كوسه بالمصري

الكوسه
لست معارض أو أكره الكوسه أو المسمى العلمى ليها اللى هو الوساطه
ولكن الكوسه كخضار مظلوم معانا فى مصر جدا مع انه المفروض النبات ده يبقى متصان ومحفوظ حقه فى مصر بالذات لأنه نبات عزيز على قلوب المصريين ( بصفه عامه ) وعزيز جدا على قلوب حكومتنا ( بصفه خاصه جدا )
وبرغم مانحمله من حقد وضغائن لهذا النبات لكن لازم نبين اد أيه هو مظلوم معانا
والحكايه تبدأ لما الكوسه بتكون نبته فى الارض مظلوم
بنسقيه بميه الصرف الصحى مع أننا (على حد ذاكرتى ) عندنا نيل فى مصر لكن هنعمل أيه ما أحنا كمان بنشرب منها هنقول ايه فى النهايه اسمه ( كوسه )
وبعدين نرشه بسماد مسرطن وغير صالح بس برده هنعمل ايه ما كل النباتات زيه لكن هو طبعا ليه وضع خاص عن باقى النباتات كفايه أسمه ( كوسه )
وبعدين نطبخه وناكله احنا وولادنا وولادنا تموت بسبب الامراض اللى جات للكوسه من الميه وغيرها ونييجى ندخلهم مستشفيات عشان نلحقهم بس مالهمش مكان فنقول السبب ( الكوسه )
ولو ربنا كرم العيال وعاشت وندخلهم مدارس عندهم امراض بسبب اكلهم للكوسه فابعدهم عن اولاد ال........ اللى هما ما اكلوش الكوسه ونرجع تانى نقول السبب (الكوسه)
سيبكم مننا ومن ولادنا فى النهايه نولع ونستاهل عشان كلنا ( الكوسه)
لكن سؤالى هل وزراء مصر الحاليين اكلوا كوسه من بتاعتنا وهل أسماهم ليها علاقه بأكل الكوسه
مثلا
رئيس الوزراء / أحمد ( نظيف ).. والبلد كلها زباله
وزير الشئون القانونيه / ( مفيد ) شهاب.. هو فعلا مفيد بس مفيد للحكومه وبس عايز قانون جديد طوارى بقا اعتقالات قانون عمل جاهزين يامعلم
وزير الداخليه/ حبيب ( العادلى ) . . العادلى واخدين بالكم معايا أيوه صحصحوا كده
وزير البترول / ( أمين ) سامح فهمى.. ونعم الامانه فلوس البترول مغرقاته
وزير التعاون الدولى /( فايزه) أبو النجا.. ربنا يجعلها على طول فايزه انشالله حتى بفرق جول واحد بس اللى نفسى افهمه هى بتلعب فى فريقنا ولا فريق تانى . مش المهم المهم التشجيع
وزير البيئه / ماجد جورج (غطاس).. وادينا غاطسين فى بلعات الصرف الصحى وكله من اجل البيئه
وزير التجاره والصناعه / (رشيد) محمد (رشيد).. والتكرار يعلم ال .......
وزير الماليه / يوسف (غالى).. لا تعليـــــــــــق
هل لاسماء الوزراء علاقه بالكوسه ولا للاسم دور فى عمليه الاختيار
ام أن هناك فرق بين كوستنا وكوستهم
والله ظلمنا الكوسه كتير
وشكرا