني رسالة ان عندي اعادة اختبار للبريزنتيشن النهائي ف ضاق خلقي و بدأت اسوي البريزنتيشن حق البوك يوم الثلاثاء ( علما ان لازم اقدمه الأربعاء )

ع العموم .. ، كان تحضيره اصعب بكثير من ماتوقعت لان الدكتور عطاني اشياء ابحث عنها خارج المحاضرات الي يعطوننا اياها ..، وكان الموضوع جديد وصعب .. ف قررت قرار اتضح لي انه خاطئ بعدين .

قررت اني اسحب عالاشيا الي قالي الدكتو راضيفها بالبريزينتشين واعتمد ع المواضيع الأساسيه لان مافي وقت + صعب فهمها و تنظيمها بالبريزنتيشن ، قلت بعتمد 100% ع ادائي ولا بيحس اني خطرت المواضيع الي قالي اضيفها عالبريزينتيشن .

ف الكارثة حدثت ان بعد ماخلصت البريزنتيشن قالي ادائك كان ممتاز ، ولكن المواضيع الي اتفقنا عليها ماحطيتها !! انا يوم قالي كذا انجلطت .

وقام يسألني عن المواضيع واحد واحد ، ولا عرفت شي منهم ، - ببساطة لاني مابحثت عنهم لان ماكان فيه وقت لان كان مالي خلق ابدأ مبكر - .
لذلك نزل درجتي علما بان ادائي كان ممتاز ولكن المحتوى كان غير المطلوب ، ف خطتي ماضبطت ونزل درجتي و زاد همي .

ولكن الحمدلله ع كل حال ، الواحد يتعلم من اخطائه عموما .

بس والله حبيت افضفض بعد هاليوم الشاق والطويل . وشكلي بشوف فلم ز
والحين مالي خلق اذاكر شي ،

(1 ديسمبر )

اهلا ..

اولا .. اعتذر للي بالتقييم ودي ارد عليكم جدا ولكن مافيه وقت ، وانا أسعد جدا بماتكتبون حتى ولو انه كان رقص ع جراحي هههههههههههههههه

اليوم تكملة نكبة امس..،
تفاجأت اليوم، يوم رحت الجامعة و وقفت السيارة شف واحد من الشباب ..
جا سلم علي واهو متفاجئ جدا .. قالي : "حسين!!.. صج الي سمعناه ؟! يقولون انك عايد اختبار بس انا ماصدقت ، شلون واحد مثلك يصير له كذا ؟ "
انا ابتسمت وقلت له : "كيف عرفت ؟"
قالي :" الأخبار تنتشر بسرعة بالكلية هههههههه وخبرك منتشر "، انا صرت كذا
ولكني ابتسمت بعدين لسببين ..، الأول ان المفروض ان ماحد يدري ،علما ان انا ماعندي مشكلة اذا درى احد لاني ولله الحمد واثق من نفسي ولكن المشكلة ان انا من يوم ماجاتني الرسالة من المسؤل ماخبرت احد فكيف درى هذا الشخص ودروا كل الطلاب ، ماادري ؟!

الشي الثاني ..، قلت اكيد احد الي جاهم الإعادة معي كان يبي يرقع الشي الي صار ف قالهم ترى " حتى حسين " جاه reset عشان مايحس انه الوحيد ويلومونه ، وطلاب الجامعة ماخذين فكرة عني اني دافور فعشان يثبت لهم انه تصير لاي واحد عادي ابلشني بالموضوع ، الحمدلله ع كل حال .

الخلاصة ، استغربت و عرفت ان صحيح الواحد مراقب بالجامعه ، مع اني احرص كل الحرص اني مااقول درجاتي حتى لربعي الي امشي معهم ، الا ان في ناس تحسب وراي

شكرا لكم .

(7 ديسمبر )

اليوم بما اني فيني النوم و تخرط جولي اليوم و مو قادر اذاكر قلت خليني اجي ادردش بمدونتي الجميلة شوي ..

