الي كل انسان (يائس , حزين , مخنؤق )

المهم وأنا رايح للعالم الأفضل..ومش عايزة أروحله لوحدي عايزة آخدكوا معايا طبعا..
بس الأول لازم نعالج نفسنا الأول عشان نوصل للعالم الأفضل..
بس المشكلة إني وأنا في الطريق إكتشفت إن إحنا البشر طبيعتنا مأساوية..وممكن أتفه حاجة تنكد علينا وتهبط معنوياتنا..
وتخلينا نرجع خمسين خطوة ورا بعد ما كنا إتقدمنا مية خطوة وقربنا من العالم الأفضل
لإن نفوسنا الضعيفة إلي بنعالجها لسه في مرحلة العلاج وممكن تتأثر بالميكروبات إلي حواليها في أي لحظة وترجع حالتها تسوء تاني
يعني مثلا" تبقى صاحي مبسوط ونشيط و تشغل التليفزيون..
تلاقي مغني الله يسهله جاي يغني ويقلب عليك المواجع عالصبح ويقول:
(الشعر إتحنى بريق ألماس والقلب باقيله كتير إحساس..طول عمري مش عايش ليا وباعيش لناس غدرت بيا في حزنهم ياما إتألمت وفي فرحهم ضحكوا عليا.....إلخ) وفي آخر الأغنية يسأل ويقول: (عشت الحياة ولا عاشتني)؟
وإحنا طبعا نسمع الأغنية ونتغم ونتأثر ونعيط آل عشان يعني الكلام ينطبق علينا
نيجي نغير المحطة نلاقي أغنية بتقول (الأيام الحلوة بتعدي في ثواني..الأيام الحلوة مابترجعش تاني) وإحنا نسمع ونعيط وننف ونعيط
يجيلنا إكتئاب ننزل من البيت نشم هوا..نركب التاكسي نلاقي الأغنية بتقول: ( كتاب حياتي ياعين ماشوفت زيه كتاب..الفرح فيه سطرين والباقي كله عذاب)
وإحنا نسمع ونعيط وننف ونعيط
وكل ده بيأثر فينا ويخلينا نرجع خمسين خطوة لورا بعد ماكنا قربنا مية خطوة قدام من عالمنا الأفضل
عارفين ليه؟ عشان إحنا نفوسنا ضعيفة بتتأثر بالعبارات الإنهزامية بسرعة
يعني أنت أثرت فيك كلمات أغنية حسيت إنها تنطبق على حالك وخلاك تنهزم وتحس بالضعف..
ياااااه قد كده أثر فيك كلام أغنية عشان كلماتها تنطبق على حالك
طيب ياترى أثر فيك كلام ربنا لما قال في الحديث القدسي (يا إبن آدم لا تخف من ذي سلطان ما دام سلطاني وملكي لا يزول . لا تخف من فوات الرزق ما دامت خزائني مملوءة لا تنفد . خلقت الأشياء كلها من أجلك وخلقتك من أجلي فسر في طاعتي يطعك كل شيء . لي عليك فريضة ولك على رزق . فإن خالفتني في فريضتي لم أخالفك في رزقك إن رضيت بما قسمته لك أرحت قلبك وإن لم ترض بما قسمته لك فوعزتي وجلالي لأسلطن عليك الدنيا تركض فيها كركض الوحوش في البرية ولا ينالك منها إلا ما قسمته لك وكنت عندي مذموما) هتقول لي آه أثر فيا طبعا الكلام ده أنا متدين و بأعرف ربنا كويس وبصلي والحوارات دي؟ هاقولك العبادات مش موضوعنا
أنا بتكلم عن الإحساس نفسه..
حسيت بالكلام ده؟
حسيت بإن ربنا معاك بيكلمك وبيطمنك؟
بيقولك ماتخافش أنت مش لوحدك أنا معاك؟
أنت لو حسيت بالإحساس ده.. لو ملأ قلبك الإحساس بالثقة إنك مش لوحدك وربنا معاك بجد.. ساعتها أضمنلك إن مافيش عبارة أو موقف أو أي حاجة تقدر تحطمك
ودي أول خطوة نحو العالم الأفضل:
حس إن ربنا معاك حسها أوي
أوجس موسى في نفسه خيفة ثلاث مرات: الأولى:عندما دخل ديوان الطاغية فرعون، فقال: ( إننا نخاف أن يفرط علينا أو أن يطغى) ، قال الله: ( لا تخافا إنني معكما أسمع وأرى ) وحقيق بالمؤمن أن تكون في ذاكرته وفي خلده: لا تخف، إنني أسمع وأرى. والثانية: عندما ألقى السحرة عصيهم، فأوجس في نفسه خيفة موسى
