اجمل ما قيل عن الوطن

يا ماي الزلال وعالحصو مجراه
يا طعم الفرات أو سايغ اشمحلاه
يا ريحة العنبر والمسج وياه
يا نخل عيط وشامخ اشمعلاه
يا فرحة فطر للصايم بدنياه

******************

تبقه أنت النِفَس بيه تِرد وتروح
وضماد ودوه ومرهم يداوي جروح
بريحة رازقي وقداح من تفوح
كهوة مهيلة مُره ترد الروح
مشراكة شتة للي يصيح اشاه

******************

يا نخوة زلم من تصعد النخوة
يا هوسة عشاير والفشك دَوَّه
يا بيرغ معلك أبد ما يهوة
يا حِنَّة الفاو بأيد كل حلوة
يا لهفة امفارك من يلاكي اهواه

******************

اتيه من الفخر من أسمع بطرواك
وآغمض العين حتى اتلذذ بذكراك
واصيح افيش ريحك, يا وطن محلاك
ولحد الموت يا عراق ما أنساك
ولا تشغلني عنك الونات والآه

******************

عراقي اللي كتب كبل اليكتبون
وعراقي أول من وضع قانون
وعراقي العلم الناس اليزرعون
وعراقي العَجَلَة علَّم يصنعون
حكهه من تموت بالغيظ كل عداه

******************

عراقي ومجده من بابل وآشور
وسومر التتغنى بحضارة أور
تغذه بفكر أبو الحسنين بالنور
وبثورة أبو السجاد لبعاشور
كل طيب وفخر بعراقنا تلكاه

******************

مو حكه العدو من يحرك المتحف
وآلاف الوثائق والتحف يتلف
وبنهب بالمخازن يتبرّه ويحلف
لأن أحنه الأوائل وهو متخلف
مثل هذا العمل هو لاكو ما سواه
وضعف النفوس وقلة الأيمان
وابطال الحواسم هدموا البنيان
مكبسِّل مسلَّح يترنح ونعسان
يفخخ يخطف ويبجي على ليلاه

******************

اتأمل وكت وتزول هالغمة
وتصبح هالطوائف كلها ملتمة
تخلص للعراق وخير هاللأمة
وبصحوة ضمير وحساب للذمة
نعمر بالبلد ونعلي مبناه

******************

اصبر يا عراق الخير بس اصبر
تداريج العوافي اتجيلك وتكثر
موش بيوم بيت الله انبنه وازهر
نتحزم جميع ونبني ونعمر
بس ننوي بصدق والعونه من الله

******************
وان شاءالله تتحسن الاوضاع ابلدنا الغالي وتزول الغمه عن هاي الامه ونعيش كلنا ايد وحده طبعا بوجود مثل وجوهكم الطيبه
كولو وياي
امين

تحياتي لجميع اعضاء منتدى العاشق

موضوع حلو جدا جدا
تشكر ع المجهود
تقبل مرورى

مشكوورر يا اخوي على الموضوع الحلو

قصيده وطنيه روعه