اهلا وسهلا كيف حالكم ؟ ان شاء الله كلكم بخير وتجيبون دراجات عالية >> واضح اني مقهور هههههههههه

كما كنت اردد من قبل فان هالبلوك مزدحم بالمحاضرات جدا ، ومحاضراته كثير وصعبة ويصعب فهمها لانها عن ( الجهاز المناعي ) و هو موضوع اول مره ناخذه و دسم جدا ..،
ف من كثر ماهو صعب ، انا متقوقع بملجئي ( غرفتي ) و ربعي طبعا يطلعون ويستانسون وانا قاعد اسولف واضحك مع الكتب الي اذاكرها هههههههههههه

عموما .. هالشي خلاني اتضايق جدا ، لان الوضع يخوف المحاضرات كثيرة ومااعتقد ان يمديني اخلصها كلها قبل الاختبار النصفي ( الميدترم ) ولا اني قادر افهمها لمن يشرحها الدكتور ، ف ظليت كام يوم افكر شسوي وكيف ان بدبر وضعي وان الحالة صعبة لاني مو فاهم المحاضرات + ضغط بالعدد + مافي وقت افكر فيه اصلا الا أني ..

التقيت (بالصدفة ) بأحد الطالب الي أكبر منا بسنة وهو يتكلم مع بعض من زملائي على هالبلوك ، ف قال ان هالبلوك صعب جدا كان بالنسبة له و ماقدر يتدارك الموضوع هو اصلا فيه وكيف معاناته كانت ( مع انه معروف هذا الشخص انه من أشطر الطلاب الأوائل بالمدرسة كان ولازال بالجامعة ) ف هنا أدركت اني مو انا لوحدي احس بهالشي ، وانه شي طبيعي كل الطالب يحسون فيه، ف تغييرت نظرتي للموضوع بعد ماحسيت ان العيب مو فيني يعني ..
ف تغيرت نظرتي تماما ، و تطمنت ولله الحمد وضبطت جدول اذاكر فيه عدل وأدركت ان الواحد يحتاج اصدقاء يشجعونه ويدلونه دربه ويمسكون بيده اذا سقط ..

كما حدث لي مره من المرارير و في يوم من الأيام ..
كنت ب برنامج صيفي لأرامكو ( ادرس انجليزي مع مكافأة 2500 ريال سعودي )
الزبدة ان كان فيه مسابقة عن فن الخطابة الإنجليزية (toastmaster ) و طبعا الاستاذ رشحني عشان اشارك بالمسابقة وكان الموضوع عن البيئة .. فكان فيه حول 7 منافسين وانا ال8
ف جا الموعود وبدأت المسابقة .. دخل الأول و قال الي عنده ، و دخل بعده الثاني ونفس الشي ، والثالث ونفس الشي ،يوم جاء المنافس الرابع ، دخل القاعة .. ولكن ارتبك لان الجمهور كثير والخطاب الي بيقوله بالانجليزي ف ارتبك و ماعرف يقدم وطلعوه ..
المهم باقي المنافسين وانا منهم قدموا الي عندهم وجلسوا بعد ، يوم خلصنا كلنا رجعوا جابوا المنافس الرابع ( الي ارتبك ) - يعطونه فرصة ثانية - ف بدأ بشكل كويس اول دقيقتين .. شوي ولا نشوفه بدأ يتأتئ و يرتبك ويتخبط ..

انا شفته بهالحال .. فقمت أأشر له والوح له بيدي وكأني أقوله ( أختم خلاص ) واهو يزيد ويتوتر وانا الوح بيدي واقوله ( اختم خلاص ) والا بنفس اللحظات الي جالس جنبي مباشرة كان يسوي العكس تمااما ، كان يشجعه و يقوله :" كويس كمل كمل .. يمديك "
ف صار الموقف مضحك ومبكي .. انا كنت أقوله أختم عشان يحفظ بقية ماء وجهه ( أو على حسب ماكنت أظن ) والي جنبي مباشرة كان يشجعه ويدفعه للأمام .
فكان اثنين قباله بردود فعل مختلفة ، واحد بنصحه للتوقف ، والثاني يشجعه ويدفعه للأمام .
طبعا انتهى من كلامه المتنافس وجلس .
انا بعد ماخلصنا تأملت الموقف وعرف اني كانت حركتي خطأ ، وتصرفي كان جاهل وتندمت عليه .

