اللي يبي يرحل ترا الباب مفتـوح

ما كل فرقى عقبها دمع وجروح
بعض الأوادم في فراقـه مسـرّه

اللي يبي يرحل ترا الباب مفتـوح
ماني بشاري خاطر أنسـان مـرّه

ماعاد تفرق من يجي من هو يروح
بس المهم من راح يقفـي بشـرّه

لا أبتبعه شرهه ولا أقول مسموح
وله مني أنّـه مـا تجيـه المضـرّه

ماني بناقص دوخة الراس والبوح
لـه ساعـةٍ لا جــات لله درّه

واللي سكن بالروح للحين بالروح
ماغيّرت سـود الليالـي مقـرّه

اللي عليه الشعر والنثر والبـوح
هذاك يبطي عاذلـي مـا يغـرّه

تبقى معي ذكراه من وين ما أروح
وتبقى عيوني تحتفل فـي صـورّه

يا كثر ما قالوا على غير مصلوح
ويا كثر من جاني عليـه يتشـرّه

مادندنوا مثلي مع ساجع الـدوح
ولا عدّدوا مثلـي نجـوم المجـرّه

ياعاذليني والصبر ثوب مفضـوح
متفتـقٍ بالستـر وشلـون أزرّه

لو كل مملوحٍ يعـوّض بمملـوح
ما كان له بيـن المعاليـق جـرّه