فقال الله تعالى: ( لا تخف إنك أنت الأعلى ) الثالثة: لما أتبعه فرعون بجنوده، فقال له الله: ( اضرب بعصاك ) وقال موسى كلا إن معي ربي سيهدين )
قد إيه إحساس جميلة أوي لما بتبقى واثق إن ربنا معاك
تاني خطوة نحو العالم الأفضل
ماتفكرش في المفقود وتنسى الموجود
قال النبي صلى الله عليه وسلم ( من بات آمنا في سربه، معافى في بدنه، عنده قوت يومه، فكأنما حيزت له الدنيا بحذافيرها )
يعني لو إنت عندك الصحة والبيت الآمن والأكل يبقى أنت عندك خير الدنيا كله، وناس كتير عندها النعم دي بس للأسف مش حاسين بيها
معظمنا عندنا الحمدلله أعضائنا كاملة وحواسنا سليمة ومافيناش أي إعاقة الحمدلله
ومعظمنا الحمدلله ماعندهوش مرض خطير في جسمه
ومعظمنا الحمدلله عندنا بيتنا وأسرتنا ولقمتنا
ومعظمنا بردو بيقول أنا أتعس إنسان في الدنيا..مافيش حاجة حلوة في حياتي..
للأسف في حاجات كتير مابنحسش بقيمتها غير لما نفقدها؟
حاول تحس بالنعمة قبل ماتفقدها
تالت خطوة نحو العالم الأفضل:
ماتستمعش لكلام الناس اللي نفوسها ضعيفة وتتأثر بيه..
ال ايه كتاب حياتي ياعين الفرح فيه سطرين والباقي كله عذاب
ياشيخ إتق الله في نفسك وإفتح كتب غيرك وهتعرف إن كتابك أحسن من كتب ناس كتير كتبهم أحسن من كتب ناس كتير تانية كتبهم أحسن من كتب ناس كتير تالتة....وهكذا
والتاني ال يقول إيه الشعر إتحنى بريق ألماس
ياحج لو الحزن شيب شعرك أصبغ شعرك أسود وطلع للحزن لسانك
وبعد كده ال يقول إيه عشت الحياة ولا عاشتني؟ ياشيخ إتق الله في حياتك والحياة أصلا هتعيشك إزاي وأنت ميت من اليأس، دي لو الحياة عاشتك أكيد هتموت من الخنقة..ومش هيبقى في حياة..فوكها ونفض للهم ينفضلك
والتالت ال ايه الايام الحلوة بتعدي في ثواني وما بترجعش تاني
ياشيخ إحمد ربنا إن في أيام حلوة أساسا..حتى أيامنا الحلوة خلينا ليها علاقة بالنكد..لاحول ولاقوة إلا بالله
أنا مش فاهم إيه الخنقة دي..بجد المفروض مانسمعش ونتأثر بالكلام إلي بيهبط المعنويات ده ويجيب الواحد ورا
في قصيدة جامدة أوي بتحرق الكلام التعبان ده كله بتقول:
كفكف دموعك ليس ينفعك البكاء ولا العويل
وإنهض ولا تشكو الزمان فما شكا إلا الكسول
ماضل ذو أمل سعى يوما وحكمته الدليل
كلا ولا خاب ولا خسر من كان مقصده نبيل
أفنيت عمرك يا إبن آدم في التأوه والحزن
وقعدت مكتوف اليدين تقول حاربني الزمن
إن لم تقم بالعبء أنت..فمن يقوم به إذن؟!
أضحى التشاؤم في حديثك بالغريزة والسليقة
مثل الغراب نعى الديار فأملأ الدنيا نعيقه
تلك الحقيقة والمريض القلب تجرحه الحقيقة
هو ده الكلام الصح إللي المفروض نسمعه ونتأثر بيه..لإن تأثيره هيكون إيجابي مش سلبي
ودول كانوا أهم تلات خطوات للوصول إلى العالم الأفضل.....
وفي خطوات غيرهم كتير يوصلونا لعالم أفضل بكتير
بس التلات خطوات دول لو إجتازتهم يبقى أنت حققت إنجاز كبير ووصلت لعالم أفضل

احترامى وتقديرى للجميع

اروع حجازي