ف هنا رسالتين /
الأولى : رؤيتنا للأمور من جانب اخر قد لا تغير الواقع ، ولكن تجعلنا نتعايش معه بشكل أفضل .
الثانية : ثق بنفسك وقدراتك ، وصاحب اصدقاء تتكئ على اكتافهم وقت المصاعب ويدفعونك للأمام في وقت ضيقك ..

اسف على الإطالة ، شكرا لكم .

(10 ديسمبر )


(Genius is one percent inspiration and ninety-nine percent perspiration)

اهلا جميعا ..

في تعليق وصلني قبل كام يوم خل وجهي يصير كذا ،ولكنه أسعَدَنِي بِحق .



تفاجأت ان في احد بالطب هنا ويفهم الي قاعد اكتبه ، لاني كنت احاول ابسط الاشياء الي اقولها قد مااقدر .

عموما .. شكرا من القلب على النصائح ، بالنسبة لليوتيوب صحيح 100% كلامك،فَ فِي مقولة مشهورة عندنا بالكلية وهي ( اليوتيوب يُخَرِِج أطباء ) ف صحيح هو مفيد جداَ .
عجبتني فكرة الرسم جدا ، وَ بعتقادي انها نصيحة لطيفة جداً مافكرت فيها من قبل .، وراح أطبقها باذن الله أكيد ، وان شاء الله توضح الامور اكثر . شكراً لكِ وممنون لِلطفكِ وتعليقك ،

___

أحس اني صاير اتحلطم كثير هنا ، ان شاء الله بحاول اخفف شوي و اطرح اشياء سعيدة غير الشكوى والتجارب السيئة الي تحصل لي في المشاركة القادمة

عموما..
قبل يومين طلعت درجات البلوك الأول ، بعد مذاكرة حول 40 محاضرة و فحط الكتب، طلعت النتيجة وكانت للأسف مخيبة ، نجحت بالبلوك بدرجة اقل من ماتوقعتها .
ولكن مالمت نفسي ابداً ، لاني الحمدلله بذلت قصارى جهدي بالمذاكرة وتعبت ، سحبت ع ربعي و ع أهلي وانعزلت بالغرفة طلباً للمجد والتفوق , ولكن الأمر لله من قبل ومن بعد .
الشي الي ضايقني شوي و خلاني استغرب ، ان في واحد مهمل ودائما يجي متأخر عن المحاضرة 15-30 دقيقة وقليل انه يذاكر ..،كانت درجته مقاربه جداً للدرجة الي جبتها انا (مو سالفة اني اتمنى له سوء او ودي انه ماينجح، لا والله ، سَعدت لأجله ، الحمدلله ان الله وفقه ومشى وضعه ولكن ، أستغربت من الي حصل جداً ، يعني كأن جهدي كله كان ماله داعي طار هباء منثورا . اذا انا الي احضر المحاضرات واذاكر، درجتي قريبه من المهمل الي مايذاكر ويطلع ويستانس ، ف هالشي يجلط كان .
لذلك عزمت اني أغير طريقة المذاكرة لان قد يكون اني باذل جهد و وقت بالمذاكرة ولكن بطريقة خاطئة ، ف بنشوف شيحصل .

الشي الي استغربت منه ، اني كنت أظن ان مقولة توماس أديسون " العبقرية 1% الهام و 99% جهد واجتهاد " كلام فاضي وأظن ان مقولة ( الطالب يكون إما شاطر كسول او غبي مجتهد ) هي الصح .
الا ان الي أثار استغرابي ان الي جاب أعلى درجة بهذا الإختبار ( صار الأول على الطلاب ) واحد أعرفه شخصياً .، ماعنده من الموهبة او الذكاء الفطري من شي ،ولكنه كان مجتهد ويحفظ كثير .. ف كسر جزء من القواعد الي حاطها برأسي وأثبت مقولة اديسون لي .


ولكن بَقي سُؤال يؤرقنِي و يسرق الأحلام مِن عيني .. هل مافعلتُه كَان خاطئ؟ هل وهبُ الحياة للطب والإنعزال خَطِيئة يُعاقِب الله عليها ؟،

الحمدلله حمداً كثيراً ،شخصياً ..أؤمن ان كل الامور الي تحدث لنا تكون لصالحنا مهما بَدت قساوتها .

مأادري شنو رسالة اليوم

كونوا بخير